Faatuatua

O le faatuatua e le o le mautinoa lea o mea; o lea, afai ua ia te outou le faatuatua, tou te faamoemoe i mea e le o vaaia, a ua moni ia (Alema 32:21).

O au o se afafine o le Tama Faalelagi, o le e alofa ia te au. Ou te faatuatua i Lana fuafuaga faavavau, lea o loo faaautu ia Iesu Keriso, lo’u Faaola.

O Mea Faatonuina e Fai Mo Le Tulaga Faatauaina

Fai ia uma mea faatonuina [nei e tolu] mo le tulaga faatauaina. Ia saini e se tasi o ou matua po o se taitai ma tusi ai le aso pe a maea ona e faia o mea taitasi.

1. O le muai mataupu faavae o le talalelei o le faatuatua i le Alii o Iesu Keriso. Aoao e uiga i le faatuatua mai tusitusiga paia ma perofeta soifua. Faitau le Eperu 11; Alema 32:17–43; Eteru 12:6–22; ma le Talafaasolopito—Iosefa Samita 2:11–20. Faitau ni lauga se lua o le konafesi aoao, e uiga i le faatuatua. Ia faaaoga lou lava faatuatua, e ala i lou amatalia o se amio masani o le tatalo i lou olaga. Ia amata i le faia o au tatalo e le aunoa i le taeao ma le afiafi. A uma vaiaso e tolu o faia pea lenei faatulagaga, ona talanoaina lea ma se tasi o ou matua po o se taitai pe o a mea ua e aoaoina e uiga i le faatuatua ma pe na faapefea ona faamalosia e au tatalo i aso taitasi lou faatuatua. Ia tusia i lau api o talaaga ou lava lagona e uiga i le faatuatua ma le tatalo.

2. Saili ia maua mataupu faavae o le faatuatua na aoao mai e tina o le autau taulelea a Helamana. Faitau le Alema 56:45–48 ma le 57:21. Toe iloilo pe o le a le mea o loo ta’u mai i le, “O Le Aiga: O Se Folafolaga i le Lalolagi” (tagai i le itulau e 101), e uiga i le matafaioi a le tina. Ia talanoaina faatasi ma se tina, tinamatua, po o se taitai, ia uiga taua e tatau i se tamaitai ona aoao ai fanau, ina ia maua le faatuatua, ma ia faavae a latou faaiuga i upumoni o le talalelei. E mafai faapefea ona fesoasoani ia te oe nei mataupu faavae i lou olaga i le taimi nei, ma e faapefea foi ona fesoasoani e saunia ai oe e avea ma se tamaitai faatuatua, se ava, ma se tina? Ia tusi ou manatu ma lagona i lau api o talaaga.

3. O le ola i mataupu faavae o le talalelei e manaomia ai le faatuatua. Faitau e uiga i le faatuatua i le Guide to the Scriptures [Taiala i Tusitusiga Paia] po o le Faamaoni i le Faatuatua. O le faatuatua i le Faaola o Iesu Keriso e taitaiina atu ai i faatinoga. Filifili se mataupu faavae e pei o le tatalo, sefuluai, anapogi, salamo, po o le faapaiaina o le aso Sapati. I totonu o lou lava aiga po o se isi foi nofoaga, tago e fuafua ma tuuina atu se lesona o se afiafi faaleaiga, e uiga i auala ua fesoasoani ai le faatuatua e te ola ai i lena mataupu faavae o le talalelei. Afai e mafai, ona fai lea i se tagata o le aiga e faamatala mai se mea na tupu ia te ia, na faamalosia ai lona faatuatua. Faamatala foi i ai mea na tutupu ia te oe. Ia tusi i lau api o talaaga se tasi o na aafiaga po o mea na e oo i ai, ma faamatala ou lagona e uiga i le faatuatua.

Nisi Mea e Fai Mo Le Tulaga Faatauaina

Fai ia uma nisi mea [se tolu] mo le tulaga faatauaina. E mafai ona e filifilia mai i mataupu nei pe tusia ni au lava mea e fai ia le silia ma le lua. E tatau ona faamaonia e se tasi o ou matua po o se taitai, mea na e tusi e oe lava ae e te le i amataina. Ia saini e se tasi o ou matua po o se taitai ma tusi ai le aso pe a maea ona e faia o mea taitasi.

4. Aoao atili e uiga i le faamanatuga. Faitau e uiga i le Talisuaga Mulimuli o loo i le Mataio 26:26–28; Mareko 14:22–24; ma le Luka 22:17–20. Ia amatalia se faiga e te manatunatu loloto ai i le taimi o le faamanatuga, e ala lea i lou faalogo lelei i le viiga ma tatalo o le faamanatuga. Mafaufau pe aisea tatou te aai ai i le falaoa ma feinu i le vai. A mavae le tolu vaiaso o e mulimulita’ia lea faiga, ona tusi lea i lau api o talaaga, nisi o folafolaga e te faia pe a e ‘ai ma inu i le faamanatuga, ma manatua ai au feagaiga o le papatisoga ma mea e te faia e tausia ai na folafolaga. Tusi i lau api o talaaga pe faapefea i lou malamalama i nei folafolaga ona faamalosia lou faatuatua i le Faaola.

5. Ia faateleina lou malamalama e uiga i le Togiola a Iesu Keriso i lou faitauina lea o le Isaia 53:3–12; Ioane 3:16–17; Roma 5; 2 Nifae 9:6–7, 21–26; Alema 7:11–13; 34:8–17; ma le Mataupu Faavae ma Feagaiga 19:15–20. Ia tusia i lau api o talaaga ou lagona e uiga i le Faaola ma mea na Ia faia mo oe. Ia faamatalaina ou lagona i se sauniga molimau.

6. Ia faateleina lou malamalama i le ata o le faaolataga. O punaoa e suesue ai e aofia ai le 1 Korinito 15:22; Faaaliga 12:7–9; 2 Nifae 9:1–28; 11:4–7; Mataupu Faavae ma Feagaiga 76:50–113; 93:33–34; Mose 4:1–4; ma le Aperaamo 3:24–27. Tusi pe aumai foi se ata o faaalia ai le ata o le faaolataga, e aofia ai le muai olaga, o le fanau mai, olaga faaletino, oti, faamasinoga, ma le olaga pe a maea le faamasinoga. Ia faaaoga lenei ata, e faamatala ai le ata o le faaolataga i lau vasega, o lou aiga, po o se uo. Talanoaina pe faapefea i lou malamalama i le ata po o le fuafuaga, ona aafia ai mea e te faatinoina, fesoasoani ia te oe ia e malamalama i lou faasinomaga, ma na faamalosia ai lou faatuatua.

7. Ua poloaiina i tatou e le Alii ina ia totogi sefuluai. Faitau le Mataupu Faavae ma Feagaiga 119 ma le Malaki 3:8–12. Talu ai ona o le usitai i le tulafono o le sefuluai, o se faamaoniga lea o lou faatuatua, ia totogi se sefuluai atoa. A mavae le tolu masina, ona tusi lea i lau api o talaaga pe na faapefea ona fesoasoani le totogiina o sefuluai e faatupuina ai lou faatuatua. Tusi se lisi o faamanuiaga i lou olaga, o faamanuiaga laiti ma faamanuiaga tetele, ua e maua ona o lou faatuatua i le mataupu faavae o le sefuluai.

Ia Faatatau Ia Te Oe Lava Ia Mea E Fai Mo Le Tulaga Faatauaina

Galuega Faatino o le Tulaga Faatauaina

A uma ona e faia uma mea e ono e fai mo le tulaga faatauaina o le faatuatua, ona amatalia loa lea o se galuega faatino o le a fesoasoani ia te oe e te faataunuuina ai mea sa e aoaoina. O se taumafaiga taua tele lea e tatau ona alu ai itula e le itiiti ifo i le sefulu e faamaea ai. Ia e saili ma le agaga tatalo mo le taitaiga a le Agaga Paia e te filifilia ai se galuega faatino e tele sona aoga.

Ia faamaonia e se tasi o ou matua po o se taitai le galuega faatino ae e te lei amataina. Ia e tusia foi se iloiloga pe a maea ona e faia. O nisi nei o manatu mo se galuega faatino o se tulaga faatauaina.

• Tauloto le “O Le Keriso Soifua” (tagai i le itulau e 102). A o e faia, ia e manatu i le uunaiga a le Faaola i lou olaga ma pe na faapefea ona faateleina lou faatuatua ia te Ia. Ia faataitai ona mulimuli i le faataitaiga a le Faaola.

• Faitau i le Alema 32:28–43. Mafaufau i le faatuatua o se fatu pe a e fesoasoani e toto, tausia, ma selesele se togalaau aina. Ia tusia i lau api o talaaga pe faapefea ona e fafagaina, tausiaina, ma faamalosia lou faatuatua.

• Alu i se vasega o gafa po o le talafaasolopito o le aiga, i la outou uarota po o le paranesi. Faaputuputu ni tala o tagata o lou aiga po o nisi foi, o e na faia ni faataitaiga o le faatuatua, pe faatalanoaina ni tagata o le tou aiga po o nisi foi ma pue pe faamaumau a latou tala.

• Faamatala ia faamanuiaga o le faatuatua e ala i le tusia o se tala fou, solo, po o se pese, pe tusia ni ata e faamatala ai lou faatuatua ia Iesu Keriso.

O la’u galuega faatino o le:

O la’u fuafuaga e faia ai la’u galuega faatino o le:

Faamaoniga

Aso ua fuafua e faamaea ai

O la’u iloiloga o le galuega faatino e (ia aofia ai ou lagona ma pe ua faateleina faapefea lou malamalama i le faatuatua):

Saini a se tasi o matua po o taitai

Aso

Aofai o itula na faaalu ai