“Fakahingoa mo e Tāpuakiʻi ʻo e Fānaú,” Ngaahi Ouau mo e Ngaahi Tāpuaki ʻo e Lakanga Fakataulaʻeikí (2018).
“Fakahingoa mo e Tāpuakiʻi ʻo e Fānaú,” Ngaahi Ouau mo e Ngaahi Tāpuaki ʻo e Lakanga Fakataulaʻeikí.
Fakahingoa mo e Tāpuakiʻi ʻo e Fānaú
ʻOku fie maʻu ki hono fakahoko ʻo e ouau ko ʻení hano fakamafaiʻi mei ha taki lakanga fakataulaʻeiki ʻokú ne maʻu ʻa e ngaahi kī totonú pe ʻoku ngāue ʻi he malumalu ʻo ha taha ʻokú ne maʻu ʻa e ngaahi kī ko iá.
Ngaahi Fakahinohino Fakalukufuá
“Ko e kāingalotu kotoa pē ʻo e siasi ʻo Kalaisí ʻoku ʻi ai haʻane fānau ʻoku totonu ke ne ʻomi ʻa kinautolu ki he kaumātuʻá ʻi he ʻao ʻo e siasí, ʻa ia te nau hilifaki honau nimá kiate kinautolu ʻi he huafa ʻo Sīsū Kalaisí, ʻo tāpuakiʻi ʻa kinautolu ʻi hono huafá” (Tokāteline mo e Ngaahi Fuakava 20:70 Fakatatau mo e fakahā ko ʻení, ko e kau maʻu Lakanga Taulaʻeiki Faka-Melekisēteki moʻui tāú pē ʻe lava ʻo kau ʻi hono fakahingoa mo tāpuakiʻi ʻo e fānaú. ʻOku totonu ke fakahā ʻe he kau taki lakanga fakataulaʻeikí ki he kāingalotú ʻa e fakahinohino ko ʻení, ki muʻa pea toki fakahingoa mo tāpuakiʻi ʻenau fānaú. ʻOku totonu ke feinga ʻa e kau takí ʻi he tapa kotoa pē ke ʻoua naʻa fakamaaʻi pe fakatupu loto mamahi ki ha taha pe ngaahi fāmili, kae kei tauhi pē natula toputapu ʻo e tāpuakí.
ʻI he angamahení, ʻoku totonu ke fakahingoa mo tāpuakiʻi pē ʻa e fānaú ʻi he houalotu ʻaukai mo e fakamoʻoni ʻa e uooti ʻoku ʻi ai ʻa e lekooti mēmipasipi ʻo e mātuʻá.
Ngaahi Fakahinohino ki Hono Fakahingoa mo Tāpuakiʻi ha Fānau
ʻI he taimi ʻoku tāpuakiʻi ai ha pēpē, ʻe tuʻu takatakai fuopotopoto ʻa e kau maʻu Lakanga Taulaʻeiki Faka-Melekisētekí ʻo hapai hake ʻaki honau nimá ʻa e pēpeé mei lalo. Kapau ko ha fānau lalahi ange ʻoku tāpuakiʻí, ʻe lava ke hilifaki fakamaʻamaʻa ʻe he kau tangatá honau nimá ʻi he ʻulu ʻo e kiʻi tamasiʻí pe taʻahiné. ʻE fakahoko leva ʻeni ʻe he tokotaha ʻokú ne fai ʻa e tāpuakí:
-
Fakataufolofola ki he Tamai Hēvaní.
-
Fakahaaʻi ko e tāpuakí ʻoku fakahoko ia ʻaki ʻa e mafai ʻo e Lakanga Taulaʻeiki Faka-Melekisētekí.
-
Fakahā ʻa e hingoa ʻo e kiʻi tamasiʻí pe taʻahiné.
-
Foaki mo ha tāpuaki ʻo fakatatau mo e fakahinohino ʻa e Laumālié.
-
Fakaʻosi ʻi he huafa ʻo Sīsū Kalaisí.