Ko e Faingāue ki he Mahakí

tāpuakiʻi ʻe ha kau tangata ha fefine

Ngaahi Fakahinohino Fakalūkufuá

Ko e kau maʻu Lakanga Taulaʻeiki Faka-Melekisētekí pē te nau lava ʻo faingāue ki he mahakí pe faingataʻaʻiá. ʻI he angamahení ʻe faingāue ha toko ua pe tokolahi ange ki he mahakí, ka ʻe lava ʻe ha toko taha pē ʻo fakahoko ʻa e tākaí mo e fakamaʻú kapau ʻoku fie maʻu. Kapau ʻoku ʻikai ke maʻu ha lolo tapu, ʻe kei lava pē ke tāpuakiʻi ʻa e tokotahá ʻi he mafai ʻo e lakanga fakataulaʻeikí ʻo ʻikai fai ha tākai.

ʻI he angamahení, ʻoku totonu ke faingāue ha tamai ʻokú ne maʻu ʻa e Lakanga Taulaʻeiki Faka-Melekisētekí ki he kau mēmipa ʻoku puke ʻi hono fāmilí.

ʻOku totonu ke faingāue ʻa e houʻeiki tangatá ki ha tokotaha mahaki ʻi ha kole ʻa e tokotaha ʻoku puké pe ʻanautolu ʻoku nau mātuʻaki hohaʻa ki aí, koeʻuhí ke fakatatau ʻa e faingāué mo ʻenau tuí (vakai ki he Tokāteline mo e Ngaahi Fuakava 24:13–1442:43–44, 48–52). Ko e kau maʻu Lakanga Taulaʻeiki Faka-Melekisēteki ko ia ʻoku ʻaʻahi ki he ngaahi falemahakí ʻoku ʻikai totonu ke nau kole ha ngaahi faingamālie ke nau faingāue ki he kakai mahakí.

Kapau ʻoku kole ʻe ha taha ha faingāue tuʻo ua ki ha faʻahinga puke tatau, ʻoku ʻikai fie maʻu ke toe tākai ʻaki ia e loló ʻe he tokotaha maʻu lakanga fakataulaʻeikí hili ʻa e ʻuluaki faingāué. Ka te ne tāpuakiʻi pē ia ʻi he hilifaki ʻo e nimá pea ʻi he mafai ʻo e Lakanga Taulaʻeiki Faka-Melekisētekí.

Ko e faingāue ki he mahakí ʻoku konga ua: ko hono tākai ʻaki ʻa e loló mo hono fakamaʻu ʻo e tākaí.

Ko Hono Tākai ʻaki ʻa e Loló

Ko e tākaí ʻoku fakahoko ia ʻe he taha maʻu Lakanga Taulaʻeiki Faka-Melekisētekí. Te ne:

1. ʻAi ha tulutā ʻe taha ʻo e lolo tapú ki he ʻulu ʻo e tokotahá.

2. Hili fakamaʻamaʻa hono ongo nimá ki he ʻulu ʻo e tokotahá pea ui e tokotahá ʻaki hono hingoa kakató.

3. Fakahaaʻi ʻokú ne fakahoko ʻeni ʻi he mafai ʻo e Lakanga Taulaʻeiki Faka-Melekisētekí.

4. Fakahaaʻi ʻokú ne tākai ʻaki ia e lolo kuo ʻosi fakatapui ki hono tākai mo tāpuakiʻi ʻo e mahakí mo e faingataʻaʻiá.

5. Fakaʻosi ʻi he huafa ʻo Sīsū Kalaisí.

Ko Hono Fakamaʻu ʻo e Tākaí

ʻI he angamahení, ʻe hilifaki fakamaʻamaʻa ʻe ha ongo maʻu Lakanga Taulaʻeiki Faka-Melekisēteki hona nimá ki he ʻulu ʻo e tokotahá. ʻE fakahoko leva ʻeni ʻe he tokotaha ʻokú ne fakamaʻu ʻa e tākaí:

1. ʻUi ʻa e tokotahá ʻaki hono hingoa kakató.

2. Fakahaaʻi ʻokú ne fakamaʻu ʻa e tākaí ʻaki ʻa e mafai ʻo e Lakanga Taulaʻeiki Faka-Melekisētekí.

3. Foaki mo ha tāpuaki ʻo fakatatau mo e fakahinohino ʻa e Laumālié.

4. Fakaʻosi ʻi he huafa ʻo Sīsū Kalaisí.