O se Vaaiga Aoao mo Matua ma Taitai

Faamoemoega o le Polokalama o le Alualu i Luma o le Tagata Lava Ia

O le polokalama o le Alualu i Luma o le Tagata Lava Ia o Tamaitai Talavou o se polokalama o le faataunuuga ua mamanuina e fesoasoani ai i tamaitai talavou e:

Faamalolosia a latou molimau ia Iesu Keriso.
Faamalolosia o latou aiga i le taimi nei ma le lumanai.
Saunia ia agavaa e osia ma tausia feagaiga paia o le malumalu.
Saunia mo o latou tiute ma matafaioi o le lumanai.

E galulue faatasi tamaitai talavou ma o latou matua, taitai o Tamaitai Talavou, ma isi tina o loo avea ma faataitaiga lelei ia i latou e faatu ma faataunuu ia sini o loo faaautu i tulaga faatauaina e valu a Tamaitai Talavou. O le polokalama o le Alualu i Luma a le Tagata Lava Ia e mafai ona fesoasoani i matua ma taitai e faaleleia a latou fegalegaleaiga ma tamaitai talavou ao latou galulue faatasi.

Matafaioi a Matua ma Taitai o Tamaitai Talavou

Folasia atu le Polokalama

E feiloai atu taitai o Tamaitai Talavou i tamaitai talavou taitoatasi o e ulufale mai i le polokalama a Tamaitai Talavou faatasi ai ma ona matua. E mafai foi ona faatasi atu i ai ma se tasi o le au peresitene o le vasega a le tamaitai talavou. E tuuina atu e taitai i le tamaitai talavou se tusi o le Alualu i Luma o le Tagata Lava Ia o Tamaitai Talavou, se api o talaaga, ma le asoa o le sulu a Tamaitai Talavou. E faamatala atu e taitai le polokalama i le tamaitai talavou ma faamalosiau atu i matua e galulue ma le la tama teine i le filifilia ma le faatinoina o mea e fai ma galuega faatino i le polokalama o le Alualu i Luma o le Tagata Lava Ia. E tatau foi i taitai ona valaaulia matua i soo se gaoioiga faapitoa lea e auai ai le la tama teine.

Ia Mautinoa E Lava le Lagolagosua

E manaomia e se tamaitai talavou le lagolagosua ma le faamalosiau faifai pea i le faamaeaina o le polokalama o le Alualu i Luma o le Tagata Lava Ia. E mafai ona maua lenei [tulaga manaomia] mai matua, taitai, isi tagata matutua, ma tamaitai talavou matutua ua maea a latou polokalama o le Alualu i Luma a le Tagata Lava Ia. Afai e le lava le lagolagosua a lona aiga e fesoasoani ai ia te ia e faamaea lana polokalama o le Alualu i Luma o le Tagata Lava Ia, e mafai ona valaaulia se isi tamaitai e avea ma fesoasoani ia te ia, pe a fautuaina ai e taitai perisitua. E mafai e lenei tamaitai matua ona faamaonia mea na fai mo tulaga faatauaina ma galuega faatino ma saini le tusi a le tamaitai talavou o le polokalama o le Alualu i Luma a le Tagata Lava Ia pe a maea. E mafai foi ona valaaulia se isi tamaitai talavou ua maea lana polokalama o le Alualu i Luma o le Tagata Lava Ia e tuuina atu se fesoasoani ma se faamalosiauga.

Tusi Faamaumau ma Matau le Alualu i Luma

E tuuina atu pea e matua ma taitai ia avanoa e le aunoa i tamaitai talavou e lipotia ai lo latou alualu i luma. Pe a tuuina soo mai se lipoti a se tamaitai talavou, ua faaalia ai lona mafai ona faia se tulaga e matauina ai ana taumafaiga ma fetufaai mai mea na ia aoaoina ma auala ua faamalosia ai lana molimau. E matauina e matua ma taitai ana taumafaiga, ma mautinoa lona malamalama ma le faaaogaina o mataupu faavae o le talalelei, ma tuuina atu le faamalosiauga e faaauau ai pea lona alualu i luma. O nei fesootaiga o le a fesoasoani i le atiina ae o fegalegaleaiga alofa ma le fetausiai.

O Tiutetauave a Taitai Perisitua

Pe a faamaeaina e se tamaitai talavou le polokalama atoa o le Alualu i Luma o le Tagata Lava Ia, ona faatalanoaina lea o ia e le epikopo, e faaaoga ai ia tulaga faatonuina mai le tusi Mo Le Malosi o le Autalavou e avea o se taiala. Na te faamaonia le auai o le tamaitai talavou i sauniga faamanatuga, auai i le seminare, ma le faitauga o le Tusi a Mamona. E mafai ona avea lenei tulaga ma vaega o lana faatalanoaga i le tausaga po o le ono-masina. E fuafuaina e le epikopo le agavaa o le tamaitai talavou i lona mauaina o le [taui] o le Aloaiaina o le Tulaga Faatamaitai Talavou ma sainia lana tusi o le Alualu i Luma o le Tagata Lava Ia, e talia ai lona faamaeaina o tulaga manaomia. E mafai ona ia tauaaoina atu i le tamaitai talavou [le faailoga] o le Aloaiaina o le Tulaga Faatamaitai Talavou i le sauniga faamanatuga po o se isi sauniga.

E mafai foi ona faailoaina le tulaga faamanuiaina o se tamaitai talavou i le polokalama o le Alualu i Luma o le Tagata Lava Ia pe a ia mauaina lana tusi faamaonia i le Ofagapi, Maea Maite, ma le Lora ao siitia atu o ia i se isi vasega.

E mafai foi ona faaaoga e le au epikopo a latou faatalanoaga ma tamaitai talavou e aloaia ai ma faamalosiau ai i tamaitai talavou taitoatasi e uiga i lo latou alualu i luma. O Pepa Mo Taitai e Siaki ai le Alualu i Luma o Tamaitai Talavou, o loo i le au peresitene o Tamaitai Talavou, e mafai ona fesoasoani i le au epikopo. E tatau i peresitene o siteki ona fesili e le aunoa i epikopo e uiga i tulaga ma le alualu i luma o tamaitai talavou i a latou uarota.

Taiala

O sini ma tulaga e manaomia o le polokalama o loo otooto atu i le pito i luma o lenei tusi. O taiala faaopoopo o loo taua i lalo e mafai ona fesoasoani mo taitai.

O Mea E Fai Mo Tulaga Faatauaina

E mafai ona galue le tamaitai talavou i tulaga faatauaina i soo se faasologa.
E ese mai ai la le [faasologa] mo le tulaga faatauaina o le mama, ua fautuaina tamaitai talavou e faamaea muamua ia mea faatonuina e fai ae lei faia le galuega faatino mo lena tulaga faatauaina.

Galuega Faatino o le Tulaga Faatauaina

O le faamoemoega o galuega faatino o tulaga faatauaina, ina ia fesoasoani ai i tamaitai talavou e faaaoga mea na ia aoaoina mai aafiaga o le tulaga faatauaina.
E tatau i se tamaitai talavou ona faaaluina ia le itiiti ifo ma le sefulu itula mo galuega faatino mo tulaga faatauaina taitasi. O na foi itula e sefulu e le faitaulia ai le sili atu ma le tasi ni galuega faatino o le tulaga faatauaina.
E mafai ona galulue faatasi ia tamaitai talavou i galuega faatino. Peitai, e tatau ona faaaluina e se tamaitai talavou se taimi e le itiiti ifo i le sefulu itula o lona lava taimi pe afai o loo ia faaaogaina lena galuega faatino e faataunuu ai tulaga manaomia mo lana lava polokalama o le Alualu i Luma o le Tagata Lava Ia.
Pe a i ai se faamaoniga muamua mai a matua po o taitai o Tamaitai Talavou, e mafai ona faaaoga ia mea lelei o loo faia e tamaitai talavou i le fale, Lotu, aoga, seminare, ma le nuu e faatumu ai tulaga manaomia o le Alualu i Luma o le Tagata Lava Ia.

Faamaeaina o le polokalama o le Alualu i Luma o le Tagata Lava Ia

Pe a faamaeaina e se tamaitai talavou tulaga o loo manaomia o lana polokalama o le Alualu i Luma o le Tagata Lava Ia, ma e lei aluese atu o ia mai Tamaitai Talavou, e tatau ona valaaulia o ia e fesoasoani i isi tamaitai talavou o loo galulue pea lava i a latou polokalama o le Alualu i Luma. E tatau foi ona fautuaina o ia e galue ia maua sana faailoga o le Pi Faamamaluina pe toe amata foi le polokalama.
Afai ae le’i maea tulaga o loo manaomia o le polokalama o le Alualu i Luma o le Tagata Lava Ia a se tamaitai talavou ae lei aluese atu mai Tamaitai Talavou, e tatau ona faamalosiau atu ia te ia e faaauau pea ona galue ai ina ia maua lona [taui] o le Aloaiaina o le Tulaga Faatamaitai Talavou. E mafai ona valaaulia ia tina, taitai, ma isi tina o loo avea ma faataitaiga lelei i tamaitai talavou e lagolagoina o ia i le faamaeaina [o lana polokalama].

Siakiina ma le Vave

O le Pepa e Faamaumau ai le Alualu i Luma o le Tagata Lava Ia, o loo i le itulau e 77 o le tusi lenei, e tuufaatasia ai galuega a tamaitai talavou taitasi i lana polokalama o le Alualu i Luma o le Tagata Lava Ia.
O Pepa Mo Taitai e Siaki ai le Alualu i Luma o Tamaitai Talavou o loo maua foi kopi o pepa taitasi e fesoasoani ai i taitai e siaki le alualu i luma o tamaitai talavou taitoatasi (36655). E mafai ona faaaoga e fesoasoani ai i taitai o Tamaitai Talavou faapea foi ma taitai perisitua e galulue ai ma aloaia ia tamaitai talavou taitoatasi.
E pule lava le tamaitai talavou pe o le a le vave e galue ai i lana polokalama o le Alualu i Luma o le Tagata Lava Ia: peitai ua fautuaina ia tamaitai talavou e faamaea se mea e fai o le tulaga faatauaina ia le itiiti ifo i le tasi i le masina, ma se galuega faatino e tasi i le ono masina (lua i le tausaga). Afai ae amata galue mai le taimi e ulufale ai i Tamaitai Talavou i lona 12 tausaga ma faaauau ai pea i lenei tulaga fautuaina, o le a maea [lana polokalama] pe a aulia lona 16. Ona totoe lea o le lua tausaga e galue ai ia maua sana faailoga o le Pi Faamamaluina pe toe amataina foi le polokalama e pei ona fautuaina i le itulau e 83.

Aloaiaina o le Tulaga Alualu i Luma o Tagata Taitoatasi

Pe a faamaea e se tamaitai talavou ia mea e fai ma galuega faatino mo tulaga faatauaina taitasi, na te mauaina se asoa (36654) ma se lipine mo ana mau e fesootai ma lena tulaga faatauaina. Na te faapipiiina lana faailoga i le itulau o le Faataunuuga o le polokalama o le Alualu i Luma o le Tagata Lava Ia mo Tulaga Faatauaina i lana tusi (itulau 78). Na te faaaogaina le lipine e avea ma faailoga tusi i ana tusitusiga paia. O lenei tulaga aloaia o lona alualu i luma e mafai ona tauaaoina atu i se sauniga a Tamaitai Talavou.
I tausaga uma, i le polokalama a Tamaitai Talavou i le Tulaga Aupito Sili, o le a aloaia ai tamaitai talavou mo a latou galuega.
E mafai foi ona aloaia se tulaga faamanuiaina a se tamaitai talavou i le polokalama o le Alualu i Luma o le Tagata Lava Ia pe a mauaina sana tusi faamaonia i le Ofagapi, Maea Maite, ma le Lora ao siitia atu o ia i se isi vasega. O nei tusi faamaonia (Ofagapi, 08563; Maea Meite, 08565; Lora, 08564) o le a tauaaoina atu i lalo o le taitaiga a le epikopo. E aloaia ai le siitia atu o tamaitai talavou mai lea vaitausaga i le isi.

Aloaiaina o le Tulaga Faatamaitai Talavou

Pe a faamaea e se tamaitai talavou ana galuega i tulaga faatauaina uma e valu ma ua uma ona faatalanoaina e le epikopo, ona ia mauaina loa lea o le [taui] o le Aloaiaina i le Tulaga Faatamaitai Talavou. O lenei taui e aofia ai ia le tusi faamaonia (36651) ma se asoa e lanu auro po o le lanu siliva (auro, 08602; siliva, 08603). O se tasi o le au epikopo na te tauaaoina atu le [taui] o le Aloaiaina o le Tulaga Faatamaitai Talavou i se sauniga faamanatuga.
A mavae le Aloaiaina o le Tulaga Faatamaitai Talavou, e mafai ona faaauau ai pea se tamaitai talavou i le alualu i luma e ala i le mauaina o se asoa o le Pi Faamamaluina (lanu auro, 08562; lanu siliva, 08578; tagai itulau 83). O lenei tulaga aloaia o lona alualu i luma e mafai ona tauaaoina atu i se sauniga a Tamaitai Talavou.
O taui ma tusi faamaonia e mafai ona maua mai i le faletusi a le Ekalesia e faaaoga ai tupe a le uarota, e aunoa ma se tau e totogia e tamaitai talavou po o o latou matua.

O Tulaga o loo Manaomia o le Polokalama o le Alualu i Luma o le Tagata Lava Ia mo Taitai

O loo fautuaina ia taitai e galulue i le polokalama o le Alualu i Luma o le Tagata Lava Ia faatasi ai ma tamaitai talavou. O i latou o loo latou faatinoa lenei polokalama o le Alualu i Luma o le Tagata Lava Ia e sili atu le malamalama i le polokalama ma latou te faatuina ni faataitaiga lelei mo tamaitai talavou e mulimuli i ai. E mafai ona latou mauaina le [taui] o le Aloaiaina o le Tulaga Faatamaitai Talavou pe a maea ona latou:

Auauna atu o se taitai o Tamaitai Talavou mo se tausaga atoa.
Fai ia maea ia mea e faatonuina e fai mo tulaga faatauaina taitasi e valu.
Fai ia maea ia ni galuega faatino e tolu o se tulaga faatauaina, e aofia ai galuega faatino mo le mama.

O Le Auai o Tina i le Faatinoga

E taliaina ia tina ina ia auai e galulue ma tamaitai talavou i le sailia o lo latou [taui] o le Aloaiaina o le Tulaga Faatamaitai Talavou. E galulue lava tina mai a latou lava tusi o le Alualu i Luma o le Tagata Lava Ia ina ia latou mauaina foi le faailoga o le aloaia faatasi ai ma a latou tama teine. Ua fautuaina ina ia maua muamua le faailoga o le aloaia a le tamaitai talavou pe maua faatasi foi ma lona tina.

E mafai ona faataunuu e tina ia tulaga manaomia tutusa ma a latou fanau teine, e aofia ai le:

Auai i sauniga faamanatuga e le aunoa (pe a mafai).
Ola i tulaga faatonuina o loo taua i le tusi Mo Le Malosi o le Autalavou.
Fai ia maea ia mea e fai ma galuega faatino mo tulaga faatauaina taitasi e valu.
Tusia ma teu sau api o talaaga.
Faitau e le aunoa le Tusi a Mamona.
Tusi ma faamaumau lana molimau i le Faaola o Iesu Keriso.

E pule lava tina i a latou mea ua filifilia e fai ma galuega faatino mo tulaga faatauaina e ese mai i a latou fanau teine. O a latou mea e fai ma galuega faatino e mafai ona sainia ma tuu i ai le aso e a latou tama teine, taitoalua, o se taitai o Tamaitai Talavou, po o se isi tagata matua. E faamaonia e le epikopo pe a maea uma tulaga manaomia. O le tulaga aloaia ma le faatauina o faailoga o le aloaiaina e tatau ona faia faatasi e taitai o Tamaitai Talavou ma le au epikopo.

O Tulaga Manaomia o le Polokalama o le Alualu i Luma o le Tagata Lava Ia mo Isi O Loo Mananao e Galulue i le Polokalama

E mafai ona auai isi tamaitai o loo naunau e faataunuu le polokalama o le Alualu i Luma o le Tagata Lava Ia e ala lea i le faataunuuina o tulaga manaomia tutusa ma tamaitai talavou ma ia fesoasoani atu i se tamaitai talavou i se vaega o lana polokalama o le Alualu i Luma. (Tagai i tulaga o loo manaomia mo tina i le itulau e 92).

Faaaofiaina o le polokalama o le Alualu i Luma o le Tagata Lava Ia i Lesona o le Aso Sa ma i taimi o Mutuale.

O le galulue faatasi i se mea e fai o le polokalama o le Alualu i Luma o le Tagata Lava Ia ma se vaega o le lesona o le Aso Sa, o le a mafai ai ona maua e taitai ma tamaitai talavou se avanoa e talanoa ai i mataupu faavae o loo aoaoina ma le faaaogaina i olaga o tamaitai talavou. O mea e faasino i le Alualu i Luma o le Tagata Lava Ia, e mafai ona maua i mea mo mataupu aoaoina a Tamaitai Talavou.

O gaoioiga o le polokalama o le Alualu i Luma o le Tagata Lava Ia e mafai foi ona avea ma vaega o le Mutuale. Mo se faataitaiga, e mafai ona fesoasoani tamaitai talavou uma lava i se galuega faatino o le tulaga faatauaina a se tasi tamaitai talavou. O le galulue faatasi i se galuega faatino e mafai ai ona fesoasoani e uunaia ia tamaitai talavou e faaauau pea le alualu i luma. O nei gaoioiga faale-vaega e tatau ona fuafuaina ma le agaga tatalo ma le filifilia ina ia mautinoa o loo tumau pea le patino o le polokalama o le Alualu i Luma o le Tagata Lava Ia i tamaitai talavou taitoatasi.

Fetuunai i Manaoga o Tagata Taitoatasi ma le Lotoifale

E mafai ona fetuunai ia mea e fai ma galuega faatino mo tulaga faatauaina e tusa ai ma tulaga patino po o le lotoifale, mea e fiafia ai, ma manaoga e manaomia ai le faamaoniga muamua a matua ma taitai. Pe a faia ni suiga po o ni tulaga e faaesea ai se tagata e toatasi, e tatau i taitai ona mafaufau i tulaga e ono aafia ai isi tamaitai talavou ona o na suiga. Pe a maea ai ona iloiloina ma le toto’a e matua ma taitai, o le a mafai ai loa ona faia ni fetuunaiga ina ia fetaui ma manaoga o tamaitai talavou e le atoatoa le malosi po o le lava o aoaoga, ina ia fetaui ma manaoga faaleaganuu po o tamaitai taitoatasi, po o le faataga foi o tamaitai talavou e le auai i le talalelei ina ia auai [i le polokalama].

Afai ae liliu mai se tamaitai talavou i le Ekalesia pe toe malosi mai i Tamaitai Talavou a ua te’a lona 16 tausaga, o ona tulaga manaomia mo le faamaeaina o le polokalama o le Alualu i Luma o le Tagata Lava Ia o le:

Auai i sauniga faamanatuga e le aunoa (pe a mafai).
Ola i tulaga faatonuina o loo taua i le tusi Mo Le Malosi o le Autalavou.
Fai ia maea ia mea e faatonuina e fai mo tulaga faatauaina taitasi e valu. (Na te le tau faamae’aina ni mea e filifilia e ia lava.)
Fai ia maea se galuega faatino o le tulaga faatauaina, mo tulaga faatauaina taitasi e valu.
Auai atu i le seminare (pe a mafai).
Faitau e le aunoa le Tusi a Mamona.
Tusi ma faamaumau lana molimau i le Faaola o Iesu Keriso.

O nei tulaga manaomia e faatatau foi i tamaitai talavou i isi tulaga e pei ona filifilia e taitai o Tamatai Talavou i le lotoifale.