Ekkewe Nongonongen Angang Ngeni, June 2018
Nimu Mettoch Ekkewe mi Auseningoch Ra Fori
Ennetin ausening epwe anisuk om kopwe sinei ifa usun om kopwe anisi ne apwonueta met mi auchea ngeni ekkoch non pekin ngun me aion usun ewe Chon Amanau.
Liahona, June 2018
Elter Jeffrey R. Holland seni ewe Mwichen Engon me Ruemon Aposel a apasa: “Meni ausening a fen kon auchea nap seni kapas. … Ika sia ausening ren tong, sisapw aureki met sipwe apasa. Epwe kawor ngeni kich—seni ewe Ngun.”1
Ausening ew sinenap sia tongeni kaeo. Ausening a pwarano ach tong ngeni ekkoch, a anisi ne apochokuna nefinen aramas, me etiwa ewe Ngun an epwe efeiochu kich ren ewe niffangen tufichin apungu emon an epwe anisikich ach sipwe weweiti met mi auchea ngeni ekkoch.2 Ikkei nimu aanen ach sipwe tongeni aochueno ifa usun ach sipwe ausening.
1. Mut Ngenir Och Fansoun
Mi auchea ngeni chommong aramas och fansoun ar repwe ota ochu ar ekiek me mwen repwe kapas. Mut ngenir och fansoun ar repwe ekiek me mwen me pwan mwirin repwe apasa och mettoch (nengeni James 1:19). Iwe pokiten ra wes me kapas esapw wewen pwe ra fen apasa mettoch meinisin ra mochen apasa. Kosapw nuokusiti fanafaneno (nengeni Job 2:11–3:1 me Alma 18:14–16).
2. Ausening
Sia ekiek mwitir nap seni ekkoch ra kapas. Engino ngeni ewe mochenin kopwe forano pungun mettoch ika ekieki met kopwe apasa nupwen ra wes (nengeni Proverbs 18:13). Nge, ausening ren ewe popun om kopwe weweiti. Om penuweni epwe fokkun murino pokiten epwe ponu me ren watten weweoch.
3. Affataochu
Kosapw nuokus om kopwe eis ekkewe kapaseis epwe afattaochu mettoch kose weweiti (nengeni Mark 9:32). Affataochu a ekisano wewengaw me pwari om pwapwaiti met ewe oua kapas usun.
4. Ekiekochu
Apasa sefani met ka rong me ifa usun om weweiti ewe emon mi mefi. Ei a anisir ar repwe sinei ika ir me weweoch me a ngeni ir ew tufich ar repwe affataochu.
5. Kutta Met mi Nonnofengen
Meni kosapw tipeew ngeni mettoch meinisin ra apasa, nge kopwe tipeew ngeni met en mi tongeni me nukun om kopwe amwannano om pwisin memef. Om tipeew ngeni a tongeni anisi an epwe kisino noninen me eppet (nengeni Matthew 5:25).
Preseten Russell M. Nelson a aitikich pwe sipwe “kaeo ne ausening, me ausening ne kaeo seni emon me emon.”3 Nupwen ka ausening ren ewe popun om kopwe kaeo usun ekkoch, kopwe nonnomoch ne weweiti met mi auchea ngenir me rongorong memef ren ifa usun om kopwe tongeni tumunu ekkewe ir mi nom unukum usun ewe Chon Amanau.
Ausening Wewen Tong
Ew tutunap seni Elter Holland a awewei ewe manamanen ausening:
“Chienei we Troy Russell a sa pweteteu won wan we taraku efoch pickup seni an iwe karach . … A mefi an we taian mwirin a sata won och chukuchukuta. … A tou chok nge a kuna noun we at achengicheng tiu ierin, Austen, mi chapetiw won ewe simen. … Austen a mano.
“Ese tongeni mour, ese tongeni kuna kinamwe, ese tufich an Troy epwe kinamwe. … Nge non ena fansoun riaffou a feito … John Manning. …
“Ennetin use sinei won met kokkot John me chienan we kukkun ra chuto ngeni imwen Russell we. … Met ngang mi sinei pwe non ewe fansoun non ewe ier a no Brother Manning a angetiw me aueta Troy Russell seni ewe osukosuken ena anen taraku usun chok an we pwisin ekieta kukkun Austen. Usun ita … pwin me non ewe kapas allim, John a chok angei ewe wisen tumunun pristut me tumunu Troy Russell. A poputa ne apasa, ‘Troy, Austen a mochen kopwe uta sefan—mi pachenong won ewe nenien pasket—iwe upwe etto ikei iteiten nesosor Kunok 5:15. Kopwe monneta. …’
“‘Use mochen upwe no,’ Troy a ureniei mwirin, ‘pokiten ua kan soun uwei Austen. … Nge John a chok tiniken, iwe ua no. Seni ena aewin ran sefan, aua kapas fengen—ika fen ua kapas me John a ausening. … Akkom mi weires, nge a tameno fansoun ua apareni pwe ua kuna ai pochokun non napanapen [John Manning], ewe a tongeiei me ausening ngeniei tori an ewe akkar a tota sefan non manauei.”’4
© 2018 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/17. Kapungunon awewen: 6/17. Chiaku seni Ministering Principles, June 2018. Chuukese. 15055 901