“Japta 4: Lukaotem mo Dipen long Spirit,” Prijim Gospel blong Mi: Wan Gaed blong Stap Serem Gospel blong Jisas Kraes (2023)
“Japta 4: Lukaotem mo Dipen long Spirit,” Prijim Gospel blong Mi
Japta 4
Lukaotem mo Dipen long Spirit
Tingting long Hemia
-
?Wanem nao mi save mekem blong gat paoa blong Tabu Spirit long laef blong mi mo misinari seves blong mi?
-
?Wanem nao wok blong Tabu Spirit long saed blong fasin blong jenisim laef?
-
?Olsem wanem mi save helpem ol pipol mifala i tijim blong filim paoa blong Tabu Spirit?
-
?Olsem wanem bae mi save mekem ol prea blong mi gat moa mining?
-
?Olsem wanem nao mi save lanem blong luksave kwaet voes blong Tabu Spirit?
Lukaotem Daereksen blong Tabu Spirit
Presen ia blong Tabu Spirit i wan long ol nambawan presen we God i bin givim long ol pikinini blong Hem. Hemia i impoten tumas long wok blong yu olsem wan misinari. Yu nidim daereksen, paoa blong revelesen blong Tabu Spirit taem yu helpem ol pipol blong kasem baptaes, kasem konfemesen mo konvet.
Blong stap gat daereksen blong Tabu Spirit long laef blong yu i nidim wok long saed blong spirit. Wok ia i nidim prea we i kam long tru hat mo tru long evri dei skripja stadi. Hem i blong kipim tu ol kavenan blong yu mo ol komanmen blong God (luk long Mosaea 18:8–10, 13). Hemia i tekem tu fasin blong stap klin inaf blong tekem sakramen evri wik (luk long Doktrin mo Ol Kavenan 20:77, 79).
Yu fesem ol defdefren nid mo ol situesen evri dei. Ol kwaet voes blong Spirit bae i helpem yu blong save wanem blong mekem mo wanem blong talem. Taem yu lukaotem mo tekem aksen folem ol kwaet toktok ia, Tabu Spirit bae i dabolem ol janis blong yu blong mekem wok mo seves blong yu bitim hamas we yu save mekem yuwan. Bae Hem i helpem yu long evri pat blong misinari seves blong yu mo laef blong yuwan. (Luk long 2 Nifae 32:2–5; Alma 17:3; Hileman 5:17–19; Doktrin mo Ol Kavenan 43:15–16; 84:85.)
“Long ol dei we oli stap kam, bambae i no posibol blong laef long saed blong spirit, sapos yumi no gat Tabu Spirit i lidim, daerektem mo kamfotem yumi wetem paoa blong Hem” (Russell M. Nelson, “Revelesen blong Jos, Revelesen blong Laef blong Yumi,” Liahona, Mei 2018, 96).
Laet blong Kraes
Laet blong Kraes, “ God i givim long evri man, blong hem i save gat save long samting we i gud aot long samting we i nogud” (Moronae 7:16; luk long ol ves 14–19; luk tu long Jon 1:9). Laet blong Kraes hem i blong save andastanem, save, mo kasem paoa we i kam tru long Jisas Kraes. Paoa ia hem i fas samting blong kasem presen ia blong Tabu Spirit. Bae i lidim olgeta we oli save akseptem blong lan mo laef folem gospel blong Jisas Kraes we i bin kambak.
Tabu Spirit
Spirit Olsem Sep blong Man
Tabu Spirit i nambatri memba blong Godhed. Hem i spirit we sep blong Hem i olsem hemia blong man mo i no gat bodi blong mit mo bun (luk long Doktrin mo Ol Kavenan 130:22). Hem i Kamfota, we Sevya i promesem se bae i tijim ol man blong folem Hem long evri samting mo mekem oli tingbaot wanem we Jisas i bin tijim long olgeta (luk long Jon 14:26).
Paoa blong Tabu Spirit
Witnes we i kam long olgeta we oli lukaotem trutok wetem tru hat bifo oli baptaes, i kam tru long paoa blong Tabu Spirit. Evri pipol oli save kasem wan testemoni abaot Jisas Kraes mo gospel blong Hem we i bin kambak tru long paoa blong Tabu Spirit. “Tru long paoa blong Tabu Spirit, [yumi] save gat save long saed blong trutok blong evri samting” (Moronae 10:5).
Presen Ia we i Tabu Spirit
Presen ia blong Tabu Spirit hem i raet ia blong gat oltaem kampani blong Tabu Spirit taem yumi stap klin inaf. Yumi kasem presen ia we i Tabu Spirit afta we yumi kasem baptaes long wota. Oli givim tru long odinens blong konfemesen.
Profet Josef Smit i talem: “I gat wan samting we i defren bitwin Tabu Spirit mo presen ia blong Tabu Spirit. Konelias i kasem Tabu Spirit bifo hem i kasem baptaes, we hem kam tru long paoa blong God blong winim tingting blong hem abaot trutok blong gospel, be hem i no save kasem presen ia we i Tabu Spirit kasem taem we afta bae hem i kasem baptaes” (Teachings of Presidents of the Church: Josef Smit [2007], 97).
Hem i tru long presen ia mo paoa blong Tabu Spirit we i mekem yumi kam tabu—kam moa tabu, moa komplit, moa fulwan, moa olsem God. Hem i tru long fasin blong pemaot man blong Kraes mo tabu paoa blong Tabu Spirit we bae yumi save bon long saed blong spirit bakegen taem yumi kipim ol kavenan we yumi mekem wetem God (luk long Mosaea 27:25–26).
Tabu Spirit blong Promes
Tabu Spirit i semmak tu olsem Tabu Spirit blong Promes (luk long Doktrin mo Ol Kavenan 88:3). Long paoa ia, Tabu Spirit i konfemem se God i akseptem ol prishud odinesen we yumi kasem mo ol kavenan we yumi mekem. Olgeta we oli sil tru long Tabu Spirit blong Promes bae oli kasem evri samting we Papa i gat (luk long Doktrin mo Ol Kavenan 76:51–60; Efesas 1:13–14; Gaed long Ol Skripja, “Tabu Spirit blong Promes”).
Evri odinens mo ol kavenan, oli mas silim tru long Tabu Spirit blong Promes blong mekem se i stap laef kasem afta long laef ia (luk long Doktrin mo Ol Kavenan 132:7, 18–19, 26). Siling ia i dipen long hamas yumi stap gohed blong stap fetful.
Ol Presen blong Spirit
Lod i givim long yumi ol presen blong Spirit blong blesem yumi mo blong yusum blong blesem ol narawan (luk long Doktrin mo Ol Kavenan 46:8–9, 26). Eksampol, ol misinari we oli lanem wan niu lanwis oli save kasem ol presen blong toktok ol lanwis blong givim tabu help long olgeta blong tijim ol narafala man long lanwis blong olgeta.
Oli tokbaot sam long ol presen blong Spirit insaed long Moronae 10:8–18, Doktrin mo Ol Kavenan 46:11–33, mo 1 Korin 12:1–12. Hemia i sam nomo long ol plante presen blong Spirit. Lod i save blesem yumi wetem ol narafala presen dipen long hamas yumi stap fetful, folem nid blong yumi mo ol nid blong ol narafala man.
Sevya i invaetem yumi blong lukaotem gud ol presen blong Spirit (luk long Doktrin mo Ol Kavenan 46:8; 1 Korin 14:1, 12). Ol presen ia oli kam tru long prea, fet mo hadwok—mo folem tingting blong God.
Stadi blong Yuwan mo Kompanion Stadi
Long Baebol Diksonari, ridim “Holy Ghost,” “Light of Christ,” mo “Spirit, the Holy.” Raetemdaon wan sot toktok abaot wanem hem i fasin mo wok blong Tabu Spirit.
Ridim Ol Wok 4:1–33.
-
?Olsem wanem nao Pita mo Jon tufala i lukaotem ol presen long saed blong spirit?
-
?Olsem wanem nao God i ansarem ol prea blong tufala?
-
?Wanem nao yu save lanem aot long eksperiens ia abaot wok blong yuwan?
Paoa blong Spirit long Fasin blong Jenisim Laef
Fasin blong jenisim laef i hapen tru long paoa blong Tabu Spirit. Wok blong yu i blong help blong tekem paoa blong Spirit i kam insaed long laef blong wan. Samfala wei blong yu save mekem hemia i stap andanit ia.
-
Lukaotem blong gat Spirit i stap wetem yu tru long prea, ridim ol skripja, mo kipim ol kavenan blong yu.
-
Tij wetem Spirit abaot Sevya mo mesej blong Restoresen. Folem daereksen blong Spirit taem yu stap mekem jenis long mesej blong yu folem ol nid blong wanwan man o woman.
-
Testifae se yu save se tru long paoa blong Tabu Spirit se wanem we yu stap tijim i tru. Taem yu testifae, Tabu Spirit i save talem witnes long ol narawan.
-
Invaetem ol pipol blong tekem aksen, mo sapotem olgeta blong oli stap kipim ol komitmen blong olgeta. Taem ol pipol oli kipim ol komitmen, bae oli filim paoa blong Tabu Spirit moa strong. Luk long japta 11.
-
Folemap taem yu stap askem ol pipol abaot ol eksperiens blong olgeta long taem oli mekem wan invitesen. Fet blong olgeta bae i gro taem oli sakem sin, obei ol komanmen mo kipim ol komitmen blong olgeta. Helpem olgeta blong luksave Spirit i stap wok wetem olgeta.
Presiden M. Russell Ballard i tijim: “Tru fasin blong jenisim laef i hapen tru long paoa blong Spirit. Taem we Spirit i tajem hat, ol hat oli jenis. Taem we wanwan man o woman i … filim Spirit i stap wok wetem olgeta, o taem oli luk pruf blong lav mo bigfala sore blong Lod long laef blong olgeta, oli kam antap mo kam mo strong long saed blong spirit mo fet blong olgeta i kam moa strong long Hem. Ol eksperiens ia blong Spirit i kam nomo folem hamas wan man i wantem blong kasem eksperiens long ol toktok [luk long Alma 32:27]. Hemia i olsem wanem yumi kam blong filim se gospel i tru” (“Now Is the Time,” Ensign, Nov. 2000, 75).
Stadi blong Yuwan o Kompanion Stadi
-
Stadi long wan o moa long ol sentens ia. Taem yu ridim, lukaotem blong andastanem wanem nao wan man o woman i stap filim long rod blong fasin blong jenisim laef blong hem. Raetemdaon ol filing mo tingting blong yu insaed long stadi jenol blong yu. Toktok raon long ol niufala lukluk ia wetem ol narafala misinari mo ol memba.
2 Nifae 4:16–35; Inos 1; Mosaea 4–5; 18:7–14; 27–28; Alma 5; 17–22; 32; 36; 38
-
Stadi long wan o moa long ol sentens ia. Taem yu ridim, tingting long olsem wanem yu save i tij moa gud wetem paoa blong jenisim man blong Spirit. Rekodem ol filing mo ol tingting blong yu long stadi jenol blong yu. Toktok raon long ol aedia blong yu wetem ol narafala misinari mo ol memba.
1 Nifae 8:11–12; Mosaea 28:1–4; Alma 26; 29; 31:26–38; 32; Moronae 7:43–48; Doktrin mo Ol Kavenan 4; 18:10–16; 50:21–22.
Stadi long Ol Skripja
?Wanem nao ol skripja ia oli tijim abaot paoa blong Spirit long wok blong yu?
?Wanem nao yu save mekem blong gat paoa blong Spirit long wok blong yu?
Prea wetem Fet long Jisas Kraes
Blong helpem ol narawan oli kam konvet, yu nid blong tij tru long paoa blong Spirit (luk long Doktrin mo Ol Kavenan 50:13–14, 17–22). Lod i talem, “Mo bae mi givim Spirit long yufala tru long prea blong fet; mo sapos yufala i no kasem Spirit, bae yufala i no save tij” (Doktrin mo Ol Kavenan 42:14).
Taem yu prea from help long tijing blong yu, paoa blong Tabu Spirit bae i karem ol tijing blong yu “i go long ol hat blong ol pikinini blong ol man” (2 Nifae 33:1). Taem yu tij wetem Spirit mo ol narawan oli kasem tru long Spirit, bae yufala i “andastanem wanwan long [yufala]” mo “kam antap mo stap glad tugeta” (Doktrin mo Ol Kavenan 50:22).
Olsem Wanem blong Prea
Jisas i tijim yumi olsem blong prea (luk long Matiu 6:9–13; 3 Nifae 18:19). Prea wetem tru hat mo wetem strong tingting blong tekem aksen folem kwaet voes we yu kasem tru long Tabu Spirit. Prea we i moa gud i nidim fasin blong putum tingting i stap daon, mo wan strong efot (luk long Moronae 10:3–4; Doktrin mo Ol Kavenan 8:10).
Yusum lanwis we i karem wan rilesensip blong lav mo wosip wetem God. Long , yusum ol lanwis blong skripja olsem Yu, Yu, blong Yu, mo blong Yu bitim blong yusum hemia we oltaem man i stap yusum yu, blong yu, mo blong yu.
Oltaem talem tangkyu. Blong gat wan maen we i rere oltaem blong stap talem tangkyu, bae i helpem yu blong luksave hamas sore mo lav blong God i bin gat long laef blong yu. Bae hemia i openem hat mo maen blong yu blong kasem insperesen.
Prea “wetem evri paoa blong hat” blong jareti i kam fulap long yu (Moronae 7:48). Prea from ol narawan mo talem nem blong olgeta. Prea from olgeta we yu stap tijim. Lukaotem insperesen blong olsem wanem bae yu invaetem olgeta blong kam long Kraes.
Stadi blong Yuwan
Stadi long prea blong Lod long Matiu 6:9–13. Askem ol kwestin ia long yuwan, mo raetemdaon ol filing mo tingting blong yu long stadi jenol blong yu.
-
?Olsem wanem nao responsabiliti blong yu naoia olsem wan misinari i jenisim ol prea blong yu?
-
?Long wanem wei nao ol prea blong yu oli lukaotem blong blesem laef blong ol narafala man?
-
?Olsem wanem nao yu stap prea blong save winim ol temtesen?
-
?Olsem wanem nao yu prea from help blong stap mekem i hapen ol nid blong yu long saed blong spirit mo ol samting blong wol?
-
?Olsem wanem nao yu givim glori i go long God taem yu prea?
Wetaem blong Prea
?Long wanem taem nao yu mas prea? Lod i talem se, “Lukaot strong wetem strong tingting, prea oltaem, mo stap biliv, mo evri samting bambae oli wok tugeta blong gud blong yufala” (Doktrin mo Ol Kavenan 90:24).
Alma i talem, “Askem advaes long Lod long evri wok blong yu, mo bae hem i lidim yu blong gud; yes, taem we yu stap ledaon long naet, ledaon long Lod, blong hem i save luklukaotem gud yu long slip blong yu; mo taem we yu girap long moning, letem hat blong yu i fulap long ol tangkyu long God” (Alma 37:37; luk tu long 34:17–27).
Lod i invaetem yu blong gat ol kwaet ples, ol praevet taem blong prea: “Go insaed long rum blong yu, mo … prea long Papa blong yu” (3 Nifae 13:6; luk tu long ol ves 7–13).
Presiden Gordon B. Hinckley i tijim se: “Evri moning… , ol misinari oli mas go daon long ni blong olgeta mo askem wetem tru hat long Lod blong mekem tang blong olgeta i fri mo toktok tru long olgeta blong blesem olgeta we bae oli stap tijim. Sapos oli mekem hemia, wan niufala laet bae i kam insaed long laef blong olgeta. Bae i gat wan strong filing blong wantem mekem wok. Bae oli kam blong save se long wan tingting we i tru, olgeta oli ol wokman blong Lod we oli stap toktok long bihaf blong Hem” (“Missionary Seves,” First Worldwide Leadership Training Meeting, Jan. 11, 2003, 20).
Trastem God Taem Yumi Prea
Blong gat fet long God i minim blong stap trastem Hem. Hemia i minim tu blong stap trastem tingting blong Hem mo taem blong Hem blong stap ansarem ol prea blong yu (luk long Aesea 55:8–9). Presiden Dallin H. Oaks i tijim:
“Nomata hamas fet blong yumi i strong olsem wanem, hem i no save mekem wan risal we i no go wetem tingting blong God we long Hem yumi gat fet. Tingbaot se taem ol ansa blong prea blong yu oli no kam long wei o long taem we yu wantem. Oltaem blong praktisim fet long Lod, Jisas Kraes i wan oda blong heven, we i kam tru long gud fasin mo tingting mo waes mo taem blong Lod. Taem yumi gat kaen fet ia mo tras long Lod, yumi gat ful proteksen mo pis long laef blong yumi” (“The Atonement and Fet,” Ensign, Apr. 2010, 30).
Long saed blong ol prea we oli no kasem ansa, Presiden Russell M. Nelson i talem:
“!Mi save filing ia! Mi save ol fraet mo wota blong ae blong ol kaen taem olsem. Be mi save tu se oli neva ting nating long ol prea blong yumi. Oli glad mo luksave fet blong yumi. Mi save se wan Papa long Heven we i gat evri waes tingting mo lukluk blong Hem long yumi i moa bitim wanem yumi stap tingting long hem. Taem yumi save long ol problem mo ol harem nogud blong yumi long wol ia, Hem i save long progres mo paoa blong yumi taem bae yumi kasem wan bodi we i no save ded. Sapos yumi prea blong save tingting blong Hem mo putum ful tingting blong yumi long Hem wetem fasin blong save wet longtaem mo gat strong paoa long tingting, hiling blong heven i save tekem ples long wei mo taem blong Hemwan” (“Jesus Christ—the Master Healer,” Liahona, Nov. 2005, 86).
Lanem blong Luksave Ol Kwaet Voes blong Spirit
Hem i impoten blong yu mo ol pipol we yu stap tijim blong lanem blong luksave wanem we Spirit i stap talem. Oltaem Spirit bae i toktok long kwaet voes, tru long ol filing, maen mo hat blong yu. Profet Elaeja i faenemaot se voes blong Lod i no stap long win, long etkwek o long faea—be hem i “wan kwaet voes” (1 King 19:12). Hem i “no wan voes blong tanda,” be hem i “wan kwaet voes we i sofsof stret, olsem se i wan slo toktok,” be yet i save, “go tru i go kasem sol” (Hileman 5:30).
Komunikesen we i kam long Spirit, bae ol defren pipol oli filim i defdefren. Nomata se oli filim ol komunikesen ia oli defdefren, ol skripja oli tijim olsem wanem blong luksave olgeta. Eksampol. Spirit bae i mekem save blong yu i kam antap mo lidim yu blong mekem gudfala samting. Hem bae i givim laet long maen blong yu. Hem bae i mekem yu wokbaot wetem tingting we i stap daon mo mekem jajmen long stret mo gud fasin. (Luk long Doktrin mo Ol Kavenan 11:12–14 mo long “Stadi blong Yuwan” bokis we i stap afta long seksen ia.)
Blong ansarem kwestin ia, “?Olsem wanem nao yumi luksave ol kwaet toktok blong Spirit? Presiden Gordon B. Hinckley i ridim Moronae 7:13, 16–17. Afta, Hem i talem:
“Hemia nao tes, taem oli talem mo mekem evri samting. ?Hem i stap winim tingting blong wan blong mekem gud, blong girap, blong mekem raet samting, blong stap kaen, blong yu gat gudfala hat? Sapos yes, nao Hem i Spirit blong God. …
“… Sapos hem i invaetem blong mekem gudfala samting, hemia i kam long God. Sapos Hem i invaetem blong mekem nogud, hemia i kam long devel. … Mo sapos yu stap mekem raet samting mo sapos yu stap laef folem stret wei, bae yu save insaed long hat blong yu wanem Spirit i stap talem long yu.
“Yu luksave ol smol voes blong Spirit tru long ol frut blong Spirit—we i givim save, we i bildimap yu, hemia we i givim ol gudfala mo stret tingting mo i leftemap mo i lidim yumi i go long ol tingting we i moa gud mo ol toktok we i moa gud mo ol wok we i moa gud oli kam long Spirit blong God” (Teachings of Gordon B. Hinckley [1997], 260–61).
Taem yu lukaotem mo folem daereksen we i kam tru long Tabu Spirit, janis blong yu blong luksave gud mo nogud mo blong andastanem ol kwaet toktok blong Spirit, bae yu developem sloslo (luk long 2 Nifae 28:30). Long sam narafala wei, blong wok wan wetem lanwis blong Spirit i olsem blong stap lanem wan narafala lanwis. Hem i wan rod blong folem we i slo we i nidim hadwok, gat tingting blong save wet longtaem wetem efot.
Lukaotem daereksen blong Tabu Spirit wetem evri stamba tingting blong hat. Sapos yu stap bisi wetem ol narafala samting, bae yu no save filim save kaen voes blong Spirit we i stap toktok kwaet. O, bae Hem i wet blong toktok kasem taem we bae yu lukaotem paoa blong Hem wetem tingting we i stap daon mo tingting blong wantem tekem aksen folem insperesen we i kam long Hem.
Ol voes long wol oli stap resis blong kasem yu o pulum tingting blong yu. I isi blong oli kam fasfas mo pusumaot ol filing mo tingting long saed blong spirit, be sapos nomo yu givim wan ples blong Spirit insaed long hat blong yu. Tingbaot kaonsel ia we i kam long Lod: “Stap kwaet mo save se Mi, Mi God” (Ol Sam 46:10; luk tu long Doktrin mo Ol Kavenan 101:16).
“God i yusum ol defdefren paten blong givim revelesen i go long ol pikinini boe mo gel blong Hem, olsem ol tingting i go long maen mo ol filing i go long hat, ol drim … mo insperesen. Sam revelesen i kwik blong kasem mo wetem paoa; sam i slo mo had blong luksave. Blong stap kasem, luksave, mo ansa long ol revelesen we oli kam long God oli ol presen long saed blong spirit we yumi evri wan i mas wantem mo lukaotem long stret fasin” (David A. Bednar, “The Spirit of Revelation in the Work,” 2018 mission leadership seminar).
Stadi blong Yuwan
Stadi long ol skripja we i stap long tebol ia. Tingting long ol taem we yu bin gat eksperiens long ol filing, ol tingting we oli tokbaot long ol ves ia. Taem yu stadi mo kasem eksperiens, ademap ol narafala skripja i go long lis ia. Tingting long olsem wanem yu save yusum ol prinsipol ia blong helpem ol narawan blong filim o luksave Spirit.
|
Doktrin mo Ol Kavenan 6:23; 11:12–14; 88:3; Jon 14:26–27; Rom 15:13; Galesia 5:22–23 |
Hem i givim ol filing blong lav, glad, pis, kamfot, fasin blong save wet longtaem, i no stap flas, kaen fasin, fet mo hop. |
|
Alma 32:28; Doktrin mo Ol Kavenan 6:14–15; 8:2–3; 1 Korin 2:9–11 |
I givim moa laet mo givim ol aedia long maen mo ol filing insaed long hat. |
|
I helpem ol skripja blong save jenisim laef. | |
|
I riplesem tudak wetem laet. | |
|
I mekem tingting blong hat i kam strong moa blong stap longwe long devel mo obei long ol komanmen. | |
|
Moronae 10:5; Doktrin mo Ol Kavenan 21:9; 100:8; Jon 14:26; 15:26; 16:13 |
I stap tijim trutok mo mekem man i save tingbaot bakegen. |
|
I lidim mo protektem yumi long ol giaman. | |
|
I givim glori mo i talemaot rekod blong God, Papa mo Jisas Kraes. | |
|
I lidim ol toktok blong ol tija we oli putum tingting i stap daon. | |
|
Hem i givim ol presen blong Spirit. | |
|
Hem i talem wanem blong prea from. | |
|
Hem i talem wanem blong mekem. | |
|
Hem i helpem olgeta we oli stap stret mo gud blong toktok wetem paoa mo atoriti. | |
|
Hem i mekem i kam tabu mo mekem man i kam klin aot long ol sin. | |
|
Hem i karem trutok i kam insaed long hat blong olgeta we oli stap lisin. | |
|
I mekem i kam bigwan ol skil mo ol janis blong mekem samting. | |
|
1 Nifae 7:15; 2 Nifae 28:1; 32:7; Alma 14:11; Momon 3:16; Ita 12:2 |
Hem i wantem mekem samting i go fored o holem bak. |
|
Hem i givhan long, tugeta, tija mo ol studen. |
Dipen long Spirit
Olsem wokman blong Lod, yu yu blong mekem wok blong Hem long wei blong Hem mo tru long paoa blong Hem. Profet Josef Smit i bin tijim se “I no gat man i save prijim Gospel sapos i no gat Tabu Spirit” (Teachings: Josef Smit, 332).
Trastem Tabu Spirit blong i lidim yu long evri pat blong wok blong yu. Hem bae i givim laet mo insperesen long yu. Bae Hem i helpem yu blong faenem ol pipol blong tijim mo bae i givim paoa long tijing blong yu. Hem bae i helpem yu taem yu helpem ol memba, ol memba we oli stap kambak, ,mo ol niu konvet blong mekem fet blong olgeta i kam strong.
Sam misinari oli save trastem olgetawan. Ol narawan oli no save gat tras ia. Wetem tingting we i stap daon putum tras blong yu mo fet blong yu long Jisas Kraes, be i no long yuwan. Dipen long Spirit be i no blong dipen long ol talen mo paoa blong yuwan. Tabu Spirit bae i dabolem ol hadwok blong yu bitim wanem we yu save mekem yuwan.
Stadi long Ol Skripja
Stadi long ol skripja ia mo tingting long olsem wanem oli ansarem ol impoten kwestin ia we yu mas askem evri dei. ?Olsem wanem nao yu save yusum ol tijing long ol paragraf ia i go wetem wanem we yu traehad blong faenem, ol sesen blong mekem plan, mo stadi blong yuwan mo kompanion stadi? ?Olsem wanem nao yu save yusum ol paragraf ia i go wetem ol efot blong yu blong tij, invaetem ol pipol blong mekem ol komitmen, mo folemap ol komitmen ia?
?Weaples nao bae mi go?
?Wanem nao bae mi mekem?
?Wanem nao bae mi talem?
?Olsem wanem nao bae mi yusum ol skripja long taem mi stap tij?
Samfala Toktok blong Tekem Kea
Konfemem Ol Filing mo Tingting blong Yu wetem Ol Risos we Yu Save Yusum
Taem yu prea from insperesen, komperem ol filing mo tingting blong yu long saed blong spirit wetem ol skripja mo ol tijing blong ol profet we oli stap laef. Ol filing mo ol tingting we oli kam tru long Spirit bae oli joen wetem ol risos ia.
Lukaotem Revelesen folem Asaenmen blong Yu
Mekemsua se ol filing we yu kasem oli go stret wetem asaenmen blong yu. Be sapos nomo oli singaotem yu folem stret atoriti, ol filing mo tingting we i kam tru long Spirit oli kam long yu blong givim kaonsel o stretem ol narawan. Eksampol, bae yu no kasem revelesen blong talem long bisop wanem nao hem i mas mekem long koling blong hem.
Luksave Tru Paoa blong Spirit
Presiden Howard W. Hunter i givim kaonsel se: “Letem mi givim wan toktok blong stap tekem kea. … Mi ting se sapos yumi no tekem kea … , bae yumi stat blong traem blong mekem giaman kopi blong tru paoa blong Spirit blong Lod tru long ol wok blong yumi we oli no klin inaf mo ol nogud fasin. Mi gat wari taem i kamaot olsem ol strong filing o wota blong ae we i kamaot fri i semmak wetem filing blong Spirit taem i stap. I tru, Spirit blong Lod i save givim ol strong filing, we i tekem tu wota long ae, be wanem we i kamaot we man i luk bae oli no mas konfius wetem taem we Spirit Hemwan i stap” (The Teachings of Howard W. Hunter [1997], 184).
No Traem blong Fosem Ol Samting long Saed blong Spirit
Oli no save fosem ol samting long saed blong spirit. Yu save krietem wan fasin mo wan ples we i save invaetem Spirit, mo yu save mekem rere yuwan, be yu no save talem olsem wanem mo wetaem insperesen bae i kam. Gat fasin blong save wet longtaem mo trastem se bae yu kasem wanem we yu nidim long stret taem.
Holemtaet Ol Eksperiens long Saed blong Spirit I Tabu
Olsem wan misinari, bae yu save save moa long ol eksperiens long saed blong spirit bitim we yu bin gat bifo yu kam long misin. Ol eksperiens ia oli tabu mo oli blong gud blong yuwan, blong kasem instraksen o blong stretem yu.
Plante long ol eksperiens ia oli bes blong kipim i praevet. Serem nomo taem Spirit i poenemaot se yu save blesem ol narawan taem yu mekem olsem (luk long Alma 12:9; Doktrin mo Ol Kavenan 63:64; 84:73).
Yusum Bes Jajmen blong Yuwan long Samfala Eksampol
Samtaem yumi wantem blong Spirit i lidim yumi long evri samting. Be, plante taem Lod i wantem yumi blong tekem aksen folem bes jajmen blong yumiwan (luk long Doktrin mo Ol Kavenan 60:5; 61:22; 62:5). Presiden Dallin H. Oaks i tijim:
“Blong wantem blong Lod i lidim yu i wan paoa, be i nid blong i mas kam wetem save ia se Papa blong yumi long Heven i livim yumi nao blong mekem plante desisen long ol joes blong yumi. Blong stap mekem desisen yumiwan, i wan long ol stamba blong groap we yumi sapos blong gotru long hem long laef long wol ia. Olgeta we oli traem blong seftem wok blong stap mekem desisen i go long Lod, mo askem revelesen long evri joes, bae i no longtaem, bae hem i luk se bae i gat ol taem we bae oli prea blong Lod i soem rod, mo bae oli no gat ansa. Eksampol: hemia i save hapen long plante kaen situesen, we joes blong mekem i no impoten, o eni joes, bae i oraet nomo.
“Yumi mas stadi long olgeta samting ia insaed long maen blong yumi, mo yusum ol paoa blong gud tingting we Krieta i putum insaed long yumi. Afta, yumi mas prea blong Hem i soem rod mo tekem aksen folem sapos yumi kasem ansa. Sapos yumi no kasem daereksen, yumi mas tekem aksen folem bes jajmen blong yumi. Olgeta we oli gohed blong stap lukaotem revelesen blong kasem daereksen long olgeta we Lod i no jusum blong lidim yumi bae oli save mekem wan ansa aot long tingting mo wol blong olgetawan o oli save kasem wan ansa tru long ol smosmol giaman revelesen” (“Our Strengths Can Become Our Downfall,” Ensign, Oct. 1994, 13–14).
Stadi long Ol Skripja
Blong stap dipen long Spirit i impoten tumas se Lod i stap wonem yumi blong no tanem baksaed o putumaot Spirit. ?Wanem nao yu lanem long ol paragraf ia blong ol skripja?
Ol Aedia blong Stadi mo Yusum
Stadi blong Yuwan
-
Divaedem pej long tu kolom. Raetem long wan kolom “Wanem we Lod i Bin Mekem” mo long narafala kolom “Wanem we Lihae mo Nifae i Bin Mekem.” Ridim stori blong Liahona mo bonara we i brok long (1 Nifae 16:9–31) o stori blong Nifae we i stap bildim wan sip (1 Nifae 17:7–16; 18:1–6). Mekem lis blong ol samting we oli hapen long stori insaed long stret kolom blong olgeta. Tingting long wanem nao stori i save tijim long yu abaot fasin blong kasem insperesen.
-
Lukluk tru long jenol blong yu mo faenem ol taem we Spirit i bin lidim yu o yu bin kasem wan eksperiens long wan presen blong Tabu Spirit. Tingting long wetaem, wea mo from wanem ol eksperiens ia oli bin hapen. ?Olsem wanem nao yu luk han blong Lod i wok? ?Yu bin filim olsem wanem? Blong stap tingbaot ol eksperiens ia i save helpem yu blong luksave Spirit.
-
Stadi long Alma 33:1–12 mo Alma 34:17–31. ?Wanem ol kwestin we Alma mo Amulek i stap ansarem? (Luklukbak long Alma 33:1–2.) ?Olsem wanem nao tufala i ansarem ol kwestin ia? ?Wanem tingting blong hop nao tufala i givim?
-
Lod i bin promesem se Spirit bae i lidim yumi long plante impoten wei. Taem yu ridim ol paragraf ia, poenemaot ol pat blong wok blong yu we i nidim daereksen blong Spirit. ?Wanem nao ol prinsipol insaed long ol skripja ia oli minim long stadi blong yuwan mo kompanion stadi blong yu? ?Blong distrik kaonsel miting, son konfrens, ol seves blong baptaes mo ol narafala miting?
Fasin blong stap prea
Ol miting blong kondaktem
Kompanion Stadi mo Dei blong Jenisim Kompanion
-
Tokbaot ol prea we yu mo kompanion blong yu i stap talem. ?Tabu Spirit i stap lidim? ?Olsem wanem nao yutufala i kasem ol ansa blong ol prea blong yutufala olsem wan kompanionsip? ?Taem yu mo kompanion blong yu i prea, yutufala i stap:
-
?Bilivim se God bae i givim wanem we yutufala i askem long stret mo gud fasin folem tingting blong Hem?
-
?Yutufala i stap luksave mo talem tangkyu from ol ansa blong ol prea blong yutufala?
-
?Prea from ol pipol mo talem nem blong olgeta mo prea from ol nid blong olgeta?
-
?Prea from wanwan long yutufala mo from Spirit blong i lidim yutufala?
-
?Luksave ol ansa blong ol prea blong yutufala?
-
?Prea wetem wan komitmen blong tekem aksen folem kwaet voes blong spirit we yutufala i kasem?
-
-
Toktok raon long olsem wanem bae yutufala i lukaotem gud Spirit moa.
-
Toktok raon long ol defdefren wei we ol pipol oli tokbaot paoa blong Tabu Spirit. Holemtaet wan rekod insaed long stadi jenol blong yu abaot ol komen we olgeta we yu tijim oli bin mekem abaot ol eksperiens blong olgeta wetem Spirit. ?Olsem wanem nao yu save helpem ol narawan blong luksave tabu paoa ia?
Distrik Kaonsel, Ol Son Konfrens, mo Misin Lidasip Kaonsel
-
Olsem we i stret, askem ol misinari blong serem wan stori o eksperiens we oli bin harem long wan testemoni we jes pas i no long taem long wan miting, wan eksperiens long saed blong tij o wan narafala ples. Ol stori mo ol eksperiens we ol narafala pipol oli talem i save helpem yu blong developem fet mo luksave se paoa blong long saed blong spirit i stap evri ples mo i talemaot hemwan.
-
Askem ol misinari blong givim ol toktok abaot misin mo paoa blong tabu Spirit.
-
Tokbaot olsem wanem taem yu talem tangkyu i helpem yu blong luk ol smol, be yet ol spesel wei we Lod i stap blesem yu (luk long Ita 3:5; Doktrin mo Ol Kavenan 59:21). Toktok raon long ol wei blong soem fasin blong talem tangkyu.
-
Tingting blong askem wan niu memba blong tokbaot olsem wanem paoa blong Spirit i bin tijim hem taem hem i stap lan abaot Jos. Askem man o woman ia blong serem ol eksperiens we hem i filim se i stret blong hem i serem.
Ol Misin Lida mo Ol Misin Kaonsela
-
Yu save askem ol misinari blong talem tu ol eksperiens long saed blong spirit we i stret insaed long ol leta blong olgeta we i kam long yu blong evri wik.
-
Long taem blong ol intaviu o ol storian, wanwan taem askem ol misinari abaot ol prea blong olgeta long moning mo long naet. Sapos i gat nid, givim kaonsel long olgeta abaot olsem wanem blong mekem ol prea blong olgeta i gat moa mining.
-
Askem ol misinari long olsem wanem oli helpem olgeta we oli tijim blong filim mo luksave Spirit.