1 Corinto 2

Pag-unawa sa mga Espirituwal na Bagay

Ano ang mga makamundong ideya na nakapaligid sa iyo na kung minsan ay nagpapahirap sa iyo na matukoy ang katotohanan? Nalito ang mga Banal sa Corinto ng mga makamundong ideya, at sinikap ni Apostol Pablo na tulungan sila na makita kung paano sila matututo ng mga walanghanggang espirituwal na katotohanan. Ang lesson na ito ay makatutulong sa iyo na maanyayahan ang Espiritu Santo na tulungan kang matuto ng mga espirituwal na bagay. 

Paghahayag ng mga katotohanan ng ebanghelyo sa sarili mong salita. Ang paghikayat sa mga estudyante na maghayag ng mga katotohanan ng ebanghelyo sa sarili nilang salita ay makatutulong sa kanila na maunawaan ang mga alituntuning matatagpuan sa mga banal na kasulatan at makaugnay sa mga ito. Maaari ding makatulong na hilingin sa kanilang magnilay upang makatanggap ng pagpapatibay mula sa Espiritu na totoo ang kanilang mga pahayag.

Paghahanda ng estudyante: Sabihin sa mga estudyante na maghanda ng mga sagot sa mga sumusunod na tanong: Ano ang katotohanang nalaman mo sa pamamagitan ng Espiritu Santo? Paano pinagtibay ng Espiritu Santo ang mga katotohanang ito sa iyo?

Mga Posibleng Aktibidad sa Pag-aaral

“Sabihin mo sa akin kung paano mo nalaman”

Basahin o ipabasa sa isang estudyante ang sumusunod na kuwento.

Ibabahagi kalaunan sa lesson ang wakas ng salaysay.

Ikinuwento ni Pangulong Boyd K. Packer (1924–2015) ng Korum ng Labindalawang Apostol ang sumusunod:

Nakaupo ako sa eroplano katabi ang isang atheist na agad iginiit na walang Diyos kaya ibinahagi ko sa kanya ang aking patotoo. “Nagkakamali ka,” sabi ko, “mayroong Diyos. Alam ko na Siya ay buhay!”

Tumutol siya, “Hindi mo alam. Walang nakakaalam niyan! Hindi mo maaaring malaman iyan!” Nang hindi ako makumbinsi, itinanong ng atheist, na isang abugado, ang pinakamahalagang tanong sa paksa [tungkol sa] patotoo. “Sige nga,” ang patuya at mayabang niyang sabi, “sabi mo alam mo. Sabihin mo sa akin kung paano mo nalaman.”

(Boyd K. Packer, “Ang Paghahangad sa Espirituwal na Kaalaman,” Liahona, Ene. 2007, 14)

Paano mo nakita ang ganitong uri ng pagtatanong sa mundo ngayon?
Ano ang isasagot mo sa tanong ng lalaki?

Sa pag-aaral mo, pagnilayan kung gaano kahusay mong nauunawaan kung paano matuto ng mga espirituwal na katotohanan at maghanap ng mga kaalamang makatutulong sa iyong matuto pa.

Pag-aaral ng mga espirituwal na katotohanan

Naisama ng mga Banal sa Corinto ang mga ideya at gawain ng mundo sa pagpapamuhay ng ebanghelyo. Bilang resulta, marami silang nagawang pagkakamali. Sumulat si Pablo sa kanila upang tulungan silang maunawaan kung paano matuto ng mga espirituwal na bagay.

Basahin ang 1 Corinto 2:9–14 , at hanapin ang mga kaalamang makatutulong sa ating matuto ng mga espirituwal na katotohanan.

Tandaan na ang “taong hindi ayon sa espiritu” sa talata 14 ay “isang tao na pumapayag na mahikayat ng mga silakbo ng damdamin, pagnanasa, gana, at damdamin ng laman kaysa ng mga panghihikayat ng Banal na Espiritu” (Gabay sa mga Banal na Kasulatan, “ Likas na Tao ,” SimbahanniJesucristo).

Anong mga talata o parirala ang pinakamahalaga para sa iyo? Ano ang nagustuhan mo sa mga ito?
Ano ang natutuhan mo tungkol sa Ama sa Langit at sa Kanyang pagmamahal para sa iyo sa talata 9 ?
Anong mga katotohanan ang nahanap mo tungkol sa kung paano naghahayag ang Ama sa Langit ng kaalaman sa Kanyang mga anak?

Sumangguni sa tip sa pagtuturo sa simula ng lesson na ito upang matulungan ang mga estudyante habang tumutukoy sila ng mga katotohanan.

Ang isang katotohanang itinuro sa mga talatang ito ay malalaman at mauunawaan natin ang mga bagay ng Diyos sa pamamagitan lamang ng Kanyang Espiritu.

Bilang isang posibleng halimbawa ng hindi pag-unawa sa kung paano matuto ng espirituwal na katotohanan, basahin kung ano ang nangyari habang sinisikap ni Pangulong Packer na ipaliwanag kung paano niya nalamang totoo ang Diyos sa atheist sa eroplano:

Nang gamitin ko ang mga salitang Espiritu at saksi, tumugon ang atheist, “Hindi ko alam ang pinagsasabi mo.” Ang mga salitang panalangin, pahiwatig, at pananampalataya, ay pawang walang kahulugan sa kanya.

(Boyd K. Packer, “Ang Paghahangad sa Espirituwal na Kaalaman,” Liahona, Ene. 2007, 14)

Pag-aaral sa pamamagitan ng Espiritu

Sa iyong study journal, maglista ng ilang espirituwal na katotohanang natutuhan mo sa pamamagitan ng Espiritu Santo. Maglista rin ng ilang katotohanan na nais mong makatanggap ng pagpapatibay tungkol dito. Maaaring kabilang sa ilang halimbawa ang sumusunod: Ang Ama sa Langit ay totoo at buhay at minamahal ako, si Jesucristo ang aking Tagapagligtas, at si Joseph Smith ay propeta ng Diyos.

Pumili ng isa sa mga katotohanang natukoy mo at sagutin ang sumusunod:

Paano sasabihin sa iyo ng mundo na tuklasin ang katotohanan tungkol sa paksang ito?
Ano ang ginawa mo, o magagawa mo, upang malaman ang katotohanang ito sa pamamagitan ng Espiritu Santo?

Maaari mong ipabahagi sa mga boluntaryo ang kanilang mga sagot kung hindi masyadong personal ang mga ito. Kung magbabahagi ang isang estudyante tungkol sa katotohanang gusto nilang malaman, maaari mong tanungin kung may sinumang estudyante na gustong ibahagi ang kanilang karanasan sa pag-alam ng katotohanang iyon. Maaari ka ring magbahagi ng mga personal na karanasan.

Sundin ang mga pahiwatig ng Espiritu upang malaman kung makikinabang ang mga estudyante sa pag-aaral pa ng tungkol sa kung paano matuto sa pamamagitan ng Espiritu. Gamitin ang ilan o lahat ng sumusunod na resources.

Kung gusto mong matutuhan pa ang tungkol sa pag-aaral ng katotohanan sa pamamagitan ng Espiritu Santo, maaari mong pag-aralan ang ilan sa sumusunod na resources:

Galacia 5:22–23 ; Doktrina at mga Tipan 8:2–3 ; 9:7–8 ; 11:12–14, 21–22 ; at 138:1–4, 11
mga entry tulad ng “ Espiritu Santo ” sa Gabay sa mga Banal na Kasulatan , o sa Mga Paksa ng Ebanghelyo na matatagpuan sa SimbahanniJesucristo.org

How Does the Holy Spirit Guide?
What is it like to be guided by the Holy Ghost? Ordinary people share their experiences.

Sabihin sa mga estudyante na ibahagi ang nahanap nila.

Pagtulong sa ibang matuto sa pamamagitan ng Espiritu

Basahin ang sumusunod para matapos ang kuwento ni Pangulong Packer. Nang hindi tanggapin ng lalaki sa eroplano ang mga paliwanag ni Pangulong Packer, nakadama ng inspirasyon si Pangulong Packer na ipalarawan sa lalaki ang lasa ng asin:

Pagkaraan ng ilang pagtatangka, siyempre pa, hindi niya ito magawa. Hindi niya maipaliwanag, [gamit lamang] ang mga salita, ang napakakaraniwang karanasan tulad ng lasa ng asin. Muli akong nagpatotoo sa kanya at sabi ko, “Alam kong mayroong Diyos. Pinagtawanan mo ang patotoong iyan at sinabi mo [na] kung talagang alam ko, masasabi ko sa iyo kung paano ko ito nalaman. Kaibigan, kung espirituwal ang pag-uusapan, nalasahan ko na ang asin. Hindi ko kayang ipaliwanag sa iyo sa mga salita kung paano ko nalaman ito gaya ng pagsasabi mo sa akin kung ano ang lasa ng asin. Pero uulitin ko sa iyo, mayroong Diyos! Talagang buhay Siya! At dahil lang sa hindi mo alam, huwag mong tangkaing sabihin sa akin na hindi ko rin alam, dahil alam ko!” …

Mula nang maranasan ko iyon, hinding-hindi na ako napahiya o nahiya na hindi ko maipaliwanag sa mga salita lamang ang lahat ng alam kong espirituwal.

(Boyd K. Packer, “Ang Paghahangad sa Espirituwal na Kaalaman,” Liahona, Ene. 2007, 14–15)

Bakit mas mainam na pagmumulan ng kaalaman ang Espiritu Santo kaysa sa karunungan at pangangatwiran ng mundo?
Ano ang magagawa mo upang makahingi ng kaalaman sa Ama sa Langit?

Maaari mong isulat sa iyong study journal ang gusto mong gawin upang patuloy na matuto ng katotohanan sa pamamagitan ng kapangyarihan ng Espiritu Santo.

Magbahagi ng personal na patotoo ng kahalagahan ng matutuhan ang mga espirituwal na bagay sa pamamagitan ng Espiritu. Magpahayag ng tiwala na kapag nagsisikap ang mga estudyante na matutuhan ang tungkol sa Ama sa Langit at kay Jesucristo, tutulungan sila ng Espiritu.

Komentaryo at Pinagmulang Impormasyon

Ano ang magagawa ko upang matutuhan ang mga espirituwal na bagay?

Ipinahayag ni Elder Paul V. Johnson ng Pitumpu:

Ang mga sagot sa mga tanong na espirituwal ay ibinibigay sa mga taong hindi nagmamatigas ng kanilang puso; na nagtatanong nang may pananampalataya, naniniwala na sila ay tatanggap; at masigasig na sumusunod sa mga kautusan.

(Paul V. Johnson, “A Pattern for Learning Spiritual Things” [Seminaries and Institutes of Religion satellite broadcast, ika-7 ng Ago. 7, 2012], broadcasts.ChurchofJesusChrist.org)

Magagamit ba ang mga bagay tulad ng siyentipikong paraan at lohika lamang upang maunawaan ang mga katotohanan ng ebanghelyo?

Ipinahayag ni Pangulong Dallin H. Oaks ng Unang Panguluhan:

Katotohanan at ang Plano
President Oaks teaches that we should seek truth from trustworthy sources and shares some fundamental truths that explain why Latter-day Saints live as we do.

Kapag naghahanap tayo ng katotohanan tungkol sa relihiyon, dapat tayong gumamit ng espirituwal na mga paraan na angkop para sa paghahanap na iyon: panalangin, ang pagpapatotoo ng Espiritu Santo, at pag-aaral ng mga banal na kasulatan at mga salita ng mga makabagong propeta. Nalulungkot ako kapag nakaririnig ako tungkol sa isang tao na nawawalan ng pananampalataya sa relihiyon dahil sa mga sekular na turo. Ang mga taong dating nagkaroon ng espirituwal na pananaw ay maaaring magdusa sa espirituwal na pagkabulag na ang sarili niya mismo ang may gawa. Tulad ng sinabi ni Pangulong Henry B. Eyring, “Ang problema nila ay wala sa inaakala nilang nakikita nila; ito ay nasa hindi pa nila nakikita” [Henry B. Eyring, To Draw Closer to God: A Collection of Discourses (1997), 143].

Inaakay tayo ng pamamaraan ng agham sa tinatawag nating katotohanan ng agham. Ngunit ang “katotohanan ng agham” ay hindi ang kabuuan ng buhay. Ang mga hindi natututo “sa pamamagitan ng pag-aaral at gayon din sa pamamagitan ng pananampalataya” ( Doktrina at mga Tipan 88:118) ay nililimitahan ang pag-intindi nila sa katotohanan sa mga bagay na napapatunayan sa pamamagitan ng mga siyentipikong paraan. Ito ay naglalagay ng artipisyal na limitasyon sa paghahanap nila ng katotohanan.

(Dallin H. Oaks, “Katotohanan at ang Plano,” Ensign o Liahona, Nob. 2018, 25)

Kapag naghahanap tayo ng katotohanan tungkol sa relihiyon, dapat tayong gumamit ng espirituwal na mga paraan na angkop para sa paghahanap na iyon: panalangin, ang pagpapatotoo ng Espiritu Santo, at pag-aaral ng mga banal na kasulatan at mga salita ng mga makabagong propeta. Nalulungkot ako kapag nakaririnig ako tungkol sa isang tao na nawawalan ng pananampalataya sa relihiyon dahil sa mga sekular na turo. Ang mga taong dating nagkaroon ng espirituwal na pananaw ay maaaring magdusa sa espirituwal na pagkabulag na ang sarili niya mismo ang may gawa. Tulad ng sinabi ni Pangulong Henry B. Eyring, “Ang problema nila ay wala sa inaakala nilang nakikita nila; ito ay nasa hindi pa nila nakikita” [Henry B. Eyring, To Draw Closer to God: A Collection of Discourses (1997), 143].

Inaakay tayo ng pamamaraan ng agham sa tinatawag nating katotohanan ng agham. Ngunit ang “katotohanan ng agham” ay hindi ang kabuuan ng buhay. Ang mga hindi natututo “sa pamamagitan ng pag-aaral at gayon din sa pamamagitan ng pananampalataya” (Doktrina at mga Tipan 88:118) ay nililimitahan ang pag-intindi nila sa katotohanan sa mga bagay na napapatunayan sa pamamagitan ng mga siyentipikong paraan. Ito ay naglalagay ng artipisyal na limitasyon sa paghahanap nila ng katotohanan.

(Dallin H. Oaks, “Katotohanan at ang Plano,” Ensign o Liahona, Nob. 2018, 25)

Paano maipapaalam sa akin ng Espiritu Santo ang katotohanan?

Ipinahayag ni Elder Richard G. Scott (1928–2015) ng Korum ng Labindalawang Apostol:

Matututuhan ninyo ang napakahahalagang bagay sa inyong naririnig at nakikita at, higit pa riyan, sa inyong nadarama, na ipinahihiwatig ng Espiritu Santo. Maraming indibiduwal ang nililimitahan ang kanilang pagkatuto sa kung ano ang kanilang naririnig o nababasa. Maging matalino. Magkaroon ng kasanayan na matuto rin sa pamamagitan ng nakikita mo at lalo na sa pamamagitan ng ipinadarama sa iyo ng Espiritu Santo. Kusa at patuloy na sikaping matuto sa pamamagitan ng nadarama mo. Madaragdagan ang kakayahan mong gawin ito sa pamamagitan ng paulit-ulit na pagsasanay. Kinakailangan ng malaking pananampalataya at pagsisikap upang matuto sa pamamagitan ng nadarama mo mula sa Espiritu. Humingi nang may pananampalataya para sa ganoong tulong. Mamuhay nang karapat-dapat sa patnubay na iyon.

(Richard G. Scott, “How to Learn by the Spirit,” New Era, Set. 2014, 48)

Mga Karagdagang Aktibidad sa Pag-aaral

Pagpapakita ng pagmamahal para sa Ama sa Langit at kay Jesucristo

Sabihin sa mga estudyante na basahin ang 1 Corinto 2:9 , at alamin ang pinaplano ng Ama sa Langit para sa mga nagmamahal sa Kanya. Maaari nilang pag-isipan ang mga pagpapalang natanggap nila at maghanap ng mga banal na kasulatan na tumutukoy ng mga pagpapalang nagmumula sa pagsunod sa Ama sa Langit at kay Jesucristo (tingnan sa Doktrina at mga Tipan 76:50, 58–70 at Mosias 2:41). Pagkatapos ay maaaring anyayahan ang mga estudyante na basahin ang Juan 14:15 at pag-isipan ang mga kautusang mas ganap nilang masusunod bilang paraan upang ipakita ang kanilang pagmamahal para sa Kanila.

Pagiging karapat-dapat para sa Espiritu

Maaaring anyayahan ang mga estudyanteng pag-aralan ang magagawa nila upang maging karapat-dapat na maturuan ng Espiritu Santo. Maaari nilang basahin ang Alma 32:27–28 ; Doktrina at mga Tipan 42:14 ; at Juan 7:17 at ibahagi ang nalaman nila. Maaari mo silang anyayahang pagnilayan ang ginagawa nila ngayon at ang magagawa nila sa hinaharap upang maging karapat-dapat para sa patnubay ng Espiritu Santo.