Sākalamēnití

talavou ʻoku tufa sākalamēniti

ʻOku fie maʻu ki hono fakahoko ʻo e ouau ko ʻení hano fakamafaiʻi mei ha taki lakanga fakataulaʻeiki ʻokú ne maʻu ʻa e ngaahi kī totonú pe ʻoku ngāue ʻi he malumalu ʻo ha taha ʻokú ne maʻu ʻa e ngaahi kī ko iá.

Ngaahi Fakahinohino Fakalukufuá

ʻOku fakataha ʻa e kāingalotu ʻo e Siasí ʻi he ʻaho Sāpaté ke lotu ki he ʻOtuá mo maʻu ʻa e sākalamēnití (vakai ki he Tokāteline mo e Ngaahi Fuakava 20:75; 59:9 ʻI he lolotonga ʻo e ouau toputapu ko ʻení, te nau maʻu ʻa e maá mo e vaí ko e fakamanatu ʻo e feilaulau ʻaki ʻe he Fakamoʻuí ʻa Hono sinó mo Hono taʻataʻá pea ke fakafoʻou ai ʻenau ngaahi fuakavá (vakai ki he Mātiu 26:26–28Liliu ʻa Siosefa Sāmitá, Maʻake 14:20–25Luke 22:15–203 Nīfai 18Molonai 6:6).

Ko Hono Tāpuakiʻi mo Tufaki ʻo e Sākalamēnití

ʻE lava ke tāpuakiʻi ʻa e sākalamēnití ʻe he kau taulaʻeikí mo e kau maʻu Lakanga Taulaʻeiki Faka-Melekisētekí. ʻE lava ʻo tufa ʻa e sākalamēnití ʻe he kau tīkoní, akonakí, taulaʻeikí mo e kau maʻu Lakanga Taulaʻeiki Faka-Melekisētekí.

ʻI he taimi ʻe hivaʻi ai ʻe he fakatahaʻangá ʻa e himi sākalamēnití, ʻe tuʻu leva ki ʻolunga ʻa e kau maʻu lakanga fakataulaʻeiki te nau tāpuakiʻi ʻa e sākalamēnití ʻi he founga ʻapasia, toʻo ʻa e tupenu ʻokú ne ʻufiʻufi ʻa e ngaahi laulau maá, pea nau pakipaki iiki ʻa e maá. ʻI he hili ʻenau pakipaki ʻa e maá, te nau tangutu leva ki lalo ʻo kau atu ʻi hono hivaʻi ʻo e himí.

Ka hili e himí, ʻe tūʻulutui leva ʻa e tokotaha ʻokú ne tāpuakiʻi ʻa e maá ʻo fakahoko ʻa e lotu tāpuaki ʻo e maá he sākalamēnití. Ko e lotu tāpuakiʻi ʻo e sākalamēnití naʻe fakahā mai ia ʻe he ʻEikí (vakai ki he Tokāteline mo e Ngaahi Fuakva 20:77, 79Molonai 4–5). ʻE fakapapauʻi ʻe he pīsopé ʻoku puʻaki mahino, totonu, pea ʻi he founga fakaʻeiʻeiki. Kapau ʻe fehalaaki hono fakaleá ʻe he taha ʻokú ne tāpuakiʻi ʻa e sākalamēnití peá ne toe fakatonutonu pē ʻe ia, ʻoku ʻikai leva toe fie maʻu hano fakatonutonu. Kapau he ʻikai fakatonutonu ʻe he tokotahá ʻa e fehalākí, ʻoku totonu ke fakaʻilonga atu ʻa e pīsopé ʻoku totonu ke ne toe fakahoko ʻa e tāpuakí ke tonu.

Ka hili hono tāpuakiʻí, ʻe tufa leva ʻe he kau tīkoní pe ʻe ha kau maʻu lakanga fakataulaʻeiki kehe ʻa e maá ki he fakatahaʻangá ʻi ha founga mamalu mo maau. Ko e maʻu mafai pulé te ne fuofua toʻo ʻa e sākalamēnití. Ko e pīsopé (pe ko hano tokoni kapau ʻoku ʻikai ke ʻi ai ʻa e pīsopé) te ne tokangaʻi ʻa e houalotu sākalamēnití tuku kehe kapau ʻoku ʻi ai ha mēmipa ʻo e kau palesitenisī fakasiteikí, ha Fitungofulu Fakaʻēlia, pe ha Taki Māʻolunga ʻi muʻa. ʻOku ʻikai tokangaʻi ʻeni ʻe ha aleaʻanga māʻolunga pea ʻoku ʻikai ke ne fuofua toʻo ʻa e sākalamēnití.

Lolotonga hono maʻu ʻe he maʻu mafai pulé ʻa e sākalamēnití, ʻe lava ke luelue ʻa e toenga ʻoku nau tufa ʻa e sākalamēnití ki he ngaahi feituʻu ne ʻosi vahe angé.

Ko e ʻosi pē hono ʻoatu ʻe he maʻu lakanga fakataulaʻeikí e laulau sākalamēnití ki ha taha ʻo e kāingalotú, te nau lava pē ke tokoni ʻi hano ʻoatu hokohoko ʻa e laulaú ki he toengá.

Ko e hili pē hono tufa ʻe he kau tangatá ʻa e maá, te nau fakafoki leva ʻa e ngaahi laulaú ki he tēpile sākalamēnití. ʻE ʻufiʻufi leva ʻe kinautolu ʻoku nau tāpuakiʻi e sākalamēnití e ngaahi laulau maʻá ʻaki ʻa e tupenu ʻufiʻufí kae toʻo ʻa e ʻufiʻufi ʻo e ngaahi laulau vaí. ʻE tūʻulutui leva ʻa e tokotaha ʻokú ne tāpuakiʻi ʻa e vaí ʻo fakahoko ʻa e lotu tāpuakiʻi ʻo e vaí (vakai ki he Tokāteline mo e Ngaahi Fuakava 20:79), ʻo fetongi e foʻi lea uaine ki he vai.

Ka hili hono tāpuakiʻí, ʻe tufa leva ʻe he kau tīkoní pe ʻe ha kau maʻu lakanga fakataulaʻeiki kehe ʻa e vaí ki he fakatahaʻangá. Hili iá, te nau fakafoki leva ʻa e ngaahi laulaú ki he tēpile sākalamēnití, tatali ke ʻufiʻufi ʻa e ngaahi laulaú ʻe kinautolu ʻoku ngāue aí, pea nau toki tangutu leva ki honau tangutuʻangá ʻi he founga fakaʻapaʻapa.