Iamwiri seni Mwichen Sakrament

Mwichen sakrament a awora tufich ach sipwe chungeni me iamwiri ekkoch.

Mwichen sakrament ina ew fansoun sipwe angei tumun non pekin ngun me ach sipwe pwisin ekiek won ewe Chon Amanau me An we Achasefan. Nupwen sia angei ewe sakrament iteiten wiik, sia ourour fengen (nengeni Doctrine and Covenants 84:110). Nge ekkoch non ach kewe wart me pranch ra wato ar chou ika rese fen nom ikewe.

Ikkei ekkoch tufich ren ifa usun kich mi tongeni aea ena awa mi monomon ne iamwiri ekkoch me fori manauer epwe sokkono.

Anisi ne Fori Mwichen Sakrament epwe Murino ngeni Ekkewe Ka Iamwirir

Ach sipwe sisinei emon me emon ika famini me met mi auchea ngenir ina ewe aewin kinikinin ach kaeo ifa usun sipwe iamwirir. Meni epwe wor ekkoch aanen om kopwe tongeni aninis ne fori ar fenin sakrament epwe murino ren chok om kaeo usur.

Ren Mindy, emon fopun inenapen ruemon nipwe ra keran chok tee, ewe chok mecheresin an noun we fefin chon iamwiri a fori watten sokkofesenin non an mwichen sakrament iteiten wiik.

“Pokiten an punuwei we kokotun angang, a chok ngang uwa uwei noum kewe nipwe nengin ngeni fan iteiten wiik,” Mindy a awewei. “A men apekus ai upwe sotuni ne awesi unusen ewe mwichen sakrament ren ruomon semirit mi wosukosuk, nge nei we fefin chon iamwiri a pwisin finata an epwe anisiei.

“A mwot rem me anisiei ne tumunu nei kewe nengin iteiten wiik. Ren an neminewe chok mwot unukui a men auchea ngeniei me a ennetin ekisano ai aurek non fansoun nei kewe ra aosukosuk me kechiw. Ai nuku esap tongeni sinei ifa ukukun an foffor a awora watten ekesiwin atun ei fansoun non manauei. A kuna ai osupwang ren ai emon inenap mi chok kukkun, aurek, me a anisi ne fori fan epwe ew neni mi ekinamwe me pwapwa ngeni kem.”

Ekkoch Ekiek epwe Anisi Ekkewe mi wor ar Osupwang mi Affatoch

Repot sefan ngeni mwichen elter me Sou emwenin Fin Anisi usun met mi auchea ngeni chon mwichefen.
Sou emwen ra ota afanafanen mwichen sakrament an epwe wenengeni met mi auchea ngeni chon ewe mwichefen. Ika ekkewe ka iamwirir repwe feioch seni ar ausening ngeni och sokkun porous, ureni noum kewe sou emwen ena ekiek.
Ika en mi sinei pwe mi wor terin emon ika mwongo mi ngaw ngeni ewe a eppeti senir ar repwe pwapwaiti ekkewe feiochun ewe sakrament, eisinir tichikin me met kokkot epwe fis an epwe eochueno ar pekin fen. Ureni noum kewe sou emwen ekkei mettoch.
Ika emon ka iamwiri ika en mi sinei pwe a mwochunong non imw, ika nomofoch are ren chok mochomochen fansoun, tingorei noum we pisop ika ewe sakrament mi tongeni kawor ngenir me non imwer. En mi fen tongeni makkei ekkewe porous fansoun mwichen sakrament me aporousa ngenir me won ewe fon, non email, ika om churir.
Ika emon ka iamwiri mi wor noun kukkun semirit, en mi tongeni awora om aninis ne anisir fansoun mwichen sakrament.
Ika ekkewe ka iamwirir rese kon fifiti mwichen sakrament, sotuni ne weweiti me ekieki ekkoch aanen om kopwe aninis. Ika ese wor war, en mi tongeni om kopwe uweir. Ika ra mefi pwe ese wor aninis me ren ar famini, en mi tongeni tingorer repwe mommot reom. En mi tongeni fori om tingor epwe murino an epwe anisir ne mefi pwe ir mi ketiw me auchea atun mwichen sakrament.

Chechemeni, Mecheresin Mwokutukut A Nap Murinon

Ach kapas usun iamwiri, Sister Jean B. Bingham, Presetenin Fin Anisi Unus, a aitikich: “Fan ekkoch sia ekieki pwe sipwe fori och mettoch mi nap me itefouno an epwe ‘annea’ pwe epwe angang ngeni chon oruch. Nge fofforun angang mi mechrese ngeni ekkoch ra tongeni watte pungunon ngeni ekkoch—pwan ngeni kich pwisin.”¹

Non ew kukkun wart non Belgium, Evita a soun finata an epwe chiaku fan iten ekkewe wasona non fosun Spain me chon ewe mwichefen fansoun mwichen Fan. Non ew fansoun, Evita a churi emon seni ewe Dominican Republic ewe a kaeo usun ewe Mwichefen. Mi ekis sinei fosun Merika, nge Spanish ina kapasen fonuwan. Iwe Evita a finata an epwe chok neukukkkun ne chiaku fan itan non mwichen sakrament pwe epwe kon mefi kinamwe.

“Chiaku fan ekkoch a fori ai Sabbath epwe ekis aosukosuk,” Evita a apasa. “Nge ai atapwa memef ai upwe eisini ekkoch ika mi auchea ngenir emon chon chiaku a fokkun awora ngeniei ew memefin pwapwa me kinamwe ai sinei pwe ua tongeni anisir ne mefi ewe Ngun me pwapwaiti ar mwich.”

Ekkoch Ekiekin Aninis seni Mwokutukut mi Mecheres

Kapas ngeni noum sou emwen om kopwe katon ion mi auchea ngeni pwan och aninis fansoun mwichen sakrament. Are ika en mi sinei usun emon mi auchea ngeni aninis, mei eoch noum sou emwen repwe sinei usur.
Mosonoson ne mommot nupwen ka witi ewe mwich ewe poputan. Ei epwe anisi “ekkewe ekkoch mi netipechou me netipeta ir mi pweni kich”² ekkewe mi auchea ngenir ewe kinamwe mi tongeni feito seni sufon non ew neni mi pin.
Non ranin echikipin, ekieki om kopwe pwonei om achikipin me iotek ngeni emon ka iamwiri ewe epwe auchea ngeni pwan och kinamwe.
Iotek om kopwe sinei ika mi wor emon epwe feioch seni om mommot unukun ika arap ngenir fansoun mwichen sakrament are ika mi wor pwan och aanen om kopwe tongeni aninis.

Mwichen Sakrament mi Tongeni epwe ew Nenien Ketiw ngeni Meinisin

President Joseph Fielding Smith (1876–1972) a aitikich, “Mwichen sakrament ina ewe mwich mi kon monomon, mi kon pin, seni mwichen Fan meinisin.”³ Non menni napanap, mi auchea sipwe tumunu pwe meinisin ekkewe mi fiti mwichen sakrament repwe mefi ketiw me angei aninis seni ewe ngun—akkaewin minafon chon ewe mwichefen ika chon ewe mwichefen rese mwo chiwen fiti non ekkoch fansoun.

Merania seni New South Wales, Australia, a chiechi ngeni emon fefin ewe a kaeo usun ewe Mwichefen non an we wart. “Neminewe a pwan winiti emon me nein chiechiei kewe achengicheng iei.” Merania a apasa. “Ua sani ai mommot ren neminewe non mwichen sakrament iteiten wiik, me ua soun eis ifa usun me ika mi wor och mettoch ngang mi tongeni fori fan itan.” Mwirin ekkoch fansoun, chienan Merania we a papatais. Ewe achocho an chon ewe wart, pwan ewe memefin ketiw non mwichen sakrament, a watte aninisin non an finata epwe papatais.

Ekkoch Ekiek om kopwe Iamwiri Chon ewe Mwichefen mi Niwinsefanito ika Minafo

Nupwen kopwe afanafan non mwichen sakrament, en mi tongeni tingorei chienom, famini, me ekkoch repwe feito ausening om porous.
En mi tongeni nenengeni ika etiwa ekkewe ir mi anamon ika menin epwe auchea ngenir aninis. Tingor ika en mi tongeni mwot unukur ika tingorer repwe mwot reom.
Nupwen ewe mwich a sopwono, en mi tongeni tingorei ekkewe ka iamwirir me ekkoch ngeni ekkoch urumotun Mwichefen repwe fis, ngeni ewe tempel, ika ngeni ew mwichen asos.
Ika emon ka iamwiri mi fifiti mwichen sakrament nge esemo chiwen fiti non ekkoch fansoun, en mi tongeni eisinir ika mi wor ar kapaseis usun met ra kaeo. Urenir pwe ir mi ketiw fansoun meinisin ar repwe feito reom ika epwe wor ew kapas, porous, ika ekis nongonong rese weweiti. Oua tongeni kutta fengeni ponuwan ika epwe auchea.

© 2020 seni Intellectual Reserve, Inc. Meinisin pung mi kawor. A för non USA. Kapungunon non fosun Merika: 6/19. Kapungunon chiakun: 6/19. Chiakun Ministering Principles, June 2020. Chuukese. 16988 901