Faauuina o e Mamai

Taiala Lautele

E na o e umia le Perisitua Mekisateko e mafai ona faauuina e mama’i pe mafatia foi. E masani lava e toalua pe sili atu i latou o loo umia le perisitua e faauuina le ma’i, ae mafai e le toatasi ona faatinoina uma na o ia le faauuga ma le faamauga pe afai ua tatau ai. Afai e le o i ai se suauu ua faapaiaina, e mafai lava ona tuuina atu se faamanuiaga e ala i le pule o le perisitua e aunoa ma le faauuina.

O se tamā agavaa o loo umiaina le Perisitua Mekisateko e masani lava ona ia faauuina tagata mama’i o lona aiga.

E tatau i uso ona faauu i e mama’i pe a talosaga mai le tagata ma’i po o se tasi o i latou o e o loo matuai popole lava ina ia faamanuiaina e tusa ai ma lo latou faatuatua (tagai Mataupu Faavae ma Feagaiga 24:13–14; 42:43–44, 48–52). O Perisitua Mekisateko o e asiasi atu i le falemai, e le tatau ona talosagaina ni avanoa e faauu ai e mama’i.

Afai e talosagaina e se tagata ni faamanuiaga e sili atu i lo le tasi mo le ma’i lava e tasi, e le manaomia e le o umia le perisitua ona toe faauuina i le suauu pe a maea le faamanuiaga muamua. Ae na te tuuina atu se faamanuiaga i le faaee atu o lima ma le pule o le Perisitua Mekisateko.

O le faauuina o e mama’i e lua ona vaega: (1) faauuina i le suauu ma le (2) faamauina o le faauuga.

Faauuina i le Suauu

O le faauuga e faia e se tagata e toatasi o loo umia le Perisitua Mekisateko. Na te:

1. Faatulutulu sina mataua o le suauu paia i luga o le ulu o le tagata.

2. Tuu faamama ona lima i luga o le ulu o le tagata ma ta’u le igoa atoa o le tagata.

3. Ta’u atu faapea o loo ia faia i le pule o le Perisitua Mekisateko.

4. Ta’u atu faapea o loo ia faauuina i le suauu ua uma ona faapaiaina mo le faauuina ma le faamanuiaina o e mama’i ma mafatia.

5. Faaiu i le suafa o Iesu Keriso.

Faamauina o le Faauuga

E masani lava, e toalua pe sili atu i latou e umia le Perisitua Mekisateko e tuu faamāmā o latou lima i luga o le ulu o le tagata. O le tagata o loo faamauina le faauuga e:

1. Ta’u le tagata i lona igoa atoa.

2. Ta’u atu faapea o loo ia faamauina le faauuga e ala i le pule o le Perisitua Mekisateko.

3. Faaopoopo atu i upu o le faamanuiaga e pei ona taitaiina ai e le Agaga.

4. Faaiu i le suafa o Iesu Keriso.