Tuhaa haapiiraa 2
Haaparare i te mana‘o ma te here
Te fâ o te tuhaa haapiiraa
I te roaraa o teie tuhaa haapiiraa, a tauturu i te mau melo o te piha haapiiraa ia:
-
Maramarama e, a riro ei ratou mai te Mesia ra te huru e a tamata ai i te tauiraa i te aau, e tupu rahi mai to ratou hiaai e to ratou aravihi no te tauaparau ma te maitai e te tano.
-
Haapii mai i te mau aravihi no te haaparareraa mana‘o o te riro i te faarahi i to ratou aravihi no te maramarama mai e no te faahiti atu i te mauiui o te aau.
-
Maramarama e, na te huru Mesia e te haaparareraa mana‘o tano e aupuru i te faaipoiporaa.
Te here e te haaparareraa mana‘o tano
Ua haapii mai te mau peropheta e te mau aposetolo i te mau mahana hopea nei e, e mea ti‘a i te mau metua ia here te tahi i te tahi e ia here raua i ta raua mau tamarii: « E hopoia mo‘a ta te tane faaipoipo e te vahine faaipoipo no te here ia raua iho e i ta raua atoa ra mau tamarii ».1
Te haaparareraa mana‘o i roto i te faaipoiporaa, o te mau mana‘o ïa, te mea i te aau, te mau raveraa, e aore râ te hinaaro ta te tane e ta te vahine e faaite mai i te tahi e te tahi ma te reo anei e aore râ aita. O te haaparareraa mana‘o tano te hoê faaiteraa i te here. E faaherehere te haaparareraa mana‘o tano i te faaroo e te faatura i te tahi e te tahi, e faaiti te reira i te mau mârôraa, e e faarahi ho‘i te reira i te here, ma te iriti i te mau opani no te tomo atu i te faito teitei o te poihereraa taata. E nehenehe ta te mau hoa faaipoipo e haapii mai ia haaparare i te mana‘o ma te aravihi rahi.
Ua haapii mai te peresideni Spencer W. Kimball no te faufaa o te haaparareraa mana‘o tano:
« E ohipa maere i roto i te mau parau tano. Te hoê pae o te taata e faaohipa maitai nei i te reira, te tahi pae o ratou e faaohipa nei i te reira ma te haapa‘o ore.
« E rave‘a te mau ta‘o no te haaparareraa mana‘o, e e mana‘o hape te tae mai no te hoê ta‘o hape. O te arepurepuraa e te maramarama-ore-raa te faaotiraa o te reira. Na te mau ta‘o e faahoho‘a i to tatou iho oraraa e o te reira te tauihaa no ta tatou ohipa, te faaiteraa i to tatou mau taamuraa, e te tapa‘opa‘oraa no to tatou nuuraa. Na te mau ta‘o e haaputapû i te aau e na te reira atoa e faatahe i te roimata aroha. No roto mai te mau ta‘o i te aau e aore râ i te haavare. E rave rahi o tatou e ere nei i te mau ta‘o e, i te hopea, e tano-ore-rii ta tatou paraparau ».2
Te faito rahi o te mau fifi haaparareraa mana‘o
I te hoê titorotororaa na rotopu i te mau taata faaipoipo e 21 501, o David H. Olson, te hoê tahu‘a manava no te haapiiraa tuatoru University of Minnesota e to’na apee ia Amy K. Olson, ua ite mai raua e, ua riro te haaparareraa mana‘o i te hoê o te 10 ofa‘i turoriraa no te manuiaraa o te faaipoiporaa. 82 i ni‘a i te hanere o te mau taata faaipoipo tei hiaai i te faaroo pinepine mai i te mea i te aau o te hoa faaipoipo. No te tahi mau pueraa pahonoraa tei tu‘ati i te haaparareraa mana‘o, noa’tu aita i roto i nau ahururaa, tei ni‘a roa ïa i roto i te ana‘iraa. 75 i ni‘a i te hanere o ratou tei tafifi i te ani atu i te hoa faaipoipo i te mea ta’na e hinaaro ra, 72 i ni‘a i te hanere tei mana‘o e, aore roa ona e taahia ra, 71 i ni‘a i te hanere tei parau mai e, aita te hoa faaipoipo e paraparau mai i ta’na mau uiraa e aore râ ta’na mau fifi, e 67 i ni‘a i te hanere tei parau mai e, e taiâ ratou i te mau parau a te hoa faaipoipo.3 Ua ite-atoa-hia mai na roto i te titorotororaa e, o te « haaparareraa mana‘o au » te tapa‘o matamua no te hoê faaipoiporaa oaoa.4
Tamaru i te aau
E nuu rahi atu te mau taata faaipoipo i roto i te mau aravihi no te haaparareraa mana‘o ia vai te aau paruparu e te hinaaro ia faaore i te hape e na reira atoa ia ani i te tatarahapa. E nehenehe ta te hoê taata ia tamaru i te aau noa’tu te mea ta te hoa faaipoipo e ma‘iti i te rave.
O Victor Cline, te hoê tahu‘a manava e melo ho‘i o te Ekalesia, ua faataa mai oia e: « ua ite mai au na roto i te mau matahiti e 30 ta’u i rave no te tauturu i te mau faaipoiporaa e, eita te haapiipiiraa i te mau rave‘a apî o te haaparareraa mana‘o, eita atoa te haereraa i te mau haapiiraa no te faaaravihi mai i te pae o te auraa, e aore râ te tai‘oraa i te mau buka maitai no ni‘a i te reira, eita ho‘i te reira e rapaau mai i te faaipoiporaa mauiui maori râ e ohipa mai te mau taata faaipoipo no te faatupu i te aau paruparu e aore râ e tamaru mai ratou i to ratou aau. E ti‘a i teie tamaruraa ia tupu i te aau o na hoa faaipoipo toopiti, noa’tu no te tahi te hape rahi i fifi ai. Inaha ho‘i eita roa e nehenehe ta outou e faahepo i te hoa faaipoipo ia taui mai, e nehenehe râ ta outou iho e taui mai. E nehenehe ta outou e ma‘iti ia here e ia faaore i te hape noa’tu te mea e tupu faahou mai. E i te faaotiraa, e taui mai te huru o te hoa faaipoipo e na reira atoa no ta’na mau raveraa ».5
Te parau nei te mau papa‘iraa mo‘a e, e tu‘ati te huru haaparareraa mana‘o a te taata i to ratou iho huru mau. Ua haapii Iesu, « Area ta te vaha e haapuai mai, no roto mai ïa i te aau » (Mataio 15:18). I roto i ta’na episetole, ua parau mai Iakobo e, « E ia ore te hoê taata ia hapa i te parau ra, e te taata paraut-tia oia, e tia ia’na ia tapea i te tino atoa ra » (Iakobo 3:2). No te haamaitai mai i te haaparareraa mana‘o, e titauhia te mau tauiraa hohonu i roto i te huru mau, i roto i te mana‘o, i roto i te aau, e i roto i te raveraa. Ei feia apee i te Mesia, e imi tatou ia riro mai Ia’na ra te huru, mai Ta’na i faaue mai i te taime a haapii ai i te mau pĭpĭ i rotopu i te ati Nephi: « Eaha to outou huru e au ai ? Amene, e parau atu vau ia outou, mai to‘u nei ïa » (3 Nephi 27:27).
Haamaitai i te haaparareraa mana‘o
Te mau parau a‘o i muri nei, no te tauturu ïa i te mau taata faaipoipo ia haamaitai mai i te haaparareraa mana‘o i roto i te faaipoiporaa.
Faaore i te huru paparauraa e vavahi i te tahi
Na roto i te mau matahi e 20 ta’na i ratere no te tuatapapa mai i te raveraa i rotopu i te mau taata faaipoipo, ua ite mai te tahu‘a manava John Gottman i te mau rave‘a haaparareraa mana‘o e maha o te faaino pinepine ra i te faaipoiporaa:
-
Te faahaparaa: « faainoraa i te taata e aore râ i to’na huru… ma te parau faahapa ».
-
Te tahitohitoraa: parau-ino-raa e aore te taahiraa i te hoa faaipoipo i raro ; faaiteraa na roto i te mau parau e aore râ na roto i te mau raveraa e, e faariro roa i te hoa faaipoipo ei taata « maau, e te hairiiri, e te ite ore, e te maamaa ».
-
Te imi-haere-raa i te paruru: Pahono noa ma te imi-haere-raa i te paruru i te ohumuraa, te faahaparaa, e te tahitohitoraa, na roto ïa i te faatororaa i te tahi, e te tapuniraa, e te mârôraa, e te ta‘iraa, e aore râ te faaho‘iraa atu i te hape e aita a‘e ra e tamata rii i te faaafaro i te fifi.
-
Te pahono-ore-raa: Otoheraa i te pae tino e te mana‘o ho‘i mai te auraa e te hoa faaipoipo ia tupu mai te mârôraa, e riro atu ai mai te hoê patu ofa‘i.6
No te tahi tane faaipoipo e te tahi vahine faaipoipo, e parau vave mai ratou e aore râ e rave vave mai i te tahi mea o te tapu roa mai i te taura no te paraparauraa e te faarooraa. E mau roa mai te mau raveraa hape na roto i te mau matahi i te tapiti-haere-raa e i te haapapûraa. A taime rii, e aano roa mai te mau fifi, e na te hoa faaipoipo e haataupupu mai i te haaparareraa mana‘o no to’na iria, to’na mana‘o ino, to’na taahoa, to’na ino, e aore râ to’na tau‘a-ore-raa. No teie mau taata faaipoipo e ta ratou mau fifi, e hinaarohia i te tauturu a te feia toro‘a i te pae faaroo e i te pae tivira. No te mau taata faaipoipo, mai te peu te vai ra te ofa‘i turoriraa i roto i te faaipoiporaa, e ti‘a ia ratou ia hi‘opo‘a i te huru ratou e paraparau ra i te tahi e te tahi e ia hi‘opo‘a atoa i te tumu no te reira, ma te faaafaro i te mau fifi i raro a‘e i te reira.
Teie faahou te tahi mea no te faaore i te mau rave‘a haaparareraa mana‘o vavahi, e ti‘a i te mau taata faaipoipo ia faatupu rahi mai i te haaparareraa mana‘o haamanuia. « 5 no te 1, [o te ] faito tahutahu ïa » ua na ô mai Gottman. Ia tupu mai te mana‘o au e te raveraa au ho‘i e pae a‘e taime hau i te mana‘o faanono‘a e te tau‘a-ore-raa, « e afaro au mai te faaipoiporaa ».7
I roto i ta’na titorotororaa, ua ite mai Gottman e, te mau taata faaipoipo oaoa, e aau tae to ratou no te tahi e te tahi. I muri nei te mau mea ta teie mau taata i rave no te faahoa maitai i roto i te faaipoiporaa:
-
Faaroo i te mau parau a te hoa faaipoipo.
-
Faaite i te taamuraa na roto i te tahi ohipa au, tape‘a i te rima, faaite i te here.
-
Faaite i te mana‘ona‘oraa no te tahi na roto i te mau ohipa rii, na roto i te mau tao‘a aroha, e na roto i te mau taniuniuraa.
-
Faaite i te mauruuru ma te parau roa’tu i te reira, ma te haafaahiahia i te tahi, ma te teoteo i te hoa faaipoipo.
-
Faaite i te mana‘o aroha a aehuehu ai te hoa faaipoipo.
-
Aroha atu, ma te faaite e, ua maramarama e ua papû i te mea e vai ra i te aau o te hoa faaipoipo.
-
Farii noa, faaite i te hoa faaipoipo e, e fariihia e e faaturahia ta’na mau parau noa’tu aita te mana‘o e tu‘ati ra.
-
Parau hauti haere e arearea haere ma te ore e iria mai.
-
Faaite atu i te oaoa ia oaoa e ia mauruuru te tahi.8
Noa’tu ho‘i te fâ hopea ia ore mai te ino i rotopu i na hoa, e tamata atoa te mau taata faaipoipo ia rahi mai i te raveraa au i roto i te faaipoiporaa ia iti mai ho‘i te tau‘a-ore-raa.
Ia ite e ia farii te taa-ê-raa
Te rave nei te tahi pueraa taata mai te mea ra e, aita atu ta te hoa faaipoipo ohipa maori râ ia feruri e ia rave mai ta’na e hinaaroa ra. Ia ite mai te mau taata faaipoipo, ia farii e ia oaoa ratou te tahi i to te tahi taa-ê-raa, e tupu rahi mai te maramarama e te haapa‘oraa i to te tahi hinaaro e huru raveraa.
E rave rahi buka e irava a te mau aivanaa o te faahiti nei i te taa-ê-raa i rotopu i te tane e te vahine, no ni‘a ihoa râ i te huru e te rave‘a no te haaparareraa mana‘o. To’na tanoraa, te vai nei te taa-ê-raa i rotopu i te mau taata toopiti atoa. Maa taata papa‘i e maa aivanaa ho‘i o te parau nei e, te haafaufaa roa nei te vahine i te mana‘o a vetahi, te tu‘atiraa e vetahi, e te tahoêraa ia vetahi, no reira, e feruri ratou i te mau fifi ma te imi i te mana‘o tu, ma te faaroo, ma te uiui, ma te faaite atu i te mea i te aau, e ma te faaite atu ho‘i i ta ratou iho mau fifi. Ta ratou atoa râ e parau nei no te tane, te haafaufaa roa nei te tane i to’na noa mana‘o, te tiamâraa, te ti‘araa, e te mana faatere, no reira, e feruri ratou i te mau fifi ma te faaû i te reira, ma te a‘o atu, ma te haapapû ia vetahi, e ma te faaite i te rave‘a.
Inaha ho‘i te anaanatae rahi o te nunaa no teie mau buka e irava, area râ, e taui haere mau te taa-ê-raa tei faaitehia ra mai te hoê taata i te tahi taata e mai te ta‘ere o te fenua i te tahi atu. Na te huru sotaiete, te mea e haapiihia ra i te utuafare, e te mau toro‘a ohipa e arata‘i nei i te feruriraa o te taata e na reira atoa i te huru haaparareraa mana‘o e te tu‘atiraa i te tahi. E mea ti‘a i te tane faaipoipo e te vahine faaipoipo ia maramarama e, e rave‘a ê ihoa ta tera e tera taata no te paraparau mai. Eiaha roa teie mau taa-ê-raa e riro ei hoê tapearaa ; e nehenehe râ ta te taa-ê-raa i roto anei i te aparauraa e aore râ i roto i te pahonoraa i te hoê ohipa, e riro mai i te hoê puai i roto i te faaipoiporaa.
Hi‘opoa i te mau rave‘a mana‘o vavahi
E tafifi te mau taata i te haaparare-au-maitai-raa i te mana‘o mai te mea e mana‘o faanono‘a to ratou i te tane faaipoipo e aore râ i te vahine faaipoipo. E mea pinepine i te mana‘o faanono‘a i te faahuru ê–e ti‘a i te taata hoê ia faarahi mai i to’na iho puai a rotahi ai oia i ni‘a i te paruparu o te hoa faaipoipo. E nehenehe ta te mau melo o te piha haapiiraa e faatano na mua i te mana‘o huru ê e vai ra i roto ia ratou ma te imi i to ratou mana‘o–te pae hape o te reira, ma te mata i te mana‘o pato‘i i raro a‘e i te maramarama apî, e ma te feruri e, e mana‘o maitai to te hoa faaipoipo i muri i taua huru ra. E nehenehe atoa ta ratou ia pure i te Fatu ia tauturu mai ia hi‘o i te hoa faaipoipo mai Ta’na e hi‘o ra ia’na. Te tahi taime, mai te mea e paraparau maru te hoa faaipoipo i te tahi, e tupu mau ihoa te mana‘o au maitai e te mea au maitai i te aau.
Ua ite mai Gottman e, e faatupu pinepine mai te mana‘o vavahi i te mauiui i te aau e aora râ i te riri ti‘a ; e tena e tupu otahi mai e aore râ e tupu toopiti mai.9 O ratou tei mauiui, e riaria atu ïa i te hoa faaipoipo ; e mana‘o mai ratou e, ua faahapa-tano-ore-hia mai au, ua faainohia, e aore râ te au-ore-hia ra vau. No te riaria rahi o te tahi, aita atura ratou e paruru faahou ia ratou iho. E auraro ratou ia vai noa ei taata mauiui, e e faaohipa ratou i tera ti‘araa no te faarue i te hopoia ia faaora mai i to ratou faaipoiporaa.10
O tei riri ti‘a mai, e tupu mai ïa i te aau i te « mana‘o enemi e te faanono‘a » i te hoa faaipoipo no to’na haapeperaa mai. I to ratou aau, ua ti‘a roa to ratou iria e i te tahi taime ua hinaaro roa ho‘i i te tairoiro. O te taata e vai ra te mauiui e te iria i te aau, eita ïa e hinaaroa roa i te faaohipa mai i te aravihi no te haaparareraa mana‘o maitai. Aita ratou e hinaaro i te faaroo e i te haamaramarama a‘e.11
E mea maitai ia feruri te taata i to’na mau hinaaro i roto i te faaipoiporaa, tera râ no te tahi o te mau hoa faaipoipo, e mea haapa‘o noa ïa ia’na iho e e vai noa to’na feruriraa i to’na noa maitai. E faahapa a‘e ratou i te tahi ma te ore roa’tu e amo rii mai i te hopoia no te mau fifi, e aore râ e haavare mai ratou e e huna ho‘i i to ratou mau raveraa. E faanono‘a ratou e aore râ e faaino i te hoa faaipoipo no te mea aita ratou e pahono nei i ta ratou mau hinaaro.
I te tahi taime, e teimaha roa mai te aau o te taata no to’na taahoa ia’na iho e aore râ i to’na hoa faaipoipo, e riro atura oia i te maniania noa, e imi haere i te paruru, e aore râ e otohe roa mai e e haamata i te pahono-ore-mai. Aita atura te haaparareraa mana‘o maitai e ti‘a i te faatupu mai i reira.
A faaohipa i te aravihi no te haaparareraa mana‘o maitai
E nehenehe ta te vahine faaipoipo e te tane faaipoipo e raverave rii mai e e haapuai mai i te mau aravihi o te riro i te tauturu ia’na ia haaparare maitai mai i te mana‘o. A taui ai ratou i te mau rave‘a haaparareraa mana‘o vavahi tahito i te rave‘a faaauraa apî e te maitai a‘e, e hamani mai ratou i te hoê vahi maitai a‘e e riro i te arata‘i i te tauiraa aau tei faahitihia i roto i teie tuhaa haapiiraa. Teie râ, te peehia nei te haaparareraa mana‘o aravihi e te tahi mana‘o ri‘ari‘a. Ia haamatara te tane faaipoipo e te vahine faaipoipo i te reni no te haaparareraa mana‘o, e hau ratou no te faaite mai i te hohonu o te aau, ta ratou i taiâ na i te paraparau mai na mua a‘e. E faura mai paha te mau taa-ê-raa ; e hiti mai paha te mârôraa. Teie râ, e maue oioi atu taua huru pe‘ape‘a ra. E ore mai te mau vahi pepe o te auraa ia maramarama ana‘e te mau taata faaipoipo i te tahi e ia farii ho‘i i te reira. E nehenehe ta te mau fifi e afaro mai ia tauaparau ana‘e te mau taata faaipoipo ma te aravihi e te tapa‘o itea.
I muri nei, te mau aravihi e tauturu i te mau taata faaipoipo ia haamaitai i te haaparareraa mana‘o.
Tau‘a e faaroo maite ia paraparau mai te hoa faaipoipo. E nehenehe ta te taata e faaite i te mana‘ona‘oraa ma te ore e paraparau, na roto ïa i te hi‘o-maite-raa i te tahi e na roto i te faaroo-maite-raa i te mau parau ma te ore e nevaneva e ma te ore e haafiu.
Ia pe‘ape‘a te hoa faaipoipo e aore râ ia hinaaro oia i te paraparau, e mea ti‘a i te tane faaipoipo e aore râ te vahine faaipoipo ia vaiiho i ta’na iho mana‘ona‘oraa e ia faaroo atu. Mai te peu e taime fifi no te faaroo maite, e mea ti‘a i na taata faaipoipo ia faanaho i te tahi a‘e taime i muri iho no te faaoti i te tauaparauraa. Ia faaroo te tahi i te tahi, e mea ti‘a i te mau taata faaipoipo ia ara i te mea ta’na e rave ra e to’na tino e e mea ti‘a ia’na ia faaite mai e, te faaroohia ra ma te pahono e te upoo e aore râ ma te parau, « ah », « e pai », e tera mau huru pahonoraa. Ua a‘o mai Elder Russell M. Nelson no te Pŭpŭ no te Tino Ahuru Ma Piti: « E mea faufaa ia ravehia te tahi taime paraparauraa ia vai te mau reni au no te haaparareraa mana‘o. Mai te peu e, o te faaipoiporaa te auraa matamua i roto i te oraraa, no’na ïa te reni matamua ! »12
Ui atu. E nehene ta te taata e titau i to’na hoa faaipoipo ia paraparau ma te ui atu ia’na « Te pe‘ape‘a nei oe. E paraparau taua no te reira ? »
Te vai ra te tane faaipoipo e te vahine faaipoipo o te ape nei i te mârôraa e o te feaa nei i te parau atu i te mana‘o i to ratou aau, no te taiâ ho‘i ia tupu mai te tu‘ato-ore-raa. No tera tumu, eiaha ratou e faaite i te parau atâta i te tahi e te tahi. Teie râ, eita te inoino i te aau e taui mai maori râ ia tauaparauhia te reira. E nehenehe ta te taata hoê e to’na hoa faaipoipo e tauaparau i taua mau mea atâta ra na roto ïa i te aniraa i te tahi to’na mau mana‘o i te aau ma te hinaaro mau ia maramarama mai i te reira. I te taime e maramarama mai te tahi i to te tahi hi‘oraa, e nehenehe ta raua e ohipa no te imi mai i te mau pahonoraa.
Faaroo maite. E taata faaroo maite te taata e roaa ia’na i te faahiti faahou te mea ta’na e faaroo ra. Ia faahiti faahou mai te taata, te faaite ra ïa oia i to’na mana‘ona‘oraa e to’na hiaai ia maramarama mai i te parau o te taata e paraparau ra. Mai te peu aita i papû maitai te mea ta’na i faaroo, e nehenehe ta te taata paraparau e haamaramarama mai.
E nehenehe ta te tane faaipoipo e ta te vahine faaipoipo e parau, « Heru na, e tamata rii au ia faahiti papû i te mea ta oe i parau mai ». (Hi‘oraa: « Ua mauiui oe no te mea aita vau i paraparau ia oe na mua i te hoo mai i te parahiraa maru. I mana‘o ai oe aita oe e tau‘ahia ra e au. Ua tano ? » e aore râ « Teie te mea i to aau, ua haapae au i te faanahoraa ia rave taua toopiti i te mau faaotiraa rahi a hoo mai au i te parahiraa maru, e ua mauiui oe. Tera ihoa ? ») E nehenehe ta te taata hoê e tapiti faahou i te faahitiraa i te mea ta’na i maramarama no taua paraparauraa ra e tae roa i te taime e oaoa mai te taata paraparau no te navai o te maramarama a te tahi. Eiaha te taata e faaroo nei ia tuu atoa mai i to’na parau no te faatitiaifaro i te paraparauraa. E mea ti‘a ia’na ia farii te mana‘o o te tahi taata e na reira atoa no te mea i to’na aau ma te ore e faahaapa e e haava i te reira.
Faaite i te mau opuaraa. Ia tae i te tumu parau fifi, e nehenehe ta te taata e faaite na mua roa i te mau opuaraa–te mea ta’na e hinaaro ra no te auraa, no te hoa faaipoipo, e no’na iho ho‘i. Ia maitai te mau opuaraa, e maramarama mai te hoa faaipoipo e, e hinaaro mau e vai ra ia pahono i te fifi, eiaha râ no te faahapa mai e no te amuamu ho‘i.
Ia tupu te mau fifi i roto i te faaipoiporaa, e mea pinepine te taata riri ia puhi mai i te mana‘o faanono‘a e aore râ e haamata oia i te haaparare i te mana‘o vavahi mai te faahaparaa, te tahitohitoraa, te imi-haere-raa i te paruru, e te pahono-ore-raa. Ia tupu mai teie raveraa, e ino mai te auraa, e puta mai i te aau o te hoa faaipoipo i te mo‘emo‘e, te farii-ore-raa ia’na, te haamâ, te oto, te mauiui, te mauruuru ore, e aore râ te iria. Teie te hoê feruriraa maitai a‘e no te tane faaipoipo e te vahine faaipoipo, ia tuatapapa raua i te fifi ma te mana‘o ia faaafaro i te reira, eiaha râ no te ohumu i te reira. Oia nei ïa, e nehenehe ta raua ia faaite na mua roa te opuaraa ia faaafaro i te fifi. Ei hi‘oraa: « Ua hinaaro roa vau ia ite oe i to’u here ia oe e ia ite atoa oe te faufaa o to taua auraa no’u nei. E fifi e ti‘a ia tauaparau taua. Ua hinaaro roa vau ia taua ia faaafaro i te fifi ia vai piri ho‘i e ia tamau noa to taua auraa ra.
Faahiti i to’u iho parau (ta’u). Ia riri mai i te hoê taata, e mea ti‘a ia’na ia faahiti atu i to’na iho parau eiaha râ te parau o te tahi.
Na te faahitiraa i to’u iho parau e faaite i te mea i to’u aau e te tumu no te reira (ei hi‘oraa, « I to’u aau te mauruuru ore ia ore ana‘e e aufauhia i te mau tarahu i te taime ti‘a e ia ore ana‘e e tapurahia te mau moni parau ») eita ïa te hoa faaipoipo e faahapa-ti‘a-hia. Oia atoa, na te faahitiraa i to’u iho parau e faatumu i te mea i to’u iho aau (ei hi‘oraa, « ua iria vau » eiaha râ « no oe to’u iria »).
E faatae mai te faahitiraa i to te tahi parau « ta oe » i te mana‘o haava, te mana‘o faanono‘a, e te mea pinepine roa, oia ho‘i, te mana‘o hape no ni‘a i te hoa faaipoipo (ei hi‘oraa, « Mea hupehupe oe » e aore râ « repo noa teie vahi i muri mai i ta oe ohipa »). Na te faahitiraa i to te tahi parau e titau i te inoino, te imi-haere-raa i te paruru, e te tahoo.
Paraparau ma te imi-ore-raa i te paruru e ma te fariiraa i te parau mau. E mea ti‘a ia farii te taata i te parau mau no roto mai i te faaiteraa mana‘o e aore râ te faahaparaa. Ia amo oia i te hopoia no te mau hape, e roaa ia’na ia tamarû i te manianiaraa e ia faatupu rahi mai i te tiaturiraa. Ia pato‘i oia i te parau mau, e rahi mai te fifi e fâ mai to’na paruparu e to’na hape.
Ua faariro mai Gottmann i te imi-haere-raa i te paruru ei hoê o te haaparareraa mana‘o atâta roa na roto i te mau huru haaparareraa mana‘o vavahi atoa. Ua faaite mai oia e, « e nehenehe ta te reira e riro mai ei aureure rahi roa no te mana‘o faanono‘a ». Tei roto te imi-haere-raa i te paruru i te amo-ore-raa i te hopoia, te faatororaa i te tahi, te pato‘iraa, te faahaparaa, te aroraa, te parau faataiâ, e te ta‘iraa.
Tapiri i te reira, te imi-ore-raa i te paruru o te arata‘i i te hopoia, te fariiraa i to’na iho mau hape, te imiraa i te pahonoraa i te mau fifi, te aau tae ia taui, e te faatura i te mea i to te hoa faaipoipo aau. Ua tapa‘o mai Gottman e, o te mau taata faaipoipo aita te mana‘o i te imi-haere-noa-raa i te paruru o te haamaitai mai i to ratou faaipoiporaa: « Teie ana‘e te rave‘a no te faaore i te imi-haere-raa i te paruru maori râ, ia tape‘a i te feruriraa maitai i te hoa faaipoipo e ia faaô faahou mai i te arueraa e te faahanahanaraa i te tahi ».13
Ia farii te taata i te parau mau e ia haapii oia ia paraparau ma te ore e imi haere i te paruru, e ti‘a mai ia raua ia haafaufaa i te parau ohie, « te tatarahapa nei au ». Te aniraa o te aau ia faaore mai i te hape, na te reira e faati‘a mai i te hoê e‘a i ni‘a mai i te taputoraa e na te reira atoa e tamaru i te iria e te aehuehuraa i te aau.
Arueraa ti‘a. Na te arueraa ti‘a e faarahi mai i te haaparareraa mana‘o e na te reira e tauturu mai i te taata ia mana‘o maitai ia ratou iho. Mai ta Gottman i tuu mai, « Te faahamana‘oraa i to outou hoa (e ia outou iho ho‘i !) e mea faahiahia mau oia no outou, o te faatupuraa ïa i te au e te anaanatae i roto i te tauaparauraa ».14 Na tera huru arueraa e aupuru i te auraa.
Faahiti papû i te mea e auhia nei. Ua faataa mai te taata papa‘i Susan Page e, te ratere nei te tahi mau taata faaipoipo i te mau matahiti e rave rahi ma te ore e faahiti i te mea e auhia e aore te mea e tiaihia ra e ratou ra.15 Mea ohie te tahi o te mau mea e tiaihia nei, mai te turairaa i te faarueraa pehu i te pae purumu e aore râ mai te faaho‘iraa i te mereti i te vahi horoiraa ia oti te tamaaraa, te vai faahou ra te tahi mea rii. Ta Page i a‘o mai, oia ho‘i ïa, e haataupupu te tahunaraa i te mea e tiaihia ra i te auraa no te matahiti e rave rahi. Ia ore e pahonohia te mea e tiaihia ra, e tupu te mauruuru ore i te taata, e taahoa mai, e e iria mai, noa’tu ho‘i aita taua mau hiaairaa ra e taua mau tiairaa ra i faahitihia. E i te hopea eita roa’tu oia e tiaturi faahou i taua auraa ra.
Teie rii te mau tumu e ore te taata e faaite mai i te mau hiaai e te mau mea e tiaihia ra, o te mau mana‘o ïa mai « Ua ite ho‘i ona ta’u hinaaro » ; « E mana‘o mai paha ïa oia e, te faahapa ra vau ia’na » ; « Farii noa pai tei horoahia mai » ; e aore râ « Eita ihoa oia e horo‘a mai, aita e apî ia ani atu » Atira noa’tu, ma te ani i te mea e hinaaroohia ra, te faaite nei te taata e, te amo ra oia i ta’na hopoia i roto i te auraa. Na te aniraa e haapuai mai i te auraa. Noa’tu eita te aniraa e pahonohia mai e aore râ e faatupu mai te reira i te mârôraa, ua tuuhia te aniraa no te hoê pahonoraa. I te taime ua tuuhia mai te aniraa, e nehenehe ia ohipa i te reira e ia pahono tano mai i te reira i te pae hopea.16
E mea ti‘a i te taata ia feruri maite a faatae ai i to’na hinaaro, ia haamana‘o ho‘i oia e, aita te tahi mau aniraa i te tano roa. E mea ti‘a ia ratou ia:
-
Papû i to ratou mana‘o te mea e hinaarohia ra na mua i te ani mai.
-
Maiti i te taime tano no te ani mai. Eita e roaa i te hoa faaipoipo ia pahono mai ia rahi to’na feruriraa i te tahi ohipa.
-
A faahiti papû i te hinaaro, ei hi‘oraa, e nehenehe ta’na e parau mai, « E nehenehe anei ta oe e turai i te faarueraa pehu i te pae purumu ? » eiaha râ « Ahani pai oe e tauturu mai ».
-
A faahiti ohie i te aniraa ma te ore e faananea i to te tahi hapa, ei hi‘oraa, e nehenehe ta ratou e parau, « Ua hinaaro vau ia apa mai oe ia’u hou vau e reva i te ohipa », eiaha râ « Ua ite ihoa vau e, e aniraa rahi teie e aita atoa paha oe e ara maitai, area e tauturu oe ia’u mai te mea… »
-
A ani ma te faahepo-ore-raa. « Ua hinaaro anei oe… » e faahitiraa maitai no te haamata i te hoê parau. E mea ti‘a i te taata ia maramarama mai e, e nehenehe ta te hoa faaipoipo ia pahono mai aita, ia ore ihoa ra te aniraa i te mea tano roa.17
Ia tano te aniraa e ia hinaaro ihoa te taata i te reira e ia ore te hoa faaipoipo e farii mai, e nehenehe ta te taata e taui rii mai te parau no te ani-faahou-mai. E maoro rii paha no te hoa faaipoipo ia maramarama i te hinaaro mau o te aniraa.18
Hi‘opo‘a i te huru paraparauraa a te tahi i te tahi (te faanahoraa e te hinaaro)
Te tahi taime e mana‘o noa te mau taata faaipoipo i te rave-viti-raa i te ohipa, mai te aufauraa i te mau tarahu e aore râ te turairaa i te faarueraa pehu i te pae purumu (te hinaaro), e e ore roa raua e ite mai e, o te haaparareraa mana‘o (te faanahoraa) ta raua fifi rahi a‘e. E e tamata atura raua ia tata‘i i te fifi haaparareraa mana‘o na roto i te raveraa i te mea manuia ore, mai te paraparau-puai-raa, te manianiaraa, e aore râ te faahaparaa. Aita te reira e tauturu ia faaafaro i te mau fifi, hau atu râ, na te reira e faarahi mai i te manianiaraa. Mai te mea e hi‘opo‘a mai te mau taata faaipoipo i ta ratou faanahoraa haaparareraa mana‘o e e taui ho‘i i te reira, ma te haamaitai mai i taua mau rave‘a ra, e faaafaro ratou i te mârôraa e e apî mai ratou i te mau opuaraa e arata‘i atu ia ratou i te raveraa maitai a‘e.
Ua tapa‘o e piti hoa faaipoipo ia raua i te hoê haapiipiiraa no te mea ua riaria roa te vahine i ta’na tane faaipoipo. Ua moto ho‘i te tane i te papa‘i o te piha taoto i te hoê manianiaraa na raua, e ua parari te papa‘i. I roto i te haapiiraa, ua haapapû mai oia e, eita roa oia e haapepe i te tahi a‘e taata, o ta te vahine ïa i pahono e, na te motoraa i te tauihaa e arata‘i i te motoraa i te taata (te hinaaro)
Aita te aivanaa tauturu i vaiiho ia ratou ia paraparau maoro roa i te parau ahiri te tane faaipoipo e moto i te taata, ua faatumu oia i te haapiipiiraa i ni‘a i te huru raua e rave nei i te mau mana‘o taa ê, mai teie iho nei ho‘i. E ohumuhumu pinepine te vahine i te tane faaipoipo no te mau fifi ta’na e pe‘ape‘a ra. I te aau o te tane, te faahaparaa e te teimaha i tae mai. No te ite ore i te mea e parau atu, e faaea i te paraparau e e haere oia. I tupu atura ïa i te aau o te vahine i te tau‘a-ore-raa no te otoheraa a ta’na tane. I reira te vahine i onoono noa ai na roto i te mau piha o te fare, ma te ui i te tane ia paraparau mai. E i te hopea ua haapaaina mai oia.
I muri mai i te hi‘opo‘araa o na hoa faaipoipo i te faanahoraa, ua tauturu mai te aivanaa tauturu ia raua ia taui i ta raua raveraa i te fifi. Ua haapii mai te vahine ia faaite i te mea i to’na aau ma te marû, e ua haapii mai ïa te tane ia faaroo e ia pahono tano i te mana‘o a ta’na vahine.
Te haaparareraa mana‘o manuia
Ua faaite mai Elder Marvin J. Ashton no te Pŭpŭ no te Tino Ahuru Ma Piti nahea te taata e haapii mai i te haaparareraa i te mana‘o ma te here: « Te pure nei au i te Metua i te Ao ra ia faatae mai i te haaparareraa mana‘o manuia mau i roto i te utuafare na roto i te hoê hinaaro haatusiaraa, te hoê hinaaro ia faaroo, te hoê hinaaro ia parau i te mea i te aau, te hoê hinaaro ia haapae i te haava atu, te hoê hinaaro ia tamau i te tiaturi atu, e te hoê hinaaro ia faaohipa i te faaoromai … E nehenehe ta te haaparareraa mana‘o e tauturu i te patu i te utuafare mai te peu e ohipa tatou i te reira e e tusia tatou i te reira ».19
« E hopoia hanahana ta te tane e ta te vahine faaipoipo i te hereraa e i te poihereraa te tahi e te tahi e ta raua mau tamarii ».
« Te Utuafare : E Poro‘i i to te Ao Nei »