Iamwiri
Iamwir seni Urumot non Mwichefen
Nongonongen Iamwir

“Iamwir seni Urumot non Mwichefen,” Liahona, July 2020

iamwiri

Sassingin ekkoch anuon ar aueta eu tento seni Bud Corkin; sassingin emon nengin e fori ewe chepen seni Sherie Price McFarland; background seni sassingin Getty

Nongonongen Iamwir, July 2020

Iamwir seni Urumot non Mwichefen

Taropwe seni ewe chon apungano mak: Ei article a for me mwen ewe COVID-19 semwen mi watte. Ekkoch ekkei kokkot fan resap tufich ngeni ei fansoun ren towawen nefin nge repwe fis nupwen mwichen Mwichefen me Urumot non mwichefen epwe poputa sefan. Ika mi namot, ose mochen oupwe siwini ekkei kokkot anongonong won emwenin mwichefen me emwenien muun fonu.

Eu anen ach sipwe tongeni iamwir ngeni chiechiach non wart, chon oruch, me chiechiach epwe seni Urumot non Mwichefen. Ika pwe ka okokkotu ew urumot epwe fich ngeni ika apwapwa ngeni emon ka iamwiri ika io ka tingorei epwe fiti ewe urumot ika aninis a namot ngeni ekkoch, urumot non wart, steik, ika ekkewe steik ra tongeni amonata murinon me amwararen anen aninis me apochokuna souneng.

Urumot non mwichefen a tongeni suki chommong anen iamwir. Ren awewe, Urumot non mwichefen a tongeni awora anen ach sipwe fiti angangen aninis epwe efeiochu ekkoch me awora eu nefin mi murino non muu. Urumot non mwichefen a pwan tongeni eu anen ach sipwe anisi ekkewe souneng mi apwangapwang manauen ar souneng non ewe Mwichefen me ngeni chiechiach mi sokono ar nuku ika chienach rese choni ew namanam.

Pachenong chommong aramas non Urumotun mwichefen ra awora anen an ewe Samon epwe efeiochu me apochokuna ach kewe wart me pranch, chon oruch, me ach iwe muu.

Forutan Chiechi mi Auchea

Fansoun pitapat a wareto, me David Dickson ese sinei ifa usun an epwe anisi an famini ar repwe pwichikar.

David, punuwan, me ruemon noun nengin ra keran chok eto ngeni ewe neni nukun ew sopw non Fredonia, Arizona, USA, eu neni mi tekia punun usun fonupon mi pwenino seni watten achaw mi par, sagebrush, me ira.

Ewe imw ewe faminien Dickson ra rentini rekan chok anongonong won ew sitof ren ar aea muchun ekei an epwe epwichikarer. David a mwitir ne kaeo pwe namot ioi fengenin omuchun ekei pokiten patapat non Fredonia amen wate snow me ice.

“Ese wor ai omuchun ekei ika ew ngerenger ika fen eu sinei usun aean eu!” David a apasa. “Use sinei met upwe fori.”

Ekkoch wart memper ra eisini David ika pwe mi naf an an we famini omuch ngeni ewe fansoun patapat. “Ese pwan tam ar repwe esina pwe ese wor ai,” David a apasa. “Ewe mwichen elter ra mwitir ne apasa pwe repwe anisi ei ne ioi omuch. Ua ureno ren kinisou, Ua etiwa ar repwe anisiei.”

David a mwitir ne sinei pwe ei angangen ioien omuch a fokkun monefich, tetenoch, me eu an wart urumot ra fori. Eu sosoren Amon, David, ewe mwichen elter, me ekkoch ekkewe wart memper ra feino ngeni ewe chuk non ew tettenin ekkoch pikap me sein pisek .

“Non eu chok neanowas, kinisou ngeni pisekir kewe me ar sinei-usun, wart memper ra awora ngeni ai we famini eu pinukun omuch minne a anisi kem non ruu fansoun patapat,” David a apasa. “Afen kon wesen auchea, Ua kaeo mettoch meinisin minne a namot ai upwe sinei usun ioien omuch won pusin ai. Seni ewe fansoun ua no seni Fredonia, ua sine nounoun ewe ngerengeren ira, me ua aninis non chommong an wart ioien omuch urumot nap seni ai upwe tongeni anneata.”

Eu urumot an wart ese chok anapano nefin epwe murino nefinen sounengin ewe Mwichefen nge apwan awateno murinon nefin nefinen meinisin non ewe muu.

“Ua chechemeni emon fefin, esapw emon chon ewe Mwichefen, a minefo ngeni ewe neni,” David a apasa. “Akan chok kukun an omuchun ekei akan fori fan iten imwan we an epwe pwichikar. Nupwen aua sinei usun an osukosuk, aua kan tumunu pwe epwe naf an omuch non unusen ewe fansoun patapat. Akan fokkun ennetin kinisou ese menin an epwe chiwen kapas.”

Angangen iamwir non Fredonia a anisi meinisin ar repwe tufich me pwichikar non unusen fansoun patapat.

Anisi Ekkoch

Fansoun angangen misineri non Romania, Meg Yost me chienan we rakan chok soun churi eu famini rese fefeino ngeni fan non fansoun nakatam. “Ewe faminien Stanica ir ekkewe akkaewin memper non ewe Mwichefen non Romania,” Meg a apasa, “me aua men tonger.”

Nupwen ewe fansoun aua ota me onukunuku eu an pranch urumot, ekkewe souemwen ra mefata pwe ewe pranch epwe fori eu ar “Pwinin Pioneer.” Ei epwe nekunion sipwe apwapwai ewe tipepochokun an ekkewe Pioneers ar feinno epekin ewe United States ngeni ewe Salt Lake Valley. Epwe pwan eu tufich ach sipwe afona ekkewe Pioneers ren ewe Mwichefen non Romania.

“Aua ekieki pwe epwe pwan eu an mi murino ngeni ekkoch ekkewe souneng ar repwe apasa ar kapasen pwarata usun ar ekkesiwin me ifa usun ar kuna fefeitan ei Mwichefen non Romania,” Meg a apasa. “Aua mwitir ne ekieki pwe ewe faminien Stanica repwe pwan fiti. Aua tingorer repwe fiti, me ra wesen pwapwaiti!”

Non ewe pwinin ewe urumot, ewe faminien Stanica rese awen war nupwe epwene poputa.

“Aua noninen ika resap war,” Mega a achemma. “Nge wesen chok non ewe kunok, ra tonong non ewe asam. Ewe faminien Stanica ra apasa ar kapasen pwarata ammen murino usun ewe kapas allim me ewe Mwichefen. Ra pwan churi ekkoch ekkewe memper rese kukuna fengenir non fansoun nakatam.”

Ekkewe memper non ewe pranch ra fokkun unusen pwapwa me ra etiwa ochu ewe faminien Stanica. Ewe Raninfen mwirin, Meg a fokkun mairu an a kuna Sister Stanica non fan.

“Nupwen ua churi ewe pranch fitu maram mwirin, mi chok pwan fafan!” Meg a apasa. “Ua ekieki pwe ewe fansoun e apasa an kapasen pwarata me memefin an pachonong me auchea non ewe pranch a ennetin anisi.”

4 Ekiek ren Iamwir seni Urumot non Mwichefen

  • Kokkotun Urumot mi namot: Urumot ir aan mi murino epwe anisi sokun nipwakingaw. Repwe kokkot an epwe wesen anisi an emon me emon nipwakingaw ika mwicheich. Repwe pwan anisi an ekkewe mi fiti nipwakingaw, ika fen na tufich ar repwe sisinefengenir, anapano ar kaeo usun ewe kapsa allim, ika mefi ewe Ngun mi Fel.

  • Tingorei meinisin: Nupwen kopwe ota urumot, kopwe achocho ngeni om kopwe tingorei ekkewe mi auchea ngenir ar repwe fiti an epwe anisir. Ekieki usun ekkewe minefo memper, mi patapateno, serafo, anuon me fopun nipich, aramas mi ter, me aramas mi sokono ar nuku. Anapano ewe tingorun etiwetiw ngeni ekkewe ka ekieki, me pwar ngenir usun om tongei me mochen ar repwe feito.

  • Pesepesin ar repwe fiti: Ekkewe ka etiwer repwe kaeo chommong mettoch seni ewe urumot ika pwe mi wor ar tufichin fiti. Eu anen om kopwe pesei ar repwe fiti kopwe aea an emon me emon neir kewe niffang, tongeni, me sine non ewe urumot.

  • Etiwa meinisin: Ika emon chienom e fiti eu urumot, fori ukukun om tongeni ar repwe mefi pwe ir mi pachenong me auchea. Usun chok, ika pwe ka kuna aramas kose sisinei, kopwe chiechioch me etiwer pwan!

© 2020 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/19. Kapungunon chiakun: 6/19. Chiakun Ministering Principles, July 2020. Chuukese. 16989 901