ហេព្រើរ ១–១០

« ជានាមដែលប្រសើរជាង »

អ្នកដើរតាមព្រះយេស៊ូវគ្រីស្ទទាំងអស់នឹងឆ្លងកាត់ការសាកល្បងនៃសេចក្តីជំនឿរបស់ពួកគេ ។ ករណីនេះបានកើតឡើងចំពោះពួកគ្រីស្ទាននៃសាសន៍យូដា ។ ក្រោមសម្ពាធនៃការបៀតបៀនផ្សេងៗ មនុស្សជាច្រើនបានដកខ្លួនចេញពីសាសនាចក្រ ហើយត្រឡប់ទៅរកសុវត្ថិភាពនៃទំនាកទំនងនៃការថ្វាយបង្គំបែបសាសន៍យូដានៅឯសាលាប្រជុំវិញ ។ ប៉ុលចង់បង្ហាញពួកគ្រីស្ទានសាសន៍យូដាទាំងនេះថា ព្រះយេស៊ូវអស្ចារ្យជាង ម៉ូសេ ហើយថាការងារបម្រើរបស់ទ្រង់បាននាំមកនូវសេចក្តីសញ្ញាថ្មីដ៏ឧត្តុងឧត្តមលើសេចក្តីសញ្ញាចាស់នៅក្រោមក្រឹត្យវិន័យរបស់ម៉ូសេ ។ មេរៀននេះអាចជួយពង្រឹងសេចក្តីជំនឿរបស់អ្នកទៅលើព្រះអង្គសង្គ្រោះ នៅពេលអ្នករៀនអំពីព្រះចេស្ដារបស់ទ្រង់លើគ្រប់ការណ៍ទាំងអស់ ដោយកំណត់អត្តសញ្ញាណនិងសិក្សាពីព្រះបរមងារនិងតួនាទីមួយចំនួនរបស់ទ្រង់ ។

ការផ្តោតទៅលើព្រះយេស៊ូវគ្រីស្ទ ។ « នៅពេលយើងផ្ដោតទៅលើព្រះបរមងារ តួនាទី ចរិតលក្ខណៈ និងគុណលក្ខណៈរបស់ទ្រង់ ព្រះវិញ្ញាណនឹងថ្លែងទីបន្ទាល់អំពីទ្រង់ ដោយនាំមកនូវការយល់ដឹង និងសេចក្ដីស្រឡាញ់កាន់តែខ្លាំងចំពោះទ្រង់ពិតប្រាកដ ហើយមានបំណងប្រែក្លាយដូចជាទ្រង់កាន់តែខ្លាំងឡើង » ( ឆាដ អេច វិប « We Talk of Christ, We Rejoice in Christ » [ សុន្ទរកថាផ្ដល់ឲ្យនៅឯការចាក់ផ្សាយការបំពាក់បំប៉នប្រចាំឆ្នាំរបស់ថ្នាក់សិក្ខាសាលា និងថ្នាក់វិទ្យាស្ថានសាសនា ថ្ងៃទី ១២ ខែ មិថុនា ឆ្នាំ ២០១៨ ] ដែលមាននៅលើគេហទំព័រChurchofJesusChrist.org ) ។

ការរៀបចំរបស់សិស្ស ៖ សូមអញ្ជើញសិស្សឲ្យរកមើលព្រះនាមរបស់ព្រះយេស៊ូវគ្រីស្ទ អំឡុងពេលសិក្សាព្រះគម្ពីរផ្ទាល់ខ្លួន ឬជាលក្ខណៈគ្រួសារ ហើយមករៀនដោយបានត្រៀមខ្លួនដើម្បីចែកចាយពីព្រះនាមដែលពួកគេបានរកឃើញ ។

សកម្មភាពរៀនសូត្រដែលអាចមាន

ព្រះបរមងាររបស់ព្រះយេស៊ូវគ្រីស្ទ

សូមពិចារណាអញ្ជើញសិស្សឲ្យធ្វើសកម្មភាពដូចខាងក្រោមនៅលើក្រដាសមួយសន្លឹក ។ បន្ទាប់មកប្រមូលក្រដាសទាំងនោះ ហើយអានចម្លើយដោយអញ្ជើញសិស្សឲ្យទស្សន៍ទាយថាតើសិស្សម្នាក់ណាដែលសរសេរការពិពណ៌នានីមួយៗនោះ ។

សូមចំណាយពេលមួយនាទី ហើយសរសេរនៅក្នុងសៀវភៅកំណត់ហេតុការសិក្សារបស់អ្នកនូវពាក្យ ឬឃ្លាជាច្រើនដែលពិពណ៌នាអំពីខ្លួនអ្នកទៅតាមអ្វីដែលអ្នកអាចគិតឃើញ ។

• ហេតុអ្វីបានជាអ្នកប្រើពាក្យ និងឃ្លាដែលអ្នកបានពិពណ៌នា ?

គឺដូចជាអ្នកមានពាក្យ ឬឃ្លាដែលពិពណ៌នាអំពីខ្លួនអ្នក ដែរ ព្រះយេស៊ូវគ្រីស្ទក៏មានព្រះនាម ឬព្រះបរមងារជាច្រើនដែលពិពណ៌នាអំពីទ្រង់ផងដែរ ។ នៅពេលយើងស្គាល់ព្រះបរមងារទាំងនេះកាន់តែច្បាស់ នោះយើងយល់កាន់តែច្បាស់ថាតើទ្រង់ជានរណា និងថាទ្រង់ស្រឡាញ់យើងប៉ុណ្ណា ។

សិស្សខ្លះប្រហែលជាបានរក្សាបញ្ជីនៃព្រះបរមងារ និងតួនាទីរបស់ព្រះអង្គសង្គ្រោះនៅក្នុងសៀវភៅកំណត់ហេតុការសិក្សារបស់ពួកគេ ។ បើពួកគេមិនបានរក្សាទុកទេ សូមអញ្ជើញពួកគេឲ្យធ្វើដូច្នេះ ។

នៅក្នុងសៀវភៅកំណត់ហេតុការសិក្សារបស់អ្នក សូមសរសេរអំពីព្រះបរមងារមួយចំនួនដែលអ្នកស្គាល់រួចហើយ សម្រាប់ព្រះអង្គសង្គ្រោះ ។

• តើការស្គាល់ និងការយល់ដឹងអំពីព្រះបរមងារទាំងនេះរបស់ព្រះយេស៊ូវគ្រីស្ទ មានឥទ្ធិពលលើរបៀបដែលអ្នកមានទស្សនៈអំពីទ្រង់យ៉ាងដូចម្ដេច ?

សូមពិចារណាធ្វើបញ្ជីចម្លើយរបស់សិស្សនៅលើក្ដារខៀន ។ ដើម្បីជួយសិស្សធ្វើឲ្យសេចក្តីជំនឿរបស់ពួកគេកាន់តែស៊ីជម្រៅទៅលើព្រះយេស៊ូវគ្រីស្ទ សូមពិចារណាសួរសំណួរបន្តបន្ទាប់ដូចជា « ហេតុអ្វីបានជាអ្នកគិតថាវាសំខាន់សម្រាប់ក្មេងជំទង់ដើម្បីយល់ដឹងអំពីព្រះអង្គសង្គ្រោះ ? » ឬ « តើតួនាទីនេះបង្រៀនយើងអ្វីខ្លះអំពីចរិត និងគុណលក្ខណៈរបស់ទ្រង់ ? »

ប្រធាន រ័សុល អិម ណិលសុន បានបង្រៀនអំពីរបៀបដែលយើងអាចទទួលបានពរជ័យ នៅពេលយើងរៀនបន្ថែមអំពីព្រះអង្គសង្គ្រោះ ៖

កាលណាបងប្អូនរៀនពីព្រះអង្គសង្គ្រោះកាន់តែច្រើន នោះវាកាន់តែងាយស្រួលដើម្បីទុកចិត្តលើសេចក្ដីមេត្តាករុណារបស់ទ្រង់ សេចក្ដីស្រឡាញ់ដ៏និរន្ដរ៍របស់ទ្រង់ និងព្រះចេស្ដារបស់ទ្រង់ក្នុងការពង្រឹង ព្យាបាល និងប្រោសលោះ ។

( រ័សុល អិម ណិលសុន « ព្រះគ្រីស្ទមានព្រះជន្មរស់ឡើងវិញ សេចក្តីជំនឿលើទ្រង់នឹងរើភ្នំចេញបាន » លីអាហូណា ខែ ឧសភា ឆ្នាំ ២០២១ ទំព័រ ១០៣ )

• តើអ្នកត្រូវការជំនួយពីព្រះអង្គសង្គ្រោះតាមរបៀបណាខ្លះ ចំពោះអ្វីដែលប្រធាន ណិលសុន បានពិពណ៌នា ?

សូមពិចារណាបង្ហាញ ឬសង្ខេបឯកសារខាងក្រោមដើម្បីជួយសិស្សឲ្យយល់អំពីបរិបទនៃគម្ពីរហេព្រើរ ។

ដូចជាយើងត្រូវការព្រះអង្គសង្គ្រោះដែរ ដូច្នេះពួកគ្រីស្ទានសាសន៍យូដាដែលមិនចូលរួមការប្រជុំសាសនាចក្រដោយសារការបៀតបៀន និងសម្ពាធផ្សេងទៀតក៏ត្រូវការទ្រង់ដូចគ្នា ។ ពួកគេបានបែរទៅរកការថ្វាយបង្គំដែលពួកគេធ្លាប់ស្គាល់ និង ទំនាក់ទំនងដ៏សុខសាន្តនៃទំនៀមទម្លាប់របស់ពួកសាសន៍យូដា ដែលមិនរួមបញ្ជូលនឹងការជឿទៅលើព្រះយេស៊ូវគ្រីស្ទឡើយ ( សូមមើល ហេព្រើរ ១០:២៥, ៣៨–៣៩ ) ។ អ្នកអាចស្វែងយល់បន្ថែមអំពីសំបុត្រនេះដោយសិក្សា « ហេព្រើរ, សំបុត្រដល់ពួក » នៅក្នុងសេចក្ដីណែនាំដល់បទគម្ពីរទាំងឡាយ។

សូមស្វែងរកព្រះបរមងារ និងតួនាទីផ្សេងទៀតរបស់ព្រះយេស៊ូវគ្រីស្ទ

ប៉ុលបានចែកចាយព្រះបរមងារ និងតួនាទីជាច្រើនរបស់ព្រះអង្គសង្គ្រោះ ដែលអាចនឹងជួយពួកបរិសុទ្ធឲ្យទទួលស្គាល់តម្រូវការរបស់ពួកគេសម្រាប់ទ្រង់ ។ ជាឧទាហរណ៍ ហេព្រើរ ១:២ សង្កត់ធ្ងន់លើព្រះបរមងាររបស់ព្រះអង្គសង្គ្រោះដែលជា « ព្រះរាជបុត្រា » ដែលទាក់ទងនឹងការដែលទ្រង់ « គ្រងរបស់ទាំងអស់ ទុកជាមរដក » ។ ហេព្រើរ ១:២, ១០ ពន្យល់អំពីតួនាទីរបស់ព្រះយេស៊ូវជាអង្គបង្កបង្កើតស្ថានសួគ៌ និងផែនដី ។

ខគម្ពីរជាក់លាក់មួយចំនួនអាចចាត់តាំងឲ្យសិស្សអានជាគូ ឬជាក្រុមតូចៗ ។ បន្ទាប់ពីពួកគេបានអាន សូមពិចារណាធ្វើបញ្ជីមួយនៅលើក្ដារខៀនអំពីព្រះបរមងារដែលសិស្សបានរកឃើញ ។

ឥឡូវនេះ អ្នកបានឃើញឧទាហរណ៍មួយចំនួននៃព្រះបរមងាររបស់ព្រះអង្គសង្គ្រោះ សូមអានខគម្ពីរខាងក្រោម ហើយរកមើលព្រះបរមងារ និងតួនាទីបន្ថែមទៀតរបស់ព្រះយេស៊ូវគ្រីស្ទ ។ សូមពិចារណាគូសសម្គាល់អ្វីដែលអ្នករកឃើញ ។

ហេព្រើរ ១:១–៣, ១០

ហេព្រើរ ២:៩–១០, ១៧

ហេព្រើរ ៣:១

ហេព្រើរ ៥:៨–១០

ហេព្រើរ ៩:១១–១៦

• តើសេចក្ដីពិតអ្វីដែលអ្នកបានកត់សម្គាល់អំពីព្រះអង្គសង្គ្រោះពីព្រះបរមងារ និងតួនាទីរបស់ទ្រង់មួយ ឬច្រើន ?

សិស្សអាចកត់សម្គាល់ភាពខុសគ្នានៃសេចក្ដីពិត ដូចជា ព្រះយេស៊ូវគ្រីស្ទបានបង្កើតស្ថានសួគ៌ និងផែនដី ( សូមមើល ហេព្រើរ ១:២, ១០ ) ឬ ព្រះយេស៊ូវគ្រីស្ទជាព្រះរាជបុត្រានៃព្រះ ហើយជារូបភាពនៃព្រះវរបិតាទ្រង់ ( សូមមើល ហេព្រើរ ១:២ –៣ ) ។

សូមជ្រើសរើសព្រះបរមងារឬតួនាទីដែលពណ៌នាអំពីសកម្មភាពដែលអ្នកត្រូវការឲ្យព្រះយេស៊ូវគ្រីស្ទ ចាត់ចែងក្នុងជីវិតរបស់អ្នក ហើយសរសេរវានៅចំកណ្តាលក្រដាសមួយសន្លឹក ។ ការប្រើប្រាស់ព្រះគម្ពីរ កម្មវិធីបណ្ណាល័យដំណឹងល្អ ឬនៅលើគេហទំព័រChurchofJesusChrist.org រកមើលការយល់ដឹងបន្ថែមអំពីព្រះបរមងារនៃព្រះយេស៊ូវគ្រីស្ទដែលអ្នកបានជ្រើសរើស ។ របៀបមួយដើម្បីចាប់ផ្តើមការសិក្សារបស់អ្នកគឺដោយស្វែងរក ច្រកចូលទៅរក« ព្រះយេស៊ូវគ្រីស្ទ » នៅក្នុង សេចក្ដីណែនាំដល់បទគម្ពីរទាំងឡាយ ឬ ក៏នៅក្នុ Topical Guide ។ បន្ទាប់មក អ្នកអាចរកមើលបទគម្ពីរផ្សេងៗដែលផ្តោតទៅលើព្រះអង្គសង្គ្រោះ ។

ជុំវិញព្រះបរមងារ សូមសរសេរគំនិតរបស់អ្នកអំពីព្រះយេស៊ូវគ្រីស្ទ ហើយហេតុអ្វីបានជាព្រះបរមងារនោះមានអត្ថន័យសម្រាប់អ្នក ។ គំនិតទាំងនេះអាចរួមបញ្ចូល

• ឃ្លាពីខគម្ពីរ ឬពាក្យដកស្រង់ដែលអ្នកអាន

• គំនិតអំពីរបៀបដែលការបំពេញតួនាទីរបស់ព្រះអង្គសង្គ្រោះអាចជួយអ្នកក្នុងជីវិតរបស់អ្នក

• ការយល់ដឹងរបស់អ្នកអំពីរបៀបដែលចំណេះដឹងអំពីព្រះបរមងារនោះអាចពង្រឹងសេចក្ដីជំនឿរបស់អ្នកទៅលើព្រះយេស៊ូវគ្រីស្ទនិង

• សំណួរណាមួយដែលអ្នកមានអំពីព្រះបរមងារនោះ ។

ប្រសិនបើពេលវេលាអនុញ្ញាត សិស្សអាចទទួលបានឱកាសដើម្បីស្វែងរកចម្លើយចំពោះសំណួររបស់ពួកគេ ។ សិស្សក៏អាចត្រូវបានអញ្ជើញឲ្យចែកចាយការយល់ដឹងរបស់ពួកគេជាថ្នាក់ ជាក្រុមតូចៗ ឬជាគូៗ ។ ថ្លែងទីបន្ទាល់អំពីព្រះយេស៊ូវគ្រីស្ទ និងសារៈសំខាន់នៃការរៀនសូត្របន្ថែមអំពីទ្រង់ ។

ឥឡូវនេះ អ្នកបានអនុវត្តកត់សម្គាល់ព្រះនាមនិងព្រះបរមងាររបស់ព្រះយេស៊ូវគ្រីស្ទ សូមចំណាយពេលមួយភ្លែតដើម្បីសញ្ជឹងគិតថាតើអ្នកកំពុងប្រើជំនាញនេះបានល្អប៉ុណ្ណាក្នុងការសិក្សាព្រះគម្ពីររបស់អ្នក ។

• តើការស្វែងរកព្រះបរមងាររបស់ព្រះយេស៊ូវគ្រីស្ទបានជួយអ្នកឲ្យស្គាល់ទ្រង់កាន់តែច្បាស់ដោយរបៀបណា ?

• តើអ្នកអាចបញ្ចូលការសិក្សាព្រះបរមងារនៃព្រះយេស៊ូវគ្រីស្ទទៅក្នុងការសិក្សាព្រះគម្ពីរជាប្រចាំរបស់អ្នកដោយរបៀបណា ?

សូមរកមើលព្រះបរមងារនៃព្រះយេស៊ូវគ្រីស្ទនៅក្នុងការសិក្សាផ្ទាល់ខ្លួនរបស់អ្នក និងជាមួយក្រុមគ្រួសាររបស់អ្នក នៅពេលអ្នកបន្តសិក្សាព្រះគម្ពីរសញ្ញាថ្មី និងព្រះគម្ពីរផ្សេងទៀត ។

វិចារណកថា និង ព័ត៌មានសាច់រឿង

ហេតុអ្វីខ្ញុំគួររៀនអំពីព្រះយេស៊ូវគ្រីស្ទ ?

ប្រធាន រ័សុល អិម ណិលសុន បានបង្រៀន ៖

ប្រសិនបើអ្នកបន្តរៀនអំពីព្រះយេស៊ូវគ្រីស្ទឲ្យអស់ពីសមត្ថភាព ខ្ញុំសូមសន្យានឹងអ្នកថា សេចក្តីស្រឡាញ់របស់អ្នកចំពោះទ្រង់ និងចំពោះក្រឹត្យវិន័យរបស់ព្រះ នឹងរីកចម្រើនលើសពីអ្វីដែលអ្នកនឹកស្រមៃនាពេលបច្ចុប្បន្ននេះ ។ ខ្ញុំក៏សូមសន្យានឹងអ្នកដែរថា សមត្ថភាពរបស់អ្នកដើម្បីងាកចេញពីអំពើបាបនឹងកើនឡើង ។ បំណងប្រាថ្នារបស់អ្នកដើម្បីរក្សាបទបញ្ញត្តិនឹងចម្រើនឡើង ។ អ្នកនឹងឃើញថាខ្លួនអ្នកអាចដើរចេញពីការកម្សាន្ត និងការជាប់ជំពាក់ជាមួយមនុស្សដែលមើលងាយដល់អ្នកដើរតាមព្រះយេស៊ូវគ្រីស្ទបានកាន់តែប្រសើរជាងមុន ។ …

សូមសិក្សាអ្វីគ្រប់យ៉ាងដែល ជា ព្រះយេស៊ូវគ្រីស្ទដោយការអធិស្ឋាន និងដោយការខិតខំស្វះស្វែងដើម្បីយល់ពីអ្វីដែលព្រះបរមងារ និងព្រះនាមនីមួយៗរបស់ទ្រង់មានន័យសម្រាប់អ្នកផ្ទាល់ ។

( រ័សុល អិម ណិលសុន ដោយគូសបញ្ជាក់បន្ថែមថា « Prophets, Leadership, and Divine Law [ ការប្រជុំធម្មនិដ្ឋានសម្រាប់យុវមជ្ឈិមវ័យទូទាំងពិភពលោក ថ្ងៃទី ៨ ខែ មករា ឆ្នាំ ២០១៧ ] ដែលមាននៅលើគេហទំព័រ ChurchofJesusChrist.org សេចក្ដី បញ្ជាក់ បន្ថែម )

ហេព្រើរ ១:២, ១០ ។ តើតួនាទីរបស់ព្រះយេស៊ូវដែលជាអង្គបង្កបង្កើតអាចមានឥទ្ធិពលលើជីវិតរបស់ខ្ញុំយ៉ាងដូចម្ដេច ?

ឆាដ អេច វិប អ្នកគ្រប់គ្រងថ្នាក់សិក្ខាសាលា និងថ្នាក់វិទ្យាស្ថានសាសនាបានពន្យល់ ៖

បងប្អូនប្រហែលជាចាំថា ប្រធាន ប៊យដ៍ ឃេ ផាកកឺ ជាវិចិត្រករដ៏ចំណានម្នាក់ដែលចូលចិត្តឆ្លាក់សត្វចាបឈើ ។ ថ្ងៃមួយ លោកជាអ្នកដំណើរក្នុងឡានមួយដែលបើកដោយអែលឌើរ អេ សៀដ័រ ធូថល ហើយមានរូបចម្លាក់មួយរបស់លោកបានដាក់នៅលើកៅអីអង្គុយខាងក្រោយ ។ នៅផ្លូវបំបែក អែលឌើរ ធូថល បានជាន់ហ្វ្រាំងយ៉ាងខ្លាំង ធ្វើឲ្យរូបចម្លាក់នោះធ្លាក់ដាំក្បាលចុះ ហើយបែកខ្ទេច ។ អែលឌើរ ធូថល បានភ័យរន្ធត់ជាខ្លាំង ប៉ុន្ដែប្រធាន ផាកកឺ មិនរន្ធត់សោះ ។ លោកបាននិយាយធម្មតាថា « មិនអីទេ ។ ខ្ញុំបានធ្វើវា ។ ខ្ញុំអាចជួសជួលវាបាន » ។ ហើយគាត់បានធ្វើវា ។ លោកបានធ្វើឲ្យវាមាំជាងមុន ហើយថែមទាំងកែលម្អវាបន្ដិចទៀតផង ។ ប្រធាន ផាកកឺ បានពន្យល់ថា « តើនរណាបានបង្កើតអ្នក ? តើនរណាជាអង្គបង្កបង្កើតរបស់អ្នក ? គ្មានអ្វីណាមួយអំពីជីវិតរបស់អ្នកដែលទ្រុឌទ្រោម ឬខូចដែលទ្រង់មិនអាចជួលជុលវាបាននោះទេ ហើយទ្រង់នឹងជួសជុលបាន » ។

( ឆាដ អេច វិប « We Talk of Christ, We Rejoice in Christ » ការចាក់ផ្សាយអំពីការបំពាក់បំប៉នថ្នាក់សិក្ខាសាលា និងថ្នាក់វិទ្យាស្ថានសាសនាប្រចាំឆ្នាំ ថ្ងៃទី ១២ ខែ មិថុនា ឆ្នាំ ២០១៨ ដែលមាននៅលើគេហទំព័រChurchofJesusChrist.org )

តើការស្គាល់ព្រះយេស៊ូវគ្រីស្ទអាចនាំឲ្យខ្ញុំមានសេចក្ដីសង្ឃឹមយ៉ាងដូចម្ដេច ?

បទពិសោធន៍ខាងក្រោមដែលបានចែកចាយដោយអែលឌើរ រ៉ូណាល់ អេ រ៉ាសបាន អាចជួយយើងឲ្យយល់ពីរបៀបដែលការស្គាល់ព្រះបរមងារ និងតួនាទីរបស់ព្រះយេស៊ូវគ្រីស្ទអាចផ្តល់ក្តីសង្ឃឹម ។

ហេព្រើរ ២:១០ ។ តើព្រះយេស៊ូវគ្រីស្ទជា« មេដឹកនាំនៃសេចក្ដីសង្គ្រោះ[ របស់យើង ] »តាមរបៀបណា ?

ផតខាសទាំងប៉ុន្មានភាគ ខាងក្រោមចែកចាយការយល់ដឹងអំពីរបៀបដែលព្រះយេស៊ូវគ្រីស្ទជាមេដឹកនាំនៃសេចក្តីសង្រ្គោះរបស់យើង ៖

សកម្មភាពរៀនសូត្របន្ថែម

ការស្វែងរកព្រះបរមងារ នៃព្រះយេស៊ូវគ្រីស្ទ នៅក្នុង ព្រះគម្ពីរមរមន

របៀបមួយទៀតដើម្បីជួយសិស្សឲ្យរកឃើញព្រះបរមងារនៃព្រះគ្រីស្ទគឺត្រូវប្រើព្រះគម្ពីរមរមន ។ សូមពិចារណាធ្វើសកម្មភាពខាងក្រោម ។

សូមសួរសិស្សថា « តើចំណងជើងពេញលេញនៃព្រះគម្ពីរមរមនជាអ្វី ? »

សូមរំឭកដល់សិស្សថាព្រះគម្ពីរមរមនត្រូវបានសរសេរឡើង ដើម្បីបញ្ចុះបញ្ចូលមនុស្សទាំងអស់ថា ព្រះយេស៊ូវគឺជាព្រះគ្រីស្ទ ។

ដើម្បីជួយសិស្សមានអំណរគុណចំពោះគោលបំណងចម្បងនៃព្រះគម្ពីរមរមន សូមស្នើសុំឲ្យសិស្សម្នាក់អានឲ្យឮៗនូវសេចក្ដីថ្លែងការណ៍ខាងក្រោមដោយប្រធាន អ៊ែសរ៉ា ថាហ្វ ប៊ែនសឹន ( ឆ្នាំ១៨៩៩–១៩៩៤ ) ៖

អ្នកដែលស្វែករកសេចក្តីពិតដោយស្មោះត្រង់ អាចទទួលទីបន្ទាល់ថា ព្រះយេស៊ូវគឺជាព្រះគ្រីស្ទនៅពេលដែលគាត់ពិចារណាប្រកបដោយការអធិស្ឋានអំពីពាក្យសម្ដីដែលប្រកបដោយការបំផុសគំនិតរបស់ព្រះគម្ពីរមរមន ។

ជាងពាក់កណ្តាលនៃខគម្ពីរទាំងអស់នៅក្នុងព្រះគម្ពីរមរមនគឺសំដៅទៅលើព្រះអម្ចាស់របស់យើង ។ ទម្រង់ព្រះនាមនៃព្រះគ្រីស្ទមួយចំនួនត្រូវបានរៀបរាប់ជាញឹកញាប់នៅក្នុងខគម្ពីរនីមួយៗក្នុងព្រះគម្ពីរមរមនច្រើនជាងព្រះគម្ពីរសញ្ញាថ្មី ។

ព្រះនាមទ្រង់ត្រូវបានផ្ដល់ផ្សេងគ្នាជាងមួយរយនៅក្នុងព្រះគម្ពីរមរមន ។ ព្រះនាមទាំងនោះមានសារៈសំខាន់ជាក់លាក់ក្នុងការពិពណ៌នាអំពីលក្ខណៈដ៏ទេវភាពរបស់ទ្រង់ ។

( អ៊ែសរ៉ា ថាហ្វ ប៊ែនសឹន « Come unto Christ » Ensign ខែ វិច្ឆិកា ឆ្នាំ ១៩៨៧ ទំព័រ ៨៣ )

សូមអញ្ជើញសិស្សឲ្យបើកទៅជំពូកណាមួយក្នុងព្រះគម្ពីរមរមន ហើយមើលថាតើពួកគេអាចស្វែងរកព្រះនាមឬព្រះបរមងារដែលសំដៅទៅលើព្រះយេស៊ូវគ្រីស្ទបានដែរឬទេ ។ សូមឲ្យសិស្សរាយការណ៍អំពីព្រះនាម ឬព្រះបរមងារដែលពួកគេបានរកឃើញ ហើយពន្យល់ពីអ្វីដែលវាអាចបង្រៀនយើងអំពីព្រះយេស៊ូវគ្រីស្ទ ។

ព្រះគោរមងារផ្សេងទៀតរបស់ព្រះយេស៊ូវគ្រីស្ទ

បន្ទាប់ពីសិស្សរាយបញ្ជីព្រះបរមងារដែលពួកគេដឹងរួចហើយ សូមពិចារណាអញ្ជើញពួកគេឲ្យមើលគេហទំព័រខាងក្រោម ដោយរកមើលព្រះបរមងារផ្សេងទៀតរបស់ព្រះអង្គសង្គ្រោះ ដែលមិនត្រូវបានកត់សម្គាល់ ៖ នៅលើគេហទំព័រ ChurchofJesusChrist.org/comeuntochrist/believe/jesus/50-names-for-jesus

វានឹងផ្តល់ឲ្យសិស្សនូវព្រះបរមងារបន្ថែមដើម្បីជ្រើសរើសនៅពេលពួកគេជ្រើសរើស និងសិក្សាព្រះបរមងារមួយដែលមានអត្ថន័យបំផុតសម្រាប់ពួកគេ ។