Pene 10
Te Piiraa Hanahana o te Peropheta Iosepha Semita
E iteraa papû tamau to‘u e ua fâ mai te Metua e te Tamaiti i te peropheta Iosepha Semita e ua heheu mai na roto ia’na te evanelia a Iesu Mesia, oia ho‘i, « te mana o te Atua no te faaoraraa » [Roma 1:16].1
Omuaraa
Ua parau te peresideni David O. McKay e, « Mai to‘u apîraa ra ua ohie roa ia‘u ia ti‘aturi i te tupuraa mau o te mau orama a te peropheta Iosepha Semita. »2 Ua parau oia e ua haapuaihia to’na iteraa papû no te peropheta Iosepha a faaroo ai oia i te hoê ohipa i tupu i ni‘a i to’na ra metua tane i roto i to’na ti‘araa misionare i te fenua Etotia :
« A haamata ai [to‘u metua tane] i te poro i to’na iho fenua ai‘a e a faaite ai oia i te iteraa papû no te faaho‘i-raa-hia mai te evanelia a Iesu Mesia, ua ite oia e e fariu ê atu te mau taata ia’na. Ua rahi roa te inoino i roto i to ratou aau no te mau huru mea atoa [no ni‘a i te Ekalesia] e e au ra e, te faaara nei te i‘oa o Iosepha Semita i te au ore i roto i to ratou mau. I te hoê mahana ua faaoti ihora oia e, te rave‘a maitai roa a‘e no te haaputapû i teie nei feia o te poro-noa-raa ïa i te mau parau tumu ohie, te taraehara o te Fatu ra o Iesu Mesia, te mau ture matamua no te evanelia, e eiaha râ e faaite i te iteraa papû no ni‘a i te faaho‘i-raa-hia mai. I roto i te hoê ava‘e mai te reira te huru, ua faateimahahia oia e te hoê mana‘o pouri, e te teiaha, e aita roa i ti‘a ia’na ia tomo atu i roto i te varua o ta’na ra ohipa. Aita oia i ite eaha râ te tumu, ua haapoirihia râ to’na feruriraa ; ua oto to’na varua ; ua teimaha oia e ua tape‘ahia oia i te rave i te ohipa ; e ua vai noa taua mana‘o oto ra e tae noa’tu ua teiaha roa oia e ua haere atu oia i te Fatu ra e ua parau atura, Ia ore ana‘e teie nei mana‘o oto e iritihia, e ho‘i atu au i te fare. Eita e nehenehe ia‘u ia tamau i te rave i ta‘u nei ohipa mai teie fifi te huru. »
« Ua tamau noa te fiu o te aau no te tahi atu taime e i muri iho, i te hoê mahana hou te hitiraa o te mahana, i muri mai i te hoê aru’i aita i taoto, ua faaoti ihora oia ia haere atu i te hoê ana, i pihai iho i te moana, inaha, ua ite oia e, i reira oia e tapu-ê-hia ai i to te ao atoa nei, e i reira oia e niinii atu ai i to’na aau i te Atua ra no te ani atu ia’na e, eaha te tumu i teimaha ai oia i teie nei mana‘o, eaha ta’na i rave, e eaha te mea e ti‘a ia’na ia rave no te faaru‘e i teie nei mana‘o e ia tamau i te rave i ta’na ra ohipa. Ua hamata oia i te haere i roto i te pouri i roto i te ana. No to’na hinaaro rahi ia tae ‘oi‘oi atu i te ana ra, haamata ihora oia i te horo. A faaru‘e ai oia i te oire, ua tape‘ahia oia e te hoê mutoi tei hinaaro i te ite eaha te mea e tupu ra i ni‘a ia’na. Ua horo‘a’tu oia i te hoê pahonoraa papû ore e te hoona râ, e ua faati‘ahia oia ia haere atu. E au ra e, te vai ra hoê mea e turai ra ia’na ia haere. E ti‘a ia’na ia farii i te pahonoraa. Ua tomo atura oia i roto i te ana e aore ra, te opani o teie nohoraa e na ô atura, » E to‘u Metua e, eaha te mea e ti‘a ia‘u ia rave ia tatara-ê-hia’tu teie nei mana- ‘o ? E ti‘a ia‘u ia iriti i te reira aita ana‘e eita e ti‘a ia‘u ia tamau i te rave i te ohipa ; e ua faaroo ihora oia i te hoê reo, papû maitai mai te ta‘iraa o to‘u nei reo e parau atu nei, i te parau raa’tu e : « A faaite papû e o Iosepha Semita te hoê ïa peropheta na te Atua.’ Haamama‘o ihora oia i te mea ta’na i faaoti papû e ono hebedoma e aore ra, hau atu, na mua’tu e to’na teimaharaa i teie nei mana‘o, ua tae maira te taatoaraa o teie nei ohipa i ni‘a ia’na i roto i te iteraa e, tei reira oia no te hoê misioni taa ê e aita roa oia i haapa‘o maitai i taua misioni taa ê ra mai tei titauhia ia’na. Tuo ihora oia i roto i to’na ra aau : ‘E te Fatu, ua navai terâ’, e haere atura oia i rapae au i te ana. »
Ua faahaamana‘o mai te peresideni McKay e, « I to‘u vai tamaiti-iti-raa, ua parahi au e ua faaroo vau i taua iteraa papû ra no roto mai i te taata ta‘u i here e i faatura mai ta outou i ite, aita vau i here i te tahi atu taata i te ao, e ua niniihia mai taua haapapûraa ra i roto i to‘u nei varua taure‘are‘a. »3
Te mau Haapiiraa a David O. McKay
Ua heheu mai te Orama Matamua a Iosepha Semita i te mau parau mau hanahana no ni‘a i te Atua te Metua e ia Iesu Mesia.
E mea puai e te faufaa mau te mau iteraa maere e te mau mea hamanihia no te afaraa hope‘a o te ahuru ma ivaraa o te tenetere tei upooti‘a i ni‘a ia tatou… Aita râ te hoê o ratou i pahono i te hinaaro rahi roa‘e o te taata nei e te hiaai rahi roa‘e o te taata nei. Aita â te hoê i heheu mai i te mea ta te taata e imi nei na roto i te mau u’i. Taua hinaaro ra—taua hiaai e vai noa nei i roto i te aau o te taata—o te iteraa ïa i te Atua, to te taata auraa ia’na… hoê noa ohipa i tupu i te ahuru ma ivaraa o te tenetere o te parau hua nei i te horo‘a i teie nei pahonoraa i te varua taata. Mai te mea e ite te taata i roto i taua ohipa i tupu ra te parau mau ta te opu taata i imi noa na, e hoona mau ïa te reira ohipa i te tapa‘o taa ê roa no te ohipa faahiahia roa‘e i roto i te ahuru ma ivaraa o te tenetere !
Taua ohipa i tupu ra, o te fâraa mai ïa o na taata toopiti no te ra‘i mai i te tamaiti peropheta Iosepha Semita ra, ma te heheu mai i te huru tata‘itahi o te Atua te Metua Mure Ore e o ta’na Tamaiti o Iesu Mesia.4
Hoê Tauatini e va‘u hanere matahiti i muri a‘e i to Iesu poheraa i ni‘a i te tatauro, ua parau te peropheta Iosepha Semita e, ua fâ mai te Fatu ti‘afaahou ia’na. [Ua parau oia] : « … Ite a‘era vau na taata toopiti, ua hau to raua anaana e to raua hanahana i te mau mea atoa, ma te ti‘araa mai i ni‘a ia‘u i te aore. Ua parau mai te hoê o raua, ma te pii mai i to‘u ra i‘oa e i te na ô raa, ma te toro atu te rima i te tahi–-O Ta‘u Tamaiti Here Teie. A faaroo Ia’na ! » [Te Aamu o Iosepha Semita 1:17.]5
E mea ohie roa ta’na parau, e mea faufaa rahi râ ; e ua maere oia a feaa ai te taata i te ti‘a mau o te reira mau parau. No’na nei, ua riro ta’na parau ei ohipa ohie roa ; No te ao kerisetiano, ua riro taua mau parau ra mai te hoê anaparaa uira tei ta‘iri, e tei haaparuparu i to ratou faanahoraa faaroo mai ni‘a roa mai i te porokita e tae roa’tu i raro i te niu fare.
Te vai ra na tuhaa faufaa rahi i roto i ta’na parau poro‘i matamua : a tahi, e tino taata te to Atua, o te faaite i to’na hinaaro i te taata ; te piti, aita roa e faaroo i roto i te ao kerisetiano i mau i te opuaraa mau no te faaora.6
Te fâraa mai o te Metua e te Tamaiti ia Iosepha Semita o te niu ïa o teie nei Ekalesia. Tei roto ia’na iho te tumu huna no to’na puai e to’na itoito. E parau mau te reira, e te faaite papû nei oia i te reira. Na te hoê heheuraa i pahono i te mau ma‘imiraa atoa no ni‘a i te Atua e to’na huru atua. Aita anei outou e ite ra e, eaha te auraa no te reira ? Ua pahonohia mai te uiraa e, eaha te huru o te Atua. E mea maramarama maitai to’na auraa e ta’na mau tamarii. Ua itehia to’na anaanatae i te taata na roto i te mana i horo‘ahia i te taata. Ua haapapûhia te ananahiraa o te ohipa. Ua haamaramaramahia mai teie mau parau mau, e te tahi atu mau parau mau hanahana na roto i taua orama hanahana matamua ra.7
Aita â te ao nei e taa maitai ra i to’na auraa ; ua riro râ ei tumu tauturu i te ite o te taata no to’na auraa e te Atuaraa e to’na ti‘araa i roto i te ao nei ; ei rave‘a no te haamauraa i te mau auraa tano i rotopu i te mau taata ei taata tata‘itahi e ei mau pŭpŭ taata ei fenua ; ei heheuraa e arata‘i i te e‘a no te oaoa o te taata e no te hau i te fenua nei mai i roto atoa i te mure-ore-raa a muri a‘e, te fâraa mai o te Metua e te Tamaiti ia Iosepha Semita e te faaho‘iraa-hia mai i muriho o te Autahu‘araa e te faati‘araahia te Ekalesia a Iesu Mesia i roto i to’na îraa, e itehia ïa te reira mai te ohipa rahi roa‘e i tupu i roto i te ahuru ma ivaraa o te tenetera, e mai te hoê o te mau ohipa rahi roa‘e i tupu i roto i te mau u’i atoa.8
Ua faaho‘i faahou mai te Fatu i te mau parau mau o te evanelia na roto i te peropheta Iosepha Semita.
Te hinaaro nei au e paraparau atu no ni‘a ia Iosepha Semita, eiaha no to’na noa huru taata tu’iroo, no ni‘a atoa râ i to’na ti‘araa tavini faaûrûhia no te Fatu… Oia mau, te faahiahiaraa o Iosepha Semita o te faaururaa ïa a te ra‘i…
Aore roa e taata e nehenehe e tuatapapa maramarama i te evanelia faaho‘ihia mai a Iesu Mesia, ma te ore e faahiahia i te huru no te au-mai-teraa o te reira mau haapiiraa e te mau haapiiraa tei horo‘ahia e te Fatu e te Faaora iho a parahi ai Oia i ni‘a i te fenua e Ta’na mau pĭpĭ. Ei hi‘oraa, a feruri na i te heheuraa a te peropheta no ni‘a i Tei Hamani—te Atua mai te hoê taata maramarama, te taata tei riro, mai ta Iesu i haapii, « To Tatou Metua i te ao ra » [A hi‘o Mataio 6:9]…
Te haapiiraa a Iosepha Semita no ni‘a i te parau e, o Iesu Mesia te Fanau Tahi a te Metua, te Faaora o te ao nei, hoê â ïa e te mau haapiiraa a Iesu Iho e Ta’na mau aposetolo.
Mai te reira atoa ta’na haapiiraa no ni‘a i te vai-tamau-oa-raa te huru taata i muri a‘e i te poheraa…
E itehia taua auraa ra i roto i te mau haapiiraa no ni‘a i te tahi atu mau ture no te evanelia mai te faaroo, te tatarahapa, te bapetizoraa, te turaa rima no te horo‘araa i te Varua Maitai, te faatoro‘araa i te autahu‘araa, ta’na mau haapiiraa no ni‘a i te « ite, te hitahita ore, te paieti, te aroha taea‘e, te aau aroha », etc… [A hi‘o 2 Petero 1:5-7 ; PH&PF 4:6]
… Ua haapii te feia e turu ra i te bapetizoraa o te mau tamarii rii no ni‘a i te mau tamarii rii : « Te mau aiû e haere mai nei i roto i te ao nei aita ïa ratou i ere noa i te ite, te parau-ti‘a, e te mo‘araa, e hinaaro natura râ to ratou no te ino e te ino ana‘e »
… Ma te itoito e te măta‘u ore, e te parauraa mai te hoê tei mau i te haapapûraa e ua ti‘a oia, ua parau te peropheta Iosepha : « Ua mo‘a noa te mau tamarii rii, i haamo‘ahia na ho‘i ratou na roto i te taraehara a Iesu Mesia » [PH&PF 74:7].9
Te itehia nei te faaururaa a te ra‘i i roto i ta [Iosepha Semita] faaiteraa hanahana no ni‘a i te natura mure ore o te mau fafauraa e te mau oro‘a e te haamaitairaa no te faaoraraa no te mau taata ora atoa. Aita te Ekalesia e tiavaru, e amui mai râ i te mau varua atoa o te farii i ta’na mau ture… E faaorahia te taata atoa na roto i te haapa‘oraa i te mau ture e te mau oro‘a no te evanelia. E tae noa’tu i tei pohe ma te ture ore e haavahia ïa ma te ture ore. No te reira tumu te oro‘a no te faaoraraa i tei pohe i heheuhia mai ai.
Te mure-ore-raa o te fafauraa no te faaipoiporaa o te hoê ïa heheuraa hanahana, o te horo‘a nei i te haapapûraa i te aau tei apitihia e te tape‘a o te here e tei taatihia e te mana no te autahu‘araa mo‘a ia vai mure ore to ratou taatiraa.
E tamau noa te tahi atu mau fafauraa e te haereraa mure ore i mua na roto i te mau u’i a muri atu.
Aita e nehenehe ia Iosepha Semita ia rave hope roa i teie nei mau mea na roto noa i to’na iho paari, to’na ite, e to’na mana ; Eita e noaa ia’na i te rave i te reira.10
Ua heheu mai te Fatu i teie nei mahana i te Opuaraa no te Faaoraraa, tei riro ei e‘a e tae atu ai i te basileia varua na roto i te paturaa i te huru taata e ti‘a ia tomo i roto i to’na ra basileia. Te faanahoraa, o te evanelia ïa a Iesu Mesia mai tei faaho‘ihia mai i te peropheta Iosepha Semita, e e mea maitai roa e tei roto te mau mea atoa.11
Ua riro te Ekalesia a Iesu Mesia tei faaho‘ihia mai ei faaiteraa no te faaururaa hanahana o te peropheta Iosepha.
I te area matahiti 1820, ua arata‘i te arepurepuraa o te pae faaroo ia Iosepha Semita ia imi i te ekalesia mau, te huru mau no te haamoriraa, te rave‘a afaro no te oraraa ; Ua tura‘i te hinaaro i te ite i te taure‘are‘a ia imi i te Fatu na roto i te pure mau. Te hoê hotu o te pahonoraa i ta’na pure o te faati‘araa ïa o te Ekalesia i roto i te fare o Peter Whitmer i te… 6 no eperera 1830. I roto i taua faanahonahoraa ra, e itehia te iteraa o te taatoaraa o te opuaraa no te faaoraraa i te taata nei.
Te hinaaro nei au i teie nei taime ia faariro i taua faanahonahoraa ra ei faaiteraa no to’na faaururaa… Ua vai ora noa te reira noa’tu te mau topatariraa faufaa, te mau tauiraa sotiare, e te arepurepuraa o te faaroo ; e te ti‘a nei te reira faanahonahoraa i teie nei mahana ei rave‘a rave‘a no te faatupuraa i te mau hinaaro teitei atoa o te taata nei…
… « Ua faati‘ahia te Ekalesia a Iesu Mesia mai te au i te haapa‘oraa o te Ekalesia tei papa‘ihia i roto i te Faufaa apî, » te na reira ra Iosepha Semita [hi‘o History of the Church, 1:79]. Te faaite mai nei te mau ohiparaa e au ia ravehia e te maitai a teie nei faanahanahoraa i to’na ti‘a-mau-raa.12
E rave rahi mau matahiti i ma‘iri a‘enei, ua parau Iosepha Semita, te hoê tamaroa iti mai te faito matahiti ahuru ma maha e ahuru ma pae, ei pahonoraa i te pure, ua farii oia i te hoê heheuraa no ô mai i te Atua ra… Te hope‘a o teie nei parau o to’na ïa hamani-ino-raa-hia e te ao faaroo. I roto noa i te taime poto ua ite oia ia’na iho i te ti‘araa o’na ana‘e i to’na ra pae.
O’na ana‘e—e te măta‘u ore i te paari e te philosophia o to’na tau !
O’na ana‘e- e ma te haapii-ore-hia i roto i te mau peu paari e te mau ite aivanaa !
O’na ana‘e—aita e philosopho no te haapii atu ia’na, aita e orometua no te arata‘i ia’na ! Na roto i te peu ore e te mata aiai ua haavitiviti oia i te horo‘a’tu ia ratou i ta’na poro‘i hanahana ; ua fariu ê atu ratou ia’na ma te vahavaha e te tahitohito ma te parau atu e no te diabolo ana‘e taua mau mea ra ; e aita roa e mau mea mai te mau orama e te mau heheuraa i teie nei mau mahana ; e ua faaea taua mau mea ra i te tau o te mau Aposetolo ; e aita faahou â teie nei mau mea. [A hi‘o i te Aamu no Iosepha Semita 1:21].
No reira ua vai noa mai oia ana‘e ra no te haamata i te haere atu na ni‘a i te moana o te feruriraa faaroo, ma te pato‘i i te mau pahi atoa tei matauhia no te tere e ma te ore i patu i te hoê pahi e aore ra, i te iteraa i te paturaa i te hoê pahi o’na iho. Ahiri mau e taata haavare oia, ua riro ïa te pahi ta’na e hamani e pahi tei ore e faaotihia.
I te tahi pae, mai te mea e, te mea ta’na i faati‘a, ua hau a‘e te reira i te maitai e te teitei i te mea ta te mau orometua e te mau philotopho maramarama i horo‘a i to te ao i roto i te rahiraa hanere matahiti na mua’tu, e riro mau ïa te taata i te parau ma te maere e, no hea mai ho‘i te paari o teie nei taata !
I reira e itehia ai e, noa’tu e, o oia ana‘e ia hi‘ohia’tu, o oia ana‘e ïa mai ia Mose i ni‘a i Sinai ; mai ia Iesu i ni‘a i te Mou‘a Olive. Mai te Fatu ra, mai te reira atoa ïa te peropheta, ua tae mai ta’na mau arata‘iraa eiha na roto i te mau rave‘a hamanihia e te taata, no ô ti‘a mai râ i te Atua ra, te puna o te mau ite atoa. Ua parau oia : « E ofa‘i taratara vau. Aita roa te paaina o te hamara e te paoti i faaroo-a‘ena-hia i ni‘a iho ia‘u e tae roa’tu i te taime ua rave atu te Fatu ia‘u i roto i ta’na na rima. Te hinaaro nei au i te ite e te paari ana‘e o te ra‘i » [Te Aamu o te Ekalesia, 5:423]…
Aita ta’na titauraa i te heheuraa no ô mai i te Atua, mai te mea e haapapûhia, e vaiiho mai i te feaa no ni‘a i to’na mana no te faanahoraa i te Ekalesia a Iesu Mesia i ni‘a it e fenua nei, e ia faatere na roto i te mana i te mau ture e te mau oro‘a no te evanelia. No reira i te omuaraa ihoa o teie nei ohipa rahi no te mau mahana hope‘a nei ua tuuhia mai te ofa‘i tihi aueue ore no te Ekalesia a te Mesia i teie nei tau tuuraa o te evanelia, [oia ho‘i] te mana faatere no te rave i te ohipa i te i‘oa o Iesu Mesia i roto i te mau mea no ta’na Ekalesia.13
A hi‘opo‘a ai tatou i te mau ohipa faahiahia [a Iosepha Semita] i roto i te area taime poto no na matahiti hoê ahuru ma maha mai te faanahoraa o te Ekalesia e tae atu i to’na taparahi-poheraa-hia ; a hi‘opo‘a ai tatou i te au-maitai-raa o te evanelia tei faaho‘ihia mai e te evanelia o te ekalesia matamua tei haamauhia e Iesu e ta’na mau Aposetolo ; a ite ai tatou i to’na ite no te mau ture e te mau oro‘a ; e a ite ai tatou i te faanahoraa faito-ore-hia e te manuia o te Ekalesia tei faati‘ahia na roto i te faaururaa a te Mesia tei topahia i to’na ra i‘oa—te pahonoraa i te uiraa, no hea mai te paari o teie nei taata ? Ua horo‘ahia ïa i roto i teie mau reni faateniteni :
Auê te taata i parau ia Iehova !
Parauhia oia ei hi‘o e Iesu
Maitihia oia no te ohipa
Faaho‘i mai i te evanelia ;
E faateitei te mau Arii ia’na e
e faatura te mau nunaa ia’na.
[A hi‘o Te mau Himene, no 27]14
Ua ora e ua pohe te peropheta Iosepha no te paruru i te mau paru mau i heheuhia mai ia’na ra.
E aravihi te mau taata tuiroo no te hi‘o maramarama atu i roto i te aau o te mau mea atoa. Te ite nei ratou i te parau mau. No ratou ihoa to ratou nei mana‘o. Te rave hanahana nei ratou i te ohipa. Te haamaitai nei ratou i te feia puai e pee atu ia ratou. Te vahavaha nei te feia faufaa ore ia ratou, te tahitohito nei ia ratou, te hamani ino nei ia ratou, area râ e pohe te mau feia pato‘i e e mo‘ehia ratou, e te taata tuiroo ra e ora ïa e a muri noa’tu.
Ua vahavaha te tahi o te mau taata tupu ia Iosepha Semita ; ua haapopou te tahi ia’na ; ua faahanahana ia’na te feia tei pee atu ia’na…
Aita roa e taata feruriraa afaro e nehenehe ia haapii i te oraraa o teie nei faatere faaroo ma te ore e putapû te aau no ni‘a i te mea e, ua noaa ia’na te hoê faito teitei no te mau tapa‘o no te hoê taata maitai, te tumu o te reira tei roto ïa i te hinaaro ia ite i te hinaaro o te Atua, e i roto i te faaotiraa, ia ite-ana‘e-hia mai, ia pee atu i te reira.15
I roto i te mau u’i atoa ua ite-matamua-hia te parau mau e te tahi noa taata faatere itoito tei faatusia pinepine i to ratou oraraa no te parururaa i taua parau mau ra. E mea na roto i te ite maramaramaraa e te itoito o teie nei mau arata‘i taata măta‘u ore te noaaraa mai te haereraa i mua o te taata nei. I te tahi taime, ua ti‘a ia ratou ia rave i te hoê maitiraa ia pato‘i, ia taui e aore ra, ia paruru i te parau mau—te maitiraa i te maitai no’na iho e te mau haamaitairaa taa ê e aore ra, te tiavaruraa, te faautu‘araa, e aore ra, te pohe. Ua tae atu taua huru maitiraa ra ia Petero e Ioane a ti‘a mau auri ai raua i mua ia Ana, te tahu‘a rahi. Ua ti‘a ia raua ia itoito maitai no te faaite i to raua iteraa no te Mesia i mua i taua mau taata iho tei faautu‘a ia’na i te utu‘a pohe. [A hi‘o Te Ohipa 4]
Ua itoito Paulo, te hoê taata mau auri taamuhia e te fifi i mua i te Arii Ageripa e to’na mau taata i roto i te aorai, i te faaite-papû-raa e ua mauiui te Mesia e ua ti‘a ia’na ia riro ei taata matamua e ti‘a faahou mai mai te pohe e no te faaite i te maramarama i te nunaa e i te mau Edene. [A hi‘o Te Ohipa 26]
Ua ti‘a ia Iosepha Semita ia itoito no te faaiteraa i te hoê ao ti- ‘aturi ore e te tahitohito i te parau mau e ua fâ mai te Atua e ta’na Tamaiti Here ia’na i roto i te hoê orama.16
Te mau taata atoa tei taui i te ao nei e mau taata ïa ratou tei vai ti‘a noa i to ratou nei mana‘o haava—te mau taata mai ia Petero, Iakobo, e Paulo, e to ratou mau taea‘e aposetolo tahito, e te tahi atu mau taata. A fariu ê atu ai te feia faatere faaroo no Palmyra, New York, i te tamaiti apî o Iosepha Semita no te mea ta’na i ite e ta’na i faaroo i roto i te Uru Raau Mo‘a, ua parau oia, ma te hoê iteraa papû no te Fatu ra Iesu Mesia i roto i to’na ouma : « Ua ite au i te hoê orama ; ua ite au i te reira, e ua ite au e ua ite te Atua, e ore roa e ti‘a ia‘u ia huna atu i te reira, e aore ra, e tamata ia na reira » [Te Aamu no Iosepha Semita 1:25].
Ua tape‘a maite noa Iosepha Semita i to’na iteraa papû e tae roa i te hope‘a.17
Te hotu o to Iosepha Semita arata‘i-raa-hia e te ra‘i o te hoê ïa haapapûraa no te parau-ti‘a no te mea ta’na i haapii e te hoê măta‘u-ore-raa no te poro atu i te reira. Ia haapii ana‘e Iosepha Semita i te hoê haapiiraa, ua haapii oia na roto i te mana. Aita oia e ui e, ua tuati anei te reira i te mana‘o taata e aore ra, aita, ua au anei te reira i te mau haapiiraa a te mau ekalesia e aore ra, ua pato‘i tia’tu i taua mau haapiiraa ra. Te mea tei horo‘ahia ia’na ta’na ïa e horo‘a i to te ao nei ma te tau‘a ore e, e auhia mai anei te reira, e aore ra, aita, ua au anei te reira e aore ra, aita i au i te ti‘aturiraa o te mau ekalesia, e aore ra, te mau faito tumu o te taata nei ; e i teie nei mahana, ia hi‘o ana‘e tatou na roto i te ohipa i tupu hau atu i te hoê hanere matahiti, tei vai nei ia tatou te hoê rave‘a maitai no te haavaraa i te viretu o ta’na mau haapiraa e no te faaotiraa i te puna o ta’na mau haapiiraa.
Aita oia i farii noa i te arata‘iraa e te haapiiraa no ô mai i te Upoo hanahana, area râ, ia oti i te fariihia, ua paruru oia i te reira ma te faaotiraa vî ore.18
Na roto i te mau faa’inoraa, te mau tahitohitoraa, te aroraa a te huiraatira, te mau haruraa, te mau tape‘araa i roto i te fare auri, te mau hamani-ino-raa tei arata‘i tia’tu i te taparahi-pohe-raa, ua tutava noa Iosepha Semita mai ia Petero e Paulo na mua’tu ia’na ma to’na aravihi atoa ia pee atu i te maramarama tei faariro ia’na ei hoê « tei noaa ia’na te huru Atua i te reira » [A hi‘o 2 Petero 1:4.].19
Ua haamaniihia te toto maitai roa‘e o teie nei fenua ma te hara ore. Ua ite [Te peropheta Iosepha] e aita ta’na e hara. Ua ite oia i to’na mau ti‘araa taata. Oia atoa to’na ra taea‘e o Hyrum, John Taylor e Willard Richards tei pihai iho ia’na i reira. No te mau haavare râ, te mea ereere e te mea faahapahia, ua taparahipohe-hia te peropheta Iosepha e to’na taea‘e o Hyrum.
… Eaha te huru o te peropheta i roto i taua mau mea atoa ? Te hoê huru hau, mai te Mesia te huru :
« Te haere nei au mai te pinia mamoe ra i te taparahiraa, tera râ te vai hau noa nei â vau mai te po‘ipo‘i tau mahanahana ra ; te vai hau nei to‘u mana‘o ma te ore i faaino atu i te Atua e i te taata atoa nei. Mai te mea e ravehia to‘u nei ora, e pohe ïa vau ma te hara ore, e e parauhia ïa no‘u nei e, ua taparahi-opua-ino-mau-hia oia » [A hi‘o PH&PF 135:4.].20
Te oraraa o te peropheta, o to’na taea‘e, Hyrum, to te patereareha, e to te rahiraa hanere tauatini atu mau taata tei farii i te parau mau o te [Orama Matamua], te faaite nei te reira e, te opuaraa no te faaoraraa, tei parauhia e, na Iesu Mesia i heheu mai, e arata‘i mau ïa te reira i to te Mesia ra huru. No te ti‘a mau o te heheuraa tei horo‘ahia i te peropheta ra e to’na taea‘e, Hyrum, i titiro ai raua ma te feaaraa i to raua iteraa papû i to raua iho toto.21
Te mau Mana‘o Tauturu no te Haapiiraa e no te Aparauraa
-
Ua faahiti te peresideni McKay i te hoê ohipa tei tupu i ni‘a i to’na metua tane i roto i ta’na misioni no ni‘a i te hinaaro i te faaite papû no ni‘a ia Iosepha Semita (a hi‘o i te mau api 107-110.) Eaha te pahonoraa ta to’na metua tane i farii ei mea faufaa mau no tatou i teie nei mahana ?
-
No teaha e mea titauhia i te Fatu ia pii i te hoê peropheta i teie mau mahana hope‘a nei ? (A hi‘o i te mau api 107-08.) No teaha te hoê iteraa papû o Iosepha Semita e riro ai ei hoê tuhaa faufaa roa no te evanelia ? Nahea te fâraa mai o te Metua e o te Tamaiti ia Iosepha Semita e riro ai « te niu o teie nei Ekalesia » ?
-
Eaha te tahi o te mau parau mau tei heheuhia mai na roto i te Orama Matamua ? (A hi‘o i te mau api 108-110.) Eaha te mau rave‘a i haamaitai ai to outou iteraa no te Orama Matamua i to outou iteraa papû no ni‘a i te Metua i te Ao ra e ia Iesu Mesia ?
-
Eaha te tahi atu mau haapiiraa ta te Fatu i heheu mai na roto i te peropheta Iosepha Semita ? (A hi‘o i te mau api 110-13.) Nahea to outou haamaitai-raa-hia a haapii ai outou e a faaohipa ai outou i teie nei mau haapiiraa ?
-
Nahea to te Ekalesia e ta’na mau haapiiraa riroraa mai ei iteraa e ua riro mau Iosepha Semita ei peropheta na te Atua ? (A hi‘o i te mau api 113-14.)
-
Eaha te tahi mau huru to te Mesia tei faaitehia mai e te peropheta Iosepha Semita ? (A hi‘o i te mau api 114-16.) Eaha ta outou e nehenehe ia rave no te pee atu i to’na hoho‘a ?
-
Eaha te mau hopoi‘a e vai mai i ni‘a ia tatou ia farii ana‘e tatou i te hoê iteraa papû no ni‘a ia Iosepha Semita e no ni‘a i te faaho‘i-raa-hia mai te evanelia ?
Te mau Papa‘iraa Mo‘a: Amosa 3:7 ; 2 Nephi 3:6-15 ; PH&PF 135 ; Te Aamu no Iosepha Semita 1:1-75
« Te fâraa mai o te Metua e o te Tamaiti ia Iosepha Semita o te niu ïa o teie nei Ekalesia. Tei roto ia’na te tumu huna no to’na puai e to’na ora. »
« Te hotu o te arata‘iraa o te ra‘i ia Iosepha Semita o te hoê ïa haapapûraa no te parau-ti‘a o te mea ta’na i haapii e te hoê măta‘u-ore-raa i te pororaa’tu i te reira. »