Faaeeina Atu o le Perisitua ma le Faauuina i se Tofi

O le faatinoina o lenei sauniga e manaomia ai le faatagaga mai se taitai perisitua o loo umia ia ki talafeagai pe o loo galue i lalo o le taitaiga a se tagata o loo umiaina na ki.

Afai e maea ia faatalanoaga ma faamaoniga e tatau ai:

1. O le peresitene o le siteki (po o se tasi i lalo o lana taitaiga) e mafai ona faauuina le tagata i le tofi o le toeaina, e mafai foi ona ia faatagaina se isi o loo umia le Perisitua Mekisateko e faia. E na o e umia le Perisitua Mekisateko e mafai ona tutu i le li’o.

2. O le peresitene o le siteki (po o se tasi i lalo o lana taitaiga) e mafai ona faauuina le tagata i le tofi o le faitaulaga sili, e mafai foi ona ia faatagaina se isi faitaulaga sili na te faia. E na o faitaulaga sili e mafai ona tutu i le li’o.

3. O le epikopo (po o se tasi i lalo o lana taitaiga) e mafai ona faauuina le tagata i le tofi o le tiakono, aoao, po o le ositaulaga. E na o ositaulaga ma i latou e umia le Perisitua Mekisateko e mafai ona fofogaina pe tutu foi i le lio.

Ina ia auai i le faatinoina o se faauuga, e tatau i se tagata ona (1) avea o se ositaulaga pe umia le Perisitua Mekisateko ma (2) i ai le pule lava lea pe maualuga atu foi o le perisitua nai lo lea o le a tuuina atu i le faauuga. Mo se faataitaiga, e le tatau i se toeaina ona tu i le li’o pe a faauuina se faitaulaga sili po o le vaetofiaina foi o se alii i se tofi e moomia ai ona avea ma se faitaulaga sili.

Ina ia faatino se faauuga o le perisitua, e tuu faamāmā e se toatasi pe sili atu o i latou o loo umia le perisitua, o latou lima i luga o le ulu o le tagata. O le e umia le perisitua e faia le faauuga e:

1. Ta’u le tagata i lona igoa atoa.

2. Ta’u atu le pule o loo faatinoina ai le faauuga (Perisitua Arona po o le Mekisateko).

3. Faaee atu le Perisitua Arona po o le Mekisateko, sei vagana ua uma ona faaeeina atu.

4. Faauu le tagata i se tofi o le Perisitua Arona po o le Perisitua Mekisateko ma faaee atu aia tatau, mana, ma le pule o lena tofi. (O ki o le perisitua e le faaeeina atu i le tuuina atu o le perisitua po o le faauuina i se tasi o nei tofi.)

5. Tuuina atu upu o le faamanuiaga e pei ona taitaiina ai e le Agaga.

6. Faaiu i le suafa o Iesu Keriso.

O se faauuga o se avanoa lea e tuuina atu ai se faamanuiaga. O fautuaga ma faatonuga auiliili e masani ona tuuina atu pe a aoao atu i le tagata ona tiute ae le o le taimi o le faauuga.

E le tatau ona faalauteleina atu se faauuga e avea o se sauniga aloaia. E le tau moomia ona fai ni tatalo, molimau, po o faatonuga pe a faauuina se tagata.