Pene 23

Te faatupuraa i te Huru Keretetiano

Eiaha te noaaraa mai te auro, aore ra te roo, aore ra te mau tao‘a materia ia riro e haapeapearaa tumu o te taata nei. Eiaha atoa te faarahiraa i te ohipa aito i te pae tino, aore ra te puai i te pae o te ite, ia riro râ te faarahiraa i te hoê huru mai to te Mesia ei fâ na’na, te fâ teitei roa‘e i roto i te oraraa nei.¹

Omuaraa

Ua ite te Peresideni David O. McKay i te faufaa rahi no te faarahiraa i te hoê huru parau-ti‘a mai to te Faaora ra te huru. Ua itehia te reira i roto i to’na oraraa i mua i te taata e i roto i to’na iho oraraa. Ua parau ta’na tamaiti o Robert i te hoê taime no’na, « I roto i te mau matahiti atoa i roto i te mau auraa i roto i te utuafare anei, i te faaapu, i roto i te mau imiraa faufaa, i roto i te Ekalesia, aita roa’tu vau i ite noa‘e i te hoê ohipa aore ra te hoê parau, e tae noa’tu i roto i te haapiiraa i te hoê puaa horo fenua etaeta, o te tuu mai i te feaaraa i roto i to‘u nei mana‘o e e ti‘a ia’na ia riro e ua riro ihoa oia te ti‘a e te peropheta no to tatou Metua i te Ao ra. »²

Ua haapii te Peresideni McKay e te paturaa i te hoê huru mai to te Mesia o te hoê ïa ohipa tamau noa i te mau mahana atoa o ta tatou tata‘itahi e ti‘a ia rave i te hopoi‘a. No te faahoho‘araa i teie nei parau tumu no te Feia apî, ua faaite oia i te hoê taime a haere ai oia e mata‘ita‘i i te hoê vahi ohipa a te hoê taata tarai tii i Florence, i te fenua Italia : « Ua haapurara haere te tahi mau vaehaa hapehape o te ofai ereere ta te hoê taata tarai tii e faaineine ra i te tarai i te hoê orama ta’na i ite i roto i to’na feruriraa … »

« Ahani i ti‘a ia outou ia ti‘a i roto i taua aua ra, e ua tuu mai te hoê taata i roto i to outou na rima i te hoê paoti e te hoê hamara, e tamata anei outou i te rave i te hoê o te mau ofai aore e hoho‘a e e tarai anei outou i te hoê hoho‘a taata i roto i te reira ? Eita e nehenehe ia outou ia na reira. Aore ra, ahani ua tuu mai te tahi taata i mua ia outou i te hoê ahu e ua horo‘a’tu ia outou i te mau peni e ua tuu atu i roto i to outou na rima i te hoê purumu, e peni anei outou i ni‘a i taua ahu ra te hoho‘a o te hoê varua maitai ? E parau paha outou i te taata matamua e, ‘E ere au i te taata tarai tii’ e i te piti o te taata, ‘E ere au i te taata peni hoho‘a. Eita e nehenehe ia‘u ia rave i te reira. »

« Area râ, te tarai tata‘itahi nei tatou i te hoê varua i teie iho minuti- to outou iho varua. E riro ho‘i te reira ei varua huru ê, aore ra e riro ei mea maere e te nehenehe ? »

« Tei ia outou na te hopoi‘a. Aita’tu e taata e nehenehe e tarai i te reira no outou. E nehenehe ta te mau metua e arata‘i, e nehenehe ta te mau orometua haapii e tauturu ma te horo‘a i te mau mana‘o tauturu, e ti‘a râ i te feia apî tamaroa e te feia apî vahine tata‘itahi ia rave i te hopoi‘a no te tarai i to’na iho ra huru taata. »

Ua faaite te Peresideni McKay i te hopea o te tarairaa i te hoê huru taata parau-ti‘a : « Mai te mea e tape‘a outou i to outou huru taata ia ore e noaa i te faahapahia, noa’tu eaha ta te tahi atu mau taata e mana‘o ra aore ra te mau faahaparaa ta ratou e rave nei, e nehenehe ta outou e tape‘a afaro i to outou upoo i ni‘a, ma te aau oaoa, e te fariu atu i to te ao ma te aueue ore no te mea ua ite outou iho e, ua tape‘a mâ noa outou i to outou ra varua. »³

Te mau Haapiiraa a David O. McKay

E ti‘a ia tatou ia rave itoito i te pee atu i te hi‘oraa teitei o te Faaora.

Hoê noa taata maitai i vai na i roto i teie nei ao—te huru taata faito-ore-hia o Iesu no Nazareta, te Tamaiti a te Atua, te Taraehara o te ao nei. Aita e taata e nehenehe e rave maitai atu â maori râ ia farii i te Mesia mai te Hi‘oraa faahiahia roa e te arata-‘i papû roa‘e.⁴

Mai te mea e hinaaro tatou i te haapii i te oraraa maitai roa e ti‘a ia ora i rotopu i to tatou nei mau taata tupu, e nehenehe ta tatou e ite i te hoê hi‘oraa maitai i roto i te oraraa o Iesu. Noa’tu eaha te huru o to tatou mau hinaaro hanahana, to tatou mau hinaaro teitei, ta tatou mau fâ i roto i te mau huru atoa o te oraraa nei, e nehenehe ta tatou ia hi‘o atu i te Mesia e ia ite i te maitai roa …

Te mau viretu o tei amuihia no te faatupu i teie nei huru taata maitai, o te parau mau ïa, te parau-ti‘a, te paari, te hamani maitai, e te haavîraa ia’na iho. Ua au maitai to’na mau mana‘o atoa, ta’na mau parau atoa e ta’na mau ohipa atoa i te ture a te Atua, e no reira, e mea mau ïa. Ua vai matara tamau noa te uputa no te aparauraa i rotopu ia’na e te Metua, no reira taua parau mau ra, o te turu’i nei i ni‘a i te heheuraa, i ite-noa-hia’i e a’na i te mau taime atoa.

Ua haapotohia to’na mana‘o no ni‘a i te parau-ti‘a i roto i te a‘oraa : « E te mau mea atoa ta outou i hinaaro ia vetahi ê ra, e na reira atoa’tu outou ia ratou » (A hi‘o Mataio 7:12) No te aano e te hohonu mau o to’na ra paari i itehia’i i roto i te reira te mau rave‘a a te taata e te mau opuaraa a te Atua … Te mau ohipa atoa tei papa‘ihia no ni‘a i to’na oraraa, noa’tu te poto, e mea rahi râ te ohipa i tupu, e mau ohipa ïa no te hamani maitai tei roto te aroha e te here.Ua riro to’na haavîraa ia’na iho, tei faahoho‘ahia i roto i to’na ra mana i ni‘a i to’na mau hiaai e to’na mau hinaaro rahi aore ra to’na vai-tura-raa e te maitairaa i mua i to’na feia hamani ino, e mea maitai roa ïa—e mea hanahana ho‘i.⁵

Te vai nei te [tahi] mau hoho‘a e mea au roa na‘u ia hi‘o. Te hoho‘a matamua o teie nei mau hoho‘a, o te hoho‘a ïa o Iesu i mua ia Pilato a parau ai taua Taata Fatere roma ra i te mau taata tei riri, « A hi‘o na i taua taata nei ! » (Ioane 19:5)A parau ai oia i te reira, ua faatoro atura oia i te rima i ni‘a ia Iesu, tei faakoronahia i te mau raau taratara, ma te ahu uraura i ni‘a i to’na ra tapono. Ua faatoro atu oia i taata ta te feia riri e tahitohito ra, tei faautu‘ahia mai te hoê taata hara e te taata tuhi, e a parau ai oia, « A hi‘o na i taua taata nei ! » te faaite ra oia i te taata e, ua maitai to’na ra huru, tei upootia i ni‘a i to tatou nei mau paruparu e te faahemaraa, e tei parau, mai ta’na i parau i to’na feia apee, « I parau atu vau ia outou i teie nei mau parau, ia hauhia to outou ia‘u nei … e faaitoito râ, ua riro te ora o teie nei ao ia‘u » (Ioane 16:33). O oia to tatou nei hoho‘a.⁶

E ti‘a ia tatou ia pee atu i te hoho‘a o Iesu Mesia no to’na Huru atua … Eita te mau Cherisetiano e faahanahana Ia’na, e noa’tu i te tura ta ratou e horo‘a Ia’na, no te mea aita oia i riro ei taata papa‘i pehe tuiroo, no te mea ua riro oia ei Taata aivanaa tuiroo, no te mea e taata rahi tei ite i te mau mea, te hoê taata poiete rahi aore ra te hoê faatere hau rahi aore ra te hoê tenerara rahi. Te faahanahana nei ratou Ia’na no te mea e taata rahi Oia. I te pae no te huru o te taata e mea maitai roa ïa Oia.⁷

E meau faufaa rahi roa te tape‘araa i te mau mana‘o parau-ti‘a no te tupuraa o te hoê huru taata parau-ti‘a.

Te huru o te oraraa ta outou e ora ra, to outou huru, to outou iho naturaraa, e faataahia ïa te reira na roto i to outou mau mana‘o, e ua riro ta outou mau ohipa ei faaiteraa no to outou mau mana‘o. Te mana‘o o te huero ïa no te ohipa.⁸

No roto mai te huru taata i te hohonuraa o te varua. E parau mai outou eaha ta outou e feruri ra i te taime aita outou i titauhia i te feruri, e e parau atu vau ia outou o vai râ outou.⁹

Na te mau mana‘o e hamani nei ia tatou. Mai te taata raraa ahu e hamani hope nei e te papû maitai i ta’na mau tiare e te mau hoho‘a i te mau taura no ta’na matini raraa ahu, oia atoa ïa i te mau taime atoa e teretere te mana‘o no te faatupuraa i te huru taata e tae noa’tu i te hamaniraa i te mau taura no to tatou mau hoho‘a. E faateitei te mau mana‘o i to tatou nei varua i te ra‘i ra, aore ra e huti ratou ia outou i raro i hade ra.¹⁰

Aita’tu e parau tumu no te oraraa i faahiti-tamau-hia e te Orometua Teitei maori râ te titauraa i te feruriraa afaro. No’na, aita te taata i riro mai te au i to’na hi‘oraa na rapae, aita atoa na roto i te mea ta’na e faahua nei na roto i ta’na ra mau parau : ta te taata e mana‘o nei, na te reira ïa e faaite mai i te mau taime atoa eaha mau taua taata ra. Aita’tu e orometua i faahiti puai a‘e mai Ia’na i te parau mau e « O to’na ra mana‘o i roto i to’na aau, o oia iho ïa » [a hi‘o Maseli 23:7] …

Ta’na mau haapiiraa no ni‘a i te hopoi‘a a te taata i mua ia’na iho, e te hopoi‘a a te taata i mua i to’na ra taata tupu, ua î ïa te reira i te parau mau ra e, na te mana‘o e faataa i roto i te mau huru hi‘oraa atoa, i te ti‘araa o te taata no te farii i te oaoa, e aore ra, no te farii i te faautu‘araa no te hara …

Noa’tu e, ua itehia ratou e aore ra, aita, te feia atoa o te rave i te hara e aufau ïa ratou i te utu‘a no te hara e no te faaiteiteraa. E vaiiho mai te mana‘o o tei na mua atu i te ohipa i ravehia i te hoê faaiteraa e ore roa e noaa i te tumahia i ni‘a i te huru o te taata. E noa’tu e, e tamata paha te taata hara i te tamaru i to’na mana‘o haava ma te parau mai e … eita oia e faariro i teie nei hara i te mea faufaa rahi, i roto râ i to’na uaua, e tai‘ohia ïa te reira ei hara, e e ti‘a mai te mau tapa‘o i ni‘a i to’na ra huru ei haava ia’na i te mahana haavaraa. Aore roa e taata e nehenehe e tapuni ê atu i to’na mau mana‘o aore ra e horo ê atu i te mau hopearaa e ore e noaa i te ape.¹¹

Ua ite te Faaora e mai te mea e nehenehe i te mana‘o ia faatere-ti‘a-hia, mai te mea e nehenehe te mana‘o e te hinaaro ino i te pato‘ihia, e iti mai ïa te ohipa ino. Aita Iesu e faaiti nei i te huru faaturuma o teie nei mau hara aita atoa oia e parau nei eita e ti‘a ia tatou ia faautu‘a ia ratou ; te haapapû ra râ oia i te titauraa rahi no te tape‘a mâ noa i te mana‘o, te ia mâ noa te feruriraa. E horo‘a mai te tumu raa ino i te hotu ino, e horo‘a mai te hoê tumu raau maitai i te hotu maitai. A tape‘a mâ noa i te tumu raau, a tape‘a mâ noa i te mau mana‘o e e mâ ïa te hotu e te oraraa.¹²

Te hoê huru parau-ti‘a e hotu ana‘e ïa no te tautooraa tamau e te feruriraa maitai, te hotu no te mau auraa here-maoro-hia e te mau mana‘o mai to te Atua ra te huru. E piri atu oia i te varua o te Mesia tei faariro i te Atua ei haapûraa no to’na ra mau mana‘o ; e te taata o te nehenehe e parau i roto i to’na ra aau, « Ia tupu râ to oe hinaaro eiaha to‘u » [a hi‘o Luka 22:42] ua fatata ïa oia i te huru o te Mesia.¹³

Na roto i te roaraa o te taime, e riro te « mau mea ha’iha’i » i roto i to tatou nei oraraa i te faatupu i to tatou nei huru.

Mai te papaa iti e faaite ra i te vahi e farara ra te mata‘i, e faaite atoa mai te mau mea ha’iha’i i te e‘a o te mau mana‘o e te mau feruriraa o te hoê taata.¹⁴

E mau tuhaa te mau mea ha’iha’i no te mea rahi. Eita te matie e tupu-taue- paari noa mai. E tupu râ e e rahi oia ma te maniania ore e ma te mărû eita te tari‘a o te melahi e faaroo, e penei‘a‘e eita te mata o te melahi e ite. Eita te ua e topa rahi mai e topata râ ; eita te mau paraneta e ou‘a i roto i to ratou vahi faa‘ohuraa, e faati râ ratou mai te tahi initi e te tahi initi, te tahi reni e te tahi reni i te vahi faa‘ohuraa. Te ite, te mana‘o, te peu, te huru o te taata, ua riro mau ratou na roto i te mana o te mau mea ha’iha’i, e i roto i te pae morare e te pae faaroo, e mea na roto ïa i te mau mea ha’iha’i, na roto i te mau ohipa rii rii, e haere tata‘itahi ai tatou—eiaha na roto i te ou‘araa, na roto mau râ i te tahi initi e te tahi initi—i te ora aore ra i te pohe mure ore.

Te haapiiraa rahi e ti‘a ia apo i roto i te ao nei i teie nei mahana o te faaohiparaa ïa i roto i te mau ohipa rii rii e te mau hopoi‘a o te oraraa, i te mau parau tumu hanahana o te Evanelia. Eiaha tatou e mana‘o e, no te mea e au ra e mea ha’iha’i e te faufaa ore te tahi mau mea, e ere ïa ratou i te mea faufaa. I te pae hopea, ua riro te oraraa nei ei amuiraa no te mau mea ha’iha’i. Ua hamanihia to tatou oraraa, to tatou huru, i te pae tino, e te mau otuituiraa ha’iha’i o te mafatu. Ia faaea taua mafatu ha’iha’i ra, e e faaea atoa ïa te oraraa i roto i teie nei ao. E puai u‘ana te mahana rahi i roto i te ao nei, e farii râ tatou i te mau haamaitairaa no to’na ra mau hihi mahana no te mea te tae mai nei ratou i ni‘a ia tatou ei mau hihi iti e ia amuihia ratou e faaî te taato‘araa o te ao nei e te anaana o te mahana. E mea au roa te ru’i pouri na roto i te anaana o te mau mea e au mai te mau fetia iti ; e no reira ua hamanihia te oraraa cherisetiano mau e te mau ohipa ha’iha’i mai ta te Mesia i rave i teie nei hora, i teie nei minuti, i roto i te utuafare, i roto i te pŭpŭ autahu‘araa, i roto i te pŭpŭ tauturu, i roto i te oire, i te mau vahi atoa e hautihia ai to tatou nei oraraa e ta tatou mau ohipa.¹⁵

Na te huru o te hoê taata i teie nei mahana e faataa rahi mai i to’na ra huru ananahi. Na to’na ra huru i te matahiti mairi a‘enei e tapa‘o rahi i to’na haere‘a i roto i te taato‘araa o te matahiti i mua ia’na. I te mau mahana atoa, i te mau hora atoa, te patu nei te taata i te huru o te faata mai i to’na vahi e to’na ti‘araa i rotopu i to’na mau hoa na roto i te mau u’i atoa.¹⁶

E faatupu tatou i te hoê huru mai to te Mesia na roto i te haapa‘oraa e te haavîraa ia tatou iho.

E patuhia te huru taata na roto i te haapa‘oraa i te mau parau tumu. E tupu te huru taata mai roto mai, mai te hoê tumu raau e tupu ra, mai te mau mea ora atoa e tupu ra. Aita e oomoraa i te hoê mea na rapae au no te faanehenehe ia outou ; e parau mau e tauturu te [mau raau faanehenehe] no te fare hooraa raau, no rapae au noa râ e e mea poto noa. Te nehenehe mau, mai te huru taata, no roto mai ïa, e te mea e tauturu i te puai o te huru taata tei roto ïa i te haapa‘oraa i taua mau parau tumu i haapiihia e te peropheta Iosepha, e te Faaora iho : te viivii ore, te parau-ti‘a, te mo‘araa—te haapa‘oraa i te mau faaueraa a te Atua [a hi‘o History of the Church, 5:134-35].¹⁷

I roto i te paturaa i te huru o te taata mai te tauiraa i te hoê fenua, e ohipa noa te mau ture no te hau e no te popou. Te raveitoito-raa, te haapaeraa ia’na iho, te raveraa i te ohipa ma te hoê opuaraa, o te mau taahiraa ïa no te haereraa i mua. Te haamaharaa i te hinaaro e te hara e mau mea ïa e haamou nei e e tu’ino nei i te huru o te taata. O te oto e te tatarahapa ana‘e o te pee atu ia ratou.¹⁸

Te auraa o te haavîraa ia’na iho o te faatereraa ïa e te faatureraa i to tatou atoa mau hiaai natura, te mau hinaaro, te mau hiaai rahi, e te mau here ; e aita’tu e mea e nehenehe e horo‘a i te hoê taata i taua huru puai no te huru o te taata mai te iteraa i te haavîraa ia’na iho, te iteraa e, e nehenehe ta’na e haatavini i to’na mau hiaai e to’na mau hinaaro rahi ia’na, e ere râ oia e tavini no ratou. Tei roto i teie nei viretu te hitahita ore, te haapaeraa, te itoito, te taia-ore-raa, te ti‘aturiraa, te tape‘araa ia’na i te inu i te ava, te viivii ore, te ti‘amâraa, te vaiiho-noaraa, te faaoromairaa, te auraroraa, te haapaeraa i te taoto i te vahine aore ra i te tane, te mâ. ¹⁹

Eaha te hanahana hopea o te taata nei i ni‘a i teie nei fenua no ni‘a ihoa râ i ta’na ohipa i rave faaoti ? O te huru ïa o te taata— te huru i faatupuhia na roto i te haapa‘oraa i te mau ture no te oraraa nei mai tei heheuhia mai na roto i te evanelia a Iesu Mesia, tei haere mai ia noaa to tatou ora, e ia rahi atu â te ora. [a hi‘o Ioane 10:10] Eiaha te noaaraa mai te auro, aore ra te roo, aore ra te mau tao‘a materia ia riro ei haapeapearaa tumu no te taata nei. Eiaha atoa te faarahiraa i te ohipa aito i te pae tino, aore ra te puai i te pae o te ite, ia riro râ te faarahiraa i te hoê huru mai to te Mesia ei fâ na’na, te fâ teitei roa‘e i roto i te oraraa nei.²⁰

E nehenehe ta tatou na roto i ta tatou nei faaururaa e ta tatou nei haapiiraa e tauturu i te mau tamarii e te feia apî ia patu i te hoê huru mai to te Mesia ra.

Ua riro te mau tamarii i te fanauraa ra, te poieteraa paruparu roa‘e e te tauturu-ore-roa‘e-hia o te mau poieteraa atoa, tera râ, o te mea mărû roa‘e ïa e tei hau i te rahi i te mau mea atoa i te ao nei … Ua riro to ratou mau varua mai te api parau uouo aore e tafetafeta i reira ho‘i e papa‘ihia’i te mau hinaaro e te mau ohipa maitai e ravehia i roto i te hoê oraraa.²¹

Mai te hoê tamarii e tupu ra i te pae tino ma te amu tamau i te maa i te mau taime faataahia, ma te huti tamau i te aho apî, ma te faafaaea i te mau hora faataahia, e patu-atoa-hia te huru o te taata na roto i te mau mea ha’iha’i, na roto i te mau farereiraa i te mau mahana atoa, na roto i te hoê mana i ô nei, e te hoê ohipa aore ra e parau mau i ô atu.²²

Te papûraa mau, e faatupuhia to tatou nei huru taata i roto i te utuafare. E faanahonahoraa hanahana te utuafare. Te hopoi-‘a rahi roa‘e a te tane i roto i taua utuafare ra o te faatupuraa ïa i te mau tamaroa e te mau tamahine e mau ra i te tino maitai, te puai i te feruriraa, e hau atu i te teitei i teie nei mau mea, te hoê huru taata mai to te Mesia. Te utuafare o te vahi haamaniraa ïa i reira teie nei mau mea e haamanihia’i.²³

Eaha râ ïa te faufaa mure ore no te oire, te mau orometua haapii e te feia haapii no te feia apî o te tarai nei e te faaafaro nei i te vahi morare i reira te taata e ora ai. E horo‘a mai te mau tiare i te nehenehe e te no‘ano‘a no te hoê taime poto noa, e e oriorio i muri iho e e pohe e e haere atu e a muri noa’tu ; area râ te mau tamarii tei î i te mau parau tumu mure ore o te parau mau na roto i te haapiiraa a te mau orometua maitai, e faaanaana mai ratou i te hoê mana no te maitai o te ora e a muri noa’tu mai to ratou iho mau varua.²⁴

Te mau Mana‘o Tauturu no te Haapiiraa e no te Aparauraa

Eaha te mau tapa‘o faufaa roa no te huru o te Fatu ? (A hi‘o i te mau api 257-59.) Nahea tatou ia tuu i teie nei mau tapao i roto i to tatou iho oraraa ?
No te aha te mau mana‘o maitai i riro ai te niu no te paturaa i te hoê huru taata mai to te Mesia ra ? (A hi‘o i te mau api 259- 60.) Nahea outou ia tatara i te parau a te Peresideni McKay, « E parau mai outou ia‘u eaha ta outou e mana‘o ra ia ore outou e titauhia i te feruri, e e parau atu ïa vau ia outou e, o vai râ outou ? Nahea ta tatou ia faatupu i te mau mana‘o mâ ? »
Eaha te tahi o te mau « mea iti » i roto i to outou nei oraraa o tei tauturu i te faataaraa i to outou huru taata ? Eaha ta outou e nehenehe e rave i te mau mahana atoa ia rahi tu to outou riroraa mai te Mesia ra te huru ? (A hi‘o atoa PH&PF 64:33)
Na roto i tei hea mau rave‘a e riro ai te haapa‘oraa i te evanelia a Iesu Mesia ei hoê tumu faufaa roa no te faatupuraa i te puai o te huru o te taata ? (A hi‘o i te api 260-61.) Nahea te haavîraa ia’na iho e te taviniraa, e tauturu ai i te faatupuraa i te reira ? (A hi‘o i te api 261-62.)
Eaha ta tatou te mau metua e te mau orometua haapii e rave no te tauturu i te feia apî ia patu i te hoê huru taata mai to te Mesia ra ? (A hi‘o i te mau api 262-63.)

Te mau Papa‘iraa Mo‘a : Philipi 4:8 ; Mosia 4:30 ; 3 Nephi 27:27 ; PH&PF 64:33 ; 93:11-14

Christ with children — « Hoê noa taata maitai i vai na i roto i teie nei ao—te huru taata faito-ore-hia o Iesu no Nazareta, te Tamaiti a te Atua, te Taraehara o te ao nei. Aita e taata e nehenehe e rave maitai atu â maori râ ia faarii i te Mesia mai te Hi‘oraa faahiahia roa e te arata‘i papû roa‘e. »

family — « Te hopoi‘a rahi roa‘e a te tane i roto i [te] utuafare o te faatupuraa ïa i te mau tamaroa e te mau tamahine e mau ra i te tino maitai, te puai i te feruriraa, e hau atu i te teitei i teie nei mau mea, te hoê huru taata mai to te Mesia. »