Tombano ny fianaranao 4

Matio 14–20; Marka 6–10; Lioka 10; 12; 14–18; Jaona 5–11

Ity lesona ity dia natao mba hanampiana anao hanao tombatombana ireo tanjona izay napetrakao sy ny fianarana izay nataonao ary ny fivoarana izay azonao manokana nandritra ny fianaranao ny Testamenta Vaovao.

Mivavaka ho an’ireo mpianatra. Mba hifantohana misimisy kokoa amin’ireo mpianatra tsirairay, dia mivavaha ho azy ireo amin’ny fanononana ny anarany avy. Mangataha fanampiana avy amin’ny Ray any An-danitra mba hahafahanao mahatakatra ny zavatra ilain’ireo mpianatra sy hahafantatra ny paikady enti-mampianatra tokony hampiasaina mba hanomezana ireo zavatra ilaina ireo. Henoy ireo bitsiky ny Fanahy momba ny fomba tokony hanampiana ny mpianatra tsirairay.

Fanomanana ny mpianatra: Asao ireo mpianatra mba hisaintsaina ny fitomboana ara-panahy izay efa niainan’izy ireo nandritra ny fandalinany ny Testamenta Vaovao. Manampy azy ireo hahafantatra, sy hitia, ary hanompo ny Ray any An-danitra sy i Jesoa Kristy ve ny fandalinany ny Testamenta Vaovao? Inona ny zavatra manan-danja efa niainan’izy ireo?

Sahanasa fianarana azo atao

Ity lesona ity dia natao mba hanampiana ireo mpianatra hanao tombana ny tanjona napetrak’izy ireo, ny fahafahany manazava ireo fampianarana ao amin’ny Testamenta Vaovao, na ny fomba niovan’ny fomba fihetsiny, ny faniriany, ary ny fahafahany miaina ny filazantsara. Ny fandalinan’ireo mpianatra ny Matio 14–20; Marka 6–10; Lioka 10; 12; 14–18; ary ny Jaona 5–11 dia mety nanamafy kokoa ireo fahamarinana ankoatra ireo hafa izay hita ato amin’ireto sahanasa manaraka ireto. Raha izany no izy, dia azo amboarina ireo sahanasa ireo mba hampidirana ireo fahamarinana ireo.

Manatona an’i Jesoa Kristy sy tonga mpianany

Makà fotoana mba hisaintsainana ny fivoaranao amin’ny maha mpianatr’i Jesoa Kristy anao sy ny fikatsahanao mba hanatona Azy tanteraka rehefa mianatra ny Testamenta Vaovao ianao. Ny sasany amin’ireo fomba izay amporisihanao anao hanao izany dia amin’ny alalan’ny fahafahanao mandray sy manaraka fanambarana ho an’ny tena manokana ary manazava ny sasany amin’ireo anjara asa sy anaram-boninahitra niantsoana an’i Jesoa Kristy sy ny ezaka izay ataonao mba hikatsaka fiadanana eto amin’ity fiainana ity amin’ny alalan’i Jesoa Kristy. Katsaho ny hahafantatra avy amin’ny Rainao any An-danitra ny fomba hivoaranao sy hivelaranao amin’ireo fomba ireo sy amin’izay zavatra rehetra tokony hotohizinao atao na ovainao mba hahafahanao manohy mampitombo ny maha-mpianatr’i Jesoa Kristy anao.

Ampitomboy ny fahafahanao mandray fanambarana

Atombohy amin’ny fandefasana moramora hira iray efa mahazatra ny fotoam-pianarana. Tokony halefa mora mihitsy ilay hira hany ka na dia mitabataba kely fotsiny aza ny ankizy dia mety tsy haheno ilay hira ireo izay mipetraka akaiky indrindra ny loharano iavian’ilay feon-kira. Angataho ireo mpianatra hamantatra ilay hira izay mandeha.

Makà iray minitra mba hihainoana ireo feo manodidina anao.

• Inona avy ireo feo izay tsy henonao raha tsy rehefa tena mihaino tsara ihany ianao?

• Inona ny zavatra azonao atao rehefa zara raha maheno zavatra iray ianao kanefa maniry ny hahafantatra hoe inona ilay izy?

Mety hamaly ireo mpianatra hoe hanatona akaiky kokoa ilay loharano ivoahan’ilay feo izy ireo, na hiezaka ny tsy hihetsika sy hangina tsara, na hampifantoka ny eritreriny amin’ny fihainoana, na hampitsahatra ireo feo hafa rehetra. Hevero ny hanoratra ny valin-tenin’ireo mpianatra eny amin’ny solaitrabe ary avy eo dia hangataka ny mpianatra hampiasa ireo fomba ireo mba hiezahana mamantatra ilay hira mandeha.

• Inona no mampitovy ity sahanasa ity amin’ny fandraisana fanambarana avy amin’ny Fanahy Masina?

Tanjona iray manan-danja amin’ny seminera ny hanampy anao hampitombo ny fahafahanao mandray fanambarana ho an’ny tena manokana avy amin’ny Fanahy Masina.

Eritrereto ny zavatra ilain’ny mpianatra ary jereo raha toa ka afaka manampy azy ireo ireto fampahalalana anatin’ireto andiam-pehezan-teny manaraka ireto.

Ao amin’ny bokin’i Môrmôna i Nefia dia namaritra ny Fanahy Masina ho “feo tony sy malefaka” izay tsapantsika mihoatra noho ny hoe rentsika ( 1 Nefia 17:45). Azontsika atao ny manatsara ny fahafahantsika mihaino na mahatsapa ny Fanahy Masina ao am-pontsika mitovy amin’ny fomba ampiasaintsika mba hihainoana feo moramora. Ny fanatonana akaiky kokoa an’ Andriamanitra ara-panahy, ny fitoniana ao an-tsaintsika, ny fampifantohana ny eritrerintsika, ary ny fanakanana ny feo hafa rehetra manodidina antsika dia tetika mahomby avokoa entina mampitombo ny fahafahantsika mamantatra ny bitsiky ny Fanahy Masina.

Makà fotoana vitsivitsy mba hisaintsainana ny zavatra izay niainanao vao haingana rehefa nandray fanambarana ho an’ny tena manokana avy tamin’ny Fanahy Masina ianao. Mety hamerina hijery ireo zavatra noraketinao an-tsoratra tao amin’ny soratra masinao na ny diary fandalinanao soratra masina ianao. Mety hangataka ny Ray any An-danitra ihany koa ianao mba hanampy anao hamantatra na hitadidy ilay fanambarana ho an’ny tena manokana izay noraisinao. Aorian’izay dia raketo an-tsoratra ireo eritreritra sy fahatsapana izay tonga ao an-tsainao sy ao am-ponao.

• Inona ny zavatra niainanao vao haingana mikasika ny fandraisana fanambarana ho an’ny tena manokana? Ahoana no nahafantaranao fa avy amin’ Andriamanitra ireo zavatra niainana ireo?

• Inona ny zavatra nianaranao tamin’ny fandalinanao ny Testamenta Vaovao ka afaka manampy anao hamantatra ny Fanahy Masina?

• Inona avy ireo hevitra azonao zaraina amin’ny olona sahirana amin’ny famantarana ny Fanahy?

Isan’ireo anjara asa fototra tanan’ny Fanahy Masina ny mijoro ho vavolombelon’ny Ray sy ny Zanaka (jereo ny Matio 16:17 ; Jaona 15:26 ; 3 Nefia 11:32).

• Nampian’ny Fanahy hahatakatra na hahatsapa inona momba ny Ray any An-danitra sy i Jesoa Kristy ianao?

• Ahoana ny fomba ahafahana manaporofo fa fitiavan’ Andriamanitra anao avokoa ny fanomezana ny Fanahy Masina sy ny fahafahana mandray fanambarana ho an’ny tena manokana?

Amporisiho ny mpianatra mba hanohy hikatsaka fanambarana ho an’ny tena manokana na dia mahatsapa azy izy ireo fa sarotra ny mamantatra ny bitsika avy amin’ny Fanahy Masina.

Hazavao ireo anjara asa tanan’i Jesoa Kristy sy ireo anaram-boninahitra fiantsoana Azy

Asehoy ireto sarina mofo sy ondry manaraka ireto. Anontanio ny mpianatra raha toa ka afaka manazava ny antony nahatonga ny Mpamonjy nampiasa ireo zavatra ireo mba ho tandindona hampianarana momba ny Tenany.

• Ahoana ny fomba nampiasan’ny Mpamonjy ny mofo sy ny ondry mba hampianarany momba ny Tenany?

Azonao ampahatsiahivina ny fampianaran’ny Mpamonjy tamin’ny alalan’ny sarin-teny toy ny hoe “Izaho no mofon’aina” (jereo ny Jaona 6:35, 41, 48, 51), “Izaho no Mpiandry Tsara” ( Jaona 10:11), ary “Izaho no fananganana ny maty sy fiainana” ( Jaona 11:25).

• Inona ny zavatra ampianarin’ireo anaram-boninahitra ireo anao momba ny toetran’ny Mpamonjy sy ny anjara asa azony sahanina eo amin’ny fiainanao?

• Manampy anao hitia Azy bebe kokoa amin’ny fomba ahoana ny fahatakarana ny toetrany sy ny anjara asa sahaniny?

Rehefa nianatra ny Testamenta Vaovao ianao, dia mety nanao lisitra ireo anjara asany sy ny anaram-boninahitra izay iantsoana an’i Jesoa Kristy tao amin’ny diary fandalinanao soratra masina. Raha manana izany lisitra izany ianao, dia makà minitra vitsivitsy mba hahafahanao mamerina mijery izany. Ampio ireo anaram-boninahitra sy anjara asany izay mbola tsy tafiditra tao anaty lisitra. Raha tsy mbola nanao io lisitra io mihitsy ianao, dia mety ho tianao ny hanombokahanao izany amin’izao fotoana izao, ary hitanisa ireo anjara asa na anaram-boninahitra izay tonga ao an-tsainao. Raha tsy misy tonga ao an-tsainao, dia hevero ny hamerina hijery ny “ Ilay Kristy velona: Ny fijoroana ho vavolombelon’ireo Apôstôly ” (ChurchofJesusChrist.org) na “Jesoa Kristy” ao amin’ny Torolalana ho an’ny Soratra Masina mba hakana hevitra.

Mety hahafinaritra ireo mpianatra ny manao ity sahanasa manaraka ity miaraka amina namana iray na anatina vondrona kely maromaro. Asao ireo mpianatra mba hizara amin’ny iray kilasy ny zavatra izay nosoratany.

• Manorata karatra kelyfanehoam-pisaorana ho an’ny Mpamonjy, izay mifantoka amin’iray na ny maromaro amin’ireo anjara asany sy anaram-boninahitra fiantsoana Azy. Ampidiro ao anatin’izany izay mety ho zavatra niainanao tamin’ny fankasitrahana Azy noho ny nanatanterahany izany anjara asa izany teo amin’ny fiainanao, ary manehoa fankasitrahana.

Raha nanambatambatra sary ireo mpianatra tamin’ny lesona teo aloha, dia dingano ity sahanasa natolotra manaraka ity.

• Mamorona fitaovana jeren’ny maso izay manazava ny anjara asan’ny Mpamonjy na ireo anaram-boninahitra fiantsoana Azy. Ampidiro ao anatin’izany ireo andinin-tsoratra masina azo ampiharina amin’izany sy ny antony maha-manan-danja aminao ireo anjara asa sy anarana fiantsoana ireo. Hevero ny hizara izany amin’ny tambazotra sosialy rehefa vitanao.

• Manorata lahateny fohy na manomàna lesona kely momba ny iray na maromaro amin’ireo anjara asa na anaram-boninahitra fiantsoana ny Mpamonjy izay azonao ampianarina amin’ny endrika fampaherezam-panahy ho an’ny seminera, na lesona amin’ny takarivan’ny mpianakavy, na mandritra ny kilasy ao am-piangonana. Ampidiro ao ny lanjan’ilay anjara asa na anarana fiantsoana sy izay mety ho zavatra niainanao rehefa nanatanteraka izany andraikiny izany teo amin’ny fiainanao Izy.

Mahatsapa faniriana lehibe kokoa mba hikatsaka fiadanana ao amin’i Kristy

Raha ohatra ka nisy fitaovana jeren’ny maso nampiasaina tao anatin’ireo lesona izay resahina ato amin’ity andiam-pehezan-teny ity, dia hevero ny haneho ireo fitaovana jeren’ny maso ireo mba hanampiana ireo mpianatra hitadidy ireo lesona ireo. Ho solon’ny famakiana ilay andiam-pehezan-teny, dia hevero ny hanontany ny mpianatra ny zavatra tadidin’izy ireo avy tamin’ireo lesona ireo.

Tamin’ny fianaranao ny Testamenta Vaovao, dia nanana fotoana nahafahana nianatra sy nisaintsaina mikasika ny fiadanana izay avy amin’i Jesoa Kristy ianao. Ohatra, mety hahatadidy ny fanasan’ny Mpamonjy antsika mba hanatona Azy rehefa mahatsapa enta-mavesatra ianao (jereo ny Matio 11:28–30) na ny nandehanan’i Jesoa teo ambony rano sy ny nanampiany an’i Petera hiakatra rehefa nanomboka nilentika izy (jereo ny Matio 14:26–33). Mety efa nanana fahafahana hanao sary tao amin’ny diary fandalinanao soratra masina ianao, izay ampahany nandrafitra ny lesona momba ny Marka 4:35–41 izay miresaka ny fomba nampitonian’i Jesoa Kristy ny tafiotra tamin’ny ranomasin’i Galilia. Raha ohatra ka nandray an-tsoratra izany ianao tao amin’ny diary fandalinanao soratra masina, dia hevero ny hamerina hijery azy ireny.

Saintsaino ary valio ao amin’ny diary fandalinanao soratra masina ireto fanontaniana manaraka ireto mba hahafahanao manaraka akaiky ny fivoaranao ara-panahy.

• Niova toy ny ahoana ny fanirianao hitady fiadanana ao amin’i Kristy rehefa avy nandalina ny fiainany sy ny fanompoany ianao?

• Tsapanao ho nitombo ve sa nihena ny fiadananao ao amin’i Kristy tao anatin’ireo herinandro vitsivitsy farany? Raha eny, dia inona no mba heverinao fa nahatonga izany fiovana izany?

• Nahoana araka ny hevitrao no i Jesoa Kristy no loharanon’ny fiadanana?

• Nahoana araka ny hevitrao no maniry ny hanome ny fiadanany ho anao ny Mpamonjy?

Manasà mpianatra izay mazoto ny hizara ny heviny, ny fahatsapany, na ny fanontaniana izay ananany. Avelao ireo mpianatra “hanazava ny fanontanian’[izy ireo] araka izay [ilainy]” ary amporisiho hatrany izy ireo mba tsy “hamela ireo fanontaniana ireo hanakana ny fahagagana izay ateraky ny asan’ny finoana” (Jeffrey R. Holland, “Tompo ô, mino aho,” Liahona, mey 2013, 94).

Hevero ny hijoro ho vavolombelona momba ny fomba ahafahan’ny fandalinana ny fiainana sy ireo fampianaran’i Jesoa Kristy ao amin’ny Testamenta Vaovao mampitombo ny finoana. Mety hanampy ny mizara tantaran’ny tena manokana sy fijoroana ho vavolombelona.