“ຊ່ວຍໃຫ້ຜູ້ຮຽນມາຫາພຣະເຢຊູຄຣິດ,” ການສິດສອນໃນວິທີຂອງພຣະຜູ້ຊ່ວຍໃຫ້ລອດ: ສຳລັບທຸກຄົນທີ່ສິດສອນຢູ່ໃນບ້ານ ແລະ ໃນສາດສະໜາຈັກ (2022)
“ຊ່ວຍໃຫ້ຜູ້ຮຽນມາຫາພຣະເຢຊູຄຣິດ,” ການສິດສອນໃນວິທີຂອງພຣະຜູ້ຊ່ວຍໃຫ້ລອດ
ໃນຖານະເປັນຄູສອນພຣະກິດຕິຄຸນຂອງພຣະເຢຊູຄຣິດ, ເຮົາຊ່ວຍໃຫ້ຄົນອື່ນເຂົ້າໃຈ ແລະ ເພິ່ງອາໄສຄຳສອນ, ອຳນາດ, ແລະ ຄວາມຮັກຂອງພຣະອົງ.
ຊ່ວຍໃຫ້ຜູ້ຮຽນມາຫາພຣະເຢຊູຄຣິດ
ບໍ່ມີສິ່ງໃດໃນຖານະຄູສອນທີ່ຈະເປັນພອນໃຫ້ແກ່ຜູ້ຮຽນໄດ້ຫລາຍກວ່າການຊ່ວຍໃຫ້ເຂົາເຈົ້າຮູ້ຈັກພຣະບິດາເທິງສະຫວັນ ແລະ ພຣະເຢຊູຄຣິດ ແລະ ຮູ້ສຶກເຖິງຄວາມຮັກຂອງພວກພຣະອົງ (ເບິ່ງ ໂຢຮັນ 17:3). ໃຫ້ຄິດກ່ຽວກັບປະສົບການທີ່ຊ່ວຍໃຫ້ທ່ານມາຮູ້ຈັກ ແລະ ຮັກພຣະບິດາເທິງສະຫວັນ ແລະ ພຣະເຢຊູຄຣິດ. ທ່ານໄດ້ເຮັດຫຍັງແດ່ເພື່ອຮຽນຮູ້ກ່ຽວກັບຄຸນລັກສະນະ, ອຳນາດ, ແລະ ຄວາມຮັກຂອງພວກພຣະອົງ? ຄວາມຮັກຂອງທ່ານທີ່ມີຕໍ່ພຣະບິດາເທິງສະຫວັນ ແລະ ພຣະເຢຊູຄຣິດໄດ້ນຳຄວາມສຸກມາໃຫ້ທ່ານແນວໃດ? ແລ້ວໃຫ້ຄິດກ່ຽວກັບສິ່ງທີ່ຄວາມຮັກ ແລະ ອຳນາດຂອງພວກພຣະອົງສາມາດເຮັດເພື່ອແຕ່ລະຄົນທີ່ທ່ານສິດສອນ. (ເບິ່ງ ແອວມາ 26:16; ໂມເຊ 5:11.)
ເປົ້າໝາຍສູງສຸດຂອງເຮົາໃນຊີວິດນີ້ຄື ທີ່ຈະກາຍເປັນເໝືອນດັ່ງພຣະບິດາເທິງສະຫວັນຂອງເຮົາຫລາຍຂຶ້ນ ແລະ ກັບຄືນໄປຫາພຣະອົງ. ວິທີທີ່ເຮົາບັນລຸເປົ້າໝາຍນັ້ນຄື ໂດຍການມາຫາພຣະເຢຊູຄຣິດ (ເບິ່ງ ໂຢຮັນ 14:6). ນີ້ຄືເຫດຜົນ, ດັ່ງທີ່ສາດສະດານີໄຟໄດ້ສິດສອນວ່າ, “ພວກເຮົາເວົ້າເຖິງພຣະຄຣິດ, ພວກເຮົາປິຕິຍິນດີໃນພຣະຄຣິດ” (2 ນີໄຟ 25:26).
ລູກແຕ່ລະຄົນຂອງພຣະເຈົ້າຕ້ອງການຄວາມສະຫວ່າງ ແລະ ຄວາມຈິງທີ່ມາຈາກພຣະຜູ້ຊ່ວຍໃຫ້ລອດ ແລະ ສາມາດເລືອກທີ່ຈະຕອບຮັບມັນ. ການເປັນຄູສອນພຣະກິດຕິຄຸນຂອງພຣະເຢຊູຄຣິດໝາຍເຖິງການຊ່ວຍໃຫ້ຄົນອື່ນເຂົ້າໃຈ ແລະ ເພິ່ງອາໄສຄຳສອນ, ອຳນາດທີ່ໄຖ່, ແລະ ຄວາມຮັກທີ່ສົມບູນແບບຂອງພຣະອົງ. ໃຫ້ພິຈາລະນາວິທີທີ່ແນວຄິດດັ່ງຕໍ່ໄປນີ້ສາມາດຊ່ວຍທ່ານດົນໃຈຄົນອື່ນໃຫ້ຮູ້ຈັກພຣະເຢຊູຄຣິດດີຂຶ້ນ ແລະ ຕິດຕາມພຣະອົງແນວໃດ.
ຊ່ວຍໃຫ້ຜູ້ຮຽນຮັບຮູ້ຄວາມຮັກ, ອຳນາດ, ແລະ ຄວາມເມດຕາຂອງພຣະຜູ້ເປັນເຈົ້າໃນຊີວິດຂອງເຂົາເຈົ້າ
ມັນເປັນເລື່ອງດີທີ່ ຮູ້ຈັກກ່ຽວກັບ ຄວາມຮັກ, ອຳນາດ, ແລະ ຄວາມເມດຕາຂອງພຣະຜູ້ຊ່ວຍໃຫ້ລອດ, ແຕ່ເຮົາຈຳເປັນຕ້ອງມີ ປະສົບການ ກັບມັນເຊັ່ນກັນ. ການເຫັນວິທີທີ່ພຣະອົງປິ່ນປົວຜູ້ຄົນຢູ່ໃນພຣະຄຳພີ ຊ່ວຍໃຫ້ເຮົາພັດທະນາສັດທາທີ່ຍິ່ງໃຫຍ່ກວ່າ ວ່າພຣະອົງສາມາດໃຫ້ພອນ ແລະ ປິ່ນປົວເຮົາ. ຍົກຕົວຢ່າງ, ການຮຽນຮູ້ກ່ຽວກັບປະສົບການຂອງດານີເອນຈະບໍ່ສົມບູນ ຖ້າຫາກມັນບໍ່ໄດ້ດົນໃຈເຮົາໃຫ້ໄວ້ວາງໃຈພຣະຜູ້ເປັນເຈົ້າ ເມື່ອເຮົາປະເຊີນກັບຖ້ຳສິງຂອງເຮົາເອງໃນທາງປຽບທຽບ.
ຂະນະທີ່ທ່ານຊ່ວຍໃຫ້ຜູ້ຮຽນຮັບຮູ້ “ຄວາມເມດຕາອັນລະອຽດອ່ອນ” ຂອງພຣະຜູ້ເປັນເຈົ້າ (1 ນີໄຟ 1:20), ທັງໃນພຣະຄຳພີ ແລະ ໃນປະສົບການສ່ວນຕົວຂອງເຂົາເຈົ້າເອງ, ເຂົາເຈົ້າຈະຮູ້ສຶກ ແລະ ຮູ້ວ່າພຣະຜູ້ເປັນເຈົ້າສະຖິດຢູ່ກັບເຂົາເຈົ້າ ແລະ ຈະຢືນຄຽງຂ້າງເຂົາເຈົ້າດ້ວຍຄວາມຮັກ (ເບິ່ງ ຄຳສອນ ແລະ ພັນທະສັນຍາ 68:6). ເຂົາເຈົ້າຈະເຫັນ ແລະ ຮູ້ສຶກເຖິງຄວາມເປັນຈິງຂອງຄວາມຮັກ ແລະ ຄວາມເມດຕາຂອງພຣະຜູ້ເປັນເຈົ້າ ໃນຄວາມຕ້ອງການ ແລະ ສະຖານະການສ່ວນຕົວຂອງເຂົາເຈົ້າ.
ຄູສອນສາມາດຊ່ວຍໃຫ້ຜູ້ຮຽນມີປະສົບການກັບຄວາມຮັກ, ອຳນາດ, ແລະ ຄວາມເມດຕາຂອງພຣະຜູ້ຊ່ວຍໃຫ້ລອດ.
ຊ່ວຍໃຫ້ຜູ້ຮຽນເພີ່ມຄວາມເຂັ້ມແຂງໃຫ້ແກ່ຄວາມສຳພັນຂອງເຂົາເຈົ້າກັບພຣະບິດາເທິງສະຫວັນ ແລະ ພຣະເຢຊູຄຣິດ
ຈຸດປະສົງຂອງການສິດສອນ ແລະ ການຮຽນຮູ້ກ່ຽວກັບພຣະເຢຊູຄຣິດຄື ເພື່ອຊ່ວຍໃຫ້ແຕ່ລະຄົນເຂົ້າໃກ້ຊິດກັບພຣະອົງ ແລະ ພຣະບິດາເທິງສະຫວັນຂອງເຮົາ. ຊ່ວຍຜູ້ຄົນທີ່ທ່ານສິດສອນບໍ່ໃຫ້ສູນເສຍຈຸດປະສົງນັ້ນ. ຊຸກຍູ້ໃຫ້ເຂົາເຈົ້າເພີ່ມຄວາມເຂັ້ມແຂງໃຫ້ແກ່ຄວາມສຳພັນຂອງເຂົາເຈົ້າກັບພຣະບິດາເທິງສະຫວັນ ແລະ ພຣະເຢຊູຄຣິດ ໂດຍການສຶກສາພຣະຄຳພີ, ການກັບໃຈເລື້ອຍໄປ, ການເວົ້ານຳພຣະບິດາໃນການອະທິຖານ, ແລະ ການເປັນພະຍານເຖິງພຣະບິດາ ແລະ ພຣະບຸດ. ສິດສອນຜູ້ຮຽນໂດຍຄຳເວົ້າ ແລະ ຕົວຢ່າງ ເຖິງວິທີທີ່ການເຮັດ ແລະ ຮັກສາພັນທະສັນຍາຜູກມັດເຮົາໄວ້ກັບພວກພຣະອົງແນວໃດ. ຊ່ວຍໃຫ້ເຂົາເຈົ້າຮູ້ວ່າ ເຮົາປະເສີດລ້ຳ ແລະ ເປັນທີ່ຮັກຕໍ່ພວກພຣະອົງຫລາຍຂະໜາດໃດ. ເພີ່ມຄວາມເຂັ້ມແຂງໃຫ້ແກ່ສັດທາຂອງເຂົາເຈົ້າວ່າ ພຣະເຢຊູຄຣິດ, ໂດຍຄຸນນະທຳຂອງການຊົດໃຊ້ທີ່ສົມບູນແບບຂອງພຣະອົງ, ເປັນພຽງທາງດຽວເທົ່ານັ້ນທີ່ຈະພາກັບໄປຫາພຣະບິດາຂອງເຮົາ. ຈັດຫາໂອກາດໃຫ້ຜູ້ຮຽນເພື່ອຮັບເອົາການເປັນພະຍານຈາກພຣະວິນຍານບໍລິສຸດ, “ຊຶ່ງເປັນພະຍານເຖິງພຣະບິດາ ແລະ ພຣະບຸດ” (ໂມເຊ 5:9).
ຊ່ວຍໃຫ້ຜູ້ຮຽນຕັ້ງໃຈພະຍາຍາມເປັນເໝືອນດັ່ງພຣະເຢຊູຄຣິດຫລາຍຂຶ້ນ
ໃນທີ່ສຸດ, ການຮຽນຮູ້ກ່ຽວກັບພຣະເຢຊູຄຣິດ ຈະດົນໃຈເຮົາໃຫ້ກາຍເປັນເໝືອນດັ່ງພຣະອົງຫລາຍຂຶ້ນ. ແຕ່ການກາຍເປັນເໝືອນດັ່ງພຣະອົງຈະເກີດຂຶ້ນພຽງແຕ່ເມື່ອເຮົາກະທຳດ້ວຍສັດທາ, ທັງໃນ ແລະ ນອກຫ້ອງ, ຕັ້ງໃຈເລືອກທີ່ຈະເຮັດຕາມຕົວຢ່າງຂອງພຣະອົງ ແລະ ຮັບເອົາພຣະຄຸນຂອງພຣະອົງ. ເຊື້ອເຊີນໃຫ້ຜູ້ຮຽນສະແຫວງຫາຄວາມຊ່ວຍເຫລືອຈາກພຣະວິນຍານບໍລິສຸດ ເພື່ອຊີ້ບອກທາງທີ່ເຂົາເຈົ້າສາມາດກາຍເປັນເໝືອນດັ່ງພຣະຜູ້ຊ່ວຍໃຫ້ລອດໄດ້. ສະເໜີການຊີ້ນຳ ແລະ ການສະໜັບສະໜູນ ຂະນະທີ່ຜູ້ຮຽນພະຍາຍາມໃຫ້ການເປັນເໝືອນດັ່ງພຣະອົງເປັນການສະແຫວງຫາຕະຫລອດຊີວິດ.
ຢາໂຄບໄດ້ສິດສອນວ່າ “ທຸກຢ່າງທີ່ພຣະເຈົ້າປະທານໃຫ້ມະນຸດນັບຕັ້ງແຕ່ການເລີ່ມຕົ້ນຂອງໂລກ” ສາມາດສິດສອນເຮົາກ່ຽວກັບພຣະເຢຊູຄຣິດ (2 ນີໄຟ 11:4). ຄຳສອນຂອງທ່ານສາມາດເປັນໜຶ່ງໃນສິ່ງເຫລົ່ານັ້ນ. ໃຫ້ພຣະເຢຊູຄຣິດເປັນຈຸດສູນກາງຂອງປະສົບການ ໃນການສິດສອນ ແລະ ການຮຽນຮູ້ແຕ່ລະຢ່າງ. ຂະນະທີ່ທ່ານ ແລະ ຜູ້ຮຽນ “ເວົ້າເຖິງພຣະຄຣິດ, … ປິຕິຍິນດີໃນພຣະຄຣິດ, … ສັ່ງສອນເລື່ອງພຣະຄຣິດ” (2 ນີໄຟ 25:26), ພຣະວິນຍານບໍລິສຸດສາມາດປູກຝັງປະຈັກພະຍານເຖິງພຣະຜູ້ຊ່ວຍໃຫ້ລອດ ໄວ້ໃນຈິດໃຈ ແລະ ຫົວໃຈຂອງແຕ່ລະຄົນ. ເມື່ອທ່ານຊ່ວຍໃຫ້ຜູ້ຮຽນຂອງທ່ານຮູ້ຈັກພຣະບິດາເທິງສະຫວັນ ແລະ ພຣະເຢຊູຄຣິດດ້ວຍຕົວເຂົາເຈົ້າເອງ, ສ່ວນຫລາຍແລ້ວ ເຂົາເຈົ້າຈະຫັນຫາພວກພຣະອົງໃຫ້ຊ່ວຍເຫລືອ, ໃຫ້ຄວາມຫວັງ, ແລະ ໃຫ້ການປິ່ນປົວ ຕະຫລອດຊີວິດຂອງເຂົາເຈົ້າ.