Amio Atua

Ia tofusia outou i le amio atua. … Ia outou matua faamalosi ai lava, ina ia faaopoopoina le amio lelei i lo outou faatuatua; ia faaopoopo foi le poto i le amio lelei; ia faaopoopo foi le le gaoia i le poto; ma ia faaopoopo le onosai i le le gaoia; o le amio Atua foi i le onosai; ia faaopoopo foi le alofa i le au uso i le amio Atua; o le alofa foi i le alofa i le au uso (2 Peteru 1:4–7).

Ua ia te a’u ni uiga taua paia, o le a ou taumafai e atiina ae.

O Mea Faatonuina e Fai Mo Le Tulaga Faatauaina

Fai ia uma mea faatonuina [nei e tolu] mo le tulaga faatauaina. Ia saini e se tasi o ou matua po o se taitai ma tusi ai le aso pe a maea ona e faia o mea taitasi.

1. O a ni uiga taua paia o se afafine o le Atua? Faitau le, “O Le Aiga: O Se Folafolaga i le Lalolagi” (tagai itulau 101); 2 Peteru 1; Alema 7:23–24; ma le Mataupu Faavae ma Feagaiga 121:45. Tusi i ni au lava upu se lisi o uiga taua paia o loo ta’ua i tusi na e faitauina. Mafaufau pe mafai faapefea ona e iloa ma atiina ae nei uiga taua paia taitasi. Tusi ou manatu i lau api o talaaga.

2. I le avea ai ma se tamaitai talavou ua faamanuiaina oe i ni uiga taua paia faatamaitai. Ia faateleina lou malamalama ma lou talisapaia o le tulaga faatamaitai. Faitau le Faataoto 31:10–31 ma ni lauga se lua mai se lomiga o le konafesi i mekasini a le Ekalesia, e uiga i tulaga faatamaitai. Toe faamanatu mea o loo ta’ua mai i le, “O Le Aiga: O Se Folafolaga i le Lalolagi” (tagai itulau 101) e uiga i le avea ai ma se ava ma se tina. Ona e fesili lea i lou tina po o se isi tina e te viia, pe o a uiga taua o le avea ai ma se tina. Ia lisi ia uiga taua i lau api o talaaga. Ona filifili lea o se tasi o na uiga taua ma taumafai e atiina ae. A mavae le lua vaiaso, ona lipoti atu lea o lou tulaga faamanuiaina i se tasi o ou matua po o se taitai.

3. Ia saga faateleina le lelei ma le filemu i lou aiga. Ia faia se taumafaiga faapitoa mo vaiaso e lua e faamalosia ai au sootaga ma se tagata o lou aiga i le faaali atu lea i ai o le alofa e ala i mea e te faia. Ia aloese mai lou faamasino atu, faitio ma le tautala ma le le alofa, ma ia matauina uiga taua lelei o lena tagata o le aiga. Ia tusi ni faaupuga e faamalosiau ai, ia e tatalo mo le tagata lea o lou aiga, saili ni ala e te fesoasoani ai i ai, ma ia e ta’u atu i ai lou alofa. Faamatala mea na e faia ma ni uiga taua na e mauaina i lena tagata o lou aiga po o se tasi o ou matua po o se taitai.

Nisi Mea e Fai Mo Le Tulaga Faatauaina

Fai ia uma nisi mea se tolu mo le tulaga faatauaina. E mafai ona e filifilia mai i mataupu nei pe tusia ni au lava mea e fai e oo atu i le lua. E tatau ona faamaonia e se tasi o ou matua po o se taitai, mea na e tusi e oe lava ae e te le i amataina. Ia saini e se tasi o ou matua po o se taitai ma tusi ai le aso pe a maea ona e faia o mea taitasi.

4. Tauloto tatalo o le faamanatuga o loo i le Mataupu Faavae ma Feagaiga 20:77, 79. I le taimi o le faamanatuga, ia e faalogo lelei i tatalo ma mafaufau pe o le a le uiga o le tauaveina i ou luga o le suafa o Iesu Keriso ma pe tatau faapefea ona aafia mea e te faia ma au faaiuga i lou faia o lenei mea. Ia faatino lou tausia o au feagaiga o le papatisoga. Amata i le faia o se mea i aso taitasi e iloa ma atiina ae atili ai ou uiga taua paia ma ina ia fesoasoani ai ia e manatua le Alii o Iesu Keriso. A maea vaiaso e lua, ona tusia lea i lau api o talaaga ni mea na tutupu ia te oe.

5. O le usitai o se uiga taua o le Faaola. Taumafai ia faateleina lou usitai i ou matua. Faitau le Luka 2:40–51 ma le Ioane 6:38. Ia amatalia se faatulagaga o le usitai a o e faia se taumafaiga faapitoa e faaalia lou faaaloalo ma le agalelei i ou matua ma fai mea e faatonuina ai oe e i laua, e aunoa ma le toe tau faamanatu atu. A maea le lua vaiaso, ona tusia lea i lau api o talaaga, pe na faapefea ona faaosofia oe e faaauau lou usiusitai, ona ua faateleina lou usitai ma na faapefea ona fesoasoani ia te oe e te malamalama ai i lau amio atua ma matafaioi paia o tina ma tama.

6. Ia atiina ae ou uiga taua paia. Faitau le Mataio 5:9; Ioane 15:12; Kalatia 5:22–23; Kolose 3:12–17; 1 Ioane 4:21; ma le Moronae 7:44–48. Tauloto le fuaiupu e sili ona e fiafia i ai mai se tasi o nei mau. Vaai ia iloa uiga taua paia o loo ta’ua mai i nei mau uma ma tusi se lisi i totonu o lau api o talaaga. Ia filifili se uiga taua se tasi, ona e taumafai lea mo le lua vaiaso e avea ai lena uiga taua ma se vaega o lou olaga i aso taitasi. Ia tusia i lau api o talaaga lou tulaga alualu i luma ma mea na e oo i ai.

7. Aoao le faauigaga o le upu faatupu filemu. Ona sue lea ma faitau ni mau se lima o loo aoao mai ai e uiga i le faatupu filemu. Ia avea ma se faataitaiga o sē e faatupu filemu i lou aiga ma le aoga, ao e aloese mai le faitio, tomumu, po o le tautala ma le le alofa i isi. Tatalo i taeao ma afiafi taitasi i le Tama Faalelagi mo se fesoasoani e faia lenei mea. A mavae le lua vaiaso, ona tusia lea i lau api o talaaga pe o a ni amio masani fou e te manao e atiina ae, pe faapefea ona avea lou faatupu filemu ma vaega o lou amio atua, ma pe faapefea ona e faaauau ai pea e avea ma sē faatupu filemu.

Ia Faatatau Ia Te Oe Lava Ia Mea E Fai Mo Le Tulaga Faatauaina

Galuega Faatino o le Tulaga Faatauaina

A uma ona e faia uma mea e ono e fai mo le tulaga faatauaina o le amio atua, ona amatalia loa lea o se galuega faatino o le a fesoasoani ia te oe e te faataunuuina ai mea sa e aoaoina. O se taumafaiga taua tele lea e tatau ona alu ai itula e le itiiti ifo i le sefulu e faamaea ai. Ia e saili ma le agaga tatalo mo le taitaiga a le Agaga Paia e te filifilia ai se galuega faatino e tele sona aoga.

Ia faamaonia e se tasi o ou matua po o se taitai le galuega faatino ae e te lei amataina. Ia e tusia foi se iloiloga pe a maea ona e faia. O nisi nei o manatu mo se galuega faatino o se tulaga faatauaina.

• Atiina ae se tomai e mafai ona e faaaogaina i lou aiga i le lumanai, e pei o le kuka, suisui, lipeaina o se mea, faatulagaina, po o le faia o ni mamanu. Ia e aoao atu lena tomai i se isi tagata, ma faamatala pe faapefea ona avea le faatulagaina tatau o se fale (tagai MFF 109:8) o se tasi o ou tiute paia.

• Mo se vaitaimi faaumiumi, ia e auauna i se tagata o loo manaomia le fesoasoani, e pei o se tina talavou, se tagata e le atoatoa le malosi o le tino po o le mafaufau, po o se tagata matua. Tusi i lau api o talaaga pe na faapefea ona fesoasoani au auaunaga ia te oe e te iloa ai le amio atua o ia te oe lava ia ma i isi.

• Tusi se lisi o uiga paia ma matafaioi a tamaitai o loo aoao mai i le “O Le Aiga: O Se Folafolaga i le Lalolagi” (tagai itulau 101), ma faia se galuega faatino e fesoasoani ai ia te oe e te aoao atili ai i se tasi o na matafaioi.

• Faaaoga se tomai faatusiata po o se galuega taulima na e aoaoina, e fai ai se mea mo lou aiga o i ai nei po o i le lumanai. Ia tusia i lau api o talaaga auala na avea ai le tulaga o le ala o lou mafaufau ma vaega o lau amio atua ma auala na faamanuia ai isi i lou fetufaai atu o ou mafaufauga.

• O le galulue faatasi ma isi o se uiga paia (tagai i le MFF 38:27). Fai se galuega faatino e faateleina ai le lotogatasi o lou aiga lautele, o lau aoga, ma lou nuu. Tusi i lau api o talaaga pe mafai faapefea ona e faia se eseesega pe a outou galulue ma le lotogatasi ma isi.

O la’u galuega faatino o le:

O la’u fuafuaga e faia ai la’u galuega faatino o le:

Faamaoniga

Aso ua fuafua e faamaea ai

O la’u iloiloga o le galuega faatino e (ia aofia ai ou lagona ma pe ua faateleina faapefea lou malamalama i le amio atua):

Saini a se tasi o matua po o taitai

Aso

Aofai o itula na faaalu ai