Nongonongen Iamwir, June 2019
Iamwir wewen Kuna Ekkoch usun ewe Chon Amanau mi Kuner
Jises a aunusa An fansoun ren ekkewe ir mi pwa pwe ir mi sokkono; I mi kuna ar tufich napanap.
Liahona, June 2019
Non ach achocho ne iamwir usun ewe Chon Amanau, menin repwe eis pwe sipwe iamwir ngeni emon mi sokkono seni kich. Ei a awora ew tufich ngeni kich ach sipwe kaeo me marita.
Oreni, pekin sukun, sokofesenin mwichen aramas, pekin moni, ierin aramas, mwokutukutun aramas nom me ikenai, ika pwan ekkoch sokofesen mi tongeni amecheresi ne apungu emon me mwen sipwe fen sisiner. Ei apungu me mwan ina ionapen koput, me ewe Chon Amanau a fonou kich seni (nengeni 1 Samuel 16:7; John 7:24).
Kich mi tongeni nenoi ekkewe sokofesen me kuna ekkoch usun ewe Chon Amanau mi fori? Ifa usun sipwe kaeo ach sipwe tongei ekkoch ren ennetin ir io me met repwe winiti?
Nenengeni me Tongei
Ewe Paipel a erenikich usun ewe porous mi itefouno usun ewe mwan mi pisekisek ewe a eis ifa usun epwe angei manau esemuch: “Jesus a chok nengeni ren an tongei, iwe a ereni, Kopwe fori ew chok mettoch. Kopwe feinno o amomono pisekum meinisin o kopwe ngeni ekkewe aramas mi woungaw ewe moni, iwe kopwe pisekisekino non nang, iwe kopwe ne feito fiti ei” (Mark 10:21).
Nupwen Elter S. Mark Palmer seni ekkewe Fik a kaeo ei uwokisin ekkoch ier a no, ew minafon kinikinin ewe porous a mwitir pwano ngeni I.
“‘Jesus a chok nengeni ren an tongei.’
“Nupwen ai rong ekkei kapas, ew nios mi fatafatoch a aurano ai ekiek usun ach Samon a kouno me nengeni ei anuon. Nengeni—usun ren an nenenong ren anonnon me pwereni non ngunun, a esinna murinon me pwan an tufich, me pwan esinna met mi aucheanap ngeni.
“Mwirin ekkewe kapas mi fatoch—Jises a tongei. A mefi tong mi nap me umoumoch fan iten ei anuon mi murino, me pokiten ei tong me ren ei tong, Jises a pwan tingor ekkoch seni. Ua anapanapa ita met ei anuon mi mefi an epwe foropacheno ren ena sokkun tong pwan mwo nupwen a aurour an epwe fori och mettoch mi wesewesen weires ren an epwe amomono pisekin meinisin me ngeni ekkewe mi woungaw. …
“[Ua pwisin eisiniei] ‘Ifa usun upwe tongeni ureno ren ei tong usun an Kraist pwe [ekkoch] repwe tongeni mefi ewe tongen Kot seniei me repwe mochen siwin?’ Ifa usun upwe tongeni nengeni [emon me emon unukui] non ewe chok napanap ewe Samon a nengeni ewe mwan pisekisek, me kuner ren ennetin ir ion me ion repwe tongeni winiti, nap seni ren met ra fori ika met rese fori? Ifa usun upwe tongeni winiti usun ewe Chon Amanau”1
Kaeo ach sipwe Kuna Ekkoch
Kaeo ach sipwe kuna ekkoch usun ewe Chon Amanau mi wato niwinin mi watte. Ikkei ekkoch ekiek mi tongeni anisikich nupwen sia angang ngeni ei mettoch.
-
Sipwe Sisiner
Achocho ach sipwe sinei aramas nap seni met mi pwano. Sipwe esinna pwe ach fori chiechi fengen mi tam fansoun me ennetin achocho. (Nengeni ewe toropwe ren Nongonongen Iamwir non August 2018 “Building Meaningful Relationship” ren pekin aninis.) -
Attonaochu Pwisin En
Tumunuochu kapung eni kopwe finata ne fori ika kose apareni ne fori. Attonaochu met en mi ekiekieta usun ekkoch me sotuni ne weweiti pwata en mi mefi ena sokkun memef ngenir. -
Amwochatiw Kapung
Esinna pwe nonnomun mettoch esap forata auchean emon aramas. Ekieki pwe ika en ir me ekieki ifa usun kopwe mochen emon epwe kunok ika en mi nom non ena napanap. Ach eimufeseni an emon finata me napanaper seni ewe auchear me ar tufich seni nang mi tongeni anisikich ach sipwe kuner usun ewe Chon Amanau mi kuner. -
Iotek pwe Kopwe Tonger
Iotek fan iter iteiten fansoun ren iter me ren ewe tipepos om kopwe awora ew ennetin chiechioch. Nenengeni om angang ngeni ekkoch ren iotek. Mi wor nefinen met en mi fori me met ir mi ennetin auchea ngenir?
Jises a aunusa an fansoun ren aramas seni sokopaten manau: ekkewe mi pisekisek, ekkewe mi woungaw, sou emwen, me meinisin aramas. I mi soun angei feiengawen kapung mi muan seni ekkoch nupwen ra nenengeni I me ita nonnnomun mi ngaw me ese auchea. “Iwe nupwen sipwe kuna I, esap wor ningochun pwe sipwe mochen I… Sia oput I, me sise mo afanni I” (Isaiah 53:2–3)
Kuna ren Napanapaen Kraist
Emon sister a aporousa ei porousen kaeo ach sipwe kuna emon chon oruch ren mesen Kraist.
“Julia (it a fen siwin) a nonnom unukui me usun ita ese wor chiechian. Mi soun mese netipengaw me song. Ina mwo ena, ua finata pwe upwe chiechi ngeni. Esap chok chiechiei ren ai upwe kuna, nge emon ennetin chiechiei. Ua kapas ngeni inet chok ua kuna me pwari ai pwapwaiti met chok I mi fori. Ekis me ekis, ua fori ew ririfengenin chiechi ngeni I, a wato pwapwa non netipei.
“Non ew ran, ua finata ai upwe churi Julia me eisini usun mefian an ese fifiti fan.
“Ua kaeo pwe ese wor an famini ika aramasan mi arapakan ngeni. Emon chok mwongean, ewe a tawaw seni, a kan chok kapas ngeni fan ew non ew ier won fon. Nupwen ua ausening ngeni an a wau an mangaw, song, me tipengaw usun an famini me ewe Mwichefen, ew memefin umoumoch use tongeni amam fan itan ei sister a aunusaeino mi fokkun pochokun. Ua mefi an metek me tipengaw. Ua apareni usun manauan pwe mi anamon. Usun ita ua rong ew kapas mi neukukun nukunupei: ‘Ngang mi pwan tongei. Tongei me sufonuiti.’
“Ua momot me ausening tori an ese chiwen wor met epwe apasa. Ua mefi tong me umoumoch fan itan. Ei emon sister ese sinei ifa usun an epwe mefi tong me ren ekkoch. Mwitir chok ua kon weweochuti. Ua kinisou ngeni ren an mut ngeniei upwe churi, me ua no seni ren ai foropachei me ren ai tong me sufonuti. Esap tongeni sinei ifa usun an a ku netipei ren ewe chufengen. Samach won Nang a suki mesei me aitiei pwe mi wor ai tufich ai upwe tong ren watten umoumoch. Ngang mi pochokun non ai finata pwe usap chok chiechi ngeni nge upwe pwan an famini.”
Ina ew mettoch mi pin ach sipwe ketiwenong non manauen emon. Ren pwapwa, tipepos, me aninis seni ewe Ngun, kich mi tongeni kaeo ach sipwe pwan fori ekkoch kunaen Kraist.
© 2019 by Intellectual Reserve, Inc. All rights reserved. A för non Amerika. Kapungunon non fosun Merika: 6/18. Kapungunon chiakun: 6/18. Chiakun Ministering Principles, June 2019. Chuukese. 15767 901