“ສິດສອນກ່ຽວກັບພຣະເຢຊູຄຣິດ ບໍ່ວ່າທ່ານກຳລັງສິດສອນຫຍັງ,” ການສິດສອນໃນວິທີຂອງພຣະຜູ້ຊ່ວຍໃຫ້ລອດ: ສຳລັບທຸກຄົນທີ່ສິດສອນຢູ່ໃນບ້ານ ແລະ ໃນສາດສະໜາຈັກ (2022)
“ສິດສອນກ່ຽວກັບພຣະເຢຊູຄຣິດ ບໍ່ວ່າທ່ານກຳລັງສິດສອນຫຍັງ,” ການສິດສອນໃນວິທີຂອງພຣະຜູ້ຊ່ວຍໃຫ້ລອດ
Peace I Leave with You [ສັນຕິສຸກທີ່ເຮົາມອບໃຫ້ພວກເຈົ້າ], ໂດຍ ວາວເຕີ ເຣນ
ສິດສອນກ່ຽວກັບພຣະເຢຊູຄຣິດ ບໍ່ວ່າທ່ານກຳລັງສິດສອນຫຍັງ
ມັນມີຫລາຍສິ່ງທີ່ຈະສິດສອນຢູ່ໃນພຣະກິດຕິຄຸນທີ່ຖືກຟື້ນຟູຂອງພຣະເຢຊູຄຣິດ—ຫລັກທຳ, ພຣະບັນຍັດ, ຄຳທຳນາຍ, ແລະ ເລື່ອງລາວພຣະຄຳພີ. ແຕ່ທັງໝົດນີ້ແມ່ນກິ່ງງ່າຈາກຕົ້ນດຽວກັນ, ເພາະທັງໝົດມີຈຸດປະສົງດຽວຄື: ເພື່ອຊ່ວຍໃຫ້ທຸກຄົນມາຫາພຣະຄຣິດ ແລະ ດີພ້ອມໃນພຣະອົງ (ເບິ່ງ ເຈຣອມ 1:11; ໂມໂຣໄນ 10:32). ສະນັ້ນບໍ່ວ່າທ່ານກຳລັງສິດສອນຫຍັງ, ຈົ່ງຈື່ຈຳວ່າ ທ່ານກຳລັງສິດສອນແທ້ໆກ່ຽວກັບພຣະເຢຊູຄຣິດ ແລະ ວິທີທີ່ຈະກາຍເປັນເໝືອນດັ່ງພຣະອົງ. ພຣະວິນຍານບໍລິສຸດສາມາດຊ່ວຍໃຫ້ທ່ານຮຽນຮູ້ທີ່ຈະຮັບຮູ້ຄວາມຈິງກ່ຽວກັບພຣະຜູ້ຊ່ວຍໃຫ້ລອດ ແລະ ອຳນາດແຫ່ງການໄຖ່ຂອງພຣະອົງໃນຫລັກທຳພຣະກິດຕິຄຸນ, ພຣະບັນຍັດ, ແລະ ຄຳສອນຂອງສາດສະດາແຕ່ລະຂໍ້ (ເບິ່ງ ຢາໂຄບ 7:10–11).
ທ່ານກຳລັງສິດສອນກ່ຽວກັບການເສຍສະລະບໍ? ໃຫ້ຄິດທີ່ຈະສຳຫລວດກັບຜູ້ຮຽນວ່າ ການເສຍສະລະທີ່ເຮົາເຮັດຊີ້ນຳຈິດວິນຍານຂອງເຮົາໄປຫາ “ການເສຍສະລະຄັ້ງຍິ່ງໃຫຍ່ ແລະ ຄັ້ງສຸດທ້າຍ” ຂອງພຣະຜູ້ຊ່ວຍໃຫ້ລອດແນວໃດ (ແອວມາ 34:10). ທ່ານກຳລັງສິດສອນກ່ຽວກັບຄວາມເປັນອັນໜຶ່ງອັນດຽວກັນບໍ? ໃຫ້ຄິດທີ່ຈະສົນທະນາເຖິງຄວາມເປັນອັນໜຶ່ງອັນດຽວກັນທີ່ພຣະເຢຊູຄຣິດໄດ້ບັນລຸກັບພຣະບິດາຂອງພຣະອົງ ແລະ ກ່ຽວກັບຄຳເຊື້ອເຊີນຂອງພຣະອົງໃຫ້ເຮົາເປັນອັນໜຶ່ງອັນດຽວກັນກັບພວກພຣະອົງ (ເບິ່ງ ໂຢຮັນ 17). ເບິ່ງຫົວຂໍ້ພຣະກິດຕິຄຸນທຸກຫົວຂໍ້ວ່າ ມັນເປັນໂອກາດທີ່ຈະສິດສອນ ແລະ ຮຽນຮູ້ກ່ຽວກັບພຣະເຢຊູຄຣິດ.
ພຣະບັນຍັດທຸກຂໍ້ກໍໃຫ້ໂອກາດນີ້ຄືກັນ. ຢ່າພຽງແຕ່ເຈາະຈົງຢູ່ທີ່ກົດຂອງພຣະກິດຕິຄຸນເທົ່ານັ້ນ—ໃຫ້ຮຽນຮູ້ກ່ຽວກັບຜູ້ໃຫ້ກົດນຳອີກ. ຖ້າຫາກທ່ານສົນທະນາກ່ຽວກັບພຣະວາຈາແຫ່ງປັນຍາ ແລະ ຢຸດຢູ່ທີ່ການເຮັດ ແລະ ການບໍ່ເຮັດຕາມຊີວິດທີ່ມີສຸຂະພາບດີ, ແລ້ວທ່ານຈະພາດໂອກາດທີ່ຈະໄຕ່ຕອງວ່າ ພຣະເຢຊູຄຣິດຄົງຫ່ວງໃຍເຮົາຫລາຍຂະໜາດໃດ—ທັງຄວາມຜາສຸກທາງວິນຍານ ແລະ ທາງຮ່າງກາຍ—ຈຶ່ງໄດ້ປະທານກົດນີ້ໃຫ້ແກ່ເຮົາ. ສຸມໃສ່ວິທີທີ່ພຣະຜູ້ຊ່ວຍໃຫ້ລອດເຕັມພຣະໄທ ແລະ ຮ້ອນຮົນຫລາຍຂະໜາດໃດທີ່ຈະປະທານພອນໃຫ້ເຮົາ ດ້ວຍອຳນາດຂອງພຣະອົງ ເພື່ອຊ່ວຍໃຫ້ເຮົາດຳລົງຊີວິດຕາມກົດຂອງພຣະອົງ. ພຣະບັນຍັດທຸກຂໍ້ທີ່ພຣະອົງປະທານໃຫ້ເຮົາ ເປີດເຜີຍບາງສິ່ງກ່ຽວກັບພຣະດຳລັດ ແລະ ພຣະປະສົງ ແລະ ພຣະໄທຂອງພຣະອົງ—ພົບຄວາມສຸກໃນການຄົ້ນພົບສິ່ງນີ້ນຳກັນ!
ເນັ້ນໜັກຕົວຢ່າງຂອງພຣະເຢຊູຄຣິດ
ເຮົາສາມາດໃຫ້ພຣະເຢຊູຄຣິດເປັນຈຸດສູນກາງຂອງການສິດສອນ ແລະ ການຮຽນຮູ້ ໂດຍການຮັບຮູ້ ແລະ ການເນັ້ນໜັກວ່າ ພຣະອົງເປັນຕົວຢ່າງທີ່ສົມບູນແບບຂອງຫລັກທຳພຣະກິດຕິຄຸນ. ໃນຖານະສານຸສິດ, ເຮົາບໍ່ພຽງແຕ່ເຮັດຕາມຫລັກທຳເທົ່ານັ້ນ—ເຮົາຕິດຕາມພຣະເຢຊູຄຣິດນຳອີກ. ເມື່ອເຮົາເອົາໃຈໃສ່ຕໍ່ຕົວຢ່າງທີ່ສົມບູນແບບຂອງພຣະຜູ້ຊ່ວຍໃຫ້ລອດ, ພຣະວິນຍານບໍລິສຸດຈະເປັນພະຍານເຖິງພຣະອົງ ແລະ ດົນໃຈເຮົາໃຫ້ຕິດຕາມພຣະອົງ.
ໃຫ້ຄິດວາດພາບຈັກບຶດໜຶ່ງວ່າ ທ່ານກຳລັງສິດສອນຫລັກທຳຂອງການອົດທົນຈົນເຖິງທີ່ສຸດ. ການສົນທະນາກ່ຽວກັບວິທີທີ່ພຣະຜູ້ຊ່ວຍໃຫ້ລອດເປັນຕົວຢ່າງຂອງການອົດທົນຈົນເຖິງທີ່ສຸດ ສາມາດນຳຄວາມຮູ້ສຶກຄາລະວະທີ່ຫວານຊື່ນເຖິງພຣະອົງມາໃຫ້. ຜູ້ທີ່ທ່ານສິດສອນອາດຮຽນຮູ້ ແລະ ຮູ້ສຶກຫຍັງແດ່ຈາກຕົວຢ່າງຂອງພຣະອົງ?
ພຣະຜູ້ຊ່ວຍໃຫ້ລອດໄດ້ຕັ້ງຕົວຢ່າງໄວ້ສຳລັບເຮົາທຸກຄົນ. He Healed Them All [ພຣະອົງໄດ້ຊົງໂຜດຮັກສາທຸກຄົນໃຫ້ດີພະຍາດ], ໂດຍ ໄມໂກ ມອມ
ສິດສອນກ່ຽວກັບຕຳແໜ່ງ, ບົດບາດ, ແລະ ຄຸນລັກສະນະຂອງພຣະເຢຊູຄຣິດ
ພຣະເຢຊູຄຣິດມີຫລາຍຕຳແໜ່ງໃນພຣະຄຳພີ. ແຕ່ລະຕຳແໜ່ງສະທ້ອນເຖິງບົດບາດຂອງພຣະອົງໃນແຜນຂອງພຣະເຈົ້າ ແລະ ສິດສອນເຮົາກ່ຽວກັບຄຸນລັກສະນະອັນສູງສົ່ງຂອງພຣະອົງ. ທ່ານອາດຢາກຄິດທີ່ຈະສຳຫລວດກັບຜູ້ຮຽນເບິ່ງວ່າ ຕຳແໜ່ງຂອງພຣະເມສານ້ອຍຂອງພຣະເຈົ້າ, ຜູ້ວິງວອນແທນ, ຜູ້ຊົງເຮັດໃຫ້ [ສັດທາ] ຂອງເຮົາເຖິງທີ່ສຳເລັດ, ແລະ ເປັນຄວາມສະຫວ່າງຂອງໂລກ ສິດສອນເຮົາຫຍັງແດ່ກ່ຽວກັບພຣະເຢຊູຄຣິດ. ພ້ອມນີ້, ຂະນະທີ່ທ່ານຊ່ວຍໃຫ້ຜູ້ຮຽນມາຮູ້ຈັກພຣະຜູ້ຊ່ວຍໃຫ້ລອດຫລາຍຂຶ້ນ, ໃຫ້ເບິ່ງກາຍສິ່ງທີ່ພຣະອົງໄດ້ກ່າວ ແລະ ກະທຳ ແລະ ໃຫ້ເບິ່ງຜູ້ທີ່ພຣະອົງເປັນ ແລະ ບົດບາດໃດທີ່ພຣະອົງປະສົງທີ່ຈະເປັນໃນຊີວິດຂອງເຮົາ. ຂະນະທີ່ພວກທ່ານຮຽນຮູ້ນຳກັນກ່ຽວກັບລັກສະນະ ແລະ ຄຸນລັກສະນະຂອງພຣະຜູ້ຊ່ວຍໃຫ້ລອດ, ພຣະວິນຍານບໍລິສຸດຈະເຮັດໃຫ້ພວກທ່ານເຂົ້າໃຈ ແລະ ຮັກພຣະອົງເລິກເຊິ່ງຫລາຍຂຶ້ນ.
ຊອກຫາສັນຍາລັກທີ່ເປັນພະຍານເຖິງພຣະເຢຊູຄຣິດ
“ທຸກສິ່ງທັງປວງ,” ພຣະຜູ້ເປັນເຈົ້າໄດ້ປະກາດ, “ໄດ້ຖືກສ້າງຂຶ້ນມາ ແລະ ຖືກເຮັດເພື່ອໃຫ້ເປັນພະຍານເຖິງເຮົາ” (ໂມເຊ 6:63; ເບິ່ງ 2 ນີໄຟ 11:4 ນຳອີກ). ດ້ວຍຄວາມຈິງນັ້ນຢູ່ໃນໃຈ, ເຮົາສາມາດຮຽນຮູ້ທີ່ຈະເຫັນສັນຍາລັກຫລາຍຢ່າງໃນພຣະຄຳພີທີ່ເປັນພະຍານເຖິງພຣະຜູ້ຊ່ວຍໃຫ້ລອດ. ສັນຍາລັກເຫລົ່ານີ້ແມ່ນລວມທັງເຂົ້າຈີ່, ນ້ຳ, ແລະ ແສງສະຫວ່າງ. ເມື່ອເຮົາເຂົ້າໃຈວິທີທີ່ສິ່ງຂອງເຫລົ່ານີ້ກ່ຽວຂ້ອງກັບພຣະຜູ້ຊ່ວຍໃຫ້ລອດແນວໃດ, ມັນສາມາດສິດສອນເຮົາເຖິງອຳນາດ ແລະ ຄຸນລັກສະນະຂອງພຣະອົງໄດ້. ທ່ານສາມາດແມ່ນແຕ່ຊອກຫາຄວາມຄ້າຍຄືກັນກັບຊີວິດຂອງພຣະຜູ້ຊ່ວຍໃຫ້ລອດໃນຊີວິດຂອງສາດສະດາ ແລະ ຊາຍ ແລະ ຍິງທີ່ຊື່ສັດຄົນອື່ນໆ ຢູ່ໃນພຣະຄຳພີນຳອີກ. ການຊອກຫາສັນຍາລັກຈະເປີດເຜີຍຄວາມຈິງກ່ຽວກັບພຣະຜູ້ຊ່ວຍໃຫ້ລອດ ໃນບ່ອນທີ່ທ່ານອາດມອງຂ້າມ.