Te Omuaraa

Ua faanaho te Peresideniraa Matamua e te Pŭpŭ no te Tino Ahuru Ma Piti Aposetolo i Te mau Haapiiraa a te mau peresideni o te Ekalesia no te tauturu i te mau melo o te Ekalesia ia faahohonu i to ratou iteraa i te mau haapiiraa tumu o te evanelia e ia haafatata atu ia ratou ia Iesu Mesia na roto i te mau haapiiraa a te mau peropheta i roto i teie tau tuuraa evanelia. Tei roto i teie buka te faaite-raa-hia te mau haapiiraa a te peresideni David O. McKay, tei riro ei peresideni no Te Ekalesia a Iesu Mesia i te Feia Mo‘a i te mau Mahana Hopea nei mai te ava‘e eperera 1951e tae roa’tu i te ava‘e tenuare1970.

Nahea ia faaohipa i teie buka

I roto i te pene tata‘itahi o teie nei buka, te vai ra e maha tuhaa : (1) te hoê faahitiraa parau no te faaite poto noa i te mana‘o tumu o te pene, (2) te hoê « Omuaraa », no te faataa i te mau parau poro‘i o te pene ma te turuhia mai te reira e te hoê aamu e aore ra, te hoê a‘oraa na te peresideni McKay ; (3) « Te mau Haapiiraa a David O. McKay », o te hohora mai i te mau parau haapiiraa faufaa no roto mai i ta’na mau parau poro‘i e ta’na mau a‘oraa ; e (4) « Te mau Mana‘o Tauturu no te Haapiiraa e te Aparauraa », tei roto i reira te tahi mau uiraa no te tauturu i te taata tata‘itahi i roto i ta’na hi‘opo‘a-faahou-raa e ta’na tuatapaparaa, tauturu atoa i te faaohiparaa i te mau parau tumu o te evanelia, e i te tâu‘araa parau i te utuafare e i te fare pure. Na roto i te hi‘opo‘araa i te mau uiraa hou a tai‘o ai i te mau parau a te peresideni McKay, e riro te reira ei tautururaa ia roaa te tahi atu iteraa i ta’na mau haapiiraa. Ei tuhaa no te mau rave‘a tauturu no te haapiiraa e te aparauraa, te vai ra i roto i te pene tata‘itahi te hoê tabula no te mau papa‘iraa mo‘a.

Teie te huru no te faaohiparaa i teie buka :

No te faaohiparaa a te taata hoê e aore ra, a te utuafare. Ia tai‘o ana‘e e ia tuatapapa ana‘e te taata i teie buka na roto i te pure, e roaa ia ratou te iteraa papû no ni‘a i te mau parau mau i haapiihia mai e te peresideni McKay. E vai teie buka i roto i te apaparaa buka evanelia a te melo tata‘itahi, e e riro ïa ei rave‘a tauturu faufaa no te haapiiraa i to te utuafare.

No te aparauraa i roto i te mau pureraa i te Sabati. E buka haapiiraa teie e faaohipahia i roto i te mau pureraa a te pŭpŭ tahu‘a rahi, te pŭpŭ peresibutero, e te Totaiete Tauturu i te piti e te toru o te Sabati o te ava‘e. Ia riro teie mau pureraa i te Sabati ei taime aparauraa i ni‘a i te mau haapiiraa tumu e te mau parau tumu o te evanelia. E faatumu te mau orometua i ta ratou haapiiraa i ni‘a i te mau parau i papa‘ihia i roto i teie buka e i ni‘a i te mau papa‘iraa mo‘a, e na ratou atoa e faaau i te reira mau haapiiraa i ni‘a i te mau mea i matarohia e te mau melo. E nehenehe ta ratou e rave mai i te mau uiraa e vai ra i te pae hopea o te pene no te tauturu i te aparauraa. E mai te mea e, e titauhia, e mea ti‘a i te mau melo ia faaite i to ratou iteraa papû e i te tahi atu mau iteraa no ratou tei au i te haapiiraa. Mai te mea e, e titau te mau orometua i te Varua ma te aau haehaa i roto i ta ratou faaineineraa e te faatereraa i te haapiiraa, e haapuaihia ïa te iteraa i te parau mau o te mau taata atoa e amui mai i roto i te haapiiraa.

E ti‘a i te feia faatere e i te mau orometua ia faaitoito i te mau melo ia tai‘o i te mau pene parau ei faaineineraa ia ratou no te mau pureraa i te Sabati e ia ta‘ita‘i mai i ta ratou buka i te fare pureraa. E ti‘a atoa ia ratou ia faatura i te reira faaineineraa na roto i te haapiiraa i te mau parau a te peresideni McKay. Mai te mea e, e tai‘o te mau melo o te piha haapiiraa i te pene parau na mua a‘e, e ineine ïa ratou no te haapii e no te faaitoito te tahi i te tahi.

Aita e faufaa e aore ra, aita e titauhia i te mau melo ia hoo mai i te tahi atu mau buka faaiteraa mana‘o e aore ra, i te tahi atu mau buka no te turu i te mau papa‘iraa i roto i teie buka. Ei faananearaa i te tuatapaparaa i te parau haapiiraa, te faaitoitohia nei te mau melo ia tai‘o i te mau papa‘iraa mo‘a tei faaitehia i te pae hopea o te tuhaa « Te mau Mana‘o Tauturu no te Haapiiraa e te Aparauraa. »

Ua faataahia teie buka ei buka haapiiraa no te taata hoê, e ei buka haamaramaramaraa i te evanelia ; no reira, e rave rahi mau pene eita e hope ia haapiihia i roto i te roaraa o te mau pureraa i te Sabati, no te rahi o te mau parau i papa‘ihia i roto ra. No reira, e mea faufaa roa ia tai‘o te taata i te reira i te utuafare ia roaa ia ratou te îraa o te mau haapiiraa a te peresideni McKay.

Te Faatereraa i te mau Haapiiraa no roto mai i te mau Pene o Teie Buka

E rave rahi te mau haamaramaramaraa i roto i te mau pene o teie buka eita e hope i te mau orometua ia haapii pauroa i roto i te roaraa o te hoê taime haapiiraa. E ti‘a i te mau orometua ia pure no te ani i te tauturu, no te titau i te arata‘iraa a te Varua Maitai, e ia faaitoito, i roto i ta ratou maitiraa i te mau faahitiraa parau, te mau irava faahororaa, e i te mau uiraa, o te tano maitai i ni‘a i te mau hinaaro o te mau melo o te piha haapiiraa.

Faaineineraa i te Haapiiraa

Teie te tahi mau mana‘o tauturu no ni‘a i te hoê rave‘a o te riro ei tauturu i te mau orometua ia faaineine e ia hohora i te mau haapiiraa o teie buka (e nehenehe te mau metua e faaohipa atoa i teie mau arata‘iraa no te faaineine i te mau haapiiraa no te pô utuafare) :

1. A tai‘o maite i te pene na roto i te pure. A tapa‘opa‘o i te tahi mau tuhaa parau tei faauru ia outou.

2. A faataa i te mea e tupu mai i roto i te oraraa o te feia ta outou e haapii, na roto i te mau haapiiraa o te pene parau. A titau i te arata‘iraa a te Varua Maitai a feruri ai outou i te mau hinaaro o te feia ta outou e haapii nei.

3. A faataa i te mea e ti‘a ia haapii. A tai‘o faahou i te pene parau, ma te maiti maite i te mau tuhaa parau o te riro ei tautururaa rahi no te feia ta outou e haapii.

4. A faataa e nahea outou ia haapii. A faanaho i te tahi mau rave‘a no te haapii i te mau tuhaa parau ta outou i maiti. Teie te tahi mau mana‘o tauturu.

   • A arata‘i i te mau aparauraa na ni‘a i te mau uiraa i roto i « Te mau mana‘o Tauturu no te Haapiiraa e no te Tâu‘araa parau » e vai ra i te pae hopea o te pene tata‘itahi.

   • A tâu‘a parau na ni‘a i te tahi mau parau i maitihia mai no roto mai i te mau papa‘iraa mo‘a tei tabulahia i ni‘a i te tabula e vai ra i te pae hopea o te pene tata‘itahi.

   • A faaineine i te hoê rave‘a no te faaanaanatae i te mau melo i te omuaraa o te haapiiraa. Teie te hoê hi‘oraa, e nehenehe ta outou e faati‘a i te hoê aamu no roto mai i te tuhaa omuaraa o te pene parau, e papa‘i i te hoê uiraa haaferuri i ni‘a i te tabula, e aore ra, a faaohipa i te hoê haapiiraa ma te faaite i te hoê tao‘a.

   • A faahimene i te mau himene pureraa e te mau himene paraimere no te tauturu i te mau melo ia ineine no te farii i te Varua.

   • A faaite i te iteraa papû ia faauru mai te varua ia outou, eiaha râ i te pae hopea noa o te haapiiraa.

   • A titau manihini i te hoê e aore ra, e piti na melo ia haere mai raua i roto i te piha haapiiraa ma te ineine no te faaite i te hoê iteraa papû poto noa no ni‘a i te mau parau tumu i roto i te pene.

   • Mai te mea e ti‘a ia na reirahia, a faaite i te tahi mau ohipa i tupu e tuati atu i te mau parau tumu o te pene parau. A titau ia vetahi ê ia na reira atoa.

   No ni‘a i te mau mana‘o tauturu e nahea ia faaohipa i teie rave‘a haapiiraa e te tahi atu mau rave‘a, a hi‘o i roto i te buka ra, Te Haapiiraa, Aore e Piiraa Teitei atu (36123) ; te Buka Arata‘i no te Haapiiraa (34595) ; e « Te Haapiiraa i te Evanelia e te Faatereraa », tuhaa 16 no te Buka Haamaramaramaraa a te Ekalesia, Buka 2: Feia Faatere no te Autahu‘araa e no te Pŭpŭ Tauturu (35903). No te tauturu-atoa-raa ia outou ia manuia i roto i to outou piiraa, te faaitoitohia’tu nei outou ia faaô atu ia outou i roto i te faanahoraa haapiiraa o ta outou paroita, e aore ra, amaa, te Haapiiraa i te Evanelia, 12 hepetoma te roaraa, e i roto atoa i te mau apooraa toru ava‘e no te faarava’iraa i te ite o te mau orometua.

5. Faanaho maite i to outou mau mana‘o. E nehenehe ta outou e papa‘i i te hoê parau no te arata‘i ia outou i roto i ta outou vauvauraa i te haapiiraa.

Te Arata‘iraa i te mau Tâu‘araa parau Maitai

I roto anei i te utuafare e aore ra, i te hoê piha haapiiraa, te vai nei i roto i te mau pene o teie buka te hoê rave‘a nehenehe roa no te mau taata ia haapuai te tahi i te tahi na roto i te paraparauraa i roto i te mau tâu‘araa parau. E nehenehe teie mau arata‘iraa i muri nei e riro ei tautururaa ia outou ia arata‘i i te tahi mau tâu‘araa parau maitai roa :

• A ui i te mau uiraa e titau i te feruriraa e te aparauraa, eiaha râ te mau uiraa e ti‘a ia pahono-noa-hia na roto i te e, e aore ra, te aita. Te mau uiraa e haamata na roto i te parau eaha, nahea, no te aha, o vai, e aore ra, i hea, e mau uiraa maitai roa ïa no te faatupu i te aparauraa.

• A faaitoito ia vetahi ê ia faaite mai i to ratou mau iteraa no ni-‘a i te huru o te faaohipa-raa-hia te mau parau tumu o te evanelia i te mau mahana atoa o te oraraa. A faaitoito atoa ia ratou ia faaite mai i to ratou mau mana‘o no ni‘a i te mau mea ta ratou i apo. A faaroo maite e a faaite i te mauruuru no te mau mea ta ratou i faaite mai.

• A haapa‘o maite i te faaururaa a te Varua Maitai. Na’na e tauturu ia outou ia ite eaha te mea e ui, o vai te pii, e aore ra, nahea ia faaô mai i te tahi atu mau taata i roto i te aparauraa. Mai te mea e, te ite ra outou e, te haere atura te aparauraa na rapae i te tumu parau, na roto i te faatura, a faaafaro i te reni o te aparauraa.

• A ara eiaha outou e tapu ‘oi‘oi noa i te hoê aparauraa maitai no te tamata i te faahaere i te haapiiraa i mua ia hope roa ho-‘i te mau mea ta outou i faaineine. Te mea faufaa roa maori râ, ia farii te mau taata i te Varua, ia rahi to ratou iteraa i te evanelia, ia faaohipa ratou i te mau parau tumu o te evanelia i roto i to ratou oraraa, e ia haapaari ratou i ta ratou fafauraa ia ora i te evanelia.

Haamaramaramaraa no ni‘a i te mau parau tauturu tei faahitihia i roto i Teie Buka

Te mau haapiiraa a te peresideni McKay i vauvauhia i roto i teie buka, e mau parau ïa no roto mai i te mau papa‘iraa e rave rahi. Ua haapa‘o-maite-hia te mau faatomaraa, te mau papa‘iraa e te mau papa‘iraa rarahi o te mau parau atoa, maori râ, te tahi noa mau tauiraa no te nene‘iraa i titauhia no te haamaitai i te tai‘oraa. No reira, e ite te feia e tai‘o i teie buka i te tahi mau taa-êraa i roto i taua mau papa‘iraa ra.

Pinepine te peresideni McKay i te faaohipa i te mau parau ra, te mau taata, te taata, e aore ra, te taata nei no te parau i te mau taata atoa, tane e te vahine. E mea tamau atoa oia i te faaohipa i te parau ra, oia, no na apeni e piti ra. E mau parau matarohia te reira i to’na ra tau. Taa ê noa’tu te mau taa-ê-raa i rotopu i te reira mau huru faahitiraa parau e te faahitiraa parau matarohia, e ite râ te feia tai‘o parau e, ua tuea noa te faaohiparaa i te mau haapiiraa a te peresideni McKay no te vahine e no te tane.

E taata tai‘o-rahi-hia te peresideni McKay, e e mea pinepine oia i te faahiti i te parau a te tahi atu mau taata papa‘i parau i roto i ta’na mau haapiiraa. I roto i te rahiraa o te mau parau i faahitihia, na te mau paruru faahitiraa parau e faaite mai e, te faahiti nei te peresideni McKay i te parau a te tahi atu taata, tera râ, e mea varavara te i‘oa o te reira taata i te horo‘ahia. Ua tapea noahia mai i roto i teie buka te mau paruru faahitiraa parau no te faaite e, te faahiti nei te peresideni McKay i te mau parau a te tahi atu taata, eiaha ho‘i te mau pene parau o te buka ia mutumutu noa i te rahiraa parau mai teie « [taata papa‘i ite-ore-hia]. »

Ua faatoro‘ahia o David O. McKay ei Aposetolo i te matahiti 1906 e ua paturuhia ei peresideni no te Ekalesia i te matahiti 1951.