“Japta 2: Lukaotem Ol Skripja mo Putum Klos blong Faet blong God,” Prijim Gospel blong Mi: Wan Gaed Buk blong Stap Serem Gospel blong Jisas Kraes (2023)
“Lukaotem Ol Skripja mo Putum Klos blong Faet blong God,” Prijim Gospel blong Mi
Japta 2
Lukaotem Ol Skripja mo Putum Klos blong Faet blong God
Tingting long Hemia
-
?From wanem hem i impoten blong stadi oltaem long toktok blong God insaed long ol skripja?
-
?Olsem wanem mi save mekem skripja stadi blong mi i gat moa mining?
-
?Olsem wanem nao mi save yusum teknoloji long stret mo gud fasin, blong helpem mi blong mekem stamba tingting blong mi i kam tru?
-
?Hem i minim wanem blong werem klos blong faet blong God?
Lukaotem long Ol Skripja
Jisas Kraes “hem i laef mo laet blong wol. Luk, hem i toktok blong trutok mo stret mo gud fasin” (Alma 38:9; luk tu long Jon 1). Blong stap stadi long toktok blong God insaed long ol tabu skripja, bae i mekem laef blong yu i save fulap gud long evri samting (luk long Jon 10:10). Ol toktok blong Hem bae oli fulumap yu—mo olgeta we yu tijim—wetem laet mo trutok. Bae oli helpem yu—mo olgeta we yu tijim—blong laef long wan stret mo gud laef mo kasem tabu proteksen mo paoa. Bae oli helpem yu blong kam blong save Hem mo testem lav blong Hem, we i swit bitim evri samting we oli swit. Ol toktok blong Hem bae oli fulumap sol blong yu wetem glad (1 Nifae 8:11–12; luk long ol ves 1–34).
Ol skripja oli ol presen we i kam long heven. Wan long ol bigfala blesing blong misin blong yu i blong gat wan taemtebol blong stadi olgeta evri dei.
Stadi blong gospel i wan long ol nambawan kaen wok long saed blong spirit we yu save mekem. Hem i blong mekem yu kam strong tugeta long saed blong tingting mo long saed blong spirit. Olsem we Alma i bin tijim, taem yu “planem” toktok blong God insaed long hat blong yu, bae “hem i stat blong givim moa laet long save blong [yu],” mo hem i stat blong kam swit long yu (Alma 32:28; luk tu long Inos 1:3–4). Taem yu gohed blong stadi mo yusum toktok blong God, bae “rus blong hem i gro; mo … bae i kam wan tri we i gro i kam antap we i lid i go long laef we i stap oltaem” (Alma 32:41; luk tu long ol ves 42–43). Save mo testemoni blong yu long gospel bae i kam antap. Tingting blong hat blong yu mo janis blong yu blong serem gospel bae i kam antap.
Blong lanem samting long wan gudfala tija hem i impoten, be hem i impoten tu long yu blong gat ol eksperiens we i gat mining long saed blong stap lanem samting aot long skripja stadi blong yuwan. Hemia i tru tu blong ol pipol we yu tijim.
Blong andastanem ol skripja bae i save kam wan jalenj long stat. Be, taem yu gohed wetem longfala tingting blong stap stadi ol toktok blong God, andastaning blong yu bae i gro. Bae yu kam blong mekem taem blong ol skripja stadi blong yu i gat valiu. Bae yu wantem tumas blong lukluk fored long wanem we bae yu lanem mo eksperiensem.
Blong kam blong save mo lavem ol skripja i save kam wan bigfala blesing blong wan laeftaem blong misinari seves blong yu. Taem yu gat eksperiens long ol blesing blong skripja stadi long taem blong misim blong yu, bae yu wantem blong gohed long hem blong ful laef blong yu.
“Stamba tingting blong evri skripja i blong fulumap ol sol blong yumi wetem fet long God, Papa mo Pikinini blong Hem, Jisas Kraes—fet se Tufala i stap laef; fet long plan blong Papa from bodi we i nomo save ded mo laef we i no save finis; fet long Atonmen mo Laef Bakegen long Ded blong Jisas Kraes, we i mekem se i gat plan blong stap glad; fet blong mekem gospel blong Jisas Kraes i kam wei blong laef blong yumi; mo fet blong kam blong save ‘yu, we yu nomo yu tru God, mo se mi, Jisas Kraes, we [Hem] i sanem i kam’ (Jon 17:3)” (D. Todd Christofferson, “The Blessing of Scripture,” Liahona, Mei 2010, 34).
Stadi blong Yuwan
Lukluk pikja blong Josef Smit long stat blong japta ia. Ridim Josef Smit—Histri 1:11–13. Ansarem ol kwestin ia long stadi jenol blong yu.
-
?Olsem wanem nao riding mo tingting hevi long Jemes 1:5 blong Josef Smit i lidim hem blong kasem revelesen?
-
?Wanem paoa nao stadi blong hem i gat long ol fiuja jeneresen?
-
?Wanem risal nao desisen blong hem blong stadi mo lukaotem skripja i gat long laef blong yu?
-
?Olsem wanem nao gospel stadi blong yu i bin jenisim laef blong yu mo laef blong ol narafala man?
Stadi long Ol Skripja
?Wanem nao yu lanem long ol skripja ia abaot olsem wanem blong kam moa kolosap long gospel stadi?
Lukaotem Spirit
Blong stap lanem samting aot long gospel i moa bitim blong stap kasem infomesen. Hem i wan rod tu long saed blong spirit blong stap yusum trutok we i no save finis anda long daereksen blong Tabu Spirit (luk long Jekob 4:8; Doktrin mo Ol Kavenan 50:19–25). Lukaotem mo trastem Spirit blong tijim yu taem yu stap stadi long ol skripja. Hemia bae i hapen kasem mak ia se bae yu yusum ol skripja long yuwan mo wantem blong tekem aksen folem wanem we yu lanem (luk long 1 Nifae 19:23; Moronae 10:4; Josef Smit—Histri 1:18).
Prea mo stadi long ol skripja bae i openem wan windo blong revelesen blong Spirit i toktok long maen mo hat blong yu. Hem bae i blesem yu wetem daereksen, insperesen, mo ol ansa blong ol kwestin blong yu. Tru long stadi blong yu long ol skripja, Tabu Spirit bae i givim paoa mo givim kamfot long yu. Hem bae i givim save long yu mo bilif we bae i blesem laef blong yu mo mekem yu save blesem laef blong ol narawan blong taem we bae i no save finis.
Stadi long Ol Skripja
?Wanem nao hem i wok blong Tabu Spirit blong stap helpem wan blong lanem gospel?
Lukaotem Ol Ansa blong Ol Kwestin
Olsem wan misinari bae yu harem plante kwestin. Bae yu gat ol kwestin tu blong yuwan. Blong stap lukaotem ol skripja mo ol narafala risos we oli apruvum blong kasem ol ansa blong ol kwestin ia, i wan wei blong givim moa paoa long stadi blong yu. Raetemdaon ol kwestin mo wanem yu lanem mo filim insaed long stadi jenol blong yu.
Yusum ol risos we oli stret long ol stadi blong yu mo we yu save dipen long olgeta—faswan, ol skripja, ol toktok blong ol profet we oli stap laef, mo Prijim Gospel blong Mi. Yusum ol risos insaed long Gospel Laebri, olsem Gaed long Ol Skripja, Baebol Diksonari, index to the triple combination, Gospel Topik, mo Gospel Topik essays. Lanem ol wanem kaen risos we i stap long ol lanwis blong ol pipol we yu tijim.
“Wan samting we mi lanem long laef i olsem wanem evri taem Lod i stap ansa long ol kwestin mo givim kaonsel long yumi tru long ol skripja. … Letem yumi go long Lod tru long prea, krae from help o ansa; mo ol ansa ia bae oli kam taem yumi openem ol skripja mo stat blong stadi long olgeta. Samtaem hem i olsem se wan toktok we i blong wan handred o taosen yia i pas, oli bin ridim speseli blong ansarem kwestin blong yumi” (M. Russell Ballard, “Be Strong long the Lord, and long the Power of His Might” [Brigham Young University fireside, Mar. 3, 2002], 5, speeches.byu.edu).
Laef Folem Wanem Yu Lanem
“Taem yu stap filim glad we i kam taem yu kam antap blong andastanem gospel, bae yu wantem blong yusum wanem we yu lanem. Traehad blong stap laef long wan wei we i go wetem wanem yu stap lanem. Taem yu stap mekem olsem, bae i mekem fet, save, mo testemoni blong yu i kam strong moa. Blong stap tekem aksen folem wanem we yu lanem bae i ademap andastaning mo gat filing blong wantem blong gohed strong. (Luk long Jon 7:17.)
“Tru doktrin, taem oli andastanem gud, i jenisim ol fasin mo wei blong mekem samting. Stadi blong ol [doktrin] blong gospel bae i jenisim ol fasin kwiktaem moa bitim we wan stadi long saed blong fasin bae i jenisim fasin” (Boyd K. Packer, “Little Children,” Ensign, Nov. 1986, 17).
Stadi blong Yuwan
?Wanem nao ol skripja ia oli tijim abaot stap lanem gospel?
Yusum Gospel Laebri
Gospel Laebri i wan onlaen risos we i save mekem stadi mo tijing blong yu i kam moa gud. Blong save gud wetem ol samting we oli stap insaed. Sam gudfala samting we i kam taem yu yusum Gospel Laebri olsem pat blong stadi mo tijing blong yu oli mekem lis blong hem daon ia.
-
Hem i gat ol skripja we yu save yusum, ol toktok blong ol profet we oli stap laef, mo ol narafala samting insaed long Jos long plante lanwis long teks, odio mo vidio fomat.
-
Sapos yu raetemdaon wanem yu lanem mo filim we i kam long yu insaed long Gospel Laebri, yu save gohed blong luk mo kam strong tru long infomesen ia afta long misin blong yu.
-
Hemia i letem yu blong serem ol skripja moa isi, ol kwot blong ol profet we oli stap laef, mo ol vidio wetem olgeta we yu stap tijim.
-
Plante long ol pipol we yu tijim mo baptaesem bae oli yusum Gospel Laebri blong kasem ol risos blong Jos. Blong kam blong save moa gud ol samting insaed long Gospel Laebri bae i mekem se yu save helpem olgeta blong lanem blong yusum.
Stadi blong Yuwan
Lukluk tru long “Gospel Library User Guide.” Jusum wan samting insaed long Gospel Laebri blong traem long nekis stadi blong yuwan mo kompanion stadi. ?Olsem wanem nao pat ia i helpem yu long stadi blong yu? ?Wanem nao bae yu traem long nekis taem? Tijim ol narafala misinari long wanem we yu lanem.
Yusum Teknoloji wetem Stret mo Klin Fasin
Lod mo ol profet blong Hem oli bin trastem yu wetem teknoloji blong help mekem wok blong Hem i hapen. Teknoloji i save mekem stadi blong yu long ol skripja i kam antap mo Prijim Gospel blong Mi. Ol dijitol risos oli save helpem yu tu blong mekem plan. Oli save helpem yu long ol tijing blong yu mo long ol hadwok blong yu blong faenem ol pipol blong tijim.
Blong stap yusum teknoloji wetem waes tingting mo long stret mo gud fasin, bae i save helpem yu blong mekem stamba tingting blong yu olsem wan misinari i kam tru. Hem i save helpem yu tu blong stap longwe long ol materiol we oli no stret blong yusum.
Folem Spirit blong save wetaem mo olsem wanem blong yusum teknoloji long ol wei we bae i helpem fet blong yu long Jisas Kraes i kam strong mo fet blong olgeta we yu givim seves mo tijim olgeta.
Folem Ol Sef Step blong Stap Yusum Teknoloji
Ol fo sef step aotlaen we oli stap andanit ia bae oli helpem yu blong yusum teknoloji long stret fasin. Blong stap folem ol sef step ia i wan impoten wei blong yu blong “kasem paoa blong God, we i olsem olgeta samting blong faet we i blong blokem ara. Nao taem Setan i stap wokem ol giaman trik blong hem, be bambae yufala i save stanap strong” (Efesas 6:11).
Stap Wan Wetem Ol Kwaet Voes long Saed blong Spirit.
Nifae i promes se “Sapos yufala i go tru long rod, mo kasem Tabu Spirit, bae hem i soem long yufala evri samting we bae yufala i mas mekem (2 Nifae 32:5). Papa blong yu long Heven i bin givim long yu tu presen we i gat paoa we bae i helpem yu: klin tingting blong fridom blong joes mo presen ia we hem i Tabu Spirit. Yu gat paoa blong jusum blong folem daereksen blong Tabu Spirit. Daereksen we i kam tru long spirit blong Hem, i impoten tumas blong stap helpem yu blong mekem gud taem yu stap yusum teknoloji. Hem i helpem yu tu blong stap sef long ol ivel samting.
Lukluk Nomo long Stamba Tingting blong Yu Olsem Misinari
Lod i talem: “Sapos ae blong yufala i lukluk long glori blong mi nomo, ful bodi blong yufala bambae i fulap long laet, mo bambae i no gat tudak insaed long yufala; mo bodi ia we i fulap wetem laet i andastanem evri samting” (Doktrin mo Ol Kavenan 88:67). Blong gat ae blong yu i lukluk nomo long glori blong God i minim se lukluk blong yu i mas lukluk nomo fulwan long stamba tingting blong God, we i stap tu olsem stamba tingting blong yu olsem wan misinari.
Fasin blong yu blong stap yusum teknoloji i mas stap long medel blong stamba tingting blong yu olsem wan misinari. Onem divaes blong yu nomo afta we yu luksave wanem stamba tingting blong yu blong mekem olsem wan misinari we bae yu yusum blong mekem. Afta, ofem taem yu finisim stamba tingting blong yu.
Fulap taem, bae yu fesem ol samting we oli no stret long Intanet taem yu stap lukluk Intanet nating nomo, mo we yu no gat wan stret tingting o wok blong mekem long Intanet.
Kontrolem Yuwan
Momon i raetem: “Mi mi wan disaepol blong Jisas Kraes, Pikinini blong God. Hem i bin singaotem mi blong talemaot toktok blong hem long medel blong ol pipol blong hem, blong oli save gat laef we i no gat en” (3 Nifae 5:13). Olsem Momon, yu yu wan disaepol blong Kraes. Blong stap givim seves olsem wan fultaem misinari i wan spesel janis blong mekem fasin blong kam wan disaepol i kam moa bigwan.
Ol toktok ia disaepol mo fasin blong jusum blong kontrolem yuwan i kamaot long semmak stamba toktok we i minim se “wan we i stap lan” o “wan we narawan i stap tijim.” Blong stap wan disaepol blong Kraes i minim se yu lukaotem blong folem Hem mo obei ol komanmen blong Hem. I minim blong oltaem lanem mo tij abaot Kraes.
Kontrolem yuwan mo mekem ol stret mo gud joes long olsem wanem yu yusum teknoloji. Jusum blong folem ol sef step. Taem yu stap toktok fes tu fes wetem ol pipol, no jekem ol mesej o ansa long ol kol. Tekem kontrol long olsem wanem yu yusum ol divaes ia. No letem oli kontrolem yu.
Lod i talemaot se, “Hem we i akseptem loa blong mi mo i mekem samting folem, hem ia, hem i disaepol blong mi; mo hem we i talem se hem i akseptem loa ia, mo i no mekem samting folem, hem ia, hem i no disaepol blong mi, mo oli mas sakemaot hem long medel blong yufala” (Doktrin mo Ol Kavenan 41:5). From se i no gat wan we i stret gud evriwan, Lod i wantem luk se yumi gohed strong mo oltaem wokhad blong folem Hem.
Naesfala samting abaot gospel hem i we yumi save kasem fogivnes taem yumi sakem sin—mo Lod i wantem yumi blong sakem sin mo no pusumbak dei blong sakem sin (luk long Doktrin mo Ol Kavenan 109:21). Sapos yu mekem wan mistek, we i tekem tu fasin blong no yusum gud teknoloji, sakem sin long semmak taem mo gohed blong traem blong laef folem loa blong Hem. Hemia i pat blong stap olsem wan disaepol blong Kraes.
Stap Wan
Lod i talem: “Stap wan; sapos yufala i no stap wan, yufala i no blong mi” (Doktrin mo Ol Kavenan 38:27). Helpem misin blong yu blong i developem wan kalja blong yuniti, mo fasin blong stap akaontebol mo lav mo sore blong mekem se yufala i save mekem wanwan long yufala i kam moa strong, mo sapsapotem wanwan long yufala.
Evri misinari oli mas filim se i stret mo gud blong stap askem help taem oli nidim. Wan misinari we i strong long saed blong Spirit, i save helpem wan we i kam slak (luk long Doktrin mo Ol Kavenan 84:106). Sapos we, yu fesem temtesen, askem kompanion blong yu o misin lida blong yu blong helpem yu.
Kolosap evri jalenj we i go wetem Intanet o wetem ponografi, oli hapen long taem we yu stap yuwan. Yusum ol divaes ia nomo taem yu save luk wanwan skrin blong yutufala. Gat strong paoa long tingting mo stap akaontebol long wanwan long yutufala.
Lod i gat tras long wanwan misinari we Hem i singaotem, we i gat yu tu. Hem i bin givim ol kompanion mo ol lida blong help protektem mo sapotem yu. Semmak olsem we Alma i sapotem kompanion blong hem Amulek, lukaotem blong mekem wanwan long yutufala i kam strong (luk long Alma 15:18).
?Wanem Nao Bae Yu Mekem Sapos Yu Filim se Yu No Strong blong Faetbak o I Isi blong Oli Winim Yu?
Blong lanem blong folem ol fofala sef step ia i nidim efot, fasin blong save kontrolem yuwan, mo praktis. Iven afta we ol sef step ia i kam wan fasin blong yu long olsem wanem yu stap tingting mo tekem aksen, bae yu gat ol taem we bae yu filim se yu no sef o wan i save mekem nogud long yu. Maet yu bin gat sam fasin we i mekem yu no strong tumas blong yusum gud teknoloji bifo long misin blong yu we i bin had blong yu lego. Sam misinari oli bin traehad blong stopem ponografi bifo oli kasem misin kol blong olgeta mo maet oli save fesem temtesen blong foldaon bakegen i go long ol olfala fasin blong olgeta.
Ol prinsipol daon ia bae oli helpem yu blong laef folem ol sef step ia mo mekem yu kam strong agensem temtesen:
-
Stap luksave ol tingting, filing, mo fasin blong yu. Andastanem olsem wanem oli save mekem yu filim se yu no sef blong no yusum gud teknoloji long stret wei.
-
Jusum blong tekem aksen. Ansa long ol wei we i stret mo gud, long wanem we yu stap filim.
-
Lan, sakem sin mo kam moa gud. Yusum ol eksperiens blong yu blong gohed blong stap lanem samting mo stap kam moa gud.
Yu no nid blong winim ol jalenj ia yuwan. Dipen long paoa we i kam tru long Atonmen blong Sevya mo ol kavenan we yu bin mekem wetem Hem. Lod i save ol jalenj we yu stap fesem, mo Hem bae i helpem yu long bigfala wok ia.
Blong stap tingbaot Sevya oltaem, i save helpem yu blong yusum teknoloji long stret mo klin fasin. Stap fetful long tras we Hem i bin givim long yu. Tingting blong mekem “blong wokbaot long stret laef long fored blong hem” (Alma 53:21; luk tu long ves 20). Filim fasin blong talem tangkyu from evri samting we Hem mo Papa i bin mekem blong yu, bae i helpem yu blong mekem ol gudfala joes abaot olsem wanem blong yusum ol dijitol risos.
Misin blong yu i wan bigfala janis blong lan blong yusum teknoloji wetem waes tingting. Ol komitmen mo ol gudfala fasin we yu developem long taem blong misin blong yu bae i blong gud blong yu blong ful laef blong yu.
Putum ful Klos blong Faet blong God
Paoa blong yu blong stap no foldaon long temtesen bae i kam antap taem yu stadi mo yusum ol skripja, ol toktok blong ol profet we oli stap laef, Prijim Gospel blong Mi, Ol Misinari Standet blong Ol Disaepol blong Jisas Kraes, mo aotlaen blong ol sef step long japta ia.
Blong stap putum “ful klos blong faet blong God,” bae yu save luksave trutok aot long rong. Bae yu gat sus long leg wetem “gospel blong pis.” Stap putum “jesplet blong stret mo gud fasin” bae i protektem yu. Wetem “sil blong fet”, bae yu save blokem evri spia blong faea blong enemi. Bae yu tekem “naef blong faet blong Spirit blong Hem” blong tijim trutok wetem paoa mo atoriti. Bae yu stap strong agensem ol paoa blong wol we bae oli save lidim yu go rong, stap mekem yu stap yuwan mo iven kam wan strenja. (Luk long Efesas 6:10–18; luk tu long 1 Nifae 8:20, 30; 15:24–25; Hileman 3:29–30; Doktrin mo Ol Kavenan 27:15–18; Josef Smit—Matiu 1:37; 2 Timoti 3:15–17.)
Stadi blong Yuwan
Wetem prea, faenemaot wan long ol sef step blong yu lukluk nomo long hem long wik ia. Lukaotem Help blong Lod. Raetemdaon ol filing mo wanem we yu stap lanem.
Ol Aedia blong Stadi mo Yusum
Stadi blong Yuwan
-
Traem sam long ol tingting ia blong mekem stadi blong yu i kam moa gud:
-
Ridim ol skripja wetem ol kwestin mo ol samting we yu stap wari from insaed long maen blong yu.
-
Serem wanem yu lanem wetem ol narafala misinari mo wetem olgeta we yu tijim. Blong stap eksplenem wan doktrin o prinsipol, bae i helpem yu blong tingbaot mo kasem wan klia tingting.
-
Stadi folem topik. Lukluk nomo long wan topik we bae i helpem yu mo ol pipol we yu tijim.
-
Askem yuwan, “?Wanem nao man blong raet i stap talem? ?Wanem nao i stamba mesej? ?Olsem wanem nao bae mi yusum hemia? ?Long wanem wei nao hemia i save helpem wan we yumi stap tijim?”
-
Pikjarem long maen o dro wanem we yu stap stadi long hem. Eksampol, pikjarem long maen se i bin olsem wanem long taem we Amon i stanap long fored blong king blong Ol Man blong Leman.
-
Raetem stamba aedia blong wan paragraf long wan sentens o wan sot paragraf.
-
Lanem baehat ol skripja we oli eksplenesen mo sapotem ol prinsipol we yu tijim.
-
-
Skelem yuwan folem hemia (1=neva, 3=samtaem, mo 5=kolosap evri taem).
-
Mi stap kam antap long fet mo kam blong save Papa long Heven mo Jisas Kraes moa gud.
-
Mi tingting long olgeta pipol we mi stap tijim long taem we mi stap stadi.
-
Truaot long dei, mi tingbaot wanem we mi bin stadi long hem long moning.
-
Taem mi stadi, ol aedia oli kam long maen blong mi we i neva bin hapen olsem bifo.
-
Mi raetemdaon ol filing mo tingting blong mi mo aedia insaed long wan stret ples.
-
Mi stap wekap taem mi stadi.
-
Mi stap glad from taem blong mekem stadi blong miwan.
-
Mi stap glad from taem blong kompanion stadi.
Luklukbak long ol ansa blong yu. ?Wanem nao yu stap mekem i gud? ?Olsem wanem nao yu save kam antap gud? Putum wan o tu gol blong mekem kwaliti blong stadi blong yu i kam moa gud.
-
Kompanion Stadi mo Dei blong Jenisim Kompanion
-
Ridim tugeta sam long ol sentens ia. Toktok raon long ol blesing we bae oli kam taem yumi stap stadi long toktok blong God. ?Wijwan long ol paragraf ia bae i bes wan blong helpem olgeta we yutufala i tijim?
Distrik Kaonsel, Ol Son Konfrens, mo Misin Lidasip Kaonsel
-
Askem ol misinari blong raetem wan o tu kwestin abaot gospel long wan lesen long japta 3. Ol kwestin ia i save blong olgetawan nomo o blong ol pipol we ol tijim. Invaetem ol misinari blong serem ol kwestin blong olgeta wetem grup. Blong wanwan kwestin, toktok raon long olgeta ia:
-
?Olsem wanem nao taem yumi ansarem kwestin ia i blesem laef blong ol misinari?
-
?Olsem wanem nao hemia i save blesem laef blong ol pipol we hem i stap tijim?
-
?Olsem wanem nao wan misinari i save faenem ansa?
-
-
Seraotem ol misinari i go long ol grup, mo asaenem wanwan grup blong stadi long wan long olgeta fo sef step mo ol skripja we oli go wetem. Invaetem ol misinari blong serem wanem we oli bin lanem mo olsem wanem ol sef step ia i bin helpem olgeta.
Ol Misin Lida mo Ol Misin Kaonsela
-
Samtaem joenem ol misinari long ol kompanion stadi blong olgeta.
-
Long taem blong ol intaviu o storian, askem sam long ol kwestin ia:
-
?Wanem ol filing mo tingting we yu bin kasem i no longtaem long taem blong skripja stadi blong yu?
-
?Wanem japta o seksen blong Prijim Gospel blong Mi i bin helpem yu bigwan long tu wik we i pas? ?Long wanem wei nao hemia i bin helpem yu?
-
?Wanem nao yu stap mekem long stadi blong yuwan we i stap helpem yu blong lan?
-
-
Long ol intaviu, tingting blong luklukbak long ol sef step blong stap yusum teknoloji mo askem ol misinari wanem oli stap lanem taem oli stap yusum olgeta.
-
Serem ol niufala tingting we yu kasem long stadi blong yuwan. Serem ol eksperiens blong yu we yu stap raetemdaon long long stadi jenol blong yu mo testemoni blong yu abaot hamas i impoten blong stadi gospel.