« Pene 3 : Ha’api’ira’a 2—Te fa’anahora’a nō te fa’aorara’a a te Metua i te ao ra », ’Ia poro haere i tā’u nei ’Evanelia : E arata’i nō te fa’a’ite i te ’evanelia a Iesu Mesia (2023)

« Pene 3 : Ha’api’ira’a 2 », ’Ia poro haere i tā’u nei ’Evanelia

Pene 3 : Ha’api’ira’a 2

Te fa’anahora’a nō te fa’aorara’a a te Metua i te ao ra

Tē uiui nei paha te ta’ata

E aha te fā o te orara’a ?
Nō hea mai au ?
E Atua ānei e tāu’a mai ra iā’u ? Nāhea vau e ’ite ai ē tē tāu’a mai ra ’oia ?
Nāhea vau e ti’aturi ai i te Atua e inaha, tē tupu noa nei te mau ’ohipa ’ī’ino e rave rahi ?
Nō te aha e mea pa’ari roa te orara’a i te tahi mau taime ? Nāhea vau e ’ite mai ai i te pūai i roto i taua mau taime ra ?
Nāhea vau e nehenehe ai e riro ’ei ta’ata maita’i a’e ?
E aha tē tupu i muri a’e i tō’u pohera’a ?

E tauturu te ’evanelia a Iesu Mesia i fa’aho’ihia mai ia tātou ’ia pāhono i te mau uira’a faufa’a roa a te vairua. Nā roto i te ’evanelia, e ’apo mai tātou i te parau nō tō tātou ti’ara’a hanahana ’e tō tātou fāito pūai mure ’ore ’ei tamari’i nā te Atua. E hōro’a mai te ’evanelia ia tātou i te tīa’ira’a ma te tauturu ia tātou ’ia ’ite i te hau, te ’oa’oa ’e te aura’a. E tauturu mai te orara’a i te ’evanelia ’ia tupu i te rahi ’e ’ia noa’a te pūai ’a fa’aruru ai tātou i te mau fifi o te orara’a.

Tē hina’aro nei te Atua i te mea maita’i roa atu nō tāna mau tamari’i ’e tē hina’aro nei ’oia e hōro’a mai ia tātou i tāna mau ha’amaita’ira’a rahi roa atu, ’oia ho’i, te tāhuti ’ore ’e te ora mure ’ore (hi’o Mose 1:39 ; Te Ha’api’ira’a Tumu ’e te mau Fafaura’a 14:7). Nō te mea ’ua aroha ’oia ia tātou, ’ua hōro’a mai ’oia i te hō’ē ’ōpuara’a ’ia fāna’o tātou i teie mau ha’amaita’ira’a. I roto i te mau pāpa’ira’a mo’a, ’ua pi’ihia teie fa’anahora’a te fa’anahora’a nō te fa’aorara’a, te ’ōpuara’a rahi nō te ’oa’oa, ’e te ’ōpuara’a nō te fa’aorara’a (hi’o Alama 42:5, 8, 11, 13, 15, 16, 31).

I roto i te fa’anahora’a a te Atua, tē rave nei tātou tāta’itahi i te hō’ē tere i roto i te orara’a hou te tāhuti nei, te fānaura’a, te tāhuti nei, te pohe, ’e te orara’a i muri a’e i te pohe. ’Ua hōro’a mai te Atua i te mea e tītauhia i roto i teie tere ’ia nehenehe ia tātou ’ia ho’i i mua i tōna aro ’e ’ia fa’ari’i i te ’īra’a o te ’oa’oa.

’O Iesu Mesia te pū ’o te fa’anahora’a a te Atua. Nā roto i tāna tāra’ehara ’e tōna ti’afa’ahoura’a, ’ua fa’ati’a Iesu ia tātou ’ia roa’a te tāhuti ’ore ’e te ora mure ’ore.

I roto i tō tātou orara’a i ni’a i te fenua nei, ’aita tātou e ha’amana’o nei i tō tātou orara’a hou te tāhuti nei. ’Aita ato’a tātou e ta’a maita’i nei i te orara’a i muri a’e i te pohe. Terā rā, ’ua heheu mai te Atua e rave rahi parau mau nō ni’a i teie mau tuha’a o tō tātou tere mure ’ore. Nā teie mau parau mau e hōro’a mai ia tātou i te ’ite e nava’i nō te hāro’aro’a i te tumu o te orara’a, nō te ’ite i te ’oa’oa, ’ia vai te ti’aturira’a i te mau mea maita’i e tae mai. ’Ua riro teie ’ite ’ei tao’a mo’a nō te arata’i ia tātou ’a ora ai i ni’a i te fenua nei.

Mana’o nō te ha’api’i i te ta’ata

E hōro’a mai teie tuha’a i te hi’ora’a nō te tauturura’a ia ’oe ’ia fa’aineine nō te ha’api’i. Tē vai ato’a ra te hi’ora’a nō te mau uira’a ’e te mau tītaura’a manihini tā ’oe e nehenehe e fa’a’ohipa.

’A fa’aineine ai ’oe nō te ha’api’i i te ta’ata, ’a feruri nā roto i te pure i te huru o te ta’ata tāta’itahi ’e i tōna mau hina’aro pae vārua. ’A fa’aoti e aha te mea faufa’a roa a’e e ha’api’i atu. ’A fa’aineine ia ’oe nō te fa’ata’a i te mau ta’o ’aita te ta’ata e māramarama ra. ’A fa’anaho i te taime tā ’oe e fāna’o, ma te ha’amana’o ’ia ha’apoto noa i te mau ha’api’ira’a.

’A mā’iti i te mau pāpa’ira’a mo’a e fa’a’ohipa i roto i te ha’api’ira’a. Tē vai ra i roto i te tuha’a « Ha’api’ira’a tumu niu » o te ha’api’ira’a e rave rahi pāpa’ira’a mo’a faufa’a ta’a ’ē.

’A feruri i te mau uira’a e ui i roto i te ha’api’ira’a. ’A fa’anaho i te mau tītaura’a manihini ’o tē fa’aitoito i te ta’ata tāta’itahi ’ia rave i te hō’ē ’ohipa.

’A ha’apāpū i te mau ha’amaita’ira’a tei parau-fafau-hia mai e te Atua ’e ’a fa’a’ite i tō ’oe ’itera’a pāpū nō te mea tā ’outou e ha’api’i ra.

Te mea e nehenehe e ha’api’i i te ta’ata i roto e 15–25 minuti

’A mā’iti hō’ē parau tumu i muri nei, ’e ’aore rā hau atu, nō ni’a i te fa’anahora’a nō te fa’aorara’a nō te ha’api’i i te ta’ata. ’Ua hōro’ahia te ha’api’ira’a tumu niu nō te parau tumu tāta’itahi i muri mai i teie arata’i ha’api’ira’a.

Te orara’a hou te tāhuti nei : Te fā ’e te fa’anahora’a a te Atua nō tātou

E mau tamari’i vārua tātou pā’āto’a nā te Atua. ’Ua hāmani ’oia ia tātou ’ia au i tōna iho hōho’a.
’Ua ora na tātou i pīha’i iho i te Atua hou tātou ’a fānauhia mai ai i ni’a i te fenua nei. E mau melo tātou nō tōna ’utuāfare. ’Ua ’ite ’oia ’e ’ua aroha ’oia ia tātou tāta’itahi.
’Ua hōro’a mai te Atua i te hō’ē fa’anahora’a nō tō tātou ’oa’oa ’e tō tātou haerera’a i mua i roto i teie orara’a ’e te tau mure ’ore.
I roto i tō tātou orara’a hou te tāhuti nei, ’ua mā’iti tātou ’ia pe’e i te fa’anahora’a a te Atua. ’Oia ho’i, e haere mai tātou i te fenua nei ’ia ti’a ia tātou ’ia rave i te ta’ahira’a nō muri iho i ni’a i tō tātou haerera’a mure ’ore i mua.
’O Iesu Mesia te pū o te fa’anahora’a a te Atua. Maoti ’oia e ti’a ai ia tātou ’ia fa’ari’i i te tāhuti ’ore ’e te ora mure ’ore.

Te poietera’a

I raro a’e i te arata’ira’a a te Atua, ’ua poiete Iesu i te fenua nei.

Te hi’ara’a o Adamu ’e o Eva

’O Adamu ’e ’o Eva te mau tamari’i mātāmua a te Metua i te ao ra tei ora i ni’a i te fenua nei. ’Ua hāmani te Atua i tō rāua tino tāhuti ’e ’ua tu’u ia rāua i roto i te ’ō i Edene.
’Ua ’ōfati ’o Adamu ’e ’o Eva i te ture, ’ua ti’avaruhia rāua i rāpae i te ’ō ’e ’ua fa’ata’a-’ē-hia rāua i te aro o te Atua. ’Ua parauhia teie ’ohipa i tupu te Hi’ara’a.
I muri mai i te Hi’ara’a, ’ua riro mai ’o Adamu ’e ’o Eva ’ei ta’ata tāhuti. ’Ei ta’ata tāhuti, ’ua ti’a ia rāua ’ia ha’api’i, ’ia haere i mua ’e ’ia fānau i te tamari’i. ’Ua fa’aruru ato’a rāua i te ’oto, te hara ’e i te pohe.
Te Hi’ara’a, e ta’ahira’a i mua ïa nō te ta’ata nei. Maoti te Hi’ara’a e ti’a ai ia tātou ’ia fānauhia i ni’a i te fenua nei ’e ’ia haere i mua i roto i te fa’anahora’a a te Metua i te ao ra.

Tō tātou orara’a i te fenua nei

I roto i te fa’anahora’a a te Atua, ’ua tītauhia ia tātou ’ia haere mai i te fenua nei nō te fa’ari’i i te hō’ē tino tāhuti, nō te ha’api’i ’e nō te tupu i te rahi.
I ni’a i te fenua nei, tē ha’api’i nei tātou ’ia haere nā roto i te fa’aro’o. ’Aita rā te Metua i te ao ra i vaiiho ia tātou ’o tātou ana’e. ’Ua hōro’a mai ’oia e rave rahi hōro’a ’e te mau arata’ira’a nō te tauturu ia tātou ’ia ho’i i mua i tōna aro.

Te tāra’ehara a Iesu Mesia

E hara tātou tāta’itahi, ’e e pohe tātou tāta’itahi. Nō tōna here ia tātou, ’ua tono mai te Atua i tāna Tamaiti, ’o Iesu Mesia, i te fenua nei nō te fa’aora ia tātou i te hara ’e i te pohe.
Maoti te tūsia tāra’ehara a Iesu, e ti’a i tā tātou mau hara ’ia fa’a’orehia ’e ’ia tāmāhia. E nehenehe tō tātou ’ā’au e taui i te maita’i ’a tātarahapa noa ai. Maoti te reira e ti’a ai ia tātou ’ia ho’i fa’ahou i mua i te aro o te Atua ’e ’ia fa’ari’i i te ’īra’a o te ’oa’oa.
Maoti Iesu i ti’afa’ahou e ti’afa’ahou ā tātou pā’āto’a i muri mai i te pohe. Te aura’a ra, e tāhō’ē-fa’ahou-hia te vārua ’e te tino o te ta’ata tāta’itahi, ’e e ora tātou pā’āto’a i roto i te hō’ē tino maita’i roa ’e te ti’afa’ahou ē a muri noa atu.
Tē pūpū nei Iesu Mesia i te tāmāhanahanara’a, te ti’aturira’a ’e te fa’aorara’a māuiui. ’O tāna tūsia tāra’eraha te fa’a’itera’a rahi hope’a nō tōna aroha. Te mau mea ato’a e ’ere i te mea maita’i i roto i te orara’a nei, e nehenehe ïa e tātā’ihia nā roto i te tāra’ehara a Iesu Mesia.

Te ao vārua

’Ia pohe tō tātou tino tāhuti, e tāmau noa tō tātou vārua i te ora i roto i te ao vārua. E vaira’a tau poto nō te ha’api’ira’a ’e te fa’aineinera’a hou te ti’afa’ahoura’a.
Tē ha’api’ihia nei te ’evanelia a Iesu Mesia i roto i te ao vārua, ’e e nehenehe tātou e tāmau noa i te tupu i te rahi ’e i te haere i mua.

Te ti’afa’ahoura’a, te fa’aorara’a ’e te fa’ateiteira’a

I muri iho i tō tāime i te ao vārua, ’o te ti’afa’ahoura’a te ta’ahira’a nō muri iho i roto i tō tātou tere mure ’ore.
Te ti’afa’ahoura’a ’o te tāhō’ē-fa’ahou-ra’a ïa tō tātou vārua ’e tō tātou tino. Tātou pā’āto’a tē ti’afa’ahou mai ’e tē fa’ari’i i te hō’ē tino ’i’o ’e te maita’i roa. E ora tātou ē a muri noa atu. E tupu te reira maoti te tāra’ehara ’e te ti’afa’ahoura’a o te Fa’aora.

Te ha’avāra’a ’e te mau bāsileia hanahana

’Ia ti’afa’ahou mai tātou, ’o Iesu Mesia tō tātou ha’avā. Ta’a ’ē noa atu ma’a ta’ata ri’i, e fa’ari’i te mau tamari’i ato’a a te Atua i te hō’ē pārahira’a i roto i te hō’ē bāsileia hanahana.
Noa atu ē e ti’afa’ahou mai tātou pā’āto’a, e’ita tātou pā’āto’a e fa’ari’i i te hō’ē ā hanahana mure ’ore. E ha’avā Iesu ia tātou ’ia au i tō tātou fa’aro’o, tā tātou mau ’ohipa ’e tā tātou tātarahapara’a i te tāhuti nei ’e i te ao vārua. E nehenehe tātou e ho’i fa’ahou e ora i mua i te aro o te Atua mai te mea e ha’apa’o maita’i tātou.

Te mau uira’a e nehenehe e ui i te ta’ata

Te mau uira’a i muri nei e hi’ora’a ïa nō te uira’a tā ’oe e nehenehe e ui i te ta’ata. E nehenehe teie mau uira’a e tauturu ia ’oe ’ia fa’atupu i te mau ’āparaura’a maita’i ’e ’ia māramarama i te mau hina’aro ’e te hi’ora’a a te hō’ē ta’ata.

Ia ’outou, e aha te fā o te orara’a ?
E aha te mea e fa’a’oa’oa ia ’outou ?
E aha te mau fifi tā ’outou e hina’aro i te Atua ’ia tauturu mai ?
E aha tā ’outou i ha’api’i mai roto mai i te mau fifi tā ’outou i fa’aru’u ?
E aha tā ’outou i ’ite nō ni’a ia Iesu Mesia ? Nāhea tōna orara’a ’e tāna misiōni i te ha’amaita’ira’a i tō ’outou orara’a ?

Te mea e nehenehe e tītau manihini

E ani ānei ’oe i te Atua nā roto i te pure ’ia tauturu mai ’ia ’ite ē e parau mau tā māua i ha’api’i ? (Hi’o « Ha’amāramaramara’a ha’api’ira’a : Pure » i roto i te tuha’a hope’a o te ha’api’ira’a 1.)
E haere mai ānei ’oe i te purera’a i teie Sābati nā muri ia mātou nō te ha’api’i hau atu ā nō ni’a i te mea tā mātou i ha’api’i ?
E tai’o ānei ’oe i te Buka a Moromona ’e e pure ānei ’oe nō te ’ite ē e parau te reira nā te Atua ? (E hina’aro paha ’oe e hōro’a i te tahi mau pene ’e ’aore rā mau ’īrava ta’a ’ē.)
E pe’e ānei ’oe i te hi’ora’a o Iesu ma te bāpetizo ia ’oe ? (Hi’o « Te ani-manihini-ra’a ’ia bāpetizo ’e ’ia ha’amauhia », tē nā mua noa mai i te ha’api’ira’a 1.)
E nehenehe ānei tātou e fa’ata’a i te hō’ē taime nō te fārerei fa’ahou ā ?

hōho’a nō te fa’anahora’a nō te fa’aorara’a

Ha’api’ira’a tumu niu

Tē hōro’a nei teie tuha’a i te ha’api’ira’a tumu ’e te mau pāpa’ira’a mo’a ’o tā ’oe e nehenehe e tai’o māite nō te ha’apūai i tō ’oe ’ite ’e tō ’oe ’itera’a pāpū nō ni’a i te ’evanelia ’e nō te tauturu ia ’oe ’ia ha’api’i i te ta’ata.

Te orara’a hou te tāhuti nei : Te fā ’e te fa’anahora’a a te Atua nō tātou

E mau tamari’i tātou nā te Atua, ’e ’ua ora tātou i pīha’iho iāna hou tō tātou fānaura’a

’O te Atua te Metua o tō tātou vārua. E mau tamari’i tātou nāna, i hāmanihia ’ia au i tōna hōho’a. E nātura atuara’a tō tātou tāta’itahi ’ei tamari’i nā te Atua. E nehenehe teie ’ite e tauturu ia tātou i roto i te mau taime fifi, ma te fa’auru ia tātou ’ia riro ’ei ta’ata maita’i atu ā.

I ora na tātou i pīha’i iho i te Atua ’ei tamari’i vārua hou tātou ’a fānauhia mai ai i ni’a i te fenua nei. E mau melo tātou nō tōna ’utuāfare.

« Tē vai nei te hō’ē ti’ara’a faufa’a rahi roa nā tātou pā’āto’a i teienei ē a muri noa atu, e ti’ara’a ’eiaha roa tātou e ha’amo’e, ’e ’o tei tītauhia ’ia māuruuru. ’Oia ho’i e tamaiti ’e ’aore rā e tamāhine ’outou nā te Atua ma te a’a pae vārua i roto i te tau mure ’ore.

« […] Te māramaramara’a i teie parau mau—te māramarama-mau-ra’a i te reira ’e te fa’ari’ira’a i te reira—e tauira’a orara’a ïa. E hōro’a mai te reira i te ihota’ata fa’ahiahia mau tē ’ore roa e ti’a i te ta’ata ’ia rave ’ē atu ia ’outou na. Hau atu rā, ’ia hōro’a te reira ia ’outou i te mana’o nō tō ’outou faufa’a rahi ’e te faufa’a mure ’ore ho’i. ’E i te hope’a, e hōro’a te reira ia ’outou i te hō’ē fā hanahana ’e te tura rahi ’e te ti’a mā i roto i te orara’a » (M. Russell Ballard, « Children of Heavenly Father [Te mau tamari’i a te Metua i te ao ra] » [Brigham Young University devotional, Māti. 3, 2020], 2, speeches.byu.edu).

’Ua mā’iti tātou ’ia haere mai i ni’a i te fenua nei

’Ua here tō tātou Metua i te ao ra ia tātou ’e tē hina’aro nei ’oia ’ia riro tātou mai iāna ra te huru. ’Ua fa’ateiteihia ’oia ma te tino hanahana.

I roto i tō tātou orara’a hou te tāhuti nei, ’ua ha’api’i tātou ē e fa’anahora’a tā te Atua nō tātou ’ia riro mai iāna ra te huru. Te hō’ē tuha’a o tāna fa’anahora’a maori rā ’ia fa’aru’e tātou i tō tātou fa’aeara’a i te ao ra ’e ’ia haere mai i te fenua nei nō te fa’ari’i i te tino tāhuti. ’Ua tītau-ato’a-hia ia tātou ’ia noa’a te ’ite ’e ’ia fa’atupu i te fa’aro’o i roto i te hō’ē pu’e tau e mea ātea tātou i te aro o te Atua. E’ita tātou e ha’amana’o i tō tātou orara’a i pīhai iho i te Atua. Terā rā, e hōro’a mai ’oia i te mea e tītauhia nō tātou, ’ia ti’a ia tātou ’ia ho’i e ora i piha’i iho iāna.

Te ti’amāra’a, ’oia ho’i te ti’amāra’a ’e te ti’ara’a ’ia mā’iti, ’o te hō’ē ïa tuha’a faufa’a roa o te fa’anahora’a a te Atua nō tātou. I roto i tō tātou orara’a hou te tāhuti nei, ’ua mā’iti tātou tāta’itahi ’ia pe’e i te fa’anahora’a a te Atua ’e ’ia haere mai i te fenua nei ’ia ti’a ia tātou ’ia rave i te ta’ahira’a nō muri iho i roto i tō tātou haerera’a mure ’ore i mua. I ta’a na ia tātou ē ’a pārahi ai i’ō nei, e rave rahi rāve’a ’āpī tā tātou e fāna’o nō te tupu i te rahi ’e nō te ’ite i te ’oa’oa. I ta’a ato’a na ia tātou ē e fa’aruru tātou i te pāto’ira’a. E fārerei tātou i te fa’ahemara’a, te mau fifi, te ’oto ’e te pohe.

Ma te mā’iti i te haere mai i ni’a i te fenua nei, ’ua ti’aturi tātou i te here ’e te tauturu a te Atua. ’Ua ti’aturi tātou i tāna fa’anahora’a nō tō tātou fa’aorara’a.

’Ua mā’iti te Metua i te ao ra ia Iesu Mesia nō te fa’aora ia tātou

’O Iesu Mesia te pū ’o te fa’anahora’a a te Atua. Hou tātou ’a haere mai ai i te fenua nei, ’ua ’ite tātou ē e’ita tātou e nehenehe e ho’i fa’ahou i mua i te aro o te Atua nā roto noa i tō tātou iho pūai. ’Ua mā’iti te Metua i te ao ra ia Iesu Mesia, tāna tamaiti matahiapo, ’ia ti’a ia tātou ’ia ho’i fa’ahou iāna ra ’e ’ia fa’ari’i i te ora mure ’ore.

’Ua ineine roa Iesu i te fa’ari’i i te reira. ’Ua fa’ari’i ’oia ’ia haere mai i ni’a i te fenua nei ’e ’ia fa’aora ia tātou nā roto i tāna tūsia tāra’ehara. Nā tāna tāra’ehara ’e tōna ti’afa’ahoura’a e fa’ati’a ’ia fa’atupuhia te mau fā a te Atua nō tātou.

Heheura’a pāpa’ira’a mo’a

Te mau tamari’i a te Atua

Te fa’anahora’a a te Atua

Te orara’a hou te tāhuti nei

Ha’api’i rahi atu ā nō ni’a i teie parau tumu

Arata’i nō te mau pāpa’ira’a mo’a : « Te orara’a hou te tāhuti nei », « Te fa’anahora’a nō te fa’aorara’a »
Buka arata’i rahi, 1.1 : « Te fa’anahora’a nō te ’oa’oa a te Atua »
Gospel Topics : « Premortality », « Plan of Salvation »

Te poietera’a

’Ua tītau te fa’anahora’a a te Metua i te ao ra i te hāmanira’a o te fenua, i reira tāna mau tamari’i vārua e fa’ari’i ai i te tino tāhuti ’e e fa’ari’i ai i te ’ite. E mea faufa’a roa tō tātou orara’a i te fenua nei nō tātou nō te haerera’a i mua ’e nō te rirora’a mai mai te Atua ra te huru.

I raro a’e i te arata’ira’a a te Metua i te ao ra, ’ua poiete Iesu Mesia i te fenua ’e te mau mea ora ato’a. I muri mai ’ua hāmani te Metua i te ao ra i te tāne ’e te vahine ’ia au i tōna iho hōho’a. E tāpa’o te Poietera’a nō te aroha o te Atua ’e tōna hina’aro ’ia fāna’o tātou i te rāve’a nō te tupura’a i te rahi.

Heheura’a pāpa’ira’a mo’a

Ha’api’i rahi atu ā nō ni’a i teie parau tumu

Arata’i nō te mau pāpa’ira’a mo’a : « Poiete, Poietera’a »
Gospel Topics : « Creation »

Te hi’ara’a o Adamu ’e o Eva

Hou te Hi’ara’a

’O Adamu ’e ’o Eva te mau tamari’i vārua mātāmua a te Metua i te ao ra tei haere mai i ni’a i te fenua nei. ’Ua hāmani te Atua i tō rāua tino tāhuti ’ia au i tōna iho hōho’a ’e ’ua tu’u ia rāua i roto i te ’ō i ’Ēdene. I roto i te ’ō ’aita tā rāua e hara, ’e ’ua hōro’a te Atua i te mau mea e tītauhia nō rāua.

I tō Adamu ’e o Eva fa’aeara’a i roto i te ’ō, ’ua fa’aue te Atua ia rāua ’eiaha e ’amu i te hotu nō te tumu rā’au nō te ’ite i te maita’i ’e te ’ino. Mai te mea e ha’apa’o rāua i terā fa’auera’a, e nehenehe ïa rāua e fa’aea noa i roto i te ’ō. Terā rā, e’ita tā rāua e nehenehe e haere i mua ’e e ’apo i te ha’api’ira’a nō roto mai i te pāto’ira’a ’e te mau fifi o te tāhuti nei. E’ita tā rāua e nehenehe e ’ite i te ’oa’oa nō te mea e’ita e nehenehe e ’ite i te ’oto ’e te māuiui.

’Ua fa’ahema Sātane ia Adamu rāua ’o Eva ’ia ’amu i te hotu i rāhuihia, ’e ’ua mā’iti rāua ’ia nā reira. Nō teie mā’itira’a, ’ua ti’avaruhia rāua i rāpae i te ’ō ’e ’ua fa’ata’a-’ē-hia rāua i te aro o te Atua. ’Ua parauhia teie ’ohipa i tupu te Hi’ara’a.

I muri mai i te Hi’ara’a

I muri mai i te Hi’ara’a, ’ua riro mai ’o Adamu ’e ’o Eva ’ei ta’ata tāhuti. ’Aita rāua i vai fa’ahou ma te hapa ’ore, ’ua ta’a ia rāua ē ’ua ’ite ho’i i te maita’i ’e te ’ino. E nehenehe rāua e fa’a’ohipa i tō rāua ti’amāra’a nō te mā’iti i te hō’ē ’aore rā i te tahi. Nō te mea ’ua fa’aruru ’o Adamu ’e ’o Eva i te pāto’ira’a ’e te mau fifi, ’ua ti’a ia rāua ’ia ha’api’i ’e ’ia haere i mua. Nō te mea ’ua ’ite rāua i te ’oto, ’ua nehenehe ato’a ia rāua ia ’ite i te ’oa’oa. (Hi’o 2 Nephi 2:22–25.)

Noa atu tō rāua mau fifi, ’ua mana’o ’o Adamu ’e ’o Eva ē e ha’amaita’ira’a rahi te rirora’a ’ei ta’ata tino tāhuti. Te hō’ē ha’amaita’ira’a, ’oia ho’i ïa e nehenehe rāua e fānau i te tamari’i. Nā te reira i fa’ati’a i te tahi atu mau tamari’i vārua a te Atua ’ia haere mai i te fenua nei ’e ’ia fa’ari’i i te tino tāhuti.

Nō te mau ha’amaita’ira’a o te Hi’ara’a, ’ua ’oa’oa ’o Adamu ’e ’o Eva. ’Ua parau ’o Eva : « ’Āhiri ’aita tāua i ’ōfati i te ture ’aore ïa e noa’a tō tāua [tamari’i], ’e ’aore ato’a tāua e ’ite i te maita’i ’e te ’ino, ’e te ’oa’oa o tō tāua fa’aorara’a ra, ’e te ora mure ’ore ’o tā te Atua e hōro’a ia rātou ato’a ’o tē ha’apa’o » (Mose 5:11 ; hi’o ato’a te ’īrava 10).

Ha’amāramaramara’a ha’api’ira’a tumu : Te Hi’ara’a

E tuha’a faufa’a roa te hi’ara’a nō te fa’anahora’a a te Atua nō tō tātou fa’aorara’a. Maoti te Hi’ara’a e ti’a ai ia tātou ’ia haere mai i te fenua nei ’e ’ia haere i mua ’ia riro mai te Atua ra te huru (hi’o 2 Nephi 2:25).

’Ua riro te fa’aotira’a a Eva ’e i muri iho a Adamu ’ia rave i te hotu ’e ’ia fa’aru’e i te ’ō i Edene ’ei mā’itira’a ta’ata ara ’ōhie i te mau mea pae vārua. I te rahira’a o te taime, tē parau nei te mau pāpa’ira’a mo’a ’e te mau peropheta i teie mā’itira’a mai te hō’ē ’ōfatira’a ture, ’eiaha rā mai te tahi hara (hi’o Te Hīro’a Fa’aro’o 1:2 ; 2 Nephi 9:6).

Tē ti’aturi hape nei te tahi mau ta’ata ē ’ua fa’ari’i tātou pā’āto’a i te hara a Adamu ’e a Eva (tei parauhia e te tahi te « hara mātamua »). Terā rā, ’ua heheu mai te Fatu iho ē ’ua « riro ’oia ’ei tāra’ehara nō te hape tumu mātāmua, e ’ore ai te mau hara a te mau metua e tae atu i ni’a iho i te upo’o o te mau tamari’i » (Mose 6:54).

I te taime mātāmua ’a ha’api’i ai ’outou i te ta’ata i te Hi’ara’a, ’a fa’a’ōhie i te reira.

Heheura’a pāpa’ira’a mo’a

I roto i te ’Ō

Te Hi’ara’a

Ha’api’i rahi atu ā nō ni’a i teie parau tumu

Arata’i nō te mau pāpa’ira’a mo’a : « Te Hi’ara’a ’o Adamu ’e ’o Eva », « Ti’amāra’a »
Gospel Topics : « Fall of Adam and Eve », « Agency and Accountability »

Tō tātou orara’a i te fenua nei

E rave rahi te ta’ata e uiui nei : « Nō te aha tei i’ō nei au i ni’a i te fenua nei ? » E tuha’a faufa’a roa tō tātou orara’a i te fenua nei nō te fa’anahora’a a te Atua nō tō tātou haerera’a mure ’ore i mua. Tā tātou fā hope’a roa ’o te fa’aineinera’a ïa ia tātou nō te ho’i i mua i te aro o te Atua ’e ’ia fa’ari’i i te ’īra’a o te ’oa’oa. Teie i raro nei te tahi rāve’a te orara’a i te fenua nei e fa’aineine ai ia tātou nō te reira.

Te fa’ari’ira’a i te hō’ē tino tāhuti

Te hō’ē o te mau tumu nō te haerera’a mai i ni’a i te fenua nei ’o te fa’ari’ira’a ïa i te hō’ē tino tāhuti i reira tō tātou vārua e pārahi ai. E mea mo’a tō tātou mau tino ’e e hāmanira’a semeio mau nā te Atua. Maoti te tino tāhuti nei e nehenehe ai tā tātou e rave, e ha’api’i ’e e ’ite i te mau mea e rave rahi e’ita e noa’a i tō tātou vārua. E nehenehe tā tātou e haere i mua mai te ’ore e noa’a i te mau vārua.

Nō te mea e tino tāhuti tō tātou, e ’ite tātou i te māuiui, te ma’i, ’e te tahi atu mau fifi. E nehenehe teie mau ’itera’a e tauturu ia tātou ’ia ha’api’i i te fa’a’oroma’i, te aroha, ’e te tahi atu mau huru maita’i nō te atuara’a. E nehenehe te reira e riro ’ei ta’ahira’a i ni’a i te ’ē’a nō tō tātou ’oa’oa. Te mā’itira’a i te maita’i i te taime fifi nō te reira, ’o te huru ïa te fa’aro’o, te tīa’ira’a ’e te aroha e riro mai ai ’ei tuha’a nō tō tātou huru.

Ha’api’i nāhea i te fa’a’ohipa i te ti’amāra’a ma te pa’ari

Te tahi ato’a tumu nō te orara’a tāhuti nei ’o te ha’api’ira’a ïa ’ia fa’a’ohipa i tō tātou ti’amāra’a ma te pa’ari—nō te mā’iti i te mea ti’a. E mea faufa’a roa te ha’api’ira’a ’ia fa’a’ohipa i tō tātou ti’amāra’a ’ia mā’iti ma te pa’ari nō te riro mai te Atua ra te huru.

E ha’api’i mai te Metua i te ao ra ’e ’o Iesu Mesia ia tātou i te mea ti’a, ma te hōro’a mai i te mau fa’auera’a nō te arata’i ia tātou i te poupou. Tē fa’ahema nei Sātane ia tātou ’ia rave i te ’ino, ma te hina’aro ’ia ’ore tātou e ’oa’oa mai iāna ra te huru. E fa’aruru tātou i te pāto’ira’a i rotopū i te maita’i ’e te ’ino, e mea tītauhia ho’i nō te ha’api’i i te fa’a’ohipa i tō tātou ti’amāra’a ’ia mā’iti (hi’o 2 Nephi 2:11).

’Ia ha’apa’o ana’e tātou i te parau a te Atua, e tupu ïa tātou i te rahi ’e e fa’ari’i tātou i te mau ha’amaita’ira’a tāna i fafau mai. ’Ia ha’apa’o ’ore ana’e tātou, tē fa’aātea ra ïa tātou iāna ’e tē fa’ari’i nei tātou i te mau fa’ahope’ara’a o te hara. I te hope’a, e arata’i iho ā te hara i te ’oa’oa ’ore, noa atu i te tahi taime ’aita e hōho’a ra. E mea pinepine te mau ha’amaita’ira’a nō te ha’apa’o—’e te mau hope’a o te hara—i te ’ore e ’ite-’oi’oi-hia ’e i te ’ore e ’itehia nā rāpae. E mea pāpū rā te reira, nō te mea e mea parauti’a te Atua.

Noa atu tātou e fa’aitoito roa, e hara tātou pā’āto’a ma te « ’ere i te ha’amaita’i a te Atua ra » (Roma 3:23). Nō tōna ’itera’a i te reira, ’ua hōro’a mai te Metua i te ao ra ia tātou i te hō’ē rāve’a nō te tātarahapa ’ia nehenehe ia tātou ’ia ho’i fa’ahou iāna ra.

E ’āfa’i mai te tātarahapara’a i te mana o tō tātou Tāra’ehara, ’o Iesu Mesia, i roto i tō tātou orara’a (hi’o Helamana 5:11). ’Ia tātarahapa ana’e tātou, e tāmāhia tātou i te hara nā roto i te tūsia tāra’ehara a Iesu Mesia ’e te hōro’a nō te Vārua Maita’i (hi’o 3 Nephi 27:16–20). Nā roto i te tātarahapara’a, e ’ite tātou i te ’oa’oa. ’Ua matara te ’ē’a nō te ho’i atu i te Metua i te ao ra nō tātou, nō te mea e Atua aroha ’oia. (Hi’o « Tātarahapara’a » i roto i te ha’api’ira’a 3.)

Ha’api’i ’ia haere nā roto i te fa’aro’o

Te tahi atu tumu o teie orara’a ’o te noa’ara’a ïa te ’ite ’o tē noa’a noa mai nā roto i te fa’ata’a-’ē-ra’a iāna i te Metua i te ao ra. Nō te mea ē ’aita tātou e ’ite ra iāna, tītauhia ia tātou ’ia ha’api’i i te haere nā roto i te fa’aro’o (hi’o 2 Korinetia 5:6–7).

’Aita te Atua i vaiiho noa ia tātou ’o tātou ana’e i ni’a i teie ’ē’a. ’Ua hōro’a mai ’oia i te Vārua Maita’i nō te arata’i, nō te fa’aitoito, ’e nō te ha’amo’a ia tātou. ’Ua hōro’a ato’a mai ’oia i te mau pāpa’ira’a mo’a, te mau peropheta, te pure, ’e te ’evanelia a Iesu Mesia.

E nehenehe te mau tuha’a ato’a o tō tātou orara’a i te tāhuti nei—te mau ’oa’oa ’e te mau ’oto, te mau manuïara’a ’e te mau manuïa-’ore-ra’a—e tauturu ia tātou ’ia tupu i te rahi ’a fa’aineine ai tātou nō te ho’i i te Atua ra.

Heheura’a pāpa’ira’a mo’a

E taime nō te tupura’a i te rahi ’e nō te haere i mua

Mā’itira’a

Te maita’i ’e te ’ino

Moroni 7:12–19

Hara

Tītau-roa-hia tātou ’ia tāmāhia nō te pārahi i pīha’i iho i te Atua

Ha’api’i rahi atu ā nō ni’a i teie parau tumu

Arata’i nō te mau pāpa’ira’a mo’a : « Pohe, Tāhuti », « ’Ati »
Gospel Topics : « Mortality », « Adversity »

Te tāra’ehara a Iesu Mesia

Nō te hi’ara’a o Adamu ’e o Eva, tē fa’aruru nei tātou i te hara ’e te pohe. E’ita e ti’a ia tātou iho ’ia upo’oti’a i ni’a i te fa’ahope’ara’a o te hara ’e te pohe. I roto i te fa’anahora’a nō te fa’aorara’a a tō tātou Metua i te ao ra, ’ua hōro’a mai ’oia i te rāve’a nō te upo’oti’a i ni’a i te mau fa’ahope’ara’a o te Hi’ara’a e ti’a ai ia tātou ’ia ho’i fa’ahou iāna ra. Hou ’a hāmanihia ai te ao nei, ’ua mā’iti ’oia ia Iesu Mesia ’ia riro ’ei Fa’aora ’e ’ei Tāra’ehara nō tātou.

’O Iesu Mesia ana’e tē nehenehe e fa’aora ia tātou i te hara ’e i te pohe. ’O ’oia te Tamaiti mau a te Atua. ’Ua ora ’oia i te hō’ē orara’a hara ’ore, ma te auraro hope i tōna Metua. ’Ua fa’aineinehia ’oia ’e ’ua hina’aro i te rave i te hina’aro o te Metua i te ao ra.

I roto i te tāra’ehara a te Fa’aora, tē vai ra tōna mamae i Getesemane, tōna mamae ’e tōna pohe i ni’a i te sātauro, ’e tōna ti’afa’ahoura’a. ’Ua māuiui ’oia hau atu i te hāro’aro’ahia—ē ’ua tahe te toto nā roto i te mau poa ato’a (hi’o Te Ha’api’ira’a Tumu ’e te mau Fafaura’a 19:18).

’O te tāra’ehara a Iesu Mesia te ’ohipa hanahana roa a’e i roto i te ’ā’amu o te ta’ata nei. Nā roto i tāna tūsia tāraʼehara ʼua fa’ati’a Iesu ’ia tupu te fa’anahora’a a te Metua. ’Aita tā tātou e rāve’a ’āhiri ’aita te tāra’ehara a Iesu Mesia, nō te mea e’ita e ti’a ia tātou ’ia fa’aora ia tātou iho i te hara ’e i te pohe (hi’o Alama 22:12–15).

’Ua riro te tūsia a tō tātou Fa’aora ’ei fa’a’itera’a hope roa nō tōna here i tōna Metua ’e ia tātou. Te « ’ā’ano, te maoro, te hōhonu, ’e te teitei » o te here o te Mesia e ’ore roa ïa e tae’a i tō tātou ’ite (Ephesia 3:18 ; hi’o ato’a te ’īrava 19).

’Ua upo’oti’a Iesu Mesia i te pohe nō te tā’āto’ara’a

I tō Iesu Mesia pohera’a i ni’a i te sātauro, ’ua fa’ata’a-’ē-hia tōna vārua i tōna tino. I te toru o te mahana, ’ua ’āmui-fa’ahou-hia tōna vārua ’e tōna tino, ma te ’ore roa e fa’ata’a-’ē-fa’ahou-hia. ’Ua fā atu ’oia i mua e rave rahi ta’ata, ma te fa’a’ite ia rātou ē e tino ’i’o ’e te ivi tāhuti ’ore tōna. ’Ua pi’ihia te tāhō’ē-fa’ahou-ra’a te vārua ’e te tino te ti’afa’ahoura’a.

’Ei feiā tāhuti, e pohe tātou tāta’itahi. Nā roto rā i te upo’oti’ara’a ’o Iesu i ni’a i te pohe, e ti’afa’ahou mai te mau ta’ata ato’a i fānauhia i te fenua nei. E ō hanahana te Ti’afa’ahoura’a nō te tā’āto’ara’a, tei hōro’ahia mai nā roto i te aroha ’e te maita’i tāra’ehara o te Fa’aora. E tāhō’ē-fa’ahou-hia te vārua ’e te tino o te ta’ata tāta’itahi, ’e e ora tātou tāta’itahi ē a muri noa atu i roto i te hō’ē tino maita’i roa ’e te ti’afa’ahou. ’Āhiri ’aita ’o Iesu Mesia, ’ua tinai te pohe i te ti’aturira’a i te hō’ē orara’a a muri a’e i pīha’i iho i te Metua i te ao ra (hi’o 2 Nephi 9:8–12).

Maoti Iesu e ti’a ai ia tātou ’ia tāmāhia i tā tātou mau hara

Nō te māramarama i te ti’aturira’a e roa’a mai nā roto i te Mesia, e tītauhia ’ia māramarama i te ture nō te parauti’a. ’O te ture taui ’ore teie e fa’autu’a i tā tātou mau ’ohipa. E hōpoi mai te aurarora’a i te Atua i te mau utu’a maitata’i, ’e te fa’aro’o-’ore-ra’a i te mau utu’a ’ino. (hi’o Alama 42:14–18.) ’Ia hara ana’e tātou, e riro mai tātou ’ei mea vi’ivi’i i te pae vārua, ’e ’aita e mea vi’ivi’i e nehenehe e ora i mua i te aro o te Atua (hi’o 3 Nephi 27:19).

Jesus Praying in Gethsemane [Iesu e pure ra i Getesemane], nā Harry Anderson

I te taime nō te tūsia tāra’ehara a Iesu Mesia, ’ua ti’a ’oia nō tātou, ’ua māuiui, ’e ’ua ’aufau i te ho’o nō tā tātou mau hara (hi’o 3 Nephi 27:16–20). ’Ua hōro’a te fa’anahora’a a te Atua ia Iesu Mesia i te mana nō te ti’a ’ei ārai nō tātou—nō te ti’a i rotopū ia tātou ’e te parauti’a (hi’o Mosia 15:9). Nā roto i te tūsia tāra’ehara a Iesu, e nehenehe tāna e ti’aoro i tōna ti’ara’a mana nō te tahiti’a ia tātou mai te mea e fa’a’ohipa tātou i tō tātou fa’aro’o nō te tātarahapa (hi’o Moroni 7:27 ; Te Ha’api’ira’a Tumu ’e te mau Fafaura’a 45:3–5). « E nō reira, e ti’a ai i te aroha ’ia fa’atupu i te mau tītaura’a nō te parauti’a, ’e ’ia ha’a’ati ia [tātou] i te rima nō te hau » (Alama 34:16).

Nā roto ana’e i te hōro’a nō te tāra’ehara a te Fa’aora ’e tā tātou tātarahapara’a e ti’a ai ia tātou ’ia ho’i e ora i pīha’i iho i te Atua. Nā roto i te tātarahapara’a, e fa’a’orehia tā tātou mau hara ’e e tāmāhia tātou i te pae vārua. E ha’amāmāhia te hōpoi’a o te mana’o fa’ahapa nō tā tātou mau hara. E fa’aorahia tō tātou vairua pēpē. E fa’ari’i tātou i te ’oa’oa (hi’o Alama 36:24).

Noa atu ’aita tātou i tae i te fāito maita’i roa ’e e riro fa’ahou tātou i te hape, e rahi a’e te maita’i, te here ’e te aroha i roto ia Iesu Mesia, i te manuia ’ore ’e te hape ’e te hara i roto ia tātou. ’Ua ineine noa te Atua ’e ’ua hina’aro ho’i ’ia tauahi mai ia tātou ’ia fāriu ana’e tātou iāna ra ’e ’ia tātarahapa (hi’o Luka 15:11–32). ’Aore mea « e ti’a ’ia fa’ata’a ’ē ia tātou i te aroha o te Atua, i roto i tō tātou Fatu ia Iesu Mesia ra » (Roma 8:39).

ʼUa rave ’o Iesu Mesia i niʼa iho iāna i tā tātou mau hara, mau māuiui, ʼe te mau paruparu

I roto i tāna tūsia tāra’ehara, ʼua rave ’o Iesu Mesia i niʼa iho iāna i tā tātou mau hara, mau māuiui ʼe mau paruparu. Nō reira, ’ua ’ite ’oia « nā roto i te tino i te rāve’a nō te fa’aora i tōna mau ta’ata ’ia au i tō rātou paruparu » (Alama 7:12 ; hi’o ato’a i te ’īrava 11). Tē ani manihini mai nei ’oia ē, « e haere mai ’outou iā’u nei », ’e mai te mea e nā reira tātou, e hōro’a mai ’oia ia tātou i te hau, te tīa’ira’a, te pūai, te hi’ora’a ātea ’e te fa’aorara’a māuiui (Mataio 11:28 ; hi’o ato’a te mau ’īrava 29–30).

Mai te mea e turu’i tātou i ni’a ia Iesu Mesia ’e tāna tāra’ehara, e nehenehe ’oia e tauturu ia tātou ’ia fa’a’oroma’i i tō tātou mau fifi, tō tātou mau ma’i ’e tō tātou mau māuiui. E nehenehe tātou e fa’a’īhia i te ’oa’oa, i te hau ’e i te tāmāhanahanara’a. Te mau mea au ’ore ato’a i roto i te orara’a nei, e ti’a ïa ’ia fa’a’āfarohia nā roto i te tāra’ehara a Iesu Mesia.

Heheura’a pāpa’ira’a mo’a

Te tāra’ehara a te Fa’aora

Ti’afa’ahoura’a

Ha’api’i rahi atu ā nō ni’a i teie parau tumu

Arata’i nō te mau pāpa’ira’a mo’a : « Iesu Mesia », « Tāra’ehara », « Maita’i »
Gospel Topics : « Jesus Christ », « Atonement of Jesus Christ », « Grace »

Te ao vārua

E rave rahi te ta’ata e uiui nei : « E aha tē tupu i muri mai i tō’u pohe ? » E hōro’a mai te fa’anahora’a nō te fa’aorara’a i te mau pāhonora’a faufa’a roa nō teie uira’a.

E tuha’a te pohe i roto i te « ’ōpuara’a aroha » a te Atua nō tātou (2 Nephi 9:6). E ’ere te pohe i te hope’a o tō tātou orara’a, ’o te ta’ahira’a rā nō muri iho i roto i tō tātou haerera’a mure ’ore i mua. Nō te riro mai te Atua ra te huru, e tītau-roa-hia ia tātou ’ia ’ite i te pohe ’e ’ia fa’ari’i i muri iho i te tino maita’i roa ’e te ti’afa’ahou.

’Ia pohe tō tātou tino tāhuti, e tāmau noa tō tātou vārua i te ora i roto i te ao vārua. ’O te hō’ē ïa vaira’a taime poto nō te ha’api’ira’a ’e nō te fa’aineinera’a hou te ti’afa’ahoura’a ’e te ha’avāra’a hope’a. E vai noa tō tātou ’ite nō te tāhuti nei i roto ia tātou.

I roto i te ao vārua, nō te mau ta’ata i fa’ari’i ’e i ora i te ’evanelia a Iesu Mesia « e fa’ari’ihia rātou i roto i te hō’ē vāhi ’oa’oa, ’o tei parauhia te pāradaiso » (Alama 40:12). E fa’ari’i-ato’a-hia te mau tamari’i ri’i i roto i te pāradaiso ’ia pohe ana’e rātou.

E vai hau noa te mau vārua o te pāradaiso i tō rātou mau fifi ’e tō rātou mau ’oto. E tāmau noa rātou i tō rātou tupura’a i te rahi i te pae vārua, ma te rave i te ’ohipa a te Atua ’e ma te aupuru ia vetahi ’ē. E ha’api’i rātou i te ’evanelia i te feiā tei ’ore i fa’ari’i i te reira i roto i tō rātou orara’a tāhuti nei (hi’o Te Ha’api’ira’a Tumu ’e te mau Fafaura’a 138:32–37, 57–59).

I roto i te ao vārua, te mau ta’ata tei ’ore i fa’ari’i i te ’evanelia i ni’a i te fenua nei, ’e ’aore rā, tei mā’iti ’eiaha e ha’apa’o i te mau fa’auera’a, e fa’aruru ïa rātou i te tahi mau tā’ōti’ara’a (hi’o Te Ha’api’ira’a Tumu ’e te mau Fafaura’a 138:6–37 ; Alama 40:6–14). Nō te mea rā ē e mea parauti’a ’e te aroha te Atua, e fa’ari’i ïa rātou i te rāve’a ’ia ha’api’ihia i te ’evanelia a Iesu Mesia. Mai te mea e fa’ari’i ’e e tātarahapa rātou, e fa’aorahia ïa rātou i tā rātou mau hara (hi’o Te Ha’api’ira’a Tumu ’e te mau Fafaura’a 138:58 ; hi’o ato’a 138:31–35 ; 128:22). E fa’ari’i-pōpou-hia rātou i roto i te hau o te pāradaiso. I te hope’a, e hōro’ahia ia rātou te hō’ē pārahira’a i roto i te hō’ē bāsileia hanahana tei niuhia i ni’a i te mau mā’itira’a tā rātou i rave i roto i te tāhuti nei ’e i roto i te ao vārua.

E fa’aea noa tātou i roto i te ao vārua ē tae atu i te taime e ti’afa’ahou mai tātou.

Heheura’a pāpa’ira’a mo’a

Ha’api’i rahi atu ā nō ni’a i teie parau tumu

Arata’i nō te mau pāpa’ira’a mo’a : « Pāradaiso »

Te ti’afa’ahoura’a, te fa’aorara’a, ’e te fa’ateiteira’a

Te ti’afa’ahoura’a

Maoti te fa’anahora’a a te Atua e ti’a ai ia tātou ’ia tupu i te rahi ’e ’ia fa’ari’i i te ora mure ’ore. I muri iho i tō tātou tere i roto i te ao vārua, ’o te ti’afa’ahoura’a ïa te ta’ahira’a nō muri mai, nō taua tupura’a ra.

Te ti’afa’ahoura’a ’o te tāhō’ē-fa’ahou-ra’a ïa tō tātou tino ’e tō tātou vārua. E ti’afa’ahou tātou tāta’itahi. ’Ua tupu te reira nā roto i te tāra’ehara ’e te ti’afa’ahoura’a o te Fa’aora. (Hi’o Alama 11:42–44.)

’Ia ti’afa’ahou ana’e tātou, e fa’ari’i tātou tāta’itahi i te hō’ē tino ’i’o ’e te maita’i roa, ’aita e māuiui fa’ahou ā ’e ’aita e ma’i. E ta’ata tāhuti ’ore ïa tātou, ’o tē ora ē a muri noa atu.

Te fa’aorara’a

Nō te mea e ti’afa’ahou tātou pā’āto’a, e fa’aorahia ïa tātou pā’āto’a—’e ’aore rā, e roa’a te fa’aorara’a—i te pohe tino nei. ’Ua hōro’ahia mai teie ō nō tātou nā roto i te maita’i rahi o Iesu Mesia.

E nehenehe ato’a tātou e fa’aorahia—’e ’aore rā, e fa’ari’i i te fa’aorara’a—i te mau utu’a tā te ture nō te parauti’a e tītau nei nō tā tātou mau hara. E roa’a ato’a teie hōro’a nā roto i te maita’i ’e te aroha o Iesu Mesia ’ia tātarahapa ana’e tātou. (Hi’o Alama 42:13–15, 21–25.)

Te fa’ateiteira’a

Te fa’ateiteira’a, ’e ’aore rā, te ora mure ’ore, ’o te fāito teitei roa a’e ïa o te ’oa’oara’a ’e te hanahana i roto i te bāsileia tiretiera. E hōro’a ma te tītaura’a te fa’ateiteira’a. ’Ua ha’api’i te peresideni Russell M. Nelson : « Teie mau tītaura’a nō te ti’ara’a pipi, ’o te fa’aro’o ïa i te Fatu, te tātarahapara’a, te bāpetizora’a, te fa’ari’ira’a i te Vārua Maita’i, ’e te ha’apa’o-maita’i-ra’a i te mau ’ōro’a ’e te mau fafaura’a o te hiero » (« Fa’aorara’a ’e Fa’ateiteira’a », Liahona, Mē 2008, 9).

Te fa’ateiteira’a ’o te orara’a ïa i pīha’i iho i te Atua ē a muri noa atu, i roto i te mau ’utuāfare mure ’ore. ’O te noa’ara’a ïa te ’ite nō te Atua ’e nō Iesu Mesia, ’o te rirora’a mai ia rāua te huru ’e ’o te ’itera’a i te orara’a tā rāua e fāna’o nei.

Heheura’a pāpa’ira’a mo’a

Ha’api’i rahi atu ā nō ni’a i teie parau tumu

Arata’i nō te mau pāpa’ira’a mo’a : « Ti’afa’houra’a »
Gospel Topics : « Resurrection », « Salvation »

Te Ha’avāra’a ’e te mau bāsileia hanahana

Fa’ata’ara’a : I te taime mātāmua ’a ha’api’i ai ’oe nō ni’a i te mau ao hanahana, ’a ha’api’i ma te fāito ’ōhie mai te au i te mau hina’aro ’e te māramarama o te ta’ata.

’Ia ti’afa’ahou mai tātou, ’o Iesu Mesia te ha’avā parauti’a ’e te aroha nō tātou. Ta’a ’ē noa atu i te reira, e fa’ari’i tātou tāta’itahi i te hō’ē pārahira’a i roto i te hō’ē bāsileia hanahana. Noa atu ē e ti’afa’ahou mai tātou pā’āto’a, e’ita tātou pā’āto’a e fa’ari’i i te hō’ē ā hanahana mure ’ore (hi’o Te Ha’api’ira’a Tumu ’e te mau Fafaura’a 88:22–24, 29–34 ; 130:20–21 ; 1320:5).

Te mau ta’ata tei ’ore i fāna’o i te rāve’a nō te māramarama hope ’e nō te ha’apa’o hope i te mau ture a te Atua i roto i tō rātou orara’a tāhuti nei, e fāna’o ïa rātou i teie rāve’a i roto i te ao vārua. E ha’avā ’o Iesu i te ta’ata tāta’itahi ’ia au i tō rātou fa’aro’o, tā rātou mau ’ohipa, tō rātou mau hina’aro ’e te tātarahapara’a i roto i te tāhuti nei ’e i roto i te ao vārua (hi’o Te Ha’api’ira’a Tumu ’e te mau Fafaura’a 138:32–34, 57–59).

Tē ha’api’i nei te mau pāpa’ira’a mo’a nō ni’a i te mau bāsileia hanahana tiretiera, teretetiera ʼe tiretia. E fa’a’itera’a te reira nō te here o te Atua, tōna parauti’a, ’e tōna aroha.

Te feiā ’o tē fa’a’ohipa i tō rātou fa’aro’o i te Mesia, tei tātarahapa i tā rātou mau hara, tei fa’ari’i i te mau ’ōro’a o te ’evanelia, ’e tei ha’apa’o i tā rātou mau fafaura’a, tei fa’ari’i i te Vārua Maita’i, ’e tei fa’a’oroma’i ē tae noa atu i te hope’a, e fa’aorahia ïa rātou i roto i te bāsileia tiretiera. I roto ato’a i teie bāsileia te mau ta’ata tei ’ore i fāna’o i te rāve’a nō te fa’ari’i i te ’evanelia i roto i tō rātou orara’a tāhuti nei, « ’o tei ti’a rā ’ia fa’ari’i i te reira ma tō rātou ’ā’au ato’a » ’e ’ua nā reira rātou i roto i te ao vārua (Te Ha’api’ira’a Tumu ’e te mau Fafaura’a 137:8 ; hi’o ato’a i te ’īrava 7). Te mau tamari’i tei pohe hou a’e te matahiti e ta’a ai tōna mana’o (e va’u matahiti) e fa’aora-ato’a-hia ïa i roto i te bāsileia tiretiera (hi’o Te Ha’api’ira’a Tumu ’e te mau Fafaura’a 137:10).

I roto i te mau pāpa’ira’a mo’a, ’ua fa’aauhia te bāsileia tiretiera i te hanahana ’e ’aore rā i te ’ana’ana o te mahana. (Hi’o Te Ha’api’ira’a Tumu ’e te mau Fafaura’a 76:50–70.)

Te feiā ’o tei ora i te orara’a tura « ’o tei ’ore i fa’ari’i i te ’itera’a pāpū nō Iesu i roto i te orara’a nei, ’e ’ua fa’ari’i rā i te reira i muri iho » e fa’ari’i ïa rātou i te hō’ē pārahira’a i roto i te bāsileia teretetiera (Te Ha’api’ira’a Tumu ’e te mau Fafaura’a 76:74). Hō’ē ā huru nō te feiā tei ’ore i itoito i roto i tō rātou ’itera’a pāpū nō ni’a ia Iesu. ’Ua fa’aauhia teie bāsileia i te hanahana o te ’āva’e. (hi’o Te Ha’api’ira’a Tumu ’e te mau Fafaura’a 76:71–80.)

Te feiā tei tāmau noa i roto i tā rātou mau hara ’e tei ’ore i tātarahapa i roto i teie orara’a ’e ’aore rā ’o tei fa’ari’i i te ’evanelia a Iesu Mesia i roto i te ao vārua, e fa’ari’i ïa rātou i tā rātou utu’a i roto i te bāsileia tiretia. ’Ua fa’aauhia teie bāsileia i te hanahana o te mau feti’a. (hi’o Te Ha’api’ira’a Tumu ’e te mau Fafaura’a 76:81–86.)

Ha’amāramaramara’a ha’api’ira’a tumu : Te Ha’avāra’a

E ti’a te mau ta’ata ato’a i mua ia Iesu Mesia « ’ia ha’avāhia rātou mai te au i tā rātou ra mau ’ohipa » (3 Nephi 27:15 ; hi’o te mau ’īrava 13–15). E hi’opo’a te Fatu i te vaira’a ta’a ’ē o te ta’ata tāta’itahi, mai tō rātou ’ite i te maita’i ’e te ’ino, tē māramaramara’a i te ’evanelia, tē fāito o te mau mea tā rātou e ta’a, ’e tō rātou mau hina’aro (hi’o Luka 12:47–48 ; Te Ha’api’ira’a Tumu ’e te mau Fafaura’a 137:9).

Nō te mea ho’i ē ’aita tātou e māramarama hope roa i te vaira’a o te ta’ata, e ti’a ïa ia tātou ’ia ha’apae i te fa’aoti i te bāsileia hanahana tā rātou e fa’ari’i. E fa’aineine rā tātou ia tātou nō te fārerei i te Fatu ’e nō te ani ia vetahi ’ē ’ia fa’aineine ato’a. (Hi’o Alama 5:15–19, 33 ; Moroni 10:32 ; Dallin H. Oaks, « ‘Judge Not’ and Judging [’Eiaha e ha’avā ’e Ha’avāhia] », Ensign, ’Ātete. 1999, 6–13.)

Heheura’a pāpa’ira’a mo’a

Ha’api’i rahi atu ā nō ni’a i teie parau tumu

Arata’i nō te mau pāpa’ira’a mo’a : « Ha’avā, Ha’avāra’a », « Te mau fāito hanahana »

Mana’o nō te ha’api’ira’a poto ’e te mea tano noa te roa

Te arata’i ha’api’ira’a i muri nei ’o te hō’ē ïa hi’ora’a nō te mea e nehenehe e ha’api’i i te ta’ata mai te mea e taime poto noa tō ’outou. ’Ia fa’a’ohipa ana’e ’oe i teie arata’ira’a, ’a mā’iti i te hō’ē parau tumu, ’e ’aore rā hau atu, nō te ha’api’i. ’Ua hōhorahia te ha’api’ira’a tumu niu nō te parau tumu tāta’itahi i te ’ōmuara’a o te ha’api’ira’a.

’A ha’api’i ai ’oe, ’a ui i te mau uira’a ’e ’a fa’aro’o. ’A tu’u i te mau tītaura’a manihini ’o tē tauturu ia rātou ’ia ha’afātata atu ā i te Atua. Te tahi tītaura’a manihini faufa’a roa, ’o te anira’a ïa i te ta’ata ’ia fārerei fa’ahou ’outou. Te roara’a o te ha’api’ira’a tei te huru ïa o te mau uira’a tā ’oe e ui ’e tō ’oe fa’aro’ora’a i tei parauhia mai.

Te mea e nehenehe e ha’api’i i te ta’ata i roto e 3–10 minuti

E mau tamari’i vārua tātou pā’āto’a nā te Atua. E mau melo tātou nō tōna ’utuāfare. ’Ua ’ite ’oia ’e ’ua aroha ’oia ia tātou tāta’itahi.
’Ua hōro’a mai te Atua i te hō’ē fa’anahora’a nō tō tātou ’oa’oa ’e tō tātou haerera’a i mua i roto i teie orara’a ’e te tau mure ’ore.
I roto i te fa’anahora’a a te Atua, ’ua tītauhia ia tātou ’ia haere mai i te fenua nei nō te fa’ari’i i te hō’ē tino tāhuti, nō te ha’api’i ’e nō te tupu i te rahi.
’O Iesu Mesia te pū o te fa’anahora’a a te Atua. Maoti ’oia e ti’a ai ia tātou ’ia fa’ari’i i te ora mure ’ore.
I raro a’e i te arata’ira’a a te Atua, ’ua poiete Iesu i te fenua nei.
’Ua ’ōpuahia te mau ’ohipa tā tātou e ’ite i ni’a i te fenua nei, nō te tauturu ia tātou ’ia fa’aineine nō te ho’i atu i mua i te aro o te Atua.
E hara tātou tāta’itahi, ’e e pohe tātou tāta’itahi. Nō tōna here ia tātou, ’ua tono mai te Atua i tāna Tamaiti, ’o Iesu Mesia, i te fenua nei nō te fa’aora ia tātou i te hara ’e i te pohe.
Te mau mea ato’a e ’ere i te mea maita’i i roto i te orara’a nei, e nehenehe ïa e tātā’ihia nā roto i te tāra’ehara a Iesu Mesia.
’Ia pohe ana’e tō tātou tino tāhuti, e tāmau noa tō tātou vārua i te ora. I te pae hope’a e ti’afa’ahou mai tātou pā’āto’a. Te aura’a ra, e tāhō’ē-fa’ahou-hia te vārua ’e te tino o te ta’ata tāta’itahi, ’e e ora tātou pā’āto’a i roto i te hō’ē tino maita’i roa ’e te ti’afa’ahou ē a muri noa atu.
’Ia ti’afa’ahou mai tātou, ’o Iesu Mesia tō tātou ha’avā. Ta’a ’ē noa atu ma’a ta’ata ri’i, e fa’ari’i te mau tamari’i ato’a a te Atua i te hō’ē pārahira’a i roto i te hō’ē bāsileia hanahana. E nehenehe tātou e ho’i fa’ahou e ora i mua i te aro o te Atua mai te mea e ha’apa’o maita’i tātou.