Dagiti Pagalaan wenno Resources tapno Maipaay dagiti Kasapulan nga Intelektual

Dagiti kasapulan nga intelektual ket sabali ti epektona kadatayo. Dagiti kabaelan nga adda kadatayo ket umdasto tapno maipatungpal ti aramid ti Dios no agtalektayo Kenkuana a pagkaduaenna ti paglaingantayo ken no ania ti kasapulan. Mabalin a makatulong dagiti singasing iti sumagmamano nga isyu. Kasta met nga agibasarka iti seksion ti “Dagiti Sapasap a Pagbatayan tapno Kabaelan a Labanan ti Stress” kadagiti panid 17–22 para kadagiti nayon pay nga ideya.

A

Panagsursuro iti Lengguahe

• Adalen ti Preach My Gospel, kapitulo 7. Nainkararagan a yaplikar daytoy a kapitulo, “Kasano a Nasaysayaat a Masursurok ti Lengguahek iti Mision?”

• Agtultuloyka nga agtrabaho a sipapasnek. Agtalekka iti Apo a bendisionannaka iti sagut ti pagsasao no kasapulam daytoy tapno maipatungpal no ania ti tartarigagayanna. Laglagipem, manmano a misionario ti agbalin a naan-anay a nalaing iti baro a lengguahe. Am-ammonaka ti Apo, inawagannaka, ket usarennanto dagiti pagpigsaam tapno mabendisionan dagiti dadduma. Isunanto ti mangpunno iti pagkapsutam. Itedmo a tulong ti amin a sagut nga adda kenka.

• Maragsakanka nga agsao iti baro a lengguahem. No dadduma nalaklaka nga isao ti baro a lengguahe no ditay namnamaen nga agbalin nga eksperto ti bagbagitayo.

B

Panagtalinaed a Naurnos kadagiti Panggep a Tun-oyen ken Plano

• Usarem dagiti ramit [tools] iti panagiskediul a naited kenka iti Preach My Gospel. Adalenyo ti kapitulo 8, “Kasano a Mausarko a Nainsiriban ti Orasko?” Naannad a napadur-as dagitoy a ramit [tools] para kadagiti misionario ken matulongandakanto iti panggepmo. Saggaysaem nga ipokus dagiti banag, ket saanka nga agdardaras.

• Saanka nga agpannuray iti memoriam laeng. Isuratmo dagiti nagan, adress, appointment, lesson plan, ken panggepmo a tun-oyen. Mangipigketka iti reminder notes para kadagiti napapateg a banag iti ridaw, iti refrigerator, iti abay ti katrem, wenno iti plannermo.

Irekordmo iti plannermo

• Dagiti wagas a pangusaran kadagiti babassit a dagup ti panawen a nainsiriban

• Dagiti plano iti preparation-day

• Dagiti nagan, adres, appointment, lesson plan

• Ikabilmo ti amin a banag a kasapulamto iti sumaruno nga aldaw iti maitudo a lugar sakbay a maturogka. Iti kasta saanmonto a malipatan dagiti napapateg a banag. Idulinmo dagiti napapateg a banag iti maymaysa a lugar tapno saanka a mangsayang iti oras iti panangsapul kadagitoy.

• No masingaka, siaanus ngem sititibker nga iturongmo ti atensionmo iti aramidem. Masansan nga aramidem dagitoy no kasapulam.

• Bay-an a tulongannaka ti Apo kalpasan nga inaramidmon ti amin a kabaelam nga agplano iti dayta nga aldaw. Apaman a naaramidmon ti kabaelam nga aramiden nga agplano a naan-anay, kiddawem Kenkuana nga agkaykaysa a maaramid dagiti banag para iti pagimbagam. Agsaganaka nga agaramid kadagiti panagbalbaliw ken dumngegka iti Espiritu.

“Kas iti nasken a ditayo panangibaba kadagiti pagrukodan [standards] nga impasdek ti Apo para iti galad dagiti katulonganna, saantayo met a napusgan a mangpatanor kadagitoy. … Siguraduem nga awananka kadagiti nangatngato a pagrukodan para iti bagim wenno iti dadduma ngem iti impasdek ti Apo” (“Perfection, Perceptions, Pressures, and Principles” [Provo Missionary Training Center devotional, Mar. 19, 2002], 2–3).

—Elder Cecil O. Samuelson Jr.

C

Saan a Marikna a Nalaing wenno Mannakabael a kas kadagiti Dadduma

• No narigat para kenka ti panagbasa, panagadal, wenno panagiyulo, agan-anuska iti bagim. Masansan nga agsarde-sardengka biit iti damo; kalpasanna in-inut nga agadalka iti sumagmamano a minuto iti at-atiddog nga oras. Isuratmo no ania ti nabasam tapno makatulong kenka a manglagip. Basaem iti napigsa (iti nainnayad) no makatulong daytoy. Padasem ti panagiyulo babaen (ti) panangulitmo kadagiti banag iti napigsa, (2) panangbasa wenno panangisuratmo kadagiti banag iti sumagmamano a gundaway, wenno (3) panagtignay ken panangyakemmo kadagiti banag bayat ti panagsursurom. Kitaem no ania a teknik ti kasayaatan para kenka. Usarem dagiti dadduma pay a pagpigsaan nga adda kenka, kas iti panangkontak kadagiti interesado nga investigator, panag-navigate, wenno panagbalin a naragsak.

  

• Pagtalinaedem ti kinaragsakmo no makaaramidka iti biddut. Kalpasanna padasem manen.

• Sapulem ti pagpigsaan iti maysa a pagkapsutan. No dadduma ti kaadda ti pagkapsutan ket mangisuro kadatayo kadagiti pagpigsaan kas iti kinamanangngaasi, pannakipagrikna, kinaanus, kinapakumbaba, ken panagpannuray iti Apo. No dadduma ti maysa a pagkapsutan (kas iti panagbalin a nalaka a masinga) ket addaan iti pagpigsaan a kumadua iti daytoy (kas iti pannakadlaw kadagiti banag a naliwayan dagiti dadduma). Sapulem dagiti pagpigsaan a mabalin a naggapu manipud kadagiti pagkapsutam.

• No mariknam nga agilemka kadagiti paglaingan ti maysa a tao, ulitem nga ipokus ti atensionmo iti personal a misionmo. Usarem ti pigsam iti panangpadur-asmo kadagiti pagpigsaam ken panangitulongmo kadagitoy iti trabaho. Daytoy ti misionmo. (Kitaen iti Preach My Gospel, 10–11.)