பலவகையான கற்பித்தல் பின்னணிகள் மற்றும் கற்பவர்களுக்கான ஆலோசனைகள்

இரட்சகரின் வழியில் கற்பிப்பதற்கான கொள்கைகள், வீட்டில், சபையில் மற்றும் பிற இடங்களில் உள்ள எந்தவொரு கற்பிக்கும் வாய்ப்பிற்கும் பொருந்தும். இருப்பினும், ஒவ்வொரு வாய்ப்பும் அதன் தனித்துவமான சூழ்நிலைகளுடன் வருகிறது. இந்தப் பிரிவு பல்வேறு கற்பவர்களுக்கும் கற்பித்தல் பின்னணிகளுக்கும் குறிப்பிட்ட கூடுதல் ஆலோசனைகள் வழங்குகிறது.

வீடும் குடும்பமும்

சுவிசேஷத்தைக் கற்பித்தலுக்கும் கற்றுக்கொள்ளுவதற்கும் சிறந்த இடம் வீடு

“சுவிசேஷக் கற்றலின் மையமாக” வீடு இருக்க வேண்டும் என்று தலைவர் ரசல் எம். நெல்சன் போதித்தார் (“Becoming Exemplary Latter-day Saints,” Liahona, Nov. 2018, 113). சபையிலோ அல்லது வேதபாட வகுப்பிலோ நடக்கும் கற்பித்தல் மதிப்புமிக்கது மற்றும் தேவைப்படுகிறது, ஆனால் இது வீட்டில் நடக்கும் கற்பித்தலுக்கு ஆதரவாயிருக்கவேண்டும். நமக்கும் நம் குடும்பங்களுக்கும்,சுவிசேஷத்தைக் கற்றலுக்கான முக்கிய பின்னணி மற்றும் சிறந்த பின்னணி, வீடு.

ஆனால் நல்ல சுவிசேஷம் கற்றல் வீட்டில் தானாகவே நடக்கும் என்று அர்த்தமல்ல; விழிப்புடன் கூடிய முயற்சி தேவை. நீங்கள் உங்கள் வீட்டை “மாற்ற” அல்லது “மறுவடிவமைக்க” வேண்டும் என்று தலைவர் நெல்சன் பரிந்துரைத்துள்ளார், சுவர்களை இடிப்பதன் மூலமோ அல்லது புதிய தரையையும் சேர்ப்பதன் மூலமாகவோ அவசியமில்லை ஆனால் ஒருவேளை அந்த ஆவிக்கு உங்கள் பங்களிப்பு உட்பட, உங்கள் வீட்டில் உள்ள ஒட்டுமொத்த உணர்வை மதிப்பிடுவதன் மூலம் (“Becoming Exemplary Latter-day Saints,” 113). எடுத்துக்காட்டாக, உங்கள் வீட்டில் உள்ள இசை, காணொலிகள் மற்றும் பிற ஊடகங்களை; சுவர்களில் படங்கள்; மற்றும் உங்கள் குடும்ப உறுப்பினர்கள் ஒருவருக்கொருவர் பேசும் விதம் மற்றும் நடத்தும் விதம் போன்றவற்றை கருத்தில் கொள்ளுங்கள். இந்தக் காரியங்கள் பரிசுத்த ஆவியின் செல்வாக்கை அழைக்கின்றனவா? தனித்தனியாகவும் குடும்பமாகவும் சுவிசேஷத்தைக் கற்றுக்கொள்வதற்கு நேரத்தை ஒதுக்குகிறீர்களா? உங்கள் வீட்டில் இருக்கும் போது குடும்ப உறுப்பினர்கள் அன்பாகவும், பாதுகாப்பாகவும், தேவனுடன் நெருக்கமாகவும் உணர்கிறார்களா?

உங்கள் வீட்டில் உள்ள ஆவிக்குரிய சூழலின் மீது உங்களுக்கு கட்டுப்பாடு இருப்பதாக நீங்கள் உணராமல் இருக்கலாம். அப்படியானால், உங்களால் முடிந்த சிறந்த செல்வாக்காயிருங்கள், உதவிக்காக கர்த்தரிடம் கேளுங்கள். உங்களுடைய நீதியான முயற்சிகளை அவர் கனம்பண்ணுவார். நீங்கள் சுவிசேஷத்தைக் கற்பிக்கவும் கற்றுக்கொள்ளவும் முயற்சிக்கும்போது, நீங்கள் விரும்பிய விளைவுகளை உடனடியாகக் காணாவிட்டாலும், நீங்கள் வெற்றி பெறுகிறீர்கள்.

வீட்டில் கற்றுக்கொள்ளுதல் என்பது உறவுகளை அடிப்படையாகக் கொண்டது

“நீங்கள் கற்பிப்பவர்களை நேசியுங்கள்” என்பது சுவிசேஷ போதனைக்கான அனைத்து பின்னணிகளுக்கும் பொருந்தும், ஆனால் வீட்டில், அன்பு மிகவும் இயல்பாக வர வேண்டும் மற்றும் மிகவும் ஆழமாக உணரப்பட வேண்டும். உங்கள் வீடு தகுதியைவிட குறைவாக இருந்தாலும், அது சுவிசேஷ போதனையின் மையமாக இருக்க வேண்டும், ஏனென்றால் அங்குதான் நமது மிக நீடித்த உறவுகள் கட்டமைக்கப்படுகின்றன. வீட்டிற்கு வெளியே உள்ள ஆசிரியர்கள் ஆசிரியர்களாக அதிக அனுபவம் அல்லது பயிற்சி பெற்றிருக்கலாம், ஆனால் வீட்டில் இருக்கும் அன்பான, நித்திய உறவுகளுக்கான சாத்தியத்தை அவர்களால் ஒருபோதும் இணையானதாக்க முடியாது. எனவே அந்த உறவுகளை போஷியுங்கள். உங்கள் குடும்ப உறுப்பினர்களுக்குச் செவிகொடுக்கவும், அவர்களுடன் நம்பிக்கையையும் புரிதலையும் வளர்த்துக்கொள்ளவும் தேவையான நேரத்தையும் முயற்சியையும் செலவிடுங்கள். வீட்டிலேயே சுவிசேஷத்தைக் கற்பிப்பதற்கும் கற்றுக்கொள்வதற்கும் உங்கள் முயற்சிகளுக்கு உறுதியான அடித்தளத்தை உருவாக்க இது உதவும்.

வீட்டில் கற்றுக்கொள்ளுதல் திட்டமிடப்பட்டதாக இருக்கலாம் ஆனால் தன்னிச்சையாகவும் இருக்கலாம்

பெரும்பாலான சபை வகுப்புகள் வாரத்திற்கு ஒரு முறை, திட்டமிடப்பட்ட ஆரம்பம் மற்றும் முடிவுடன் நடக்கும், ஆனால் இப்படி வீட்டில் எப்போதும் நடப்பதில்லை. ஒரு திட்டமிடப்பட்ட வீட்டு மாலைப் பாடம் அல்லது குடும்ப வேதப் படிப்பு உங்களுக்கிருக்கலாம், ஆனால் குடும்பத்தில் கற்பித்தல் வாய்ப்புகள் முறைசாரா, உணவு சாப்பிடும் போது, வேலைகளைச் செய்யும்போது, விளையாடும் போது, வேலை அல்லது பள்ளிக்குச் செல்லும்போது, புத்தகம் படிக்கும்போது அல்லது ஒன்றாக ஒரு திரைப்படம் பார்க்கும்போது போன்ற தருணங்களில் அடிக்கடி நிகழ்கின்றன, ஆவிக்குரிய புயல்களில் இருந்து இரட்சகர் நமக்கு எவ்வாறு அடைக்கலம் கொடுக்கிறார் என்பதைப்பற்றி பேசுவதற்கு மழைப் புயல் ஒரு வாய்ப்பாக இருக்கலாம். கடினமான முடிவெடுக்கும் ஒரு இளைஞன் தனிப்பட்ட வெளிப்பாட்டைப்பற்றி அறியத் தயாராக இருக்கலாம். பயத்தில் இருக்கும் ஒரு குழந்தை, தேற்றரவாளனைப் பற்றிய உங்கள் சாட்சியிலிருந்து பயனடையலாம். ஒருவருக்கொருவர் தவறாக நடந்துகொள்ளும் அல்லது தவறாக நடத்தும் குழந்தைகளுக்கு மனந்திரும்புதல் மற்றும் மன்னிப்பைப்பற்றி கற்பிக்க முடியும்.

இத்தகைய தருணங்கள் திட்டமிடப்படாதவை என்பதால், பாரம்பரிய பாடத்திற்கு நீங்கள் தயார் செய்யும் விதத்தில் நீங்கள் அவற்றை தயார் செய்ய முடியாது. இருப்பினும், நீங்கள் ஆவிக்கு உணர்திறன் உடையவராக இருப்பதன் மூலமும், “எப்பொழுதும் ஆயத்தமாயிருக்க” முயற்சி செய்வதன் மூலமும் நீங்களே உங்களை ஆயத்தப்படுத்திக் கொள்ளலாம் (1 பேதுரு 3:15). எந்த கணமும் கற்பித்தல் அல்லது கற்றுக்கொள்ளுதல் தருணமாக மாறலாம்.

வீட்டில் கற்றுக்கொள்ளுதல் என்பது சிறிய, எளிய, சீரான முயற்சிகளைக் கொண்டது

வீட்டில் சுவிசேஷத்தைப் போதிக்கும் முயற்சிகள் வெற்றி பெறாதபோது பெற்றோர்கள் சில சமயங்களில் சோர்வடைவார்கள். தனித்தனியாக எடுத்துக் கொண்டால், ஒரு வீட்டு மாலை, வேதப் படிப்பு அமர்வு அல்லது சுவிசேஷ உரையாடல் அதிக அளவில் சாதிப்பதாகத் தெரியவில்லை. ஆனால், சிறிய, எளிய முயற்சிகளின் தொகுப்பு, காலப்போக்கில் தொடர்ச்சியாக மீண்டும் மீண்டும், எப்போதாவது நினைவுகூரக்கூடிய தருணம் அல்லது சிறந்த பாடத்தை விட மிகவும் வல்லமை வாய்ந்ததாகவும் வலுவூட்டுவதாகவும் இருக்கும். “அதனதன் காலத்தில் அனைத்தும் சம்பவிக்கவேண்டும்,” என கர்த்தர் சொன்னார். ஆதலால் “நன்மை செய்வதிலே சோர்ந்து போகாதிருங்கள், ஏனெனில் [நாம்] “ஒரு மகத்தான பணிக்கு நீங்கள் அஸ்திபாரம் போடுகிறீர்கள். சிறிய காரியங்களிலிருந்து பெரிதானவை வரும்” (கோட்பாடும் உடன்படிக்கைகளும் 64:32–33; ஆல்மா 37:6–7 ஐயும் பார்க்கவும்). எனவே விட்டுவிடாதீர்கள், ஒவ்வொரு முறையும் ஏதாவது ஒரு பெரிய சாதனையை நிறைவேற்றுவதைப்பற்றி கவலைப்படாதீர்கள். உங்கள் முயற்சிகளில் நிலைத்திருங்கள்.

வீட்டில், கற்றுக்கொள்ளுதலும் வாழ்தலும் பிரிக்க முடியாதவை

சுவிசேஷம் வீட்டில் உடனடிப் பொருத்தத்தைப் பெறுகிறது. அங்கு நீங்கள் யாருடன் சுவிசேஷத்தைக் கற்றுக்கொள்கிறீர்களோ அவர்களுடன் தினமும் நீங்கள் வாழ்வீர்கள். உண்மையில், பெரும்பாலான நேரங்களில், சுவிசேஷத்தின்படி வாழ்வதே நாம் சுவிசேஷத்தை எவ்வாறு கற்றுக்கொள்கிறோம் என்பதாகும். எனவே நீங்கள் வீட்டில் சுவிசேஷத்தைக் கற்றுக்கொண்டு கற்பிக்கும்போது, நீங்கள் கற்றுக் கொண்டிருப்பதை நீங்கள் என்ன செய்கிறீர்கள் என்பதை இணைப்பதற்கான வழிகளைத் தேடுங்கள். உங்கள் வீட்டில், சுவிசேஷம் நீங்கள் பேசும் விஷயமாக இல்லாமல், நீங்கள் வாழ முயற்சிக்கும் ஒன்றாக இருக்கட்டும்.

குடும்பத்தில் கற்பிக்கும் வாய்ப்புகள் முறைசாரா, அன்றாட தருணங்களில் அடிக்கடி நிகழ்கின்றன.

பிள்ளைகளுக்குப் போதித்தல்

பிள்ளைகளுக்கு வெவ்வேறு வகை தேவை

எல்லா பிள்ளைகளும் வித்தியாசமாக இருக்கிறார்கள், அவர்கள் வளரும்போது, அவர்களின் தேவைகள் மாறும். உங்கள் கற்பித்தல் முறைகளை மாற்றுவது அவர்களின் பல்வேறு தேவைகளைப் பூர்த்தி செய்ய உதவும். எடுத்துக்காட்டாக, பின்வருவனவற்றைப் பயன்படுத்துவதைக் கருத்தில் கொள்ளுங்கள்:

• கதைகள் அன்றாட வாழ்க்கையில் சுவிசேஷம் எவ்வாறு பொருந்துகிறது என்பதைப் பார்க்க பிள்ளைகளுக்கு கதைகள் உதவுகின்றன. வேதங்களிலிருந்து, உங்கள் சொந்த வாழ்க்கையிலிருந்து, உங்கள் குடும்ப வரலாற்றிலிருந்து அல்லது சபை பத்திரிகைகளில் இருந்து, குறிப்பாக இரட்சகரைப்பற்றிய கதைகளைப் பயன்படுத்தவும். படங்களை பிடிப்பதன் மூலம், சொற்றொடர்களைத் திரும்பத் திரும்பச் சொல்வதன் மூலம் அல்லது பகுதிகளை நடிப்பதன் மூலம் பிள்ளைகளை கதையில் ஈடுபடுத்துவதற்கான வழிகளைத் திட்டமிடுங்கள்.

• காட்சி உபகரணங்கள் படங்கள், காணொலிகள் மற்றும் பொருள்கள் பிள்ளைகளுக்கு சுவிசேஷக் கொள்கைகளைப் புரிந்துகொள்ளவும் நினைவில் கொள்ளவும் உதவும். ChurchofJesusChrist.org ல் உள்ள ஊடக நூலகத்தில் பல படங்கள் மற்றும் காணொலிகளைக் காணலாம்.

• இசை துதிப்பாடல்கள் மற்றும் பிற பரிசுத்தப் பாடல்கள் தேவனின் அன்பை உணரவும், பரிசுத்த ஆவியை உணரவும், சுவிசேஷ சத்தியங்களைக் கற்றுக்கொள்ளவும் பிள்ளைகளுக்கு உதவும். மெல்லிசைகள், தாளங்கள் மற்றும் எளிமையான பாட்டுக்கள் பிள்ளைகளுக்கு வரும் ஆண்டுகளில் சுவிசேஷ சத்தியங்களை நினைவில் வைக்க உதவும். நீங்கள் பிள்ளைகளுடன் பாடும்போது, பாடல்களில் கற்பிக்கப்படும் கொள்கைகளைக் கண்டறிந்து புரிந்துகொள்ள அவர்களுக்கு உதவுங்கள்.

பல புலன்கள் ஈடுபடும்போது பெரும்பாலான பிள்ளைகள் சிறப்பாகக் கற்றுக்கொள்கிறார்கள். பிள்ளைகள் கற்றுக் கொள்ளும்போது பார்வை, செவிப்புலன் மற்றும் தொடுதல் ஆகிய அவர்களின் உணர்வுகளைப் பயன்படுத்த உதவும் வழிகளைக் கண்டறியவும். சில சூழ்நிலைகளில், அவர்களின் வாசனை மற்றும் சுவை உணர்வுகளை சேர்க்கும் வழிகளையும் நீங்கள் காணலாம்!

பிள்ளைகள் படைப்பாற்றல் மிக்கவர்கள்

சுவிசேஷக் கொள்கையுடன் தொடர்புடைய ஒன்றை வரைவதற்கு, கட்டுவதற்கு, வண்ணம் தீட்டுவதற்கு அல்லது எழுதுவதற்கு பிள்ளைகளை நீங்கள் அழைக்கும் போது, அவர்கள் அந்தக் கொள்கையை நன்றாகப் புரிந்துகொள்ள உதவுகிறீர்கள், மேலும் அவர்கள் கற்றுக்கொண்டதை அவர்களுக்கு உறுதியான நினைவூட்டலை வழங்குகிறீர்கள். தாங்கள் கற்றுக்கொண்டதை மற்றவர்களுடன் பகிர்ந்து கொள்ள அவர்கள் உருவாக்கியதையும் அவர்கள் பயன்படுத்தலாம். Friend இதழின் ஒவ்வொரு இதழிலும் பிள்ளைகளுக்கான ஆக்கப்பூர்வமான செயல்பாடுகள் உள்ளன.

பிள்ளைகள் ஆர்வமுள்ளவர்கள்

பிள்ளைகள் கேள்விகள் கேட்கும் போது, கவனச்சிதறல்களாக பார்க்காமல், வாய்ப்புகளாக பார்க்கவும். பிள்ளைகளின் கேள்விகள் அவர்கள் கற்றுக்கொள்ளத் தயாராக இருக்கிறார்கள் என்பதற்கான அறிகுறியாகும், மேலும் அவர்களின் கேள்விகள் அவர்கள் என்ன நினைக்கிறார்கள் மற்றும் உணர்கிறார்கள் என்பதைப்பற்றிய மதிப்புமிக்க உள்ளுணர்வுகளை உங்களுக்குத் தருகின்றன. அவர்களுடைய ஆவிக்குரிய கேள்விகளுக்கான பதில்கள் வேதங்களிலும் ஜீவிக்கிற தீர்க்கதரிசிகளின் வார்த்தைகளிலும் காணப்படுவதைக் காண அவர்களுக்கு உதவுங்கள்.

பிள்ளைகள் இடையூறு செய்தாலும் அவர்களுக்கு அன்பு தேவை

சில நேரங்களில் ஒரு பிள்ளை மற்றவர்களின் கற்றலை சீர்குலைக்கும் வழிகளில் செயல்படுகிறது. பெரும்பாலான நடத்தை இடையூறுகள் பூர்த்தி செய்யப்படாத தேவையிலிருந்து வளர்கின்றன. இது நிகழும்போது, ​​பிள்ளை எதிர்கொள்ளக்கூடிய சவால்களைப்பற்றி பொறுமையாகவும், அன்பாகவும், புரிந்து கொள்ளவும். பாடத்தில் நேர்மறையான வழிகளில் பங்கேற்க அவனுக்கு அல்லது அவளுக்கு அதிக வாய்ப்புகள் தேவைப்படலாம், உதாரணமாக, ஒரு படத்தைப் பிடிப்பது, ஏதாவது வரைவது அல்லது ஒரு வசனத்தை வாசிப்பது.

ஒரு பிள்ளை தொடர்ந்து இடையூறு விளைவித்தால், அவருடன் அல்லது அவளுடன் தனித்தனியாக பேசுவது உதவியாக இருக்கும். அன்பு மற்றும் பொறுமையின் உணர்வில், உங்கள் எதிர்பார்ப்புகளையும், அவன் அல்லது அவள் அவற்றைச் சந்திக்க முடியும் என்ற உங்கள் நம்பிக்கையையும் விளக்கவும். அவன் அல்லது அவள் சிறந்த தேர்ந்தெடுப்புகளைச் செய்யும்போது பிள்ளையைப் புகழுங்கள்.

பிள்ளைகள் பகிர்ந்து கொள்ள நிறைய இருக்கிறது

பிள்ளைகள் புதிதாக ஒன்றைக் கற்றுக்கொண்டால், அவர்கள் இயல்பாகவே அதை மற்றவர்களுடன் பகிர்ந்து கொள்ள விரும்புகிறார்கள். ஒருவருக்கொருவர், அவர்களது குடும்ப உறுப்பினர்கள் மற்றும் அவர்களது நண்பர்களுக்கு சுவிசேஷக் கொள்கைகளை கற்பிக்க பிள்ளைகளுக்கு வாய்ப்புகளை வழங்குவதன் மூலம் இந்த விருப்பத்தை ஊக்குவிக்கவும். நீங்கள் கற்பிக்கும் கொள்கைகள் தொடர்பான அவர்களின் எண்ணங்கள், உணர்வுகள் மற்றும் அனுபவங்களை உங்களுடன் பகிர்ந்து கொள்ளும்படி அவர்களிடம் கேளுங்கள். அவர்களிடம் எளிமையான, தூய்மையான மற்றும் ஆற்றல்மிக்க உள்ளுணர்வுகள் இருப்பதை நீங்கள் காண்பீர்கள்.

பிள்ளைகள் பரிசுத்த ஆவியை உணர முடியும் ஆனால் அவரது செல்வாக்கை அடையாளங்காண உதவி தேவைப்படலாம்

பரிசுத்த ஆவியின் வரத்தைப் பெறாத பிள்ளைகள் கூட, குறிப்பாக இயேசு கிறிஸ்துவைப்பற்றியும் அவருடைய சுவிசேஷத்தைப்பற்றியும் கற்றுக் கொள்ளும்போது, அவருடைய செல்வாக்கை உணர முடியும். அவர்கள் நீதியான தேர்ந்தெடுப்புகளைச் செய்யும்போது, பரிசுத்த ஆவியின் மூலம் இரட்சகரின் அங்கீகாரத்தை அவர்கள் உணர முடியும். ஆவியானவர் நம்முடன் தொடர்பு கொள்ளும் பல்வேறு வழிகளைப்பற்றி பிள்ளைகளுக்குக் கற்றுக்கொடுங்கள். அவர் அவர்களிடம் பேசும்போது அவருடைய குரலை அடையாளம் காண அவர்களுக்கு உதவுங்கள். இது அவர்களின் வாழ்நாள் முழுவதும் தனிப்பட்ட வெளிப்பாட்டைத் தேடி செயல்படும் பழக்கத்தை வளர்க்க உதவும்.

வாலிபருக்குப் போதித்தல்

இளைஞர்களுக்கு பெரும் ஆற்றல் உள்ளது

கர்த்தருடைய சேவையில் குறிப்பிடத்தக்க காரியங்களைச் செய்ய இளைஞர்களுக்கு ஆற்றல் இருக்கிறது. இளைஞர்களின் ஆவிக்குரிய திறமைகளில் தேவன் நம்பிக்கை வைத்திருக்கிறார் என்பதை வேதங்களில் பதிவு செய்யப்பட்டுள்ள பல அனுபவங்கள் விளக்குகின்றன. நீங்கள் அவர்களை நம்புகிறீர்கள் என்று இளைஞர்கள் உணர்ந்தால், அவர்களின் தெய்வீக ஆற்றல் மீது அவர்களுக்கு நம்பிக்கை வளரும், மேலும் அவர்கள் என்ன சாதிக்க முடியும் என்று அவர்கள் உங்களை ஆச்சரியப்படுத்துவார்கள். அவர்கள் என்ன ஆக முடியும் என்று பரலோக பிதா அறிந்திருக்கிறார் என்பதைப் பார்க்க அன்புடன் அவர்களுக்கு உதவுங்கள். அவர்களை நேசிப்பதன் மூலமும் ஊக்குவிப்பதன் மூலமும், அவர்களுடன் பொறுமையாக வேலை செய்வதன் மூலமும், அவர்களை ஒருபோதும் கைவிடாமல் இருப்பதன் மூலமும் இரட்சகரின் முன்மாதிரியைப் பின்பற்றுங்கள்.

இளைஞர்கள் தங்களைப்பற்றி கற்றுக்கொள்கிறார்கள்

நீங்கள் கற்பிக்கும் இளைஞர்கள் அவர்களின் சாட்சியத்தின் அடித்தளத்தை உருவாக்குகிறார்கள். அவர்கள் தங்கள் நம்பிக்கைகளையும் பொறுப்புகளையும் கண்டறியும் பணியில் ஈடுபட்டுள்ளனர். அவர்கள் தங்கள் வாழ்க்கைப் பாதையை பாதிக்கும் முடிவுகளை எடுக்கிறார்கள். இந்த ஆபத்தான காலங்களில் ஆவிக்குரிய ரீதியில் வாழவும், அவர்களுக்கான கர்த்தரின் பணியை நிறைவேற்றவும், நீங்கள் கற்பிக்கும் இளைஞர்கள் தங்கள் சோதனைகளின் போது எவ்வாறு வலிமையைக் கண்டறிவது, அவர்களின் கேள்விகளுக்கான பதில்கள் மற்றும் “தேவனின் சாட்சிகளாக நிற்க” தைரியம் ஆகியவற்றைத் தெரிந்துகொள்ள வேண்டும். (மோசியா 18:9).

வெறுமனே விஷயங்களைக் கூறுவதைக் காட்டிலும் பகுத்தறிவு மற்றும் அனுபவத்தின் மூலம் விஷயங்களைக் கற்றுக்கொள்ள இளைஞர்களுக்கு விருப்பம் அதிகரித்து வருகிறது. இதன் பொருள் இளைஞர்களுக்கு கற்பிக்க நல்ல செவிகொடுக்கும் திறன் தேவைப்படும். இளைஞர்கள் புரிந்து கொண்டதாக உணரும்போது, அவர்கள் ஆலோசனை மற்றும் வழிகாட்டுதலுக்கு மிகவும் மனந்திறந்தவர்களாக இருப்பார்கள். அவர்கள் கேள்விகளுடனும் சோதனைகளுடனும் மல்யுத்தம் செய்யும்போது, கர்த்தர் அவர்களை அறிந்திருக்கிறார் என்றும் அவர்களுக்கு உதவுவார் என்றும் அவர்களுக்கு உறுதியளிக்கவும். ஜெபம் மற்றும் வேதம் படிக்கும் தினசரி பழக்கத்தை வளர்த்துக்கொண்டு மற்றவர்களுக்கு சேவை செய்வதன் மூலம் அவர்மீது தங்கள் விசுவாசத்தைப் பிரயோகிக்கலாம். சபை வகுப்புகளில் பங்கேற்கவும், தாங்களாகவே படிக்கவும் இளைஞர்களை ஊக்குவிப்பது அவர்களின் தெய்வீக பாரம்பரியத்தின் சாட்சியத்தை உருவாக்கும் தனிப்பட்ட அனுபவங்களைப் பெற அவர்களுக்கு உதவும்.

பல இளைஞர்கள் தொழில்நுட்பத்தைப் பயன்படுத்தி வசதியாக இருக்கிறார்கள்

நீங்கள் கற்பிக்கும் இளைஞர்களிடம் சொந்தமாக மின்னணு சாதனங்கள் இருந்தால், இந்தக் கருவிகள் கற்றுக்கொள்ளுதலை மேம்படுத்தும் கருவிகள் என்பதை நினைவில் கொள்ளுங்கள். சுவிசேஷ நூலகத்தில் உள்ள மின்னணு வேதங்களையும் பிற ஆதாரங்களையும் எவ்வாறு பயன்படுத்துவது என்பதை அவர்களுக்குக் கற்றுக் கொடுங்கள். வரவிருக்கும் பாடங்களுக்கு இளைஞர்கள் தயாராவதற்கு உதவ, நீங்கள் அவர்களுக்கு செய்திகளையும் இணைப்புகளையும் அனுப்பலாம்.

தாங்கள் என்ன ஆக முடியும் என்பதை பரலோக பிதா அறிந்திருக்கிறார் என்பதை இளைஞர்கள் புரிந்து கொள்ள வேண்டும்.

வயதுவந்தோருக்குப் போதித்தல்

வயதுவந்தோர் தங்கள் கற்றலுக்கான பொறுப்பை ஏற்கலாம்

வயது வந்த கற்பவர்கள் சுவிசேஷத்தைக் கற்றுக்கொள்ளுதல் பின்னணிகளில் தாங்களே செயல்படும் திறன் கொண்டவர்கள் (2 நேபி 2:26 பார்க்கவும்). முன்கூட்டியே எதையாவது படிப்பதன் மூலம் சுவிசேஷ கலந்துரையாடல்களுக்குத் தயாராகும்படி அவர்களை அழைக்கவும், மேலும் அவர்கள் பரிசுத்த ஆவியின் மூலம் கற்றுக்கொள்வதைப் பகிர்ந்துகொள்ள அவர்களை ஊக்குவிக்கவும். எந்த சுவிசேஷக் கொள்கைகளை ஒன்றாகக் கற்றுக்கொள்வதற்கு அவர்கள் நேரத்தை செலவிட விரும்புகிறார்கள் என்றும் நீங்கள் அவர்களிடம் கேட்கலாம்.

கற்றுக்கொள்ளுதலின்போது வயதுவந்தோர் தங்கள் அனுபவங்களை பெற்றுக் கொள்கிறார்கள்

யோபு சொன்னான், “முதியோரிடத்தில் ஞானமும், வயதுசென்றவர்களிடத்தில் புத்தியும் இருக்குமே” (யோபு 12:12). பொதுவாக, ஞானமும் ஆவிக்குரிய புரிதலும் பல வருட அனுபவத்திற்குப் பிறகு வரும். நீங்கள் வயதுவந்தோருக்குக்குக் கற்பிக்கும்போது, பரலோக பிதா மற்றும் இயேசு கிறிஸ்துவின் மீது தங்கள் நம்பிக்கையைக் கட்டியெழுப்பிய அனுபவங்களைப் பகிர்ந்துகொள்ள அவர்களை அழைக்கவும். தாங்கள் படிக்கும் சுவிசேஷக் கோட்பாடுகள் உண்மை என்பதை அவர்கள் எப்படி அறிந்துகொண்டார்கள் என்பதைப்பற்றி சாட்சியமளிக்க இது அவர்களுக்கு வாய்ப்பளிக்கும். அனுபவங்களைப் பகிர்வது, நீங்கள் கற்பிப்பவர்களுக்கிடையே உறவுகளை உருவாக்கி, “அனைவரும் அனைவராலும் பக்திவிருத்தியடைய” உதவும் (கோட்பாடும் உடன்படிக்கைகளும் 88: 122).

வயதுவந்தோர் நடைமுறை பிரயோகத்தை நாடுகின்றனர்

நீங்கள் கற்பிக்கும் வயதுவந்தோருக்கு அவர்களின் தொழில்கள், சமூகங்கள், சபை அழைப்புகள் மற்றும் குடும்பங்களில் பல பாத்திரங்கள் மற்றும் பொறுப்புகள் இருக்கலாம். அவர்கள் சுவிசேஷத்தைப் படிக்கும்போது, தாங்கள் கற்றுக்கொள்வது அந்த பாத்திரங்களில் அவர்களுக்கு எவ்வாறு உதவக்கூடும் என்பதைப்பற்றி அவர்கள் அடிக்கடி சிந்திக்கிறார்கள். தேவனுடைய வார்த்தை அவர்களின் தனித்துவமான சூழ்நிலைகளுக்கு எவ்வாறு பொருத்தமானது என்பதைப் பார்க்க அவர்களை அழைக்கவும். சுவிசேஷக் கொள்கைகள் எப்படி அர்த்தமுள்ளவை மற்றும் அவர்களின் வாழ்க்கைக்குப் பொருந்தும் என்று அவர்களிடம் கேட்பதன் மூலம் நீங்கள் இதைச் செய்யலாம்.

வயதுவந்தோர்களால் சிக்கலான வழிகளில் சிந்திக்க முடியும்

அவர்களின் அனுபவம் மற்றும் அறிவின் காரணமாக, சுவிசேஷக் கேள்விகளுக்கு எப்போதும் எளிதான பதில்கள் இல்லை என்பதை வயதுவந்தோர் அறிவார்கள். ஒரு வேதப் பகுதிக்கு பல அர்த்தங்கள் இருக்கலாம் என்பதை அவர்கள் பாராட்டலாம், மேலும் அவர்கள் பல்வேறு வாழ்க்கை சூழ்நிலைகளுக்கு ஒரு சுவிசேஷக் கொள்கையைப் பயன்படுத்தலாம். சுவிசேஷக் கோட்பாடுகள் ஒன்றுக்கொன்று எவ்வாறு தொடர்பு கொண்டிருக்கின்றன மற்றும் அவர்களின் வாழ்வில் என்ன நடக்கிறது என்பதைப்பற்றி சிந்திக்க அவர்களை அழைக்கவும். பங்கேற்பு மற்றும் கலந்துரையாடலை ஊக்குவிக்கவும், இதனால் அவர்கள் ஒருவருக்கொருவரின் தனிப்பட்ட கண்ணோட்டத்தில் இருந்து கற்றுக்கொள்ள முடியும்.

பரலோக பிதா மற்றும் இயேசு கிறிஸ்துவின் மீது தங்கள் விசுவாசத்தை வளர்த்த பல அனுபவங்களை வயதுவந்தோர் பகிர்ந்து கொள்ளலாம்.

குறைபாடுகளுள்ள மக்களுக்குப் கற்பித்தல்

ஒவ்வொரு நபரும் வளரவும் முன்னேறவும் உதவுங்கள்

“தேவன் உலகிற்கு அனுப்பிய அனைத்து மனங்களும் ஆவிகளும் எளிதில் விரிவடைவதற்கு இலக்கானவை”(Teachings of Presidents of the Church: Joseph Smith [2007], 210) என ஜோசப் ஸ்மித் கற்பித்தார். தேவனின் எல்லா பிள்ளைகளும் அறிவைப் பெருக்கி முன்னேறும் திறன் கொண்டவர்கள் என்று வைத்துக் கொள்வோம். ஒவ்வொரு நபருக்கும் எவ்வாறு உதவுவது என்பதை அறிய உங்களுக்கு உதவ கர்த்தரிடம் கேளுங்கள்.

குறிப்பிட்ட தேவைகளைப்பற்றி அறியவும்

கற்பவர்கள் அல்லது அவர்களது பெற்றோர்கள் அல்லது பராமரிப்பாளர்களிடம் பேசுங்கள். ஒவ்வொரு நபரும் எவ்வாறு சிறப்பாகக் கற்றுக்கொள்கிறார்கள் மற்றும் என்ன உத்திகள் மிகவும் பயனுள்ளதாக இருக்கும் என்பதைக் கண்டறியவும். அனுபவமும் பகிர்ந்து கொள்ள உள்ளுணர்வுகளும் உள்ள மற்ற தலைவர்கள் மற்றும் ஆசிரியர்களுடனும் நீங்கள் ஆலோசனை செய்யலாம். உதவிகரமான கற்பித்தலுக்காக, disabilities.ChurchofJesusChrist.org பார்க்கவும்.

ஒரு நேர்மறையான சூழ்நிலையை உருவாக்கவும்

எல்லோரும் பாதுகாப்பாகவும் அன்பாகவும் உணரும் ஒரு நேர்மறையான சூழ்நிலையை உருவாக்கவும். குறைபாடுகள் உள்ள அனைத்து கற்றுக்கொள்பவர்களும் ஒரே மாதிரியானவர்கள் என்று கருத வேண்டாம், ஒவ்வொரு நபரையும் அன்புடனும் மரியாதையுடனும் நடத்துங்கள். மற்றவர்களை அன்பாகவும் ஏற்றுக்கொள்ளவும் ஊக்குவிக்கவும்.

அனைவரும் பங்கேற்க முடியும் என்பதை உறுதிப்படுத்தவும்.

உடல் ரீதியான வரம்புகள் அல்லது கற்றுக்கொள்ளுதலில் சிரமம் உள்ளவர்கள் உட்பட அனைத்து கற்பவர்களும் கற்க முடியும் என்பதை உறுதிசெய்ய நடவடிக்கைகளில் சிறிய மாற்றங்களைச் செய்யலாம். உதாரணமாக, ஒரு நிகழ்ச்சி ஒரு படத்தைக் காட்ட பரிந்துரைத்தால், பார்வைக் குறைபாடுள்ள கற்பவர்களைச் சேர்ப்பதற்குப் பதிலாக தொடர்புடைய பாடலை நீங்கள் பாடலாம்.

சீரான நடைமுறைகள் மற்றும் கட்டமைப்பை நிறுவுதல்

அட்டவணையுடன் ஒரு சுவரொட்டியை உருவாக்குவது ஒரு அட்டவணையை நிறுவுவதற்கான ஒரு வழி. உங்கள் அட்டவணையில் ஜெபங்கள், கற்பிக்கும் நேரம் மற்றும் செயல்பாட்டு நேரம் ஆகியவை அடங்கும். ஒரு அட்டவணையைப் பின்பற்றுவது சில கற்பவர்களுக்கு நிச்சயமற்ற தன்மை மற்றும் பதட்டம் போன்ற உணர்வுகளைக் குறைக்க உதவும்.

சவாலான நடத்தைகள் ஏன் நிகழ்கின்றன என்பதைப் புரிந்து கொள்ளுங்கள்

ஒருவரை தகாத முறையில் செயல்படத் தூண்டும் குறைபாடுகள் அல்லது சூழ்நிலைகளைப்பற்றி அறியவும். சவாலான நடத்தைகள் எழும்போது என்ன நடக்கிறது என்பதில் கவனம் செலுத்துங்கள். கற்பவர்களை சிறப்பாக ஆதரிப்பதற்காக சூழ்நிலையை எவ்வாறு மாற்றுவது என்பதை ஜெபத்துடன் கருத்தில் கொள்ளுங்கள்.

குறைபாடுகள் உள்ளவர்களுக்கு கற்பித்தல்பற்றிய கூடுதல் தகவலுக்கு, disabilities.ChurchofJesusChrist.org பார்க்கவும்.

எல்லோரும் ஏற்றுக்கொள்ளப்பட்டதாகவும் நேசிக்கப்படுவதாகவும் உணரும் நேர்மறையான கற்றல் சூழலை ஆசிரியர்கள் உருவாக்க முடியும்.

மெய்நிகர் கற்பித்தல்

தொழில்நுட்பத்தை நன்கு அறிந்திருங்கள்

உங்கள் வகுப்பு அல்லது கூட்டத்திற்கு முன், நீங்கள் பயன்படுத்தும் தொழில்நுட்பத்தைப்பற்றி தெரிந்துகொள்ள சிறிது நேரம் செலவிடுங்கள். காணொலிகள் அல்லது படங்களை எவ்வாறு பகிர்வது போன்ற சில அம்சங்களை ஆராயுங்கள். குடும்ப அங்கத்தினர்கள் அல்லது நண்பர்களுடன் “சோதனை” சந்திப்பை நடத்துவதைக் கருத்தில் கொள்ளுங்கள்.

பெரும்பாலான தொகுதிகள் மற்றும் பிணையங்களில் தொழில்நுட்ப வல்லுநர்கள் உள்ளனர். மெய்நிகர் சந்திப்புகளில் அனுபவமுள்ள மற்றவர்களையும் நீங்கள் அறிந்திருக்கலாம். அவர்களின் ஆலோசனை அல்லது வழிகாட்டுதலைக் கேளுங்கள்.

சாத்தியமான கவனச்சிதறல்களை அகற்றவும்

முடிந்தால், உங்கள் கூட்டத்தை நடத்த அமைதியான இடத்தைக் கண்டுபிடியுங்கள். பின்னணியில் உள்ள சத்தங்கள் கவனத்தை சிதறடிக்கலாம். கற்றவர்களையும் அவ்வாறே செய்யும்படி ஊக்குவிக்கவும் அல்லது அவர்கள் பேசாமல் இருந்தால் அவர்களின் ஒலிவாங்கிகளை முடக்கி வைக்கவும்.

புகைப்படக் கருவிகளைப் பயன்படுத்துங்கள்.

முடிந்தால், உங்கள் புகைப்படக் கருவியை இயக்கத்திலேயே வைத்திருங்கள், இதனால் கற்பவர்கள் உங்கள் முகத்தைப் பார்க்க முடியும். அவர்களுடைய புகைப்படக் கருவிகளை இயக்கவும் கற்பவர்களை அழைக்கவும் (ஆனால் தேவையில்லை). இது ஒற்றுமை மற்றும் பரஸ்பர ஆதரவின் உணர்வை உருவாக்க உதவும்.

மெய்நிகர் அரட்டை அம்சத்தைப் பயன்படுத்தவும்

பல மெய்நிகர் சந்திப்பு நிகழ்வுகள், பங்கேற்பாளர்களை அரட்டை சாளரத்தில் கேள்விகள் அல்லது கருத்துகளைத் தட்டச்சு செய்ய அனுமதிக்கின்றன. பங்கேற்பாளர்கள் மெய்யாகவே தங்கள் கைகளை உயர்த்தவும் சிலர் அனுமதிக்கலாம். இந்த அம்சங்களைப்பற்றி கற்பவர்கள் தெரிந்திருக்கட்டும். அரட்டையில் உயர்த்தப்பட்ட கைகள் அல்லது கருத்துகளைப் பார்க்க ஒருவரை நீங்கள் நியமிக்க விரும்பலாம், இதன் மூலம் கலந்துரையாடலை முன்னெடுப்பதில் உங்கள் கவனத்தை செலுத்தலாம்.

கற்பவர்களை ஈடுபடுத்துவதற்கான வழிகளைக் கண்டறியவும்

மெய்நிகர் கற்றுக்கொள்ளுதல் அமைப்புகள் சில சமயங்களில் பார்க்கப்படுவதற்கும் கேட்கப்படுவதற்கும் மக்களுக்குக் கடினமாக்குகின்றன. ஈடுபட விரும்புபவர்களை ஈடுபடுத்த மனப்பூர்வமாக முயற்சி செய்யுங்கள். சில நேரங்களில் இது சிறிய குழுக்களை உருவாக்குவதாகும் (உதாரணமாக, ஒரு பெரிய ஞாயிறு பள்ளி வகுப்பை பிரிப்பதன் மூலம்). சில நேரங்களில் ஒரு குறிப்பிட்ட வழியில் பங்கேற்பதற்கு முன்னதாகவே, , கற்பவர்களைக் கேட்பதைக் குறிக்கிறது. தொழில்நுட்பத்தின் வரம்புகள், ஆர்வமுள்ள மற்றும் கற்றுக்கொள்ள விரும்பும் நபர்களை மறந்துவிடவோ அல்லது கவனிக்காமல் விடவோ அனுமதிக்காதீர்கள்.