Vahe 15

Tauʻatāina ke Filí mo e Haʻisiá

Ko hotau faingamālie ke fili ki hotau hakeakiʻí pe ko hotau fakamāʻulaloʻí; ko hotau faingamālie ke fili ʻa ʻetau fiefia pe mamahi ʻi he maama ka haʻú.¹

Mei he Moʻui ʻa Sione Teilá

Naʻe pehē ʻe Palesiteni Sione Teila, “ ʻOku tau faʻa talanoa he taimi ʻe niʻihi fekauʻaki mo e tauʻatāiná. Ko e tefitoʻi moʻoni totonu nai ia? ʻIo. Pea ko ha tefitoʻi moʻoni ia ne ʻi ai maʻu pē, pea ne haʻu mei he ʻOtua ko ʻetau Tamai Hēvaní.”² Ne fakamahuʻingaʻi ʻe Palesiteni Teila ʻa e tefitoʻi moʻoni ʻo e tauʻatāina ke fili ki he totonú—ko ha mālohi ia kuo foaki ʻe he Tamai Hēvaní ki Heʻene fānaú ke nau fili ai ʻa e leleí pe koví pea mo ngāue maʻanautolu pē. Neongo ia, naʻá ne toe akoʻi foki ʻoku fatongia tauhi ʻaki ʻe he toko-taha fakafoʻituitui kotoa pē ki he ʻOtuá ʻa ʻenau angafaí. Naʻá ne fakamahinoʻi, “Naʻe ʻikai teitei tuku ʻe he ʻOtuá ki ha tangata ke faʻi-teliha ʻi he ngaahi meʻa ʻo e māmaní; ka naʻá ne folofola maʻu pē fe-kauʻaki mo e tangatá ʻo pehē ʻoku nau ʻi he malumalu ʻo ʻene faka-hinohinó, nofoʻi hono tofiʻá, pea haʻisia ai kiate ia ʻi heʻene ngaahi angafaí.”³

Koeʻuhí ke fakamamafaʻi ʻa e fekauʻaki ʻa e tauʻatāina ke filí mo e haʻisiá, ne fakamatala ai ʻe Palesiteni Teila ʻa e tala fakatātā ko ʻení: “Naʻe nō pe lisi ʻe ha tangata ha ngoue vaine pe ngoueʻanga, pea naʻe maʻu ai ʻe he tangata naʻe nofo aí ha faʻahinga tauʻatāina pe mālohi ke fili, ka naʻe kei moʻulaloa pē ki ha ngaahi tuʻunga ne fai ʻe he tokotaha naʻe ʻoʻona ʻa e kelekelé. Naʻe fai ʻe he ʻOtuá ha fua-kava mo Noa, ʻĒpalahame, Fānau ʻo ʻIsilelí, pea mo e kāingalotu ʻo e kuonga muʻá. ʻOku fakasino mai ʻe hono fai ʻo e fuakavá ne ʻi ai ha ongo tafaʻaki ʻe ua, ʻa ia ko e ʻOtuá ʻa e taha, pea ko e kakaí leva ʻa e taha. Ka fakahoko ʻe he kakaí ʻenau tafaʻaki he fuakavá, ʻe haʻi-sia ʻa e ʻOtuá ke ne fakahoko ʻene tafaʻakí; ka ʻo kapau ʻe maumauʻi ʻe he tangatá he ʻikai leva toe haʻisia ʻa e ʻEikí ia ke fakahoko ʻa e fuakavá ni. … . ʻOku lava heni ʻa e tangatá ke fai ha ngaahi fili ki he totonú, ke fakaleleiʻi ʻa e ngaahi tāpuaki kuo tuku ʻe he ʻOtuá ki hono mālohí, pe ʻikai, ʻo fakatatau mo hono lotó.”⁴

ʻI he kuonga ʻo Palesiteni Teilá, ne pehē ai ʻe ha kakai ʻe niʻihi naʻe fakataumuʻa ʻa e ongoongoleleí mo e lakanga fakataulaʻeikí ke “ ʻomi ʻa e tangatá ke pōpula mo pule fakaaoao ai ki he konisēnisi ʻo e tangatá.” Naʻá ne fakaʻikaiʻi fefeka ʻa e fakakaukau ko ʻení, ʻo ne fakahā ko e taumuʻa ʻo e ongoongoleleí ke “fakatauʻatāinaʻi ʻa e ta-ngata kotoa pē he ʻoku tauʻatāina ʻa e ʻOtuá; koeʻuhí ke nau lava ʻo inu mei he fanga kiʻi vaitafe ‘ʻa ia te ne fakafiefiaʻi ʻa e kolo ʻo e ʻOtuá’; [Saame 46:4] ʻa ia ʻe lava ke hiki hake kae ʻikai tuku hifo; koeʻuhí ke lava ʻo fakamaʻa ʻakinautolu kae ʻikai fakaʻuliʻi; koe- ʻuhí ke nau lava ʻo ako ʻa e ngaahi fono ʻo e moʻuí mo ʻaʻeva ai, kae ʻikai ʻaʻeva ʻi he ngaahi ʻalunga ʻoku fakatau ki he maté.”⁵

Ngaahi Akonaki ʻa Sione Teilá

Naʻe foaki mai ʻe he ʻOtuá kiate kitautolu ʻa e meʻaʻofa ʻo e tauʻatāina ke filí talu mei he kamataʻangá.

Naʻe fai ʻe he Tamaí … ha tuʻutuʻuni … ʻoku totonu ke maʻu ʻe he kakai kotoa ʻi he langí mo māmani fakatouʻosi ʻa e tauʻatāina ke filí. Naʻe taʻe loto ki heni ʻa Lusifā; ka he ʻikai ke ne lava ʻo fakafepakiʻi ha palani pe fekau ne teʻeki ai fakahoko; he ko e fakafetaú ʻokú ne fakafōtunga hano maumauʻi ʻo ha fono, pe fekau, pe mafai; pea naʻe kapusi ia mei he langí koeʻuhí ko ʻene fakafepakí. Naʻe ʻikai ke mei lava ʻo hoko ʻa e fakafepaki ko ʻení kapau naʻe ʻikai ke ʻi ai ha tauʻatāina ke fili; he kapau ne ʻikai ke ʻi ai ha tauʻatāina ke fili naʻe mei fakakounaʻi kotoa kinautolu ke nau fakahoko ʻa e finangalo ʻo e Tamaí. Ka ʻi hono maʻu ʻo e tauʻatāina ke filí, ne nau fakaʻaongaʻi leva ia; pea kapusi hifo ai ʻa Lusifā mo ha vahetolu ʻe taha ʻo e kau ʻāngeló koeʻuhí ko ʻenau fakafepaki mo ngāueʻaki ʻa e tauʻatāina ke fili ko ʻení ke fakafetau ki heʻenau Tamai fakalangí. Pea ʻikai ngata pē koeʻuhí ko ʻenau fakafepakí, ka koeʻuhí, ʻo hangē ko hono fakamatalá, “ne nau feinga ke fakaʻauha ʻa e tauʻatāina ʻa e tangatá;” [vakai, Mōsese 4:3] he ne mei ngāueʻaki ʻenau tauʻatāina ke filí ke fakafepakiʻi ʻaki ʻa e ngaahi taumuʻa, fiefia mo e hakeakiʻi taʻengata ʻo e faʻahinga ʻo e tangatá, ʻa ē naʻe fokotuʻu ke faka-hoko ʻo fou ʻi he fakalelei mo e huhuʻi ne fai ʻe Sīsū Kalaisí.⁶

Kuo foaki mai ʻe he [ʻOtuá] ke tau lava ʻo fili ʻa e leleí kae siʻaki ʻa e koví. Te tau lava ke fakahoko ʻa e angahalá pe ko e māʻoni- ʻoní, ʻo fakatatau mo hotau lotó; pea kuo lau ia ʻe he Tēvoló ko hono faingamālie, mo ne feinga ke ʻākilotoa ʻa e ʻatamai ʻo e tangatá ʻaki ha ngaahi ivi ko ē te ne fakatupu ke nau ʻauhá, koe- ʻuhí ke ne lava ʻo taki pōpula kinautolu ʻo fakatatau mo hono lotó. Kuo teʻeki ai fakapōpulaʻi kinautolu ʻe he ʻEikí, pe puleʻi kinautolu; ka ʻokú ne pule ki he nunuʻa ʻo ʻenau ngaahi angafaí, ʻi he taimi kotoa pē te nau fai ai ha meʻa ne nau palani ke uesia ai hono kakaí.

ʻE tuku ʻe he ʻEikí … ke kumia ʻe he faʻahinga ʻo e tangatá ʻa e fiefiá ʻi heʻenau founga pē ʻanautolu, pea fakatatau mo honau lotó te ne tuku ai ke nau inu ʻa e ipu ʻo ʻenau faiangahalá ʻi he founga pē ʻanautolu. ʻI he tafaʻaki ʻe tahá, kuó ne ʻosi fakahaaʻi ʻa ʻene leleí pea ʻe kei hoko atu pē ʻi hono fai ia maʻa ʻene fānaú kotoa. Ko e hā ʻa e meʻa ʻokú ne palani ke fakahokó? Ke langa hake ʻa e puleʻangá ni ʻi he funga māmaní, ke fokotuʻu ʻa e mā- ʻoniʻoní, ke tekeʻi atu ʻa e filí pea kapusi ʻa [Sētane] mei māmani. ʻI he foungá ni, ʻe mafola atu ai ʻa e ngaahi tefitoʻi moʻoni ʻo e moʻoní ki he lōloa pea mo e maokupu ʻo e māmaní kotoa, pea ʻe punou ʻa e taha kotoa ki he ʻOtuá mo ʻene Kalaisí, pea ʻe fakahoko ʻe kinautolu kuo filí ʻa e ngaahi ouau ʻo hono falé ʻo taʻengata pea taʻengata. Ne fuoloa mai pē hono ʻafioʻi ʻe he Fungani Māfimafí ʻa e kaveingá ni.⁷

ʻOku ʻomi ʻe he ʻOtuá ha fakahinohino, ka he ʻikai ke Ne teitei fakamālohiʻi ʻa e ʻatamai ʻo e tangatá.

Kuo tau maʻu ʻa e ongoongoleleí. Ne fakamālohiʻi nai ha taha ke ne talangofua ki ai? Naʻe ʻi ai nai ha fakamālohiʻi ʻi ha faʻahinga founga ʻi hono fakahā mai kiate kitautolú? Ne ʻikai ke ʻilo ʻe au ha meʻa pehē. Naʻe fakamālohiʻi nai ʻa ʻŌliva Kautele, ʻa ē ne hoko ko e kaumātuʻa hono ua ʻi he Siasí, ke ne tali ʻa e ongoongoleleí ni? ʻIkai, naʻe ʻikai. Naʻe fakamālohiʻi nai ʻa Hailame Sāmita ke ne tali ia? ʻIkai, naʻe ʻikai. Fēfē ʻa e kau fakamoʻoni ki he Tohi ʻa Molomoná—ʻa e kau Uitemaá mo e toengá? ʻIkai. Pea ʻi he hili ʻo ʻenau kau ki he Siasí ni, naʻe fakamālohiʻi nai kinautolu ke nau nofo maʻu ai? ʻIkai. Kuo fakamālohiʻi nai ha taha ʻo e kau mēmipa ʻi he kōlomu ʻo e toko hongofulu mā uá, ʻi he kau fitungofulú, ʻi he kau taulaʻeiki lahí, pe ha taha ʻi he kau aleaʻanga māʻolungá, pe kau palesiteni ʻo e kau fitungofulú, pe ʻi ha faʻahinga kulupu ʻo e houʻeiki tangata he Siasí, ke nau fua ʻa e lakanga kuo uiuiʻi ki-nautolu ki aí? ʻOku ʻikai ke u ʻilo ʻe au ha taha, fēfē koe? ʻOku ou ʻiloʻi naʻe ʻikai ha fakamālohi ne ngāueʻaki kiate au ʻo kehe mei he mālohi ʻo e moʻoní ʻi heʻene fokotuʻu mai ki hoku ʻatamaí; pea naʻe ʻikai foki pehē kiate kimoutolu, ʻo kehe mei he mālohi ʻo e moʻoní ʻi heʻene ngāue ʻi homou ʻatamaí.⁸

He ʻikai ke u teitei fakaʻamu au ke u puleʻi ʻa e ʻatamai ʻo e ta-ngatá. He ʻikai ke u fie puleʻi ʻe au ʻa e ngaahi angafai ʻa e tangatá. ʻOku ʻikai fakahoko ia ʻe he ʻOtuá, he ʻokú ne tuku ke nau ngāue- ʻaki ʻenau tauʻatāina ke filí ke nau fepaki mo e ngaahi faingataʻá, ngaahi ʻahiʻahí, ngaahi fakamamahí, pea mo e kovi ʻo e faʻahinga kotoa pe ʻoku ʻi he māmaní, ʻa ia ʻoku moʻulaloa pe ʻe lava ke moʻulaloa ki ai ʻa e faʻahinga ʻo e tangatá. Neongo ia, kuó ne tuku ha ngaahi tefitoʻi moʻoni te nau lava ʻo maʻu pea ʻe fiefia ke ne taki mai kinautolu kiate ia ʻo kapau te nau loto ki ai. Ka ʻikai, te ne fai pē ʻene lelei taha te ne lavá maʻa kinautolu.⁹

ʻOku maʻu ʻe he tangatá ha tauʻatāina ke fili ki he totonú; ke ne ngāue ʻi he malumalu ʻo e ʻEikí, pea ko hono olá, ʻoku haʻisia ia ki heʻene ngaahi angafaí, koeʻuhí ko e tauʻatāina ke fili ki he totonú. Ka te Ne tuku noaʻi nai ai ia ʻo ʻikai tokoniʻi ke Ne fakahoko ʻEne ngaahi palaní? ʻIkai. ʻI heʻene ʻafioʻi ko e tangatá ko hono fohá, kuó ne faʻa foaki mai ai ʻEne tokoní mo ʻEne ngaahi fakahinohinó mei he taimi ki he taimi, ʻi hono tuʻunga fakatamaí. Kuó ne fai mai ha ngaahi fakahā, fakahinohino mo fakatokanga ki hono kakaí. Kuó ne fai ha ngaahi talaʻofa ki he kau talangofuá, mo valoki ki he kau talangataʻá. Kuó ne fakahinohinoʻi ha ngaahi tuʻi, kau pule, mo ha kau palōfita. Kuó Ne maluʻi foki mo e kau anga-tonú, pea tauteaʻi, ʻi he fakamāú, ʻa e kau angahalá. Kuó Ne talaʻofa kia ʻĒpalahame mo ha niʻihi kehe ha fonua mo ha koloa. Kuó Ne fakahoko mai ʻa e talaʻofa ʻo e moʻui taʻengatá ki he kau anga-tonú; ka naʻe ʻikai teitei fakamālohiʻi pe fakakounaʻi ʻa e ʻatamai ʻo e tangatá.¹⁰

ʻOku tau haʻisia ki he ʻOtuá ʻi heʻetau founga fakaʻaongaʻi ʻa e tauʻatāina ke filí mo totongi mai fakatatau mo ʻetau ngaahi filí.

ʻOku ʻikai nai ko e kau faʻu kitautolu ʻo hotau ikuʻangá? ʻOku ʻikai nai ko kitautolu ʻoku tau fili hotau ikuʻangá? … Ko hotau faingamālie ke fili hotau hakeakiʻí pe fakameleʻí; ko hotau faingamālie ke fili ʻa ʻetau fiefia pe mamahi ʻi he maama ka haʻú.¹¹

Kapau te tau vakai fakalelei ki he Ngaahi Folofolá, te tau ʻilo ai ʻoku maʻu ʻe he tangatá ha faʻahinga mālohi kuo tuku ki hono nimá, ʻa ia ʻokú ne maʻu ka ʻoku moʻulaloa ki he pule mo e faka-hinohino ʻa e ʻEikí; pea kapau ʻe ngāue taʻe kau ai e faleʻi, faka-hinohino, pe tataki ʻa e ʻOtuá, ʻoku mavahe atu ai ia mei he ngaahi fakangatangata ne tuku ange ʻe he ʻEikí ki aí, pea ʻoku halaia tatau ai hangē [ha ʻōfisa fakapuleʻanga] ʻo kapau ʻe mavahe meí he ngaahi fakangatangata ʻo e fakahinohino ki aí; pe ko ha tangata ʻokú ne tokangaʻi ha ngoueʻanga pe ngoue vaine, ʻi ha lisi, kapau te ne tukuange ʻa e ngaahi tuʻunga ʻo e lisi ko iá, ka ne faka- ʻauha ʻa e ngoueʻanga pe ngoue vaine ko iá; he ʻoku ʻa e ʻEikí ʻa māmani, pea ne tuku ki ai ʻa e tangatá ʻe he ʻEikí. ʻOku ʻikai maʻu ia ʻe he tangatá, ka ʻokú ne tauhi pē ia maʻá e ʻOtuá. … Kapau ʻoku tuku ha tangata ke ne hoko ko ha fakafofonga ʻo e ʻEikí, pea kiate ia foki, peá ne fakaliʻeliʻaki ʻa e ʻEikí, kuo pau ke ne haʻisia ki hono Tupuʻangá.¹²

Foki atu hoʻo manatú, pea te ke lava pē ʻo manatuʻi ha taimi ne ke fai ai ha ngāue lelei, te ke lava ʻo manatuʻi ha taimi ne ke fai ai ha ngāue kovi; ʻoku tohi tongi ia ʻi ho ʻatamaí pea te ke lava pē ke fakafoki mai ia ʻo vakai ki ai ʻi ha taimi pē te ke fie maʻu ai. … Kapau ne ke ako ha lea fakafonua te ke lava pē ʻo manatuʻi ʻo ka ke ka fie maʻu, te ke lava ai ke fakafaikehekeheʻi vave pē ʻa e ngaahi kupu kehekehe ʻo e leá. Kapau ne ke ako ngāue fakamīsini ʻe foki atu hoʻo fakakaukaú ki ha feituʻu ne ke fakatokangaʻi ai ha faʻahinga mīsini, pea ke kamata ngāue ʻo ke lava ke ngaohi ha mīsini tatau mo ia. Kapau ne ke fononga ki ha ngaahi kolo lalahi te ke lava pē ʻo tala pe ko e faʻahinga fale fēfē, hala fēfē, ʻoku ʻi he ngaahi kolo lalahi ne ke fou atu aí, kae ʻumaʻā ʻa e faʻahinga anga ʻo e ka-kai ne mou feohi mo iá; te ke lava ʻo manatuʻi kinautolu, mo fakakaukau kiate kinautolu ʻi he ʻahó pe ʻi he poʻulí, ʻi he taimi pē te ke fakakaukau lelei ai, mo fakamanatuʻi ʻa e ngaahi meʻa ne ke ʻosi mamata aí. ʻOkú ke maʻu kotoa ʻa e ngaahi meʻá ni ʻi fē? ʻI hoʻo tohí, ka ʻoku ʻikai ke ke kumi ia ʻi ha tohi pe laipeli ʻa ha taha kehe, he kuo hiki ia ʻi hoʻo lekōtí, pea ko ia te ke maʻu ai iá. Kuo fakahū ia ʻe ho matá mo ho telingá, pea ala ki ai mo ho nimá, pea ngāue ki ai hoʻo fakakaukau leleí, hangē ko e laú,—ko ho mālohi ia ke manatú.

Sai, kapau ʻokú ke maʻu ha laumālie pe faʻahinga poto pehē, ʻa ia ʻokú ke malava ai ke lau hoʻo ngaahi angafaí, ʻoku ʻikai ʻapē te ke fakakaukau ko e taha ko ia naʻá ne fakahū ʻa e laumālie pe poto ko iá kiate koé ʻokú ne maʻu ʻa e ngaahi kī ki he poto ko iá, pea te ne lava ke lau ia ʻi ha faʻahinga taimi pē te ne loto ki aí? ʻIkai ʻoku fakapoto, ʻuhinga lelei mo fakalaumālie ia? Te u lau ʻe au ʻoku pehē. …

ʻOku mohe ʻa e tangatá ʻi he mohe ʻo e maté ka ʻoku moʻui ʻa e laumālié ʻi he feituʻu ʻoku tauhi ai ʻa e lekooti ʻo ʻene ngaahi anga-faí—ʻoku ʻikai mate ia—he ʻikai lava ʻe he tangatá ke tāmateʻi ia, ʻoku ʻikai ha popo ai, pea ʻe kei mata ʻāʻā, ʻa hono manatuʻi ʻo e meʻa ko ia ne hoko ki muʻa pea toki hoko ʻa e māvahevahe ʻi he mate ʻa e sinó mo e laumālie moʻui taʻe ngatá.¹³

Ko e kakai kitautolu ʻa e ʻOtuá, pea ʻoku haʻisia Ia ki he meʻa kotoa pē ne palani ke ne haʻi ʻa e tangatá pe ko e ʻOtuá. ʻOkú ne haʻisia ke tauhi hono kakaí, kapau te nau tokangaʻi kinautolu; kapau te nau fakaʻapaʻapaʻi honau ngaahi uiuiʻí mo honau lakanga fakataulaʻeikí; kapau te nau fakahoko totonu mo ʻomi ʻa e lāngilangí ki he mālohi mo e mafai kuo foaki kiate kinautolú; kapau he ʻikai ke nau ʻauhē mei he ngaahi tefitoʻi moʻoni totonú, ʻe haʻisia leva ʻa e ʻOtuá ke ne fakahoko ʻa e ngaahi meʻa kotoa pē ʻo fakatatau mo ia ʻoku haʻisia ki aí; ʻa ia ko e taha ʻo kinautolu, ke tokonaki maʻa ʻEne Kau Māʻoniʻoní. … . Kuo faifaiangé pea maʻu ʻe ha taha ʻa e ʻOtuá kuo mavahe mei he ngaahi tefitoʻi moʻoni totonú? … Kuo teʻeki ai ke u teitei maʻu ʻe au, pea ʻoku ou tui ʻoku pehē mo kimoutolu.¹⁴

Ngaahi Fokotuʻu ki he Akó mo Hono Aleaʻí

Ko e hā ʻoku mahuʻinga ai ʻa e tauʻatāina ke filí ki hotau hakeakiʻí? ʻOku fekauʻaki fēfē ʻa e tauʻatāina ke filí mo e Fakalelei ʻa Sīsū Kalaisí?
Ko e hā ha ngaahi founga ʻoku kei feinga ʻaki ʻe Sētane ke ne uesia ʻetau tauʻatāina ke filí? ʻE anga fēfē haʻatau tekeʻi ʻa e ngaahi feinga mai ko iá?
Ko e hā ha ngaahi fakahinohino kuo fai mai ʻe he ʻEikí ke tokoniʻi kitautolu ke tau ngāueʻaki ʻetau tauʻatāina ke filí ʻi he mā- ʻoniʻoni? Ko e hā ʻa e founga ʻokú ne fakapaleʻi ai kitautolu ʻi heʻetau ngāueʻaki ʻetau tauʻatāiná ki he māʻoniʻoní?
Ko e hā ʻoku mahuʻinga ai ke maʻu ʻe he toko taha fakafoʻituituí ha faingamālie ke ne fai maʻana ʻa ʻene filí? Te tau fakaʻapaʻapaʻi fēfē ʻa e tauʻatāina ke fili ʻa e kau mēmipa ʻo e fāmilí pea toe lava ke poupouʻi kinautolu ʻi he taimi tatau ke nau fai ʻa e ngaahi fili ʻoku totonú? Te ke tokoniʻi fēfē ʻa e kau mēmipa ʻo e fāmilí ke mahino ʻa e ngaahi nunuʻa ʻo ʻenau ngaahi filí?
Neongo ʻoku tau tauʻatāina ke tau fili, ko e hā ʻoku fakangatangata ai ʻe he ngaahi fili taʻe māʻoniʻoní ʻa ʻetau tauʻatāiná? Kuo anga fēfē hano fakaleleiʻi hoʻo tauʻatāiná ʻe hoʻo ngaahi fili mā- ʻoniʻoní?

Ngaahi Potu folofola fekauʻaki mo iá: Siosiua 24:15; Kalētia 6:7; 2 Nīfai 2:14–16, 26–27; Hilamani 14:30–31; T&F 58:26–28; 101:78; Mōsese 4:1–4; 6:33