Wase 3: Lesoni 1

Na iTukutuku ni kena Vakalesui Mai na Kosipeli i Jisu Karisito

Era na Vakataroga Beka na Tamata

• E Tiko Dina Beka na Kalou?

• E rawa vakacava meu vakila niu voleka cake vua na Kalou?

• Meu na vulica vakacava na dina ena vuravura veilecayaki nikua?

• Ena vukei au vakacava na lotu?

• Na cava na vuna sa rui levu kina na lotu?

• Na cava beka sa rui levu kina na dredre au sotava?

• Meu na kunea vakacava na vakacegu ena loma ni gauna veibolei?

• Ena rawa vakacava meu mamarau cake?

• Ena vukea vakacava beka na vuravura nikua e dua na parofita?

Mai na itekivu ni vuravura, sa vakatakila na kosipeli vei ira na Luvena na Kalou mai vei ira na parofita. Sa vakayacora oqo o Koya mai vua na Luvena, ko Jisu Karisito. Ena gauna makawa, sa vakatakila ko Jisu na kosipeli vei ira na parofita me vakataki Atama, Noa, Eparaama, kei Mosese. Ia e levu na tamata era a besetaka.

Ena rua na udolu na yabaki sa oti, a mai vakavuvulitaka sara ga vakataki Koya o Jisu Karisito na Nona kosipeli ka tauyavutaka na Nona Lotu. Era a besetaki Jisu sara mada ga o ira na tamata. Ni oti sara ga na Nona mate, sa takalevu sara na lutu tani mai na dina kei na Nona Lotu na Turaga. Sa sega tale ni tiko e vuravura na taucoko ni kosipeli kei na lewa ni matabete.

Ena vica na senijiuri e muri, sa kaciva na Kalou e dua tale na parofita, o Josefa Simici. A vakalesuya mai na Kalou na taucoko ni kosipeli mai vua ka vakadonuya vua me tauyavutaka tale na Lotu i Jisu Karisito.

Sa dua na veivakalougatataki cecere ni noda gauna oqo na kena sa tu na taucoko ni kosipeli i Jisu Karisito e vuravura. E vukei keda na kosipeli me da sauma na veitaro bibi ni bula. Era liutaki keda ena veigauna dredre na parofita bula. Sa tu tale e vuravura na lewa ni matabete ni Kalou me vakalougatataki ira na Luvena.

Vakatutu baleta na Veivakavulici

E vakarautaki ena iwasewase oqo e dua na sabolo ni ituvatuva me vukea nomu vakavakarau mo veivakavulici. E okati talega kina na ivakaraitaki ni taro kei na veisureti e rawa nio vakayagataka.

Nio vakarau veivakavulici, vakasamataka ena masumasu na ituvaki ni tamata yadua kei na nona gagadre vakayalo. Vakatulewataka na ka ena veivuke vakalevu me vakavulici. Vakarau mo vakamacalataka na vosa eso era na sega beka ni kila na tamata. Tuvatuva me vaka ga na levu ni gauna ona taura, ka nanuma tiko me vakaleleka ga na lesoni.

Digia na ivolanikalou mo vakayagataka nio veivakavulici. Na iwasewase ni “Yavu Vakaivunau” ena lesoni e okati kina e vuqa na ivolanikalou ena veivuke.

Vakasamataka na taro cava me tarogi nio veivakavulici. Tuva na veisureti me caka ka na vakayaloqaqataka na tamata me yavala.

Vakabibitaka na veivakalougatataki yalataki ni Kalou, ka wasea na nomu ivakadinadina ni veika o vakavulica.

Na Veika mo na Vakavulica vei ira na Tamata ena Loma ni 15-25 na Miniti

Digia e dua se sivia mai na veivakavuvuli oqo mo vakavulica. Na yavu vakaivunau ni veivakavuvuli yadua sa toka tarava mai na ituvatuva oqo.

Na Kalou E Tamada Vakalomalagi Dauloloma

• Na Kalou e Tamada Vakalomalagi, ka eda sa Luvena. A buli keda me da ucui Koya.

• Na Kalou e kilai keda yadua ka lomani keda.

• E taukena tu na Kalou e dua na yago vakalagilagi, ka uasivi sara ni lewe kei na sui.

• E vinakata na Kalou me vakalougatataki keda ena vakacegu kei na reki e taucoko ka na tawamudu.

• Ena vuku ni nona lomani keda na Kalou, sa tala mai kina na Luvena, ko Jisu Karisito, me vueti keda mai na ivalavala ca kei na mate.

Sa Vakatakila mai na Kalou na Kosipeli mai vei ira na Parofita ena Veitabagauna Kecega

• Sa kacivi ira na parofita na Kalou me ra matataki Koya e vuravura.

• Ena gauna makawa, a kaciva na Kalou na parofita me vakataki Atama, Noa, Eparaama, kei Mosese.

• Na parofita bula e ciqoma na ivakatakila mai vua na Kalou me vakavulici keda ka liutaki keda ena gauna oqo.

Na Veiqaravi ni iVakabula e Vuravura kei na Veisorovaki

• Sa Luve ni Kalou o Jisu Karisito.

• Ena Nona veiqaravi e vuravura, e a vakavuvulitaka kina o Jisu na Nona kosipeli ka tauyavutaka na Nona Lotu.

• A kaciva o Jisu e Tinikarua na iApositolo ka solia vei iratou na lewa me ratou liutaka na Nona Lotu.

• Ena itinitini ni Nona bula, a sorovaka na noda ivalavala ca ko Jisu ena Nona vakararawataki ena Were mai Kecisemani kei na nona Vakamatei ena Kauveilatai. Ni oti na mate nei Jisu, a tucake tale o Koya.

• Ena isoro ni veivakaduavatataki nei Jisu, sa rawa kina ni da vosoti ka savai mai na noda ivalavala ca ni da sa veivutuni. Oqo e kauta mai vei keda na vakacegu ka rawa kina ni da lesu tale ki na iserau ni Kalou ka rawata na reki e taucoko.

• Ena vuku i Jisu, eda na tucake kece tale ni oti noda mate. Sa kena ibalebale oqo ni na cokoti vata tale na yalo kei na yago ni tamata yadua ka bula me tawamudu.

Na Lutu Tani

• Ni ra sa mate na iapositolo nei Jisu sa yaco e dua na lutu tani rabailevu mai na kosipeli kei na Lotu i Jisu Karisito.

• Ena gauna oqo, era sa veisautaka na tamata e vuqa na ivakavuvuli ni kosipeli. Era sa veisautaka talega na tamata e vuqa na cakacaka vakalotu me vaka na papitaiso. Sa sega tale ni qai tiko kina e vuravura na lewa ni matabete kei na Lotu a tauyavutaka o Jisu.

Na Vakalesui mai ni Kosipeli i Jisu Karisito ki vei Josefa Simici

• A mani vakasaqara o Josefa Simici me kila se lotu cava e nona Lotu dina na Kalou me rawa ni lewena. A rairai vei Josefa Simici na Tamada Vakalomalagi kei Jisu Karisito ena 1820. Sa vakatokai oqo na iMatai ni Raivotu.

• A kacivi Josefa Simici na Kalou me dua na parofita, me vaka ga Nona a kacivi ira na parofita ena veigauna e liu.

• A vakalesuimai na Kosipeli i Jisu Karisito mai vua na Parofita ko Josefa Simici.

• Era qai vakalesuya mai na matabete eso tale na italai vakalomalagi, ka soli na lewa vei Josefa me tauyavutaka na Lotu i Jisu Karisito.

• Sa liutaka tale tiko nikua o Jisu Karisito na Nona Lotu mai vei ira na parofita bula kei na iapositolo.

Na iVola i Momani: E Dua Tale na iVakadinadina kei Jisu Karisito

• Na iVola i Momani e dua na ivolanikalou ka volai ena gauna makawa mai vei ira na parofita mai Amerika. A vakadewataka o Josefa Simici ena isolisoli kei na kaukauwa ni Kalou.

• Na iVola i Momani e vakarautaka vata kei na iVolatabu, e dua na ivakadinadina ni nona veiqaravi, ivakavuvuli, kei na Nona ilesilesi o Jisu, vaka noda iVakabula.

• Eda na toro voleka vua na Kalou ena noda wilika na iVola i Momani ka vauci ena kena ivakavuvuli.

• Eda na rawa ni kila ni iVola i Momani e vosa ni Kalou ena noda wilika, vakananuma vakatitobu, ka masulaka. Na iwalewale oqo ena vukei keda talega me yaco me da kila ni o Josefa Simici a dua na parofita.

Masuta mo Kila na Dina mai vua na Yalo Tabu

• Na masu e sala ni nodrau veivosaki na Kalou kei ira na Luvena.

• Ena masu ni yalodina, eda na rawa ni kila kina ni dina na itukutuku ni kena Vakalesui mai na Kosipeli i Jisu Karisito.

• Nida masu, na Yalo Tabu ena vakavuvulitaka ka vakadeitaka vei keda na dina.

Taro mo na Tarogi ira Kina na Tamata

Na taro eso oqo era ivakaraitaki ni veika o rawa ni tarogi ira kina na tamata. Na taro eso oqo e rawa ni vukei iko me vakaibalebale kina na nomu veivosaki ka kila na nona gagadre kei na ivakarau ni rai e dua na tamata.

• Na cava o vakabauta baleta na Kalou?

• Ena vukei iko beka vakacava na nomu vakila ni o voleka cake vua na Kalou?

• Na cava o kila me baleti Jisu Karisito? Sa vakayarayarataki iko beka vakacava na Nona bula kei na ivakavuvuli?

• O na kunea vakacava na isaunitaro nuitaki ena vuravura veilecayaki nikua?

• Ena vukei iko vakacava na nomu kila ni tiko e dua na parofita bula e vuravura nikua?

• O sa rogoca beka e dua na ka baleta na iVola i Momani? E rawa beka ni keirau wasea se cava e bibi kina?

• E rawa beka nio wasea na nomu vakabauta baleta na masu? E rawa beka ni keirau wasea na neirau vakabauta baleta na masu?

Veisureti E Rawa ni Vakayacori

• Ena rawa beka nio kerea vua na Kalou ena masu me vukei iko mo kila ni veika keirau vakatavulica e dina? (Raica na “Vakasama ni Veivakavulici: Masu” ena iotioti ni iwasewase ni lesoni oqo.)

• O na lako beka mai i lotu ena Sigatabu oqo mo vulica eso tale na ka me baleta na veika keirau sa vakavulica?

• Ena rawa beka nio wilika na iVola i Momani ka masu mo kila kina ni sa vosa ni Kalou? (Mo na vakatura sara beka ga na wase kei na tikina eso.)

• O na muria beka na ivakaraitaki nei Jisu ka papitaiso? (Raica “Na Veisureti ni Papitaiso kei na Veivakadeitaki,” ka liu tiko ki na lesoni oqo.)

• E rawa beka me keirau lokuca e dua na gauna baleta na neirau veisiko ka tarava?

Yavu Vakaivunau

Na iwasewase oqo e vakarautaka na ivunau kei na ivolanikalou mo vulica me vaqaqacotaka na nomu kilaka kei na ivakadinadina ni kosipeli ka vukea nomu veivakavulici.

Na Kalou E Tamada Vakalomalagi Dauloloma

Na Kalou e Tamada Vakalomalagi, ka eda sa Luvena. A buli keda me da ucui Koya. Sa “vakalewena ka vakasuina” ka vakalagilagi ka uasivi sara na yago i koya na Tamada “ka rawa ni da tara me vaka ga e dua na tamata” (Vunau kei na Veiyalayalati 130:22).

Na Kalou e kilai keda vakatamata yadua, ka lomani keda vakalevu cake mai na veika eda kila. E kila na noda vakatovolei, yaluma, kei na malumalumu, ka sa tuvakarau me tokoni keda ena noda lakocuruma. E dau rekitaka na noda toso ka na vukei keda me da digidigi dodonu. E gadreva me dau veitaratara kei keda, ka da na rawa ni veitaratara kei Koya ena masu.

Sa solia vei keda na Kalou na veika meda mai sotava e vuravura me rawa kina ni da vuli, tubu, ka yaco me vakataki Koya vakalevu cake. Ena loloma sa uasivi sara, sa vinakata kina o Koya me da lesu tale yani Vua ni da sa mate oti. Ia eda sega ni rawa ni cakava ga vakai keda. Baleta ni lomani keda na Kalou, a tala mai kina na Luvena, ko Jisu Karisito, me mai vueti keda. “Ni sa lomani ira na kai vuravura vakaoqo na Kalou me solia kina na Luvena e duabau ga,me bula ga ko ira na kai vuravura ena vukuna” (Joni 3:16–17).

E vinakata na Kalou me vakalougatataki keda ena vakacegu kei na reki e taucoko ka na tawamudu. Sa vakarautaka o Koya e dua na ituvatuva me da rawata kina na veivakalougatataki oqo. Na ituvatuva oqo e vakatokai me ituvatuva ni veivakabulai (raica na lesoni 2).

Vakabauta me baleta na Kalou

Mo kila mada se vakaevei na veika e kila tiko na tamata o vakavulica me baleta na Kalou. E vuqa na tamata era vakabauta ni tiko edua na Kabula Cecere, e dina ga ni tiko e levu na veimataqali rai me baleta na Kalou. Ia, e levu na tamata era sega ni kila na Kalou.

E rua na daukaulotu ni iVola iMomani, ko Amoni kei Eroni, rau a vakatavulici ira na tamata era sega ni kila na veika Vakarisito. E rau a vakatavulica na dina rawarawa ka sureti ira na tamata mera masu. Erau a saumaki kina o Lamonai kei tamana. Vulica na Alama 18:24–40 kei na 22:4–23. Qai sauma na taro e ra:

• Na cava rau a vakatavulica na daukaulotu oqo baleta na ituvaki ni Kalou?

• O na vakamuria vakacava na nodrau ivakaraitaki?

Ena ikuri ni itukutuku, raica na “Vakavulici Ira na Tamata Era Sega ni Lotu Vakarisito” ena wase e 10.

Vulici ni iVolanikalou

• 1 Nifai 17:36

• Mosaia 4:9

• 3 Nifai 14:9–11

• Vunau kei na Veiyalayalati 93:29; 130:22

• Mosese 1:39

• Eparaama 3:25

• Cakacaka 17:27–29

• Roma 8:16

• Iperiu 12:9

• Nai Vakatekivu 1:26–27

Vulica Vakalevu baleta na iVakavuvuli Oqo

• iDusidusi ki na iVolanikalou: “Tamada mai Lomalagi,” “Kalou, Lewe Tolu Vakalou”

• Gospel Topics: “God the Father”

Sa Vakatakila mai na Kalou na Kosipeli mai vei ira na Parofita ena Veitabagauna Kecega

O ira na Parofita era Matataka na Kalou e Vuravura

E dua na sala bibi sara e vakaraitaka kina na Kalou na Nona lomani keda oya na Nona kaciva ira na parofita, solia vei ira na lewa ni matabete, ka uqeti ira me ra vosa ena Vukuna. O ira na Parofita era Matataka na Kalou e Vuravura. Na parofita ni Veiyalayalati Makawa ko Emosi e a vola, “E dina ena sega ni vakayacora edua na ka na Turaga ko Jiova, ena vakaraitaka mada ga na nona vosa vuni vei ira na nona italatala, na parofita” (Emosi 3:7). Eso na veivakalougatataki eda ciqoma mai vei ira na parofita bula era sa tuvai toka e ra.

iVakadinadina kei Jisu Karisito. O ira na parofita era ivakadinadina bula digitaki kei Jisu Karisito, ka ra vakadinadinataki Koya ni sa noda iVakabula ka Dauveivueti.

iVakavuvuli. Era ciqoma na parofita na veidusimaki mai vua na Kalou me vukea noda kila na dina mai na ka cala. Era vakavulica vei keda me da talairawarawa ki na ivakaro ni Kalou ka veivutuni ni da yaco koso. Era saqata na ivalavala ca ka vakasalataki keda ena kena revurevu.

Nodra ivakavuvuli na parofita e laveti keda yani vua na Kalou ka vukei keda me da ciqoma na veivakalougatataki e gadreva me noda. Na noda itataqomaki cecere duadua e koto ena noda vakamuria na vosa ni Turaga mai vei ira na Nona parofita.

Dodonu ni Lewa ni Matabete. Na parofita bula nikua sai koya na matabete vakatulewa e vuravura. Na matabete sa ikoya na lewa kei na kaukauwa ni Kalou. Na parofita e tu vua na veivakadonui me vosa ka cakacaka ena yaca ni Kalou me baleta na nodra vakabulai na Luvena.

Na Mua ni Lotu. Na Lotu i Jisu Karisito ni Yalododonu Edaidai e tara cake ena yavu ni iapositolo kei na parofita (raica na Efeso 2:19–20; 4:11–14).

Parofita ena Veigauna Makawa

O Atama e a imatai ni parofita e vuravura. Na Kalou a vakatakila na kosipeli i Jisu Karisito vei Atama ka solia vua na kaukauwa ni matabete. E rau a vakavulica o Atama kei Ivi vei ira na luvedrau na veidina oqo ka uqeti ira mera tara cake na vakabauta ka bulataka na kosipeli.

A qai yaco nira a talaidredre na kawa nei Atama kei Ivi ka vuki tani mai na kosipeli. A basika kina e dua na ituvaki ka vakatokai me vuki tani se lutu. Ni sa na tete me rabailevu na vukitani, sa na vakasuka na Kalou na Nona kaukauwa ni matabete me vakatavulici ka vakayacori kina na cakacaka vakalotu ni kosipeli.

E vakavuvulitaki ena Veiyalayalati Makawa e vuqa na gauna ka yaco kina na vukitani levu. Me mudu na veigauna vaqori, a golevi ira na Luvena na Kalou ena nona kaciva e dua tale na parofita. Sa qai vakatakila vou tale o Koya na dina ni kosipeli vei ira na parofita oqo ka solia vei ira na lewa ni matabete. Eso vei ira na parofita oqori o Noa, Eparaama, kei Mosese. Ka ni rarawa, ni toso na gauna ena dua na ivakarau sa caka oti e liu, sa yaco me ra cati ira na parofita o ira na tamata ka lutu tani.

Vakasama Titobu eso ni Veivakavulici

Ira na Parofita

Mo kila mada se vakaevei na veika e kila tiko na tamata o vakavulica me baleti ira na parofita. Ena vei itovo vakavanua era tu kina na tamata ka ra vakabauta ni so na tamata savasava se dauveiuqeti era dau ciqoma eso na ivakarau ni veituberi kei na veidusimaki mai vua na Kalou. Ia, e sega ni o ira kece na tamata vakauqeti era parofita ni Kalou.

Vakamacalataka ni oti na veigauna kece ni vukitani raraba, ena vakalesuya mai na Kalou na kosipeli mai vua e dua na parofita. O Koya e solia vua na parofita oya na lewa ni matabete. Na parofita sa qai vukei ira na tamata mera kila vakavinaka na nodra veiwekani kei na Kalou, oka kina na sala me ciqomi kina na bula tawamudu mai na kosipeli i Jisu Karisito.

Veitabagauna

E dua na itabagauna vakosipeli i Jisu Karisito e dua na gauna e tiko kina e dua na italai vakadonui ni Turaga ka tu vua na idola ni matabete. Sa dau vakatakilai vou tale mai ena veitabagauna kece na ituvatuva ni veivakabulai nei Tamada Vakalomalagi.

Sa levu sara na veitabagauna vakosipeli. Ko Atama, Inoke, Noa, Eparaama, Mosese, Jisu Karisito, Josefa Simici kei na so tale era a sa liutaka e yadua na itabagauna. Na itabagauna a tekivutaka o Josefa Simici e vakatokai me “itabagauna ni taucoko ni gauna” (Efeso 1:10). Raica na Dikiseniri ni iVolanikalou, “Tabagauna,” kei na iDusidusi ni iVolanikalou, “iTabagauna.”

Vulici ni iVolanikalou

• Jekope 4:4, 6

• Mosaia 8:13–18

• Vunau kei na Veiyalayalati 1:37–38

• Luke 1:68–70

• Cakacaka 10:34–43

• Efeso 4:11–14

• Emosi 3:7

Vulica Vakalevu baleta na iVakavuvuli Oqo

• iDusidusi ki na iVolanikalou, “Parofita”

• Gospel Topics: “Prophets,” “Restoration of the Church”

Na Veiqaravi ni iVakabula e Vuravura kei na Veisorovaki

Sa Luve ni Kalou o Jisu Karisito. Ko Jisu kei na Nona Veisorovaki sa itakele ni nona ituvatuva na Kalou ena vukuda. Na Veisorovaki ni iVakabula e okati kina na Nona a vakararawataki ena Were o Kecisemani kei na Nona a vakararawataki ka mate ena kauveilatai, kei na Nona Tucaketale.

Mai na nodrau gauna o Atama kei Ivi, era sa dau nanamaki na tamata ki na nona lako mai o Jisu Karisito ni nodra iVakabula ka Dauveivueti. Na Tamada Vakalomalagi a talai Jisu mai ki vuravura ena sivia na 2,000 na yabaki sa oti.

A bulataka o Jisu e dua na bula taucoko, ka sega ni ivalavala ca. A vakatavulica na Nona kosipeli ka tauyavutaka na Nona Lotu. A kaciva e tinikarua na iApositolo ka solia vei iratou na lewa ni matabete me ratou veivakavulici ka qarava na veicakacaka vakalotu tabu, me vaka na papitaiso. A solia talega vei iratou na veivakadonui me ratou liutaka na Nona Lotu.

Ena itinitini ni Nona bula, a sorovaka na noda ivalavala ca ko Jisu ena Nona vakararawataki ena Were mai Kecisemani kei na nona Vakamatei ena Kauveilatai. Ena vuku ni nona isoro ni veivakaduavatataki o Jisu Karisito, sa rawa ni da savai mai na noda ivalavala ca ni da veivutuni. Oqo sa rawa kina nida lesu tale kina iserau ni Kalou ka rawata na reki e taucoko.

Ni oti na nona vakamatei ena kauveilatai ko Jisu, e a vakaturi cake tale mai na mate, ka vakadruka kina na mate ena kaukauwa nei Tamada Vakalomalagi. Ena vuku ni nona sa tucake tale mai na mate ko Jisu, eda na tucake kece tale ni oti noda mate. Sa kena ibalebale oqo ni na cokoti vata tale na yalo kei na yago ni tamata yadua, ka da na bula me tawamudu na tamata yadua ena yago sa uasivi sara, ka sa vakaturi cake tale mai na mate. (Raica “Na Veisorovaki i Jisu Karisito” ena lesoni 2.)

E vakavuvulitaka na Parofita o Josefa Simici: “Na yavu bibi ni ivakavuvuli ni noda Lotu sai koya na nodra ivakadinadina na iApositolo kei na Parofita me baleti Jisu Karisito, ni a mate, bulu, ka tucake tale ena ikatolu ni siga ka lako cake ki lomalagi; kei na veika kece tale e so e salavata kei na noda Lotu era sa tokona walega” (Nodra iVakavuvuli na Peresitedi ni Lotu: Josefa Simici [2007], 49).

Vulici ni iVolanikalou

• 2 Nifai 2:6–8; 9:1–24; 31

• Alama 7:11–13; 11:40; 34:8–10

• 3 Nifai 11:31–41; 27:1–22

• Vunau kei na Veiyalayalati 19:15–19; 45:3–5

• Joni 3:16–17

• 1 Koronica 15:1–4, 20–22

• 1 Joni 1:7

Vulica Vakalevu baleta na iVakavuvuli Oqo

• iDusidusi ki na iVolanikalou: “Jisu Karisito,” “Sorovaka, Veisorovaki

• Gospel Topics: “Jesus Christ,” “Atonement of Jesus Christ”

Na Lutu Tani

Ni sa mate oti o Jisu Karisito, era a segata na Nona iApositolo me ra maroroya toka na ivunau i Karisito me savasava ka dei tu na ivakarau ni Lotu. Ia, e vuqa na lewe ni Lotu era a vuki tani mai vei ira na iApositolo kei na ivunau a vakavuvulitaka ko Jisu.

Ni oti na nodra vakamatei na iApositolo i Jisu, sa yaco e dua na lutu tani raraba mai na kosipeli kei na Lotu i Jisu Karisito. Na lutu tani oqo sa dau vakatokai talega me Vukitani Levu. Ena vuku ni ka oqo, sa kauta tani kina na Kalou na lewa ni matabete mai vuravura. Na veika sa yali oqo e okati kina na lewa e gadrevi me liutaki kina na Lotu. Sa sega tale ni qai tiko kina e vuravura na Lotu a tauyavutaka o Jisu.

Ena gauna oqo, era sa veisautaka na tamata e vuqa na ivakavuvuli ni kosipeli. E levu sara na kila ka me baleta na itovo kei na ituvaki dina ni Kalou na Tamada, na Luvena o Jisu Karisito, kei na Yalo Tabu sa mai yali. Era sa veisautaka talega na tamata e vuqa na cakacaka vakalotu me vaka na papitaiso.

Ena veisenijiuri e muri, era sa tovolea na tagane kei na yalewa era vakasaqara voli na dina me ra vakalesuya tale na ivakavuvuli kei na ivalavala sa veisautaki. Era vakasaqara na rarama vakayalo e levu cake, ka vuqa era tukuna na gadrevi ni kena vakalesui tale mai na dina. Na nodra sasaga sa vakavuna me laki tauyavutaki kina e vuqa na matalotu.

Ena gauna oqo sa yaco kina me vakabibitaki vakalevu cake na galala vakalotu, ka dolava na katuba me vakalesui mai na dina kei na veivakadonui mai vua na Kalou.

Era a tukuna taumada mai na lutu tani levu na parofita kei na iapositolo (raica na 2 Cesalonaika 2:1–3). Era sa tukuna talega mai ni na vakalesui mai ki vuravura na kosipeli kei na Lotu i Jisu Karisito (raica na Cakacaka 3:20–21). Kevaka a sega na lutu tani, ke a sega ni gadrevi na veivakalesui mai.

Na Vakasama Titobu ni Veivakavulici: Na Lutu Tani

Vakavuvulitaka vei ira na tamata na lutu tani levu ena ivakatagedegede ni kena matailalai e veiganiti kei na nodra gagadre kei na nodra ituvaki. Vukei ira me ra kila na kena gadrevi na Vakalesui mai ni Kosipeli i Jisu Karisito.

Veitikina Bibi Mo na Vakavulica

• E vuqa na tamata era a cati Jisu Karisito kei iratou na Nona iApositolo (raica na Maciu 24:9; 1 Nifai 11:32–34; 2 Nifai 27:5). Ni oti nodratou mate na iApositolo, sa mai yali na matabete e vuravura. Sa mai sega kina na lewa ni veipapitaisotaki se na kena liutaki na Lotu.

• Sa qai yaco e muri me ciqoma na Matanitu o Roma na vakabauta Vakarisito, ka a dau vakacacana e liu. Sa wali na lomatarotaro bibi vakalotu ena veivosaki ni matabose ka sega ena ivakatakila mai vua na Kalou. Sa veivosakitaki ka veisautaki na ivunau kei na cakacaka vakalotu me veisotari kei na vuku vakavuravura. Sa buli na ivakavuvuli se na malanitukutuku ni vakabauta, vakayavutaki mai na vakatulewa ni veimatabose oqo (raica na Josefa Simici—Ai Tukutuku 1:19).

• Eso na tamata era tovolea me ra tauyavutaka tale na vakabauta Vakarisito ena nodra vakadodonutaka na ka sa tu rawa. Ia, ni sa sega e vuravura na lewa ni matabete ni Kalou, sa gadrevi me vakalesui mai na lewa kei na dina me tauyavu tale kina na Lotu i Jisu Karisito.

Vulici ni iVolanikalou

• 2 Nifai 28

• Maciu 24:9–11

• Cakacaka 20:28–30

• Kalatia 1:6–9

• 2 Cesalonaika 2:1–12 (iVakadewa nei Josefa Simici, tikina e 2, 3, 7–9)

• 2 Timoci 4:3–4

• 2 Pita 2:1–2

• Emosi 8:11–12

Vulica Vakalevu baleta na iVakavuvuli Oqo

• iDusidusi ki na iVolanikalou, “Vuki Tani”

• iDusidusi ni Ulutaga: “Vukitani Taumada ni Lotu Vakarisito”

• iDusidusi ni Ulutaga: “Vukitani”

Na Vakalesui mai ni Kosipeli i Jisu Karisito ki vei Josefa Simici

Na iMatai ni Raivotu kei na Nona Kacivi ko Josefa Simici me dua na Parofita

Ena veisenijiuri ka sega ni tiko kina e vuravura na taucoko ni kosipeli i Jisu Karisito, e a dau veitaratara tikoga kei ira na Luvena na Tamada Vakalomalagi. Ni toso na gauna, e a vakarautaka o Koya na sala me rawa ni ra vakalougatataki tale kina ena taucoko ni Nona kosipeli. Ni sa donu na ituvaki. Sa mani kacivi Josefa Simici o Koya me parofita me na vakalesui mai vua na kosipeli kei na Lotu i Jisu Karisito.

A bula voli o Josefa Simici ena tokalau kei Amerika ena dua na gauna ni maqusa vakalotu. Eratou a yalodina vua na Kalou na nona matavuvale ka vaqara tiko na dina. Era kaya e vuqa na matalotu ni tu vei ira na dina, ka gadreva o Josefa Simici me kila se o cei vei ira e dina (raica na Josefa Simici—Ai Tukutuku 1:18). A vakavuvulitaka na iVolatabu ni “sa duabau ga na Turaga, sa duabau ga na vakabauta, sa duabau ga na veipapitaisotaki” (Efeso 4:5). Ni lakova o Josefa Simici na veimatalotu duidui eso, a veilecayaiki se o cei vei ira me lewena. A qai tukuna kina vaqo e muri:

“Ia sa rui levu na veilecayaki kei na veilecalecavi vei ira na veimatavakabauta, sa dredre kina vua e dua na tamata gone vakataki au meu vakadeitaka se ko cei e dina kei cei e lasu.

“Ena loma ni ivaluvosa oqo kei na duidui ni veivakasama eso au sa dau kaya vakavuqa e lomaqu: A cava beka me caka? Na matalotu cava vei ira kece oqo e dina; se, era lasu taucoko li? Kevaka e dua vei ira e dina, ia ko cei, kau na kila beka vakacava?” (Josefa Simici—Ai Tukutuku 1:8, 10).

Me vakataki ira e levu na tamata, sa tu talega na lomatarotaro nei Josefa Simici me baleta na nona vakabulai. E vinakata me vosoti na nona ivalavala ca ka me savasava ena mata ni Kalou. Ni vaqara na dina ena loma ni veimatalotu, a wilika ena iVola Tabu, “Ia kevaka sa lailai na vuku vua e dua vei kemudou, me kerea vua na Kalou, o koya sa solia vakalevu kivei ira kecega na tamata, a sa sega ni dauveivakadirideini; ka na soli ga vua” (Jemesa 1:5).

Ena vuku ni vosa oqori, e a nanuma kina o Josefa me kerea vua na Kalou se cava e dodonu me vakayacora. Ena vulaitubutubu ni 1820 e a gole yani ki na dua na veikau voleka ka tekiduru ena masu. E va na itukutuku ni raivotu a tarava mai, a vola o Josefa Simici se o ira na vunivola eso ena ruku ni nona veidusimaki (raica na iTukutuku ni Ulutaga Vakosipeli, “iTukutuku ni iMatai ni Raivotu”). Ena itukutuku ka qai mai okati me ivolanikalou, a vakamacalataka kina vakaoqo na veika a sotava:

“Au sa raica kina e dua na duru bukawaqa ka donumaka sara tu ga na uluqu, e sivia sara na rarama ni matanisiga, sa lako sobu tikoga mai vakamalua me yacova ni sa serauni au. … Ni sa mai cilavi au na rarama au sa raica e rua na Tamata, ka sega ni vakamacalataki rawa na kedrau iserau kei na lagilagi, e rau tucake tu e macawa donumaki au. A vosa mai vei au e dua vei rau, e kaciva na yacaqu ka kaya, ni dusi koya na kena ikarua—Oqo na Noqu Gone ni Toko. Mo Rogoci Koya!” (Josefa Simici—Ai Tukutuku 1:16–17).

Ena raivotu oqo, erau rairai kina vei Josefa Simici na Kalou na Tamada kei na Luvena o Jisu Karisito. A tukuna vua na iVakabula me kua ni lewena e dua vei ira na lotu.

Ena dua tale na itukutuku ni raivotu oqo, e wasea kina o Josefa ni tukuna talega vua na iVakabula: “Sa vosoti na nomu ivalavala ca. … Raica, koi au na Turaga ni lagilagi. Au sa vakamatei ena kauveilatai ena vukui vuravura me rawa kina vei ira kece era vakabauta na yacaqu mera rawata na bula tawamudu.”

Ni oti na raivotu, a nanuma lesu o Josefa, “A vakasinaiti na yaloqu ena loloma, au sa reki kina ena marau levu me vuqa na siga ka sa tiko vata kei au na Turaga” (iTukutuku Makawa kei Josefa Simici, rauta na Vulaikatakata 1832, 3, josephsmithpapers.org; sa vakavoui na siveligi kei na icegu).

Ena raivotu oqo, sa yaco o Josefa Simici me dua na ivakadinadina bula kei Jisu Karisito ka vulica na veidina bibi me baleta na Lewe Tolu Vakalou. Me vaka, a vulica ni rau duidui kabula na Tamada Vakalomalagi kei Jisu Karisito. Ni rau kaciva na yacana, a qai kila kina ni Rau kilai koya vakatamata. Ni tukuni vei Josefa ni sa vosoti, a vulica kina ni dauloloma cecere na Kalou. Na veika a sotava oqo a vakasinaiti koya ena marau.

Me vaka a vakayacora na Kalou vei ira na parofita e liu, a kacivi Josefa Simici o Koya me parofita ka vakayagataki koya me vakalesuya mai ki vuravura na taucoko ni kosipeli. Na veivakalesui mai oqo ena vukei ira na luve ni Kalou me ra kune marau ena vuravura oqo kei na bula tawamudu ena vuravura sa bera mai—ena vukui Jisu Karisito ga.

Cavuqaqataka na Josefa Simici—Ai Tukutuku 1:16–17

Cavuqaqataka na ivakamacala nei Josefa Simici ni nona raica na Tamada kei na Luvena (Josefa Simici—Ai Tukutuku 1:16–17). Mo dau tuvakarau mo vakamacalataka na iMatai ni Raivotu ena nomu cavuta sara ga na vosa nei Josefa Simici. Wasea na ivakadinadina mai vuniyalomu ena kena dina kei na vuna sa rui bibi kina vei iko.

Vakalesuimai ni Matabete kei na iDola ni Matabete

Ni oti na nodrau rairai mai na Tamana kei na Luvena, era sa qai dau talai tiko mai na italai vakalomalagi vei Josefa Simici kei Oliva Kaudari na nona itokani. A rairai mai ko Joni na Dauveipapitaiso ni sa vakaturi cake ka mai solia na Matabete i Eroni kei na kena idola vei rau. Na Matabete i Eroni e okati kina na dodonu ni veipapitaisotaki.

Ni oti ga oya, o Pita, Jemesa, kei Joni—e tolu na iApositolo taumada i Karisito—eratou a rairai mai me vaka ni ratou sa tucake tale ka mai solia na Matabete i Melikiseteki kei na kena idola vei Josefa Simici kei Oliva Kaudari. Na matabete sai koya na dodonu vata ga a solia vei ira na Nona iApositolo makawa na Karisito.

Eratou a rairai mai ena Valetabu mai Kirtland o Mosese, Ilaisa, kei Ilaija vei Josefa Simici kei Oliva Kaudari ka solia vei rau na ikuri ni lewa kei na idola ni matabete e gadrevi me qaravi kina na cakacaka ni Kalou ena veisiga e muri. Sa vakalesuya mai o Mosese na idola ni nodra vakasokomuni na Isireli. A mai solia o Ilaisa na itabagauna ni kosipeli i Eparaama. Ka mai solia o Ilaija na idola ni kaukauwa ni veivauci. (Raica na Vunau kei na Veiyalayalati 110:11–16; raica talega na iVoladusidusi Raraba, 3.1.)

Tauyavu ni Lotu

Sa vakaroti o Josefa Simici me tauyavutaka tale na Lotu i Jisu Karisito e vuravura. A qai kaciva o Jisu Karisito e tinikarua na iApositolo mai vua.

O ira na parofita ena gauna vakaivolatabu era dau vakatoka na gauna eda bula donumaka oqo me iotioti ni veisiga se na veisiga e muri sara. Sai koya na gauna ni voleka na iKarua ni Lako Mai i Jisu Karisito. Oqori na vuna e vakatokai kina na Lotu me Lotu i Jisu Karisito ni Yalododonu Edaidai (raica na Vunau kei na Veiyalayalati 115:3–4; raica talega na 3 Nifai 27:3–8).

O Ira na Noda Parofita kei na iApositolo Bula Edaidai

Me vaka ga na Nona kacivi ira na iApositolo ko Jisu ena Nona veiqaravi ena bula oqo me ra liutaka na Nona Lotu, sa kacivi ira vakakina na iApositolo me ra liutaka ena gauna oqo. Nikua, eda sa tokoni ira na lewe ni Mataveiliutaki Taumada kei na Kuoramu ni iApositolo Le Tinikarua ni ra sa parofita, daurairai, ka daunivakatakila.

Na iApositolo dede duadua ga e kacivi me parofita baleta o koya e vakatulewa ena Lotu raraba ka vakadonui vua me vosa ena vukuna na Turaga. Sai koya na isosomi vakadonui kei Josefa Simici. O koya vata kei ira na iApositolo ena gauna oqo era semati ira lesu vei Jisu Karisito ena dua na isema sega ni cavuka ni veitabaki ka a tekivutaki ena nona tabaki o Josefa Simici mai na ligadratou na italai vakalomalagi.

Vulici ni iVolanikalou

• 2 Nifai 3

• 3 Nifai 27:3–8

• Vunau kei na Veiyalayalati 27:12–13; 112:30–32; 115:4

• Josefa Simici—Ai Tukutuku 1:68–72

• Cakacaka 3:19–22

• Efeso 4:5

• Jemesa 1:5

Vulica Vakalevu baleta na iVakavuvuli Oqo

• iDusidusi ki na iVolanikalou: “Vakalesuimai ni Kosipeli”

• “Na Vakalesui Mai ni Taucoko ni Kosipeli i Jisu Karisito: A iVakaro ni Yabaki Ruanadrau ki Vuravura”

• Gospel Topics: “Restoration of the Church,” “Restoration of the Priesthood”

Na iVola i Momani: E Dua Tale na iVakadinadina kei Jisu Karisito

Na iVola i Momani e dua na isoqoni ni volanikalou tabu ka vakatautauvatataki ki na iVolatabu. Na iVolatabu e dua na ivakadinadina kei Jisu Karisito, kei na iVola i Momani na ikarua ni ivakadinadina ni Nona veiqaravi, Nona ivakavuvuli, kei na Nona itavi vaka noda iVakabula.

A dusimaki o Josefa Simici mai vua e dua na italai vakalomalagi ka yacana o Moronai ki na dua na delana ka vunitaki tu kina e dua na itukutuku makawa me vica vata na senijiuri. Na itukutuku oqo, ka ceuti tu ena peleti koula (drau ni kaukamea mamare), e tu kina na nodra volavola na parofita me baleta nona cakacaka na Kalou vata kei ira na tawana e liu na vanua ko Amerika. A vakadewataka ko Josefa Simici na itukutuku oqo ena isolisoli kei na kaukauwa ni Kalou.

Era a kila na parofita ena iVola i Momani na ilesilesi i Jisu Karisito ka vakavuvulitaka na Nona kosipeli. Ni sa tucake oti mai na mate ko Jisu, a rairai vei ira na matatamata oqo ka qaravi ira saraga o Koya. A vakatavulici ira ka tauyavutaka na Nona Lotu.

E vukei keda na iVola i Momani me da toro voleka vua na Kalou ni da vuli, kila, ka bulataka na kena ivakavuvuli. E kaya na parofita o Josefa Simici ni na toro voleka cake vua na Kalou e dua “na tagane [se yalewa] ena nona bulataka na ivakavuvuli ni [ivola], mai na ivola tale eso” (iVakavuvuli: nei Josefa Simici, 64).

Meda kila ni iVola i Momani e vosa ni Kalou, e gadrevi meda wilika, vakananuma vakatitobu, ka masulaka. E yalataka e dua na parofita ni iVola i Momani ni na vakatakila vei keda na Kalou na dina ni ivola nida masuta ena yalodina, ka vakabauti Jisu Karisito (raica na Moronai 10:3–5). Sa gadrevi sara me vulici na iVola i Momani me baleta na saumaki tudei.

Nida wilika na iVola i Momani ka masulaka, eda na vulica na dina eso baleti Jisu Karisito ka na vakalougatataka na noda bula. Eda na kila talega ni a parofita dina ni Kalou o Josefa Simici ka ni a vakalesui mai vua na kosipeli kei na Lotu i Jisu Karisito.

Au yalataka ni o ni vulica ena masumasu na iVola i Momani e veisiga, o ni na dau vakatauca na lewa vinaka cake—e veisiga. Au yalataka ni o ni vakasamataka vakatitobu na veika o ni vulica, ena tadolavi na katubaleka ni lomalagi, o na ciqoma na isau ni nomu taro kei na idusidusi me baleta na nomu bula. Au sa yalataka ni gauna o na dromuci iko kina e veisiga ena iVola i Momani, o rawa ni taqomaki mai na veika ca ni dua na siga” (“Na Vola i Momani: Ena Vakacava na Nomu Bula kevaka e sega?” Liaona,, Nove. 2017, 62–63).

Vakasama Titobu eso ni Veivakavulici

Vakaveikilaitaka na iVola i Momani Vei Ira na Tamata

Ni o vakaveikilaitaka na iVola i Momani vei ira na tamata, vakamacalataka ni oqori e dua na itukutuku tabu ni nona veimaliwai na Kalou kei ira na tamata e Amerika makawa ena rauta ni sivia na dua na udolu na yabaki. Eda rawa ni vulica mai kina e levu na ka e yaga ena noda bula nikua.

Na inaki levu ni Vola i Momani sa ikoya me vakaraitaka na dina vei ira kece na tamata ni o Jisu na Karisito.(raica na tabana ni ulutaga). Me vaka e kaya na kena ikuri ni ulutaga ni “dua tale na ivakadinadina kei Jisu Karisito.” Yalataka vei ira na tamata ni ra na kila vakavinaka cake na iVakabula ni ra wilika.

Ni o solia vei ira na tamata e dua na iVola i Momani, tukuna vei ira na kaukauwa vakayalo sa kauta mai ki na nomu bula. Wasea e dua se rua na mala ni itukutuku ka vakaibalebale vei iko se e rawa ni vakaibalebale vei ira. Ena nomu vuli yadua kei na vuli vakaitokani, ena vukei iko na Yalo mo kunea na tikina ka na rawa ni laveta ka vaqaqacotaki ira na tamata.

Vakayaloqaqataki ira na tamata me ra wiliwili mai na iVola i Momani e veisiga. Ni ra wilika ka bulataka na kena ivakavuvuli, era na vakalougatataki ka voleka cake vua na Kalou.

Na iVola i Momani e Vakadeitaka na Dina ni Veivakalesuimai

E rawa ni o vakayagataka na veimalanivosa vaka sa tuvai toka me vukei ira na tamata me ra kila na iwalewale e vakadeitaka kina na iVola i Momani na dina ni kena Vakalesuimai na kosipeli i Jisu Karisito:

“Na iVola i Momani e dua na sala sa vakadeitaka kina vei au na Kalou na dina ni veika keirau sa tukuna. E rawa beka ni o wilika na iotioti ni rua na parakaravu ena ivakamacala taumada ni ivola?”

Vakamacalataka na ibalebale ni vakasama yadua ena parakaravu ruarua. Sureti ira o vakavulica tiko me ra wilika na veiwase eso ni iVola i Momani ka vakayagataka na ivakavuvuli ena parakaravu eso oqo. Ni ra vakila na yalo kei na dina ni iVola i Momani, sa rawa ni yaco me ra kila ni a parofita dina ni Kalou o Josefa Simici.

Vulici ni iVolanikalou

• Tabana ni iulutaga ni i Vola i Momani

• iVakamacala Taumada ki na iVola i Momani, parakaravu 1–7

• Moronai 10:4–5

• Vunau kei na Veiyalayalati 1:17–23; 20:1–12

• Josefa Simici—Ai Tukutuku 1:27–62

Vulica Vakalevu baleta na iVakavuvuli Oqo

• iDusidusi ki na iVolanikalou: “iVola i Momani”

• Gospel Topics: “Book of Mormon”

Masuta mo Kila na Dina mai vua na Yalo Tabu

Baleta ni sa Tamada na Kalou, o Koya ena vukei keda meda kila rawa na dina. Sa rawa ni da kila ni dina na itukutuku ni Vakalesuimai ni kosipeli i Jisu Karisito ni da wilika na iVola i Momani ka masuta na Kalou. Ni da masu ena vakabauta kei na inaki dina, ena sauma o Koya na noda taro ka tubera noda bula.

Sa dau sauma na noda masu na Kalou mai vua na Yalo Tabu. Ni da masu, na Yalo Tabu ena vakavulica ka vakadeitaka vei keda na dina. E kaukauwa sara na veitaratara ni Yalo Tabu. Era dau yaco mai ena veivakadeitaki malumu ena veika eda vakila, vakanananu, kei na veivakauqeti (raica na 1 Tui 19:11–12; Ilamani 5:30; Vunau kei na Veiyalayalati 8:2).

Na vulici vagumatua ni ivolanikalou (vakabibi ni iVola i Momani), na soqoni ni sakaramede e veimacawa, kei na masu ena yalodina ena vukei keda me da vakila na kaukauwa ni Yalo Tabu ka kunea na dina.

Vakasama Titobu eso ni Veivakavulici

Masu

Me vakataki Josefa Simici, e vuqa na tamata era vaqara isaunitaro me baleta na taro bibi eso kei na isema vua na Kalou. Wasea na ivakarau e sa vukei iko kina na masu mo voleka cake vua na Kalou. Wasea na ivakarau o sa ciqoma kina na isaunitaro kei na veituberi mai na vuli kei na masu.

Vakamacalataka ni masu e dua na sala ni veitaratara rua na yasana kei na Kalou. Sureti ira o vakavulica me ra kerea na Kalou me ra vukei ka dusimaki. Nodra sureti na tamata me ra masu sa dua na veisureti bibi duadua o rawa ni vakayacora. Ni ra ciqoma na isaunitaro, sa na yaco me ra kila ni ra sa luvena lomani na Kalou, ka ni na vukei ira o Koya.

E levu na tamata o vakavulica ena lailai sara na ka era kila me baleta na masu. Sa dua na ka dokai vei iko mo vukei ira me ra vulica na masu ka kauta mai ki na nodra bula na veivakalougatataki ni masu. Na masu sai koya na ivakarau o na rawata kina e dua na ivakadinadina bula ni dina vakayalo.

Vakavulica vei ira na tamata ni masu e dau tiko kina na veitikina oqo:

• Tekivu ena nomu vosa vua na Tamamu Vakalomalagi.

• Vakaraitaka na nanuma ni lomamu, me vaka na vakavinavinaka ni veivakalougatataki o sa ciqoma.

• Taro, vaqara na veituberi, ka kerea na veivakalougatataki o gadreva.

• Tinia ena nomu cavuta, “Ena yaca i Jisu Karisito, emeni.”

Sureti ira na tamata me ra masu ni ra wilika na iVola i Momani me vukei ira me ra kila ni sa vosa ni Kalou, ka vakadinadinataki Jisu Karisito.

Ni o vukei ira na tamata me ra masu, vakayagataka na vosa rawarawa, ka rawa ni ra vakayagataka talega ni ra masu. Me vakalekaleka ga na veimasu oqo.

Sureta na tamata o vakavulica tiko me cabora e dua na masu ni sa cava na lesoni. Vakadinadinataka ni dau rogoca ka sauma na Kalou na noda masu.

Vakainaki Dina

Na masu vakainaki dina e kena ibalebale ni da sa tuvakarau me da cakacakataka na ivunau ka vakayagataka ena noda bula e veisiga. Na masu ena inaki dina e kena ibalebale ni o sa tuvakarau mo cakacakataka na isaunimasu e da ciqoma mai vua na Kalou.

Vulici ni iVolanikalou

• Moronai 10:3–5

• Alama 5:45–46

• Vunau kei na Veiyalayalati 8:2–3

• Joni 14:26

• iVakamacala Taumada ki na iVola i Momani, parakaravu 8–9

Vulica Vakalevu baleta na iVakavuvuli Oqo

• Dikiseniri ni iVolanikalou: “Masu”

• Dikiseniri ni iVolanikalou: “Masu”

• Ulutaga Vakosipeli: “Masu”

iTuvatuva ni Lesoni Lekaleka ki na Vakarauta

Na ituvatuva sa koto oqo e sabolo ni veika e rawa ni o vakavulica vua e dua ke lailai walega na gauna. Nio vakayagataka na ituvatuva oqo, digia e dua se sivia na ivakavuvuli mo vakavulica. Na yavu vakaivunau ni veivakavuvuli yadua sa soli yani ena itekivu ni lesoni.

Nio veivakavulici, taro ka vakarorogo. Vakayacora na veisureti ena vukei ira na tamata me ra vulica me ra toro voleka vua na Kalou. E dua na veisureti bibi sai koya mo sota tale kei na tamata oya. Na balavu ni lesoni ena vakatau ena taro o taroga kei na vakarorogo o vakayacora.

Na Veika e Rawa ni o Vakavulica Vei Ira na Tamata ena Loma ni 3-10 na Miniti

• Na Kalou sa Tamada Vakalomalagi, ka sa buli keda meda itovo vata kei Koya. E kilai keda yadua o Koya ka lomani keda. E vinakata o Koya me vakalougatataki keda ena vakacegu kei na reki e taucoko ka na tawamudu.

• Sa Luve ni Kalou o Jisu Karisito. Na nona cakacaka sai koya me rawa kina vei keda me da savai mai na noda ivalavala ca, vakadrukai mate, ka rawata na bula tawamudu.

• Sa kacivi ira na parofita na Kalou me ra matataki Koya e vuravura. Ena gauna e liu a kacivi ira na parofita eso me vakataki Atama, Noa, Eparaama, kei Mosese. Na parofita bula e ciqoma na ivakatakila mai vua na Kalou me vakavulici keda ka liutaki keda ena gauna oqo.

• Ena nona gauna ni veiqaravi ena bula vakayago o Jisu, e a tauyavutaka kina na Nona Lotu. Ni ra sa mate na iapositolo nei Jisu sa yaco e dua na lutu tani rabailevu mai na kosipeli kei na Lotu i Jisu Karisito. Era veisautaka na tamata e vuqa na ivakavuvuli ni kosipeli kei na cakacaka vakalotu, me vaka na papitaiso.

• A kacivi Josefa Simici na Kalou me dua na parofita, me vaka ga Nona a kacivi ira na parofita ena veigauna e liu. A rairai vei koya na Tamada Vakalomalagi kei Jisu Karisito. A vakalesuimai na Kosipeli i Jisu Karisito mai vua.

• Na iVola i Momani e ivolanikalou. Me vaka ga na iVola Tabu, sa dua na ivakadinadina kei Jisu Karisito ka na vukei keda me da toro voleka vua na Kalou ni da wilika ka bulataka na kena ivakavuvuli. A vakadewataka o Josefa Simici ena isolisoli kei na kaukauwa ni Kalou.

• Ena masu yalodina, sa rawa ni da veitaratara kina kei na Kalou. Eda rawa ni kila kina ni dina na itukutuku ni kena Vakalesui mai na Kosipeli i Jisu Karisito.