« Pene 3 : Ha’api’ira’a 3—Te ’evanelia a Iesu Mesia », ’Ia poro haere i tā’u nei ’Evanelia : E arata’i nō te fa’a’ite i te ’evanelia a Iesu Mesia (2023)

« Pene 3 : Ha’api’ira’a 3 », ’Ia poro haere i tā’u nei ’Evanelia

Pene 3 : Ha’api’ira’a 3

Te ’evanelia a Iesu Mesia

The Second Coming [Te Tae-Piti-Ra’a mai], nā Harry Anderson

Tē uiui nei paha te ta’ata

’O vai ’o Iesu Mesia ? Nāhea ’oia e tauturu mai ai iā’u ’e tō’u ’utuāfare ?
E aha te aura’a ’ia fa’atupu i te fa’aro’o ia Iesu Mesia ? Nāhea te noa’ara’a te fa’aro’o iāna e ha’amaita’i ai i tō’u orara’a ?
E aha te aura’a te tātarahapara’a ?
Nāhea vau e fa’ari’i ai i te hau o te Atua ’e te fa’aorera’a hara i muri a’e i te ravera’a i te mau mā’itira’a ’ī’ino ?
E aha te fā o te bāpetizora’a ?
E aha te hōro’a nō te Vārua Maita’i ?
E aha te aura’a ’ia fa’a’oroma’i ē tae noa atu i te hope’a ?

Te ’evanelia a Iesu Mesia ’o te rāve’a ïa e haere ai tātou i te Mesia ra. E mea ’ōhie roa nō te hō’ē tamari’i ’ia māramarama i te reira. Tē ha’atumu nei teie ha’api’ira’a i ni’a i te ’evanelia ’e te ha’api’ira’a tumu a te Mesia, mai te fa’aro’o ia Iesu Mesia, te tātarahapara’a, te bāpetizora’a, te hōro’a nō te Vārua Maita’i, ’e te fa’a’oroma’ira’a ē tae noa atu i te hope’a. Tē ha’atumu ato’a nei te reira i ni’a i te huru te ’evanelia e ha’amaita’i ai i te mau tamari’i ato’a a te Atua.

Te aura’a o te ta’o ’evanelia ’oia ho’i, e « parau ’āpī maita’i. » E parau ’āpī maita’i te ’evanelia a Iesu Mesia nō te mea tē hōro’a mai nei i te ha’api’ira’a tumu—te parau mau mure ’ore—tei tītauhia nō te haere mai iāna ra ’e ’ia fa’aorahia (hi’o 1 Nephi 15:14). Tē ha’api’i mai nei te ’evanelia ia tātou nāhea i te ora i te hō’ē orara’a maita’i ’e te faufa’a. E hōro’a mai te parau ’āpī maita’i o te ’evanelia i te rāve’a ’ia fa’a’orehia tā tātou mau hara, ’ia ha’amo’ahia, ’e ’ia ho’i fa’ahou i mua i te aro o te Atua.

Ha’amāramaramara’a ha’api’ira’a : Te ’evanelia a te Mesia ’e te ha’api’ira’a tumu a te Mesia

Tei roto i te ’evanelia a Iesu Mesia te tā’āto’ara’a o te ha’api’ira’a tumu, te mau parau tumu, te mau ture, te mau fa’auera’a, te mau ’ōro’a, ’e te mau fafaura’a e tītauhia nō tō tātou fa’aorara’a ’e tō tātou fa’ateiteira’a.

Te poro’i a te ’evanelia, ’oia ho’i, e noa’a ia tātou te mana fa’aora ’e te tāra’ehara o Iesu Mesia. E rave tātou i te reira nā roto i te fa’a’ohipara’a i te fa’aro’o iāna, te tātarahapara’a, te bāpetizora’a, te fa’ari’ira’a i te hōro’a nō te Vārua Maita’i, ’e te fa’a’oroma’ira’a ē tae noa atu i te hope’a (hi’o Hīro’a Fa’aro’o 1:4).

’Ua ’ite-ato’a-hia te reira ’ei ha’api’ira’a tumu nā te Mesia. Te orara’a i teie ha’api’ira’a tumu, ’o te huru ïa tātou e haere ai i te Mesia ’e e fa’aorahia ai (hi’o 1 Nephi 15:14). ’Ua ha’api’i-pāpū-hia te reira i roto i te Buka a Moromona (hi’o 2 Nephi 31 ; 32:1–6 ; 3 Nephi 11:31–40 ; 27:13–22). Tā ’oe fā ’o tē tauturura’a ïa i te mau ta’ata ’ia haere mai i te Mesia nā roto i te tauturura’a ia rātou ’ia ora i tāna ha’api’ira’a tumu.

Hi’o Arata’i nō te mau pāpa’ira’a mo’a, « ’Evanelia », « Ha’api’ira’a Tumu a te Mesia »; Gospel Topics, « Gospel. »

Mana’o nō te ha’api’i i te ta’ata

E hōro’a mai teie tuha’a i te hi’ora’a nō te tauturura’a ia ’oe ’ia fa’aineine nō te ha’api’i. Tē vai ato’a ra te hi’ora’a nō te mau uira’a ’e te mau tītaura’a manihini tā ’oe e nehenehe e fa’a’ohipa.

’A fa’aineine ai ’oe nō te ha’api’i i te ta’ata, ’a feruri nā roto i te pure i te huru o te ta’ata tāta’itahi ’e i tōna mau hina’aro pae vārua. ’A fa’aoti e aha te mea faufa’a roa a’e e ha’api’i atu. ’A fa’aineine ia ’oe nō te fa’ata’a i te mau ta’o ’aita te ta’ata e māramarama ra. ’A fa’anaho i te taime tā ’oe e fāna’o, ma te ha’amana’o ’ia ha’apoto noa i te mau ha’api’ira’a.

’A mā’iti i te mau pāpa’ira’a mo’a e fa’a’ohipa i roto i te ha’api’ira’a. Tē vai ra i roto i te tuha’a « Ha’api’ira’a tumu niu » o te ha’api’ira’a e rave rahi pāpa’ira’a mo’a faufa’a ta’a ’ē.

’A feruri i te mau uira’a e ui i roto i te ha’api’ira’a. ’A fa’anaho i te mau tītaura’a manihini ’o tē fa’aitoito i te ta’ata tāta’itahi ’ia rave i te hō’ē ’ohipa.

’A ha’apāpū i te mau ha’amaita’ira’a tei parau-fafau-hia mai e te Atua ’e ’a fa’a’ite i tō ’oe ’itera’a pāpū nō te mea tā ’outou e ha’api’i ra.

Te mea e nehenehe e ha’api’i i te ta’ata i roto e 15–25 minuti

’A mā’iti i te hō’ē parau tumu i muri nei, ’e ’aore rā hau atu, nō te ha’api’i i te ta’ata. ’Ua hōro’ahia te ha’api’ira’a tumu niu nō te parau tumu tāta’itahi i muri mai i teie arata’i ha’api’ira’a.

Te misiōni hanahana a Iesu Mesia

’Ua tono mai te Atua i tāna Tamaiti Here, ’o Iesu Mesia, i te fenua nei nō te fa’aora ia tātou i te hara ’e i te pohe.
Maoti te tūsia tāra’ehara a Iesu, e nehenehe tātou ’ia tāmāhia i tā tātou mau hara ’e ’ia ha’amo’ahia, ’ia tātarahapa ana’e tātou.
I muri a’e i tō Iesu fa’asātaurora’ahia, ’ua ti’afa’ahou mai ’oia. Maoti tōna ti’afa’ahoura’a, e ti’afa’ahou mai tātou pā’āto’a i muri mai i te pohe. Te aura’a ra, e tāhō’ē-fa’ahou-hia te vārua ’e te tino o te ta’ata tāta’itahi, ’e e ora tātou tāta’itahi ē a muri noa atu i roto i te hō’ē tino maita’i roa ’e te ti’afa’ahou.

Te fa’aro’o ia Iesu Mesia

Te faʼaroʼo ’o te parau tumu mātāmua ïa o te ʼevanelia a Iesu Mesia.
Te fa’aro’o ia Iesu Mesia, ’o te ti’aturira’a ïa ē, ’o ’oia te Tamaiti a te Atua ’e ’o te ti’aturira’a iāna ’ei Fa’aora ’e ’ei Tāra’ehara nō tātou.
Te fa’aro’o ia Iesu Mesia, e parau tumu ïa nō te ’ohipa ’e te mana.
E ha’apūai tātou i tō tātou fa’aro’o nā roto i te pure, te ’imira’a pāpa’ira’a mo’a, ’e te ha’apa’ora’a i te mau fa’auera’a.

Te tātarahapara’a

E arata’i te fa’aro’o ia Iesu Mesia ia tātou i te tātarahapara’a. ’Ua riro te tātarahapara’a ’ei rāve’a nō te fāriu atu i ni’a i te Atua ’e te fāriu-’ē-ra’a i te hara. ’Ia tātarahapa ana’e tātou, e taui ïa tā tātou mau ’ohipa, tō tātou mau hina’aro ’e tō tātou mau mana’o ’ia au i te hina’aro o te Atua.
Mai te peu e tātarahapa tātou ma te ’ā’au tae mau, e fa’a’ore te Atua i tā tātou hara. E nehenehe te fa’aorera’a hara e tupu nō te mea ’ua ’aufau ’o Iesu Mesia nō tā tātou mau hara.
’A tātarahapa ai tātou, ’e ’ite tātou i te hau ’a ’ore ai tō tātou mana’o fa’ahapa ’e tō tātou ’oto.
E ’ohipa nō te orara’a tā’āto’a te tātarahapara’a. E fa’ari’i poupou te Atua ia tātou i te mau taime ato’a e tātarahapa tātou. E’ita roa ’oia e fa’aru’e ia tātou.

Te bāpetizora’a : Tā tātou fafaura’a mātāmua ’e te Atua

Te bāpetizora’a ’o te rāve’a ïa e tomo ai tātou nā mua roa i roto i te hō’ē fafaura’a ’e te Atua.
E piti tuha’a tō te bāpetizora’a : te bāpetizora’a pape ’e te bāpetizora’a a te Vārua. ’Ia bāpetizohia tātou ’e ’ia ha’amauhia, e tāmāhia tātou i tā tātou mau hara, ma te hōro’a ia tātou i te hō’ē ha’amatara’a ’āpī i roto i te orara’a.
E bāpetizohia tātou nā roto i te utuhira’a, ma te pe’e i te hi’ora’a o Iesu.
’Aita te mau tamari’i e bāpetizohia ē tae atu i te va’ura’a o tō rātou matahiti. Te mau tamari’i ’o tē pohe hou i tāua matahiti ra ’ua fa’aorahia ïa rātou nā roto i te tāra’ehara a Iesu Mesia.
E rave tātou i te ’ōro’a mo’a i te mau hepetoma ato’a nō te ha’amana’ora’a i te tūsia a Iesu ’e nō te fa’a’āpī i tā tātou mau fafaura’a ’e te Atua.

Te hōro’a nō te Vārua Maita’i

Te Vārua Maita’i, ’o te toru ïa o te melo nō te Atuara’a.
I muri aʼe i tō tātou bāpetizoraʼa, e fa’ari’i tātou i te hōroʼa nō te Vārua Maitaʼi nā roto i te ʼōroʼa nō te haʼamauraʼa.
’Ia fa’ari’i tātou i te hōro’a nō te Vārua Maita’i, e nehenehe tātou e fa’ari’i i tāna auhoara’a i roto i tō tātou orara’a mai te mea e ha’apa’o maita’i tātou.
E ha’amo’a te Vārua Maita’i ia tātou, e arata’i ia tātou, e tāmāhanahana ia tātou, ’e e tauturu mai ia tātou ’ia ’ite i te parau mau.

Fa’a’oroma’i ē tae noa atu i te hope’a

Te fa’a’oroma’ira’a ’o te tāmaura’a ïa i te fa’a’ohipa i te fa’aro’o i te Mesia i te mahana tāta’itahi. E tāmau tātou i te ha’apa’o i tā tātou mau fafaura’a ’e te Atua, e tātarahapa tātou, e ’imi tātou i te auhoara’a o te Vārua Maita’i, ’e e rave tātou i te ’ōro’a mo’a.
’Ia ’imi tātou i te pe’e ia Iesu Mesia ma tō tātou fa’aro’o ato’a, ’ua parau fafau ïa te Atua i te ora mure ’ore nō tātou.

E ha’amaita’i te ’evanelia a Iesu Mesia i te mau tamari’i ato’a a te Atua

Nā te orara’a i te ’evanelia e fa’ahōhonu i tō tātou ’oa’oa, e fa’auru i tā tātou mau ’ohipa, ’e e ha’afaufa’a i tō tātou mau tā’amura’a.
E rahi atu ā tō tātou ’oa’oa—’ei ta’ata hō’ē ’e ’ei ’utuāfare—’ia ora ana’e tātou mai te au i te mau ha’api’ira’a a Iesu Mesia.
Nā roto i te ’evanelia a Iesu Mesia, e ha’amaita’ihia te mau ’utuāfare i roto i teie orara’a ’e e nehenehe e tāhō’ēhia ē a muri noa atu ’e e ora i mua i te aro o te Atua.

Te mau uira’a e nehenehe e ui i te ta’ata

Te mau uira’a i muri nei e hi’ora’a ïa nō te uira’a tā ’oe e nehenehe e ui i te ta’ata. E nehenehe teie mau uira’a e tauturu ia ’oe ’ia fa’atupu i te mau ’āparaura’a maita’i ’e ’ia māramarama i te mau hina’aro ’e te hi’ora’a a te hō’ē ta’ata.

E aha tā ’oe i ’ite nō ni’a ia Iesu Mesia ?
E aha te aura’a nō ’oe ’ia fa’atupu i te fa’aro’o ia Iesu Mesia ?
E aha te mau tauira’a tā ’oe e hina’aro e rave i roto i tō ’oe orara’a ?
E aha tā ’oe i māramarama nō ni’a i te tātarahapa ?
E aha tā ’oe i māramarama nō ni’a i te bāpetizora’a ? E aha tā ’oe e nehenehe e rave i teienei nō te fa’aineine nō te bāpetizora’a ?
Nāhea te Vārua Maita’i e taututu ai ia ’oe i roto i tō ’oe tere ho’ira’a i mua i te aro o te Atua ?
E aha te fifi tā ’oe ’e ’aore rā tā tō ’oe ’utuāfare e fa’aruru nei ? E nehenehe ānei mātou e fa’a’ite atu i te tahi mau rāve’a e ti’a ai i te ’evanelia a Iesu Mesia i te tauturu mai ?

Te mea e nehenehe e tītau manihini

E ani ānei ’oe i te Atua nā roto i te pure ’ia tauturu mai ’ia ’ite ē e parau mau tā māua i ha’api’i ? (Hi’o « Ha’amāramaramara’a ha’api’ira’a : Pure » i roto i te tuha’a hope’a o te ha’api’ira’a 1.)
E haere ānei ’oe i te purera’a i teie Sābati ’ia rahi atu ā tō ’oe ’ite i te mea tā māua i ha’api’i ?
E tai’o ānei ’oe i te Buka a Moromona ’e e pure ānei ’oe nō te ’ite ē e parau te reira nā te Atua ? (E hina’aro paha ’oe e hōro’a i te tahi mau pene ’e ’aore rā mau ’īrava ta’a ’ē.)
E pe’e ānei ’oe i te hi’ora’a o Iesu ma te bāpetizo ia ’oe ? (Hi’o « Te ani-manihini-ra’a ’ia bāpetizo ’e ’ia ha’amauhia », tē nā mua noa mai i teie ha’api’ira’a.)
E nehenehe ānei tātou e fa’ata’a i te hō’ē taime nō te fārerei fa’ahou ā ?

Ha’api’ira’a tumu niu

Tē hōro’a nei teie tuha’a i te ha’api’ira’a tumu ’e te mau pāpa’ira’a mo’a ’o tā ’oe e nehenehe e tai’o māite nō te ha’apūai i tō ’oe ’ite ’e tō ’oe ’itera’a pāpū nō ni’a i te ’evanelia ’e nō te tauturu ia ’oe ’ia ha’api’i i te ta’ata.

Te misiōni hanahana a Iesu Mesia

’Ua tono mai te Metua i te ao ra i tāna tamaiti, ia Iesu Mesia, i te fenua nei, ’ia ti’a ia tātou pā’āto’a ’ia ’ite i te ’oa’oa i roto i teie ao ’e te ora mure ’ore i roto i te ao a muri a’e. « ’E ’o teie ho’i te ’evanelia, te parau ’āpī ’oa’oa […] ē ’ua haere mai [Iesu Mesia] i roto i te ao nei […] ’ia amo i te mau hara a tō te ao nei, ’e ’ia ha’amo’a i te ao nei, ’e ’ia tāmā i te reira i te parauti’a ’ore ato’a ra ; ’ia ora te tā’āto’a nā roto iāna » (Te Ha’api’ira’a Tumu ’e te mau Fafaura’a 76:40–42).

Tātou te feiā tāhuti nei, e hara ’e e pohe tātou pā’āto’a. E ’ōpani te hara ’e te pohe ia tātou ’ia fa’ari’i i te ora mure ’ore i pīha’i iho i te Atua mai te mea ē ’aita tō tātou e Tāra’ehara (hi’o 2 Nephi 9). Hou ’a hāmanihia ai te ao nei, ’ua mā’iti te Metua i te ao ra ia Iesu Mesia ’ei tāra’ehara nō tātou. Mai te hō’ē fa’a’itera’a hope roa nō te aroha, ’ua haere mai Iesu i te fenua nei ’e ’ua rave fa’aoti i teie misiōni hanahana. Maoti ’oia i ti’a ai ia tātou ’ia fa’aorahia i tā tātou mau hara ’e ’ua ha’apāpū ’oia ē e ti’afa’ahou tātou pā’āto’a i muri a’e i tō tātou pohe.

’Ua ora Iesu i te hō’ē orara’a hara ’ore. I te hope’a o tāna tau tāvinira’a i te tāhuti nei, ’ua rave ’oia tā tātou mau hara i ni’a iho iāna nā roto i tōna mamae rahi i te ’ō nō Getesemane ’e i tōna fa’asātaurora’ahia (hi’o 1 Nephi 11:33). Nō te rahi o te māuiui o Iesu, « i rurutaina ai ’oia nō te māuiui, ’e ’ua tahe mai ra te toto nā te mau poa ato’a » (Te Ha’api’ira’a Tumu ’e te mau Fafaura’a 19:18). I muri a’e i tōna fa’asātaurora’ahia, ’ua ti’afa’ahou mai Iesu, ma te upo’oti’a i ni’a i te pohe. ’Ia ’āmuihia teie mau ’ohipa, ’o te tāra’ehara ïa a Iesu Mesia.

E fa’ariro tā tātou mau hara ia tātou ’ei mea vi’ivi’i i te pae vārua, ’e « ’aita ho’i e mea vi’ivi’i e ti’a ’ia pārahi i pīha’i iho i te Atua » (1 Nephi 10:21). Hau atu ā, e tītau te ture nō te parauti’a i te utu’a nō tā tātou mau hara.

Tē hōro’a nei te tūsia tāra’ehara a Iesu i te rāve’a ’ia tāmāhia tātou i te hara ’e ’ia ha’amo’ahia, ’ia tātarahapa ana’e tātou. E hōro’a ato’a mai te reira i te rāve’a nō te ha’amāha i te mau tītaura’a a te parauti’a (hi’o Alama 42: 15, 23–24). ’Ua parau te Fa’aora : « ’Ua […] mamae au i teie nei mau mea nō te ta’ata ato’a, ’ia ’ore rātou ’ia ro’ohia i te mamae mai te mea ē e tātarahapa rātou ; Terā rā, mai te mea ’aita rātou e tātarahapa, ’ia ro’ohia rātou i te mamae rahi e ti’a ai, mai iā’u ato’a » (Te Ha’api’ira’a Tumu ’e te mau Fafaura’a 19:16–17). ’Āhiri ’aita ’o Iesu Mesia, e fa’a’ore ïa te hara i te ti’aturira’a ato’a i te hō’ē orara’a a muri a’e i pīha’i iho i te Metua i te ao ra.

Nā roto i te pūpūra’a iāna iho ’ei tūsia nō tātou, ’aita ’o Iesu i fa’a’ore i tā tātou iho hōpoi’a. E tītauhia ia tātou ’ia fa’aro’o iāna, ’ia tātarahapa, ’e ’ia tauto’o nō te ha’apa’o i te mau fa’auera’a. Mai te mea e tātarahapa tātou, e ti’aoro Iesu i tōna ti’ara’a mana nō te tahiti’a ia tātou, i mua i tōna Metua (hi’o Moroni 7:27–28). Maoti te āraira’a a te Fa’aora, e fa’a’ore mai te Metua i te ao ra i tā tātou mau hara, ma te ha’amāmā i te hōpoi’a ’e te mana’o fa’ahapa o tā tātou mau hara (hi’o Mosia 15:7–9). E tāmāhia tātou i te pae vārua ’e e fa’ari’i-poupou-hia tātou i mua i te aro o te Atua i te hope’a.

Te misiōni hanahana a Iesu ’o te fa’aorara’a ato’a ïa ia tātou i te pohe. Nō te mea ’ua ti’afa’ahou ’oia, e ti’afa’ahou ïa tātou pā’āto’a i muri mai i te pohe. Te aura’a ra, e tāhō’ē-fa’ahou-hia te vārua ’e te tino o te ta’ata tāta’itahi, ’e e ora tātou pā’āto’a i roto i te hō’ē tino maita’i roa ’e te ti’afa’ahou ē a muri noa atu. ’Āhiri ’aita ’o Iesu Mesia, ’ua tinai ïa te pohe i te ti’aturira’a i te hō’ē orara’a a muri a’e i pīha’i iho i te Metua i te ao ra.

Heheura’a pāpa’ira’a mo’a

’Ua tono mai te Atua i tāna Tamaiti

Te fa’aorara’a nā roto ia Iesu Mesia

Ha’api’i rahi atu ā nō ni’a i teie parau tumu

« Te Mesia ora »
Arata’i nō te mau pāpa’ira’a mo’a : « Iesu Mesia »
Gospel Topics : « Jesus Christ »

Te fa’aro’o ia Iesu Mesia

Te parau tumu mātāmua o te ’evanelia ’o te fa’aro’o ïa i te Fatu ia Iesu Mesia. ’O te fa’aro’o te niu nō te tahi atu mau parau tumu o te ’evanelia.

Te fa’aro’o ia Iesu Mesia, ’o te ti’aturira’a ïa ē, ’o ’oia te Tamaiti Fānau Tahi a te Atua. ’Oia ho’i ’o te ti’aturira’a iāna ’ei Fa’aora ’e ’ei Tāra’ehara nō tātou—ē ’o ’oia ana’e tō tātou ’ē’a nō te ho’i i mua i te aro o te Atua (hi’o Te ’Ohipa 4:10–12 ; Mosia 3:17 ; 4:6–8). ’Ua anihia tātou ’ia fa’a’ohipa « i te fa’aro’o ’āueue ’ore iāna ra, i te ti’aturi-māite-ra’a i te mau maita’i rahi nōna, ’o tei pūai ’ia fa’aora » (2 Nephi 31:19).

Te fa’aro’o ia Iesu Mesia ’o te ti’aturira’a ato’a ïa ē ’ua mamae ’oia nō tā tātou mau hara i roto i tāna tūsia tāra’ehara. Maoti tāna tūsia, e nehenehe tātou e tāmāhia ’e e fa’aorahia mai te mea e tātarahapa tātou. Nā teie tāmāra’a e tauturu ia tātou ’ia ’ite i te hau ’e te tīa’ira’a i roto i teie orara’a. E tauturu ato’a te reira ia tātou ’ia fāna’o i te ’īra’a o te ’oa’oa i muri a’e i tō tātou pohera’a.

E tītau te fa’aro’o ia Iesu Mesia i te ti’aturira’a ē nā roto iāna, e ti’afa’ahou tātou pā’āto’a i muri a’e i tō tātou pohera’a. E nehenehe teie fa’aro’o e turu ’e e tāmāhanahana ia tātou i te mau taime ’ati pohe. E nehenehe te pōiri o te pohe e tīahihia e te fafaura’a o te Ti’afa’ahoura’a.

Te fa’aro’o ia Iesu Mesia, ’o te ti’aturira’a ïa ’e te ’ite-pāpū-ra’a ē ’ua rave ’oia i ni’a iho iāna i tō tātou mau ’ati ’e tō tātou mau ma’i (hi’o Isaia 53:3–5). ’Ua ’ite ’oia nā roto i te mau mea tāna i ora mai nāhea i te turu ia tātou ma te aroha i roto i te mau fifi o te orara’a (hi’o Alama 7:11–12 ; Te Ha’api’ira’a Tumu ’e te mau Fafaura’a 122:8). ’Ia fa’a’ohipa tātou i tō tātou fa’aro’o, e tauturu ’oia ia tātou ’ia haere i mua i roto i te mau taime fifi.

Nā roto i tō tātou fa’aro’o iāna, e nehenehe Iesu e fa’aora ia tātou i te pae tino ’e i te pae vārua. ’Ua ineine noa ’oia i te tauturu ia tātou ’a ha’amana’o ai tātou i tāna anira’a ’ia « hi’o mai iā’u nei i tō mau mana’o ato’a na ; ’eiaha e fē’a’a, ’eiaha e mata’u ». (Te Ha’api’ira’a Tumu ’e te mau Fafaura’a 6:36).

E parau tumu nō te ’ohipa ’e te mana

E arata’i te fa’aro’o ia Iesu Mesia i te ’ohipa. E fa’a’ite tātou i tō tātou fa’aro’o nā roto i te ha’apa’ora’a i te mau fa’auera’a ’e te ravera’a i te maita’i i te mau mahana ato’a. E tātarahapa tātou i tā tātou mau hara. E ha’apa’o maita’i noa tātou iāna. E tūtava tātou ’ia riro atu ā mai iāna te huru.

’Ia fa’a’ohipa tātou i te fa’aro’o, e nehenehe tātou e ’ite i te mana o Iesu i roto i tō tātou orara’a i te mau mahana ato’a. E fa’arahi ’oia i tā tātou iho mau tauto’ora’a maita’i roa a’e. E tauturu ’oia ia tātou ’ia tupu i te rahi ’e ’ia pāto’i i te fa’ahemara’a.

Ha’apūai i tō tātou fa’aro’o

’Ua ha’api’i te peropheta Alama ē e nehenehe te patura’a i te fa’aro’o e ha’amata nā roto i te « hina’aro noa ’ia ti’aturi » (Alama 32:27). I muri iho, ’ia tupu tō tātou fa’aro’o ia Iesu Mesia i te rahi, e tītauhia ’ia aupuru i te reira nā roto i te ’apora’a i tāna mau parau, te fa’a’ohipara’a i tāna mau ha’api’ira’a ’e te ha’apa’ora’a i tāna mau fa’auera’a. ’Ua ha’api’i ’o Alama ē mai te mea e aupuru tātou ma te fa’a’oroma’i ’e te itoito i te parau a te Atua i roto i tō tātou ’ā’au, « e a’ahia ïa te reira [’e e riro mai] mai te tumu rā’au ’o tē tupu noa i ni’a ē tae atu ai i te ora mure ’ore »—’e nā te reira e ha’apūai i tō tātou fa’aro’o (Alama 32:41 ; hi’o te mau ’īrava 26–43).

Heheura’a pāpa’ira’a mo’a

Fa’aro’o, mana ’e fa’aorara’a

Te ha’api’ira’a tumu nō te fa’aro’o

Te mau hi’ora’a nō te fa’aro’o

Te mau ’ohipa ’e te ha’apa’o

Te fa’aro’o ’ia tātarahapa

Alama 34

Ha’api’i rahi atu ā nō ni’a i teie parau tumu

Arata’i nō te mau pāpa’ira’a mo’a : « Iesu Mesia », « Tāra’ehara », « Fa’aro’o »
Bible Dictionary : « Faith »
Gospel Topics : « Jesus Christ », « Atonement of Jesus Christ », « Faith in Jesus Christ »

Te tātarahapara’a

E aha te tātarahapara’a ?

’O te tātarahapa te piti o te parau tumu o te ’evanelia. E arata’i tō tātou fa’aro’o ia Iesu Mesia ’e tō tātou here iāna i te tātarahapara’a (hi’o Helamana 14:13). ’O te tātarahapara’a te rāve’a nō te fāriu atu i te Atua ra ’e nō te fāriu ’ē i te hara. ’Ia tātarahapa ana’e tātou, e taui tā tātou mau ’ohipa, tō tātou mau hina’aro ’e tō tātou mau mana’o ’ia au i te hina’aro o te Atua. E noa’a te fa’aorera’a hara maoti ’o Iesu Mesia ’e tāna tūsia tāra’ehara.

’Ua hau atu te tātarahapara’a i te fa’a’ohipa-noa-ra’a i te hina’aro ’ia taui i te hō’ē peu ’e ’aore rā ’ia upo’oti’a i ni’a i te hō’ē paruparu. Te tātarahapara’a ’o te fāriu-mau-ra’a ïa i te Mesia ra, ’o tē hōro’a mai ia tātou i te mana nō te ’ite i te hō’ē « fa’ahuru-’ē-ra’a rahi » i roto i tō tātou ’ā’au (Alama 5:12–14). ’Ia ’ite tātou i teie tauira’a o te ’ā’au, ’ua fānau-vārua-fa’ahou-hia ïa tātou (hi’o Mosia 27:24–26).

Nā roto i te tātarahapara’a, e fa’atupu tātou i te hi’ora’a ’āpī nō te Atua, nō tātou iho ’e nō te ao nei. E putapū fa’ahou tātou i te aroha o te Atua nō tātou ’ei tamari’i nāna—’e te aroha o tō tātou Fa’aora nō tātou. Te rāve’a nō te tātarahapa ’o te hō’ē ïa o te mau ha’amaita’ira’a rahi roa tā te Atua i hōro’a mai ia tātou nā roto i tāna Tamaiti.

Te fa’anahora’a nō te tātarahapara’a

’Ia tātarahapa tātou, e fā’i tātou i tā tātou mau hara ’e e ’oto mau tātou. E fā’i tātou i tā tātou mau hara i te Atua ’e e ani tātou i tāna fa’a’orera’a hara. E fā’i ato’a tātou i tā tātou mau hara teimaha i te feiā fa’atere mana o te ’Ēkālesia, ’o tē tauturu mai ia tātou, ’ia tātarahapa ana’e tātou. E rave tātou i tei noa’a ia tātou nō te fa’aho’i i tei haruhia, ’oia ho’i e tāmata i te fa’a’āfaro i te mau fifi ’o tā tātou ’ohipa i fa’atupu. E ’ite-maita’i-hia a’e te tātarahapara’a mau nā roto i te mau ’ohipa parauti’a tei ravehia i te roara’a o te hō’ē taime.

E ’ohipa tāmau te tātarahapara’a, i te mau mahana ato’a o tō tātou orara’a. « ’Ua rave pā’āto’a ho’i i te hara, ’e ’ua ’ere i te ha’amaita’i a te Atua ra » (Roma 3:23). E ti’a ia tātou ’ia tātarahapa tāmau noa, ma te ha’amana’o ē « e ti’a ia [tātou] te mau mea ato’a nei i te Mesia, tei tauturu mai » (Philipi 4:13). ’Ua ha’apāpū mai te Fatu ia tātou ē « ’ia tātarahapa pinepine ana’e tō’u mau ta’ata, e fa’a’ore ïa vau i tā rātou ra mau hapa iā’u nei » (Mosia 26:30).

Te mau ha’amaita’ira’a nō te tātarahapara’a

Te tātarahapara’a o te hō’ē ïa parau tumu maita’i ’o tē ’āfa’i mai i te ’oa’oa ’e te hau. E arata’i te reira ia tātou « i raro a’e i te mana nō te tāra’ehara, ’e i te fa’aorara’a o tō [tātou] vairua » (Helamana 5:11).

’Ia tātarahapa ana’e tātou, e fa’aorahia te māuiui o tō tātou hirahira ’e te ’oto i te roara’a o te tau. E ’ite rahi atu ā tātou i te fa’aurura’a a te Vārua. E pūai atu ā tō tātou hina’aro ’ia pe’e i te Atua.

« E rave rahi ta’ata e hi’o nei i te tātarahapara’a ’ei utu’a—e ’ohipa e ’ape atu […] Nā Sātane rā e fa’atupu nei i teie mana’o nō te utu’a. Tē tāmata nei ’oia i te ’ōpani ia tātou ’ia hi’o atu ia Iesu Mesia, ’o tē ti’a nei ma te rima māhorahora, mai te ti’aturi ’e mai te hina’aro ’ia fa’aora, ’ia fa’a’ore i te hapa, ’ia tāmā, ’ia ha’apūai, ’ia fa’aateate ’e ’ia ha’amo’a » (Russell M. Nelson, « E nehenehe tātou e rave maita’i a’e ’e e ha’amaita’i ia tātou », Liahona, Mē 2019, 67).

Heheura’a pāpa’ira’a mo’a

Tātarahapara’a

Te fa’aorara’a ’e te fa’a’orera’a hapa

Helamana 5:10–11

Te tahiti’a nō te feiā e tātarahapa

Alama 12:32–34 ; 42:13, 21–24

Ha’api’i rahi atu ā nō ni’a i teie parau tumu

Arata’i nō te mau pāpa’ira’a mo’a : « Tātarahapa, Tātarahapara’a », « Tāra’ehara »
Bible Dictionary : « Repentance »
Buka arata’i rahi, 32.1
Gospel Topics : « Repentance », « Atonement of Jesus Christ »

Te bāpetizora’a : Tā tātou fafaura’a mātāmua ’e te Atua

E fa’aineine te fa’aro’o ia Iesu Mesia ’e te tātarahapara’a ia tātou nō te mau ’ōro’a nō te bāpetizora’a ’e nō te ha’amaura’a. Te bāpetizora’a ’o te ’ōro’a mātāmua nō te fa’aorara’a ïa o te ʼevanelia a Iesu Mesia. ’Ia fa’ari’i tātou i teie ’ōro’a nō te ’oa’oa ’e te tīa’ira’a, e rave tātou i tā tātou fafaura’a mātāmua ’e te Atua.

Te hō’ē ’ōro’a ’o te hō’ē ïa ’ohipa mo’a ’e ’aore rā te hō’ē fa’anahora’a e ravehia nā roto i te ha’amanara’a o te autahu’ara’a. E mea faufa’a te tahi mau ’ōro’a mai te bāpetizora’a, nō tō tātou fa’aorara’a.

Nā roto i te mau ’ōro’a, e rave tātou i te mau fafaura’a ’e te Atua. Teie mau fafaura’a e mau ’euhera’a mo’a ïa i rotopū ia tātou ’e te Atua. ’Ua fafau mai ’oia ē e ha’amaita’i ’oia ia tātou mai te peu e tāpe’a tātou i tā tātou ’euhera’a ’e ’o ’oia. ’Ia pūai tā tātou parau fafau e ha’apa’o i tā tātou mau fafaura’a i mua i te Atua e ti’a ai.

’Ua hōro’a mai te Atua i te mau ’ōro’a ’e te mau fafaura’a nō te tauturu ia tātou ’ia haere iāna ra ’e ’ia fa’ari’i i te ora mure ’ore. ’Ia fa’ari’i ana’e tātou i te mau ’ōro’a nō te autahu’ara’a ’e ’ia ha’apa’o tātou i te mau fafaura’a tei tū’ati i te reira, e nehenehe tātou e ’ite i te « mana nō te huru Atua » i roto i tō tātou orara’a (Te Ha’api’ira’a Tumu ’e te mau Fafaura’a 84:20).

Te fafaura’a nō te bāpetizora’a

’Ua ha’api’i mai te Fa’aora ē e tītauhia te bāpetizora’a nō te tomo i roto i te bāsileia o te Atua (hi’o Ioane 3:5). E tītau-ato’a-hia ia tātou ’ia riro mai ’ei melo nō te ’Ēkālesia a Iesu Mesia. ’Ua hōro’a mai te Fa’aora i te hi’ora’a nā roto i te bāpetizora’ahia ’oia (hi’o Mataio 3:13–17).

’Ia bāpetizohia tātou ’e ’ia ha’apa’o tātou i tā tātou fafaura’a, ’ua fafau mai te Atua ē e fa’a’ore ’oia i tā tātou mau hara (hi’o Te ’Ohipa 22:16 ; 3 Nephi 12:1–2). E tupu teie ha’amaita’ira’a rahi maoti te tūsia tāra’ehara a Iesu Mesia, tei « aroha mai ia tātou nei, ’e ’ua tāmā ia tātou i tā tātou hara i tōna ihora toto » (Apokalupo 1:5). ’Ua parau fafau ato’a mai te Atua ē e ha’amaita’i mai ’oia ia tātou i te hoara’a o te Vārua Maita’i ’ia ti’a ia tātou ’ia ha’amo’ahia, ’ia arata’ihia, ’e ’ia tāmāhanahanahia.

I roto i tā tātou tuha’a nō te fafaura’a o te bāpetizora’a, tē fa’a’ite pāpū nei ïa tātou ē ’ua hina’aro tātou i te rave i ni’a iho ia tātou i te i’oa o Iesu Mesia. E parau fafau ato’a tātou ē e haʼamanaʼo noa tātou iāna ’e e haʼapaʼo i tāna mau faʼaueraʼa. E parau fafau tātou e here ’e e tāvini ia vetahi ’ē, « ’ia ’oto ’a ’oto ai te feiā ’oto ra […] ’ia tāmāhanahana ia rātou i tei au ’ia tāmāhanahanahia ra, ’e ’ia ti’a ’ei ’ite nō te Atua i te mau taime ato’a ’e nō te mau mea ato’a, ’e i roto i te mau vāhi ato’a » (Mosia 18:9 ; hi’o te mau ’īrava 8–10, 13). E fa’a’ite tātou i te hina’aro pāpū ’ia tāvini ia Iesu Mesia ē tae noa atu i te hope’a o tō tātou orara’a (hi’o Te Ha’api’ira’a Tumu ’e te mau Fafaura’a 20:37 ; Mosia 2:17).

E hōpoi’a rahi tā tātou mau parau fafau ’e mau fafaura’a i ’āpitihia e te bāpetizora’a. E mea fa’auru ato’a ’e e mea ’oa’oa. E fa’atupu te reira i te hō’ē tā’amura’a ta’a ’ē i rotopū ia tātou ’e te Metua i te ao ra nā roto i te reira ’oia e fa’atae tāmau noa ai i tōna aroha.

Te bāpetizora’a utuhi

’Ua ha’api’i Iesu ē e tītauhia ia tātou ’ia bāpetizo-utuhi-hia nō te ha’amatarara’a i tā tātou mau hara (hi’o Te Ha’api’ira’a Tumu ’e te mau Fafaura’a 20:72–74). E tāpa’o te bāpetizora’a nō te pohera’a, te tanura’a ’e te ti’afa’ahoura’a o Iesu Mesia (hi’o Roma 6:3–6).

E tāpa’o pūai ato’a te bāpetizora’a utuhi nō tātou tāta’itahi. E fa’ahōho’a te reira i te pohera’a tō tātou orara’a tahito, te hunara’a o taua orara’a ra, ’e tō tātou pipihara’a ’ei fānau-fa’ahou-ra’a pae vārua. ’Ia bāpetizo-ana’e-hia tātou, e ha’amata tātou i te fānau-fa’ahou-ra’a ’ei tamāroa ’e ’ei tamāhine vārua nā te Mesia (hi’o Mosia 5:7–8 ; Roma 8:14–17).

Te mau tamari’i

E’ita te mau tamari’i e bāpetizohia ē tae roa atu i te va’ura’a o tō rātou matahiti (hi’o Te Ha’api’ira’a Tumu ’e te mau Fafaura’a 68:27). Te mau tamari’i e pohe hou i taua matahiti ra, e fa’aorahia ïa rātou nā roto i te Tāra’ehara a Iesu Mesia (hi’o Moroni 8:4–24 ; Te Ha’api’ira’a Tumu ’e te mau Fafaura’a 137:10). Hou ’a bāpetizohia ai te mau tamari’i, e mea ti’a ia rātou ’ia ha’api’ihia te ’evanelia, ’ia fa’aineinehia rātou nō teie ta’ahira’a faufa’a rahi i roto i tō rātou orara’a, nō te rave i te hō’ē fafaura’a ’e te Atua.

Te ’ōro’a mo’a

Tē hina’aro nei tō tātou Metua i te ao ra ’ia ha’apa’o maita’i tātou i te mau fafaura’a tā tātou e rave i mua iāna. Nō te tauturu ia tātou ’ia rave i te reira, ’ua fa’aue mai ’oia ia tātou ’ia ha’aputuputu pinepine nō te rave i te ’ōro’a mo’a. Te ’ōro’a mo’a o te hō’ē ïa ’ōro’a nō te autahu’ara’a tā Iesu i hōro’a i tāna mau ’āpōsetolo nā mua noa a’e i tāna Tāra’ehara.

Te ravera’a i te ’ōro’a ’o te tumu mau ïa o te purera’a ’ōro’a i te mau hepetoma ato’a. E ha’amaita’ihia te pāne ’e te pape ’e e hōro’ahia i te ’āmuira’a. E fa’ahōho’a te pāne i te tino o te Fa’aora tei ha’atūsiahia nō tātou. E fa’ahōho’a te pape i tōna toto, tāna i ha’amani’i nō tātou.

E rave tātou i teie mau tāpa’o ’ei ha’amana’ora’a i te tūsia o te Fa’aora ’e nō te fa’a’āpī i tā tātou mau fafaura’a ’e te Atua. E fa’ari’i ’āpī tātou i te parau fafau ē e vai noa te Vārua i roto ia tātou.

Hou te bāpetizora’a

Hou te feiā tā ’oe e ha’api’i e bāpetizohia ai, e mea ti’a ’ia fa’atupu rātou i te fa’aro’o i te Mesia, ’ia tātarahapa, ’e ’ia rave i te mau tauira’a i roto i tō rātou orara’a e nava’i nō te fa’ari’i i te bāpetizora’a, mai tei fa’a’itehia i roto i Te Ha’api’ira’a Tumu ’e te mau Fafaura’a 20:37. E mea ti’a ato’a ia rātou ’ia fafau ’ia ha’apa’o i te mau fa’auera’a ’e ’ia ora i te ’evanelia a Iesu Mesia. Mai te mea ’ua fa’ata’a ’outou i te hō’ē tai’o mahana bāpetizora’a terā rā e tītauhia te tahi fa’aineinera’a hau atu, ’a fa’ataime i te bāpetizora’a ē tae roa atu i te taime e ineine ai ’oia. Hi’o i te pene 12.

Hou a’e te bāpetizora’a, e mea ti’a i te ta’ata tāta’itahi ’ia :

fa’ari’i i te tā’āto’ara’a o te mau ha’api’ira’a misiōnare.
Fārerei i te peresideni pupu peresibutero, te peresideni Sōtaiete Tauturu, ’e te ’ēpisekōpo.
Haere i te mau purera’a ’ōro’a e rave rahi.

Heheura’a pāpa’ira’a mo’a

Te hi’ora’a o te Mesia

Te fafaura’a nō te bāpetizora’a

Te mau tītaura’a nō te bāpetizora’a

Te mau ha’amaita’ira’a i fafauhia nō te bāpetizora’a

Te tītaura’a nō te ha’amanara’a

Te ha’amaura’a Iesu i te ’ōro’a mo’a

Te mau pure nō te ’ōro’a mo’a

Te ravera’a i te ’ōro’a mo’a

Ha’api’i rahi atu ā nō ni’a i teie parau tumu

Arata’i nō te mau pāpa’ira’a mo’a : « Bāpetizo, Bāpetizora’a », « ’Ōro’a mo’a »
Gospel Topics : « Baptism », « Sacrament »

Te hōro’a nō te Vārua Maita’i

Te fa’ari’ira’a i te hōro’a nō te Vārua Maita’i

E piti tuha’a i roto i te bāpetizora’a. ’Ua ha’api’i Iesu ē e tītauhia ia tātou ’ia « fānau i te pape ’e i te Vārua » nō te tomo i roto i te bāsileia o te Atua (Ioane 3:5 ; reta tei fa’ahuru-’ē-hia). ’Ua ha’api’i ’o Iosepha Semita : « Te bāpetizora’a i te pape ’o te ’āfara’a ïa o te bāpetizora’a, ’e e mea faufa’a ’ore mai te mea ’aita te tahi ’āfa—’oia ho’i, te bāpetizora’a a te Vārua Maita’i » (Te mau Haʼapiʼiraʼa a te mau Peresideni o te ʼĒkālesia : Iosepha Semita [2007], 109).

Tītau-roa-hia i te bāpetizora’a pape ’ia pe’ehia e te bāpetizora’a Vārua ’ei fa’ahopera’a i te reira. ’Ia fa’ari’i ana’e tātou i nā bāpetizora’a e piti, e tāmāhia tātou i tā tātou mau hara ’e e fānau-fa’ahou-hia tātou i te pae vārua. ’Ei reira tātou e ha’amata ai i te hō’ē orara’a ’āpī pae vārua ’ei pipi nā te Mesia.

E fa’ari’i tātou i te bāpetizora’a Vārua nā roto i te hō’ē ’ōro’a tei pi’ihia te ha’amaura’a. E ravehia teie ’ōro’a e te hō’ē ta’ata, ’e ’aore rā hau atu, ’o tē mau nei i te autahu’ara’a, ma te tu’u i tō rātou rima i ni’a i te upo’o. ’A tahi, e fa’ariro rātou ia tātou ’ei melo nō te ’Ēkālesia, ’e i muri iho e hōro’a mai rātou i te hōro’a nō te Vārua Maita’i i ni’a ia tātou. Hō’ē ā huru ’ōro’a tei fa’a’itehia i roto i te Faufa’a ’Āpī ’e te Buka a Moromona (hi’o Te ’Ohipa 8:14–17 ; 3 Nephi 18:36–37).

Te Vārua Maita’i, ’o te toru ïa o te melo nō te Atuara’a. Tē ’ohipa ’autahi nei ’oia ’e te Metua i te ao ra ’e ’o Iesu Mesia. ’Ia fa’ari’i ana’e tātou i te hōro’a nō te Vārua Maita’i, e nehenehe tātou e fa’ari’i i tāna auhoara’a i roto i tō tātou orara’a mai te mea e ha’apa’o maita’i tātou.

Nāhea te Vārua Maita’i i te ha’amaita’i ia tātou

Te hōro’a nō te Vārua Maitai, ’o te hō’ē ïa hōro’a rahi roa a’e a te Metua i te ao ra. E tāmā ’e e ha’amo’a te Vārua Maita’i ia tātou, ’e nāna e ha’amo’a atu ā ia tātou, e fa’ahope atu ā, e fa’ariro atu ā mai te Atua te huru (hi’o 3 Nephi 27:20). E tauturu ’oia ia tātou ’ia taui ’e ’ia tupu i te rahi i te pae vārua ’a ’imi ai tātou i te pe’e i te mau parau a te Atua.

E tauturu te Vārua Maita’i ia tātou ’ia ha’api’i ’e ’ia ’ite e aha te parau mau (hi’o Moroni 10:5). E ha’apāpū ato’a ’oia i te parau mau i roto i tō tātou ’ā’au ’e tō tātou ferurira’a. Ta’a ’ē noa atu te reira, e tauturu te Vārua Maita’i ia tātou ’ia ha’api’i i te ta’ata i te parau mau (hi’o Te Ha’api’ira’a Tumu ’e te mau Fafaura’a 42:14). ’Ia ’apo tātou ’e ’ia ha’api’i tātou i te ta’ata i te parau mau nā roto i te mana o te Vārua Maita’i, nāna e hōpoi i te reira i tō tātou ’ā’au (hi’o 2 Nephi 33:1).

Mai te mea e ’imi tātou ma te ha’eha’a i te arata’ira’a a te Vārua Maita’i, e arata’i mai ’oia ia tātou (hi’o 2 Nephi 32:5). ’Oia ho’i, e muhumuhu ato’a mai ’oia e nāhea tātou e tāvini ai ia vetahi ’ē.

E hōro’a mai te Vārua Maita’i ia tātou i te pūai pae vārua nō te tauturu ia tātou ’ia upo’oti’a i ni’a i tō tātou paruparu. E tauturu ’oia ia tātou ’ia pāto’i i te fa’ahemara’a. E nehenehe ’oia e fa’aara mai ia tātou i te ’ati pae vārua ’e i te pae tino.

E tauturu te Vārua Maita’i ia tātou ’ia upo’oti’a i ni’a i te mau fifi o te orara’a. E tāmāhanahana ’oia ia tātou i te mau taime fifi ’e te ’oto, ma te fa’a’ī ia tātou i te tīa’ira’a. (hi’o Moroni 8:26). Nā roto i te Vārua Maita’i, e nehehehe tātou e putapū i te here o te Atua ia tātou.

Te arata’ira’a nō ’ō mai i te Vārua Maita’i ra

Pāpū ē ’ua putapū te feiā tā ’oe e ha’api’i i te mana o te Vārua Maita’i i te taime ’a fārerei ai ’outou ’e ’a ha’api’i ai rātou ’e ’a pure ai. ’A fa’ata’a atu ē, nō te tāmau i te fa’ari’i i teie mau mana’o maita’i, e mea ti’a ia rātou ’ia tai’o i te Buka a Moromona, ’ia pure, ’ia haere mai i te purera’a ’ōro’a, ’e ’ia ha’apa’o i te mau fa’auera’a.

’A fa’ata’a atu ē, nā te bāpetizora’a ’e te ha’amaura’a e fa’afāna’o i te ha’amaita’ira’a ’ia fa’ari’i i te arata’ira’a tāmau a te Vārua Maita’i.

Mai te mea e tītauhia, ’a ha’api’i i te ta’ata nāhea i te pure. Hi’o « Pure nō te ’ite i te parau mau nā roto i te Vārua Maita’i » i roto i te ha’api’ira’a 1 ’e « ’A pure pinepine » i roto i te ha’api’ira’a 4 nō te arata’ira’a nō ni’a i te tauturura’a i te vetahi ’ia ha’api’i i te pure.

Heheura’a pāpa’ira’a mo’a

Te nātura o te Vārua Maita’i

Te mau ha’amaita’ira’a ’e te mana o te Vārua Maita’i

Te faufa’a o te hōro’a nō te Vārua Maita’i

Ha’api’i rahi atu ā nō ni’a i teie parau tumu

Arata’i nō te mau pāpa’ira’a mo’a : « Vārua Maita’i », « Hōro’a o te Vārua Maita’i »
Bible Dictionary : « Holy Ghost »
Gospel Topics : « Holy Ghost », « Spiritual Gifts »

Fa’a’oroma’i ē tae noa atu i te hope’a

’Ia bāpetizohia ’e ’ia ha’amauhia tātou, e rave tātou i te hō’ē fafaura’a ’e te Atua. Teie ri’i, e fafau tātou ’ia ha’apa’o i tāna mau fa’auera’a ’e ’ia tāvini iāna nō te toe’a o tō tātou orara’a (hi’o Mosia 18:8–10, 13 ; Te Ha’api’ira’a Tumu ’e te mau Fafaura’a 20:37).

’Ia tomo ana’e tātou i ni’a i te ’ē’a o te ’evanelia nā roto i te bāpetizora’a ’e te ha’amaura’a, e ’imi tātou i te mau rāve’a ato’a nō te fa’aea i reira. ’Ia hahi ’ē ri’i ana’e tātou i te ’ē’a, e fa’a’ohipa tātou i te fa’aro’o i te Mesia nō te tātarahapa. Nā te ha’amaita’ira’a o te tātarahapa e fa’ati’a ia tātou ’ia ho’i fa’ahou i ni’a i te ’ē’a o te ’evanelia ’e ’ia tāpe’a i te mau ha’amaita’ira’a o tā tātou mau fafaura’a ’e te Atua. Mai te peu e tātarahapa tātou ma te ’ā’au tae mau, ’ua ineine noa te Atua i te fa’a’ore i tā tātou mau hara ’e i te fa’ari’i fa’ahou mai ia tātou.

Te aura’a e fa’a’oroma’i ē tae noa atu i te hope’a, ’o te tāpe’ara’a ïa i tō tātou ha’apa’o maita’i i te Atua ē tae noa atu i te hope’a o tō tātou orara’a— i te mau tau maita’i ’e i te mau taime fifi, i roto i te manuia ’e te ’ati. Ma te ha’eha’a, e fa’ati’a tātou i te Mesia ’ia tarai ia tātou ’e ’ia fa’ariro ia tātou mai iāna ra te huru. E fāriu tātou i ni’a i te Mesia ma te fa’aro’o, te ti’aturi ’e te tīa’ira’a noa atu te huru o te mau mea e tupu i roto i tō tātou orara’a.

Te fa’a’oroma’ira’a ē tae noa atu i te hope’a, e ’ere ïa te tāpe’a-noa-ra’a ē tae noa atu i tō tātou pohera’a. ’Aita, tōna aura’a, ’oia ho’i, e ha’atumu i tō tātou orara’a, tō tātou mau mana’o ’e tā tātou mau ’ohipa i ni’a ia Iesu Mesia. ’Oia ato’a ïa, e tāmau i te fa’a’ohipa i te fa’aro’o i te Mesia i te mau mahana tāta’itahi. E tāmau ato’a tātou i te tātarahapa, i te ha’apa’o i tā tātou mau fafaura’a i te Atua, ’e i te ’imi i te auhoara’a o te Vārua Maita’i.

Te fa’a’oroma’ira’a ē tae noa atu i te hope’a ’o te « haere-māite-ra’a [ïa] i mua i te ti’a-māite-ra’a i te Mesia, ma te ti’aturi pāpū roa, ’e te here i te Atua ’e te ta’ata ato’a. » ’Ua fafau mai tō tātou Metua i te ao ra ē mai te mea e fa’a’oroma’i tātou ē tae noa atu i te hope’a, « e fa’ari’i [tātou] i te ora mure ’ore » (2 Nephi 31:20).

Heheura’a pāpa’ira’a mo’a

Fa’a’oroma’i ē tae noa atu i te hope’a

Te mau ha’amaita’ira’a nō te feiā e fa’a’oroma’i

Ha’api’i rahi atu ā nō ni’a i teie parau tumu

Gospel Topics : « Adversity »
Arata’i nō te mau pāpa’ira’a mo’a : « Fa’a’oroma’i », « ’Ati »

E ha’amaita’i te ’evanelia a Iesu Mesia i te mau tamari’i ato’a a te Atua

Te ’evanelia a Iesu Mesia, nō te mau tamari’i ato’a ïa a te Atua. Tē ha’api’i mai nei te mau pāpa’ira’a mo’a ē « ’ua riro te mau ta’ata ato’a mai te Atua ra te huru » noa atu tō tātou orara’a tahito ’e tō tātou vaira’a. Tē ani nei ’oia « ia rātou ato’a ’ia haere mai iāna ra ’e ’ia fa’ari’i i tōna maita’i ; ’e ’aita roa ’oia e pāto’i i te hō’ē ’ia haere mai iāna ra » (2 Nephi 26:33).

E ha’amaita’i te ’evanelia ia tātou i roto i tō tātou orara’a tāhuti nei ’e i roto i te tau mure ’ore. E rahi atu tō tātou ’oa’oa—’ei ta’ata hō’ē ’e ’ei ’utuāfare—’ia ora ana’e tātou mai te au i te mau ha’api’ira’a a Iesu Mesia (hi’o Mosia 2:41 ; « Te ’Utuāfare : E Poro’i i tō te ao nei », ChurchofJesusChrist.org). Nā te orara’a i te ’evanelia e fa’ahōhonu i tō tātou ’oa’oa, e fa’auru i tā tātou mau ’ohipa, ’e e ha’afaufa’a i tō tātou mau tā’amura’a.

E nehenehe ato’a te orara’a i te ’evanelia a Iesu Mesia e pāruru ia tātou i te mau mā’itira’a ’o tē ha’apēpē ia tātou i te pae tino ’e i te pae vārua. E tauturu te reira ia tātou ’ia ’ite i te pūai ’e te tāmāhanahanara’a i roto i te mau taime fifi ’e te ’oto. E fa’atoro te reira i te ’ē’a nō te hō’ē orara’a mure ’ore ’e te ’oa’oa.

Te hō’ē o te mau parau poro’i rahi o te ’evanelia i fa’aho’ihia mai maori rā, e tuha’a tātou pā’āto’a nō te ’utuāfare o te Atua. E mau tamāroa ’e e mau tamāhine herehia tātou nāna. Noa atu te huru o tō tātou vaira’a ’utuāfare i ni’a i te fenua nei, e melo tātou tāta’itahi nō te ’utuāfare o te Atua.

Te tahi ato’a tuha’a rahi o tā tātou poro’i maori rā e nehenehe te mau ’utuāfare e tāhō’ēhia nō te tau mure ’ore. ’Ua ha’amauhia te ’utuāfare e te Atua. Tē fa’ati’a nei te fa’anahora’a nō te ’oa’oa a te Metua i te ao ra i te mau aura’a utuāfare ’ia tāmau noa i muri a’e i te pohe. Maoti te mau ’ōro’a ’e te mau fafaura’a mo’a o te hiero e ti’a ai i te mau ’utuāfare ’ia vai hō’ē ē a muri noa atu.

Nā roto i te māramarama o te ’evanelia, e nehenehe te mau ’utuāfare e fa’a’āfaro i te mau ta’a-’ore-ra’a, te mau mārōra’a ’e te mau fifi. E nehenehe te mau ’utuāfare tei ’āmahamaha nā roto i te mārōra’a e fa’aorahia nā roto i te tātarahapara’a, te fa’a’orera’a hara, ’e te fa’aro’o i te mana o te tāra’ehara a Iesu Mesia.

E tauturu te ’evanelia a Iesu Mesia ia tātou ’ia fa’atupu i te mau aura’a ’utuāfare pūai roa atu. ’O te ’utuāfare te vāhi maita’i roa a’e nō te ha’api’i atu ’e nō te ’apo mai i te mau parau tumu o te ’evanelia. ’O te ’utuāfare tei ha’amauhia i ni’a i te mau parau tumu nō te ’evanelia te vāhi nō te ha’apūra’a ’e te pāruru. E vāhi ïa i reira te Vārua o te Fatu e nehenehe e pārahi.

E vai ara ’ia ha’api’i ana’e nō ni’a i te mau ’utuāfare

’Ia ha’api’i ana’e ’oe nō ni’a i te mau ’utuāfare, ’a ha’apa’o maita’i mai te mea ’aita te mau ta’ata i fa’aipoipohia, e’ita e nehenehe e fānau i te tamari’i, ’e ’aore rā tē fifi ra rātou i roto i tō rātou mau aura’a ’utuāfare. ’A tūra’i i te parau ē ’ua here te Atua ia rātou i roto i tōna ’utuāfare. ’A tauturu ia rātou ’ia ’ite ē e nāhea te ’evanelia i te ha’amaita’i ia rātou tāta’itahi, noa atu te vaira’a o tō rātou ’utuāfare. ’Ia ha’apa’o maita’i noa rātou, e hōro’a mai te Atua ia rātou i te hō’ē rāve’a nō te fa’ari’i i te mau ha’amaita’ira’a nō te ’utuāfare here, i roto ānei i teie orara’a ’e ’aore rā, i roto i te orara’a nō a muri a’e.

Heheura’a pāpa’ira’a mo’a

Ha’api’i rahi atu ā nō ni’a i teie parau tumu

Arata’i nō te mau pāpa’ira’a mo’a : « ’Evanelia »
« Te ’Utuāfare : E Poro’i i tō te Ao nei »
Buka Arata’i rahi, mau pene 2 ’e 16
Gospel Topics : « Gospel », « Family »

Mana’o nō te ha’api’ira’a poto ’e te mea tano noa te roa

Te arata’i ha’api’ira’a i muri nei ’o te hō’ē ïa hi’ora’a nō te mea e nehenehe e ha’api’i i te ta’ata mai te mea e taime poto noa tō ’outou. ’Ia fa’a’ohipa ana’e ’oe i teie arata’ira’a, ’a mā’iti i te hō’ē parau tumu, ’e ’aore rā hau atu, nō te ha’api’i. ’Ua hōhorahia te ha’api’ira’a tumu niu nō te parau tumu tāta’itahi i te ’ōmuara’a o te ha’api’ira’a.

’A ha’api’i ai ’oe, ’a ui i te mau uira’a ’e ’a fa’aro’o. ’A tu’u i te mau tītaura’a manihini ’o tē tauturu ia rātou ’ia ha’afātata atu ā i te Atua. Te tahi tītaura’a manihini faufa’a roa, ’o te anira’a ïa i te ta’ata ’ia fārerei fa’ahou ’outou. Te roara’a o te ha’api’ira’a tei te huru ïa o te mau uira’a tā ’oe e ui ’e tō ’oe fa’aro’ora’a i tei parauhia mai.

Te mea e nehenehe e ha’api’i i te ta’ata i roto e 3–10 minuti

’Ua tono mai te Atua i tāna Tamaiti Here, ’o Iesu Mesia, i te fenua nei nō te fa’aora ia tātou i te hara ’e i te pohe.
Te fa’aro’o ia Iesu Mesia, e parau tumu ïa nō te ’ohipa ’e te mana. E tauturu te fa’aro’o ia tātou ’ia ’ite i te mana ha’apūai o te Fa’aora i roto i tō tātou orara’a.
E arata’i te fa’aro’o ia Iesu Mesia ia tātou i te tātarahapara’a. ’O te tātarahapara’a te rāve’a nō te fāriu atu i te Atua ra ’e nō te fāriu ’ē i te hara. ’Ia tātarahapa ana’e tātou, e taui tā tātou mau ’ohipa, tō tātou mau hina’aro ’e tō tātou mau mana’o ’ia au i te hina’aro o te Atua.
’Ia tātarahapa ana’e tātou, e fa’a’ore mai te Atua i tā tātou hara. E nehenehe te fa’aorera’a hara e tupu nō te mea ’ua ’aufau ’o Iesu Mesia nō tā tātou mau hara.
E piti tuha’a tō te bāpetizora’a : te bāpetizora’a pape ’e te bāpetizora’a a te Vārua. ’Ia bāpetizohia tātou ’e ’ia ha’amauhia, e tāmāhia tātou i tā tātou mau hara, ma te hōro’a ia tātou i te hō’ē ha’amatara’a ’āpī i roto i te orara’a.
I muri aʼe i tō tātou bāpetizoraʼahia i te pape, e fa’ari’i tātou i te hōroʼa nō te Vārua Maitaʼi nā roto i te ʼōroʼa nō te haʼamauraʼa.
’Ia pe’e tātou ma te ha’apa’o maita’i i te ’ē’a o te ’evanelia ē tae atu i te hōpe’a o tō tātou orara’a, ’ua fafau te Atua ē e fa’ari’i tātou i te ora mure ’ore.