Pene 13

Te Faufaa Mo‘a o te mau Hiero

Te pure nei au ma tou aau atoa e ia nehenehe i te mau melo atoa o te Ekalesia e ta ratou mau tamarii e te mau tamarii a ta ratou mau tamarii ia ite i te mau parau mau faahiahia tei faaitehia i roto i te fare o te Fatu.¹

Omuaraa

I to David O. McKay riroraa mai ei Peresideni no te Ekalesia i te matahiti 1951, te vai ra ïa e va‘u hiero a te Ekalesia e ohipa ra. E maha i Utaha, e te tahi atu mau hiero i Arizona, Hawaii, Idaho e Alberta. I te tau mahanahana no te matahiti 1952, ua tere atu te Peresideni McKay i na fenua e iva no Europa. I roto i teie nei tere, ua maiti oia i te mau fenua faati‘araa no te mau hiero i te fenua Helevetia e te fenua Peretane, haamatararaa i te hoê tau e rooa ai te mau haamaitairaa no te hiero i rapae au i te Fenua Marite e Canada.²

Ua arata‘ihia te Peresideni McKay e te faaûrûraa a te ra‘i i roto i te maitiraa e te hooraa mai i te mau fenua faati‘araa no te hiero. A maiti ai oia i te fenua faati‘araa no te Hiero no Lonedona Peretane, ua feaa te mau taata faatere ohipa, ma te parau e e mea vari roa te fenua. Area râ, i muri a‘e i to ratou hi‘opo‘a-maitai-raa, ua itehia te påpå i te hohonuraa tano, no te haamau i te niu o te hiero. I te fenua Helevetia, a ore ai te Peresideni McKay e te tahi atu feia faatere i manuia i te hoo mai i te fenua matamua tei maitihia, ua pure atu ratou i te Fatu no te tautururaa. I muri noa iho ua ite ratou i te tahi atu fenua rahi atu â e ma te afaraa râ o te moni hoo. Fatata i taua iho taime, ua hamanihia te hoê purumu aano rahi mana‘o-ore-hia na roto i te tahi tuhaa o te fenua matamua, e na te reira i faariro i te iteraa o te fenua apî ei ohipa maitai roa’tu.³

Ua haamo‘a te Peresideni McKay i te Hiero no Bern Helevetia i te matahiti 1955 e te Hiero no Lonedona Peretane i te matahiti 1958. Ua haamo‘a atoa oia i te Hiero no Los Angeles California (1956), te Hiero no Hamilton Niu Zelani (1958) e te Hiero no Oakland California (1964). Ua haamaitai te faatereraa a te Peresideni McKay i te paturaa i te mau hiero i te mau vahi atoa o te ao nei i te mau oraraa o te mau rahiraa melo tai‘o-ore-hia, to ratou mau tupuna, e to ratou mau huaai. Te faaite mai nei te hoê papa‘iraa i roto i ta’na buka haamana‘oraa i to’na iteraa papû no te faufaa rahi o te ohipa no te hiero ; i te mahana i haamo‘a ai oia i te fenua faati‘araa no te Hiero no Bern Helevetia, ua papa‘i oia : « Te hinaaro nei au ia afai atu te hiero i rotopu i te mau taata. »⁴

Te mau Haapiiraa a David O. McKay

E arata‘i te oro‘a hiero ia tatou i te basileia o te Atua.

Te vai nei te « oro‘a » Hiero, » o te hoê ïa oro‘a no ni‘a i te tere mure ore o te taata nei e te mau rave‘a e te tereraa faito ore i mua a ta te hoê Metua parau-ti‘a e te here i horo‘a no te mau tamarii ta’na i hamani mai te au i to’na iho hoho‘a—no te taatoaraa o te utuafare taata. Teie te tumu e patuhia’i te mau Hiero.⁵

Ia tauturun mai te Atua ia tatou ia mauruuru i te evanelia faaho‘ihia mai a Iesu Mesia, tei roto te mau mea atoa. Tei roto i te evanelia te philosophia o te oraraa nei, e i roto i ta tatou mau hiero e faaitehia’i te oro‘a, e na te haapa‘oraa i te reira e afai i te taata tata‘itahi (e o teie to‘u iteraa papû, no te mea ua ite au i te reira) mai te mau huru haapa‘o ia’na iho, nounou, maroraa, au ore o te faito animala i te faito teitei roa‘e e i te basileia o te Atua.⁶

E nehenehe te mau tane e te mau vahine e te mau utuafare ia taatihia no te tau mure ore i roto i te mau hiero.

Te hoê o te mau uiraa tumu e anihia e te mau papa‘i ve‘a, e te mau taata o teie ïa, « Eaha te huru ê raa i rotopu i ta outou Hiero e te tahi atu o ta outou mau fare a te Ekalesia ? » Mai ta te mau melo atoa o te Ekalesia i ite, te pahonoraa o teie ïa, e ua patuhia te mau Hiero no te raveraa i te mau oro‘a mo‘a- eiaha te mea huna, te mea mo‘a râ. E ere te Hiero te hoê fare haamoriraa na te huiraatira. Ua faatiahia te reira no te mau tumu taa ê. Oia mau i muri a‘e te hoê Hiero e haamo‘ahia’i te mau melo tiamâ ana‘e o te Ekalesia e nehenehe e tomo atu i roto.

Te hoê o te mau tapa‘o taa ê o te Ekalesia tei faaho‘ihia mai a Iesu Mesia o te natura mure ore ïa no ta’na mau oro‘a e ta’na mau peu mo‘a. Ei hi‘oraa, i te rahiraa o te taime i roto i te mau oro‘a tivira e i roto atoa i te ekalesia, e faaipoipohia te mau tane e te mau vahine no « te taime noa », a ore râ « e tae noa’tu na te pohe e faataa ê ». Area râ te here e mea mure ore ïa mai te varua o te taata ; e mai te mea e vai noa te taata i muri a‘e i te pohe, e na reira ihoa oia, e vai noa atoa mai te here.

E anaanatae te mau taata maramarama atoa e imi nei e te feia titorotoro atoa, i te taime ihoa râ a ite ai ratou i te parau mau, e e mea mure ore te here, te horo‘a hanahana roa‘e o te varua taata, mai te varua iho. No reira ia pohe ana‘e te taata, e vai noa mai te viretu o te here, e mai te mea e tiaturi te taata titorotoro i te tahuti ore o te varua, aore ra i te vai raa mai o te huru taata i muri a‘e i te pohe, e ti‘a ïa ia’na ia farii e vai atoa mai te here…

… Te faaueraa a te Faaroa o te aroharaa ïa i te taata tupu mai tatou e aroha ia tatou iho na. Mai te mea râ e ua riro te mau mea o te fenua nei ei hoho‘a no te mau mea o te ra‘i, e ite ïa tatou i reira i roto i te ao varua i te feia i herehia e tatou e e ite tatou ia ratou mai ta tatou i here ia ratou i ô nei. Te here nei au i ta‘u vahine hau atu i to‘u hereraa i te tahi atu mau taata. Te here nei au i ta‘u mau tamarii. E nehenehe ta‘u e au maitai i te hoê taata, e nehenehe ta‘u e hinaaro i te tauturu i te taata nei, area râ te here nei au i ta‘u vahine i pihai iho ia’na vau i parahi ai e hi‘o ai i te hoê tamarii rii i roto i te ma‘i aore ra, paha, o te pohe. E taati taua mau ohipa râ te aau i te aau, e e mana‘o hanahana ia poiherehia e e ore roa e nehenehe i te pohe ia faataa ê te mau aau tei taati- amui-hia ; e ite faahou â outou tata‘itahi te mau tane i ta outou vahine i roto i tera’tu ao, e e here outou ia’na mai ta outou i here ia’na i ô nei, e e ti‘a mai oia i roto i te apiraa no te oraraa mure ore i te ti‘a-faahou-raa. No teaha e tia’i i te pohe ia faataa ê ia orua a vai tamau noa’i te here i muri a‘e i te pohe ?

E ore roa e ti‘a, e ore roa e titauhia, no te mea a vai ai Iesu i ni‘a i te fenua nei ua parau oia i ta’na mau Aposetolo, « E e horo‘a’tu ho‘i au i te mau taviri o te basileia o te ao ra ia oe, e ta oe e haamau i raro nei, e haamau-atoa-hia ïa i te ao ; e ta oe e tuu i raro nei, e tuu-atoa-hia ïa i te ao » (Mataio 16:19). E na roto i te faaho‘i-raa-hia mai te Autahu‘araa Mo‘a, te haapapû nei te Ekalesia e ua horo‘a-faahou-hia teie nei mana i te mau taata maitihia, e i roto i te fare o te Fatu i reira te oro‘a faaipoiporaa e ravehia’i e te feia tei haamana-ti‘a-hia no te ti‘a atu no to tatou Fatu e Faaora, Iesu Mesia, e ravehia’i te taatiraa i rotopu i te tane e te vahine, e i rotopu i te mau metua e te mau tamarii no te taime nei e no a muri atu, e no te feia tei faaipoipohia e vai tamau noa ïa te utuafare i roto i te mau tau mure ore.⁷

Ua heheu mai Iosepha [Semita]… te hi‘o i te mure-ore-raa o te fafauraa no te faaipoiporaa, te hoê haapiiraa nehenehe mau, tano mau, e te atea i roto i to’na auraa e mai te mea e fariihia te taatoaraa o te reira, e rave rahi ïa o te mau ino i teie nei mahana o te haamouhia.⁸

Te horo‘a nei te Ohipa i te Hiero i te ora no te feia tei pohe ma te ite ore i te evanelia.

Te aparau ra te hoê piahi tinito e ho‘i ra i to’na fenua ai‘a e tei farii i ta’na parau tui’te i roto i te hoê o ta tatou fare haapiiraa tuarua tuiro e te hoê orometua keresekiano e tere atoa ra i te fenua Taina. A faaite ai teie nei orometua i te parau mau e na roto ana‘e i te mau haapiiraa a te Mesia e nehenehe ai i te taata e faaorahia, ua parau maira te [piahi] : « E to‘u ïa mau tupuna tei ore roa i farii i te hoê taime no te faarooraa i te i‘oa o Iesu ? » Pahono atura te orometua : « Ua mo‘e ïa ratou ». Ua parau maira te piahi : « Eita ïa vau e hinaaro i te hoê haapa‘oraa faaroo ti‘a ore o te faautu‘a i te utu‘a mure ore i te mau tane e te mau vahine tei riro ei feia parau-ti‘a mai ia tatou nei, penei a‘e hau atu i te parau-ti-‘a ia tatou, o tei ore râ i farii i te hoê rave‘a no te faarooraa i te i‘oa o Iesu. »

E pahono atu ïa te taata tei maramarama i te parau mau, mai tei heheuhia i te peropheta Iosepha no ni‘a i teie nei haapiiraa : « E farii ratou i te hoê rave‘a no te faaroo i te evanelia, e no te haapa‘o i te mau ture e te mau oro‘a atoa na roto i te monoraa. E haavahia e e faautu‘ahia te mau taata atoa i ô nei e a muri a‘e mai te au i ta ratou ra mau ohipa. »⁹

No te mea ho‘i e e mea faufaa rahi roa te tatarahaparaa e te bapetizoraa na roto i te pape e na roto atoa i te Varua no te faaoraraa, nahea ïa te mau milioni taata tei ore roa i faaroo noa‘e i te Evanelia, tei ore roa i farii noa‘e i te hoê rave‘a no te tatarahapa anei aore ra ia bapetizohia ratou, e tomo atu ai i roto i te basileia o te Atua ? E mea papû roa eita roa te hoê Atua no te aroha e mauruuru mai te mea tei rapae i to’na Basileia te rahiraa o ta- ’na mau tamarii, ma te faaea-noa-raa e a muri noa’tu i roto i te ite ore, te oto rahi e te hade. E mea inoino mau taua huru mana‘o ra no te mau varua maramarama. I te tahi pae, mai te mea e nehenehe i teie nei mau milioni taata tei pohe ma te faaroo ore i te Evanelia ia tomo atu i roto i te basileia o te Atua ma te haapa‘o ore i te mau ture e te mau oro‘a no te evanelia, e ere ïa te mau parau a te Mesia ia Nikodemo [A hi‘o Ioane 3:2-5] e faaiteraa no te hoê parau mau mure ore no te taatoaraa, e aita ïa e faaohiparaa na te ao atoa te mau parau a Petero i te Mahana Penetekose [a hi‘o Te Ohipa 2:38], noa’tu e ua parau maramarama maitai mai oia, « No outou ho‘i tei parauhia maira, e no to outou tamarii, e no te feia atoa ho‘i i te atea ê ra, ta te Fatu ta to tatou Atua e parau atu » [A hi‘o Te Ohipa 2:39].

I teie nei te haapii nei te Evanelia a Iesu Mesia e e faaorahia te taata atoa na roto i te haapa‘oraa i te mau ture e te mau oro‘a no te evanelia. [A hi‘o i Te Mau Hiroa Faaroo 1:3] Aita te ta‘o « atoa » i tape‘ahia no te auraa e te tahi noa tei maitihia ; te auraa no te reira, o te mau tamarii atoa a te hoê Metua here e te hanahana. E te vai ra â mau hanere milioni tei pohe ma te ore noa‘e i faroo e te vai nei hoê mea mai te opuaraa no te Evanelia.

E titauraa tano ta te mau nunaa e te mau opu atoa no ni‘a i te mau maitai o te Atua. No te mea ho‘i e e hoê ana‘e opuaraa no te faaoraraa, e mea papû roa ïa te vai nei te tahi faanahoraa tei ravehia e nehenehe ai i « tei pohe tei numera-ore-hia » ia faaroo i te reira e ia farii i te rave‘a no te farii anei aore ra no te pato‘i atu i te reira. Ua horo‘ahia taua huru faanahoraa i roto i te ture no te faaoraraa i te feia pohe…

Ua faahiti Paulo i [te] peu no te bapetizoraa [i tei pohe] i roto i ta’na parururaa i te parau no te ti‘a-faahou-raa. Ua parau oia, « Aore ra, eaha ihora te feia i bapetizohia no te feia i pohe ra, ia ore roa te feia i pohe ra ia ti‘a faahou ? » (1 Korinetia 15:29). E ere te mea iti te feia tatara tei tamata i te haamaramarama i te auraa mau o [teie nei irava] ; te faaite papû mai ra te irava e i vai na i te mau mahana o te mau aposetolo te peu no te bapetizoraa i te feia pohe ; oia ho‘i, e utuhihia i raro i te pape te feia ora no te feia i pohe—eiaha tei « pohe i te hara », tei « haere ê atu râ i te tahi atu pae ».

I roto i te Hiero no Ketelani, i te 3 no eperera 1836, ua fâ mai te peropheta Eliaha ia Iosepha Semita e Oliver Cowdery e ua horo‘a’tu ia ratou « te mau mana o te autahu‘araa » o te faati‘a i te feia ora ia rave i te ohipa no te feia i pohe. Ua faaho‘ihia mai teie mau taviri ei faatupuraa i te tohuraa a Malaki :

« I rotoaha, e tono na vau i te peropheta ra ia Elia ia outou na, a tae atu ai i taua mahana rahi măta‘u o Iehova ra : ia faafariu oia i te aau o te mau metua e te tamarii, e te aau o te tamarii e to ratou mau metua, o te haere mai ho‘i au, e o te tairi i te fenua nei i te ino » (Malaki 4:5-6). E faafariu te aau o te mau metua e o te mau tamarii te tahi ia ite ana‘e te mau metua i roto i te ao varua, o te faaroo i te Evanelia i porohia’tu ia ratou e o te ite e e ti‘a ia ratou ia haapa‘o i te mau oro‘a no te evanelia, e te rave ra ta ratou mau tamarii i ni‘a i te fenua nei i taua mau oro‘a no ratou.

E ravehia taua mau huru « ohipa no te feia pohe » i roto i te mau hiero, tei haamo‘ahia e tei faataahia no taua mau tumu ra, i reira te mau buka tano e papa‘ihia ai, e i reira te mau mea atoa e faarirohia’i ei mea mo‘a.

Ma te hopoi‘a e vai mai ni‘a ia ratou no te faahaereraa’tu i teie nei tuhaa faufaa rahi no te taviniraa i roto i te Evanelia, ua riro mai te Feia Mo‘a i te mau Mahana Hopea nei ei nunaa patu hiero.¹⁰

Tei ia outou ra paha te rave‘a no te haaputu i te mau i‘oa o to outou mau tupuna, o te nehenehe, ia bapetizohia na roto i te monoraa, e riro mai ei melo no te basileia o te Atua i roto i te tahi atu ao mai ia tatou te mau melo i ô nei.

Mai te faaho‘i-raa-hia mai teie nei ture e teie nei raveraa, ua imi itoito noa te mau melo o te Ekalesia i te mau buka o te ao nei no te aamu o to ratou mau tupuna ia nehenehe i to ratou mau tupuna ia farii na roto i te monoraa i te mau haamaitairaa no te evanelia a te Mesia. Ei tuatiraa i teie nei ohipa te haapa‘o nei te Ekalesia i te hoê faanahoraa rahi no te tuatapaparaa.¹¹

I roto i teie nei ture no te faaoraraa i tei pohe, ua heheuhia mai te hohonuraa o te mana faaora o te Evanelia, e te faaohiparaa i te mau taata atoa i te mau haapiiraa a te Faaora. Oia mau, « Aita’tu ho‘i e i‘oa i faaitehia mai i te taata i raro a‘e i teie nei ra-‘i, e ora‘i tatou nei » [Te Ohipa 4:12]. E mea mure ore te mau oro‘a atoa o te ravehia i te Autahu‘araa o Tei Teitei roa ra mai te here, e mea aano e e vai maoro mai te oraraa, e na roto i te haapa‘oraa i te reira, e nehenehe ai i te mau taata atoa, te mea ora e te mea pohe, ia tomo atu e ia faaea e a muri noa’tu i roto i te basileia o te Atua.¹²

E ti‘a ia tatou ia tomo tiamâ atu i roto i te hiero e ia haapa‘o i te mau fafauraa ta tatou e rave i reira.

O ratou o te haere ra i te hiero e haere ïa ratou e te mau parau faati‘a e e mau Keresetiano mau ratou ; e e mau melo mau ratou no te Ekalesia a te Mesia ; e e mea parau-ti‘a ratou e to ratou mau taata tupu ; e e ora ratou mai te au i te mau haapiiraa teitei o te evanelia a Iesu Mesia.¹³

Hou te hoê faaipoiporaa [hiero] e ravehia’i, e mea titauhia i te feia apî tane e te feia apî vahine ia roaa na mua i te hoê parau faati‘a i te episekopo… I reira, i mua i te autahu‘araa, hou a rave ai ratou i ni‘a iho ia ratou iho te titauraa o te faaipoiporaa, e farii ai te feia apî i te mau arata‘iraa no ni‘a i te mo‘araa o te hopoi‘a e vai nei i mua ia ratou ; e, hau atu â, e faaoti ratou e, ua ineine anei ratou e aore ra aita, i te haere ma te mâ e te viivii ore i te fata o te Atua e i reira ia taati i ta ratou mau tapuraa e to ratou ra here.¹⁴

Te faaipoiporaa i te hiero o te hoê ïa o te mau mea hau atu i te nehenehe i roto i te ao atoa nei. E arata‘ihia’tu te tane e te vahine i reira e te here, te taipe hau atu i te hanahana o te varua taata… E ti‘a toopiti raua i roto i te fare o te Fatu no te faaite papû e no te fafau i mua ia’na e e haapa‘o raua i te mau fafauraa ta ratou e rave i taua mahana ra, ma te tape‘a ia’na iho no te tahi e eiaha no te tahi atu. O tera te hoho‘a teitei roa‘e o te faaipoiporaa i horo‘ahia i te taata nei. Mai te mea e haapa‘ohia taua mau fafauraa ei mea mo‘a mai te mau fafauraa mo‘a e ti‘a ia haapa‘ohia, e iti mai ïa te mau aau oto i roto i te mau vahine faaipoipo e i roto atoa i te mau tane faaipoipo. Te fafauraa o te hoê ïa mea mo‘a… A tape‘a maite i te reira, a haapa‘o i te reira.¹⁵

O ratou o te rave i te mau fafauraa no te feia ta ratou i here e o te haa atu i roto i te hoho‘a teitei roa‘e o te faaipoiporaa tei horo‘ahia’tu i te taata nei, e haere ïa ratou i roto i te varua eita râ e haapa‘o i ta te tino. E e haapa‘o outou i te mau fafauraa ta outou e rave i roto i te Fare o te Atua.¹⁶

« E ore roa tau Varua e mârô i te taata nei e a muri noa’tu » (Genese 6:3) te parau mai nei te Fatu. « E ore roa tau Varua e parahi i roto i te hoê tino viivii. » O oia o te tamata i te ora e piti na oraraa, o te ora i te oraraa toopiti na roto i te ofatiraa i ta’na mau fafauraa, e no te faahitiraa i te hoê taata papa‘i, e « e tavini oia, aore ra e taata maamaa ». E mea pinepine oia i te riro i na huru taata toopiti, no te mea te faaohipa nei oia i to’na tiamâraa no te haamaha i to’na mau hinaaro rahi, no te haamau‘a i ta’na faufaa i roto i te oraraa taiâta, no te ofatiraa i te mau fafauraa ta’na i rave i roto i te fare o te Atua.¹⁷

E hopoi‘a na tatou ia tauturu ia vetahi ê ia fana‘o i te mau haamaitairaa o te hiero.

Te tauturu nei to tatou mau hiero tei patuhia no te faaoraraa e te faateiteiraa i te utuafare taata i te faahaereraa i te opuaraa mure ore o te faaoraraa. E tano taua iho mau ture no te haereraa i mua i te mau tamarii atoa a te Metua e ora nei i roto i te hoê oraraa tahuti aore ra i roto i te hoê oraraa varua. Na teie huru titauraa i te mau taata atoa e faaite mai nei i te faautu‘araa hanahana…

Te Ekalesia i faaho‘ihia mai a Iesu Mesia o te opuaraa ïa i horo‘ahia mai e to tatou Metua i te Ao ra e nehenehe ai te taata tata‘itahi e feruri ia haa e te Atua no te oaoa e te faaoraraa o to’na iho varua. Te titau nei te feruriraa e te faautu‘araa e ia faaohipahia na te ao taatoa te mau ture mure ore e te mau oro‘a i te mau taata e ora ra i roto i te tahuti nei e o ratou e ora ra i roto i te ao varua.

E mea na roto ana‘e i teie raveraa e hope ai te ohipa e te hanahana a te Atua na roto i te tahuti ore e te ora mure ore o te taata nei.

Ua horo‘ahia mai te opuaraa mure ore no te faaoraraa na roto i te heheuraa no ô mai i te Metua e ta’na Tamaiti i te peropheta ra Iosepha Semita, e te vai nei te mana faatere hanahana no te ohiparaa i roto i te mau ture e te mau oro‘a i ni‘a i te mau taata e arata‘i nei i teie nei i te oraraa o te Ekalesia tei heheuhia mai.¹⁸

Te hoê o ta tatou hopoi‘a rahi roa‘e o te faafana‘oraa ïa te mau melo haapa‘o maitai o te Ekalesia i roto i te mau fenua ĕê i te mau fare maitai o te Fatu. E rave rahi ahuru tauatini o ratou tei ore e nehenehe ia haere atu i te vahi i reira te mau hiero, e i reira ho‘i ratou e farii ai i te mau haamaitairaa no te oro‘a, ia taatihia i ni‘a ia ratou ta ratou mau vahine faaipoipo e ta ratou mau tamarii no teie oraraa e no te oraraa a muri noa’tu. E hopoi‘a na tatou ia afai atu te hiero ia ratou ra.¹⁹

Auê ho‘i te hanahana te evanelia ! Auê ho‘i te rahi ta tatou nei hopoi‘a ia vaiiho i to te ao nei ia ite i to’na nehenehe, to’na hohonu, to’na ra hanahana ! Te pure nei au ma tou aau atoa e ia faaama mai to tatou mau hiero i te anaanatae e te hinaaro ia ite i te hinaaro o te Atua i roto i te aau o te mau tauatini e ahuru tauatini o te mau taata maitai e hinaaro nei i te ite i te parau mau. Ia tauturu mai te Atua ia tatou paatoa ia faarahi i to tatou aravihi no te haaparare i teie nei parau mau e no te tauturu i te taata ia ite i te reira.²⁰

Te mau Mana‘o Tauturu no te Haapiiraa e no te Aparauraa

No te aha e mea faufaa rahi roa ia farii tatou i te mau oro‘a no te hiero e ia rave e ia haapa‘o tatou i te mau fafauraa i tuatihia’tu ? (A hi‘o i te mau api 145-47, 149-53.)
Nahea e nehenehe ai i te oro‘a hiero ia arata‘i ia tatou i te ora mure ore ? (A hi‘o i te api 150). No te aha e mea faufaa roa ia haere pinepine atu i te hiero ? Eaha te mau haamaitairaa ta outou i farii na roto i te raveraa i te mau oro‘a e te mau fafauraa o te hiero ? No te aha outou e mana‘o ai e e mea faufaa rahi roa ia farii i teie nei mau oro‘a e teie nei mau fafauraa hou a tavini ai i te hoê misioni aore ra a haamata ai i te hoê utuafare mure ore ?
Eaha tei titauhia i roto i te faaipoiporaa e te mau auraa utuafare, ia vai tamau noa e a muri noa’tu ? (A hi‘o i te mau api 149-53.) Nafea te haapiira no ni‘a i te faaipoiporaa e te mau utuafare mure ore e haamaitai ai i ta tatou mau auraa e to tatou hoa faaipoipo e ta tatou mau tamarii ? Nahea te haapa‘oraa rahi atu â i teie nei haapiiraa e tauturu ai i te haamou i te « mau ino o te sotaiete e vai nei i teie nei mahana » ?
Eaha ta tatou mau hopoi‘a no ni‘a i te faaoraraa i tei pohe ? (A hi‘o i te mau api 145-49.) Eaha te tathi mau rave‘a e nehenehe ai tatou e rave i te ohipa no tei pohe ?
Nahea to te mau hiero riroraa ei hoê faaiteraa rahi o te here o te Atua no ta’na mau taamarii atoa ? (A hi‘o i te mau api 151-53.) Nahea te ohipa o te hiero e faaite mai ai i te natura aano o te opuaraa no te faaoraraa ? (A hi‘o i te mau api 152-53.)
Eaha te tumu no te hoê parau faati‘a no te hiero ? (A hi‘o i te api 153). No te aha te parau-ti‘a o te taata tata‘itahi ei mea faufaa roa no te tomo atu i roto i te hiero ? Eaha te mau rave‘a e haamaitaihia’i tatou mai te mea e haapa‘o tatou i ta tatou mau fafauraa no te hiero ? No te aha e mea faufaa ia tapea noa i te hoê parau faati‘a mana noa’tu e eita tatou e haere pinepine atu i te hiero aore ra eita roa tatou e tae ?
Eaha ta tatou e nehenehe e rave no te faafana‘o i te tahi atu mau taata i te mau haamaitairaa o te hiero ? (A hi‘o i te mau api 152-53.)

Te mau Papa‘iraa Mo‘a :1 Korinetia 15:29 ; PH&PF 124:37-41 ; 128:1, 15-24 ; 131:1-4 ; 132:19 ; 138:28-37, 57-60

London England Temple — I roto i ta’na faatereraa, ua haamo‘a te Peresideni McKay e pae na hiero na te ao taatoa nei, mai te Hiero no Lonedona Peretane, tei faaitehia i ô nei.