Ulufale Mai i le Polokalama o le Alualu i Luma o le Tagata Lava Ia

O oe o se afafine faapelepele o le Tama Faalelagi, ua saunia e te sau i le lalolagi i lenei taimi faapitoa mo se faamoemoega paia ma le mamalu. Ua ia te oe se valaauga faatamalii, e te faaaogaina lou malosi ma uunaiga mo le lelei. Ua faamanuiaina oe e lou Tama Faalelagi alofa i taleni ma tomai, na o le a fesoasoani ia te oe e faataunuuina ai lau misiona paia. Ao e aoao e talia ma galue i tulaga faatauaina o Tamaitai Talavou i lou olaga, o le a e faatuina ni amioga masani mo au lava tatalo patino, o le suesue i tusitusiga paia, o le usitai i poloaiga, ma le galue auauna atu i isi. O nei amioga masani patino o le a faamalosia ai lou faatuatua ma molimau ia Iesu Keriso. O nei [amioga masani patino] o le a mafai ai ona e iloa ma atiina ae au meaalofa tulaga ese.

Faaaoga au uunaiga e siitia a’e ai ma faamanuia lou aiga, o isi tamaitai talavou, ma alii talavou o loo outou faifai mea faatasi. Ia e faamamaluina le tulaga faatamaitai, lagolago i le perisitua, ma ia e matua faatauaina le faamaoni o le tulaga faatina faapea foi le tulaga faatama.

Ao e galue i le faatinoina o le polokalama o le Alualu i Luma o le Tagata Lava Ia, ua e auai faatasi ma le faitau afe ma afe o isi tamaitai talavou o loo taumafai e o mai ia Keriso ma “laulaututu e fai ma molimau a le Atua i aso uma, ma mea uma, atoa ma nuu uma” (Mosaea 18:9). Talanoa ma ou matua, ma ia e filifilia ma le agaga tatalo au sini o le a fesoasoani ia te oe e atiina ae ai uiga lelei faatamaitai, faamalosia ai lau molimau, ma e ausia ai tulaga paia e te gafatia. Ia faaaoga ma le atamai ou taimi e te i ai i Tamaitai Talavou, e ala i lou saunia ia maua sauniga paia o le malumalu, ina ia avea ai oe ma se ava ma se tina faamaoni, ma faamalolosia ai lou aiga ma le auaiga.

O Le Au Peresitene Sili