Nongonongen Iamwir, December 2019
Met ewe Tutunapen Kirisimas a Aiti Kich usun Iamwir
“Iei ewe fansoun ewe ier a men chen. Konu ew kon; Fansoun Kirisimas epwe feito ekiseno chok. Aporousa ewe tutunapen uputiwen Jises mi rennet, nupwen, i emon monukon, a feito ngeni ewe fonufan” (“The Nativity Song,” Children’s Songbook, 52).
Liahona, December 2019
Tichikin seni Behold the Lamb of God, seni Walter Rane
Fansoun Kirisimas a ew fansoun mi amwarar nupwen siip, chon masen siip, nenien amwongon man, me fuu a sokkono wewer. Ra winiti mi auchea chon non ewe tutunapen ew me nein ekkewe mettoch mi fis mi auchea me non uruon aramas: ewe uputiwen Jises Kraist. Chommong famini ra awora ekkewe niosun an Jises uputiw me non imwer kewe. Ekkoch ra aucheani ar repwe anneani porousen Uputiwan we ika fiti ew urumwot. Usun porousen Kraist meinisin, ewe porousen An uputiw mi masow ren nesen kich mi tongeni kaeo usun iamwir, usun ach sipwe aea An saram ne asarama ewe fonufan. “Ewe tutunapen Kirisimas ina ew tutunapen tong,” Preseten Henry B. Eyring a apasa, Aruemonun Chon Aninis non ewe Aewin Presetensi.
“… Non ekkewe porousen an Kraist uputiw, sia tongeni kuna me mefi ion I me akkom me ion I iei. Ena a appanano osach non ach sai. Me epwe emweni kich ach sipwe monnukano inisich me appano osen ekkoch.”1
“Ese chuwen wor neenier non ewe imwen wasona”(Luke 2:7)
Ewe chon tumunu imwen wasona a kichingaw ne awora neenien ewe Chon Amanau, nge sisap pwan fori ena mwan! Kich mi tongeni awora ne neenien ewe Chon Amanau non netipach ren ach awora neni fan iten pwich me fefinach ren ach kewe cheipen, non imwach, me non ach oreni. Chommong orenien famini mi tongeni epwe murino me fen pwan chechemoch ren ach apachanong ekkoch aramas. Daiana me an famini mi wor ew ar oreni ne etiwa emon epwe ani Kirisimas rer. Iteiten December, ra porous fengen me finata ion repwe etiwa.2 Meni om famini mi tongeni pwan poputani ew oreni mi nonno ngeni. Eni emon ka iamwir ngeni epwe sani an epwe choni om famini ne konfengeni ekkewe konun Kirisimas oua sani. Ka tongeni pwan awora neenien emon esap wor an famini non ewe neni ren ami we mwongon faaf non Kirisimas.
Met aan epwe murino ne apwapwai ewe Chon Amanau nap seni ach tapweno mwirin An neenien appirun apachanong ekkoch? Chechemeni pwe I a etiwa “meinisin pwe repwe feito ngeni I me angei seni an kirekiroch; iwe ese amam emon epwe feito ngeni I, chon me pwechepwech, chon fotek me chon ngaseno, mwan me fefin; iwe I a chechemeni ewe ese sinei namanam; me meinisin ra nonno chok ngeni Kot, ir me ru chon Jew me chon Gentile” (2 Nifai 26:33). Awora neni me fori epwe wor chon pachenong.
“Non ewe neeni a wor ekkoch chon manmasa siip ra mammasa nour kewe pwiin siip neman non ewe pwinin” (Luke 2:8)
Mi fen fich pwe chon masen siip ir repwe nom nein ekkewe aewin repwe kapong ngeni ewe monukon Chon Amanau. Soufosun nom ra apasa pwe Jises Kraist I ewe “Chon Masen Israel” (Konupin 80:1) me ewe “Chon Masen Siip won unusen ewe fonufan” (1 Nifai 13:41). Me Kraist pwisin a apasa, “Ngang ewe chon mmasen siip, ua sinei nei kewe siip” (John 10:14). Ach sinei nouch kewe siip me tutumunur ina ew kinikinin masa me iamwir usun ewe Chon Amanau mi fori.
Ren ekkewe meretinen saram me ningen enning, mi chommong met sipwe nengeni atun Kirisimas. Nge menin watten ningochun ewe fansoun mi tongeni pwa nupwen sia chechemeni ne akunu ach ekiek ngeni ekkewe sia iamwirir me tumunu nouch kewe siip. Mammasa mi tongeni epwe wewen ach esinna met mwongo emon a kan sani ika eis usun an emon kokkoten fansoun asoso. Sia mammasa nupwen sia kuna me anisi an emon osupwang—ekkewe mi pwano me ese kon pwano.
Nupwen punuwen Cheryl we a mwitir mano, itan Mick, a fokkun riaffou. Nupwen an ewe aewin Kirisimas me nukun punuwan we a arapeto, an tipitipingaw a watteno. Nge kinisou pwe, noun we chon iamwir sister Shauna a nom ren. Shauna me punuwan we, Jim, ra etiwa Cheryl ngeni ar kewe chommmongun kukunoun fansoun asoso. Ra apareni ufan Cheryl we sekit a mesino me ra finata pwe fori och mettoch usun. Ekkoch ran me mwen Kirisimas, Shauna me Jim ra wato ren Cheryl ew nifangen Kirisimas: echo minafon sekit mi ningoch. Ir mi apareni pwe mi auchea ngeni Cheryl echo sekit me pwan met mi auchea ngeni an memmef ren pekin kinamwe me chiechioch fengen. Ra wisen fori ngeni met a osupwang ren ren tufichir me ra isetta eu nenien appiru mi amwarar usun sia pwan tongeni mamasa nouch kewe siip.3
“Ekkewe chon masen siip ra kapas fengen nefiner, Sipwe ne feinno Bethlehem” (Luke 2:15)
“Sipwe ne feinno” a ew etiwetiw mi apwapwa! Ekkewe chon masen siip rese chok ekieki pwe chiener kewe repwene kon pekus ar repwe fori ewe sai. Rese monomon ne feinno ngeni Bethlehem won pwisin ar. Ra pwapwa ne kun fengen me apasa, “Sipwe ne feinno!”
Nupwen eni sisap tongeni etiwa chienach kewe ne feito nengeni ewe monukon Chon Amanau, sia tongeni etiwer ar repwe mefi ewe ngunun Kirisimas (ika ewe ngunun Kraist) ren ar angang rech. “Ewe aanen ach sipwe anapano memefin Kirisimas ina ach sipwe kirekiroch ne anisi ekkewe mi nom unukuch me fangeno ach fansoun,” anon Bonnie L. Oscarson, akkomwen Presetenin Ekkewe Fopun Unus.4 Aneanei pwe ka kamwoch efoch kanten. Ekkoch ir mi tongeni kuna me tufich seni ewe saram seni noum we kanten, nge aneanei pwichikaran we ir mi tongeni mefi ika ka nounou noum we kanten ne keni nour kewe kanten me mut ngeni ir repwe pwisin kamwoch ewe saram.
Kraist pwisin a aiti kich pwe ekkewe ir mi tawpweno mwirin epwe wor rer ewe saramen manau (nengeni John 8:12). Angang ngeni ekkoch usun a fen fori ina ew aanen ach sipwe tongeni tapweno mwirin I me pwapwaiti ewe saram mi pwonei. Iwe sipwe aea ewe saram ren ach etiwa ekkoch repwe angang rech! Ifa usun en me ekkewe ka iamwir ngenir oupwe angang fengen? En me ir oua tongeni amwonata mwongo ami mi sani me amairu emon ren ew kukkun niffang ika mak toropwe. En me ir oua tongeni mefi ewe saram mi feito seni ami tapweno mwirin an Kraist neenien appirun angang ngeni ekkoch.
“Ra pwar fetanei ewe kapas minne ra rong usun ewe semirit” (Luke 2:17)
Mi mecheres ne aneanei ewe emmeseiken pwapwa an ekkewe chon masen siip nupwen ra aporousa ngeni chommong aramas ir mi tongeni ewe porous mi amwarar usun an Kraist uputiw. Affeteno seni chon nang, ewe Messiah ir mi oseni usun a feito! A nom ikei! Ennetin, ach aporousa fetanei ewe porous murino usun ewe Chon Amanau ina itenapen ewe tutunapen ewe Uputiw. Ekkewe chon nang ra kon. Ewe fuu a itini ewe aan. Me ekkewe chon masen siip ra pwarano ekis meinisin.
Sia tongeni apachata neuwach ngeni ewe tutunapen Kirisimas ren ach aporousa fetanei ewe porous mi murino me pwarata usun ewe Chon Amanau. “Nupwen a wor reom ewe tufich ne tupuna ewe Chon Amanau non om achocho ne iamwir, pwisin eisinuk, ‘Ifa usun ngang mi tongeni aea ewe saramen ewe kapas allim ngeni emon ika famini?‘” Sister Jean B. Bingham, Presetenin Fin Anisi Unus a aiti kich. “Met ewe Ngun a amemefi ngeniei upwe fori?”5
Ikkei ekkoch kokkot oupwe ekieki nupwen oua kutta ami oupwe sinei ifa usun oua tongeni apasa ami kapasen pwarata usun ewe Chon Amanau me An kapas allim:
-
Kutta ew uwokisin mi efi ami memef usun ewe Chon Amanau ika awewei pwata oua kinisiou ngeni I. Anneani ngeni ekkewe oua iamwir ngenir.
-
Tinano ew text ika ew porous won kampiuter fiti ew kachiton Kirisimas. Mi wor ekkoch mi amwarar won ChurchofJesusChrist.org!
-
Ureni emon chienom usun ew achechem mi auchea ika oreni mi achema ngonuk usun Kraist.
Nuku pwe ewe Ngun mi Fel epwe pwarata usun ennetin om kapasen pwarata, usun chok a pwarata ngeni Simeon me Anna pwe ewe monukon Jises I ewe chon Amanau (nengeni Luke 2:26, 38).
“Ach sipwe ennetin sufoniti an [Jises Kraist] feito ngeni fonufan, mi auchea sipwe fori met I a fen fori me anisi ekkoch non kirekiroch me chen ngeni chiechiach aramas,” Elder Dieter F. Uchtdorf seni ewe Mwichen Ekkewe Engon me Ruemon Aposel a apasa. “Ei kich mi tongeni fori iteiten ran, ren kapas me foffor. Sipwe fori ei epwe winiti ach orenien Kirisimas, ese nifinifin ian sia nom ia—sipwe anapa kirekiroch, pwan fangoch, ekisi ach apungu ekkoch, anapa kinisou, me anapa kisasew non ach aea ach pisek ngeni ekkewe mi osupwang.”6
© 2019 by Intellectual Reserve, Inc. All rights reserved. A för non USA. Kapungunon non fosun Merika: 6/18. Kapungunon chiakun: 6/18. Chiakun Ministering Principles, December 2019. Chuukese. 15773 901