Faamanatuga

o se alii talavou o loo tufaina le faamanatuga

O le faatinoina o lenei sauniga e manaomia ai le faatagaga mai se taitai perisitua o loo umia ia ki talafeagai pe o loo galue i lalo o le taitaiga a se tagata o loo umiaina na ki.

Taiala Lautele

E potopoto tagata o le Ekalesia i le Sapati e tapuai i le Atua ma taumamafa i le faamanatuga (tagai Mataupu Faavae ma Feagaiga 20:75; 59:9). I le taimi o lenei sauniga paia, latou te aai ai i le areto ma feinu i le vai e manatua ai le taulaga a le Faaola o Lona tino ma le toto ma toe faafouina ai a latou feagaiga (tagai Mataio 26:26–28; Faaliliuga a Iosefa Samita, Mareko 14:20–25; Luka 22:15–20; 3 Nifae 18; Moronae 6:6).

Faamanuiaina ma le Tufaina o le Faamanatuga

E mafai e ositaulaga ma i latou o loo umia le Perisitua Mekisateko ona faamanuiaina le faamanatuga. O tiakono, aoao, ositaulaga, ma Perisitua Mekisateko e mafai ona tufaina le faamanatuga.

A o lagiina e le faapotopotoga le viiga faamanatuga, o e umia le perisitua o le a faamanuiaina le faamanatuga e tutulai ma le faaaloalo, aveese le ie o loo ufiufi ai ia fata falaoa, ma tofitofi le falaoa ia faaninii mo le taumafaina. A uma ona latou tofitofiina le falaoa, ona latou nonofo lea i lalo ma auai faatasi i le lagiina o le viiga.

A maea le viiga, o le tagata e faamanuiaina le falaoa e tootuli ma fai le tatalo o le faamanatuga mo le falaoa. O tatalo o le faamanatuga na faaalia mai e le Alii (tagai Mataupu Faavae ma Feagaiga 20:77, 79; Moronae 4–5). Ia mautinoa e le epikopo o loo manino, sa’o lelei, ma mamalu le fofogaina. Afai e sese se upu e ta’u e le tagata o loo faamanuiaina le faamanatuga ae na faasa’o e ia lava, e le toe manaomia se isi faasa’oga. Afai e le faasa’oina e le tagata se mea na sese, e faailoa atu e le epikopo e tatau ona toe fofogaina le tatalo ia sa’o.

A maea le tatalo, ona tufatufa atu lea e tiakono po o isi perisitua o le falaoa i le potopotoga i se faiga migao ma le faatulagaina lelei. E talia muamua e le taitai pulefaamalumalu le faamanatuga. O le epikopo (po o se fesoasoani pe a’o toesea o ia) e pulefaamalumalu i le sauniga faamanatuga sei vagana o susu i luga o le tulaga se tasi o le au peresitene o le siteki, se Fitugafulu Eria, po o se Pulega Aoao. E le pulefaamalumalu se fautua maualuga ma e le taliaina muamua foi e ia le faamanatuga.

A o taliaina e le taitai pulefaamalumalu le faamanatuga, e mafai foi e isi o e o loo tufaina le faamanatuga ona savavali atu i nofoaga ua tofi i ai i latou.

A maea ona tauaao atu e se perisitua se fata faamanatuga i se tagata o le au paia, e mafai e isi ona tuufaasolo atu le fata mai le tasi i le isi mo le faafaigofieina.

A uma ona tufaina e uso le falaoa, ona latou toe faafoi atu lea o fata i le laulau faamanatuga. O i latou o loo taitai i le laulau faamanatuga e toe ufiufia ia fata o le falaoa i le ie ae afeese le ie o loo ufiufi ai fata vai. Ona tootuli lea o le tagata e faamanuiaina le vai ma fai le tatalo o le faamanatuga mo le vai (tagai Mataupu Faavae ma Feagaiga 20:79), ma sui le upu vai mo le uaina.

A maea le tatalo, ona tufa atu lea e tiakono po o isi perisitua ia le vai i le potopotoga. A maea, ona latou toe faafoi atu lea o fata i le laulau faamanatuga, e faatali mo i latou o loo taitaia le sauniga e toe ufiufi fata, ona toe foi atu lea ma le migao i o latou nofoaga.