Գլուխ 3

Մկրտվելու և հաստատվելու հրավեր

Եկեք Աստծո հոտը, Ուոլթեր Ռեյն

Վարդապետության հիմունքներ

Մենք բոլորս Երկնային Հոր զավակներն ենք: Մենք եկել ենք երկիր սովորելու, աճելու և ավելի նմանվելու Նրան, որպեսզի կարողանանք վերադառնալ Նրա ներկայություն (տես Մովսես 1.39): Առանց աստվածային օգնության մենք չենք կարող նմանվել Նրան կամ վերադառնալ Նրա մոտ: Մեր Երկնային Հայրն ուղարկեց Իր Որդուն՝ Հիսուս Քրիստոսին, որպեսզի Նա քավի մեր մեղքերը և արձակի մահվան կապանքները (տես 3 Նեփի 27.13–22):

Մենք ստանում ենք Քրիստոսի քավիչ զորությունը՝ հավատք գործադրելով Նրա հանդեպ ապաշխարության համար, մկրտվելով, հաստատման միջոցով Սուրբ Հոգու պարգևը ստանալով և համբերելով մինչև վերջ: Մկրտության ուխտի պահումը մեզ Աստծուն կապելու առաջին քայլն է, որպեսզի Սուրբ Հոգին կարողանա մաքրել, զորացնել և փոխել մեր էությունը դեպի լավը: Այս սրբագործող ազդեցության զգացողությունը կոչվում է հոգևոր վերածնունդ (տես 2 Նեփի 31.7, 13–14, 20–21, Մոսիա 5.1–7, 18, 27.24, 3 Նեփի 27.20, Հովհաննես 3.5)։

Հոգևոր վերածնունդը սկսվում է այն ժամանակ, երբ մենք մկրտվում ենք ջրով և Հոգով: Մկրտությունն ուրախ և հուսադրող արարողություն է: Երբ մենք մկրտվում ենք կոտրված սրտով և փշրված հոգով, մենք սկսում ենք կյանքը նորովի՝ Աստծո պահպանող զորությամբ: Մկրտվելուց և հաստատվելուց հետո մենք կարող ենք շարունակել զորանալ՝ արժանավայել ընդունելով հաղորդությունը: (տես 2 Նեփի 31.13, Մոսիա 18.7–16, Մորոնի 6.2, Վարդապետություն և Ուխտեր 20.37):

Հրավերի հղում

Երբ դուք զգաք, որ առաջնորդվում եք Հոգով, հրավիրեք մարդկանց մկրտվել և հաստատվել: Դա կարող է պատահել ցանկացած դասի ընթացքում։

Ուսուցանեք մկրտության վարդապետությունը և օգնեք մարդկանց հասկանալ Քրիստոսի վարդապետությունը (տես դաս 3-ը): Ուսուցանեք մկրտության ուխտի կարևորության և ուրախության, մեղքերի թողություն ստանալու և Սուրբ Հոգու պարգևը հաստատման միջոցով ստանալու մասին:

Պատրաստեք մարդկանց մկրտության հրավերին՝ համոզվելով, որ նրանք հասկանում են, թե ինչ եք ուսուցանել նրանց և այն ուխտը, որը նրանք կապելու են: Մկրտության ուխտըհետևյալն է.

• Պատրաստ լինել ձեզ վրա վերցնել Հիսուս Քրիստոսի անունը:

• Պահել Աստծո պատվիրանները:

• Ծառայել Աստծուն և ուրիշներին

• Համբերել մինչև վերջ: (տես դաս 4-ը)։

Կարող եք կիսվել հետևյալով.

«Երբ մենք մկրտվում ենք, մենք «վկայում ենք [Աստծո] առաջ, որ [մենք] մտել ենք նրա հետ ուխտի մեջ, որ [մենք] կծառայենք նրան և կպահենք նրա պատվիրանները»։ Այս ուխտը կապելիս Նա խոստանում է, որ Նա «իր Հոգին ավելի առատորեն դուրս կթափի [մեզ] վրա» (Մոսիա 18.10):

Մկրտվելու ձեր հրավերը պետք է լինի հստակ և անմիջական: Դուք կարող եք ասել․

«Դուք կհետևե՞ք Հիսուս Քրիստոսի օրինակին՝ մկրտվելով որևէ մեկի կողմից, ով կարգվել է կատարելու այս արարողությունը: Մենք կօգնենք ձեզ նախապատրաստվել մկրտությանը: Մենք հավատում ենք, որ դուք կարող եք պատրաստ լինել [ամսաթիվ]-ին: Դուք պատրաստվու՞մ եք մկրտվել այդ օրը»։

Ցանկացած հրավեր ուղղելիս խոստացեք մեծ օրհնություններ, որոնք մարդիկ կստանան, երբ նրանք ընդունեն մկրտվելու հրավերը և պահեն կապված ուխտերը: Կիսվեք այս օրհնությունների մասին ձեր վկայությամբ:

Ուսուցանեք, որ մկրտությունն ու հաստատումը վերջնական նպատակակետ չեն: Ավելի շուտ, դա է դարձի ճանապարհին գտնվող այն կետը, որը լիարժեքորեն հույս, ուրախություն և Աստծո զորություն է բերում մարդու կյանք (տես Մոսիա 27.25–26)։ Երբ մարդիկ մկրտվում և հաստատվում են, նրանք սպասում են Սուրբ Հոգով սրբագործվելուն՝ առաջ ընթանալով ուխտի արահետով։

Եթե հնարավոր է, հրավիրեք նրանց, ում ուսուցանում եք, ներկա գտնվել որևէ մկրտության ծառայության և հաղորդության ժողովի, որի ընթացքում ինչ-որ մեկը հաստատվում է:

Մկրտվելու հրավերի գաղափարներ

Կարող եք կարդալ սուրբ գրություններում տեղ գտած Հիսուսի մկրտության վերաբերյալ պատմությունը (տես Մատթեոս 3.13–17): Կարող եք նաև ցույց տալ Աստվածաշնչի տեսանյութը, որը պատկերում է Փրկչի մկրտությունը կամ Մորմոնի Գրքի տեսանյութը, որտեղ մկրտվում են Փրկչի աշակերտները:

Դուք կարող եք նաև կարդալ Նեփիի պատմությունը Հիսուսի մկրտության մասին (տես 2 Նեփի 31.4–12): Հիսուս Քրիստոսի մկրտության պատմությունների ընթերցանությունը կարող է զորացնել նրանց, ում ուսուցանում եք:

Սուրբ գրությունների ուսումնասիրություն

Ուսումնասիրեք հետևյալ սուրբ գրությունները:

• 2 Նեփի 31․4–12

• Մորոնի 6

• Վարդապետություն և Ուխտեր 20․37, 22

• Մատթեոս 3.13–17

Գրավոր ամփոփեք ձեր սովորածը:

Ուսուցման գաղափարներ

Երկնային Հայրը գուցե արժեքավոր հոգևոր պատրաստվածությամբ օրհնել է այն մարդկանց, ում դուք կգտնեք: Նրանց կողմից արված քայլերը հավանաբար արդեն նախապատրաստել են նրանց Հիսուս Քրիստոսի Վերջին Օրերի Սրբերի Եկեղեցում մկրտության միջոցով ուխտեր կապել Աստծո հետ: