Ko Hoku Fakavaʻé: Ngāue ʻaki ʻa e Tui kia Sīsū Kalaisi—Taimi Lōloa Tahá: Miniti ʻe 20

Fakalaulauloto:ʻE tokoniʻi fēfē ʻe heʻeku tui kia Sīsū Kalaisí ke u moʻui fakafalala pē kiate au?

Mamataʻi:“Ngāue ʻaki ʻa e Tui kia Sīsū Kalaisí [Exercise Faith in Jesus Christ],” maʻu ʻi he srs.lds.org/videos. (ʻIkai ha vitiō? Lau ʻa e peesi 21.)

Ngāue ʻaki ʻa e Tui kia Sīsū Kalaisí

Kapau ʻoku ʻikai ke mou lava ʻo mamata ʻi he foʻi vitioó, lau ʻa e fakamatala ko ʻení.

ʻEletā David A. Bednar: Ko hono fakahoko ha ngāué ko e ngāue ʻaki ia ʻa e tuí. ʻOku fua ʻe he fānau ʻo ʻIsilelí ʻa e puha ʻo e fuakavá. ʻOku nau omi ki he Vaitafe Soataní. Ko e talaʻofá te nau kolosi he fonua mōmoá. ʻE mavaeua fakakū ʻa e vaí? ʻI he taimi ʻe viviku ai honau vaʻé. Ne nau hifo atu ki he vaí—ngāue. Ne hoko mai e mālohí—ʻo mavaeua ʻa e vaí.

ʻOku tau faʻa tui he taimi ʻe niʻihi, “Te u maʻu e mahino haohaoa ko ʻení pea te u liliu ia ki heʻeku meʻa ʻe faí.” ʻOku ou fokotuʻu atu kuo feʻunga ia ke tau kamata ʻaki. Kuo tau ʻiloʻi ʻetau taumuʻá. Ko e tuí ko ha tefitoʻi moʻoni—ko e tefitoʻi moʻoni—ʻo e ngāué mo e mālohí. ʻOku fakataumuʻa ʻa e tui moʻoní ki he ʻEiki ko Sīsū Kalaisí pea ʻoku iku maʻu pē ia ki he ngāué.

(Vakai, “Seek Learning by Faith” [address to Church Educational System religious educators, Feb. 3, 2006], lds.org/media-library)

Foki ki he peesi 20.

Aleaʻi:Ko e hā ʻoku iku maʻu ai pē ʻa e tui moʻoní ki he ngāué? Ko e hā ʻoku fie maʻu ai e tuí ki hono tokoniʻi fakatuʻasino mo fakalaumālie kitautolu ʻe he ʻOtuá?

Lau:Mātiu 6:30 mo e kupuʻi lea ʻi he Lectures on Faith (ʻi he toʻomataʻú).

“Pea ko ia, kapau ʻoku fakakofu pehē ʻe he ʻOtuá ʻa e mohuku ʻo e ngoué, ʻa ia ʻoku ʻi ai he ʻahó ni, kae lī ki he ngotuʻumú ʻapongipongí, pea ʻe ʻikai lahi hake ʻene fie fakakofuʻi ʻa kimoutolú, ʻa kimoutolu ʻoku siʻi hoʻomou tuí?”

Mātiu 6:30

“He ʻoku ʻikai ke fakafalala, ʻa hoʻomou ngaahi faingataʻaʻia kotoa pē, ʻi hoʻomou tuí? … ʻI heʻetau maʻu e ngaahi tāpuaki fakatuʻasino kotoa pē ʻoku tau maʻu ʻi he tuí, ʻoku pehē pē foki mo ʻetau maʻu ʻi he tuí e ngaahi tāpuaki fakalaumālie kotoa pē ʻoku tau maʻú. Ka ko e tuí ʻoku ʻikai ko ha tefitoʻi moʻoni pē ia ʻo e ngāué, kae ʻo e mālohí foki.”

Lectures on Faith1985), 2, 3.

ʻEkitivitií

Ko e hala ki he moʻui fakafalala pē kiate kitá, ko ha fononga ia ʻi he tui. ʻOku fakaafeʻi kitautolu ʻe he Kau Palesitenisī ʻUluakí mo e Kōlomu ʻo e Toko Hongofulu Mā Uá ke tau fakamuʻomuʻa ʻi heʻetau moʻuí ʻa hono fakatupulaki ʻetau tui ki he Tamai Hēvaní mo Hono ʻAló.

Sitepu 1: Lau fakakulupu ʻa e ngaahi akonaki fakaepalōfita ke fakamuʻomuʻá ʻi he puha ʻi laló.

Sitepu 2: Aleaʻi ʻa e founga ʻe tokoni atu ai hono tauhi faivelenga e Sāpaté, maʻu e sākalamēnití, mo lau e Tohi ʻa Molomoná ke ke moʻui fakafalala ange kiate koé.

Ngaahi Akonaki Fakaepalōfita ke Fakamuʻomuʻá mo e Ngaahi Talaʻofá
“Fakakaukau ki he maʻongoʻonga ʻo e kupuʻi lea ko iá! ʻOku talaʻofa ʻa e koloa ʻo e māmaní kiate kinautolu ʻoku nau tauhi ʻa e Sāpaté ke māʻoniʻoní” (Russell M. Nelson, “ʻOku Fakafiefia ʻa e ʻAho Sāpaté,” Ensign pe Liahona, Mē 2015, 130; vakai foki ki he T&F 59:16).
“ʻOku ʻikai feliliuaki ʻa e tuʻunga fakalaumālié kae pehē ki he ngaahi fuakava [ʻo e sākalamēnití]. ʻOku ʻikai ngata pē hono ʻomi ʻe he ngaahi fuakavá ʻa e ngaahi tukupaá ka ʻoku nau ʻomi ʻa e mālohi fakalaumālié” (Neil L. Andersen, General Authority training meeting, Apr. 2015).
“ʻOku ou fakamoʻoni ʻe lava ke hoko [ʻa e Tohi ʻa Molomoná] ko ha “ʻUlimi mo ha Tumemi’ fakafoʻituitui ʻi hoʻo moʻuí” (Richard G. Scott, “The Power of the Book of Mormon in My Life,” Ensign, Oct. 1984, 11).

Tukupā:Tukupā ke fakahoko ʻa e ngaahi ngāue ko ʻení he lolotonga ʻo e uiké. Fakaʻilongaʻi ʻa e kiʻi puhá ʻi he taimi kuó ke fakakakato ai e ngāue takitaha.

• Fakahā hoʻo tuí he Sāpate ko ʻení ʻaki hono tauhi e ʻaho Sāpaté ke māʻoniʻoni mo maʻu ʻa e sākalamēnití ʻi he loto ʻapasia.

• Lau ʻa e Tohi ʻa Molomoná he ʻaho kotoa pē.

• Lau e ngaahi potufolofola ʻi he peesi 21. Fili ʻa e taha pea vahevahe ia mo ho fāmilí pe kaungāmeʻá.

  Ngaahi Potufolofola fekauʻaki mo e Ngāueʻi ʻo e Tuí

  Koeʻuhí ko e ʻikai tuku e lotu ʻa Tanielá, naʻe lī ai ia ki ha ʻana ʻo e fanga laioné, ka “[naʻe] fekau ʻe hoku ʻOtuá … ʻene ʻāngelo, pea … tāpuni ʻa e ngutu ʻo e fanga laioné, … pea naʻe ʻikai ʻilo ha lavea siʻi ʻiate ia, koeʻuhí naʻá ne tui ki hono ʻOtuá” (Taniela 6:22–23; vakai foki ki he veesi 16–21).

  Naʻe ʻoange ʻe he ʻEikí ʻa e Liahoná kia Līhai ke tataki hono fāmilí, pea “naʻe ngāue ia maʻanautolu ʻo fakatatau ki heʻenau tui ki he ʻOtuá. … [ʻI he taimi] naʻa nau fakapikopiko, ʻo ngalo ʻiate kinautolu ke ngāue ʻaki ʻenau tuí mo e ngāue faivelengá … naʻe ʻikai te nau lava ʻo laka atu ki muʻa ʻi heʻenau fonongá” ( ʻAlamā 37:40–41).

  “Mou ʻomi ʻa e ngaahi vahehongofulu ʻo e meʻá ki he tukunga koloá, koeʻuhí ke ai ha meʻakai ʻi hoku falé, pea mou [ʻahiʻahiʻi] ai au, ʻoku pehē ʻe [he ʻEiki], ʻo e ngaahi kau taú, pe te u fakaava ʻa e ngaahi matapā ʻo e langí pe ʻikai, peá u lilingi hifo kiate kimoutolu ha tāpuaki, ʻe ʻikai ha potu ʻe faʻa hao ia ki ai” (Malakai 3:10).

  Naʻe kole ʻe ʻIlaisiā ki ha uitou ʻi he lolotonga ʻo ha honge, ke foaki ange maʻana ʻene meʻakai fakaʻosi naʻe toé. Naʻe palōmesi ange ʻa ʻIlaisiā ʻe foaki ange ʻe he ʻEikí maʻana ha meʻakai, pea koeʻuhí ko ʻene tuí he ʻikai ai ke toe ʻosi ʻene meʻakaí. (Vakai, 1 Ngaahi Tuʻi 17.)

  “ʻO ka kumi ʻe he masivá mo e paeá ʻa e vaí, pea ʻoku ʻikai ia, pea ʻoku vaivai honau ʻeleló ʻi he fie inu, ko au ko e ʻEikí te u fanongo kiate kinautolu, ko au ko e ʻOtua ʻo ʻIsilelí, ʻe ʻikai te u liʻaki ʻa kinautolu” ( ʻĪsaia 41:17; vakai foki ki he veesi 18).