Foaki ʻo e Lakanga Fakataulaʻeikí mo Fakanofo ki ha Lakanga

tangata ʻokú ne maʻu ʻa e lakanga fakataulaʻeikí

ʻOku fie maʻu ki hono fakahoko ʻo e ouau ko ʻení hano fakamafaiʻi mei ha taki lakanga fakataulaʻeiki ʻokú ne maʻu ʻa e ngaahi kī totonú pe ʻoku ngāue ʻi he malumalu ʻo ha taha ʻokú ne maʻu ʻa e ngaahi kī ko iá.

ʻI he taimi kuo kakato ai ʻa e ʻinitaviu ʻoku fie maʻú pea mo hono fakangofuá:

1. ʻE lava ke fakanofo ʻe he palesiteni fakasiteikí (pe ʻe ha taha ʻi he malumalu ʻo ʻene tuʻutuʻuní) ha taha ki he tuʻunga ʻo e kaumātuʻá, pe te ne fakamafaiʻi ha kau maʻu Lakanga Taulaʻeiki Faka-Melekisēteki kehe ke nau fai ia. Ko e kau maʻu Lakanga Taulaʻeiki Faka-Melekisētekí pē te nau lava ʻo tuʻu ʻi he siakalé.

2. ʻE lava ke fakanofo ʻe he palesiteni fakasiteikí (pe ʻe ha taha ʻi he malumalu ʻo ʻene tuʻutuʻuní) ha taha ki he tuʻunga ʻo e taulaʻeiki lahí, pe te ne fakamafaiʻi ha taulaʻeiki lahi kehe ke ne fakahoko ia. Ko e kau taulaʻeiki lahí pē te nau lava ʻo tuʻu ʻi he siakalé.

3. ʻE lava ke fakanofo ʻe he pīsopé (pe ʻe ha taha ʻi he malumalu ʻo ʻene tuʻutuʻuní) ha taha ki he tuʻunga ʻo e tīkoní, akoanakí, pe taulaʻeikí. Ko e kau taulaʻeikí pē mo e kau maʻu Lakanga Taulaʻeiki Faka-Melekisētekí te nau lava ke lea ʻo fakahoko ʻeni pe tuʻu ʻi he siakalé.

Ke kau ʻi he fakanofó, kuo pau ko e tokotahá (1)kuó ne ʻosi hoko ko ha taulaʻeiki pe tokotaha maʻu Lakanga Taulaʻeiki Faka-Melekisēteki mo (2) maʻu ha mafai lakanga fakataulaʻeiki tatau pe māʻolunga ange ʻi he lakanga fakataulaʻeiki ʻoku ʻamanaki ke foaki ʻi he ouaú. Hangē ko ʻení, ʻoku ʻikai totonu ke tuʻu ha kaumātuʻa ʻi he siakalé ʻi he taimi ʻoku fakanofo ai ha taulaʻeiki lahi pe ʻi he taimi ʻoku vaheʻi ai ha tangata ki ha tuʻunga ʻe fie maʻu ai ke hoko ko ha taulaʻeiki lahi.

Ke fakahoko hono fakanofo ʻi he lakanga fakataulaʻeikí, ʻe hilifaki fakamaʻamaʻa ʻe ha maʻu lakanga fakataulaʻeiki ʻe toko taha pe toko lahi ange honau nimá ki he ʻulu ʻo e tokotahá. Pea ʻe fai leva ʻeni ʻe he tokotaha maʻu lakanga fakataulaʻeiki ʻokú ne fakahoko ʻa e fakanofó:

1. Ui ʻa e tokotahá ʻaki hono hingoa kakató.

2. Fakahaaʻi ʻa e mafai ʻoku fakahoko ai ʻa e fakanofó (Lakanga Taulaʻeiki Faka-ʻĒloné pe Faka-Melekisētekí).

3. Foaki ʻa e Lakanga Taulaʻeiki Faka-ʻĒloné pe Faka-Melekisētekí, tuku kehe kapau naʻe ʻosi foaki ia kimuʻa.

4. Fakanofo ʻa e tokotahá ki ha tuʻunga ʻi he Lakanga Taulaʻeiki Faka-ʻĒloné pe Faka-Melekisētekí pea foaki ki ai ʻa e ngaahi totonu, ngaahi mālohi, pea mo e mafai ʻo e tuʻunga ko iá. (ʻOku ʻikai foaki ʻa e ngaahi kī ʻo e lakanga fakataulaʻeikí ʻi hono foaki ʻo e lakanga fakataulaʻeikí pe fakanofo ki ha taha ʻo e ngaahi tuʻunga ko ʻení.)

5. Foaki mo ha tāpuaki ʻo fakatatau mo e fakahinohino ʻa e Laumālié.

6. Fakaʻosi ʻi he huafa ʻo Sīsū Kalaisí.

Ko e fakanofó ko ha faingamālie ia ke foaki ai ha tāpuaki. Ko e faleʻi mo e fakahinohino fakaʻāulilikí ʻoku meimei ke toki fai ia ʻi he taimi ʻoku akoʻi ai ʻa e tokotahá ʻi hono ngaahi fatongiá kae ʻikai ʻi he lolotonga hono fakanofó.

ʻOku ʻikai totonu ke fakalōloaʻi ʻa e fakanofó ke hangē ha fakatahaʻangá. ʻOku ʻikai fie maʻu ke toe fai ha lotu, fakamoʻoni, pe fakahinohino ʻi he taimi ʻoku fakanofo ai ha taha.