Mama

O le ava amio lelei, o ai ea se ua maua? e silisili lona tau i penina (Faataoto 31:10).

O le a ou sauniuni e ulu atu i le malumalu ma tumau ai le mama atoatoa ma le agavaa.

O o’u mafaufauga ma faatinoga o le a faavae i luga o tulaga faatauaina e tatau ai.

O Mea Faatonuina e Fai Mo Le Tulaga Faatauaina

Fai ia uma mea faatonuina nei e fa mo le Tulaga Faatauaina. Ia saini e se tasi o ou matua po o se taitai ma tusi ai le aso pe a maea ona e faia o mea taitasi.

1. O le mama o se mamanu o le mafaufau ma le amio e faavae i tulaga faatauaina e tatau ai. E aofia ai i le mama le legavia ma le mama a’ia’i. O le mana e foafoa ai le ola faaletino o se mana faaeaina ua tuuina mai e le Atua i Ana fanau. Ua Ia poloai mai e na o le va lava o se alii ma se tamaitai, ua faaipoipo i la le tulafono ma avea ai o se tane ma se ava, e faaaoga ai lenei mana. Suesue i le uiga ma le taua o le legavia ma le mama e ala i le faitauina o le Iakopo 2:28; “O Le Aiga: O se Folafolaga i le Lalolagi” (tagai itulau 101); ma i le vaega o le mama atoatoa i tulaga feusuai Mo Le Malosi o le Autalavou. Faitau foi le Mataupu Faavae o le Faatuatua e sefulutolu ma le Faataoto 31:10–31. I totonu o lau api o talaaga, tusi ai faamanuiaga ua folafola mai o le mama faalefeusuai ma le mama a’ia’i ma lau tautinoga ia legavia.

2. O le ola mama “i aso uma, ma mea uma, atoa ma nuu uma” e faaagavaaina ai oe mo le mafutaga faifai pea a le Agaga Paia. A papatisoina oe ma faamauina, e tuuina atu ia te oe le meaalofa o le Agaga Paia e taialaina ai itu uma o lou olaga. Talu ai e le nofo le Agaga Paia i nofoaga eleelea, o le ola ai i se olaga mama o se tulaga manaomia muamua lea e maua ai le mafutaga ma le Agaga Paia ma le mauaina o faamanuiaga o sauniga o le malumalu. Faitau ia le faasologa o mau nei ma matau ia faamanuiaga na folafola mai: Ioane 14:26–27; 15:26; 2 Nifae 32:1–5; ma le Mataupu Faavae ma Feagaiga 45:57–59; 88:3–4; 121:45–46. Tusi i lau api o talaaga mea ua e aoaoina, ma tusi e uiga i se taimi na e lagonaina ai le taitaiga a le Agaga Paia.

3. Sauniuni ia agavaa e ulu atu i le malumalu ma auai i le faatinoga o sauniga o le malumalu. Faitau le Alema mataupu e 5. Fai se lisi o fesili o loo fesili ai Alema. Tali fesili mo oe lava, ma fai se lisi o mea e mafai ona e faia ma o le a e faia e saunia ai oe lava ina ia e mama a’ia’i ma agavaa e ulu atu i le malumalu ma maua ai faamanuiaga uma ua folafola mai e lo tatou Tama Faalelagi i Ona afafine faapelepele.

4. Ua mafai ona e salamo, aua e alofa le Faaola ia te oe ma ua Ia ofoina mai Lona soifua mo oe. O le Salamo o se aga o le faatuatua ia Iesu Keriso. Faitau le Moronae 10:32–33, le tusi a Enosa, ma le vaega o le salamo o i le Mo Le Malosi o le Autalavou. O le taulaga togiola a le Faaola ua mafai ai ona faamagaloina au agasala. Faitau ia tatalo o le faamanatuga i le Mataupu Faavae ma Feagaiga 20:77, 79. Fuafua e ‘ai ma inu ma le agavaa i le faamanatuga i vaiaso taitasi ma faatumu lou olaga i gaoioiga mama o le a aumaia ai le mana faaleagaga. A e faia lenei mea, o le a atili malosi ai lou tomai e tetee atu i faaosoosoga, tausi poloaiga, ma avea atili ai e faapei o Iesu Keriso. Fuafua po o le a le mea e mafai ona e faia i aso taitasi ina ia tumau ai lou mama ma le agavaa, ma tusi lau fuafuaga i lau api talaaga.

Galuega Faatino o le Tulaga Faatauaina

E mafai ona e amataina lenei galuega faatino manaomia mo le tulaga faatauaina i soo se taimi.

Sa filifili le Faaola e ola i se olaga mama. Mulimuli i Lana apoapoaiga ia “iloa a’u” (MFF 19:23) e ala lea i le faitauina atoa o le Tusi a Mamona: O Se Tasi Molimau ia Iesu Keriso. Ia faatatau mau i lou olaga ma tulaga. A o e faitauina, tusitusi e le aunoa ou mafaufauga i lau api talaaga. Matau le faataitaiga a le Faaola. O a ni mea na Ia faia faapea ma i latou na mulimuli ia te Ia na iloa ai lo latou ola i ni olaga mama? Ia tusia lau molimau i lau api o talaaga pe a maea lau faitauga.

“Sa ou ta’u atu i le usoga e faapea, o le Tusi a Mamona o le tusi sili lea ona sa’o o soo se tusi o i ai i le lalolagi, ma o le maa auau o lo tatou talitonuga, ma o le a latalata atu ai se tagata i le Atua e ala i le usitaia o ona mataupu, nai lo se isi lava tusi” (Iosefa Samita, i le Faatomuaga i le Tusi a Mamona).

O La’u Molimau i le Tusi a Mamona.

“Pe a maua e outou nei mea, ou te apoapoai atu ia te outou, ia outou ole atu i le Atua, le Tama Faavavau, i le suafa o Iesu Keriso, pe le moni ea nei mea; afai tou te ole atu ai ma le loto faamaoni, ma le manatu tonu i ai, ma le faatuatua ia Keriso, na te faaalia le tonu i ai ia te outou i le mana o le Agaga Paia” (Moronae 10:4).

Saini a se tasi o matua po o taitai

Aso

Aofai o itula na faaalu ai