ສິດ​ສອນ​ຄໍາ​ສອນ

ເຖິງ​ແມ່ນ​ວ່າ​ພຣະ​ເຢ​ຊູ​ໄດ້​ເຕີບ​ໂຕ​ຂຶ້ນ​ດ້ານ​ສະ​ຕິ​ປັນ​ຍາ ແລະ ຄວາມ​ຮູ້​ຕະ​ຫລອດ​ຊີ​ວິດ​ຂອງ​ພຣະ​ອົງ, ແຕ່​ພຣະ​ອົງ​ກໍ​ບໍ່​ເຄີຍ​ໄດ້​ຮັບ​ການ​ສຶກ​ສາ​ຄື​ກັນ​ກັບ​ຜູ້​ນຳ​ທາງ​ສາດ​ສະ​ໜາ​ຄົນ​ອື່ນໆ​ໃນ​ສະ​ໄໝ​ຂອງ​ພຣະ​ອົງ. ແລະ ເມື່ອ​ພຣະ​ອົງ​ສິດ​ສອນ, ຜູ້​ຄົນ​ໄດ້​ປະ​ຫລາດ​ໃຈ, ເວົ້າ​ວ່າ, “ເຫດ​ໃດ​ຄົນ​ນີ້​ຈຶ່ງ​ຮູ້​ກົດ​ບັນ​ຍັດ​ຫລາຍ​ແທ້, ທັງໆ​ທີ່​ລາວ​ບໍ່​ເຄີຍ​ໄດ້​ຮ່ຳ​ຮຽນ​ຈັກ​ເທື່ອ?” ເປັນ​ຫຍັງ​ການ​ສິດ​ສອນ​ຂອງ​ພຣະ​ອົງ​ຈຶ່ງ​ມີ​ພະ​ລັງ​ຫລາຍ​ແທ້? “ສິ່ງ​ທີ່​ເຮົາ​ສັ່ງ​ສອນ​ບໍ່​ແມ່ນ​ຂອງ​ເຮົາ,” ພຣະ​ຜູ້​ຊ່ວຍ​ໃຫ້​ລອດ​ໄດ້​ອະ​ທິ​ບາຍ, “ແຕ່​ແມ່ນ​ຄຳ​ສັ່ງ​ສອນ​ຈາກ​ພຣະ​ເຈົ້າ​ຜູ້​ທີ່​ໄດ້​ໃຊ້​ເຮົາ​ມາ” (ໂຢ​ຮັນ 7:15–16). ຄຳ​ສອນ​ແມ່ນ​ຄວາມ​ຈິງ​ນິ​ລັນ​ດອນ—ພົບ​ເຫັນ​ໃນ​ພຣະ​ຄຳ​ພີ ແລະ ໃນ​ຖ້ອຍ​ຄຳ​ຂອງ​ສາດ​ສະ​ດາ​ຍຸກ​ສຸດ​ທ້າຍ—ທີ່​ສະ​ແດງ​ໃຫ້​ເຮົາ​ເຫັນ​ວິ​ທີ​ທີ່​ຈະ​ກາຍ​ເປັນ​ເໝືອນ​ດັ່ງ​ພຣະ​ບິ​ດາ​ຜູ້​ສະ​ຖິດ​ຢູ່​ໃນ​ສະ​ຫວັນ​ຂອງ​ເຮົາ ແລະ ກັບ​ຄືນ​ໄປ​ຫາ​ພຣະ​ອົງ. ບໍ່​ວ່າ​ທ່ານ​ຈະ​ມີ​ປະ​ສົບ​ການ​ໜ້ອຍ​ຫລາຍ​ປານ​ໃດ​ກໍ​ຕາມ​ໃນ​ການ​ສິດ​ສອນ, ທ່ານ​ສາ​ມາດ​ສິດ​ສອນ​ດ້ວຍ​ພະ​ລັງ, ດັ່ງ​ທີ່​ພຣະ​ຜູ້​ຊ່ວຍ​ໃຫ້​ລອດ​ໄດ້​ກະ​ທຳ, ໂດຍ​ການ​ສິດ​ສອນ​ຄຳ​ສອນ​ຂອງ​ພຣະ​ບິ​ດາ. ທ່ານ ແລະ ຜູ້​ທີ່​ທ່ານ​ສິດ​ສອນ​ຈະ​ປະ​ຫລາດ​ໃຈ​ກັບ​ພອນ​ທີ່​ພຣະ​ເຈົ້າ​ໄດ້​ສົ່ງ​ມາ ເມື່ອ​ການ​ສິດ​ສອນ ແລະ ການ​ຮຽນ​ຮູ້​ຂອງ​ທ່ານ​ຕັ້ງ​ໝັ້ນ​ຢູ່​ໃນ​ພຣະ​ຄຳ​ຂອງ​ພຣະ​ອົງ.

ເພື່ອ​ສິດ​ສອນ​ຄໍາ​ສອນ

• ຮຽນ​ຮູ້​ຄຳ​ສອນ​ຂອງ​ພຣະ​ເຢ​ຊູ​ຄຣິດ​ເພື່ອ​ຕົວ​ທ່ານ​ເອງ.

• ສິດ​ສອນ​ຈາກ​ພຣະ​ຄຳ​ພີ ແລະ ຖ້ອຍ​ຄຳ​ຂອງ​ສາດ​ສະ​ດາ​ຍຸກ​ສຸດ​ທ້າຍ.

• ຊ່ວຍ​ໃຫ້​ຜູ້​ຮຽນ​ສະ​ແຫວງ​ຫາ, ຮັບ​ຮູ້, ແລະ ເຂົ້າ​ໃຈ​ຄວາມ​ຈິງ​ຢູ່​ໃນ​ພຣະ​ຄຳ​ພີ.

• ສຸມ​ໃສ່​ຄວາມ​ຈິງ​ທີ່​ນຳ​ໄປ​ສູ່​ການ​ປ່ຽນ​ໃຈ​ເຫລື້ອມ​ໃສ ແລະ ສ້າງ​ສັດ​ທາ​ໃນ​ພຣະ​ເຢ​ຊູ​ຄຣິດ.

• ຊ່ວຍ​ໃຫ້​ຜູ້​ຮຽນ​ພົບ​ເຫັນ​ຄວາມ​ກ່ຽວ​ຂ້ອງ​ສ່ວນ​ຕົວ​ໃນ​ຄຳ​ສອນ​ຂອງ​ພຣະ​ເຢ​ຊູ​ຄຣິດ.

ພຣະ​ຜູ້​ຊ່ວຍ​ໃຫ້​ລອດ​ໄດ້​ຮຽນ​ຮູ້​ຄຳ​ສອນ

ເຫັນ​ໄດ້​ຢ່າງ​ແຈ່ມ​ແຈ້ງ​ວ່າ ພຣະ​ຜູ້​ຊ່ວຍ​ໃຫ້​ລອດ​ໄດ້​ຮຽນ​ຮູ້​ຈາກ​ພຣະ​ຄຳ​ພີ​ໃນ​ໄວ​ເຍົາ​ຂອງ​ພຣະ​ອົງ ແລະ ພຣະ​ອົງ​ໄດ້​ເຕີບ​ໂຕ​ຂຶ້ນ “ດ້ານ​ສະ​ຕິ​ປັນ​ຍາ … ເປັນ​ທີ່​ພໍ​ພຣະ​ໄທ​ຕໍ່​ພຣະ​ເຈົ້າ” (ລູ​ກາ 2:52). ຄວາມ​ເຂົ້າ​ໃຈ​ທີ່​ເລິກ​ເຊິ່ງ​ຂອງ​ພຣະ​ອົງ​ເຖິງ​ຄຳ​ສອນ​ຂອງ​ພຣະ​ບິ​ດາ​ກໍ​ຊັດ​ເຈນ ເມື່ອ​ບິ​ດາ​ມານ​ດາ​ຂອງ​ພຣະ​ອົງ​ພົບ​ເຫັນ​ພຣະ​ອົງ​ຢູ່​ໃນ​ພຣະ​ວິ​ຫານ​ຕອນ​ພຣະ​ອົງ​ຍັງ​ນ້ອຍ, ກຳ​ລັງ​ສິດ​ສອນ​ພວກ​ອາ​ຈານ​ຊາວ​ຢິວ ແລະ ຕອບ​ຄຳ​ຖາມ​ຂອງ​ເຂົາ​ເຈົ້າ​ຢູ່ (ເບິ່ງ ​ການ​ແປ​ຂອງ​ໂຈ​ເຊັບ ສະ​ມິດ, ລູ​ກາ 2:46 [ໃນ ລູ​ກາ 2:46, ໝາຍ​ເຫດ​ຢູ່​ທາງ​ລຸ່ມ​ໜ້າ​ປຶ້ມ ຄ]). ຕໍ່​ມາ, ເມື່ອ​ຊາ​ຕານ​ໄດ້​ພະ​ຍາ​ຍາມ​ລໍ້​ລວງ​ພຣະ​ອົງ​ຢ່າງ​ໜັກ​ຢູ່​ໃນ​ຖິ່ນ​ແຫ້ງ​ແລ້ງ​ກັນ​ດານ, ຄວາມ​ຮູ້​ຂອງ​ພຣະ​ເຢ​ຊູ​ເລື່ອງ​ຄຳ​ສອນ​ຢູ່​ໃນ​ພຣະ​ຄຳ​ພີ​ໄດ້​ຊ່ວຍ​ໃຫ້​ພຣະ​ອົງ​ຕ້ານ​ທານ​ກັບ​ການ​ລໍ້​ລວງ​ໄດ້ (ເບິ່ງ ລູ​ກາ 4:3–12).

ທ່ານ​ກໍ​ສາ​ມາດ​ຮຽນ​ຮູ້​ຄຳ​ສອນ​ທີ່​ແທ້​ຈິງ​ໃຫ້​ເລິກ​ເຊິ່ງ​ຫລາຍ​ກວ່າ​ເກົ່າ​ເໝືອນ​ກັນ ກ່ອນ​ທີ່​ທ່ານ​ຈະ​ສິດ​ສອນ​ມັນ. ຂະ​ນະ​ທີ່​ທ່ານ​ກະ​ກຽມ​ທີ່​ຈະ​ສິດ​ສອນ ແລະ ຮຽນ​ຮູ້​ກັບ​ຄົນ​ອື່ນ, ໃຫ້​ຊອກ​ຫາ​ສິ່ງ​ທີ່​ພຣະ​ຜູ້​ເປັນ​ເຈົ້າ​ໄດ້​ກ່າວ​ກ່ຽວ​ກັບ​ຄວາມ​ຈິງ​ທີ່​ທ່ານ​ກຳ​ລັງ​ສິດ​ສອນ​ຢ່າງ​ລະ​ມັດ​ລະ​ວັງ. ຄົ້ນ​ຄວ້າ​ພຣະ​ຄຳ​ພີ ແລະ ຖ້ອຍ​ຄຳ​ຂອງ​ສາດ​ສະ​ດາ​ທີ່​ມີ​ຊີ​ວິດ​ຢູ່​ເພື່ອ​ຄຳ​ອະ​ທິ​ບາຍ ແລະ ຄຳ​ແນະ​ນຳ. ການ​ດຳ​ລົງ​ຊີ​ວິດ ແລະ ການ​ນຳ​ໃຊ້​ຄວາມ​ຈິງ​ທີ່​ທ່ານ​ສຶກ​ສາ​ຈະ​ເຊື້ອ​ເຊີນ​ໃຫ້​ພຣະ​ວິນ​ຍານ​ມາ​ສິດ​ສອນ​ຄຳ​ສອນ​ໃຫ້​ກັບ​ທ່ານ​ໃນ​ວິ​ທີ​ທາງ​ທີ່​ເລິກ​ເຊິ່ງ​ກວ່າ ແລະ ຢືນ​ຢັນ​ຄວາມ​ຈິງ​ຂອງ​ຄຳ​ສອນ​ໃນ​ຫົວ​ໃຈ​ຂອງ​ຜູ້​ທີ່​ທ່ານ​ສິດ​ສອນ.

ຄຳ​ຖາມ​ເພື່ອ​ໄຕ່​ຕອງ: ເປັນ​ຫຍັງ​ການ​ເຂົ້າ​ໃຈ​ຄວາມ​ຈິງ​ຂອງ​ພຣະ​ກິດ​ຕິ​ຄຸນ​ຈຶ່ງ​ສຳ​ຄັນ​ຕໍ່​ທ່ານ​ເອງ​ຫລາຍ​ແທ້? ທ່ານ​ຈະ​ມີ​ຄວາມ​ເຂົ້າ​ໃຈ​ຢ່າງ​ເລິກ​ເຊິ່ງ​ກວ່າ​ເກົ່າ​ເຖິງ​ຄວາມ​ຈິງ​ຂອງ​ພຣະ​ກິດ​ຕິ​ຄຸນ​ໄດ້​ແນວ​ໃດ? ທ່ານ​ຮູ້​ສຶກ​ໄດ້​ຮັບ​ການ​ດົນ​ໃຈ​ໃຫ້​ເຮັດ​ຫຍັງ​ເພື່ອ​ປັບ​ປຸງ​ການ​ສຶກ​ສາ​ພຣະ​ຄຳ​ພີ​ຂອງ​ທ່ານ ແລະ ຖ້ອຍ​ຄຳ​ຂອງ​ສາດ​ສະ​ດາ​ທີ່​ມີ​ຊີ​ວິດ​ຢູ່?

ຈາກ​ພຣະ​ຄຳ​ພີ: ສຸ​ພາ​ສິດ 7:1–3; 2 ນີ​ໄຟ 4:15–16; ຄຳ​ສອນ ແລະ ພັນ​ທະ​ສັນ​ຍາ 11:21; 88:118

ພຣະ​ຜູ້​ຊ່ວຍ​ໃຫ້​ລອດ​ໄດ້​ສິດ​ສອນ​ຈາກ​ພຣະ​ຄຳ​ພີ

ຫລັງ​ຈາກ​ການ​ສິ້ນ​ພຣະ​ຊົນ​ຂອງ​ພຣະ​ຜູ້​ຊ່ວຍ​ໃຫ້​ລອດ, ສາ​ວົກ​ສອງ​ຄົນ​ຂອງ​ພຣະ​ອົງ​ໄດ້​ຍ່າງ ແລະ ເວົ້າ​ລົມ​ກັນ​ໄປ​ດ້ວຍ​ຄວາມ​ໂສກ​ເສົ້າ ແລະ ຄວາມ​ປະ​ຫລາດ​ໃຈ. ພວກ​ເພິ່ນ​ຈະ​ເຂົ້າ​ໃຈ​ໄດ້​ແນວ​ໃດ​ກ່ຽວ​ກັບ​ສິ່ງ​ທີ່​ຫາ​ກໍ​ໄດ້​ເກີດ​ຂຶ້ນ? ພຣະ​ເຢ​ຊູ​ແຫ່ງ​ນາ​ຊາ​ເຣັດ, ຊາຍ​ທີ່​ພວກ​ເພິ່ນ​ໄວ້​ວາງ​ໃຈ​ວ່າ​ເປັນ​ພຣະ​ຜູ້​ໄຖ່​ຂອງ​ພວກ​ເພິ່ນ, ໄດ້​ເສຍ​ຊີ​ວິດ​ໄດ້​ສາມ​ມື້​ແລ້ວ​ຕອນ​ນັ້ນ. ແລະ ແລ້ວ​ພວກ​ເພິ່ນ​ໄດ້​ຖືກ​ລາຍ​ງານ​ວ່າ ອຸບ​ມຸງ​ຂອງ​ພຣະ​ອົງ​ວ່າງ​ເປົ່າ, ໂດຍ​ມີ​ເຫລົ່າ​ທູດ​ປະ​ກາດ​ວ່າ​ພຣະ​ອົງ​ຊົງ​ພຣະ​ຊົນ​ຢູ່! ໃນ​ຈຸດ​ທີ່​ສຳ​ຄັນ​ໃນ​ສັດ​ທາ​ຂອງ​ພວກ​ສາ​ວົກ​ເຫລົ່າ​ນີ້, ມີ​ຊາຍ​ແປກ​ໜ້າ​ໄດ້​ມາ​ຮ່ວມ​ເດີນ​ທາງ​ກັບ​ພວກ​ເພິ່ນ. ເພິ່ນ​ໄດ້​ປອບ​ໂຍນ​ພວກ​ເພິ່ນ​ໂດຍ “ອະ​ທິ​ບາຍ​ພຣະ​ຄຳ​ພີ​ທຸກ​ຕອນ ທີ່​ກ່າວ​ເຖິງ​ເລື່ອງ [ພຣະ​ຜູ້​ຊ່ວຍ​ໃຫ້​ລອດ].” ໃນ​ທີ່​ສຸດ, ຜູ້​ເດີນ​ທາງ​ກໍ​ຮັບ​ຮູ້​ວ່າ ຜູ້​ສິດ​ສອນ​ພວກ​ເພິ່ນ​ແມ່ນ​ພຣະ​ເຢ​ຊູ​ຄຣິດ​ເອງ ແລະ ວ່າ​ພຣະ​ອົງ​ໄດ້​ຟື້ນ​ຄືນ​ແທ້ໆ. ເປັນ​ຫຍັງ​ພວກ​ເພິ່ນ​ຈຶ່ງ​ຈື່​ພຣະ​ອົງ​ບໍ່​ໄດ້? “ໃຈ​ຂອງ​ພວກ​ເຮົາ​ກໍ​ຮ້ອນ​ຮົນ​ເໝືອນ​ໄຟ​ພາຍ​ໃນ​ພວກ​ເຮົາ​ບໍ່​ແມ່ນ​ບໍ,” ພາຍ​ລຸນ​ມາ​ພວກ​ເພິ່ນ​ໄດ້​ສະ​ທ້ອນ​ຄິດ, “ເມື່ອ​ພຣະ​ອົງ​ກຳ​ລັງ​ເວົ້າ​ນຳ​ພວກ​ເຮົາ​ຕາມ​ທາງ ແລະ ໄດ້​ອະ​ທິ​ບາຍ​ພຣະ​ຄຳ​ພີ​ໃຫ້​ພວກ​ເຮົາ​ຟັງ?” (ລູ​ກາ 24:27, 32).

ແອວ​ເດີ ດີ ທອດ ຄຣິສ​ໂຕ​ເຟີ​ສັນ ໄດ້​ສິດ​ສອນ​ວ່າ, “ຈຸດ​ປະ​ສົງ​ແທ້ໆ​ຂອງ​ພຣະ​ຄຳ​ພີ​ທັງ​ໝົດ ຄື​ທີ່​ຈະ​ເຮັດ​ໃຫ້​ຈິດ​ວິນ​ຍານ​ຂອງ​ເຮົາ​ເຕັມ​ໄປ​ດ້ວຍ​ສັດ​ທາ​ໃນ​ພຣະ​ເຈົ້າ​ອົງ​ເປັນ​ພຣະ​ບິ​ດາ ແລະ ໃນ​ພຣະ​ບຸດ​ຂອງ​ພຣະ​ອົງ, ພຣະ​ເຢ​ຊູ​ຄຣິດ” (“The Blessing of Scripture,” Liahona, May 2010, 34). ຕະ​ຫລອດ​ທົ່ວ​ການ​ປະ​ຕິ​ບັດ​ສາດ​ສະ​ໜາ​ກິດ​ຂອງ​ພຣະ​ອົງ, ພຣະ​ເຢ​ຊູ​ໄດ້​ໃຊ້​ພຣະ​ຄຳ​ພີ​ເພື່ອ​ສິດ​ສອນ, ດັດ​ແປງ, ແລະ ດົນ​ໃຈ​ຄົນ​ອື່ນ. ໃຫ້​ແນ່​ໃຈ​ວ່າ​ການ​ສິດ​ສອນ​ຂອງ​ທ່ານ​ບໍ່​ໄດ້​ອອກ​ໄປ​ຈາກ​ພຣະ​ຄຳ​ພີ ແລະ ຖ້ອຍ​ຄຳ​ຂອງ​ສາດ​ສະ​ດາ. ເມື່ອ​ທ່ານ​ເພິ່ງ​ອາ​ໄສ​ພຣະ​ຄຳ​ຂອງ​ພຣະ​ເຈົ້າ​ຢ່າງ​ຊື່​ສັດ​ໃນ​ການ​ສິດ​ສອນ​ຂອງ​ທ່ານ, ທ່ານ​ຈະ​ສາ​ມາດ​ເຮັດ​ເພື່ອ​ຄົນ​ອື່ນ​ໃນ​ສິ່ງ​ທີ່​ພຣະ​ຜູ້​ຊ່ວຍ​ໃຫ້​ລອດ​ໄດ້​ກະ​ທຳ. ທ່ານ​ສາ​ມາດ​ຊ່ວຍ​ໃຫ້​ເຂົາ​ເຈົ້າ​ຮູ້​ຈັກ​ພຣະ​ອົງ, ເພາະ​ເຮົາ​ທຸກ​ຄົນ​ຕ້ອງ​ການ​ເພີ່ມ​ຄວາມ​ເຂັ້ມ​ແຂງ​ໃຫ້​ແກ່​ສັດ​ທາ​ຂອງ​ເຮົາ​ໃນ​ພຣະ​ຜູ້​ຊ່ວຍ​ໃຫ້​ລອດ​ເປັນ​ປະ​ຈຳ. ຄວາມ​ຮັກ​ຂອງ​ທ່ານ​ຕໍ່​ພຣະ​ຄຳ​ພີ​ຈະ​ເຫັນ​ໄດ້​ຢ່າງ​ຊັດ​ເຈນ​ຕໍ່​ຜູ້​ທີ່​ທ່ານ​ສິດ​ສອນ, ແລະ ການ​ສິດ​ສອນ​ຂອງ​ທ່ານ​ຈະ​ເຊື້ອ​ເຊີນ​ພຣະ​ວິນ​ຍານ​ເຮັດ​ໃຫ້​ໃຈ​ຂອງ​ເຂົາ​ເຈົ້າ​ຮ້ອນ​ຮົນ​ເໝືອນ​ໄຟ​ດ້ວຍ​ປະ​ຈັກ​ພະ​ຍານ​ເຖິງ​ພຣະ​ບິ​ດາ ແລະ ພຣະ​ບຸດ.

ຄຳ​ຖາມ​ເພື່ອ​ໄຕ່​ຕອງ: ທ່ານ​ໄດ້​ຮັບ​ອິດ​ທິ​ພົນ​ຈາກ​ຄູ​ສອນ​ທີ່​ໃຊ້​ພຣະ​ຄຳ​ພີ​ເພື່ອ​ຊ່ວຍ​ໃຫ້​ທ່ານ​ມາ​ຮູ້​ຈັກ​ພຣະ​ຜູ້​ຊ່ວຍ​ໃຫ້​ລອດ​ດີ​ຂຶ້ນ​ແນວ​ໃດ? ທ່ານ​ອາດ​ເຮັດ​ສິ່ງ​ໃດ​ເພື່ອ​ເພິ່ງ​ອາ​ໄສ​ພຣະ​ຄຳ​ພີ ແລະ ຖ້ອຍ​ຄຳ​ຂອງ​ສາດ​ສະ​ດາ​ຫລາຍ​ຂຶ້ນ​ຂະ​ນະ​ທີ່​ທ່ານ​ສິດ​ສອນ? ທ່ານ​ຈະ​ຊ່ວຍ​ໃຫ້​ຄົນ​ທີ່​ທ່ານ​ສິດ​ສອນ​ຮູ້​ຈັກ ແລະ ຮັກ​ພຣະ​ຄຳ​ຂອງ​ພຣະ​ເຈົ້າ​ໄດ້​ແນວ​ໃດ?

ຈາກ​ພຣະ​ຄຳ​ພີ: ລູ​ກາ 4:14–21; ແອວ​ມາ 31:5; ຮີ​ລາ​ມັນ 3:29–30; 3 ນີ​ໄຟ 23

ພຣະ​ຜູ້​ຊ່ວຍ​ໃຫ້​ລອດ​ໄດ້​ຊ່ວຍ​ໃຫ້​ຜູ້​ຄົນ​ສະ​ແຫວງ​ຫາ, ຮັບ​ຮູ້, ແລະ ເຂົ້າ​ໃຈ​ຄວາມ​ຈິງ

ຄັ້ງ​ໜຶ່ງ​ທະ​ນາຍ​ຄວາມ​ຄົນ​ໜຶ່ງ​ໄດ້​ຖາມ​ພຣະ​ເຢ​ຊູ​ວ່າ, “ອາ​ຈານ​ເອີຍ, ຂ້າ​ນ້ອຍ​ຈະ​ຕ້ອງ​ເຮັດ​ຢ່າງ​ໃດ ຈຶ່ງ​ຈະ​ໄດ້​ຮັບ​ຊີ​ວິດ​ນິ​ລັນ​ດອນ?” ໃນ​ການ​ຕອບ​ນັ້ນ, ພຣະ​ຜູ້​ຊ່ວຍ​ໃຫ້​ລອດ​ໄດ້​ນຳ​ພາ​ຜູ້​ຖາມ​ໄປ​ຫາ​ຂໍ້​ພຣະ​ຄຳ​ພີ​ທີ່​ວ່າ: “ກົດ​ບັນ​ຍັດ​ມີ​ຂຽນ​ໄວ້​ວ່າ​ຢ່າງ​ໃດ? ເມື່ອ​ທ່ານ​ອ່ານ​ແລ້ວ ເຂົ້າ​ໃຈ​ຢ່າງ​ໃດ?” ສິ່ງ​ນີ້​ບໍ່​ພຽງ​ແຕ່​ນຳ​ພາ​ຊາຍ​ຄົນ​ນັ້ນ​ໄປ​ຫາ​ຄຳ​ຕອບ​ຂອງ​ລາວ​ເທົ່າ​ນັ້ນ—“ຈົ່ງ​ຮັກ​ພຣະ​ຜູ້​ເປັນ​ເຈົ້າ ພຣະ​ເຈົ້າ​ຂອງ​ເຈົ້າ … ແລະ ເພື່ອນ​ບ້ານ​ຂອງ​ເຈົ້າ”—ແຕ່​ຍັງ​ໄດ້​ຖາມ​ຄຳ​ຖາມ​ດັ່ງ​ຕໍ່​ໄປ​ນີ້​ນຳ​ອີກ: “ແມ່ນ​ຜູ້​ໃດ​ເປັນ​ເພື່ອນ​ບ້ານ​ຂອງ​ຂ້າ​ນ້ອຍ?” ພຣະ​ຜູ້​ຊ່ວຍ​ໃຫ້​ລອດ​ໄດ້​ຕອບ​ຄຳ​ຖາມ​ດ້ວຍ​ຄຳ​ອຸ​ປະ​ມາ​ກ່ຽວ​ກັບ​ຜູ້​ຊາຍ​ສາມ​ຄົນ​ທີ່​ໄດ້​ເຫັນ​ຜູ້​ເດີນ​ທາງ​ທີ່​ຕ້ອງ​ການ​ຄວາມ​ຊ່ວຍ​ເຫລືອ. ມີ​ພຽງ​ແຕ່​ຊາຍ​ຄົນ​ດຽວ​ໃນ​ສາມ​ຄົນ​ນັ້ນ, ຜູ້​ເປັນ​ຊາວ​ຊາ​ມາ​ເຣຍ, ທີ່​ຊາວ​ຢິວ​ກຽດ​ຊັງ ເພາະ​ບ່ອນ​ທີ່​ລາວ​ອາ​ໄສ​ຢູ່, ໄດ້​ຢຸດ​ເພື່ອ​ຊ່ວຍ​ເຫລືອ. ແລ້ວ​ພຣະ​ເຢ​ຊູ​ໄດ້​ເຊື້ອ​ເຊີນ​ໃຫ້​ທະ​ນາຍ​ຄວາມ​ຄົນ​ນັ້ນ​ຕອບ​ຄຳ​ຖາມ​ຂອງ​ລາວ​ເອງ: “ໃນ​ສາມ​ຄົນ​ນີ້, ແມ່ນ​ຜູ້​ໃດ​ທີ່​ເປັນ​ເພື່ອນ​ບ້ານ​ຂອງ​ຄົນ​ທີ່​ຖືກ​ພວກ​ໂຈນ​ປຸ້ນ​ນັ້ນ?” (ເບິ່ງ ລູ​ກາ 10:25–37).

ທ່ານ​ຄິດ​ວ່າ​ເປັນ​ຫຍັງ​ພຣະ​ຜູ້​ຊ່ວຍ​ໃຫ້​ລອດ​ຈຶ່ງ​ໄດ້​ສິດ​ສອນ​ໃນ​ວິ​ທີ​ນີ້—ເປັນ​ການ​ຕອບ​ຄຳ​ຖາມ​ດ້ວຍ​ຄຳ​ເຊື້ອ​ເຊີນ​ໃຫ້​ສະ​ແຫວງ​ຫາ, ໄຕ່​ຕອງ, ແລະ ຄົ້ນ​ພົບ? ພາກ​ສ່ວນ​ໜຶ່ງ​ຂອງ​ຄຳ​ຕອບ​ຄື ພຣະ​ຜູ້​ເປັນ​ເຈົ້າ​ເຫັນ​ຄຸນ​ຄ່າ​ຄວາມ​ພະ​ຍາ​ຍາມ​ຂອງ​ຜູ້​ຊອກ​ຫາ​ຄວາມ​ຈິງ. “ຈົ່ງ​ໝັ່ນ​ຊອກ​ຫາ, ແລ້ວ​ເຈົ້າ​ກໍ​ຈະ​ໄດ້​ພົບ,” ພຣະ​ອົງ​ໄດ້​ເຊື້ອ​ເຊີນ​ເທື່ອ​ແລ້ວ​ເທື່ອ​ອີກ (ເບິ່ງ, ຍົກ​ຕົວ​ຢ່າງ, ມັດ​ທາຍ 7:7; ລູ​ກາ 11:9; ຄຳ​ສອນ ແລະ ພັນ​ທະ​ສັນ​ຍາ 4:7). ພຣະ​ອົງ​ປະ​ທານ​ລາງ​ວັນ​ໃຫ້​ແກ່​ການ​ກະ​ທຳ ແລະ ຄວາມ​ອົດ​ທົນ​ດ້ວຍ​ສັດ​ທາ​ຂອງ​ຜູ້​ຊອກ​ຫາ.

ຄື​ກັນ​ກັບ​ພຣະ​ຜູ້​ຊ່ວຍ​ໃຫ້​ລອດ, ທ່ານ​ກໍ​ສາ​ມາດ​ຊ່ວຍ​ໃຫ້​ຜູ້​ທີ່​ທ່ານ​ສິດ​ສອນ​ຮັບ​ຮູ້ ແລະ ເຂົ້າ​ໃຈ​ຄວາມ​ຈິງ​ໄດ້. ຍົກ​ຕົວ​ຢ່າງ, ພຣະ​ຄຳ​ພີ​ແມ່ນ​ເຕັມ​ໄປ​ດ້ວຍ​ຄວາມ​ຈິງ​ຂອງ​ພຣະ​ກິດ​ຕິ​ຄຸນ, ແຕ່​ບາງ​ເທື່ອ​ຕ້ອງ​ໃຊ້​ຄວາມ​ພະ​ຍາ​ຍາມ​ຢ່າງ​ມີ​ສະ​ຕິ​ເພື່ອ​ຊອກ​ຫາ​ມັນ. ຂະ​ນະ​ທີ່​ພວກ​ທ່ານ​ຮຽນ​ຮູ້​ນຳ​ກັນ​ຈາກ​ພຣະ​ຄຳ​ພີ, ໃຫ້​ຢຸດ ແລະ ຖາມ​ຜູ້​ທີ່​ທ່ານ​ສິດ​ສອນ​ວ່າ ເຂົາ​ເຈົ້າ​ໄດ້​ສັງ​ເກດ​ເຫັນ​ຄວາມ​ຈິງ​ຂອງ​ພຣະ​ກິດ​ຕິ​ຄຸນ​ຢ່າງ​ໃດ​ແດ່. ຊ່ວຍ​ໃຫ້​ເຂົາ​ເຈົ້າ​ເຫັນ​ວິ​ທີ​ທີ່​ຄວາມ​ຈິງ​ເຫລົ່າ​ນີ້​ກ່ຽວ​ຂ້ອງ​ກັບ​ແຜນ​ແຫ່ງ​ຄວາມ​ລອດ​ຂອງ​ພຣະ​ບິ​ດາ​ເທິງ​ສະ​ຫວັນ​ແນວ​ໃດ. ບາງ​ເທື່ອ​ຄວາມ​ຈິງ​ນິ​ລັນ​ດອນ​ຖືກ​ກ່າວ​ເຖິງ​ຢູ່​ໃນ​ພຣະ​ຄຳ​ພີ, ແລະ ບາງ​ເທື່ອ​ມັນ​ຖືກ​ສະ​ແດງ​ໃຫ້​ເຫັນ​ຢູ່​ໃນ​ເລື່ອງ​ລາວ ແລະ ຊີ​ວິດ​ຂອງ​ຜູ້​ຄົນ​ທີ່​ທ່ານ​ອ່ານ​ກ່ຽວ​ກັບ. ມັນ​ກໍ​ຍັງ​ເປັນ​ປະ​ໂຫຍດ​ນຳ​ອີກ​ທີ່​ຈະ​ຄົ້ນ​ຄວ້າ​ເບື້ອງ​ຫລັງ​ປະ​ຫວັດ​ສາດ​ຂອງ​ຂໍ້​ເຫລົ່າ​ນັ້ນ​ນຳ​ກັນ ຂະ​ນະ​ທີ່​ທ່ານ​ອ່ານ, ຕະ​ຫລອດ​ທັງ​ຄວາມ​ໝາຍ​ຂອງ​ຂໍ້​ເຫລົ່າ​ນັ້ນ ແລະ ວິ​ທີ​ທີ່​ມັນ​ກ່ຽວ​ຂ້ອງ​ກັບ​ເຮົາ​ໃນ​ທຸກ​ວັນ​ນີ້​ແນວ​ໃດ.

ຄຳ​ຖາມ​ເພື່ອ​ໄຕ່​ຕອງ: ທ່ານ​ຊີ້​ບອກ​ຄວາມ​ຈິງ​ນິ​ລັນ​ດອນ​ໃນ​ພຣະ​ຄຳ​ພີ ຫລື ຖ້ອຍ​ຄຳ​ຂອງ​ສາດ​ສະ​ດາ​ແນວ​ໃດ? ຄວາມ​ຈິງ​ເຫລົ່າ​ນັ້ນ​ເປັນ​ພອນ​ໃຫ້​ແກ່​ຊີ​ວິດ​ຂອງ​ທ່ານ​ແນວ​ໃດ? ມີ​ວິ​ທີ​ໃດ​ແດ່​ທີ່​ທ່ານ​ສາ​ມາດ​ຊ່ວຍ​ໃຫ້​ຜູ້​ຮຽນ​ຮັບ​ຮູ້ ແລະ ເຂົ້າ​ໃຈ​ຄວາມ​ຈິງ​ທີ່​ຈະ​ມີ​ຄວາມ​ໝາຍ​ຕໍ່​ເຂົາ​ເຈົ້າ ແລະ ຊ່ວຍ​ໃຫ້​ເຂົາ​ເຈົ້າ​ເຂົ້າ​ໃກ້​ພຣະ​ເຈົ້າ​ຫລາຍ​ຂຶ້ນ?

ຈາກ​ພຣະ​ຄຳ​ພີ: ໂຢ​ຮັນ 5:39; 1 ນີ​ໄຟ 15:14; ຄຳ​ສອນ ແລະ ພັນ​ທະ​ສັນ​ຍາ 42:12

ເຮົາ​ສາ​ມາດ​ຊ່ວຍ​ໃຫ້​ຄົນ​ທີ່​ເຮົາ​ສິດ​ສອນ​ຊອກ​ຫາ ແລະ ຮັບ​ຮູ້​ຄວາມ​ຈິງ​ສຳ​ລັບ​ຕົວ​ເຂົາ​ເຈົ້າ​ເອງ.

ພຣະ​ຜູ້​ຊ່ວຍ​ໃຫ້​ລອດ​ໄດ້​ສິດ​ສອນ​ຄວາມ​ຈິງ​ທີ່​ນຳ​ໄປ​ສູ່​ການ​ປ່ຽນ​ໃຈ​ເຫລື້ອມ​ໃສ ແລະ ສ້າງ​ສັດ​ທາ

ໃນ​ວັນ​ຊະ​ບາ​ໂຕ​ມື້​ໜຶ່ງ, ພຣະ​ຜູ້​ຊ່ວຍ​ໃຫ້​ລອດ ແລະ ພວກ​ສາ​ວົກ​ຂອງ​ພຣະ​ອົງ, ຮູ້​ສຶກ​ຫິວ​ເຂົ້າ, ໄດ້​ຍ່າງ​ຜ່ານ​ທົ່ງ​ເຂົ້າ ແລະ ໄດ້​ເດັດ​ເອົາ​ຮວງ​ເຂົ້າ​ມາ​ກິນ. ພວກ​ຟາ​ຣີ​ຊາຍ, ຊຶ່ງ​ມັກ​ຈະ​ຮີບ​ຮ້ອນ​ໃນ​ການ​ເນັ້ນ​ໜັກ​ເຖິງ​ຈຸດ​ສຳ​ຄັນ​ຂອງ​ກົດ​ຂອງ​ໂມ​ເຊ​ສະ​ເໝີ, ໄດ້​ຊີ້​ບອກ​ວ່າ​ການ​ເກັບ​ເຂົ້າ​ແມ່ນ​ການ​ອອກ​ແຮງ​ງານ, ຊຶ່ງ​ຖືກ​ສັ່ງ​ຫ້າມ​ໃນ​ວັນ​ຊະ​ບາ​ໂຕ (ເບິ່ງ ມາ​ຣະ​ໂກ 2:23–24). ໃນ​ການ​ໃຊ້​ວະ​ລີ​ຂອງ​ສາດ​ສະ​ດາ​ຢາ​ໂຄບ​ໃນ​ພຣະ​ຄຳ​ພີ​ມໍ​ມອນ, ພວກ​ຟາ​ຣີ​ຊາຍ​ໄດ້ “ເບິ່ງ​ຂ້າມ​ເຄື່ອງ​ໝາຍ” (ຢາ​ໂຄບ 4:14). ໃນ​ອີກ​ຄຳ​ໜຶ່ງ, ພວກ​ເຂົາ​ໄດ້​ສຸມ​ໃສ່​ການ​ຕີ​ຄວາມ​ໝາຍ​ແບບ​ດັ້ງ​ເດີມ​ຂອງ​ພຣະ​ບັນ​ຍັດ ຈົນ​ພວກ​ເຂົາ​ພາດ​ຈຸດ​ປະ​ສົງ​ອັນ​ສູງ​ສົ່ງ​ຂອງ​ພຣະ​ບັນ​ຍັດ​ເຫລົ່າ​ນັ້ນ—ເພື່ອ​ດຶງ​ເຮົາ​ໃຫ້​ເຂົ້າ​ໃກ້​ພຣະ​ເຈົ້າ​ຫລາຍ​ຂຶ້ນ. ຕາມ​ຈິງ​ແລ້ວ, ພວກ​ຟາ​ຣີ​ຊາຍ​ບໍ່​ຮູ້​ຊ້ຳ​ວ່າ ຜູ້​ທີ່​ຕັ້ງ​ພຣະ​ບັນ​ຍັດ​ເພື່ອ​ໃຫ້​ກຽດ​ແກ່​ວັນ​ຊະ​ບາ​ໂຕ​ກຳ​ລັງ​ຢືນ​ຢູ່​ຕໍ່​ໜ້າ​ພວກ​ເຂົາ.

ພຣະ​ຜູ້​ຊ່ວຍ​ໃຫ້​ລອດ​ໄດ້​ໃຊ້​ໂອ​ກາດ​ນີ້​ເພື່ອ​ເປັນ​ພະ​ຍານ​ເຖິງ​ເອ​ກະ​ລັກ​ອັນ​ສູງ​ສົ່ງ​ຂອງ​ພຣະ​ອົງ ແລະ ເພື່ອ​ສິດ​ສອນ ເຫດ​ຜົນ ວ່າ​ວັນ​ຊະ​ບາ​ໂຕ​ສຳ​ຄັນ​ແນວ​ໃດ. ມັນ​ໄດ້​ຖືກ​ສ້າງ​ຂຶ້ນ​ສຳ​ລັບ​ເຮົາ ໃຫ້​ເປັນ​ວັນ​ນະ​ມັດ​ສະ​ການ​ພຣະ​ຜູ້​ເປັນ​ເຈົ້າ​ຂອງ​ວັນ​ຊະ​ບາ​ໂຕ, ພຣະ​ເຢ​ຊູ​ຄຣິດ​ພຣະ​ອົງ​ເອງ (ເບິ່ງ ມາ​ຣະ​ໂກ 2:27–28). ຄວາມ​ຈິງ​ເຊັ່ນ​ນັ້ນ​ໄດ້​ຊ່ວຍ​ໃຫ້​ເຮົາ​ເຂົ້າ​ໃຈ​ວ່າ ພຣະ​ບັນ​ຍັດ​ຂອງ​ພຣະ​ເຈົ້າ​ແມ່ນ​ກ່ຽວ​ກັບ​ຫລາຍ​ກວ່າ​ພຽງ​ແຕ່​ການ​ປະ​ພຶດ​ພາຍ​ນອກ​ຂອງ​ເຮົາ​ເທົ່າ​ນັ້ນ. ມັນ​ມີ​ເຈດ​ຕະ​ນາ​ທີ່​ຈະ​ຊ່ວຍ​ໃຫ້​ເຮົາ​ປ່ຽນ​ແປງ​ໃຈ​ຂອງ​ເຮົາ ແລະ ປ່ຽນ​ໃຈ​ເຫລື້ອມ​ໃສ​ຢ່າງ​ເຕັມ​ທີ່​ຫລາຍ​ຂຶ້ນ.

ໃຫ້​ພິ​ຈາ​ລະ​ນາ​ຢ່າງ​ລະ​ມັດ​ລະ​ວັງ​ກ່ຽວ​ກັບ​ຄຳ​ສອນ ແລະ ຫລັກ​ທຳ​ທີ່​ທ່ານ​ຕັດ​ສິນ​ໃຈ​ສຸມ​ໃສ່. ເຖິງ​ແມ່ນ​ຈະ​ມີ​ຄວາມ​ຈິງ​ຢ່າງ​ຫລວງ​ຫລາຍ​ຢູ່​ໃນ​ພຣະ​ຄຳ​ພີ​ທີ່​ສາ​ມາດ​ສົນ​ທະ​ນາ, ດີ​ທີ່​ສຸດ​ແມ່ນ​ໃຫ້​ສຸມ​ໃສ່​ຄວາມ​ຈິງ​ຂອງ​ພຣະ​ກິດ​ຕິ​ຄຸນ​ທີ່​ນຳ​ພາ​ໄປ​ສູ່​ການ​ປ່ຽນ​ໃຈ​ເຫລື້ອມ​ໃສ ແລະ ສ້າງ​ສັດ​ທາ​ໃນ​ພຣະ​ເຢ​ຊູ​ຄຣິດ. ຄວາມ​ຈິງ​ທີ່​ລຽບ​ງ່າຍ ແລະ ເປັນ​ພື້ນ​ຖານ​ທີ່​ພຣະ​ຜູ້​ຊ່ວຍ​ໃຫ້​ລອດ​ໄດ້​ສິດ​ສອນ ແລະ ເປັນ​ຕົວ​ຢ່າງ ມີ​ພະ​ລັງ​ທີ່​ຍິ່ງ​ໃຫຍ່​ທີ່​ສຸດ​ໃນ​ການ​ປ່ຽນ​ແປງ​ຊີ​ວິດ​ຂອງ​ເຮົາ—ເປັນ​ຄວາມ​ຈິງ​ກ່ຽວ​ກັບ​ການ​ຊົດ​ໃຊ້​ຂອງ​ພຣະ​ອົງ, ແຜນ​ແຫ່ງ​ຄວາມ​ລອດ, ແລະ ພຣະ​ບັນ​ຍັດ​ທີ່​ໃຫ້​ຮັກ​ພຣະ​ເຈົ້າ ແລະ ຮັກ​ເພື່ອນ​ບ້ານ​ຂອງ​ເຮົາ, ແລະ ອື່ນໆ. ການ​ເຊື້ອ​ເຊີນ​ໃຫ້​ພຣະ​ວິນ​ຍານ​ສະ​ແດງ​ປະ​ຈັກ​ພະ​ຍານ​ເຖິງ​ຄວາມ​ຈິງ​ເຫລົ່າ​ນີ້, ຈະ​ຊ່ວຍ​ໃຫ້​ຄວາມ​ຈິງ​ເຂົ້າ​ເຖິງ​ສ່ວນ​ເລິກ​ຂອງ​ໃຈ​ຂອງ​ຜູ້​ທີ່​ທ່ານ​ສິດ​ສອນ.

ຄຳ​ຖາມ​ເພື່ອ​ໄຕ່​ຕອງ: ມີ​ຄວາມ​ຈິງ​ຂອງ​ພຣະ​ກິດ​ຕິ​ຄຸນ​ບາງ​ຢ່າງ​ໃດ​ແດ່​ທີ່​ຊ່ວຍ​ໃຫ້​ທ່ານ​ກາຍ​ເປັນ​ຄົນ​ປ່ຽນ​ໃຈ​ເຫລື້ອມ​ໃສ​ຕໍ່​ພຣະ​ເຢ​ຊູ​ຄຣິດ ແລະ ມີ​ສັດ​ທາ​ອັນ​ຍິ່ງ​ໃຫຍ່​ກວ່າ​ໃນ​ພຣະ​ອົງ? ຄູ​ສອນ​ໄດ້​ຊ່ວຍ​ໃຫ້​ທ່ານ​ສຸມ​ໃສ່​ຄວາມ​ຈິງ​ທີ່​ສຳ​ຄັນ​ທີ່​ສຸດ​ຂອງ​ພຣະ​ກິດ​ຕິ​ຄຸນ​ແນວ​ໃດ? ທ່ານ​ສາ​ມາດ​ສິດ​ສອນ​ຫຍັງ​ແດ່​ທີ່​ຈະ​ຊ່ວຍ​ໃຫ້​ຄົນ​ອື່ນ​ປ່ຽນ​ໃຈ​ເຫລື້ອມ​ໃສ​ເລິກ​ເຊິ່ງ​ກວ່າ​ເກົ່າ​ຕໍ່​ພຣະ​ເຢ​ຊູ​ຄຣິດ?

ຈາກ​ພຣະ​ຄຳ​ພີ: 2 ນີ​ໄຟ 25:26; 3 ນີ​ໄຟ 11:34–41; ຄຳ​ສອນ ແລະ ພັນ​ທະ​ສັນ​ຍາ 19:31–32; 68:25–28; 133:57; ໂມ​ເຊ 6:57–62

ພຣະ​ຜູ້​ຊ່ວຍ​ໃຫ້​ລອດ​ໄດ້​ຊ່ວຍ​ໃຫ້​ຜູ້​ຄົນ​ຊອກ​ຫາ​ຄວາມ​ກ່ຽວ​ຂ້ອງ​ສ່ວນ​ຕົວ​ໃນ​ຄຳ​ສອນ​ຂອງ​ພຣະ​ອົງ

“ຄົນ​ນີ້​ຕ້ອນ​ຮັບ​ຄົນ​ນອກ​ສິນ​ທຳ, ແລະ ຍັງ​ຮ່ວມ​ກິນ​ນຳ​ພວກ​ເຂົາ​ດ້ວຍ,” ພວກ​ຟາ​ຣີ​ຊາຍ​ໄດ້​ເວົ້າ​ຈົ່ມ​ກ່ຽວ​ກັບ​ພຣະ​ເຢ​ຊູ—ໝາຍ​ເຖິງ ການ​ປະ​ພຶດ​ນີ້​ແມ່ນ​ບໍ່​ເໝາະ​ສົມ​ສຳ​ລັບ​ຄູ​ສອນ​ຝ່າຍ​ວິນ​ຍານ (ລູ​ກາ 15:2). ພຣະ​ເຢ​ຊູ​ໄດ້​ເຫັນ​ວ່າ​ມັນ​ເປັນ​ໂອ​ກາດ​ທີ່​ຈະ​ສິດ​ສອນ​ພວກ​ເຂົາ​ເຖິງ​ຄວາມ​ຈິງ​ທາງ​ວິນ​ຍານ​ທີ່​ເລິກ​ເຊິ່ງ​ບາງ​ຢ່າງ. ພຣະ​ອົງ​ຈະ​ເຮັດ​ສິ່ງ​ນັ້ນ​ໄດ້​ແນວ​ໃດ? ພຣະ​ອົງ​ຈະ​ຊ່ວຍ​ໃຫ້​ພວກ​ຟາ​ຣີ​ຊາຍ​ເຫັນ​ວ່າ ມັນ​ແມ່ນ​ໃຈ​ຂອງ​ພວກ​ເຂົາ—ບໍ່​ແມ່ນ​ຂອງ​ພຣະ​ອົງ—ທີ່​ບໍ່​ບໍ​ລິ​ສຸດ ແລະ ຕ້ອງ​ການ ການ​ປິ່ນ​ປົວ​ໄດ້​ແນວ​ໃດ? ພຣະ​ອົງ​ຈະ​ໃຊ້​ຄຳ​ສອນ​ຂອງ​ພຣະ​ອົງ​ເພື່ອ​ສະ​ແດງ​ຕໍ່​ພວກ​ເຂົາ​ວ່າ ຄວາມ​ຄິດ ແລະ ການ​ປະ​ພຶດ​ຂອງ​ພວກ​ເຂົາ​ຕ້ອງ​ໄດ້​ປ່ຽນ​ແປງ​ແນວ​ໃດ?

ພຣະ​ອົງ​ໄດ້​ເຮັດ​ສິ່ງ​ນີ້​ໂດຍ​ການ​ກ່າວ​ກັບ​ພວກ​ເຂົາ​ກ່ຽວ​ກັບ​ໂຕ​ແກະ​ທີ່​ອອກ​ໄປ​ຈາກ​ຝູງ ແລະ ເງິນ​ທີ່​ເສຍ. ພຣະ​ອົງ​ໄດ້​ກ່າວ​ກ່ຽວ​ກັບ​ລູກ​ຊາຍ​ທີ່​ກະ​ບົດ​ຜູ້​ໄດ້​ຂໍ​ການ​ໃຫ້​ອະ​ໄພ ແລະ ກ່ຽວ​ກັບ​ອ້າຍ​ທີ່​ປະ​ຕິ​ເສດ​ບໍ່​ຍອມ​ຮັບ​ລາວ ຫລື ກິນ​ເຂົ້າ​ກັບ​ລາວ. ຄຳ​ອຸ​ປະ​ມາ​ແຕ່​ລະ​ເລື່ອງ​ເຫລົ່າ​ນີ້​ບັນ​ຈຸ​ຄວາມ​ຈິງ​ທີ່​ກ່ຽວ​ຂ້ອງ​ກັບ​ວິ​ທີ​ທີ່​ພວກ​ຟາ​ຣີ​ຊາຍ​ເບິ່ງ​ຄົນ​ອື່ນ, ສິດ​ສອນ​ພວກ​ເຂົາ​ວ່າ​ຈິດ​ວິນ​ຍານ​ແຕ່​ລະ​ດວງ​ມີ​ຄຸນ​ຄ່າ​ຫລາຍ​ຂະ​ໜາດ​ໃດ (ເບິ່ງ ລູ​ກາ 15). ພຣະ​ຜູ້​ຊ່ວຍ​ໃຫ້​ລອດ​ບໍ່​ໄດ້​ບອກ​ພວກ​ຟາ​ຣີ​ຊາຍ—ຫລື ບອກ​ເຮົາ​ທຸກ​ຄົນ—ວ່າ​ເຮົາ​ເປັນ​ຄື​ຜູ້​ໃດ​ຢູ່​ໃນ​ຄຳ​ອຸ​ປະ​ມາ​ຂອງ​ພຣະ​ອົງ. ບາງ​ເທື່ອ​ເຮົາ​ອາດ​ເປັນ​ພໍ່​ຜູ້​ກັງ​ວົນ. ບາງ​ເທື່ອ​ເຮົາ​ອາດ​ເປັນ​ອ້າຍ​ທີ່​ອິດ​ສາ. ສ່ວນ​ຫລາຍ​ແລ້ວ​ເຮົາ​ອາດ​ເປັນ​ແກະ​ທີ່​ເສຍ ຫລື ລູກ​ຊາຍ​ທີ່​ໂງ່​ຈ້າ. ບໍ່​ວ່າ​ສະ​ຖາ​ນະ​ການ​ຂອງ​ເຮົາ​ຈະ​ເປັນ​ແບບ​ໃດ, ຜ່ານ​ທາງ​ຄຳ​ອຸ​ປະ​ມາ​ຂອງ​ພຣະ​ອົງ, ພຣະ​ຜູ້​ຊ່ວຍ​ໃຫ້​ລອດ​ໄດ້​ເຊື້ອ​ເຊີນ​ໃຫ້​ເຮົາ​ຊອກ​ຫາ​ຄວາມ​ກ່ຽວ​ຂ້ອງ​ໃນ​ຄຳ​ສອນ​ຂອງ​ພຣະ​ອົງ—ເພື່ອ​ຄົ້ນ​ພົບ​ສິ່ງ​ທີ່​ພຣະ​ອົງ​ຢາກ​ໃຫ້​ເຮົາ​ຮຽນ​ຮູ້ ແລະ ສິ່ງ​ທີ່​ເຮົາ​ຕ້ອງ​ປ່ຽນ​ແປງ​ໃນ​ຄວາມ​ຄິດ ແລະ ການ​ປະ​ພຶດ​ຂອງ​ເຮົາ​ເອງ.

ທ່ານ​ອາດ​ສັງ​ເກດ​ເຫັນ​ຜູ້​ຮຽນ​ບາງ​ຄົນ​ເບິ່ງ​ຄື​ວ່າ​ຄວາມ​ຈິງ​ບາງ​ຢ່າງ​ບໍ່​ສຳ​ຄັນ​ຕໍ່​ເຂົາ​ເຈົ້າ​ເລີຍ. ຂະ​ນະ​ທີ່​ທ່ານ​ພິ​ຈາ​ລະ​ນາ​ຄວາມ​ຕ້ອງ​ການ​ຂອງ​ຜູ້​ທີ່​ທ່ານ​ສິດ​ສອນ, ໃຫ້​ຄິດ​ກ່ຽວ​ກັບ​ວິ​ທີ​ທີ່​ຄວາມ​ຈິງ​ໃນ​ພຣະ​ຄຳ​ພີ​ສາ​ມາດ​ມີ​ຄວາມ​ໝາຍ ແລະ ເປັນ​ປະ​ໂຫຍດ​ໃນ​ສະ​ຖາ​ນະ​ການ​ຂອງ​ເຂົາ​ເຈົ້າ​ແນວ​ໃດ. ວິ​ທີ​ໜຶ່ງ​ທີ່​ທ່ານ​ສາ​ມາດ​ຊ່ວຍ​ໃຫ້​ຜູ້​ຮຽນ​ເຫັນ​ຄວາມ​ກ່ຽວ​ຂ້ອງ​ກັບ​ຄວາມ​ຈິງ​ທີ່​ເຂົາ​ເຈົ້າ​ກຳ​ລັງ​ຄົ້ນ​ພົບ ແມ່ນ​ໂດຍ​ການ​ຖາມ​ຄຳ​ຖາມ​ເຊັ່ນ “ສິ່ງ​ນີ້​ສາ​ມາດ​ຊ່ວຍ​ພວກ​ເຈົ້າ​ກັບ​ບາງ​ສິ່ງ​ທີ່​ພວກ​ເຈົ້າ​ກຳ​ລັງ​ປະ​ເຊີນ​ຢູ່​ໃນ​ເວ​ລາ​ນີ້​ແນວ​ໃດ?” “ເປັນ​ຫຍັງ​ມັນ​ຈຶ່ງ​ສຳ​ຄັນ​ສຳ​ລັບ​ພວກ​ເຈົ້າ​ທີ່​ຈະ​ຮູ້​ສິ່ງ​ນີ້?” “ສິ່ງ​ນີ້​ສາ​ມາດ​ສ້າງ​ຄວາມ​ແຕກ​ຕ່າງ​ແນວ​ໃດ​ແດ່​ໃນ​ຊີ​ວິດ​ຂອງ​ພວກ​ເຈົ້າ?” ຮັບ​ຟັງ​ຜູ້​ທີ່​ທ່ານ​ສິດ​ສອນ. ໃຫ້​ໂອ​ກາດ​ເຂົາ​ເຈົ້າ​ຖາມ​ຄຳ​ຖາມ. ຊຸກ​ຍູ້​ໃຫ້​ເຂົາ​ເຈົ້າ​ເຊື່ອມ​ຕໍ່​ລະ​ຫວ່າງ​ຄຳ​ສອນ​ຂອງ​ພຣະ​ຜູ້​ຊ່ວຍ​ໃຫ້​ລອດ​ກັບ​ຊີ​ວິດ​ຂອງ​ເຂົາ​ເຈົ້າ​ເອງ. ທ່ານ​ກໍ​ຍັງ​ສາ​ມາດ​ແບ່ງ​ປັນ​ວິ​ທີ​ທີ່​ທ່ານ​ໄດ້​ພົບ​ຄວາມ​ກ່ຽວ​ຂ້ອງ​ກັບ​ຊີ​ວິດ​ຂອງ​ທ່ານ​ໃນ​ສິ່ງ​ທີ່​ທ່ານ​ກຳ​ລັງ​ສິດ​ສອນ​ນຳ​ອີກ. ການ​ເຮັດ​ສິ່ງ​ນີ້​ສາ​ມາດ​ເຊື້ອ​ເຊີນ​ໃຫ້​ພຣະ​ວິນ​ຍານ​ສິດ​ສອນ​ຜູ້​ຮຽນ​ເປັນ​ສ່ວນ​ບຸກ​ຄົນ ເຖິງ​ວິ​ທີ​ທີ່​ຄຳ​ສອນ​ສາ​ມາດ​ສ້າງ​ຄວາມ​ແຕກ​ຕ່າງ​ໃນ​ຊີ​ວິດ​ຂອງ​ເຂົາ​ເຈົ້າ.

ຄຳ​ຖາມ​ເພື່ອ​ໄຕ່​ຕອງ: ແມ່ນ​ຫຍັງ​ທີ່​ເຮັດ​ໃຫ້​ຄວາມ​ຈິງ​ຂອງ​ພຣະ​ກິດ​ຕິ​ຄຸນ​ມີ​ຄວາມ​ໝາຍ ແລະ ເປັນ​ປະ​ໂຫຍດ​ຕໍ່​ທ່ານ? ແມ່ນ​ຫຍັງ​ທີ່​ຊ່ວຍ​ໃຫ້​ທ່ານ​ພົບ​ເຫັນ​ຄວາມ​ກ່ຽວ​ຂ້ອງ​ສ່ວນ​ຕົວ ຂະ​ນະ​ທີ່​ທ່ານ​ສຶກ​ສາ​ພຣະ​ກິດ​ຕິ​ຄຸນ? ທ່ານ​ຈະ​ເຮັດ​ຫຍັງ​ເພື່ອ​ສຸມ​ໃສ່​ຄວາມ​ຈິງ​ທີ່​ກ່ຽວ​ຂ້ອງ​ກັບ​ຜູ້​ທີ່​ທ່ານ​ສິດ​ສອນ?

ຈາກ​ພຣະ​ຄຳ​ພີ: 1 ນີ​ໄຟ 19:23; 2 ນີ​ໄຟ 32:3; ຄຳ​ສອນ ແລະ ພັນ​ທະ​ສັນ​ຍາ 43:7–9

ບາງ​ວິ​ທີ​ທີ່​ຈະ​ນຳ​ໃຊ້​ສິ່ງ​ທີ່​ທ່ານ​ກຳ​ລັງ​ຮຽນ​ຮູ້

• ປະ​ເມີນ​ສິ່ງ​ທີ່​ທ່ານ​ກຳ​ລັງ​ສິດ​ສອນ​ເພື່ອ​ໃຫ້​ແນ່​ໃຈ​ວ່າ​ທ່ານ​ກຳ​ລັງ​ສິດ​ສອນ​ຄຳ​ສອນ​ທີ່​ແທ້​ຈິງ. ຄຳ​ຖາມ​ເຫລົ່າ​ນີ້​ສາ​ມາດ​ຊ່ວຍ​ໄດ້:

  • ສິ່ງ​ທີ່​ເຮົາ​ກຳ​ລັງ​ວາງ​ແຜນ​ທີ່​ຈະ​ສິດ​ສອນ​ມີ​ພື້ນ​ຖານ​ຢູ່​ໃນ​ພຣະ​ຄຳ​ພີ ແລະ ໃນ​ຖ້ອຍ​ຄຳ​ຂອງ​ສາດ​ສະ​ດາ​ຍຸກ​ສຸດ​ທ້າຍ​ຫລື​ບໍ່?

  • ມີ​ສາດ​ສະ​ດາ​ຫລາຍ​ທ່ານ​ໄດ້​ສິດ​ສອນ​ກ່ຽວ​ກັບ​ສິ່ງ​ນີ້​ຫລື​ບໍ່? ຜູ້​ນຳ​ຂອງ​ສາດ​ສະ​ໜາ​ຈັກ​ໃນ​ປະ​ຈຸ​ບັນ​ກຳ​ລັງ​ສິດ​ສອນ​ຫຍັງ​ແດ່​ກ່ຽວ​ກັບ​ມັນ?

  • ສິ່ງ​ນີ້​ຈະ​ຊ່ວຍ​ໃຫ້​ຄົນ​ອື່ນ​ສ້າງ​ສັດ​ທາ​ໃນ​ພຣະ​ເຢ​ຊູ​ຄຣິດ, ກັບ​ໃຈ, ແລະ ດຳ​ເນີນ​ໄປ​ໜ້າ​ໃນ​ເສັ້ນ​ທາງ​ແຫ່ງ​ພັນ​ທະ​ສັນ​ຍາ​ແນວ​ໃດ?

  • ສິ່ງ​ນີ້​ສອດ​ຄ່ອງ​ກັບ​ການ​ກະ​ຕຸ້ນ​ຂອງ​ພຣະ​ວິນ​ຍານ​ບໍ​ລິ​ສຸດ​ຫລື​ບໍ່, ຫລື ເຮົາ​ຮູ້​ສຶກ​ບໍ່​ໝັ້ນ​ຄົງ​ທາງ​ວິນ​ຍານ​ກ່ຽວ​ກັບ​ມັນ​ບໍ?

• ສຶກ​ສາ​ພຣະ​ຄຳ​ຂອງ​ພຣະ​ເຈົ້າ​ທຸກ​ວັນ ເພື່ອ​ຮຽນ​ຮູ້​ຄຳ​ສອນ​ທີ່​ແທ້​ຈິງ​ສຳ​ລັບ​ຕົວ​ທ່ານ​ເອງ.

• ຂໍ​ໃຫ້​ຜູ້​ຮຽນ​ອ່ານ​ພຣະ​ຄຳ​ພີ ແລະ ຖ້ອຍ​ຄຳ​ຂອງ​ສາດ​ສະ​ດາ​ສະ​ໄໝ​ໃໝ່ ຂະ​ນະ​ທີ່​ທ່ານ​ສິດ​ສອນ.

• ສິດ​ສອນ​ຜູ້​ຮຽນ​ວິ​ທີ​ໃຊ້​ໝາຍ​ເຫດ​ຢູ່​ທາງ​ລຸ່ມ​ໜ້າ​ປຶ້ມ, ຄູ່​ມື​ພຣະ​ຄຳ​ພີ, ແລະ ແຫລ່ງ​ອື່ນໆ ຂະ​ນະ​ທີ່​ເຂົາ​ເຈົ້າ​ສຶກ​ສາ​ພຣະ​ຄຳ​ພີ.

• ເຊື້ອ​ເຊີນ​ໃຫ້​ຜູ້​ຮຽນ​ຊອກ​ຫາ​ຄວາມ​ຈິງ​ຢູ່​ໃນ​ຂໍ້​ພຣະ​ຄຳ​ພີ ຫລື ໃນ​ເລື່ອງ​ລາວ.

• ສະ​ແດງ​ປະ​ຈັກ​ພະ​ຍານ​ເຖິງ​ວິ​ທີ​ທີ່​ທ່ານ​ໄດ້​ມາ​ຮູ້​ຈັກ​ວ່າ​ຄຳ​ສອນ​ແມ່ນ​ຈິງ​ແທ້.

• ໃຊ້​ເລື່ອງ​ລາວ ຫລື ຄຳ​ປຽບ​ທຽບ ເພື່ອ​ຊ່ວຍ​ໃຫ້​ຜູ້​ຮຽນ​ເຂົ້າ​ໃຈ​ຢ່າງ​ເລິກ​ເຊິ່ງ​ຫລາຍ​ຂຶ້ນ​ກ່ຽວ​ກັບ​ຄວາມ​ຈິງ​ຂອງ​ພຣະ​ກິດ​ຕິ​ຄຸນ.