Koling blong Ol Man blong Pulum Fis (Kraes I Singaotem Pita mo Andru), i kam long Harry Anderson
Japta 6
Lukaotem Ol Fasin Olsem Hemia blong Kraes
tingting long hemia
?Olsem wanem nao taem mi traehad blong lukaotem ol fasin olsem hemia blong Kraes i save helpem mi kasem stamba tingting ia blong mi olsem wan misinari?
?Olsem wanem mi save tugeta lukaotem mo kasem ol fasin olsem hemia blong Kraes?
?Wijwan long ol fasin ia nao mi nid blong wok long hem naoia?
Fas Toktok
Stat long ministri blong Hem long wol ia, Jisas i bin wokbaot long saed blong Lagun blong Galili mo Hem i singaotem tufala man blong pulum fis, Pita mo Andru. “Yutufala i biaen long mi, yutufala i kam man blong mi.” Hem i talem, “Bambae mi mi mekem yutufala i man blong pulum man” (Matiu 4:19; luk tu long Mak 1:17).
Lod i singaotem yu tu long wok blong Hem, mo Hem i invaetem yu tu blong folem Hem. “?Yufala i mas kam wanem kaen man?” Hem i askem. “I tru mi talem long yufala, i olsem we mi stap” (3 Nifae 27:27).
Sam japta long Prijim Gospel blong Mi oli tokbaot moa long wanem yu nidim blong mekem olsem wan misinari, kaen olsem hao blong stadi, olsem wanem blong tij, mo olsem wanem blong setem ol gol. Wanem yu stap mekem naoia, i impoten semmak olsem huia hem i yu naoia mo bae yu kam huia tumoro. Hemia nao wanem japta ia i lukluk moa long hem.
Ol skripja oli talemaot ol fasin Olsem Hemia blong Kraes we oli impoten blong yu lukaotem olsem wan misinari mo truaot laef blong yu. Wan fasin olsem hemia blong Kraes i wan kwaliti o stret fasin mo laef blong Sevya. Japta ia i talemaot sam long ol fasin ia. Stadi long ol japta ia mo ol skripja we oli go wetem olgeta. Faenemaot ol nara fasin we Oli Olsem Hemia blong Kraes taem yu stadi long ol nara ves blong skripja.
Stadi blong Yuwan
Stadi Doktrin mo Ol Kavenan 4. ?Wanem fasin nao Lod i poenemaot olsem i impoten blong ol misinari? ?Olsem wanem nao taem yu stap lukaotem ol fasin ia i helpem yu kasem stamba tingting blong yu olsem misinari?
“Lukaotem Jisas Ia”
Profet Moronae i askem strong, “Bae mi askem strong long yufala blong lukaotem Jisas ia we ol profet mo ol aposol oli raetem abaot hem” (Ita 12:41). Wan wei blong lukaotem Jisas hem i blong mekem wan tru traehad blong lanem abaot Hem mo kam moa olsem Hem. Misin blong yu i wan gudfala taem blong save mekem tingting ia hapen.
Taem yu stap wokhad blong kam moa olsem Kraes, bae yu save mekem stamba tingting blong yu olsem wan misinari i hapen. Bae yu eksperiensem glad, pis, mo gro long saed blong spirit taem ol fasin blong Hem oli kam ol fasin blong yu. Bae yu save bildim wan fandesen tu we bae stap gohed blong folem Hem truaot laef blong yu.
Ol presen we i kam long God
Ol fasin we Oli Olsem Hemia blong Kraes oli ol presen we i kam long God. Olsem evri gudfala samting, ol presen ia oli kam tru long “gladhat blong God Papa, mo tu, blong Lod Jisas Kraes, mo blong Tabu Spirit” (Ita 12:41).
Putum lukluk blong stap nomo long Kraes taem yu stap wokhad blong karem ol fasin blong Hem long yu (luk long Doktrin mo Ol Kavenan 6:36). Ol fasin ia oli no olsem ol samting we yu listim olgeta i stap wan lis blong stap tikim. Oli no ol teknik we yu stap developem long wan program blong yu we yu stap wok long hem blong mekem yu kam gud moa long olgeta. Yu no save kasem olgeta tru long strong tingting blong yuwan nomo. Be, yu save kasem ol fasin ia taem yu stap wokhad mo komitim yuwan moa olsem wan disaepol blong Jisas Kraes.
Prea blong God i blesem yu wetem ol fasin ia. Luksave mo akseptem long yuwan se yu no strong mo se yu nidim paoa blong Hem long laef blong yu. Taem yu mekem olsem, bae Hem “i mekem yu winim ol samting we yu no strong long hem, mo yu kam strong long olgeta” (Ita 12:27).
I Tekem Taem mo I Wan Wok we I Stap Gogohed
Blong kam moa olsem Sevya i tekem taem, mo i wan wok we i stap gogohed long laef blong wan. Wetem wan strong tingting blong mekem wanem God i wantem, i mekem tingting blong mekem samting i kam moa gud long wan taem.
Gat fasin blong save wet longtaem wetem yuwan. God i save se blong jenis mo gro i tekem taem. Hem i agri wetem tru tingting blong yu mo bae i blesem yu long evri hadwok we yu mekem.
Taem yu stap lukaotem blong kam moa olsem Kraes, tingting blong hat, ol tingting, mo ol aksen blong yu bae oli jenis. Tru long Atonmen blong Jisas Kraes mo paoa blong Tabu Spirit, laef blong yu bae i kam klin gud (luk long Mosaea 3:19).
Pikja
Parli P. Prat
Tabu Spirit i mekem save mo fasin blong wok blong yumi i kam moa bigwan. Hem i givim “inspiresen blong gat klin fasin, fasin blong stap kaen, gudfala fasin, fasin blong putum tingting i stap daon, fasin blong stap kwaet, mo jareti. … Long sot toktok, i stap naoia, semmak olsem bifo, maro long bun, glad long hat, laet long ol ae, miusik long ol sora, mo laef long ful bodi” (Parley P. Pratt, Key to the Science of Theology [1855], 98–99).
Skripja Stadi
?Ol skripja ia oli tijim wanem abaot, folem eksampol blong Jisas Kraes?
Blong fet i lid i go long fasin blong sevem man, yu mas putum fet ia long Jisas Kraes nomo (luk long Ol Wok 4:10–12; Mosaea 3:17; Moronae 7:24–26). Taem yu gat fet long Kraes, yu trastem Hem olsem Stret Pikinini Ia Nomo blong God. Yu gat tras ia se taem yu sakem sin, ol sin blong yu bae oli fogiv tru long sakrifaes blong Hem we i pem praes mo Tabu Spirit bae i mekem yu i tabu (luk long 3 Nifae 27:16, 20).
Fet i no blong wan stret save long ol samting. Be, hem i wan tru ansa we i kam long Spirit mo talem ol samting we yu no luk be oli tru. (Luk long Alma 32:21.)
Yu soemaot fet blong yu tru long aksen. Ol aksen ia oli; blong folem ol tijing mo eksampol blong Sevya. Blong givim seves long ol narawan mo helpem olgeta jusum blong folem Kraes. Yu soemaot fet blong yu tu tru long fasin blong wok had oltaem wetem strong tingting, sakem sin, mo lav.
Fet i wan prinsipol blong paoa. Taem yu eksasaesem fet long Jisas Kraes, bae Hem i blesem yu wetem paoa blong Hem folem ol situesen blong yu. Bae yu save eksperiensem merikel long wei we Lod bae i wantem. (Luk long Jekob 4:4–7; Moronae 7:33; 10:7.)
Fet blong yu long Jisas Kraes bae i gro taem yu kam blong save Hem moa mo ol tijing blong Hem. Fet bae i gro taem yu stadi long ol skripja, mekem ol tru prea, mo obei ol komanmen. Sin mo fasin blong gat tu tingting i spolem fet.
Pikja
Elda Neil L. Andersen
Fet i no wan filing nomo; hem i wan tingting blong mekem samting. Wetem prea, stadi, fasin blong obei, mo ol kavenan, yumi bildim mo mekem fet i kam strong. Strong bilif blong yumi long Sevya mo long wok blong Hem long ol las dei ia i givim paoa long yumi blong luksave samting mekem se yumi mekem stret jajmen. Taem we laef blong yumi i stap long hadtaem, … yumi gat paoa blong tekem stret rod” (Neil L. Andersen, “It’s True, Isn’t It? Then What Else Matters?” Liahona, May 2007, 74).
Hop we I Stap Kam Antap, i kam long Joseph Brickey
Hop
Hop i no wan tingting blong wantem nomo. Be i wan strong tras o bilif, we i stanap strong long fet blong yu long Kraes, se bae God i mekem long yu wanem Hem i promes blong mekem (luk long Moronae 7:42). Tingting ia i stap finis se Kraes “i tekem ol gudgudfala samting ia oli kamtru” (Hibrus 9:11).
Jisas Kraes nomo i hop blong yu. Profet Momon i bin askem, “?Wanem ia nao we bae yufala i gat hop from?” Afta, hem i ansa, “Luk mi talem long yufala se bae yufala i gat hop tru long atonmen blong Kraes mo paoa blong laef bakegen long ded, blong hem, blong girap long laef we i no save finis, mo hemia i from fet blong yufala long hem, folem promes” (Moronae 7:41; luk long ves 40–43).
Taem yu putum hop blong yu long Kraes, yu save se evri samting bae i hapen blong gud blong yu (luk Doktrin mo Ol Kavenan 90:24). Save ia i helpem yu blong save stanap strong taem yu fesem ol hadtaem wetem fet. I save helpem yu tu yu gro tru long ol hadtaem mo developem fasin blong save kam oraet bakegen long saed blong spirit mo paoa. Hop long Kraes i olsem wan hanga blong sol blong yu (luk long Ita 12:4).
Hop i givim ful tras long yu se God bae i givim paoa long yu blong wok had oltaem long ol traehad blong yu blong kam stret mo gud (luk long Doktrin mo Ol Kavenan 123:17).
Wan wei blong mekem hop i kam antap hem i tru long fasin blong sakem sin. Hop i kambak long laef mo i save gohed blong gro taem yumi stap kam klin mo kasem fogivnes tru long Atonmen blong Jisas Kraes (luk long Alma 22:16).
Nifae i talem strong, “wokabaot i go wetem strong biliv long Kraes, wetem wan stret mo klin hop mo wan lav long God mo long evri man” (2 Nifae 31:20). Taem yu laef folem gospel, bae yu gro blong save putum tingting blong yu “i stap strong moa long hem oltaem” (Rom 15:13).
Pikja
Presiden Dieter F. Uchtdorf
“Long taem blong bigfala harem nogud, yumi save holemtaet hop se evri samting bae i wok tugeta blong gud blong [yumi] taem yumi folem toktok blong ol profet blong God. Kaen hop olsem long God, gudfala fasin blong Hem, mo paoa blong Hem i leftemap tingting i kam niu bakegen long taem blong ol hadtaem mo i mekem olgeta we oli filim se fraet, fasin blong gat tu tingting, mo lusum hop i stap holemtaet olgeta, oli kam strong” (Dieter F. Uchtdorf, “The Infinite Power of Hope,” Liahona, Nov. 2008, 23).
Wan taem wan man i askem Jisas, “Wanem loa blong God we i hae moa long ol narafala loa?” Jisas i ansa: “Yu mas lavem hae God ia we i God blong yu long olgeta hat blong yu, mo long olgeta laef blong yu, mo long olgeta tingting blong yu. Hemia nao loa ia we i hae moa long ol narafala loa, mo i nambawan blong folem. Mo narawan, we kolosap i semmak, i talem se: ‘Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu” (Matiu 22:36–39
Jareti hem i “klin lav blong Kraes” (Moronae 7:47). I gat long hem lav we i no save finis blong God, long ol pikinini blong Hem.
Profet Momon i bin tijim, “Prea long Papa wetem evri paoa blong hat, blong yufala i save fulap wetem lav ia” (Moronae 7:48). Taem yu prea blong jareti i fulap long hat, bae yu testem lav blong God. Lav blong yu long ol pipol bae i kam moa bigwan, mo bae yu kam blong filim wan dip wari from hapines we i no save finis, blong olgeta. Bae yu luk olgeta olsem ol pikinini blong God we oli gat paoa ia blong save kam olsem Hem, mo bae yu wok long bihaf blong olgeta.
Taem yu prea from presen blong jareti, ol nogud filing blong yu olsem blong stap kros o blong stap wantem samting bae i go daon. Bae yu no save jajem mo tokbaot man tumas. Bae yu gat moa filing ia blong wantem blong save tingting blong olgeta. Bae yu kam blong save gat moa longfala tingting blong wet mo traem blong helpem ol pipol taem oli fesem hadtaem o lusum hop. (Luk long Moronae 7:45.)
Jareti, olsem fet, i lid i go long aksen. Yu mekem i kam moa strong taem yu givim seves long ol nara man mo givim yuwan.
Jariti i save jenisim man. Papa long Heven i givim jareti “long olgeta we oli ol tru man blong folem Pikinini blong hem, Jisas Kraes; … blong taem we hem i kamkamaot, bae yumi stap olsem hem, … blong yumi save kam klin evriwan olsem we hem i klin evriwan” (Moronae 7:48).
“Mifala i bilif blong mas stap … klin,” ol Toktok blong Bilif i talem (1:13). Klin fasin i wan paten blong tingting mo aksen we stamba blong hem i ol hae standet blong klin tingting. Hem i blong stap fetful long God mo ol nara man. Wan impoten pat blong klin fasin i blong traehad blong stap klin mo klin gud long saed blong spirit mo bodi.
Klin fasin i stat insaed long ol tingting mo filing blong yu. “Letem klin fasin i flasem tingting blong yu oltaem,” Lod i talem (Doktrin mo Ol Kavenan 121:45). Putum tingting i stap nomo long ol stret mo gudfala strong tingting. Putum ol tingting we oli no klin aot long maen blong yu no stap laef long olgeta.
Maen blong yu i olsem wan stej long wan tieta. Sapos yu letem ol tingting we i no klin i stap longtaem long maen blong yu, bae i save mekem yu foldaon long sin. Sapos yu fulumap maen blong yu oltaem wetem ol gudfala samting, bae yu kam blong laekem moa ol klin fasin mo lego wanem we i blong devel. Stap waes blong letem wanem i kam insaed mo stap long stej blong maen blong yu.
Taem yu stap wokhad blong laef long wan klin laef, bae “tras blong yu [bae] i gro i kam strong long fored blong God; mo … Tabu Spirit bae i fren blong yu we bae i folem yu oltaem” (Doktrin mo Ol Kavenan 121:45–46).
Stap tru mo strong i kam long bigfala fas komanmen ia blong lavem God (luk long Matiu 22:37). From se yu lavem God, yu stap tru long Hem long oltaem. Olsem ol boe blong Hileman, yu “wokbaot long stret laef long fored blong hem” (Alma 53:21).
Taem yu gat fasin ia blong stap tru mo strong, yu andastanem se i gat raet mo rong mo we i gat trutok we i tru evriwan—trutok blong God. Yu yusum fridom blong mekem joes blong jusum blong mekem samting folem trutok blong God. Mo yu sakem sin kwiktaem, taem yu save se yu mekem sin. Wanem yu jusum blong tingting long hem—mo wanem yu mekem taem yu biliv i no gat man i stap wajem yu—hemia i wan strong mesamen blong save makem yuwan se yu save stap tru mo strong.
Pikja
Daniel insaed long Hol blong Ol Laeon, i kam long Clark Kelley Price
Stap tru mo strong i minim se yu no putum standet o aksen blong yu i go daon blong folem o akseptem tingting o filing blong ol narawan. Yu mekem wanem i raet nomata taem ol narawan oli talem nogud yu, jikim yu from tingting blong hat blong yu blong stap tru long God (luk long 1 Nifae 8:24–28). Yu laef wetem respek long evri ples yu stap long hem, mo tu hao yu ripresentem yu onlaen.
Taem yu stap tru mo strong, yu kipim kavenan blong yu wetem God mo tu yu kipim komitmen blong stap stret mo gud long ol narawan.
Stap tru mo strong i blong stap ones tu wetem God, yuwan, ol lida blong yu, mo ol narawan. Yu, yu no stap giaman, stil, raf, o trikim man. Taem yu mekem wan samting we i rong, yu akseptem responsabiliti mo sakem sin be i no blong faet from rong blong yu o traem blong mekem se yu no mekem i rong.
Taem yu laef long kaen laef ia blong stap tru mo strong, bae i gat pis i stap insaed long yu mo respek long yuwan. Lord mo ol narawan bae oli gat tras long yu.
Skripja Stadi
?Olsem wanem nao Jisas i soem blong stap tru mo strong iven long ol taem we oli spolem gud Hem?
I Go Wetem Fet, Klin Fasin, i kam long Walter Rane
Save
Lod i givim kaonsel, “Lukaotem blong lanem samting, tru long stadi, mo tu, tru long fet” (Doktrin mo Ol Kavenan 88:118). Long taem blong misin blong yu mo truaot laef blong yu, lukaotem save, speseli save long saed blong spirit.
Stadi long skripja evri dei, mo tu ol toktok blong ol profet we oli stap laef. Tru long stadi mo prea, lukaotem help blong ol stret kwestin, ol jalenj, mo ol janis. Lukaotem ol ves blong skripja we yu save yusum long tijing mo blong ansarem ol kwestin abaot gospel.
Taem yu stap traehad blong stadi mo prea, Tabu Spirit bae i givim laet long maen blong yu. Bae Hem i tijim yu mo bae i givim save long yu. Bae Hem i helpem yu folem ol tijing blong ol skripja mo ol profet blong las dei long laef blong yu. Olsem Nifae, yu save talem:
“Sol blong mi i glad long ol skripja, mo hat blong mi i tingting hevi long olgeta. … Luk, sol blong mi i glad long ol samting blong Lod, mo hat blong mi i tingting hevi oltaem long ol samting we mi bin luk mo mi bin harem” (2 Nifae 4:15–16).
Skripja Stadi
?Olsem wanem nao save i helpem yu blong mekem wok blong Lod?
Fasin blong save wet longtaem i wan fasin blong trastem God taem yu stap fesem dilei, fasin blong agens, o stap safa. Tru long fet blong yu, yu trastem taem blong God blong ol promes blesing blong Hem i save tekem ples.
Taem yu save wet longtaem, yu laef long wan lukluk we i blong taem we i no save finis. Yu no stap tingting blong ol blesing o wanem blong i hapen i tekem ples hariap. Stret mo gud tingting blong hat blong yu be i kam tru “rul folem rul, … smol long ples ia mo smol longwe” (2 Nifae 28:30). Sam long ol stret mo gud tingting blong hat bae oli no save hapen naoia be afta nomo long laef ia.
Fasin blong wet longtaem i no fasin blong stap les o blong stop blong mekem samting. Hem i blong “[mekem] wetem glad hat, evri samting we i stap long paoa blong [yu]” taem yu stap mekem wok blong God (Doktrin mo Ol Kavenan 123:17). Yu planem, wotarem, mo givim gudfala kakae long hem, mo God i mekem i gro “i no longtaem” (Alma 32:42; luk tu long 1 Korin 3:6–8). Yu wok olsem patna wetem God, wetem tras ia se taem yu mekem pat blong yu, bae Hem mekem wok blong Hem i kam tru folem fridom blong mekem joes blong wanwan man o woman.
Fasin blong wet longtaem i minim tu se sapos wan samting i no save jenis, yu kam blong akseptem olsem we i stap wetem gudfala tingting, mo fet.
Developem fasin blong wet longtaem wetem kompanion blong yu mo olgeta we yu stap wok wetem olgeta. Gat fasin ia blong wet longtaem wetem yuwan tu. Traehad blong kam gud insaed long yuwan mo tingbaot se bae yu gro wan step afta narawan.
Olsem ol nara fasin olsem hemia blong Kraes, blong stap gro tru fasin blong save wet longtaem i wan rod we i tekem ful laef. Taem yu stap praktisim fasin blong save wet longtaem, bae i save gat paoa ia blong hilim yu mo olgeta we oli stap raon long yu.
Pikja
Presiden Dieter F. Uchtdorf
“Fasin blong save wet longtaem i minim blong stap wet mo stap strong. I minim blong stap wetem wan samting mo mekem evri samting we yumi save mekem—stap wok, stap hop, stap praktisim fet; stap gotru long hadtaem wetem fasin blong stap strong oltaem, iven taem we ol samting we hat blong yumi i wantem i kam sloslo. Fasin blong save wet longtaem i no nomo blong stap strong; !i blong stap strong long gud fasin! (Dieter F. Uchtdorf, “Continue in Patience,” Liahona, Mei 2010, 57).
Givim i go long God wetem gud hat (Jisas i Stap Prea wetem Mama blong Hem), i kam long Simon Dewey
Fasin blong Gat Tingting I Stap Daon
Fasin blong gat tingting i stap daon i blong givim yuwan blong mekem wanem Lod i wantem. Hem i blong givim long Hem respek blong wanem i bin hapen. Hem i blong save akseptem blong lanem samting (luk long Doktrin mo Ol Kavenan 136:32). Fasin blong gat tingting i stap daon i blong talem tangkyu tu from ol blesing mo ol help blong God long ol nid we yu stap gat oltaem. Hem i helpem olgeta we oli gat tingting i stap daon.
Fasin blong gat tingting i stap daon i wan saen blong paoa long saed blong spirit, be i no wan saen blong talem se yu no strong. Fasin blong gat tingting i stap daon i wan impoten samting we i mekem yumi gro long saed blong spirit (luk long Ita 12:27).
Taem yu gat tingting i stap daon mo trastem Lod, yu save gat tras ia tu se ol komanmen blong Hem oli stap blong gud blong yu. Yu save gat tras ia tu se yu save mekem wanem samting Hem i askem yu blong mekem sapos yu putum tras blong yu long Hem. Yu wiling tu blong trastem ol wokman blong Hem mo folem ol toktok blong olgeta. Fasin blong gat tingting i stap daon bae i helpem yu stap obei, wok had, mo givim seves.
Oposit blong fasin blong putum tingting i stap daon hem i fasin blong gat hae tingting. Blong gat hae tingting i minim blong putum bigfala tras long yuwan bitim we yu putum long God. I minim tu blong putum ol samting blong wol antap long ol samting blong God. Hae tingting i wantem blong stap win oltaem; olgeta we oli gat hae tingting oli lukaotem blong gat moa mo oli ting se oli moa gud bitim ol narawan. Hae tingting i wan samting we i blokem yu.
Skripja Stadi
?Hem i minim wanem blong putum tingting i stap daon?
Fasin blong wok strong wetem strong tingting i traehad we i gat mining mo i stap gogohed oltaem. Long misinari wok, fasin blong wok strong wetem strong tingting i wan wei blong soemaot lav blong yu long Lod. Taem yu wok strong wetem strong tingting, yu faenem glad long wok blong Lod (luk long Alma 26:16).
Fasin blong wok strong wetem strong tingting i blong yuwan yu mekem plante gudgudfala samting be yu no wet blong ol lida oli talem long yu wanem blong yu mekem (luk long Doktrin mo Ol Kavenan 58:27–29).
Gohed blong mekem gud nomata i had o yu taet. Luksave nid blong save gat spel blong bae yu no save “ron moa kwik bitim paoa we yu i gat” (Mosaea 4:27).
Putum hat mo intres blong yu long Lod mo wok blong Hem. Kamaot long samting we i stap stopem yu long ol impoten wok blong yu. Lukluk moa long taem blong yu mo ol hadwok long ol aktiviti we bae oli moa gud long eria blong yu mo we i save helpem ol pipol we yu stap tijim.
Pikja
Presiden Henry B. Eyring
“Hemia i Jos blong Lod. Hem i singaotem yumi mo trastem yumi nomata Hem i save wanem yumi no strong long hem. Hem i save wanem hadtaem bae yumi go tru long hem. Tru long gudfala seves mo Atonmen blong Hem, yumi save kam blong wantem wanem Hem i wantem mo mekem wanem yumi mas mekem blong blesem olgeta we yumi stap givim seves long bihaf blong Hem. Taem yumi givim seves long Hem blong wan longfala taem mo wetem fasin blong wok strong wetem strong tingting, bae yumi jenis. Yumi save kam moa olsem Hem” (Henry B. Eyring, “Act in All Diligence,” Liahona, Mei 2010, 62–63).
Skripja Stadi
?Wanem i minim blong wok strong wetem strong tingting?
Tu(2) Taosen Yang Man blong Faet (Tu(2) Taosen Yang Man blong Faet), i kam long Arnold Friberg
Fasin blong Stap Obei
Seves blong yu olsem wan misinari i olsem wan pat blong ol kavenan yu bin mekem wetem God long baptaes mo long tempol. Taem yu kasem ol odinens ia blong baptaes mo blong endaomen, yu bin mekem kavenan se bae yu kipim ol komanmen blong Hem.
King Benjamin i bin tijim: “Mi wantem se yufala i tingbaot gudfala mo hapi ples blong olgeta we oli obei ol komanmen blong God. From luk, Lod i blesem olgeta long evri samting, ol samting blong laef ia tugeta wetem ol samting blong spirit; mo sapos oli fetful kasem en, bae oli go insaed long heven, blong mekem se oli save stap wetem God long wan ples blong hapi we i neva gat en” (Mosaea 2:41).
Stap obei ol komanmen i stap soemaot lav long Papa long Heven mo Jisas Kraes (luk long Jon 14:15). Jisas i talem, “Sipos yufala i stap obei long ol tok blong mi, bambae mi mi lavem yufala olwe, stret olsem we mi mi stap obei long ol tok blong papa blong mi, nao oltaem Hem i stap lavem mi” (Jon 15:10).
“Fasin blong obei i joes blong yumi. Sevya i mekem hemia i klia. Olsem i talem long Josef Smit Translesen blong Luk 14:28, Jisas i talem, ‘From hemia, putum gud hemia long hat blong yufala, se bae yufala i mekem ol samting we bae mi tijim, mo givim komanmen long yufala blong mekem.’ Hem i simpol nomo olsem. … Taem yumi mekem olsem, bae yumi stap strong oltaem mo gro bigwan long saed blong spirit. Bae yumi kamaot long fasin blong stap westem ol risos we God i givim mo kamaot long ol rod we bae i lidim yumi go long ol hadtaem long laef blong yumi” (Dale G. Renlund, “Constructing Spiritual Stability” [Brigham Young University devotional, Sept. 16, 2014], 2, speeches.byu.edu).
Skripja Stadi
Wanem nao yu save lanem abaot fasin blong stap obei long ol skripja we i stap?
Kraes mo Ol Man blong Pulum Fis (Yu yu Lavem Moa long Ol samting Ia), i kam long J. Kirk Richards
Wan Paten blong Save Kam Moa Olsem Kraes
Paten we i stap ia i save helpem yu blong developem mo kasem ol fasin we oli eksplenem long japta ia mo ol nara fasin we oli eksplenem insaed long ol skripja:
Luksave fasin we yu wantem blong lukaotem.
Raetem wan toktok blong eksplenem fasin ia.
Mekem lis mo stadi ol ves blong skripja we i soem ol eksampol blong ol fasin ia o we i tij abaot fasin ia.
Raetemdaon ol filing mo tingting blong yu.
Setem ol gol mo mekem ol plan blong wok long fasin ia.
Prea blong God i helpem yu developem mo kasem fasin ia.
“Lod i blesem olgeta we oli wantem blong kam gud moa, olgeta we oli agri wetem nid blong gat ol komanmen mo traem blong kipim olgeta, olgeta we oli laekem ol klin fasin we i olsem blong Kraes mo traehad blong mekem wanem oli save mekem blong gat ol samting ia. Sapos yu stap long rod blong lukaotem ol samting ia, mas save se yumi evriwan i mekem sem samting; Sevya i stap ia blong helpem yu blong gohed blong muv i go. … Bae i no longtaem bae yu gat wanem we yu stap lukaotem” (Jeffrey R. Holland, “Tomorrow the Lord Will Do Wonders among You,” Liahona, Mei 2016, 126).
Stadi blong Yuwan
Luksave wan fasin insaed long japta ia o insaed long ol skripja. Folem paten we oli jes eksplenem blong andastanem mo lukaotem fasin ia.
Luk long misinari nemtag blong yu. ?Olsem wanem nao nemtag ia i defren long olgeta we ol wokman blong wan kampani oli stap werem? Luksave se tu(2) impoten pat we i kamaot gud i nem blong yu mo nem blong Sevya.
?Olsem wanem nao yu save ripresentem gud Sevya olsem wan long ol disaepol blong Hem?
?From wanem hem i impoten blong ol man oli putum tugeta nem blong yu wetem blong Sevya long wan gudfala wei?
Raetem ol tingting blong yu long stadi jenol blong yu.
Skripja Stadi
Lukluk bak long fasin ia we oli listim long skripja we oli stap ia. Raetemdaon eni tingting mo filing long stadi jenol blong yu.
Luksave wan fasin insaed long japta ia. Askem yuwan:
?Olsem wanem mi save lanem moa abaot fasin ia?
?Olsem wanem taem mi stap lukaot blong kasem fasin ia i helpem mi blong kam wan gudfala minista blong gospel blong Jisas Kraes?
Faenemaot ol eksampol blong ol fasin we oli olsem blong Kraes long laef blong ol man mo woman insaed long skripja. Raetemdaon ol filing mo tingting blong yu long stadi jenol blong yu.
Faenemaot ol eksampol blong ol fasin we oli olsem blong Kraes insaed long ol tabu singsing blong Jos. Taem yu stap lukaot long wan fasin, save baehat ol toktok blong ol hym ia o ol singsing ia blong faenem paoa. Ripitim o singsing long ol toktok ia long yuwan blong kasem insperesen mo blong invaetem paoa blong Spirit.
Kompanion Stadi mo Jenisim Kompanion
Stadi ol refrens we oli tokbaot ol fasin olsem hemia blong Kraes long Gospel Library o sam nara risos we oli apruvum. Tokbaot olsem wanem blong laef folem wanem yu lanem. Yu maet tokbaot tu wanem yu bin lanem long traehad blong yuwan blong kam olsem Kraes.
Distrik Kaonsel, Ol Son Konfrens, mo Misin Lidasip Kaonsel
Sam dei bifo kaonsel mo konfrens, askem wanwan misinari blong rere wan faef minit toktok abaot fasin olsem hemia blong Kraes. Givim taem long miting blong sam misinari i serem ol toktok blong olgeta.
Serem ol misinari long fo grup mo givim long olgeta ol wok ia:
Grup 1: Ridim 1 Nifae 17:7–16 mo ansarem ol kwestin we i stap ia:
?Olsem wanem Nifae i praktisim fet blong hem?
?Wanem Nifae i mekem we i olsem wanem Kraes i mekem?
?Wanem ol promes Lod i bin mekem long Nifae?
?Olsem wanem storian ia i pat long misinari wok?
Grup 2: Ridim Mak 5:24–34 mo ansarem ol kwestin we i stap ia:
?Olsem wanem woman ia i eksasaesem fet long Jisas Kraes?
?From wanem hem i oraet?
?Olsem wanem yumi save folem eksampol blong hem long ol traehad blong misinari wok?
Grup 3: Ridim Jekob 7:1–15 mo ansarem ol kwestin we i stap ia:
?From wanem fet blong Jekob i strong inaf blong fesem atak blong Serem?
?Olsem wanem Jekob i eksasaesem fet taem Hem i toktok wetem Serem?
?Long wanem wei ol aksen blong Jekob i olsem hemia blong Kraes?
?Long wanem wei Josef Smit i eksasaesem fet long Jisas Kraes?
?Olsem wanem nao fet blong hem i stap long tes?
?Wanem nao hem i bin mekem, i olsem Kraes i mekem?
?Olsem wanem yumi save folem eksampol blong Josef Smit?
Afta ol grup i finis, karem ol misinari i kam tugeta mo askem olgeta blong serem wanem oli bin tokbaot.
Ol Misin Lida mo Ol Misin Kaonsela
Askem ol misinari blong ridim wan long ol fo Gospel long Niu Testeman o 3 Nifae 11–28. Askem olgeta blong anda laenem wanem Sevya i bin mekem we olgeta tu i save mekem.
Yusum gol seting mo ol plan blong tijim oli misinari abaot fasin blong wok strong wetem strong tingting. Soem olsem wanem fasin blong wok strong wetem strong tingting long ol pipol i wan saen blong lav.
Long taem blong intaviu o long taem blong toktok, askem ol misinari blong tok abaot wan fasin olsem hemia blong Kraes we oli stap lukaotem.
Aktiviti blong Fasin
Stamba tingting blong aktiviti ia i blong helpem yu luksave ol janis blong gro long saed blong spirit. Ridim wanwan toktok we i stap daon ia. Tingbaot olsem wanem toktok ia i tru abaot yu, mo jusum stret ansa. Raetem ol ansa blong yu long stadi jenol blong yu.
Nogat wan i save ansa “oltaem” long evri toktok. Gro long saed blong spirit i wan rod we i tekem ful laef. Hemia i wan risen from wanem i naes mo i gat praes blong hem—from i gat plante janis blong gro mo eksperiensem ol blesing blong stap gro.
No fraet blong stat wea ples yu stap long hem naoia. Komitim yu blong mekem wok long saed blong spirit we i nid blong gro. Lukaotem help blong God. Taem yu fesem ol taem we i nogud, gat strong tingting se Hem bae i helpem yu. Taem yu prea, lukaotem wanem fasin blong lukluk long hem long ol taem blong misin blong yu.
Ki Ansa
1 = neva
2 = samtaem
3 = plante taem
4 = kolosap oltaem
5 = oltaem
Fet
Mi bilif long Kraes mo akseptem Hem olsem Sevya blong mi. (2 Nifae 25:29)
Mi gat strong filing se God i lavem mi. (1 Nifae 11:17)
Mi trastem Sevya inaf blong akseptem wanem i wantem mo wanem i askem blong mekem. (1 Nifae 3:7)
Mi bilif se tru log Atonmen blong Jisas Kraes mo paoa blong Tabu Spirit, mi save kasem fogivnes long ol sin blong mi mo kam tabu taem mi sakem sin. (Inos 1:2–8)
Mi gat fet se God i harem mo ansarem ol prea blong mi. (Mosaea 27:14)
Mi gat fet se bae God i karem ol gud samting i kam long laef blong mi mo long laef blong ol narawan taem yumi givim yumi long Hem mo Pikinini blong Hem. (Ita 12:12)
Mi save tru long paoa blong Tabu Spirit se Buk blong Momon i tru. (Moronae 10:3–5)
Mi gat fet blong mekem wanem Kraes i wantem mi blong mekem. (Moronae 7:33)
Hop
Wan long ol bigfala tingting blong hat blong mi i blong kasem laef we i no save finis insaed long selestial kingdom. (Moronae 7:41)
Mi putum tingting blong i strong long stret mo gud fasin, ol gudfala tingting mo putumaot ol nogud tingting long maen blong mi. (Doktrin mo Ol Kavenan 121:45)