Panagsagana ti Misionario Panag-adjust iti Biag ti Misionario
Daytoy a seksion ket pakagupgopan ti material nga awatem iti online sakbay ti iseserrekmo iti MTC.
Gagangay a mapadasan dagiti baro a misionario ti sumagmamano a tukad [degree] ti stress wenno saan a pannakagin-awa no panawanda ti pamilia, gagayyem, ken dagiti banag a nakairuamanda nga aramiden. Dagiti gagangay a transision ti pannakayakar wenno transfer, dagiti baro a kompanion, ken dagiti baro a naituding nga aramiden [assignment] ket agkasapulanto pay iti sumagmamano a panag-adjust. Agan-anuska kabayatan ti panagsursurom a mangbigbig kadagiti bendision ti panangidatonmo iti biagmo a naan-anay iti Mangisalakan. Laglagipem, kaduaennakanto ti Espiritu bayat ti panangaramidmo kadagitoy a panagbalbaliw ket tulongannakanto iti panag-adjust kadagiti baro a pagrebbengam kas misionario.
Panag-adjust kadagiti Baro a Padas
Kas iti adu a sumsumrek iti baro a situasion, masansan a maipasango dagiti misionario iti uppat a paset [phases], wenno addang, iti panag-adjustda a mainaig iti rikna [emotional adjustment] no sumrekda iti MTC ken no sumrekda manen iti tay-ak ti mision:
Uppat nga Addang [Stages] ti Panag-adjust
|
1 Namnamaen |
2 Panangtakuat iti Saan a Namnamaen |
3 “Maaramidko Daytoy” |
4 Kinatibker ti Rikna |
|---|---|---|---|
|
Mabalin a mariknam ti gagar a sumango iti karit (kitaen iti 1 Nephi 3:7). Mabalin a mariknam nga ad-adda a maawatam ti panggep ken ad-adda a managtalekka iti Nailangitan nga Ama (kitaen iti 3 Nephi 5:13). Mabalin a mariknam ti ragsak ket agur-urayka a maaddaan iti baro a kaam-ammo ken padas iti baro a lugar. |
Mabalin a mangrugi a kailiwmo ti pagtaengan, pamilia, ken gagayyem ken agduaduaka pay iti pangngeddengmo nga agserbi (kitaen iti Alma 26:27). Mabalin a madlawmo dagiti pakakitaan iti bagim gapu iti pannaka-stress, kas iti naisturbo a pannaturog, panagbaliw ti ganas a mangan, wenno alisto a masuron. Mabalin a dimo namnamaen a matakuatam ti bagim a nalaka a mapasakitan ken awanan anus kadagiti annuroten ken namnamaen. |
Mangrugi a dumur-as dagiti paglaingam iti panangisuro ken lengguahe. Masursurom ti agtallugod nga agtungpal kadagiti annuroten ken namnamaen iti mision. Ipakitam ti panaganus iti bagim bayat ti panagsursurom “iti tunggal pammilin” (kitaen iti Isaias 28:10; Mosiah 4:27). Dagiti pisikal a sintomasmo iti stress, no addaanka man, ket mangrugi nga agawan. |
Mariknam ti nagin-awa a panangaramidmo iti inaldaw a trabahom. Mabigbigmo dagiti bukod a pagpigsaam ken panagprogresom. Maawatam no ania ti kayat a sawen ti saan nga agdardaras iti panagbiag (kitaen iti DkK 98:12). Maaddaanka iti dakdakkel a panagtalek iti bagi ken manayonan ti tarigagaymo nga agserbi. |
Dagiti Banag a Maaramidmo Ita
-
Mangsapul kadagiti wagas a pakapagserbiam kadagiti dadduma. Ti aramid ti misionario ket awag nga agserbi. Saanka nga agpokus iti marikriknam a saan a pannakagin-awa no di iti panagserbi kadagiti agkasapulan iti nasayaat a balikas, aramid ti kaasi, wenno pannakakigayyem. (Kitaen iti Preach My Gospel, 168–69.)
-
Kasaom dagiti dadduma maipapan iti daytoy a panag-adjust. Maaddaan iti oras a paglilinnawagan dagiti sumaganad a saludsod a kaduam dagiti nagannak, priesthood leader, wenno nagsublin a misionario a gagayyem:
-
Ania ti masursurotayo manipud kadagiti pagarigan ti Dios iti nasantuan a kasuratan a mangidawdawat kadagiti tao nga agaramid kadagiti banag nga adayo iti mariknada a kabaelanda nga aramiden? (Kitaen iti Exodo 4:10–12; Jeremias 1:6–9; Alma 17:10–12; 26:27; Ether 12:23–27; Moises 6:31–32.)
-
Apay a nasken a maturog ken agriing iti husto nga oras, mangpatalinaed iti nasayaat a nutrision, inaldaw nga agwatwat, ken maaddaan kadagiti bukod a kararag?
-
Kasano a ti panagsurat iti journal ket makatulong kadatayo iti panawen dagiti mapannubok a padas?
-
Ania ti nasayaat nga aramidentayo no saan a maikkat dagiti saan a nasayaat a kapanunotan wenno rikna?
-
-
Basaen ti artikulo a “Preparing Emotionally for Missionary Service” ni Robert K. Wagstaff (iti Ensign, Mar. 2011, 22–26; adda a magun-od iti online at LDS.org).
-
Agpokuska maipapan ti panangpapigsa iti relasionmo iti Nailangitan nga Amam. Gun-odem ti Espiritu babaen ti bukod a panagadal, panagadal iti nasantuan a kasuratan, makaparegta a musika, panagbasa iti patriarchal blessingmo, ken dadduma pay a wagas a nasarakam a makatulong.
-
Agbalinka a nasayaat iti bagim ken iti dadduma. Agsaoka iti isu met la a makaliwliwa, ken nasayaat a balikas nga iti panagkunam ket mabalin nga us-usaren ti Mangisalakan. Laglagipem, dagiti panunoten nga awanen maaramid pay, awanen ti namnama, nalaus a pannakakondena ket saan nga aggapu iti Apo.
-
Namnamaem ti saan a ninamnama. Dagiti padasmo kas misionario ket saanto a maipada iti padas ti maysa a tao. Saanto nga agpapada ti amin a banag kas iti naplanom wenno kas iti panagkunam a nasken koma. Ti panangamirismo kadagiti namnamaem ket makatulongto kenka nga agbalin a prangka ken mannakaawat.
Pakagupgopan
Bayat ti panagserbim iti misionmo, agsaganaka nga umawat iti panagbalbaliw. Ti biag kas maysa a misionario ket nalabit a naidumdumanto ngem iti ania man a banag a mapadasamto pay laeng, ngem no mapanka iti mision nga addaan iti positibo wenno nasayaat a galad, mamatika iti Apo, ken ammom a kasapulan ti panagibtur ken panaganus iti bagim ken iti dadduma, gunggonaan ken bendisionannakanto ti Apo. Laglagipem ti balakad a naited ken ni Propeta Joseph Smith iti narigat unay a panawen iti biagna: “Ammuem, anakko, nga amin dagitoy a banag ipaayandaka iti padas, ket agbalindanto a pagsayaatam” (DkK 122:7).