Nongonongen Iamwir, September 2019

Ifa usun ewe Ngun a Tongeni (me Epwe) Anisuk ne Iamwir

Ewe wisen pristut ne iamwir, mi kawor ngeni mwan me fefin, mi pachenong ewe pungun angei pwarata.

Liahona, September 2019

Sasing seni Getty Images

Ewe kokkon iamwir me angang ngeni ekkoch me pwan tong usun ewe Chon Amanau mi tongeni epwe nikinikin mi weires fan ekkoch—akkaewin nupwen sipwe anisi ekkewe sise sisineochur. Ren minion aanen ach iamwir, sia ereki ifa usun sipwe tongeni sinei ewe murinon aanen ach sipwe anisi ekkewe sia ewis ngenir.

Sisap erekitam pokiten ach ennetin achocho mi tongeni epwe emwen me ren ewe Ngun mi Fel.

“Wisemi ne iamwir mi pin a ngeni kemi ewe pungun angeni memef seni Kot.” anon Sister Bonnie H. Cordon, Presetenin ekkewe Fopun Unus. “Oua tongeni kutta ena memef ren nuku.”¹

Nupwen sia kutta ach sipwe angang ngeni ekkoch usun ewe Chon Amanau mi fori, sia tongeni emwen me ren ewe chok Ngun mi emweni I. Ei mi ennetin pung nupwen sia angang non wisach kewe, usun ren iwamir, mi fis fan ewe mumuta me ren an pisop kewe kiien pristut. Ikkei wonu kokkoten iamwir ren ewe Ngun.

Ifa usun ewe Ngun mi Tongeni nom Rei Fansoun Iamwir?

• Tingor Emwen. Samach won Nang a mochen kich sipwe porous ngeni I non iotek. Iotek ese chok mut ngeni kich sipwe arap ngeni I, nge a pwan forano “feioch Kot a fen mochen fangeto nge repwe chok fis ika sipwe tongor fan iter.”² “Nupwen sia iotek me kuttta ach sipwe weweiti netiper,” Sister Cordon a apasa, “Ua pwarata pwe Samach won Nang epwe emwenikich me Ngunun we epwe fitikich.”³

• Sisap Awitiwiti ew Amemef. Oupwe achocho. Oupwe achocho ne angang (Doctrine and Covenants 58:27), me oupwe kuna pwe ami achocho mi tongeni emwen me napeno. “Ach nikitu ren ach angang ngeni ekkoch me angang ina ew aan mi auchea ach sipwe tufich ngeni pwarata.” anon President Dallin H. Oaks, Aemonun Chon Aninis non ewe Aewin Presetensi. “Non ai kaeo ekkewe pukefel ua fen apareni pwe napengeni pwarata mi fis ngeni ekkewe noun Kot a feito nupwen ir mi mwokut fetan, esap nupwen ir mi chok momot non imwer kewe me witi an ewe Samon epwe urenir ewe aewin mettoch repwe fori.”⁴

Ifa usun Upwe Esinna Memefin Iamwir?

• Attona an Mormon Aurour. Ese namot ach sipwe chok mwot fetan me aureki ika ew ekiek mi ew memef ika apw. Esap nupwen mi nom rech an Mormon kiien sinei mi mecheres: Ika mi wor om ekiek a peseok ne fori mi och me om kopwe nuku ika anisi ekkoch ne nuku non Kraist, oupwe sinei pwe a feito seni Kot (nengeni Moronai 7:16).

• Ousap Aureki usun. “Oupwe chok mwetenong non ewe konik me aa,” Elder Jeffrey R. Holland a apasa seni ewe Mwichen ekkewe Engon me Ruemon Aposel. “No ngeni ekkewe mi nom non osupwang. Ousap chok mwoch ren ami aureki ika oupwe aaseneta ika aamunumun. Ika sipwe fori ekkei nongonong sia fen kaeo, sipwe chok nomengeni ekkewe kiien pristut, me kutta ewe Ngun mi Fel epwe emweni kich, sise tongeni tur.”⁵

Met Aanochun ach sipwe Tapweno Mwirin ew Memef?

• Mwitir. Sister Susan Bednar (punuwen Elter David A. Bednar seni ewe Mwichen Engon me Ruemon Aposel) i emon nenien appiru mi echipwer ren an tapweno mwirin aurour. Mwirin an iotek “ren ewe mas non pekin ngun epwe kuna ekkewe mi wor ar osupwang,” a nenefetan non ewe mwicheich me a kan soun “mefi ew mwokut an epwe churi ika kokkori emon aramas,” Elter Bednar a aporousa. “Iwe nupwen Sister Bednar a angei ena sokkun memef, a mwitir ponuweni me anneasochisi. A kan ina usun pwe nupwen chok ewe ‘amen’ a fisino non ewe iotekin nesoponon, a kan porous ngeni emon serafo ika foropachei emon sister ika, an tori neim, a mwitir angei ewe fon ma a kokko.”⁶

• Pwaracho. Nuokusun sisap ketiw me mefi saw, ese naf, ika mefi pwe sa aosukosuk a tongeni eppeti kich seni ach tapaweno mwirin ew aurour ne iamwir. “Non ekkoch fansoun me napanap, kich meinisin sia mefi pwe sise naf, sise fat, ika sise fich ngeni,” Elter Gerrit W. Gong seni ewe Mwichen ekkewe Engon me Ruemon Aposel a apasa. “Nge non ach nikitu ne tongei Kot me ne iamwir ngeni chon oruch, meni sipwe mefi an Kot tong me aurour fan iten manuer me manauach non ew napanap minafo me mi pin.”⁷

  Emon pwich a aporousa ifa usun an mi tiperuweru ne anisi punuwen emon fefin a sotuni epwe angeiano pwisin manauan. Nge sopwonon a tingorei ewe mwan repwe no mwongon neonowas. “Nupwen ua apasa. ‘Punuwom we a sotuni epwe angei manauan. Ina epwene kon apwosupwos ngonuk. En mi mochen porous usun?’ a wesen kechiw,” a aporousa. “Am porous a men pwetete me murino ma a fis ew arapfengen nefinem mi amwarar me apinukunuk non chok fitu minich.”⁸

© 2019 by Intellectual Reserve, Inc. All rights reserved. A för non Amerika. Kapungunon non fosun Merika: 6/18. Kapungunon chiakun: 6/18. Chiakun Ministering Principles, September 2019. Chuukese. 15770 901

Esinesin

1. Bonnie H. Cordon, “Winiti emon Chon Kuno,” Liaona, Nov. 2018, 76.

2. Bible Dictionary, “Iotek.”

3. Bonnie H. Cordon, “Winiti emon Chon Kuno,” 76.

4. Dallin H. Oaks, “In His Own Time, in His Own Way,” Liaona, Aug. 2013, 24.

5. Jeffrey R. Holland, “Ewe Angangen Achasefani,” Liaona, Nov. 2018, 77.

6. David A. Bednar, “Quick to Observe,” Liaona, Dec. 2006, 17.

7. Gerrit W. Gong, “Ach Ekein kamp ren Nuku,” Liaona, Nov. 2018, 42.

8. Nengeni Bonnie H. Cordon, “Winiti emon Chon Kuno,” 76.

An ewe Chon Amanau Nenien Appiru

Ewe Chon Amanau mi mwoneta neni An angang. “Kot a epinano Jises ewe re Nazareth ren ewe Ngun mi Fel,” and mwirin Kraist “fein fetan ekis meinisin, a fori an angang mi murinno” (Foffor 10:38). I a “ureno ren ewe Ngunupin” me fan chommong “ewe Ngunupin a emwenano” (Luke 4:1). Kraist a ennetin fein fetan ne fori angang mi murinno me mwen an epinipinino me ren ewe Ngun mi Fel, nge ren an angei ewe Ngun mi Fel me ren an annomu ena pung ngeni aurour mi ew auchean kinikinin An we Angang—usun chok mi auchea ngeni ach angang.

Etiwan Foffor

Nupwen oua fori ami iamwir iteitan ran, ennetin iotek me ponuweni aurouren ewe Ngun mi Fel. Chechemeni pwe Samach won Nang epwe efeiochu kemi me ekkewe oua iamwir ngenir nupwen oua fori!