Pene 2
Na Huru e Piti o te Taata nei
Teie ïa te uiraa : Na vai ïa e horo‘a rahi atu â te ora–te faatia-noa-raa i te mau hiaai o to tatou tino aore ra te faahoturaa i to tatou varua ? E ere anei te reira te fifi mau ?1
Omuaraa
Ua faaite mai te peresideni McKay i teie nei aamu i roto i te hoê a‘oraa i roto i te hoê amuiraa rahi i te matahi 1949:
« Te vai ra te hoê aamu … tei faatia i te ohipa i tupu i te hoê taata peni hoho‘a tuiroo o tei tihepuhia no te peni i te hoê hoho‘a peni i ni‘a i te papa‘i o te fare pureraa i roto i te hoê oire no Sicilia. Te tumu parau o teie hoho‘a peni o te oraraa ïa o te Mesia. Ua haa itoito noa teie taata peni hoho‘a na no matahiti e rave rahi, e i te pae hope‘a ua oti te hoho‘a peni maori râ na hoho‘a taata faufaa rahi roa e piti, o te Mesia te Tamaiti e o Iuda Isakariota. Ua maimi oia na te mau vahi atoa no te mau taata e faahoho‘a i teie na taata e piti. »
« I te hoê mahana a haere noa’i oia na te hoê tuhaa tahito o te oire faarerei ihora oia i te tahi mau tamarii e hauti ra i roto i te aroa purumu. I rotopu ia ratou te vai nei te hoê tamaiti ahuru ma piti to’na matahiti e ua putapû roa te aau o teie taata peni hoho‘a i te iteraa i te hoho‘a mata o teie tamaiti. O te hoho‘a mata ïa o te hoê melahi—te hoê hoho‘a mata reporepo paha area râ te hoho‘a mata ïa i hinaarohia e a’na. »
« Ua afa‘i atura te taata peni hoho‘a i teie tamaiti i to’na iho fare, e i te mau mahana atoa ua parahi faaoromai noa teie tamaiti e tae noa’tu ua oti te hoho‘a mata o te Mesia te Tamaiti i te penihia. »
Area râ aita te taata peni hoho‘a i manuïa i te imiraa i te hoê taata e faahoho‘a ia Iuda. E rave rahi mau matahiti, ma te măta‘u e e ore roa ta’na hoho‘a peni e oti i te penihia, ua tamau noa oia i te imi.
I te hoê avatea, i roto i te hoê fare inuraa, ite atura te taata peni hoho‘a i te hoê taata aoaoa e te ahu mahaehae e peretete ra na te uputa o te fare inuraa e i te maruaraa i ni‘a i te tahua, ma te taparu i te hoê hapaina uaina. Faatia ihora te taata peni hoho‘a ia’na i ni‘a e hi‘o atura i roto i te hoê hoho‘a mata tei faahiti mahuta ia’na. E au ra tei roto i teie hoho‘a mata te mau hara atoa a te taata.
« A haere mai na muri iho ia‘u » te parau ïa a te taata peni hoho‘a, « E horo‘a vau i te uaina, te maa e te ahu na oe. »
Teie ïa i te hope‘araa ta’na taata e faahoho‘araa ia Iuda. Ua rave itoito ihora te taata peni hoho‘a no na mahana e na aru’i e rave rahi no te faaoti i ta’na hoho‘a peni tuiroo.
Teie ïa i te hope‘araa ta’na taata e faahoho‘araa ia Iuda. Ua rave itoito ihora te taata peni hoho‘a no na mahana e na aru’i e rave rahi no te faaoti i ta’na hoho‘a peni tuiroo.
« A tere no‘ai te ohipa peni, ua tupu mai te hoê tauiraa i ni‘a i te taata e penihia ra te hoho‘a. Ua mono atu te hoê mana‘o pe‘ape‘a i te huru unuhi ava e ua hi‘o noa to’na na mata uteute e te ava ma te măta‘u rahi i to’na hoho‘a e penihia ra. I te hoê mahana, no to’na iteraa i te pe‘ape‘a rahi o teie nei taata, ua faaea ihora te taata peni hoho‘a i ta’na ohipa, e parau atura : E ta‘u tamaiti, te hinaaro nei au e tauturu ia oe. Eaha te haape‘ape‘a ra ia oe ? »
Aue ihora taua taata nei, e huna ihora i to’na mata i roto i to’na na rima. E maoro i muri mai, hi‘o ti‘atura to’na na mata i te hoho‘a mata o te taata peni hoho‘a paari.
« Aita ihoa ïa oe e haamana‘o ra ia‘u ? E rave rahi mau matahiti i mairi a‘e nei ua riro na vau e taata faahoho‘a na oe no te Mesia te Tamaiti. ! »
I muri a‘e i to’na faati‘araa i te aamu, ua parau te peresideni McKay, « E no reira, ua tupu ihoa anei teie aamu aore ra aita, te haapiiraa ta’na e haapii mai e parau mau ïa no te oraraa nei. Ua rave teie taata tei haamau‘a i to’na oraraa i te hoê faaotiraa hape i to’na apîraa ra, e na roto i to’na tamataraa i te haamaha i to’na mau hiaai tino atoa ua mairi oia i raro roa e tae noa’tu i te taime ua taaviri oia i raro i te repo »2
Te mau Haapiiraa a David O. McKay
Te vai nei i roto ia tatou tata‘itahi na natura e piti e aro ra : te tino e te varua.
E na natura toopiti te taata, e to’na oraraa e opuaraa ïa na te Atua.Teie te ohipa matamua faufaa roa ia haamana‘ohia. E tino natura e e tino varua to te taata nei. E mea maramarama roa te mau papa‘iraa mo‘a i te faaiteraa i teie parau mau :
« E hamani ihora te mau Atua i te taata i te repo o te fenua, e rave a‘era i to’na varua (oia ho‘i, te varua o te taata), e tuu atura i roto ia’na ; e ua haapuai ihora ratou i te aho ora i roto i ta’na apoo ihu ra, riro a‘era te taata ei taata ora » (Aberahama 5:7).
E no reira, ua riro te tino o te taata ei vairaa e parahi ai to’na ra varua. E rave rahi, e rave rahi roa, te feia e ineine nei i te faariro i te tino ei taata, e na roto i te reira, ia faatere i ta ratou tautooraa no te haamaha i te oaoa o te tino, to’na mau hiaai, to’na mau hinaaro, e to’na mau hiaai rahi. Aita re‘a e ite nei e te taata mau e varua mure ore ïa, oia ho‘i « te ite aore ra te maramarama no te parau mau », [a hi‘o PH&PF 93:29] e ora nei mai te hoê taata hou te tino i hamanihia’i, e e ora tamau noa teie taata varua e to’na mau huru taa ê i muri a‘e i to te tino faaearaa i te pahono atu i te mau titauraa a to’na heipuni. Ua parau te Faaora :
« I haere mai nei au i te ao nei mai mua mai i te aro o te Metua ra, e te ho‘i faahou nei au i te Metua ra » (Ioane 16:28).
Mai te Varua o te Mesia i tuu i te ora i te hoê tino i‘o e te ivi, e na reira atoa ïa te varua o te taata tata‘itahi e fanauhia i te ao nei. E haamana‘o anei outou i te reira ei parau mau matamua no te oraraa ?
Teie ïa te uiraa : Na vai ïa e horo‘a rahi atu â te ora–te faatianoa-raa i te mau hiaai o to tatou tino aore ra te faahoturaa i to tatou varua ? E ere anei te reira te fifi mau ?3
Te fariiraa i te mau hiaai e te mau hinaaro o taata tino e haamaha ïa te reira no te hoê noa râ taime poto, e e nehenehe ho‘i e arata‘i tia’tu i te oaoa ore, te ati, te ino-roa-raa ; te ohipa a te varua e horo‘a mai ïa i « te oaoa e ore roa e tatarahapahia.
I roto i ta’na episetole i to Galatia, ua tabula o Paulo i « ta te tino e rave », mai ta’na i pii i te reira, e « ta te varua e faatupu ». A hi‘o i teie nei tabula : Teie ta te tino e faaite mai :
« … te faaturi, te poreneia, te mau peu faufau ra, te taiata, »
« Te haamori idolo, te tahutahu, te tairoiro, te tama‘i, te mârô, te iria, te vahi a vai ra, te amahamaha, te hairesi, »
« Te feii, te taparahi taata, te taero ava, te oehamu tiaâ ra, e mai te reira atoa te huru ; o ta‘u e faaite atea noa’tu ia outou i teie nei, mai ta‘u â ho‘i i faaite ia outou i mutaa ihora, e te feia e rave i te reira mau peu, e ore ratou e parahi i te basileia o te Atua ra. »
« Area ta te Varua e faatupu ra, o te hinaaro ïa, te oaoa, te hau, te faaoromai, te mărû, te maitai, te faaroo »
« Te mamahu, te hitahita ore, aore ho‘i te ture i reira. »
« E to te Mesia râ taata, ua faasatauro ïa ratou i te tino, ma to’na mana‘o, e te hinaaro ti‘a ore atoa ra. »
« E teie nei, te ora nei tatou i te Varua, e pee tatou i ta te Varua ra » (Galatia 5:19-25).4
Te vai nei te hoê mea teitei atu i te oraraa animala ; oia ho‘i, te ao varua i reira te here, te huru atuaraa mau o te varua taata. Te vai ra te hoaraa, te maitai e te tahi atu mau peu maitai.5
Te vai ra i roto i te taata iho te hoê ohipa e tura‘i nei ia’na ia ti‘a i ni‘a a‘e ia’na iho, no te faatere i to’na heipuni, no te haavî i te tino e te mau mea tino atoa e ia ora i roto i te hoê ao hau atu â i te teitei e te nehenehe.6
E fâ hanahana atu â to te taata i to te oraraa animala. O te mana o te varua ! Te tane o tei ite i te reira e iteraa ïa to’na e te vai atoa ra to te vahine iteraa no’na iho e na natura toopiti to te taata. E tino to’na mai te mau animala atoa. Te vai ra râ te hoê mea no ô roa mai i to’na Metua i te ao ra, e ua ti‘a ia’na, ia farii i te reo iti, te mau parau rii no ô mai i to’na Metua i te Ao ra, na roto i te Varua Maitai, te rave‘a i ropu ia tatou e te Atua te Metua e ta’na Tamaiti o Iesu Mesia.7
Ua riro te oraraa ei tamataraa no te ite o vai na natura toopiti to tatou ta tatou e pee atu e e faahotu.
Te oraraa o te taata i ni‘a i te fenua nei o te hoê ïa tamataraa mai te mea e, e faatumu anei oia i ta’na tutavaraa, to’na mana‘o, to’na varua, i ni‘a i te mau mea e faatupu i te au maitai e te oaoa o to’na natura tino, aore ra e faariro anei oia te roaaraa i te mau maitai varua ei fâ no to’na oraraa.
« Te mau mana‘o faahiahia atoa, te mau faaiteraa nounou ore o te here, te mau mauiuiraa itoito atoa no te ohipa ti‘a, te mau faaru‘eraa atoa ia’na iho no te tahi ohipa teitei atu ia’na iho ; te mau haapa‘oraa atoa no te hoê fâ ; te mau faaitoitoraa atoa no te haapa‘o i te parau tumu ; te mau tautururaa atoa i te taata ; te mau rave‘a atoa no te haavî ia’na iho ; te mau itoito atoa o te varua ; tei ore i pohe na roto i te faahuaraa aore ra te faanahoraa ture, na roto râ i te riroraa, te raveraa e te oraraa no te maitai o te maitai iho—o tera ïa te varuaraa. »8
I te rahiraa o te taime te vai nei i roto i te taata nei te hoê atuaraa e tutava nei i te tura‘i ia’na i mua e i ni‘a. Te ti‘aturi nei tatou e teie mana i roto ia’na o te varua ïa no ô mai i te Atua ra. I ora na te taata hou a haere mai ai i teie nei fenua, tei ô nei oia no te tutavaraa i te haamaitai i te varua i roto ia’na. I te tahi taime i roto i to’na oraraa, e ite te taata tata‘itahi i te hoê hinaaro ia tuati i tei Mure Ore. E toro atu to’na varua i te Atua ra. Tei roto i te mau taata teie nei hinaaro, e e ti‘a i te mau taata atoa, na roto i te parau mau hohonu, ia itoito i roto i teie ohipa rahi—te imiraa e te faatupuraa i te hau e te ti‘amâraa o te varua.9
Ua horo‘ahia mai teie maitiraa, ia ora tatou i roto i teie nei ao tahuti ei mau animala, aore ra ia faaohipa tatou i ta te fenua e horo‘a mai nei ei rave‘a no te ora i roto i te ao varua e arata‘i tia’tu ia tatou i mua i te aro o te Atua.
Oia ho‘i na roto i te haapapûraa :
E maiti tatou i te haapa‘o noa ia tatou iho aore ra e faaere tatou ia tatou iho no te maitai o vetahi ê ;
Ia here maite tatou i te haamaha i te hiaai [e] te hinaaro rahi aore ra e faatupu tatou i te haavîraa ia tatou iho e te tapearaa ia tatou iho.
E maiti tatou i te faaturi aore ra te viivii ore ;
E faaitoito tatou i te tairoiro aore ra e faatupu tatou i te here ;
E rave tatou i te ohipa taehae aore ra te ohipa maitai ;
E riro tatou ei taata mana‘o poto aore ra mana‘o anaanatae— e ti‘aturi noa ;
Ei taata haavare tatou- tapea ore i ta tatou faaauraa e te feia e here ra ia tatou, e to tatou fenua ai‘a, e te Ekalesia aore ra te Atua- aore ra e tapea tatou i ta tatou faaauraa ;
E taata haavare anei tatou, aore ra e taata parau-ti‘a, ua riro ta tatou parau e tapŭraa ;
E arero faaino [to tatou] aore ra e arero haavîhia.10
Ia vai mauruuru te taata i roto i te vahi ta tatou e parau nei te ao animala, mauruuru no te mea ta te ao animala e horo‘a nei no’na, te raveraa ma te tautoo ore i te tumu no to’na mau hiaai e to’na mau hinaaro rahi e te heeraa’tu i roto i te ao no te haamaharaa aore ra na roto i te haavîraa ia’na iho e ti‘a mai oia no te imi i te mau oaoa o te mana‘o, o te pae morare e o te varua, tei te huru ïa o ta’na faaotiraa ta’na e rave i te mau mahana atoa, oia ïa i te mau hora atoa o to’na oraraa.11
Eaha râ ïa te haamâ no te natura taata ia oaoa ana‘e te taata aore ra te hoê pŭpŭ taata, noa’tu e ua horo‘ahia ia ratou te tahi iteraa e, e nehenehe ia ratou ia ti‘a atu, na roto i te turaraa o te taata, i roto i te mau mea e ore e itehia i tei haamani-haehaa-hia, i te haapa‘o i te hiaai animala, ma te ore e tutava i te ite i te oaoa o te maitai, te viivii ore, te haavîraa ia’na iho, e te faaroo e pihaa mai na roto i te haapa‘oraa i te mau ture morare ! Aue te ati rahi ia oaoa ana‘e te taata « tei raro iti a‘e oia i te mau melahi i te hamaniraahia e ua faakoronohia i te hinuhinu e te tura » (Salamo 8:5) i te eturaa mai te animala te huru.12
E ere te fenua, i roto i to’na hanahana e to’na umereraa, i te hope‘a e te tumu no te poi’eteraa «… [Tou] hanahana, ta te Fatu iho i parau, (o te) faatupuraa i te tahuti ore e te ora mure ore o te taata nei » (Mose 1:39)
Te hope‘a mau o te oraraa e ere te ora-noa-raa, e ere te arearea, te roo, aore ra te tao‘a moni. Te tumu mau o te oraraa o te haamaitairaa ïa i te taata na roto i te tautooraa o te taata tata‘itahi i raro a‘e i te arata‘iraa o te faaûruraa a te Atua.
Ua riro te oraraa mau ei pahonoraa i te mea maitai i roto ia tatou nei. Ia vai ora noa no te hiaai, te arearea, te teoteo, te imiraa i te moni, eiaha râ no te maitai e te mărû, te viivii ore e te here, te pehe, te upaupa, te mau tiare, te mau fetia, te Atua e te mau ti‘aturiraa mure ore, o te faaereraa ïa ia’na iho i te oaoaraa mau o te oraraa.13
E titau te varuaraa i te haavîraa ia’na iho e te aparauraa i te Atua.
Te varuaraa, ta tatou fâ mau, o te iteraa ïa i te upootiaraa i ni‘a ia’na iho e te aparauraa i te Atua.14
E tura‘i te varuaraa i te taata ia upootia i te mau fifi e ia titau i te tahi atua â puai. Te iteraa i to’na iho aravihi i te matararaa e te parau mau i te faarahiraa i te varua o te hoê ïa o te mau ohipa faahiahia roa a‘e o te oraraa nei. Na te vai parau-ti‘a noa ia’na iho e te tapea-noa-raa i te mau fâ teitei e faatupu i te varuaraa. Te tamataraa mau o te mau haapa‘oraa faaroo atoa o te huru taata ïa o ta ratou e faatupu. Te riroraa ei taata parau-ti‘a, te parau mau, te viivii ore, te hamani maitai, te viretu, e te raveraa i te maitai no te mau taata atoa [a hi‘o Te mau Hiroa Faaroo 1:13] o te mau peu maitai ïa o te tauturu ia roaa te tao‘a teitei roa a‘e o te varua. Na « te atuaraa i roto i te taata, te horo‘a teitei e te hanahana e faariro ia’na ei arii no te mau mea atoa tei hamanihia ra. »15
Te taata e hinaaro nei i roto i to’na feruriraa ia faariro i teie ao ta’na e ora nei ei ao maitai a‘e, e i te hinaaro i te tauturu i te oaoa no to’na utuafare e no to’na mau taata tupu, e o te rave i te mau mea atoa no te hanahana o te Atua, e tae noa’tu i te faaere ia’na iho no teie mau fâ maitai, e faarahi ïa oia i to’na varuaraa. Oia mau, na roto ana‘e i teie rave‘a e ti‘a atu ai oia i ni‘a’tu i te faito o te ao animala.16
Mai tei haapiihia e te Feia Mo‘a i te mau Mahana Hope‘a nei ua haamau- papû-hia te varuaraa e te oraraa morare i ni‘a i te mau parau tumu faufaa, te mau parau tumu e ore roa e nehenehe i to te ao e ape, noa’tu to’na hinaaro, e te parau tumu faufaa mau o te hoê ïa ti‘aturiraa—e iteraa no te Feia Mo‘a i te mau Mahana Hope‘a nei—i roto i te vairaa o te hoê Atua. Ua haapiihia te mau tamarii a te Feia Mo‘a i te mau Mahana Hope‘a nei ia ite ia’na, e ia pure atu ia’na mai te taata e nehenehe e faaroo i te parau e e faaroo e e ite, mai ta te hoê metua tane tahuti e nehenehe e faaroo i te parau, e faaroo e e ite, et ua momi ratou i roto ia ratou, mai to ratou mau metua vahine e to ratou mau metua tane, te iteraa papû mau e ua paraparau mai teie Atua i roto i teie nei tau tuuraa evanelia. Ua tupu mau ihoa te reira.17
Te faaite papû nei au e ua matara te reni no te aparauraa, e ua ineine te Fatu ia arata‘i e e arata‘i ihoa oia i to’na nunaa. E ere anei i te mea hoona te pato‘iraa i te hoê faahemaraa, te imiraa i te hoê rave‘a no te hamaha i to outou hiaai aore ra to outou te‘ote‘o mai ta vetahi ê e rave ra, e ia rave ratou i te reira, e hurihia ratou i rapae i te Ekalesia, no te hamaha-noa-raa i te hoê hiaai aore ra te hoê hinaaro rahi ? Ua matara ia outou- ua matara na e‘a e piti. Hoê e arata‘i atu i te varua, te iteraa o te varua tei au i te varua o te hamaniraa, te Varua Maitai. E faahauti, e e faaora te varua o te Fatu i te mau varua atoa, i roto i te Ekalesia aore ra i rapae au i te Ekalesia. Na roto ia’na e ora‘i tatou e e tere ai tatou e e riro mai ai tatou tatou iho, area te iteraa papû no ni‘a i te Varua Maitai o te hoê ïa haamaitairaa taa ê. Mai te faroraa i ta outou afata radio e te farooraa i te hoê reo i te tahi atu pae o te ao nei. Te taata aita to roto i te faito atea tano, eita ta’na e nehenehe e faaroo i te reira, e faaroo râ outou i te reira, e faaroo outou i taua reo ra e ua ti‘a ia outou ia faaroo i taua reo e i ta’na arata‘iraa e e haere oia ia outou na mai te mea e rave outou i ta outou tuhaa ohipa. Mai te mea râ e pee atu outou i to outou mau hiaai tino, to outou iho mau hinaaro, to outou iho mau hiaai rahi, e e te‘ote‘o outou i te feruriraa e te faanahoraa e te opuaraa, e e mana‘o outou e, aita e taata e ite mai, e pouri ïa te mau mea atoa. Ua rave hope outou i ta outou haamaharaa e to outou hinaaro e to outou hiaai, area râ ua pato‘i outou i te varua ; ua tapu outou i te aparauraa i rotopu i to outou varua e te varua o te Varua Maitai.18
Eita e nehenehe ia‘u ia mana‘o i te tahi atu parau tumu teitei atu e te maitai atu maori râ te oraraa i roto i te Varua ia nehenehe ia tatou ia aparau e te Metua Mure Ore.19
Ia riro ana‘e te Atua ei haapûraa no to tatou ora, e riro tatou i te ite i te hoê fâ apî i roto i te oraraa nei—te tupuraa hope o te varua. Eita atura te mau tao‘a o te pae tino e riro faahou ei fâ tumu i roto i te oraraa. Te haamaharaa, te faaamuraa e te oaoaraa i te tino mai ta te mau animara e rave nei, e ere atura te reira i te tumu mau o te oraraa nei. Eiaha e feruri e, eaha ta te Atua e horo‘a mai na tatou, e feruri râ e, eaha ta tatou e nehenehe e horo‘a na’na.
Na roto ana‘e râ i te horo‘a-hua-raa i to tatou iho oraraa e nehenehe ai ia tatou ia ti‘a atu i ni‘a a‘e i te hutiraa nounou e te faufau o te natura. Eaha ta te varua i to te tino, o te Atua ïa i to te varua. Ia faarue te varua i te tino, aore e ora, e ia faaore tatou i te Atua i roto i to tatou oraraa, e paruparu te varuaraa…
…A faaoti ana‘e tatou mai teie atu taime ia riro tatou ei mau tane e ei mau vahine hanahana a‘e e te viivii ore, tei hau atu i te iteraa i to tatou mau paruparu, hau atu i te maitai e te aroha i te mau paruparu o vetahi ê. A faaoti na tatou e e faaohipa atu â tatou i te haavîraa i to tatou iho huru i roto i to tatou mau utuafare ; ia tapea tatou i to tatou mau huru iria, to tatou mau mana‘o e to tatou mau arero ia ore ratou e haere atu i tera atu pae o te mau otia o te ohipa ti‘a e te viivii ore ; ia rahi atu â ta tatou mau imiraa ia faarahi i te pae varua o to tatou oraraa, e ia ite i to tatou ti‘aturiraa i te Atua no te manuïaraa i roto i teie nei oraraa.20
Te ora mau nei te Atua te Metua, te ora mau nei o Iesu Mesia, te Fatu tei tiafaahou, o te parau mau ïa e ti‘a i te varua taata atoa ia fatu. Te Atua te haapûraa mau o te mana‘o taata mai te mahana i riro ei haapûraa no teie nei ao, e ia ite tatou i to’na huru Metua Tane, ia ite ana‘e tatou i to’na piri ia tatou, ia ite i te hanahana o te atuaraa o te Faaora, e pee noa mai ïa te mau parau mau o te evanelia a Iesu Mesia mai te mahana i te ru’i, e te ru’i i te mahana.21
Te mau Mana‘o Tauturu no te Haapiiraa e no te Aparauraa
-
No teaha e mea titauhia ia farii tatou i te hoê natura tino e te hoê natura varua ? Nahea to tatou mau hiaai e to tatou mau hinaaro rahi e ti‘a ai ia faaohipahia no te maitai aore ra no te ino ?
-
Ua haapii te peresideni McKay e, ua riro te oraraa ei tamataraa no te ite eaha râ te natura ta tatou e pee atu (a hi‘o i te mau api 15-19). Eaha te mau rave‘a e ite ai tatou i te aroraa i rotopu i to tatou na natura tino e te varua ? Eaha te mau maitiraa e nehenehe ia tatou ia rave i te mau mahana atoa no te oaoa i taua mau horo‘araa varua rahi ra mai te here, te oaoa e te hau (A hi‘o i te mau api 15-21.)
-
Eaha te « taata tino nei » ? (Mosia 3:19). Eaha te taata tino nei i riro ai ei enemi no te Atua ? Eaha te mea e ti‘a ia ravehia no te faarue i te mau peu a te taata tino nei ? (A hi‘o i te mau api 19-21.)
-
Eaha te mau mana e faatupu nei i te mau taata e rave rahi ia faatumu i to ratou oraraa i ni‘a ana‘e i te haamaharaa i to ratou natura tino ? No te aha e mea fifi roa i te tahi mau taime i te faatumu i ni‘a i te mau mea varua ?
-
Eaha te tahi mau mea ha’iha’i e tapea nei i te tupuraa o to tatou varuaraa ? Nahea te faarahiraa i te haavîraa ia tatou iho e tauturu ai ia tatou ia faarahi i to tatou nei varuaraa ? (A hi‘o i te mau api 19-21.)
-
Nahea ta outou auraa e te Atua e haamaitai ai i to outou nei varua raa ? (A hi‘o i te mau api 19-21.) Eaha ta outou e nehenehe e rave no te haapûraa i to outou oraraa i ni‘a i te Atua te Metua e ia Iesu Mesia ?
Te mau papa‘iraa mo‘a: Ioba 32:8 ; 2 Nephi 2:27-29 ; Mosia 16:1-5; Aberahama 3:24-25
Ua haapii te peresideni McKay e « ua riro to tatou oraraa tahuti ei hoê noa tamataraa » no te hi‘o mai te mea e maiti anei tatou i te pee atu e te faatupu i to tatou natura tino aore ra natura varua.