Fakamatala Hisitōlia Nounou

ʻOku ʻikai ko ha tohi hisitōlia ʻeni, ka ko hano fakatahatahaʻi ʻo ha ngaahi tefitoʻi moʻoni ʻo e ongoongoleleí ʻo hangē ko hono akoʻi ʻe Palesiteni Sione Teilá. Neongo ia, ʻoku fakahokohoko fakataimi, ke lava ʻo fokotuʻutuʻu ʻene ngaahi akonakí ki ha ngaahi vahaʻa taimi fakahisitōlia. ʻOku ʻikai fakakau ʻe he fakamatala fakanounoú ni ha ngaahi meʻa mahuʻinga lahi ʻi heʻene moʻuí, kau ai ʻene malí pea mo hono fāʻeleʻi mo e pekia ʻa ʻene fānaú, ʻa ē ne ʻosikiavelenga ki ai ʻene moʻuí.

ʻAho 1 ʻo Nōvema 1808	Fāʻeleʻi ʻi Milinīfopi, Uesimoaleni, ʻIngilani, ko e fika ua ʻi he fānau ʻe toko 10 ʻa Sēmisi mo ʻAkanesi Teilá.
1819	Hiki mo hono fāmilí ki Heili (ofi pē ki Milinīfopi), ʻo ne tokoni ai he ngāue ʻi ha kiʻi faama ne tuku ki heʻene tamaí ʻe haʻane faʻē-tangata (11) ko e fika ʻoku haʻí ko e taʻu motuʻa ia ʻo Sione Teila he taimi ko iá).
1822	Ako ngāue ʻi Livapulu ke hoko ko ha taha faʻu puha (ngaohi talamu). Naʻe mate ʻa e pisinisi ʻa hono pulé ʻi ha taʻu pē ʻe taha pea toe foki leva (14).
1824	Mavahe mei he Siasi ʻIngilaní ʻo ne kau he Siasi Metotisí. Fakamoleki e konga lahi hono taimi ʻataá ki hono ako ʻo e Tohi Tapú, lau mo e ngaahi tohi fakalotú, pea mo lotu (16).
1825	Hoko ko ha taha “akonaki” he Siasi Metotisí pe ko ha taha malanga hoko. Maʻu ha ongo mālohi ke folau ki ʻAmelika ʻo malangaʻi ai ʻa e ongo-ongoleleí (17).
1830	Hiki mai ʻene ongo mātuʻá mo e toenga ʻo e fāmilí ki Tolonitō ʻi Kānata, kae nofo pē ia ʻi ʻIngilani ʻo fakaʻosiʻosi ʻenau ngaahi meʻa fakafāmilí (21 pe 22).
1832	Mavahe mei ʻIngilani ki he Kolo ko Niu ʻIoké. Kamata ʻene malangá ʻi Kānata (23 pe 24).
1833–36	Hoko ko ha tangata malanga ʻi he Siasi Metotisi ʻi Tolonitoó. Hokohoko atu ai pē ʻene ako mo fekumi ʻi he folofolá (24–27).
Faʻahitaʻu Failau ʻo e 1836	Aʻu atu ʻa ʻEletā Paʻale P. Palati ke malangaʻi ʻa e ongoongolelei kuo faka-foki maí ʻi Tolonitō (27). Ne ʻosi ui ʻa ʻEletā Palati ki he Kōlomu ʻo e Kau ʻAposetolo ʻe Toko Hongofulu Mā Uá ʻi he 1835.
ʻAho 9 ʻo Mē 1836	Na’e papitaiso ai ʻe Paʻale P. Palati
1836–37	Hoko ko e maʻu mafai pule ʻo e Siasí ʻi Kānata (27–28).
Māʻasi 1837	Fononga ki Ketilani ke feʻiloaki mo e Palōfita ko Siosefá (28).
1838	Fakanofo ko e ʻAposetolo ʻi Hihifo Mamaʻo, he ʻaho 19 ʻo Tīsemá, ʻe Pilikihami ʻIongi pea mo Hiipa C. Kimipolo, ʻi he tuʻutuʻuni ʻa Siosefa Sāmita, ʻa ia naʻe ʻi he Fale Fakapōpula Lipetií (30).
1840	Tūʻuta atu ko ha faifekau ki Pilitānia Lahi. Ko e fuofua faifekau ia ke ne malangaʻi ʻa e ongoongolelei kuo fakafoki maí ʻi ʻAilani pea mo e Motu ʻo e Tangatá (Isle of Man). Tokangaʻi hono teuteu mo hono paaki ʻo e fuofua Tohi ʻa Molomoná ʻi ha feituʻu mavahe mei he ʻIunaiteti Siteití; toe tokoni foki ʻi hono teuteu ʻo ha tohi himi pea mo hano pulusi ʻo ha ngaahi tohi tufa fakafaifekau ʻe niʻihi (31).
1841	Foki mo ha niʻihi ʻo e Kau ʻAposetoló ki he ʻIunaiteti Siteití (32).
1842	Fokotuʻu ia ʻe Siosefa Sāmita ke ne sivi ʻa e Times and Seasons, ʻa ia ko ha nusipepa ʻa e Siasí. Naʻá ne toe sivi fakaʻosi foki mo e nusipepa Wasp (1842–43) pea mo e nusipepa naʻá ne fetongi ki mui ko e Nauvoo Neighbor (1843–45), ʻa ia ko ha ongo nusipepa fakatouʻosi pē ʻi Nāvū.
1842	Fili ke hoko ko ha mēmipa ʻo e Kosilio Fakakolo ʻo e Kolo ko Nāvuú, mēmipa ʻo e poate ʻo e ʻUnivēsiti ʻo Nāvuú, pea Fakamaau Fakakautau ʻi he Kau Tau ʻo Nāvuú [Nauvoo Legion] (33).
ʻAho 27 ʻo Sune 1844 Sio	Sio Siosefa mo Hailame Sāmita ʻi he Fale Fakapōpula Kāteisí pea ne lavea lahi ai ʻi honau ʻohofí (35).
1846	Tokoni ʻi hono fokotuʻutuʻu ʻo e Konga Tau Māmongá (Mormon Battalion) ʻi Kaunisila Palafu. Toe folau ʻo ngāue fakafaifekau ko hono tuʻo uá ia ki Pilitānia Lahi, fakataha mo Paʻale P. Palati pea mo ʻOasoni Haiti (37).
1847	Foki mei ʻIngilani ki he Nofoʻanga ʻo e Faʻahitaʻu Momokó (Winter Quarters). Taki ha Kāingalotu tokolahi ki ʻIutā, ʻo nau tūʻuta ki ai ʻi ʻOkatopa (38).
1850–51	Ngāue ko ha faifekau ʻi Falanisē. Fai ha lotu ofi ki Pouloni (Boulogne) ʻo fakatapui e fonuá ki hono malangaʻi ʻo e ongoongoleleí. Fokotuʻu pea mo sivi fakaʻosi ʻa e makasini ʻa e Siasi ʻi Falanisē, Étoile du Déseret (Star of Deseret). Tokoni ʻi hono liliu ʻo e Tohi ʻa Molomoná ki he lea fakaFalaniseé. Pulusi ʻa e fuofua makasini ʻa e Siasí ʻi Siamané, ʻa ia ko ha nusipepa fakamāhina ne ui ko e [Fuka ʻo Saioné] Zion’s Panier. Ne fuofua pulusi ʻa e Tohi ʻa Molomoná ʻi he lea faka-Siamané peá ne tokangaʻi ia. Faʻu ʻa e tohi ko e The Government of God (41–42).
1854	Fili ko ha mēmipa falealea ʻo e Vāhenga ʻIutaá (45).
1854–56	Ngāue fakafaifekau ki Niu ʻIoke, ʻo ne tokangaʻi ai ʻa e ngaahi meʻa ʻa e Siasí ʻi he ngaahi siteiti he hahaké. Pulusi e nusipepa ne ui ko e The Mormon (46–48).
1857	Foki ki ʻIutā. Fili ke hoko ko e Sea ʻo e Falealeá ʻi he Falealea Fakavahe ʻo ʻIutaá, ʻa ia ko ha tuʻunga naʻá ne maʻu ʻi ha ngaahi taʻu lahi—ʻo makehe ia mei hono ngaahi fatongia faka-Siasí (49).
1868–70	Hoko ko ha Fakamaau ki he Ngaahi Tohi Tukú (Probate Judge) ʻi he Vahefonua ʻIutaá (59–61).
ʻAho 29 ʻo ʻAokosi 1877	Pekia ʻa Pilikihami ʻIongi. ʻI he taʻu ʻe tolu hono hokó, ne taki ai ʻe Sione Teila ʻa e Siasí ʻo ne hoko ko e Palesiteni ʻo e Kōlomu ʻo e Toko Hongofulu Mā Uá (68–71).
1878	Fokotuʻu ʻo e houalotu Palaimelí (69).
ʻOkatopa 1880	Fokotuʻu ko e Palesiteni ʻo e Siasí, fakataha mo Siaosi Q. Kēnoni pea mo Siosefa F. Sāmita ko hono ongo tokoni (71).
1882	Tali ʻe he Falealea ʻo e ʻIunaiteti Siteití ʻa e Lao ʻEtimoní (Edmunds bill), ke hoko ʻa e mali tokolahí ko ha hia mamafa pea taʻofi mo e kau mali tokolahí mei he kau ʻi he filí, pe maʻu ha tuʻunga fakapuleʻanga, pe kau ʻi ha kau sula (73).
1882	Pulusi ʻo e The Mediation and Atonement (73).
Mē 1884	Fakatapui ʻo e Temipale Lōkani ʻIutaá (75).
1885	Maʻu ha tala ʻi he lolotonga ʻo haʻane ʻaʻahi ki Kalefōnia kuo tuʻutuʻuni ʻe he kau taki fakapuleʻangá ke puke pōpula ia koeʻuhí ko ʻene mali tokolahí. Foki ki Sōleki Siti he ʻaho 27 ʻo Sānualí. ʻI he ʻaho 1 ʻo Fēpuelí, naʻá ne fakahoko ai ʻene malanga fakaʻosí pea ʻi heʻene ʻamanaki ko ha meʻa ʻeni ke fakasiʻisiʻi ai e fakatanga ki he Siasí, naʻá ne pulia leva ʻo toi (76).
ʻAho 25 ʻo Siulai 1887	ʻI hono taʻu 78, naʻá ne mālōlō ai ʻi he ʻapi ʻo Tōmasi Lūsoú (Thomas Roueché) ʻi Keivili ʻi ʻIutā. ʻI he lolotonga ʻo ʻene takí ne aʻu ai ʻa e kāinga-lotu ʻo e Siasí ki he toko 150,000 tupú.