Talateú
Ko e lēsoni kotoa pē ʻi he tohí ni ʻoku konga fā: (1) ko ha kupuʻi lea ʻokú ne fakafeʻiloaki nounou mai ʻa e tefitoʻi meʻa mahuʻinga he lēsoní; (2) “Mei he Moʻui ʻa Sione Teilá,” ʻa ia ʻokú ne fakafōtunga mai ʻa e ngaahi pōpoaki ʻo e lēsoní fakataha mo ha talanoa pe faleʻi meia Palesiteni Teila; (3) “Ngaahi Akonaki ʻa Sione Teilá,” ʻa ia ʻokú ne ʻomai ha ngaahi tokāteline mahuʻinga mei heʻene ngaahi pōpoakí mo ʻene ngaahi malangá; pea mo e (4) “Ngaahi Fokotuʻu Ki he Akó mo Hono Aleaʻí,” ʻa ia ʻoku nau fakaʻaiʻai hono toe fakamanatu fakafoʻituitui mo ha fekumi, toe aleaʻi, pea mo hano fakaʻaongaʻi kinautolu ʻi heʻetau moʻuí ʻi he ʻahó ni ʻo fakafou ʻi ha ngaahi fehuʻi.
Founga Fakaʻaongaʻi ʻo e Tohí Ni
Ki he ako fakafoʻituituí pe fakafāmilí. ʻOku fakataumuʻa ʻa e tohí ni ke mahino lelei ange ai ki he mēmipá ʻa e ngaahi tefitoʻi moʻoni ʻo e ongoongoleleí ne akoʻi ʻe Palesiteni Sione Teilá. ʻE lava ke maʻu ʻe he kāingalotú taki taha ha fakamoʻoni fakafoʻituitui tuʻunga ʻi haʻane lau pea ʻi he faʻa lotu mo fakakaukauʻi lelei ʻa e ngaahi moʻoní ni. Ko ha toe tānaki atu ʻeni ki he laipeli ʻo e ongoongoleleí ʻa e mēmipá pea ʻe hoko ia ko ha maʻuʻanga tokoni mahuʻinga ki he fakahinohino ʻi he fāmilí pea mo e ako ʻoku fakahoko ʻi ʻapí.
Ki he lēsoni ʻi he ngaahi houalotu he Sāpaté. Ko e tohí ni ko e lēsoni ia maʻá e fakataha ʻa e kōlomu ʻo e Lakanga Taulaʻeiki FakaMelekisētekí mo e houalotu ʻa e Fineʻofá ʻi he Sāpaté. Naʻe akoʻi ʻe ʻEletā Tālini H. ʻOakesi ko e ngaahi tohi ko ia ʻi he Ngaahi Akonaki ʻa e Kau Palesiteni ʻo e Siasí “ ʻoku ʻi ai ʻa e tokāteliné mo e ngaahi tefitoʻi moʻoní. ʻOku fonu pea fekauʻaki tonu kinautolu mo e ngaahi fiemaʻu ʻo hotau ʻahó, pea ʻoku lelei ʻaupito ke akoʻi pea mo aleaʻi.” 1 ʻOku totonu ke tokanga taha pē ʻa e kau faiakó ki he kakano ʻo e fakamatalá pea mo e ngaahi potu folofola fekauʻaki mo iá, pea ʻoku totonu foki ke nau fakaʻaongaʻi ʻa e ngaahi akonaki ko ʻení ki he tūkunga ʻoku maheni pe ʻilo ʻe he kalasí.
ʻOku totonu ke fakaʻaongaʻi ʻe he kau faiakó e ngaahi fehuʻi ʻi he fakaʻosinga ʻo e lēsoní ke fakaʻaiʻai ʻaki ʻa e fealēleaʻaki ʻa e kalasí. ʻE lava ʻe hano tomuʻa vakaiʻi ʻo e ngaahi fehuʻí ki muʻa pea toki ako e ngaahi lea ʻa Sione Teilá, ʻo ʻomi ha ʻilo makehe ki heʻene ngaahi akonakí.
ʻOku totonu ke tokanga taha pē ʻa e ngaahi houalotu ʻi he Sāpaté ki he ngaahi tefitoʻi moʻoni ʻo e ongoongoleleí, ki he ngaahi faʻifaʻitakiʻanga fakafoʻituitui ʻokú ne akoʻi ʻa e ngaahi tefitoʻi moʻoní ni, pea mo e ngaahi fakamoʻoni ki he moʻoní. Ko e taimi ʻe fekumi ai ʻa e kau faiakó ʻi he loto fakatōkilalo ke maʻu ʻa e Laumālié ʻi heʻenau teuteu mo tataki ʻa e lēsoní, ʻe fakamālohia leva ʻa e ʻilo ki he moʻoní ʻa e tokotaha kotoa pē ʻe kau aí. ʻOku totonu ke poupouʻi ʻe he kau takí mo e kau faiakó ʻa e kau mēmipa ʻo e kalasí ke nau tomuʻa lau ʻa e ngaahi vahé ki muʻa pea toki ale-aʻi kinautolu ʻi he ngaahi houalotu ʻi he Sāpaté. ʻOku totonu ke nau fakamanatu ki he kau mēmipa ʻo e kalasí ke ʻomi ʻenau ngaahi tohí ki heʻenau ngaahi houalotú pea fakahikihikiʻi e teuteu ʻoku fai ʻe he kau mēmipa ʻo e kalasí ʻaki haʻanau faiako pē mei he ngaahi lea ʻa Palesiteni Sione Teilá. Ko e taimi ʻe tomuʻa lau ai ʻe he kau mēmipa ʻo e kalasí ʻa e vahé, te nau mateuteu ai ke akoʻi kinautolu pea mo felangakihake ʻaki.
ʻOku ʻikai fie maʻu ia pe ʻe poupouʻi ke toe fakatau ʻe he kāingalotú ha ngaahi tohi fakamahino pe fakamatala kehe ke poupouʻi ʻaki ʻa e fakamatala ʻoku ʻi he tohí ni. ʻOku poupouʻi atu pē ʻa e kāingalotú ke nau fakaava pē ʻenau tohí ki he ngaahi potu folofola ʻoku fokotuʻu atú ke nau ʻilo lahi ange ai ki he tokāteliné.
Koeʻuhí ne fokotuʻutuʻu ʻa e fakamatalá ni ki he ako fakafoʻituituí pea mo hoko ko ha fakamoʻoni ki he ongoongoleleí, ʻoku lahi ai ha ngaahi fakamatala ʻi ha ngaahi lēsoni lahi ʻo laka ia ʻi he meʻa ʻe lava ke fakamatalaʻi kakato ʻi he taimi kalasi ʻo e Sāpaté. ʻI heʻene peheé, ʻoku mahuʻinga ai ke fai hano ako ʻi ʻapi e ngaahi akonaki ʻa Palesiteni Teilá ke ʻaonga kakato.
Ngaahi Maʻuʻanga Fakamatala ʻOku Fakaʻaongaʻi ʻi he Tohí ni
Ko e ngaahi akonaki ʻa Palesiteni Teila ʻi he tohí ni, ko ha ngaahi lea hangatonu ia ne toʻo mei ha ngaahi maʻuʻanga fakamatala kehekehe. Ko e ngaahi kupuʻi leá ʻoku kei ngāueʻaki ai pē hono ngaahi muʻaki fakaʻilonga leá, founga sipelá, pea mo hono tohi fakamataʻitohi lahi ʻo e ngaahi maʻuʻanga fakamatala totonú, tuku kehe pē ha ngaahi liliu fakaʻētita ke faingofua ange ai hono laú. ʻI he ʻuhingá ni, ʻe ala fakatokangaʻi ai ʻe he kau lau tohí ha fanga kiʻi faikehekehe siʻisiʻi ʻi he anga hono hikí.
Naʻe fakanofo ʻa Sione Teila ko ha ʻAposetolo he 1838 pea fokotuʻu ia ko e Palesiteni hono tolu ʻo e Siasí ʻi he 1880.