Ngaahi Tāpuaki Fakaetamaí mo ha Ngaahi Tāpuaki Kehe ʻo e Fakafiemālie mo e Faleʻi

tangata ʻokú ne foaki ha tāpuaki ki ha ʻofefine

ʻOku foaki ʻa e ngaahi tāpuaki fakaetamaí mo e ngaahi tāpuaki kehe ʻi he lakanga fakataulaʻeikí ko ha fakahinohino mo ha fakafiemālie ʻo fakatatau mo e fakahinohino ʻa e Laumālié.

ʻE lava ʻe ha tamai ʻokú ne maʻu ʻa e Lakanga Taulaʻeiki Faka-Melekisētekí ʻo foaki ha ngaahi tāpuaki fakaetamai ki heʻene fānaú. Ko e ngaahi tāpuakí ni ʻe mātuʻaki ʻaonga ia ʻi he taimi ʻe ō ai ʻa e fānaú ki he akó, mali, hū ki he ngāue fakakautaú, pe fehangahangai mo ha ngaahi palopalema makehe. ʻE lava ke hiki tepi ʻe ha fāmili ʻa e tāpuaki fakaetamaí maʻa ʻenau ngaahi lekooti fakafāmilí, ka he ʻikai tauhi ʻa e ngaahi tāpuaki ko ʻení ʻi he ngaahi lekooti ʻo e Siasí. ʻOku totonu ke poupouʻi ʻe he ngaahi mātuʻá ʻa ʻenau fānaú ke nau kolea ʻa e ngaahi tāpuaki fakaetamaí ʻi he taimi ʻoku fie maʻu aí.

ʻE toe lava foki ʻe he kau maʻu Lakanga Taulaʻeiki Faka-Melekisētekí ʻo foaki ha ngaahi tāpuaki ʻo e fakafiemālié mo e faleʻí ki he kau mēmipa ʻo ha fāmili kehe pea mo ha niʻihi te nau kole kiate kinautolú.

Ke foaki ha tāpuaki fakaetamai pe tāpuaki kehe ʻo e fakafiemālié mo e faleʻí, ʻe hilifaki fakamaʻamaʻa ʻe ha maʻu Lakanga Taulaʻeiki Faka-Melekisēteki ʻe toko taha pe toe tokolahi ange honau nimá ki he ʻulu ʻo e tokotahá. Pea ʻe fai leva ʻeni ʻe he tokotaha maʻu lakanga fakataulaʻeiki ʻokú ne foaki ʻa e tāpuakí:

1. Ui ʻa e tokotahá ʻaki hono hingoa kakató.

2. Fakahaaʻi ko e tāpuakí ʻoku fakahoko ia ʻaki ʻa e mafai ʻo e Lakanga Taulaʻeiki Faka-Melekisētekí.

3. Foaki mo ha tāpuaki ʻo fakatatau mo e fakahinohino ʻa e Laumālié.

4. Fakaʻosi ʻi he huafa ʻo Sīsū Kalaisí.