Gudfala Man blong Lukaot long Sipsip,i kam long Del Parson
Japta 9
Faenem Ol Pipol blong Tijim
Tingting long Hemia
?Olsem wanem mi save eksasaesem fet long Kraes blong faenem ol pipol blong tijim?
?Olsem wanem yumi save kam antap mo mekem gud ol plan blong yumi blong faenem ol pipol blong tijim?
?Olsem wanem mi save gro long fasin mo tras long miwan blong toktok wetem ol pipol we mi mitim olgeta evri dei?
?Olsem wanem yumi save kam wan wetem ol memba blong serem gospel?
?Wanem nao bae yumi mekem taem oli givim nem blong ol pipol blong tijim?
?Wanem sam long ol aedia blong faenem ol pipol blong tijim we yumi no traem yet?
Sevya we i laef bakegen long ded i talem long ol disaepol blong Hem, “Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Spirit” (Matiu 28:19; luk tu long Mak 16:15). Lod i ripitim wok ia long dei blong yumi, i se, “Yufala i go long ful wol [mo] prijim gospel” (Doktrin mo Ol Kavenan 68:8; luk tu long 50:14).
Misinari wok i blong faenem ol pipol, tijim olgeta, mo helpem olgeta oli rere blong baptaes. Bae yu mekem wok blong Lod i hapen blong tijim gospel blong Hem mo baptaesem ol konvet taem yu “faenem olgeta we bambae oli akseptem yufala” (Doktrin mo Ol Kavenan 42:8). I no gat wan samting i hapen long misinari wok kasem taem yu faenem wan blong tijim hem. Lukaotem oltaem blong faenem ol janis blong talemaot gospel. Lanem blong yusum ol wei we oli save wok long eria we yu stap long hem.
Speseli i impoten blong wok wetem ol memba blong faenem ol pipol blong tijim. Wok had blong kasem tras blong olgeta. Taem ol memba oli trastem ol misinari, bae oli wantem blong invaetem ol fren blong olgeta mo ol memba blong famli blong mitim yufala. Ol pipol ia bae oli kam blong konvet i go long Lod, kasem baptaes, mo stap gro long rod blong gospel.
Wok blong faenem pipol i hapen folem taem wan man o woman i rere blong harem gospel. Taem i no semmak blong wanwan man o woman. Wok blong faenem pipol blong tijim i save hapen long fastaem we yu mitim ol pipol ia o bae i tekem wan longfala taem afta long plante visit. Plante pipol oli mitim ol misinari fulap taem o ol Jos memba bifo oli statem wan series stadi blong gospel. Yu no stap fraetfraet blong kondaktem olgeta bakegen.
Traehad blong yu blong fanem pipol blong tijim i save karem frut afta we yu go long wan narafala eria finis o i maet afta we yu finisim misin blong yu finis. I nomata long taem o wanem i hapen, Lod i glad long ol hadwok blong yu.
Japta ia i aotlaenem ol prinsipol mo ol aedia blong helpem yu long wok blong faenem pipol blong tijim. Ol prinsipol ia oli aplae long evri eria long laef. Nomata long hemia, ol misinari mo ol misin lida oli nid blong wok gud long ol prinsipol ia folem ol situesen we oli stap long hem.
Yusum Fet blong Faenem Pipol blong Tijim
I nomata wea ples yu givim seves long hem, Lod i bin singaotem yu blong wok “blong sevem ol sol” (Doktrin mo Ol Kavenan 100:4). Blong mekem hemia, yu nid blong eksasaesem fet long Kraes blong faenem ol pipol blong tijim blong mekem se oli save jusum blong folem Hem mo kasem baptaes.
Fet i wan prinsipol blong aksen mo paoa. Gat fet se Lod i stap mekem rere ol pipol blong oli kasem gospel ia we i kambak bakegen. Gat fasin ia blong wet longtaem mo tras se Hem bae i lidim yu i go long olgeta, o olgeta i kam long yu. Putum fet blong yu long aksen taem yu putum ol gol, mekem ol plan, mo karemaot ol plan blong yu blong faenem ol pipol blong tijim olgeta (luk long japta 8).
Pikja
ol misinari oli stap prea
Prea wetem fet taem yu stap lukaotem help blong God blong helpem yu faenem ol pipol blong tijim olgeta. Taem Alma i bin lidim wan misin i go long ol pipol blong Soram, hem i bin prea: “O Lod, bae yu givim long mifala blong gat sakses blong karem olgeta oli kambak long yu tru long Kraes. Luk, O Lod, sol blong olgeta oli gudgudfala … ; from hemia, givim long mifala, O Lod, paoa mo waes tingting blong mifala i save tekem [olgeta ia] oli kam long yu bakegen” (Alma 31:34–35).
Ol pipol we yu stap mitim olgeta oli no save se oli stap lukaotem gospel we i bin kambak bakegen kasem taem we oli faenem. Eksampol, wan konvet i talem se, “taem mi harem gospel ia, i fulumap wan hol long hat blong mi we mi no bin save se i bin stap ia.” Narawan i talem, “Mi bin finisim wok ia blong stap lukaotem gospel we mi no bin save se mi bin stap lukaotem.” Ol narawan oli stap lukaotem trutok ia be oli no save wea ples blong faenem (luk long Doktrin mo Ol Kavenan 123:12).
Lukaotem blong Spirit i lidim yu taem yu stap lukaotem ol pipol blong tijim olgeta. Blong stap faenem ol pipol tru long Spirit i impoten semmak olsem blong tijim ol pipol tru long Spirit. Gat fet se bae yu save olsem wanem blong faenem olgeta we bae oli akseptem yu.
Kompanion Stadi
I maet gat ol memba long eria blong yu we oli ol konvet long Jos. Askem olgeta olsem wanem oli kam blong kontak wetem Jos. Ol ansa blong olgeta i save givim long yu sam tingting blong olsem wanem blong faenem ol pipol. Mo tu askem olsem wanem oli kam blong save se ol misinari oli bin stap tijim olgeta long trutok. Raetem sot toktok abaot ol eksperiens blong olgeta long stadi jenol blong yu.
Skripja Stadi
?Olsem wanem ol pikinini blong God oli bin rere mo lid i kam long gospel we i kambak?
Mekem Plan blong Visen blong Yu blong Faenem Pipol I Kam Bigwan
Taem yu lukaotem blong fanem ol pipol blong tijim, yu mas save difrens bitwin mekem taem tebol mo mekem plan. Mekem taem tebol i blong putum gud plan buk blong yu mo dei blong yu. Mekem plan i blong mekem prea, mo wok had wetem stamba tingting ia blong lukluk nomo long ol pipol mo ol gudfala wei blong faenem olgeta.
Raet aktiviti, long raet taem mo long raet ples, i save helpem yu blong faenem ol pipol blong tijim olgeta. Askem yuwan long ol kwestin ia:
?Wea ples nao yumi save mitim ol pipol we Lod i stap rere olgeta?
?Wea ples nao mo wanem kaen aktiviti nao i moa gud blong faenem ol pipol long ol stret taem blong dei o wik?
?Olsem wanem yumi save soem lav, givim seves long olgeta, o givim valiu long laef blong olgeta long taem naoia?
?Olsem wanem yumi save yusum paoa blong yumiwan, ol skil, mo ol talen blong leftemap olgeta?
?Wanem nao i ol bakap plan blong yumi sapos fas plan blong yumi i no wok aot?
Traem blong luksave ol wei we Lod i stap mekem ol pipol oli rere. ?Oli wantem tumas blong toktok wetem yu? ?Oli stap lukaotem help o kamfot?
Tingting long ol wei o wok blong faenem pipol we oli bin yusum finis we i gat sakses. ?Wea ples nao oli mekem fas kondak? ?Ol wok ia, ol lokol memba tu oli pat long hem? ?Oli bin yusum teknoloji?
Statem plan blong yu long olsem wanem nao yu save blesem ol pipol, mo afta, taem tebol blong yu bae i wok folem.
Kompanion Stadi
Wetem kompanion blong yu, yusum tebol we i stap daon ia blong lukluk long ol wok blong yutufala blong faenem ol pipol blong tijim olgeta. Plan blong traem sam aedia we oli niu long yutufala.
Ol Wok blong Faenem Ol Pipol
Samtaem
Plante Taem
Kolosap Oltaem
Yumi kam blong save ol memba mo sapotem olgeta long wok blong olgeta blong serem gospel, i gat ol yut, olgeta we oli stap rere blong go long misin, ol misinari we oli kambak finis, ol pat-memba famli, olgeta we oli stap rere blong kam ol elda.
Yumi wok blong kasem tras blong ol memba blong mekem se oli save filim gud blong invaetem ol famli mo ol fren blong olgeta blong kam mitim yumi.
Yumi wok wetem ol lida blong wod long ol kodinesen miting blong evri wik blong sapotem ol wok blong yumi blong faenem ol pipol, mo faenemaot sapos i gat ol pipol blong yumi save kondaktem olgeta.
Yumi wok wetem ol pipol we oli stap tijim olgeta naoia, pipol we oli bin tijim olgeta finis, mo olgeta we oli givim long yumi tru long media blong faenem pipol blong tijim olgeta.
Yumi toktok wetem plante pipol evri dei taem yumi gat janis.
Yumi rere yumi long saed blong spirit mo prea blong kasem help blong God taem yumi stap plan blong faenem ol pipol blong tijim olgeta.
Yumi biliv se Lod i stap rere ol pipol blong yumi tijim olgeta.
Yumi tingting long olsem wanem blong helpem olgeta we yumi mitim olgeta blong filim paoa blong Tabu Spirit.
Yumi setemap ol gol we i stret blong evri wik mo evri dei blong faenem ol pipol (luk long japta 8);
Oltaem yumi stap lukaotem ol pipol blong tijim olgeta.
Yumi krietem mo yusum ol defren wei blong faenem ol pipol blong tijim. Yumi traem ol niufala wei mo no stap stak long wan we yumi stap yusum evri taem.
Yumi mekem stret plan blong faenem pipol blong tijim. Yumi plan blong wanem taem, long wea ples, mo olsem wanem bae yumi fokas.
Yumi tingting long wanem ol gudfala ples mo ol gudfala taem long dei blong faenem ol pipol blong tijim.
Yumi tingting long ol aktiviti blong faenem ol pipol, we oli bin yusum long taem bifo mo i bin wok gud.
Yumi putum gud ol plan blong yumi blong faenem ol pipol blong tijim, olsem we yumi nidim, mo gat ol bakap plan taem ol aktiviti ia we yumi gat long taem tebol blong yumi i no wok aot.
Yumi yusum ap blong Prijim Gospel blong Mi blong faenem ol pipol blong tijim, blong setem ol gol mo mekem ol plan, mo blong luklukbak mo apdeitem ol rekod blong evri dei.
Yumi yusum ol talen mo ol paoa blong yumiwan blong help blong faenem ol pipol.
Yumi mekem plan blong wanem taem mo olsem wanem blong yusum sosol media mo ol nara teknoloji blong faenem ol pipol blong tijim olgeta.
Yumi yusum ol plan o wanem ofa we media i givim we i save mitim intres mo nid blong ol pipol blong eria blong yumi.
Yumi ansa kwiktaem long ol onlaen rikwes mo ol mesej we i kam long ol pipol we oli maet gat intres.
Yumi mekem plan blong ol sosol media post blong yumi fastaem mo wok wetem ol memba blong faenem ol pipol onlaen blong tijim.
Stap Wok Had Oltaem blong Faenem Pipol
Mekem Wok Ia blong Faenem I Kam Wan Wok We I Stap Laef Oltaem
Bifo long ol eli dei we Jos i jes stap kambak bakegen, Lod i bin ripitim instraksen ia long wan grup blong ol brata blong tijim gospel blong Hem “folem rod” taem oli stap travel. Hem i wantem olgeta blong yusum evri janis blong serem gospel. (Luk long Doktrin mo Ol Kavenan 52:9–10, 22–23, 25–27.)
Yusum instraksen ia long wok blong yu blong faenem ol pipol. Mekem wan traehad oltaem blong faenem ol pipol truaot long dei. Mekem plan blong traehad blong faenem pipol—mo tu lukaotem ol janis we oli no mekem plan from. Blong faenem ol niu pipol blong tijim i wan nid we i stap oltaem.
Lukaotem insperesen mo gat tingting ia blong wantem yusum ol defren kaen wei blong faenem pipol. Lukluk moa long ol wei we i wok gud long eria blong yu.
Pikja
Kraes i Stap Singaotem Pita mo Andru, i kam long James T. Harwood
Kipim Ol Laen I Stap long Wota
Abaot wok blong ol misinari, Presiden Dallin H. Oaks i talem:
“I no mas gat long yumi olsem man blong hukum fis we i ting se hem i huk ful dei be long ril laef hem i spendem kolosap ful taem blong hem blong go kam nomo long wota, kakae lanj, mo mekem noes wetem ol tul blong hem. Blong hukum fis i tekem hamas longfala taem yu save wet long laen blong yu insaed long wota, i no hamas longfala taem yu lego apatmen blong yu. Sam man blong hukum fis oli lego haos blong olgeta blong twelef aoa mo livim laen blong olgeta insaed long wota blong ten aoa. Ol nara man blong hukum fis oli lego haos blong olgeta blong twelef aoa mo livim laen blong olgeta insaed long wota blong tu(2) aoa nomo. Ol lasfala wan ia bae oli tingting se from wanem oli no gat semfala sakses olsem ol narawan.
“Semmak prinsipol ia i aplae long ol misinari, we Masta i singaotem olgeta ‘ol man blong hukum man’ [Matiu 4:19]. Laen blong huk blong wan misinari i mas drop i go long wota taem hem i lego apatmen blong hem” (seminar for new mission presidents, June 20, 2000).
Pikja
ol defren rel blong hukum fis
Elda Quentin L. Cook i toktok moa blong komperem wok ia. Antap long wok ia blong kipim “laen blong huk insaed long wota” blong wan longfala taem, hem i tijim se ol misinari we oli faenem ol pipol blong tijim olgeta “oli oltaem kipim plante laen blong olgeta insaed long wota. …
“Oli faenemaot mo kondaktem ol pat-memba famli.
“Oli lukaotem long [Prijim Gospel blong Mi ap] blong olgeta, faenem ol pipol we oli bin tijim olgeta bifo, blong kondaktem olgeta tru long fon mo teks.
“Oli givim seves long ol memba, pipol we oli bin tijim olgeta long pas, ol pipol we oli stap tijim naoia, mo kavremap ful komuniti. …
“Oli helpem ol memba blong krietem ol mesej blong serem long … ol sosol media platfom blong olgetawan.
“Oli kasem ol nem blong ol man mo woman long ol pipol we oli visitim mo tijim olgeta” (“Be Spiritual Pathfinders and Influencers,” missionary devotional, Sept. 10, 2020; emphasis added).
Kompanion Stadi
Tokbaot ol kwestin we i stap ia:
?Wanem nao sam long olgeta wei we yu save kipim “laen blong yu insaed long wota” blong longfala taem, long dei taem?
?Wanem nao sam long ol wei we yu save kipim plante laen long wota taem yu faenem ol pipol blong tijim olgeta?
?Wanem ol samting insaed long Prijim Gospel blong Mi ap i save helpem yu?
?Olsem wanem bae yu save yusum teknoloji blong helpem yu kipim plante laen insaed long wota?
Toktok long Evriwan
Developem wan strong filing blong wantem blong karem ol sol blong man i go long Kraes (luk long Mosaea 28:3). Taem yu gat filing blong wantem ia, lav blong yu mo wari blong yu bae i pusum yu blong traehad blong faenem pipol. Lav blong yu tu bae i soemaot hemwan long ol storian blong yu wetem olgeta.
Toktok wetem plante moa pipol taem yu gat janis evri dei. Toktok long olgeta eni ples yu go long hem. Long ples we yu save mekem, go long wanwan haos. Lod i bin givim instraksen long sam elda blong Jos bifo, “Openem maot blong yu blong talemaot gospel blong mi.” Afta Hem i givim promes se bae maot blong olgeta “i fulap” wetem wanem blong tijim (Doktrin mo Ol Kavenan 30:5; luk tu long 33:7–10).
Semmak samting, Lod i bin talem long Josef Smit mo Sidney Rigdon, “Leftemap voes blong yutufala i go long ol pipol ia; talemaot ol tingting we bae mi putum long hat blong yutufala.” Afta Hem i givim promes, “Bae mi givim yutufala … long stret taem, wanem we bae yutufala i talem” (Doktrin mo Ol Kavenan 100:5–6).
Taem yu mitim ol pipol, oltaem bae yu filim Spirit i helpem yu save wanem blong talem. Be sapos yu no filim wan samting, stat nomo sam ples—maet askem wan kwestin mo lisin long ansa blong olgeta (luk long “Faenem Ol Pipol Wea Ples Oli Stap” long japta ia). O maet tokbaot Lod Jisas Kraes o koling blong Josef Smit olsem wan profet blong God.
Ol aedia we i stap ia oli save help taem yu toktok wetem olgeta we yu mitim:
Stap ril, stap tru, mo stap wan fren. Lukaotem ol wei blong konek wetem man o woman mo statem wan smol storian.
Lisin gud long wanem ol pipol i stap talem. Lukaotem blong andastanem ol nid mo intres blong wanwan man o woman. Soemaot se yuwan yu save help sapos i gat nid.
Tingting long olsem wanem gospel i save help blong mitim ol nid blong olgeta. Afta tijim wan simpol trutok blong gospel, mo invaetem olgeta blong lanem moa. Serem olsem wanem gospel we i kambak i save karem bigfala hop mo mining i kam long laef blong olgeta.
Askem abaot ol famli blong olgeta. Helpem olgeta blong luk olsem wanem gospel ia we i bin kambak bakegen i save blesem famli blong olgeta. Letem olgeta i save se yu wantem helpem olgeta blong faenem nem blong ol bubu blong olgeta we oli ded finis.
Invaetem olgeta blong kam long sakramen miting.
Soem ol pamflet o ol nara materiol blong Jos we oli printim finis mo dijitol wan.
Serem wetem olgeta stamba wok blong yu olsem wan misinari mo from wanem yu jusum blong givim seves long wan misin.
Ol prinsipol ia yu yusum tu wetem olgeta we oli memba.
Hem i wan nomol samting blong stap fraet smol blong toktok wetem ol pipol. Prea from fet mo strong paoa long tingting blong tijim gospel ia we i kambak bakegen. Evriwan we yu mitim i brata mo sista blong yu insaed long famli blong God. Tingbaot se Hem “i no tanem baksaed blong hem long eniwan we i kam long hem, blak mo waet, slef mo fri, man mo woman; … long God evriwan i semmak” (2 Nifae 26:33).
Stadi blong Yuwan o Kompanion Stadi
Ridim stori ia we i stap long Victor Manuel Cabrera long “Thirsting for the Living Water,” Ensign, Aug. 2001, 60–61. Taem yu ridim stori ia, luk olsem wanem hem i bin rere blong kasem ol misinari mo olsem wanem ol misinari oli yusum wan janis we oli no bin plan from blong tijim hem gospel.
?Olsem wanem nao man ia i bin rere blong kasem gospel we i bin kambak bakegen?
?Wanem bae i hapen sapos ol elda oli no bin serem wan gospel mesej?
Lukluk bak long wanem yu bin mekem yestedei. ?Yu bin toktok wetem plante pipol taem yu gat janis blong mekem? Sapos nogat, setem ol gol mo mekem ol plan blong toktok wetem moa pipol tedei.
Skripja Stadi
?Wanem nao yu save lanem abaot faenem ol pipol blong tijim, long ol skripja we oli stap ia? ?Wanem nao yu save lanem abaot wanem yu mas tijim, insaed long ol skripja ia? ?Lod i promesem wanem?
“Invaetem evriwan blong kasem gospel, i pat blong wok blong sevem man mo wok blong kam olsem wan god” (Jeneral Hanbuk, 23.0). Wok wetem ol memba blong Jos blong faenem ol pipol blong tijim. Taem ol memba oli givim nem blong wan man o woman long yu mo afta tekem pat long ol lesen, plante taem ol pipol ia bae oli kasem baptaes mo bae oli stap aktiv long Jos.
Bildimap Strong Rilesensip wetem Ol Lokol Lida
Bildimap ol strong rilesensip wetem olgeta long bisoprik mo ol nara lida blong wod. Wod misin lida (sapos oli singaotem wan) mo kworom blong ol elda mo presidensi blong Rilif Sosaeti oli ol ki lida blong toktok wetem olgeta. Lukaotem kaonsel blong olgeta blong lidim yu, mo sapotem olgeta long kodinesen miting blong evri wik (luk long japta 13).
Long taem blong kodinesen miting blong evri wik, wok wetem asisten blong kworom blong pris mo Yang Woman klas presiden blong klas we oli moa bigwan. Ol yut ia oli gat wan impoten rol blong serem gospel. Helpem olgeta oli leftemap tingting blong kworom mo ol memba blong klas blong serem gospel. Wan wei hem i blong ol yut oli invaetem ol fren i kam long ol aktiviti.
Oltaem askem yuwan, “?Mi, mi wan blesing long ol lokol lida?” Developem wan fasin blong “?Olsem wanem nao mi save help?” Olsem Amon long Buk blong Momon, i toktok long ol lokol lida wetem wan fasin blong givim seves (luk long Alma 17:23–25).
Presiden Russell M. Nelson i bin tijim ol misin lida: “Mi hop se bae yu lanem blong lavem ol lokol lida mo ol memba. Leftemap tingting blong olgeta mo givim insperesen long olgeta. Save blong yu blong joenem glad blong ol misinari wetem wok mo lav blong ol memba we i stap oltaem, i no blong tokbaot tumas. Sakses bae i kam plante tru long ol smol wok ia” (“Hopes of My Heart,” seminar for new mission leaders, June 23, 2019).
Pikja
ol misinari oli stap tijim ol woman
Sapotem Ol Memba long Hadwok blong Olgeta blong Serem Gospel
I gat plante wei blong sapotem mo leftemap tingting blong ol memba blong serem gospel. Helpem olgeta blong luksave olsem wanem gospel i bin blesem laef blong olgeta. Leftemap tingting blong olgeta blong “leftemap laet blong [olgeta] blong mekem se i save saen long wol” (3 Nifae 18:24).
Helpem ol memba blong yusum ol prinsipol blong lavem, serem, mo invaetem. Givim ol eksampol blong ol nomol wei we oli save yusum long ol prinsipol ia.
Lavem. Wan wei blong soem lav blong God hem i tru long fasin blong lavem mo givim seves long ol pikinini blong Hem. Leftemap tingting blong ol memba blong go aot wetem lav long ol memba blong famli, fren, neba, mo ol narawan. Eni hadwok blong soemaot lav i wan impoten wei blong kipim ol kavenan we oli gat wetem God (luk long Mosaea 18:9–10).
Serem. From lav blong olgeta long God mo ol pikinini blong Hem, i mekem ol memba oli wantem blong serem ol blesing we Hem i givim long olgeta (luk long Jon 13:34–35). Leftemap tingting blong ol memba blong talem long ol narawan abaot olsem wanem gospel i blesem laef blong olgeta. Leftemap tingting blong olgeta blong tokbaot Sevya mo paoa blong Hem. Helpem olgeta blong filim glad blong serem lav blong olgeta, taem, mo ol samting we i stap hapen long laef blong olgeta. Helpem olgeta oli lanem olsem wanem blong serem long wan fasin we i nomol mo i stret—i simpol nomo olsem wan samting we oli stap mekem finis long laef blong olgeta.
Pikja
Elda Gary E. Stevenson
“Yumi evriwan i serem ol samting wetem ol narawan. Yumi mekem oltaem. Yumi serem wanem kaen muvi mo kaekae we yumi laekem, ol fani samting we yumi luk, ol ples we yumi visitim, ol art wok we yumi laekem, ol kwot we yumi kasem insperesen long olgeta.
“?Olsem wanem yumi save ademap wanem yumi lavem abaot gospel blong Jisas Kraes, long lis blong wanem yumi stap serem finis? … Taem yumi serem ol gudfala eksperiens blong yumi abaot gospel wetem ol narawan, yumi stap tekpat blong mekem bigfala wok blong Sevya i hapen,” (Gary E. Stevenson, “Lavem, Serem, Invaetem,” Liahona, Mei 2022, 86).
Invaetem. Sevya i stap invaetem evriwan blong akseptem gospel blong Hem mo rere from laef we i no save finis (luk long Alma 5:33–34). Semmak olsem serem, plante taem, invaetem, i minim blong invaetem famli, ol fren, mo ol neba long wanem ol memba oli stap mekem finis. Leftemap tingting blong ol memba blong prea abaot invaetem ol pipol folem ol wei ia:
Kam mo luk. Invaetem ol pipol blong “kam mo luk” ol blesing we oli save kasem tru long Jisas Kraes, gospel blong Hem, mo Jos blong Hem.
Kam mo givim seves. Invaetem ol pipol blong “kam mo givim seves” long ol narawan we oli stap long nid.
Kam mo kam pat. Invaetem ol pipol blong “kam mo kam pat” olsem ol memba blong Jos blong Jisas Kraes we i bin kambak bakegen.
Elda Gary E. Stevenson i talem: “I gat handred long ol invitesen we yumi save givimaot long ol narafala man. Yumi save invaetem ol narafala man blong “kam mo luk” wan seves blong sakramen, wan wod aktiviti, wan onlaen vidio we i stap eksplenem gospel blong Jisas Kraes. ‘Kam mo luk’ i save kam olsem wan invitesen blong ridim Buk blong Momon o visitim wan niu tempol long taem we i gat wan open haos, bifo oli dediketem. Samtaem invitesen ia i wan samting we yumi givim i kambak long yumi—wan invitesen blong yumiwan, we i stap rimaenem yumi mo mekem yumi luk ol janis we oli stap raonem yumi blong tekem aksen folem” (“Lavem, Serem, Invaetem,” 86).
Mekem sua blong helpem ol yut oli lavem, serem mo invaetem. Ol yut oli gat presen ia blong lavem ol fren blong olgeta, serem wanem i stap long hat blong olgeta, mo invaetem olgeta long ol aktiviti.
Helpem ol memba oli andastanem se eni traehad blong laef folem ol prinsipol blong lavem, serem, mo invaetem i mas gud nomo semmak long evriwan, i no mata sapos wan i stap mit o no mit wetem ol misinari o i stap joen long Jos.
Helpem ol memba blong oli yusum paoa blong olgeta blong serem gospel. Sam long olgeta oli gud blong faenem ol pipol blong tijim, mo sam long olgeta oli ol gudfala tija. Sam long olgeta oli save olsem wanem blong konek wetem ol fren, be ol narawan oli lavem blong prea from ol fren blong olgeta. Helpem olgeta blong luksave se i gat ol wei blong evriwan blong tekem pat.
Taem yu visitim ol memba, visitim olgeta wetem wan stamba tingting. Soem se yu rili laekem blong mekem wok blong faenem pipol mo tijim olgeta. Respektem taem blong olgeta mo taem tebol blong olgeta.
Sam long ol memba maet bae oli letem yu tijim wan mesej aot long wan long ol lesen. Ol trutok blong gospel oli jenisim laef. Taem yu mekem save blong ol memba long saed blong gospel i kam moa klia mo i strong, bae oli kam blong trastem yu mo i bildim glad blong olgeta blong serem gospel. Helpem olgeta oli luksave o haremsave Spirit mo folem ol kwaet toktok blong hem.
Faenem ol pipol tru long ol pat-memba famli, ol prospektif elda, ol misinari we oli kambak long misin, mo ol niu memba blong tijim olgeta. Bae oli gat plante famli memba mo fren we oli blong ol nara fet.
Long evri samting we yu mekem wetem ol memba, folem Spirit mo lukaotem blong bildim fet blong olgeta long Sevya, Jisas Kraes.
Blong gat moa aedia mo ol risos blong olsem wanem yu save sapotem ol memba blong serem gospel, luk long:
Luklukbak long las kodinesen miting blong evri wik. ?Olsem wanem nao bae yu save mekem i kam gud moa? Luklukbak long ol rikwes we i kam long ol lida blong wod mo mekem plan long olsem wanem mo wanem taem blong ansa.
Mekem plan olsem wanem blong mekem misinari wok blong yu i kam moa gud long nekis kodinesen miting.
Lanem ol nem blong ol lida blong wod (ol man mo ol woman). Mekem plan long wanem bae yufala i mekem long nekis manis blong developem strong rilesensip wetem olgeta mo sapotem olgeta long misinari hadwok blong olgeta.
Faenem pipol tru long Prijim Gospel blong Mi Ap
Prijim Gospel blong Mi ap i wan gudfala risos blong faenem ol pipol blong tijim. Ol misinari we oli yusum oltaem ol tul we i stap long ap ia oli gat moa sakses blong faenem ol pipol. Blong save gud olsem wanem blong yusum ol tul we i stap long ap ia, folem wanem trening blong ap ia i talem. Lisin gud long ol kwaet toktok blong spirit we yu maet kasem taem yu luklukbak long ol nem blong ol pipol.
Insaed long ap i gat ol infomesen abaot ol pipol we oli bin givim nem long ol misinari i stap, we oli bin kondaktem olgeta finis, o we oli bin tijim olgeta. Sam long ol pipol ia oli maet wantem blong mitim ol misinari bakegen. Oli maet save tu long ol nara pipol we oli save gat intres blong lanem abaot gospel.
Blong mekem plan blong yu, yusum map mo filta insaed long ap blong arenjem gud huia ol pipol bae yu visitim faswan. Luk long ol infomesen blong olgeta mo lanem olsem wanem oli bin faenem olgeta. Luk sapos i gat wan rekod abaot ol memba we oli bin helpem olgeta. Yusum infomesen ia blong luk wanem gudfala wei nao blong kasem olgeta bakegen.
Pikja
ol misinari oli stap stadi long ol fon
Yusum ol filta tul long ap blong faenem evriwan we:
Oli bin putum wan deit blong baptaes blong olgeta bifo be oli no bin kasem baptaes.
Oli atendem sakramen miting wan taem nomo be oli no baptaes.
Oli bin kasem bitim tri lesen finis.
Oli no bin kondaktem olgeta i no longtaem.
Sapos ol pipol we yu kondaktem olgeta oli no gat intres blong kasem tijing o jusum blong nomo visitim olgeta, rekodem ol infomesen ia long ap. Rekodem olsem wanem bae yu gohed blong kondaktem olgeta mo wok long olgeta kasem taem oli rere blong lanem moa. Eksampol, tingting blong invaetem olgeta blong saen long wan imel blong kasem ol mesej abaot Jisas Kraes o ol nara gospel topik. Yu save konektem olgeta tu wetem wan memba we i save ansarem ol kwestin mo lukaotem gud intres mo frensip blong olgeta. Setemap wan rimaenda long ap blong jekem olgeta bakegen. Askem sapos oli save eniwan bakegen we i maet gat intres.
Yu save faenem tu ol pipol blong tijim insaed long Prijim Gospel blong Mi ap taem yu yusum ol filta o ol grup blong sendem ol mesej. Hemia i save stap olsem wan gudfala wei blong letem ol pipol i save abaot ol iven olsem ol aktiviti blong wod mo ol seves blong baptaes. Folemap ol invitesen wetem wanwan man o woman blong go long ol iven ia.
Kompanion Stadi
Blong luk se Prijim Gospel blong Mi ap i wan gudfala risos we i save stap blong faenem ol pipol, traem ol aktiviti ia. Taem yu mekem ol aktiviti ia, lisin gud long ol tingting mo filing we yu kasem.
Yusum wan filta, faenemaot ol pipol we oli bin tijim olgeta long tri o moa lesen. Invaetem olgeta blong atendem jos long Sandei we i stap kam.
Krietem wan filta mo faenem olgeta we oli bin gat wan deit blong baptaes mo oli bin atendem jos tu(2) taem finis.
Mekem plan blong sendem mesej long wanwan long ol pipol ia blong joenem wan wod aktiviti o seves projek. Wanwan taem yu maet wantem blong sendem wan grup mesej mo folemap wetem wanwan long olgeta.
Tokbaot wetem kompanion blong yu olgeta we yu filim gud abaot olgeta. Mekem ol plan blong visitim o kondaktem olgeta kwiktaem.
Faenem Pipol Tru long Seves
Givim Ol Janis long Ol Pipol blong Kam mo Givim Seves
Ol pipol oli save gat ol gudfala eksperiens mo konek wetem ol misinari mo ol lokol memba long ol aktiviti blong givim seves. Plante pipol oli hapi blong serem ol talen, ol skil, o ol seves blong olgeta mo i nidim nomo blong invaetem olgeta.
Invaetem ol pipol blong tekem pat long ol aktiviti we wod i oganaesem. Yu save konektem ol pipol tu tru long ol janis blong givim seves olsem olgeta ia long JustServe.org long ples we i gat i stap long hem. Taem yu givim seves wetem ol narawan, yufala i kam tugeta long wan wei we i gat moa paoa long hem.
Givimaot Seves
Olsem Sevya, “[go] olbaot mo mekem gud” (Ol Wok 10:38; luk tu long “Go mo Stap Mekem I Gud” long japta 1). Prea blong luksave ol janis blong mekem gud long wanwan ful dei. Samtaem bae yu plan blong mekem seves, be plante taem bae i no gat plan blong hem. Faenem ol smol mo kwik wei blong givim seves, blong help, mo leftemap pipol. Tingbaot se Lod i tekem ol Janis we yumi no plan from blong tajem laef mo blesem ol narawan.
Givim seves wetem wan tru tingting blong helpem ol pipol. Sapos seves ia i lid i go long wan janis blong tij, stap glad long janis ia. Sapos i no gat, stap glad from yu bin mekem gud long wan. Ansarem ol kwestin sapos ol pipol oli askem ol kwestin ia. Sapos wan i soem intres, givim wan sot ansa mo arenjem blong mit long wan defren taem blong serem wan mesej.
Yu mas folem ol gaedlaen blong givim seves long Misinari Standet blong Ol Disaepol blong Jisas Kraes, 2.7 mo 7.2.
Faenem Wea Ples Ol Pipol Oli Stap
Faenem wea ples ol pipol oli stap i stat wetem traem blong luk olgeta olsem we God i luk olgeta. Tingting olsem se oli bin lidim yu blong go toktok long man o woman ia, o oli bin lidim hem blong i kam long yu. Lukaotem blong andastanem ol nid mo tingting blong ol pipol long saed blong spirit. Faenemaot wanem i moa impoten long olgeta, speseli long rilesensip blong olgeta wetem famli mo God. Yu maet askem ol kwestin olsem olgeta we i stap andanit ia—mo afta lisin wetem wan tru hat:
?Wanem nao i gat moa valiu long yu?
?Wanem nao i givim glad long yu?
?Wanem nao yu wantem long fiuja blong yuwan mo blong olgeta we yu lavem olgeta?
?Wanem ol jalenj nao yu fesem taem yu stap wok blong kasem ol hop mo ol drim blong yu?
?Wanem pat blong fasin long laef blong yu, we yu wantem mekem i kam gud moa?
Lukaotem insperesen taem yu luklukbak long wanem yu lanem abaot ol hop mo ol wanem we man o woman ia i wantem. ?Wanem ol trutok blong gospel we i konek long wanem we hem i wantem?
Tingting long wanem toktok blong talem folem lukluk blong man o woman ia. ?Wanem nao hem i save abaot yu? ?Wanem nao yu save givim we bae i save helpem hem? ?Man o woman ia i filim se wok blong yu wetem hem bae i save wokaot gud?
Tingting long ol defren risen we bae ol pipol oli wantem blong save yu, ol nara memba blong Jos, o Jos ia. Sam long ol eksampol we yu save givimaot oli aotlaenem i stap daon ia.
Pikja
Ol misinari oli stap toktok long wan woman
Givim Ol Eksperiens o Infomesen We Oli Gat Valiu long Olgeta
Yusum ol risos blong Jos mo ol talen blong yuwan mo paoa blong konek wetem ol intres blong wan. Lukaotem help blong Papa long Heven blong givim infomesen o ol eksperiens we i gat valiu long man o woman ia.
Stap lisin long insperesen mo rere blong krietem samting, taem yu tingting abaot ol defren kaen eksperiens o infomesen we yu save givimaot. Sam aedia oli stap long lis daon ia.
Serem wan link we i go long wan risos blong Jos we i provaedem infomesen abaot samting we oli gat intres long hem.
Oganaesem wan iven olsem wan divosen (long wan ples o i laef tru long intanet).
Givimaot wan samting long wan lokol kam tugeta o wan iven (olsem eksampol, krietem ol tri blong famli histri long lokol maket).
Tingting blong tijim wan klas.
Oganaesem wan skripja stadi klas, o askem blong ridim Baebol mo ol nara skripja wetem olgeta.
Tijim Inglis olsem wan nambatu lanwis.
Putum long pablik ol aktiviti blong Jos olsem wan holidei pati o ol klas blong stap dipen long yuwan. Yusum ol flaea o sosol media.
Invaetem olgeta long wan seves blong baptaes.
Askem blong lidim olgeta long wan wokbaot raon long lokol miting haos.
Wan long olgeta eksperiens we i gat moa valiu, we yu save helpem ol pipol blong oli gat i blong atendem wan Jos seves. Invaetem olgeta mo eksplenem long olgeta abaot Jos seves. Talem long olgeta olsem wanem bae sakramen miting i blesem laef blong olgeta sapos oli atendem.
Mekem ol Rilesensip Oli Kam Gud
Plante pipol oli laekem blong mitim ol narawan long komuniti blong olgeta o wantem blong save moa abaot olgeta. Sam pipol oli stap olgetawan nomo. Sam aedia blong helpem mo mekem ol rilesensip oli kam gud oli stap long lis daon ia.
Visitim ol pipol we oli jes muv nomo i kam long eria blong welkamem olgeta.
Soem ol pipol blong komuniti long ol memba we oli gat semmak intres.
Invaetem ol pipol i kam long ol miting, ol aktiviti, mo ol open haos blong wod.
Askem blong helpem olgeta oli konek long wod tempol mo famli histri lida, we oli save helpem olgeta blong lanem moa abaot ol famli memba blong olgeta we oli ded finis.
Askem blong tijim ol pipol olsem wanem blong holem famli haos naet o ridim ol skripja olsem wan famli. (Luk long Jeneral Hanbuk, 2.2.4, blong ol prinsipol we oli save help blong wok long wanem i stap tekem ples long laef.)
Invaetem ol pipol we yia blong olgeta i stret blong atendem seminari, atendem institiut, o tekem pat long BYU–Pathway Worldwide.
I gat plante gudfala wei blong faenem olgeta we oli rere long olgeta blong kasem gospel we i kambak bakegen. Mekem wanem we yu save mekem blong oli putum yu long rod blong olgeta we oli rere long olgeta.
Kompanion Stadi
Faenemaot sam aedia long seksen ia we yu no bin traem yet. Mekem ol plan blong traem ol aedia ia long nekis wik.
Kondaktem Ol Pipol We Oli Givim Nem blong Olgeta long Yu
Ol pipol we oli givim nem blong olgeta long yu oli maet rere blong kasem gospel blong Jisas Kraes. Nem blong ol pipol blong tijim oli save kam long ol memba blong Jos, ol nara misinari, ol hedkwota blong Jos, mo ol wok blong lokol sosol media.
Go Visit Kwiktaem
Taem oli givim nem blong wan man o woman long yu we i kam long ol hedkwota o lokol sosol media, lukluk gud long ol infomesen insaed long Prijim Gospel blong Mi ap abaot ol intres blong olgeta. Kontaktem olgeta kwiktaem.
Pikja
misinari i stap noknok long doa
Yusum ol gaedlaen ia taem yu stap wok wetem ol pipol we oli givim long yu:
Sapos man o woman ia we oli givim nem blong olgeta long yu i kam long wan memba o wan nara misinari, kondaktem hem we i sendem nem i kam long yu blong lanem moa. Sapos ol misinari oli givim nem ia long yu, oli save tij wetem yu tru long intanet sapos misin lida blong olgeta i apruvum. Ol memba oli save stap wetem yu o tru long intanet blong tij.
Traem blong kondaktem man o woman ia kwiktaem tru long wan visit, kol, teks, imel, o nara wei blong komunikesen. Sapos man o woman ia i no ansa, traem blong kondaktem hem long wan defren taem blong dei.
Sapos hem we oli givim nem blong hem long yu i kam tru long kol, teks, o imel, arenjem wan taem blong mitim hem long wan ples o tru long teknoloji.
Olsem wan kompanionsip, luklukbak long rikwes blong man o woman ia mo faenemaot ol nid mo intres blong hem. Tingting blong olsem wanem gospel i save help blong mitim ol nid ia.
Taem yufala i mit, karem eni samting we oli askem i kam, olsem Buk blong Momon. Serem ol trutok blong gospel aot long ol misinari lesen we i mitim ol intres mo ol nid blong man o woman ia.
Samtaem ol pipol we yu kasem nem blong olgeta blong tijim, oli save lidim yu i go long ol narawan we God i stap mekem rere olgeta. Sapos ol pipol we yu kondaktem olgeta oIi nogat intres, askem sapos oli save ol narawan we maet oli gat intres o olgeta we oli nidim hop long laef blong olgeta. Ating oli lidim yu i go long man o woman ia from se i gat wan we i stap long hom o neba ia i rere blong kasem gospel.
Sapos wan apoenmen i no wok aot, tingting long olsem wanem blong mekem nara misinari wok long eria ia. Prijim Gospel blong Mi ap i save helpem yu blong faenem ol pipol we oli stap kolosap we oli bin kondaktem olgeta finis bifo o we oli bin tijim olgeta.
Givim Nem blong Ol Pipol blong Tijim long Misinari long Wan Nara Eria
Taem yu mitim ol pipol we oli intres blong lanem moa abaot gospel be oli stap aotsaed long eria blong yu, tokbaot gospel long olgeta. Afta helpem olgeta i rere blong mit wetem ol misinari mo ol memba long ples we oli stap long hem.
Wetem apruvol blong misin presiden blong yu, yu save gohed blong sapotem ol pipol ia blong helpem olgeta oli kasem gospel (luk long Misinari Standet, 7.5.4).
Kompanion Stadi
Luklukbak long ol nem blong ol pipol we oli bin givim long yufala long eria blong yufala long las manis. Luksave eni pipol we yu no save kondaktem hem, mo traem blong kondaktem olgeta bakegen. Disaed se huia long olgeta we oli bin kondaktem i nid blong visitim hem bakegen. Apdeitem ol rekod ia long Prijim Gospel blong Mi ap.
Pikja
ol misinari oli stap toktok long fon
Yusum Teknoloji
I gat plante wei blong yusum teknoloji blong faenem ol pipol blong tijim. Sam eksampol oli stap long lis daon ia:
Yusum sosol media blong wok wetem ol memba blong fanem ol pipol blong tijim.
Bildim ol rilesensip tru long imel mo sosol media blong konek wetem ol pipol.
Serem ol skripja, ol kwot, mo ol mesej blong gospel we i leftemap tingting.
Helpem ol pipol blong yusum FamilySearch.org blong lanem moa abaot ol famli memba blong olgeta we oli ded finis.
Putumaot ol onlaen klas blong tijim ol skil.
Mekem ol gudfala koneksen blong ol grup we oli save serem intres blong olgeta onlaen.
Krietem wan post we i talem abaot wanem ol iven blog wod we i stap kam antap.
Stap yusum teknoloji i olsem blong kipim “plante laen blong huk insaed long wota” ful dei. Moa long ol nara wok blong faenem pipol, kipim plante intanet laen insaed long wota.
Pikja
Elda David A. Bednar
Elda David A. Bednar i bin tijim: “Teknoloji i givim plante janel we i gat paoa blong yumi save talemaot ‘Jisas Kraes, mo we Hem i ded long kros’ mo ‘prijim fasin blong sakem sin long ol pipol’ [1 Korin 2:2; Doktrin mo Kavenan 44:3]. Jeneresen we i stap kam antap naoia oli rere gud long olgeta blong harem mo lanem gospel we i kambak bakegen tru long ol wei ia blong komunikesen” (“They Should Proclaim These Things unto the World,” seminar for new mission presidents, Jun 24, 2016).
Kompanion Stadi
Faenemaot misin blong yu i stap mekem wanem wetem sosol media. Toktok raon wetem kompanion blong yu olsem wanem yutufala i save krietem ol sosol media post we i save go stret wetem hemia. Ol post blong yutufala i mas folem intanet polisi blong Jos (luk long “Intanet” long seksen 38.8 blong Jeneral Hanbuk).
Sapos misin blong yu i gat wan sosol media speselis, askem hem blong i helpem yu taem yu stap krietem ol sosol media post.
Pikja
tu(2) woman i stap toktok
Yusum Famli Histri
Famli histri i wan nara wei blong yu save faenem ol pipol blong tijim. Raon long wol, Spirit i stap toktok long milien blong ol pipol blong fanemaot ol bubu blong olgeta we oli ded finis. Plante oli wantem wan strong koneksen wetem ol famli blong olgeta we oli longwe long olgeta. Hemia i save lid i go long wan filing blong wantem blong fanemaot wan koneksen mo luksave olsem pat blong famli blong God.
Wanem yumi stap talem se hem i spirit blong Elaeja hem i paoa blong Tabu Spirit we i mekem ol pipol blog luksave, ol pepa wok, mo glad long ol famli memba blong olgeta—tugeta long pas mo long taem naoia (luk long Malakae 4:5–6).
Long wok blong yu blong faenem ol pipol, yu maet talemaot long ol pipol abaot FamilySearch.org o invaetem olgeta blong daonlodem FamilySearch Tree ap o FamilySearch Memories ap. Yu save givim tu long olgeta buklet ia Famli blong Mi: Ol Stori we Oli Karem Mifala I Kam Tugeta. Ol risos ia oli helpem ol pipol blong faenemaot ol famli mo ol bubu mo karem ol stori oli kam tugeta.
Faenemaot ol wanem famli histri risos oli stap long eria blong yu mo olsem wanem oli save helpem ol pipol we yu stap wok wetem olgeta. Wod tempol mo famli histri lida i save helpem ol pipol blong luksave ol bubu blong olgeta we oli ded finis.
Invaetem ol pipol blong serem ol memori blong olgeta we oli lavem wetem yu. Taem oli stap serem, maet bae oli filim Tabu Spirit i testifae long olgeta abaot impoten plan blong God blong ol famli. Ol taem olsem i save lid i go long ol gudfala toktok abaot stamba tingting blong laef, plan blong God blong stap glad, mo rol blong Sevya insaed long plan ia.
Sapos i stret, tijim ol pipol doktrin ia from wanem ol memba blong Jos oli mekem famli histri wok mo olsem wanem i joen wetem ol tempol.
Prea blong luksave ol janis blong yusum famli histri long wok blong yu blong faenem ol pipol. Stap blong save krietem samting, mo kam blong save gud olsem wanem blong yusum ol risos we oli stap.
Skripja Stadi
Stadi long ol skripja we i stap ia abaot famli histri. Rekodem wanem yu lanem.
Paoa blong Silim Famli I Kambak Bakegen Tru long Elaeja
Traem wan o moa long ol aktiviti we i stap blong helpem yu faenem ol pipol tru long famli histri.
Arenjem blong gat visit wetem wan memba we i gat eksperiens wetem famli histri. Lanem tru long wod tempol mo famli histri lida wanem ol seves we i stap.
Praktis olsem wanem bae yu givimaot help long saed blong famli histri long olgeta we yu mitim olgeta. Mekem ol plan blong givimaot famli histri long wok blong yu blong faenem ol pipol.
Rid mo toktok raon long smol buk ia Ol Famli mo Ol Tempol blong gat wan strong andastaning blong famli histri wok. Raetem wanem yu lanem long stadi jenol blong yu.
Yusum smol buk ia Famli blong Mi o FamilySearch.org olsem ol risos taem yu fanem ol pipol blong tijim.
Long ples we i oraet, holem wan open haos, tijim wan famli histri klas long wan pablik ples, o askem blong stap olsem wan we i save givhan long famli histri.
Faenem Ol Pipol Taem Yu Tij
Blong faenem pipol mo tijim pipol i ol aktiviti we oli go tugeta. Ol pipol we yu tijim olgeta oltaem oli gat ol fren o ol famli memba we oli rere blong kasem gospel we i bin kambak bakegen. Taem ol pipol we yu tijim olgeta oli eksperiensem ol blesing blong gospel, filing ia blong olgeta blong wantem serem bae i kam antap (luk long 1 Nifae 8:12). Long evri situesen—olsem blong faenem pipol, tijim, mo wok wetem ol memba—askem, “Yu save huia moa we bae i save glad blong harem mesej ia?”
Taem olgeta we yu tijim oli stap rere from seves blong baptaes blong olgeta, askem olgeta abaot ol famli mo ol fren we oli laekem blong invaetem olgeta long seves blong baptaes blong olgeta. Mekem ol plan blong invaetem mo leftemap tingting blong evriwan blong kam. Yu save filim paoa blong Spirit i strong long taem blong wan seves blong baptaes.
Kompanion Stadi
Luklukbak long wan lis blong ol pipol we yu stap tijim. Mekem wan lis blong olgeta we yu bin askem olgeta blong givim ol nem blong ol pipol long yu mo olgeta we yu no askem olgeta. Praktisim olsem wanem yu save givim wan invitesen long wanwan grup ia blong givim ol nem blong ol pipol long yu. Long plana blong yu, mekem wan not blong mekem invitesen ia long nekis visit blong yu.
Pikja
ol woman oli stap lukluk long fon
Tijim Taem Yu Faenem
Taem yu mitim ol pipol mo faenemaot ol intres mo nid blong olgeta, developem fasin ia blong stat blong tij mo serem testemoni blong yu. Bae yu faenem moa pipol blong tijim taem yu testifae abaot Sevya mo gospel blong Hem mo letem olgeta blong filim paoa blong Tabu Spirit.
Tingting blong stap tijim ol topik olsem hapines, fasin blong agens, stamba tingting blong laef, o ded. Nomata wanem toktok yu talem faswan, yu tanem kwiktaem i go long Sevya mo gospel blong hem, mo singaot blong Hem long Profet Josef Smit. Hemia i wan mesej ia nomo blong yumi long wol.
Ol seksen we i stap ia oli givim ol eksampol blong olsem wanem yu save tij i sot abaot Restoresen blong gospel blong Jisas Kraes mo hamas famli i impoten.
Tij mo Testifae abaot Restoresen blong Gospel blong Jisas Kraes
Testifae abaot Jisas Kraes mo tijim sot lesen abaot trutok we i bin kambak bakegen. Eksampol, yu save testifae abaot gospel blong Jisas Kraes we i bin kambak bakegen long tu(2) o tri sentens nomo:
Afta handred yia we gospel i bin lus, ol trutok oli bin kambak bakegen long wan God we i fulap long lav, tru long profet we i stap laef. Mifala i gat pruf long hemia se yu save holem long ol han blong yu, ridim, mo tingting hevi long hem long hat blong yu. Mifala i invaetem yu blong ridim mo prea blong lanem yuwan trutok abaot hemia. Bae yu save letem mifala blong …
Sapos yu gat smol moa taem, yu save talem moa:
Mesej blong mifala i simpol . God i Papa blong yumi Yumi ol Pikinini blong hem. Yumi pat blong famli blong Hem. Hem i save yumi wanwan mo lavem yumi. Hem i wantem yumi blong eksperiensem glad. Long stat blong wol ia, Hem i bin folem wan paten blong go aot wetem lav blong talemaot gospel blong Jisas Kraes mekem se ol pikinini blong Hem oli save olsem wanem blong go bak long Hem. Hem i bin talemaot gospel long ol profet olsem Adam, Noa, Ebraham, mo Moses. Be plante pipol oli jusum blong sakemaot gospel mo ol profet we oli bin tijim gospel. Tu(2) taosen yia i pas, Jisas Kraes Hemwan i bin tijim gospel blong Hem. Be nomata long hemia, ol pipol oli bin sakemaot Jisas. Afta long ol ded blong ol Aposol blong Jisas, ol pipol i jenisim tru doktrin, olsem Godhed. Oli jenisim tu ol odinens, olsem baptaes.
Invitesen blong mifala long yu i blong ademap moa long ol trutok we yu save finis. Tingting long pruf ia we Papa blong yumi long Heven i kam kamaot bakegen long ol pikinini blong Hem wetem lav mo talemaot tru doktrin mo ol odinens long wan profet. Nem blong profet ia i Josef Smit. Pruf blong trutok ia yumi faenem insaed long wan buk—Buk blong Momon. Yu save holem long ol han blong yu, ridim, mo tingting hevi long ol trutok blong hem insaed long maen mo hat blong yu. Mifala i invaetem yu blong kam long jos blong lanem moa.
Tij mo testifae abaot hamas Famli i Impoten
Tokbaot hamas famli i impoten bae i helpem yu blong faenem ol pipol blong tijim, nomata oli gat wan Kristin bakgraon o no gat Kristin bakgraon. Yu save joenem storian blong yu kwiktaem long wanem plante pipol oli save abaot famli i go plan blong Papa long Heven blong fasin blong sevem man. Maet bae yu talem wan samting olsem:
Famli blong yumi i save givim long yumi paoa blong mekem plante samting long laef. Famli blong yumi i fasem yumi long wanwan long yumi mo i save helpem yumi filim se yumi nidim yumi mo yumi lavem yumi.
Blong gat wan famli we i strong mo i hapi i wan long impoten samting we plante pipol i wantem. Blong gat wan strong mared laef mo resemap ol pikinini long wol blong tedei i save gat bigfala jalenj.
Yu save jenisim mesej long ples ia i go long mesej blong Restoresen:
Yu bin pat blong famli blong God bifo yu bin bon. Hem i Papa blong yumi. Papa long Heven i wantem yumi blong go bak stap wetem Hem. Yu yu pikinini blong Hem mo Hem i lavem yu. Hem i gat wan plan blong helpem yu go bak stap wetem Hem.
Ol trutok ia mo ol narawan oli bin kambak bakegen long wol ia tru long Papa blong yumi long Heven we i fulap long lav long wan profet we i stap laef. Ol trutok ia oli helpem yumi andastanem ples blong yumi insaed long famli blong God. ?Mifala i save tijim yu moa abaot ol trutok ia? ?Yu save atendem jos blong lanem moa?
Kompanion Stadi
Rere long wan minit mesej we yu karemaot long ol lesen we i stap long japta 3. Praktis blong serem lesen ia wetem wanwan long yutufala. Tingting long ol wei we yu save serem mesej ia long taem we yu stap wok blong faenem ol pipol. Mekem plan blong serem long wan gudfala situesen blong invaetem ol narawan blong lanem moa abaot Jisas Kraes.
I No Gat Ol Hadwok I Go Nating
Taem ol pipol oli jusum blong no lanem moa abaot gospel we i bin kambak, ol hadwok blong yu i no go nating. Maet yu bin planem wan sid we bae i gro long wan narafala taem. I no mata hemia i hapen o i no hapen, seves blong yu mo wanem yu stap mekem wetem gudfala lav bae i blesem tugeta, yu mo olgeta.
Sapos ol pipol oli no rere blong kasem gospel, luk wanem bakegen yu save mekem we i blong gud blong laef blong olgeta. Ol rilesensip we yu stap developem oli gohed blong stap gat mining mo valiu. Gohed blong stap olsem wan fren.
Samtaem ol pipol oli nidim taem blong tingting long ol jenis we oli askem long olgeta. Helpem olgeta blong kasem ol mesej tru long ol imel mo websaet blong Jos. Ol mesej ia oli maet help blong mekem rere ol pipol blong akseptem ol invitesen blong lanem moa long taem we i stap kam.
Taem wan man o woman i no akseptem gospel, hem i nomol blong harem nogud. Nomata long hemia, taem yu tanem yu i go long Lod long taem olsem, Hem i bin promes, “!Mi bambae mi mekem yufala i strong! !Mi bambae mi givhan long yufala! !Mi bambae mi blokem gud yufala, mi sevem yufala!” (Aesea 41:10).
Tru fet long Kraes, yu save faenem pis mo gat hop long ol hadwok blong yu. Holemtaet save ia se yu yu huia mo from wanem yu stap givim seves ia long Lod olsem wan misinari. Fet bae i helpem yu blong muv strong i go fored mo gohed blong gat ol tingting we i stret mo gud.
Ol Aedia blong Stadi mo Yusum
Stadi blong Yuwan
Rid long Jon 15:12, Jon 21:15–17, 1 Tesalonaeka 2, mo Mosaea 18:8–10. ?Long wanem wei nao yu yu stap mekem i gud long wok blong yu blong lavem mo givim seves long ol nara man? ?Olsem wanem nao yu save mekem i kam moa gud? Raetem ansa blong yu long stadi jenol blong yu.
Rid long 3 Nifae 18:31–32, Alma 24:7–8, mo Alma 32:41. ?Wanem nao ol ves ia oli tijim abaot stap wok wetem ol pipol we oli bin tijim olgeta finis bifo? Raetem wanem yu lanem long stadi jenol blong yu. Tijim long kompanion blong yu.
Kompanion Stadi mo Jenisim Kompanion
Mekem ol plan blong mitim ol niu memba long eria blong yu. Sapos i gat nid, yusum Prijim Gospel blong Mi ap blong faenem olgeta. Askem ol kwestin olsem olgeta ia:
?Olsem wanem yu yu bin rere from gospel ia?
?Wanem taem mo olsem wanem yu bin gat fas kondak blong yu wetem Jos ia?
?Wanem nao i mekem yu blong yu mitim ol misinari?
?Olsem wanem nao mifala i save sapotem yu blong yu gohed blong stap progres?
?Aot long ol miting ia, yu bin lanem wanem abaot faenem ol pipol we oli progres i go long baptaes? Mekem ol plan blong wok folem wanem yu lanem long wik ia.
Lukluk bak long wanwan blong ol topik ia. Yusum ol lesen we i stap long japta 3, rere long wan simpol toktok blong faenem ol pipol. Praktis blong tijim pipol long wan taem yu faenem olgeta.
Filim wan nid blong save moa wea ples blong go mo wanem i stamba tingting long laef
Wantem blong filim moa kolosap long God
Nidim help blong stap mekem ol impoten desisen
Distrik Kaonsel, Ol Son Konfrens,mo Misin Lidasip Kaonsel
Tokbaot olsem wanem ol aedia ia oli bin helpem ol misinari oli faenem ol pipol blong tijim.
Mekem lis blong ol nara aedia blong faenem ol pipol blong tijim. Invaetem ol misinari blong soemaot ol aedia blong olgeta.
Invaetem ol misinari blong setem ol gol blong olgetawan blong mekem wok blong faenem ol pipol i kam moa gud.
Krietem wan lis blong sam janis blong faenem pipol.
Givim long wanwan misinari wan long ol janis ia. Givim long wanwan misinari faef minit blong rere olsem wanem bae hem i tijim pat blong wan lesen long situesen we oli givim long hem.
Talem gud se i nid blong kipim mesej i stret mo i sot folem taem we i stap.
Invaetem sam misinari blong tijim lesen we oli plan blong tijim long situesen we oli givim long olgeta.
Invaetem ol misinari blong praktis blong tijim wan minit mesej wetem wanwan long olgeta. Yu maet wantem blong setemap plante kaen seting blong faenem ol pipol, olsem tij insaed long hom blong wan memba, tij long wan doa step, tij long saed blong rod, o kondaktem wan we i givim ol nem blong ol pipol blong tijim. Mekem ol misinari oli praktis blong tij long wanwan long ol seting ia.
Ol Misin Lida mo Ol Misin Kaonsela
Setem wan eksampol blong ol memba misinari wok insaed long famli blong yu. Serem ol eksperiens blong yu wetem ol misinari mo ol memba.
Toktok wetem ol lokol prishud mo ol oganaesesen lida abaot ol gudfala wei blong ol misinari oli faenem pipol blong tijim long misin blong yu.
Oganaesem ol misinari divosen blong yu save toktok long ol pipol we oli bin tijim olgeta long misin blong yu. Wok wetem ol lokol prishud lida blong ol memba i save karem ol fren blong olgeta i kam. Invaetem ol niu memba blong serem ol testemoni blong olgeta mo talem ol stori blong olgeta olsem wanem oli kam long Jos, bifo yu toktok.
Wanwan taem go wetem ol misinari blong helpem olgeta blong faenem ol pipol blong tijim.
