Papatisoga ma le Faamauga

alii o loo papatisoina se tamaitai

O le faatinoina o lenei sauniga e manaomia ai le faatagaga mai se taitai perisitua o loo umia ia ki talafeagai pe o loo galue i lalo o le taitaiga a se tagata o loo umiaina na ki.

Molimau o se Papatisoga

E toalua ositaulaga po o e umia le Perisitua Mekisateko e molimauina ia papatisoga taitasi ma ia mautinoa o loo sa’o lelei ona faatino. E tatau ona toe faia le papatisoga pe afai e le o sa’o lelei le ta’uga o upu e pei ona tuuina mai i le Mataupu Faavae ma Feagaiga 20:73 ma pe afai e le o lilofia atoa le tino po o lavalava o le tagata i le vai.

Faatonuga mo le Faatinoina o se Papatisoga

I lalo o le taitaiga a le taitai pulefaamalumalu, e mafai e se ositaulaga po o se tasi o loo umia le Perisitua Mekisateko ona faatinoina le sauniga o le papatisoga. Ina ia faia, e tatau ona ia:

1. Tu i totonu o le vai faatasi ma le tagata o le a papatisoina.

2. Uuina le tapulima taumatau o le tagata i lona lima tauagavale (mo le faigofie ma le saogalemu); e uu e le tagata o le a papatisoina le tapulima tauagavale o le perisitua i lona lima tauagavale.

3. Sii lona lima taumatau i le sikuea.

4. Ta’uina atoa le igoa o le tagata ma faapea atu, “Ona ua tofia au e Iesu Keriso, ou te papatiso ia te oe i le suafa o le Tama, ma le Alo, ma le Agaga Paia. Amene” (Mataupu Faavae ma Feagaiga 20:73).

5. Ia uu e le tagata lona isu i le lima taumatau (mo le faafaigofieina); ona tuu lea o le lima taumatau o le perisitua ia faamaualuga i le tua o le tagata ma faatofu atoa le tagata i lalo, e aofia ai ma lavalava o le tagata.

6. Fesoasoani e toe faatu a’e le tagata mai le vai.

Faamauga ma le Meaalofa o le Agaga Paia

E faamauina se tagata e avea ma tagata o le Ekalesia ma mauaina le meaalofa o le Agaga Paia pe a uma ona papatiso (tagai Mataupu Faavae ma Feagaiga 20:41). E faatoa avea se tasi ma se tagata o le Ekalesia pe a maea uma sauniga o le papatisoga ma le faamauga ma ua faamaumauina lelei (tagai Ioane 3:5; Mataupu Faavae ma Feagaiga 33:11).

I lalo o le taitaiga a le au epikopo, e toatasi pe sili atu i latou e umia le Perisitua Mekisateko e mafai ona auai i se faamauga. Latou te tuu faamama o latou lima i luga o le ulu o le tagata. O le tagata na te faia le faauuga e:

1. Ta’u le igoa atoa o le tagata.

2. Ta’u atu faapea o loo faatinoina le sauniga i le pule o le Perisitua Mekisateko.

3. Faamauina le tagata o se tagata O Le Ekalesia a Iesu Keriso o le Au Paia o Aso e Gata Ai.

4. Faaaogaina ia upu “Talia le Agaga Paia” (e lē o le meaalofa o le Agaga Paia”).

5. Tuuina atu upu o le faamanuiaga e pei ona taitaiina ai e le Agaga.

6. Faaiu i le suafa o Iesu Keriso.