Faatonuga Lautele

Mai le Tusitaulima 2, mataupu e 20

O loo otooto atu i lenei lomiga ia faatonuga mo le faatinoina o sauniga ma faamanuiaga o le perisitua. E tatau i peresitene o siteki, epikopo, ma failautusi ona tagai i aiaiga faavae ma tuutuuga o loo otootoina atu i le Tusitaulima 1, mataupu 16, ma le Tusitaulima 2, mataupu 20.

O se sauniga o se faatinoga paia, e pei o le papatisoga, lea e faatino i le pule o le perisitua. O sauniga o le papatisoga, faamauga, faauuina i le Perisitua Mekisateko (mo alii), o le faaeega paia i le malumalu, ma le faamauga i le malumalu e manaomia mo le faaeaga mo tagata faamoemoeina uma. Ua ta’ua ia sauniga o sauniga faaola. O se vaega o sauniga faaola taitasi, e osifeagaiga ai le tagata e tuu atu i ai le sauniga ma le Atua.

O le faatinoina o se sauniga faaola e manaomia ai le faatagaga mai se taitai perisitua o loo umia ia ki talafeagai pe o loo galue i lalo o le taitaiga a se tagata o loo umiaina na ki. O lea faatagaga e manaomia foi mo le faaigoaina ma le faamanuiaina o se tamaitiiti; faapaiaina o se tuugamau; tuuina atu o se faamanuiaga faapeteriaka; ma le saunia, faamanuiaina, ma le tufatufaina atu o le faamanatuga. O e umiaina le Perisitua Mekisateko e mafai ona faamanuiaina le suauu, faauu le ma’i, tuuina atu le faamanuiaga faaletama, ma tuu atu isi faamanuiaga o le faamafanafanaga ma le fautuaga e aunoa ma le sailia muamua o le faatagaga mai se taitai perisitua.

O uso e faatinoina sauniga ma faamanuiaga e tatau ona saunia i latou lava e ala i le ola agavaa ma taumafai ia taialaina e le Agaga. E tatau ona latou faatinoina ia sauniga taitasi po o faamanuiaga i se faiga mamalu, ia mautinoa e ogatasi ma tulaga manaomia nei:

1. E ao ona faatinoina i le suafa o Iesu Keriso.

2. E ao ona faatinoina i le pule o le perisitua.

3. E ao ona faatinoina i soo se faasologa e tatau ai, e pei o le faaaogaina o upu patino po o le faaaogaina o le suauu paia.

4. E ao ona faatagaina e le taitai pulefaamalumalu o le o loo umia ia ki e tatau ai (e masani lava o le epikopo po o le peresitene o le siteki), pe afai e tatau ai e tusa ma faatonuga i le mataupu lenei.

O se taitai perisitua o loo vaaia se sauniga po o se faamanuiaga, e faamautinoaina o le tagata o loo faatinoina o loo i ai le pule e tatau ai o le perisitua, o loo agavaa, ma, iloa ma mulimuli i faasologa e tatau ai. E saili foi taitai ina ia faia le sauniga po o le faamanuiaga ma se aafiaga migao ma le faaleagaga.

Afai e faatinoina ia sauniga po o faamanuiaga i le sauniga faamanatuga, e faamautinoa e le epikopo o loo sa’o lelei le faatinoina. Ina ia aloese mai le faamaina o se tasi e umia le perisitua, e faasa’oina lemu e le epikopo ia mea sese pe afai e le o sa’o elemene taua o le sauniga po o le faamanuiaga.

O i latou e tuuina atu faamanuiaga o le perisitua, e tautala i upu o le faamanuiaga (“Ou te [po o le matou] te faamanuia ia te oe ina ia …”) ae le o le faia o se tatalo (“Le Tama Faalelagi e, faamolemole ia faamanuia lenei tagata ina ia …”).

Auai i Sauniga ma Faamanuiaga

E na o uso o loo umia le perisitua e tatau ai ma o loo agavaa, e mafai ona faatinoina ia se sauniga po o se faamanuiaga, pe tu i le li’o. O i latou o e auai e masani lava ona faatapulaaina na o nai tagata, e aofia ai taitai perisitua, tagata o le aiga e vavalalata sootaga, ma paaga vavalalata e pei o uso o auaunaga. E le fautuaina le valaaulia o ni tagata se toatele o le aiga, uo, ma taitai e fesoasoani atu i se sauniga po o se faamanuiaga. Afai e toatele naua e auai, e mafai ona faigata ma o le a aveesea ai le agaga o le sauniga. O i latou e faatinoina se sauniga ma i latou e pulefaamalumalu e na o le pau na o tagata e moomia. O isi e tapua’ia ma lagolagoina le e fai ma fofoga.

Afai e toatele ni uso e auai i se sauniga po o se faamanuiaga, e tuu faamama e tagata taitoatasi lona lima taumatau i luga o le ulu o le tagata (po o lalo ifo o le pepe o loo faamanuiaina) ma lona lima tauagavale i luga o le tauau o le uso o loo i lona itu tauagavale.

E ui lava e na o se numera faatapulaa o uso e tutu i le li’o pe a tuuina atu se sauniga po o se faamanuiaga i se tagata, e masani lava ona valaaulia tagata o le aiga e mafuta mai.

E uunaia e taitai ia alii agavaa o e o loo umia le perisitua talafeagai e faatinoina pe auai ai i sauniga ma faamanuiaga mo tagata o o latou aiga.

Agavaa e Auai i se Sauniga po o se Faamanuiaga

E na o sē o umia le Perisitua Mekisateko o loo agavaa e umia se pepa faataga o le malumalu e mafai ona avea ma fofoga i le faamauina o se tagata e avea ma tagata o le Ekalesia, faaee atu le Perisitua Mekisateko, faauuina se tagata i se tofi o lena perisitua, pe vaetofiaina foi se tagata e galue i se valaauga faale-Ekalesia.

E pei ona taialaina ai e le Agaga ma faatonuga o i le isi parakalafa, ua i ai i epikopo ma peresitene o siteki le faautautaga e faataga ai i latou e umia le perisitua, o ē le o atoatoa ona agavaa mo le malumalu e faatino ai pe auai foi i nisi o sauniga ma faamanuiaga. Peitai, e le tatau i taitai pulefaamalumalu ona faatagaina lena auai i le faatinoga, pe afai o i ai ni agasala matuia e lei foia a sē o umia le perisitua.

E mafai e se epikopo ona faatagaina se tamā o loo umia le Perisitua Mekisateko e faaigoa ma faamanuia lana fanau tusa lava pe le o agavaa atoatoa le tamā mo le malumalu. E faapena foi, e mafai e se epikopo ona faataga se tamā o sē o avea ma ositaulaga pe o umia foi le Perisitua Mekisateko e papatisoina lana fanau pe faauuina ona atalii i tofi o le Perisitua Arona. I tulaga foi faapena e mafai ai ona faatagaina sē o umia le Perisitua Mekisateko ona tu i le li’o mo le faamauga o lana fanau, mo le faaeeina atu o le Perisitua Mekisateko i luga o ona atalii, po o le vaetofiaina o lona toalua po o le fanau. Peitai, e le mafai ona avea o ia ma fofoga.

Faatinoina o se Sauniga po o se Faamanuiaga i se Isi Uarota

Ina ia avea ma fofoga i le faaigoaina ma le faamanuiaina o se tamaitiiti, papatisoina po o le faamauina o se tagata, faauuina o se tagata i se tofi o le perisitua, po o le faapaiaina o se tuugamau, e tatau ai i se tasi ua umia le perisitua o loo i fafo atu o lana lava uarota ona faaali atu i le taitai pulefaamalumalu se pepa faataga aoga o le malumalu po o se Pepa Faataga e Faia ai se Sauniga lea na sainia e se tasi o lana au epikopo.

Faatinoina o Sauniga e Tagata E I Ai Manaoga Faapitoa ma mo Tagata e I Ai Manaoga Faapitoa

O taiala mo le faatinoina o sauniga e tagata e i ai manaoga faapitoa ma mo tagata e i ai manaoga faapitoa, o loo maua i le Tusitaulima 1, 16.1.8 ma le 16.1.9.

Mo taiala e uiga i le faamatalaupuina o sauniga mo i latou o e logonoa pe faaletonu le faalogo, tagai i le Tusitaulima 1, 21.1.26.

Faaliliuina o Sauniga ma Faamanuiaga

Taiala mo le faaliliuina o sauniga ma faamanuiaga o loo maua i le Tusitaulima 1, 16.1.2.

Faatonuga mo le Faatinoina o Sauniga ma Faamanuiaga

O lomiga nei o loo maua atu ai faatonuga i le faatinoina o sauniga ma faamanuiaga:

1. Tusitaulima 2, mataupu 20

2. Tusitaiala mo le Aiga, itulau 18–25

3. O Tiute ma Faamanuiaga o le Perisitua, Vaega E, itulau 42–47

O le faaaogaina o nei lomiga, e aoao atu ai e taitai perisitua ia uso i le auala e faatino ai sauniga ma faamanuiaga. E faamautinoa e taitai ua tofu e umia le perisitua ma le Tusitaiala mo le Aiga po o le O Tiute ma Faamanuiaga o le Perisitua, Vaega E, ina ia mafai ona i ai lana lava kopi o nei faatonuga.

E le tatau i taitai perisitua ona gaosia pe faaaogaina nisi lomiga o loo tuuina atu ai faatonuga mo sauniga, faamanuiaga, po o tatalo sei vagana ua faatagaina atu e le Au Peresitene Sili ia na lomiga.