Nongonongen Iamwir, April 2019

Awora Pwapwa non Ach Iamwir

Ach angang fiti tong a awora pwapwa ngeni ewe chon fangono me ewe chon angei.

Liahona, April 2019

Fan ekkoch ach kutta pwapwa non ei manau a usun ita sia wesen achocho nge sise kuna uwan ach achocho. Sia wesen achocho nge sia mefi pwe ese wor met sia fori. Me ren ekkoch, ra mefi pwe ar iamwir ngeni ekkoch mi chok pwan eu mettoch repwe fori.

Nge Semach won Nang a mochen ach sipwe kuna pwapwa me a fen erenikich “aramas ra manau, pwe repwe tongeni mefi pwapwa”2 Nifai 2:25). Me ewe Chon Amanau a aitikich pwe ach iamwir ngeni ekkoch mi namwot pwe sipwe tongeni awora pwapwa non manauach me manauen ekkoch.

Met Wewen Pwapwa?

Wewen pwapwa pwe “eu memmef mi amwarar me ameseik.”¹ Soufos seni ei fansoun soponon ra fen afata ian pwapwa a feito me ia me ifa usun sipwe kuna. “Ewe pwapwa sia mefi ese anongonong won nonnomuch kewe nge mi anongonong won met mi nom nukanapen manauach kewe,” Preseten Russell M. Nelson a apasa. “…Pwapwa mi feito seni me pokiten [Jises Kraist]. I ewe popun pwapwa.”²

Iamwir A Esenipato Pwapwa

Nupwen Liai a ani uwan ewe iran manau, a urono ngunun “ren pwapwa chapur” (1 Nifai 8:12). A aewin mochen pwe ekkewe minne a tongei repwe pwan ochoch uwan.

Ach mochen iamwir ngeni ekkoch a tongeni esenipato ei sokkun pwapwa ngeni kich me pwan ngeni ir. Ewe Chon Amanau a aiti Noun kewe chon kuno pwe uwan ach fiti I epwe esenipato pwapwa chapur ngeni kich (nengeni John 15:1–11). Ach fori An angang ren ach angang ngeni ekkoch me ach kutta aramas ar repwe feito ren I a tongeni awora pwapwa chapur (nengeni Luke 15:7; Alma 29:9; Doctrine and Covenants 18:16; 50:22). Sia pwan tongeni mefi ei pwapwa nupwen sia kuna osukosuk me riaffou (nengeni 2 Corinth 7:4; Colossae 1:11).

Ewe Chon Amanau I eu nenien appiru mi unusoch a pwarata pwe angang ngeni ekkoch ina met mi tongeni awora ennetin pwapwa non ei manau won fonufan. Nupwen sia iamwiri pwich me fefinach kewe usun chok ewe Chon Amanau, ren tong ennet non netipach, sipwe kuna pwapwa chapur mi nap seni och sokkun pwapwa.

“Nupwen sipwe etiwa [angangen iamwir] ren chengenin netip, sipwe … arap ngeni ach sipwe ew aramas Zion me mefi watten pwapwa ren ekkewe sia fen anisir won ewe anen chon kuno,” Sister Jean B. Bingham, Presetenin Fin Anisi Unus a aiti kich.³

Ifa Usun Sipwe Anapano Ach Pwapwa Ren Iamwir?

Mi wor chommong napanap minne sia tongeni anapano pwapwa ren ach iamwir. Iei ekkoch mettoch sia tongeni sotuni:

1. Weweiti popun ami iamwir. Mi wor chommong popun ach iamwir. Ennet, ach achocho epwe fiti an Kot popun an epwe esenipato manau ese much me manau fochofoch an aramas (nengeni Moses 1:39). Nupwen sia etiwa an Preseten Russell M. Nelson tingor ach sipwe anisi ekkoch won ewe annen pwon mi pin, sipwe kuna pwapwa ren ach fori ewe angangen Kot.⁴ (Ren pwan och usun ewe popun iamwir, nengeni “Ministering Principles: The Purpose That Will Change Our Ministering,” non ewe January 2018 Liahona.)

2. Oupwe iamwir fan iten ekkewe aramas esap chok pokiten mi eu mettoch sipwe fori. President Thomas S. Monson a aiti kich: “Kosap tongeni mut ngeni om kopwe atawei ew osukosuk epwe kon auchea mwen om kopwe tongei emon aramas.”⁵ Ach iamwir mi fis pokiten ach tongei aramas, esap usun mettoch mi namwot sipwe fori. Nupwen sia kaeo ach sipwe tongei aramas usun ewe Chon Amanau, sipwe tongeni mefi ewe pwapwa a feito seni ach angang ngeni ekkoch.

3. Amecheresi iamwir. Preseten M. Russell Ballard, ewe a Wisen Presetenin ewe Mwichen Engon me Ruemon Apostel, a aitikich: “Mettoch mi nap ra feito seni mettoch mi mecheres me kukkun. … Ach angang me kirekiroch mi kukkun me mecheres epwe efeiochu manauach ren ewe tongen Semach won Nang, ren ach mochen fori ewe angangen ewe Samon Jises Kraist, me ach memefin kinamwe me pwapwa iteiten fansoun sia anisi emon.”⁶

4. Ousap aurek usun angangen iamwir. Esap wisom om kopwe esenipato an emon manau ese much. Ena a nom nefinen ewe emon me ewe Samon. Wisach ach sipwe tongeir me anisir ar repwe kunu ngeni Jises Kraist, I nour Chon Amanau.

Kosap Amanga ewe Pwapwan Angang ngeni Ekkoch

Fan ekkoch aramas rese mochen tingor aninis ren met ra osupwang ren, iwe naman ach apasa pwe sipwe anisir ina met mi namwot ngeniir. Nge ese pwan pung ach sipwe echimwa aramas ar repwe etiwa kich. Mi och ach sipwe tingor akom mwen ach iamwir ngeni emon.

Elter Dieter F. Uchtdorf seni ewe Mwichen Engon me Ruemon Apostel a aitikich usun emon inenap mi nipich a semwenin rupw ika kiningaw—me mwirin noun kewe ra pwan semwen. Napengeni imwan mi nimenimoch nge a fitikoko me nimengaw. A chukuchukuta pisek me sepi mi nimengaw.

Nupwen a ennetin mefi osukosuk, ekkoch fefin seni ewe Mwichen Fin Anisi ra fichifich won ewe asam. Rese apasa, “Erenikem ika mi wor met aupwe tongeni anisikemi won.” Nupwen ra kuna nonnomur, ra mwitir chok poputa ne angang.

“Ra nimeti ewe osukosuk, ra awora saram me nimoch non ewe imw, me ra kokori emon chiener epwe uwouto mongo. Nupwen ra awesano ar angang me ra fen apasa pwe repwe feino, ra feino seni ewe kukun inenap non an kechiw—a kechiw ren an kinisou me tong.”⁷

Ekkewe chon angang ika fangono me ewe chon angei ra mefi pwapwa.

Anganga Pwapwa non Manauom

Ika sia anapano ach anganga pwapwa, kinamwe me kinisou non manauach, sipwe tongeni pwan anisi ekkewe sia iamwir ngeni ar repwe mefi ekkei memmef. Pwapwa a feito seni ewe Ngun mi Fel (nengeni Galatia 5:22me Doctrine and Covenants 11:13). A eu mettoch sia tongeni iotek ach sipwe angei (nengeni Doctrine and Covenants 136:29) me tingor epwe nom non manauach. Iei ekkoch mettoch sia tongeni fori ach sipwe anganga pwapwa non manauach:

1. Anneani om feioch meinisin. Nupwen oua nenegeni manauemi, maketiw ekkewe mettoch minne Kot a fen efeiochukemi ren.⁸ Esinna ekkewe mettoch mi murinno unukumi.⁹ Oupwe ekieki usun met a epeti kemi ami oupwe mefi pwapwa me maketiw ifa usun oupwe tongeni pworacho ngeniir ar weweitir. Non ei fansoun Paska, oupwe achocho ne anapano ami chiechi ngeni ewe Chon Amanau (nengeni Doctrine and Covenants 101:36).

2. Oupwe weweti nonnomemi. Oua tongeni mefi pwapwa non fansoun ekipwich mi mosonoson.¹⁰ Oupwe ekieki usun met a awora pwapwa ngeni kemi (nengeni 1 Chronicles 16:15). Fan ekkoch mi namwot ach sipwe asoso seni media pwe sipwe tongeni weweiti nonnomuch.¹¹

3. Osap anonno fengeni kemi me ekkoch. Aramas ra fen apasa pwe anonno fengen a sonani pwapwa. Paul a apasa pwe ekkewe aramas mi “annomu kem are anonno kem ngeni ekkewe ra ekieki pwe ir mi tekia. A ifa me tiparocher” (2 Corinth 10:12).

4. Kutta pwisin pwarata. Ewe Chon Amanau a aitikich: Ika sipwe tingor, sipwe angei pwarata me pwan och pwarata, mirit me pwan och mirit, pwe sipwe tongeni sinei ekkewe monomon me mettochun kinamwe—minne ra esenipato pwapwa, minne a esenipato manau ese much (Doctrine and Covenants 42:61).

Etiwetiwen Foffor

Ifa usun oua tongeni awatteno ewe pwapwa non manauemi ren ami iamwir?

© 2019 seni Intellectual Reserve, Inc. All rights reserved. A för non Amerika. Kapungunon non fosun Merika: 6/18. Kapungunon chiakun: 6/18. Chiakun Ministering Principles, April 2019. Chuukese. 15765 901

Esinesin

1. “Joy,” en.oxforddictionaries.com

2. Russell M. Nelson, “Joy and Spiritual Survival,” Liahona, Nov. 2016, 82.

3. Jean B. Bingham, “Ministering as the Savior Does,” Liahona, May 2018, 107.

4. Nengeni Russel M. Nelson, “As We Go Forward Together,”Liahona,April 2018, 4-7.

5. Thomas S. Monson, “Finding Joy in the Journey,” Liahona, Nov. 2008, 86.

6. M. Russell Ballard, “Finding Joy through Loving Service,” Liahona, May 2011, 49.

7. Nengeni Dieter F. Uchtdorf, “Living the Gospel Joyful,” Liahona, Nov. 2014, 120–123.

8. Nengeni Henry B. Eyring, “O Remember, Remember,” Liahona, Nov. 2007, 67.

9. Nengeni Jean B. Bingham, “That Your Joy Might Be Full,” Liahona, Nov. 2017, 87.

10. Nengeni Dieter F. Uchtdorf, “Of Things That Matter Most,” Liahona, Nov. 2010, 21.

11. Nengeni Gary E. Stevenson, “Spiritual Eclipse,” Liahona, Nov. 2017, 46.

Sia tongei aea ekkewe nongonongen ei poraus non ach chufengen ren aramas iteiten ran nge popun ekkei nongonong ar repwe anisi chon iamwir ar repwe efeiochu ekkewe aramas me famini minne ra wisen iamwir ngenir.