Dagiti Pagalaan wenno Resources tapno Maipaay dagiti Kasapulan nga Espiritual

Kadagiti misionario, ti gagangay a reaksion iti nalaus a pannaka-stress ket ti panagduadua iti pigsa ti pammaneknekda wenno ti kinapudno ti ebanghelio. Daytoy a problema ket masansan a bunga ti kinaawan pagalaan a tulong [resources] tapno kabaelan a labanan ti nalaus a pannaka-stress a saan a ti kinaawan ti pammaneknek. No addaanka kadagiti kasta a pagrigatan, padasem dagiti singasing iti baba a kasla umisu kenka. Kasta met nga agibasarka iti seksion ti “Dagiti Sapasap a Pagbatayan tapno Kabaelan a Labanan ti Stress” kadagiti panid 17–22 para kadagiti nayon pay nga ideya.

A

Panagsursurok a Mangpapigsa iti Pammaneknekko

• Maawatam a napintas dagiti saludsod. Inawat ni Joseph Smith ti adu a paltiing kas sungbat kadagiti napudno a saludsod. Dagiti nasantuan kasuratan, mannursuro ken rason ket makatulong kadagiti sumagmamano a saludsod, ngem ti laeng Espiritu ti mabalin a mangipatalged a napaypayso ti Dios, ken pudno ti Simbaan.

• Maawatam no ania ti pammati. Ti maaddaan iti pammati ket maaddaan iti panagtalek iti naan-anay a kinasayaat, ayat, sirib, ken saan a panangidaddaduma ti Dios, nupay ditayo naan-anay a maawatan. Isuro ni Alma a “ti pammati saan a ti kaadda ti naan-anay a pannakaammo kadagiti banag; ngarud no adda pammatim mangnamnamaka iti banag a saan a makita, ngem pudno” (Alma 32:21). Saanmo a kasapulan ti “naan-anay a pannakaammo” tapno maaddaan iti pammati. Adalem ti Alma 32 para iti tulong iti panangbangonmo iti pammatim. (Kitaen iti Preach My Gospel, 116–17.)

• Agan-anuska. Ti panawen ken padas ket makatulongto kenka a mangrikna iti sumagmamano a banag a makatikaw kenka ita. Laglagipem ti kinuna ni Nephi: “Ammok nga ay-ayatenna dagiti annakna; nupay kasta, diak ammo ti kaipapanan ti amin a banag” (1 Nephi 11:17). Mangrugika iti no ania ti naammuam a pudno babaen ti Espiritu maipapan ti Dios. (Kitaen iti Preach My Gospel, 120.)

• Tungpalem dagiti bilin. Makagun-odtayo iti panagtalek iti Apo no sursuruentayo babaen ti padas ti kinapateg dagiti pannursurona. “No adda agpanggep nga agaramid iti pagayatanna, maam-ammonanto ti maipapan iti isursurok, no aggapu iti Dios, wenno no agsaoak a sisiak” (Juan 7:17).

“Agsukisokkayo a sireregta, agkararagkayo a kanayon, ken mamatikayo, ket agkaykaysa ti amin a banag para iti pagimbaganyo, no magnakayo a sililinteg ken laglagipenyo ti katulagan a nakitulaganyo iti tunggal maysa.”

—Doktrina ken Katulagan 90:24

B

Panagsursuro nga Agbabawi

• Agbalin a napudnoka iti mission presidentmo. No kasapulam ti agbabawi kadagiti nadagsen a basolmo a saan pay a naresolba, kasaom ti mission presidentmo a sibabatad ken sipupudno. Tulongannakanto a mangatur kadagitoy a banag.

• Pakawanem ti bagim kalpasan ti panagbabawi. No nagbabawikan ket mariknam pay laeng ti basol ken bain, laglagipem a pagbabawyantayo ti amin a napalabas a nagbasolan ken nagbiddutan. Agtalekka nga umdasen ti Pannubbot ni Cristo, uray para kenka. Laglagipem a saan laeng a tulong a plano [backup plan] ti panagbabawi. Ti panagbabawi ket plano ti kinaragsak para iti tunggal tao. Siguraduem a dagiti banag a pagdandanagam unay ket dagiti banag a talaga a napateg (kas pagarigan, ti panagprogreso dagiti investigatormo), saan laeng a dagiti banag maipanggep iti bagim (kas iti ipagarup dagiti dadduma maipapan kenka).

  

• Maawatam ti kinapateg ti panagpudno. No mariknam a kasapulan ti mangipudno kadagiti saan unay a nadagsen a basol wenno ulit-uliten ti mangipudno, uray no kalpasan nga impanamnaman kenka dagiti priesthood holder nga umdasen ti panagipudnom, nalabit a nabayag unay ti panangawatmo iti daytoy. Ti panagtultuloy a pannakariknam iti babawi ken liday maipapan kadagiti napalabas a basol ket gagangay ken saanna a kayat a sawen a kasapulam manen ti agipudno. Singaem ti bagim manipud kadagita kasta a pampanunot babaen ti dadduma pay nga aktibidad, ket aramidem ti napanunot a pili a mamati iti pammakawan ti Apo. Liklikam ti sulisog nga agbalin a pagdandanagam wenno pagbainam.

• Kasaom ti mission presidentmo no agtultuloy a marigatanka.

C

Panagsursuro nga Agkararag a Napnuan iti Kaipapanan

• Padasem ti agkararag iti napigsa, uray no iti arasaas laeng. Padasem ti agsagana para iti panagkararag babaen ti panangisuratmo kadagiti saludsodmo wenno pakaseknam. Panunotem nga adda iti sibaymo ti Apo. Kiddawem ti Apo no ania ti maaramidmo para Kenkuana ita nga aldaw; kalpasanna aramidem dagiti ideya nga umay iti panunotmo. No dadduma usarem ti kararagmo laeng tapno agyaman iti Dios para iti amin a nasasayaat a banag a nangparaburanna kenka.

• Adalem ti “Pray with Faith” iti Preach My Gospel. Daytoy a seksion, a masarakan kadagiti panid 93–95, ket mangted kadagiti singasing maipapan ti kararag.

D

Panangsursuro a Mangipateg kadagiti Nasantuan a Kasuratan

• Agkararagka a silalawag para iti tulong a pannakaawat ken pannakaay-ayo kadagiti nasantuan a kasuratan. Usarem ti sumagmamano nga oras ti panagadalmo a mangisurat kadagiti riknam ken reaksionmo, no ania ti masursurom, wenno dagiti naespirituan nga impresion a maawatmo.

• Sublien nga adalen ti “Study Ideas and Suggestions” iti Preach My Gospel. Daytoy a seksion, a masarakan kadagiti panid 22–25, ket mangted kenka kadagiti singasing para iti napatpateg a panagadal iti nasantuan a kasuratan.

Be Still, My Soul: Thy God doth undertake

To guide the future as he has the past.

Thy hope, thy confidence let nothing shake;

All now mysterious shall be bright at last.

Be still, my soul: The waves and winds still know

His voice who ruled them while he dwelt below.

—Hymns, no. 124.

E

Panangsursuro nga Agpannuray iti Espiritu

• Agsursuro nga addaan iti panaganus. Ti panagsursuro a mangilasin iti timek ti Espiritu ket maipada unay iti panagsursuro iti maysa a lengguahe—kasapulanna ti panangaramid, anus, panagpakumbaba, ken panagtallugod a makasursuro manipud kadagiti biddut a saan a sumuko.

• Agsursuro manipud kadagiti sapasap a komperensia. Para kadagiti ideya maipapan iti no kasano a mapadur-as ti bukod a paltiing, adalem dagiti bitla iti sapasap a komperensia maipapan ti daytoy a topiko.

• Adalen ti Preach My Gospel. Naglaon dagiti panid 96–99 kadagiti nayon pay a singasing ken pannakaammo ken pannakaawat [insights] maipapan iti panangilasin ken panagpannuray iti Espiritu.

Dagiti Pagadawan iti Nasantuan a Kasuratan

Adalem dagiti binatog kadagiti sumaganad a panid tapno mapapigsa iti pammatim nga ipaayannakanto ti Dios iti pannakaliwliwa ken tulong. Bayat ti pananglaglagipmo iti Mangisalakan, “agtaeng [kenka] ti Espirituna” (DkK 20:79).

Isaias 41:10	“Dika agbuteng; ta addaak kenka: dika agkullayaw ta siak ti Diosmo: papigsaenkanto; wen, tulongankanto; wen, tapayaenkanto iti akinkannawan nga ima ti kinalintegko.”
Juan 14:27	“Ti talna ibatik kadakayo, ti talna itdek kadakayo: saan a kas iti panangited ti lubong ti panangitedko kadakayo. Saan koma nga agpulkok ti pusoyo ken di agbuteng.”
2 Timoteo 1:7	“Ta saannatay nga inikkan ti Dios ti espiritu ti kinatakrot; no di ti kinatibker, ken ti ayat ken ti naimbag a nakem.”
1 Nephi 1:20	“Ti panangngaasi ti Apo adda kadagiti amin a pinilina, gapu iti pammatida, a nangpakired kadakuada agingga iti pannakabalin ti pannakayawatda.”
Jacob 3:1	“Liwliwaennakayonto kadagiti sagsagabaenyo, ket idawatnanto ti pagsayaatanyo.”
Jacob 4:7	“Impakita kadakami ti Apo a Dios ti pagkapsutanmi tapno ammomi a babaen ti paraburna, ken ti naindaklan nga ikakanunongna kadagiti annak ti tattao, maaddaankami iti pannakabalin a mangaramid kadagitoy a banag.”
Mosiah 4:27	“Ket penkenyo a maaramid amin dagitoy a banag a nainsiriban ken naurnos; agsipud ta saan a masapul nga agtaray ti tao iti naparpardas ngem iti kabaelanna.”
Mosiah 24:13–14	“Yangadyo dagiti uloyo ket maliwliwakayo, ta ammok ti katulagan nga inaramidyo kaniak; ket makitulagak kadagiti taok ken wayawayaak ida iti pannakaadipen. Kasta met a palag-anek dagiti dagensen nga adda iti abagayo, tapno diyo ida marikrikna iti kaaddada iti likudyo, uray pay iti pannakaadipenyo; ket aramidek daytoy tapno agbalinkayo a saksi kalpasanna, ken tapno maammuanyo nga awan duadua a siak, ti Apo a Dios, sarungkarak dagiti taok iti panagsagabada.”
Alma 7:12	“Awatenna ti pagkuranganda, tapno mapno ti lalaemna iti kaasi, a maibatay iti lasag, tapno maammuanna a maibatay iti lasag no kasano nga alawenna dagiti taona a maibatay kadagiti pagkuranganda.”
Alma 26:27	“Idi nalday ti puspusotayo ken dandanitayon agtukiad, adtoy lininglingaynatayo ti Apo, ket kinunana: … ibturanyo ti rigrigatyo, ket itdekto kadakayo ti balligi.”
Alma 38:5	“Agingga nga adda panagtalekmo iti Dios kasta met ti pannakawayawayam kadagiti pannubok, ken kadagiti parikutmo, ken dagiti rigatmo.”
Ether 12:27	“Ket no umasideg kaniak dagiti tao ipakitak kadakuada ti pagkapsutanda. Inikkak dagiti tao iti pagkapsutan tapno agpakumbabada; ket umdas ti paraburko iti amin a tattao a mangipakumbaba iti bagbagida kaniak, ket adda pammatida kaniak, sakonto aramiden a napigsa kadakuada dagiti nakapsut a banag.”
Doktrina ken Katulagan 6:32–36	“Kas iti kaaddak iti tengngayo. … Ngarud, dikayo agbuteng, bassit a pangen; agaramidkayo iti nasayaat; bay-anyo nga agtipon ti daga ken ti impierno a mangbusor kadakayo, ta no nabangonkayo iti batok, saanda nga agballigi. Adtoy, saankayo a kedngan. … Kitaendak iti tunggal panunot; saankayo nga agduadua, saankayo nga agbuteng.”
Doktrina ken Katulagan 58:2–4	“Isu a napudno iti panagtutuok, dadakkelto ti gunggonana iti pagarian ti langit. Diyo makita iti gagangay a matayo, ta iti agdama a panawen, ti panggep ti Diosyo maipanggep kadagitoy a banag a dumtengto kalpasan daytoy, ken ti gloria a sumaruno kalpasan ti adu a panagtutuok. Ta kalpasan ti adu a panagtutuok umay dagiti bendision.”
Doktrina ken Katulagan 122:7–9	“Amin dagitoy a padas ipaayandaka iti padas, ket agbalindanto a pagsayaatam. Ti Anak ti Tao bimmaba iti babaenda amin. … Ngarud, dika bumdeng.”
Bible Dictionary, “Fear”	“Ti umuna nga epekto ti basol ni Adan ket nagbuteng isuna (Genesis 3:10). … Manipud pay idi Pannakatnag, sinursuruanen ti Dios dagiti tao a saanda nga agbuteng, ngem silaladingit nga agdawatda iti pammakawan nga addaan iti naan-anay a panagtalek iti yaawatda iti daytoy.”
Dagiti dadduma pay a pagadawan iti nasantuan a kasuratan: